About Bible Thianghlim | ©

BibleThianghlim – MIPUM SIARNAK

Genesis Exodus Leviticus Numbers Deuteronomy Joshua Judges Ruth 1 Samuel 2 Samuel 1 Kings 2 Kings 1 Chronicles 2 Chronicles Ezra Nehemiah Esther Job Psalm Proverbs Ecclesiastes Song of Solomon Isaiah Jeremiah Lamentations Ezekiel Daniel Hosea Joel Amos Obadiah Jonah Micah Nahum Habakkuk Zephaniah Haggai Zechariah Malachi

Matthew Mark Luke John Acts Romans 1 Corinthians 2 Corinthians Galatians Ephesians Philippians Colossians 1 Thessalonians 2 Thessalonians 1 Timothy 2 Timothy Titus Philemon Hebrews James 1 Peter 2 Peter 1 John 2 John 3 John Jude Revelation

MIPUM SIARNAK

  • A ngantu: Mosi
  • A huap sung cān: B.C. 1445-1406 hrawng
  • Ngan kum: B.C. 1406 hrawng

Semtirnak, Suahlannak le Puithiam Hnaṭuannak cabupawl ah thutiamkampawl, thilmakpawl le Dānpawl tampi an um. Cuih cabupawl cun Israel in Kanaan ram an lak ding le Bawipaih puithiam miphun vekih dĭn an si ding cu an hei cuan. Asinan Mipum Siarnak sungih thuanthupawl hin casiartu bei a dăwngter zet. Beidăwnnak cu Pathian lamah si loin, Israel-mipawl lamah a si. Bawipa in khawruahharzain Izip ihsin a runsuah hai zia le ramṭhing ih a kilkhawi haizia cu Israel-mipawl in an rak hmu. Sinai Tlang parih a lăngter mi a thianhlimnak le a zangfahnak khal an rak hmu. Asinan a thutiamkampawl parih tuahsuak ding cān a thlen tikah, zumlonak in dung an sîp. Curuangah Israel-mipawl cu ramṭhing ih kum 40 sung an vahvaih cān ih thi dingin hrem an si.

Mipum Siarnak bung hmaisa pahra pawl in ruahsannak thu an sim. Mosi in ralkap mipum a siar hai ih, ral doawknak hrang timlamnak ding a tuah. Israel hotupawl in Biakbûk hrangah siang zetin thawhhlawm an pe. Mipi in Suahlannak kha puai thawn cīn ringring nak an tuah. Pathian in in umpi ding ti zumnak thawn Sinai ihsin an păwk.

Asinan zamrang zetin buainak a suak: «mipi an phunzai» (11:1). Cumi cu hi cabu luahkhattu hĕlnak pahra thăwknak a si. A pipabik cu bung 13 le 14 ih thil cang mi kha a si. Thlingthlatu hleihnih pawl in Kanaan ram an va zoh. Annih in ram cu theirah an ṭha zetzet, asinan a cak zetzet mi ral thawn a khat tiah thawng an thăn. Mipi an tha a nau ih, Bawipa in anmah nehnak a pe hai ding ti an zum lo. Pathian in an parah thuṭhennak a phuang: tiamkăm mi ram lut dingah kum 40 sung an hngah tengteng a ṭul. Cuticingin ruahsannak a tāng lai thotho. Bung 15 ah Pathian in dān thar a pe hai ih, cuih dān thar ihsin Israel-mipawl in Kanaan ram an la ding ti a fiang. Bung 22-24 in Pathian in Balaam-ih camsiatnakpawl malsawmnak ih a canter thu in sim. Asinan a tlangpithuin kum 40 sung hi cu helnak le thihnak in a khat. Cumi ah Pathian ruat mi hruaitupawlih hĕlnak a tel. Bung 26 ah thlengawknak kan hmu. Hi tawkah Pathian in san hnihnak pawl timlam a thăwk. Annih in an ralkap mipum an siar lala. Ram tiam thu thawn pehparawin dān tamsin an dâwng. Bung 31 ah Midia-mipawl an neh tikah an tha a tho.

Hih thil cang mi hmuahhmuah ah, zumlonak hi atthlak le siatnak a si thu kan hmu. Asinan Bawipa cu ziangtluk fim le huham i khat hotu a si ti kan hmu sinsin. A hmaisa ah a lamzin theithiam lo khal nungna, a duhdān hlĕnsuak dingin ti theinak in pe dingah amah cu kan rinsan thei a si.

Thuhlawm Ṭhen

  • I. A mipawl khaikhawmnak hmangin hohatu a sinak Pathian in a langter (1:1-10:10)
  • II. Dodaltu nehnak hmangin hohatu a sinak Pathian in a langter (10:11-25:18)
  • III. A liam cia mi thilumdān zirhnak hmangin le hmai lam hrangih a mipawl timlamnak hmangin hohatu a sinak Pathian in a langter (26:1-36:13)

1

Mipum Siar Vei Khatnak

1 Izip ram ihsin an suah hnu a kum hnihnak, thla hnihnakih ni khatnak ah, Sinai Ramṭhing ih Tawnawknak Puanthlam ah Jehovah in Mosi a bia ih hitin a sim, 2 «Israel tefa umkhawm hmuahhmuah cu, an hrin an hrin in, an pupápawlih sungkua sungkua in, an hmin zât vivo in, mipa kip a pâkpâk in, 3 Israel tefapawl lakih ral do thei kum 20 ihsin a tlun lam hmuahhmuah mipum siar aw. Nang le Aaron in ralkappawl cu a bur a bur in nan siar pei. 4 Cule hnám kip ihsin mi pakhat, anmai pupá sungkua lakih lubân pakhat ciar nan hnenah an um pei.

5 «Hipawl hi nan zawngih dingtu dingpawlih hmin an si: Reuben hnám ihsin Shedeur fapa Elizur; 6 Simeon hnám ihsin Zurishaddai fapa Shelumiel; 7 Judah hnám ihsin Amminadab fapa Nahshon; 8 Issakar hnám ihsin Zuar fapa Nethanel; 9 Zebulun hnám ihsin Helon fapa Eliab; 10 Joseph fapapawl ihsin, Efraim hnám ihsin Ammihud fapa Elishama; Manasseh hnám ihsin Pedahzur fapa Gamaliel; 11 Benjamin hnám ihsin Gideoni fapa Abidan; 12 Dân hnám ihsin Ammishaddai fapa Ahiezer; 13 Asher hnám ihsin Okran fapa Pagiel; 14 Gad hnám ihsin Deuel fapa Eliasaf; 15 Naftali hnám ihsin Enan fapa Ahira tla an si,» tiin. 16 Hipawl hi mipi-umkhawm lak ihsin hrilsuah mi, an pupápawlih hnámpawlih hotupawl, Israel a thawngthawng ih lubânpawl an si.

17 Cun hi an hmin tarlăng mipawl hi Mosi le Aaron in an hruai, 18 cule a thla hnihnakih a ni khatnak ah mipi-umkhawm hmuahhmuah an pungkhawmawter; an thlahtupawl an hrin an hrin in, an pupápawlih sungkua sungkua in, an hmin zât vivo in kum 20 ihsin a tlun lam hmuahhmuah cu a pâkpâk in pakhat ciar in an tarlang. 19 Jehovah in Mosi thu a pek vekin, anih in cutivekin Sinai Ramṭhing ah anmahpawl cu mipum a siar hai.

20 Israel fapa upabik Reuben tefapawlih an thlahsâwngpawl, an hrin an hrin in, an pupápawlih sungkua sungkua in, an hmin zât vivo in, mipa kip a pâkpâk in, ral do thei hmuahhmuah, kum 20 ihsin a tlun lam, 21 Reuben hnám mipum an siar mipawl cu 46500 an si.

22 Simeon tefapawl ihsin an thlahsâwngpawl an hrin an hrin in, an pupápawlih sungkua sungkua in, siartelh mipawl, an hmin zât vivo in, mipa kip a pâkpâk in, ral do thei hmuahhmuah kum 20 ihsin a tlun lam, 23 Simeon hnám mipum an siar mipawl cu 59300 an si.

24 Gad tefapawl ihsin an thlahsâwngpawl an hrin an hrin in, an pupápawlih sungkua sungkua in, an hmin zât vivo in, ral do thei hmuahhmuah kum 20 ihsin a tlun lam, 25 Gad hnám mipum an siar mipawl cu 45650 an si.

26 Judah tefapawl ihsin, an thlahsâwngpawl an hrin an hrin in, an pupápawlih sungkua sungkua in, an hmin zât vivo in, ral do thei hmuahhmuah kum 20 ihsin a tlun lam, 27 Judah hnám mipum an siar mipawl cu 74600 an si.

28 Issakar tefapawl ihsin an thlahsâwngpawl an hrin an hrin in, an pupápawlih sungkua sungkua in, an hmin zât vivo in, ral do thei hmuahhmuah kum 20 ihsin a tlun lam, 29 Issakar hnám mipum an siar mipawl cu 54400 an si.

30 Zebulun tefapawl ihsin, an thlahsâwngpawl an hrin an hrin in, an pupápawlih sungkua sungkua in, an hmin zât vivo in, ral do thei hmuahhmuah kum 20 ihsin a tlun lam, 31 Zebulun hnám mipum an siar mipawl cu 57400 an si.

32 Joseph fapapawl sungin, Efraim tefapawl ihsin, an thlahsâwngpawl an hrin an hrin in, an pupápawlih sungkua sungkua in, an hmin zât vivo in, ral do thei hmuahhmuah kum 20 ihsin a tlun lam, 33 Efraim hnám mipum an siar mipawl cu 40500 an si.

34 Manasseh tefapawl ihsin, an thlahsâwngpawlih an hrin an hrin in, an pupápawlih sungkua sungkua in, an hmin zât vivo in, ral do thei hmuahhmuah kum 20 ihsin a tlun lam, 35 Manasseh hnám mipum an siar mipawl cu 32200 an si.

36 Benjamin tefapawl ihsin, an thlahsâwngpawl an hrin an hrin in, an pupápawlih sungkua sungkua in, an hmin zât vivo in, ral do thei hmuahhmuah kum 20 ihsin a tlun lam, 37 Benjamin hnám mipum an siar mipawl cu 35400 an si.

38 Dân tefapawl ihsin, an thlahsâwngpawl an hrin an hrin in, an pupápawlih sungkua sungkua in, an hmin zât vivo in, ral do thei hmuahhmuah kum 20 ihsin a tlun lam, 39 Dân hnám mipum an siar mipawl cu 62700 an si.

40 Asher tefapawl ihsin, an thlahsâwngpawl an hrin an hrin in, an pupápawlih sungkua sungkua in, an hmin zât vivo in, ral do thei hmuahhmuah kum 20 ihsin a tlun lam, 41 Asher hnám mipum an siar mipawl cu 41500 an si.

42 Naftali tefapawl ihsin, an thlahsâwngpawl an hrin an hrin in, an pupápawlih sungkua sungkua in, an hmin zât vivo in, ral do thei hmuahhmuah kum 20 ihsin a tlun lam, 43 Naftali hnám mipum an siar mipawl cu 53400 an si.

44 Hipawl hi Mosi le Aaron in mai pupáih sungkua aiawhtu mi pakhat fingfing, Israel hotu pacang hleihnih pawl thawi an siar mi, mipum siar mipawl an si. 45 Israel tefa mipum an siar mi hmuahhmuah, an pupápawlih sungkua sungkua in, Israel-mi lakih ral do thei hmuahhmuah kum 20 ihsin a tlun lam, 46 mipum an siar mi hmuahhmuah cu ting ruk le thawngthum zanga sawmnga an si.

Levi-mipawl Siartel an Si Lo

47 Asinan Levi-mipawl cu an pupápawlih hnám ah an lakah siartel an si ve lo. 48 Ziangahtile Jehovah in Mosi hnenah, 49 «Levi hnám lawng na siar lo pei, Israel tefapawl lakah annih cu mipum siar ah na siar cih hai fawn lo pei. 50 Asinan Levi-mipawl cu Theihpinak Biakbûk tlun, a thilri hmuahhmuah tlun, a thil neih mi hmuahhmuah tlunah ṭuanvo na pe hai pei, Biakbûk le a thilri hmuahhmuah an thiar pei; an kilkhawi pei ih, Biakbûk kimvelah riahhmun an sâm pei. 51 Cule Biakbûk a pawhsuak zik cān ah Levi-mipawl in an phelh pei ih, Biakbûk tundīn a si tikah Levi-mipawl in an tungding pei. A rak naihtu mi dang cu thah tengteng an si pei. 52 Israel tefapawl in mi kip mai riahhmun khuarnak ciar ah, mi kip anmai thantar kiangah, anmai ralkappawl zulhin an puanthlampawl an zar pei. 53 Asinan Levi-mipawl cun Theihpinak Biakbûk kimvelah riahhmun an sâm pei, cutin Israel tefa umkhawm parah thinlingnak a um lo ding, cule Levi-mipawl in Theihpinak Biakbûk ṭuanvo cu an la ding a si,» tiin a rak sim zo. 54 Cubangtukcun Israel tefapawl cun an rak tuah, Jehovah in Mosi thu a pek mi hmuahhmuah bangtukin an rak tuah.

2

Riahhmun Sāmdān Ding

1 Jehovah in Mosi le Aaron hnenah, 2 «Israel tefa mi kip in anmai thantar kiang, anmai pupá sungkua hminsinnakpawl kiangah riahhmun an sâm pei, Tawnawknak Puanthlam kimvel ihsin hla nawnah riahhmun an sâm ding a si.

Nisuahnak lam Riahhmun

3 «Nisuahnak lam kapah, nisuahnak lam hawiin Judah thawi a kăwpaw mi ralkappawlih thantar cun an ralkappawl zulhin riahhmun an khuar pei. Cule Amminadab fapa Nahshon cu Judah tefapawl hotu a si pei. 4 Cule a ralkap mipum an siar mi cu 74600 a si.

5 «Amah sangih riahhmun sâmtu dingpawl cu Issakar hnám an si pei, cule Zuar fapa Nethanel cu Issakar tefapawl hotu a si pei. 6 Cule a ralkap mipum an siar mi cu 54400 a si.

7 «Cu ṭhehin Zebulun hnám, cule Helon fapa Eliab cu Zebulun tefapawl hotu a si pei. 8 Cule a ralkap mipum an siar mi cu 57400 a si. 9 Judah ralkappawl thawi kăwpaw ih, an ralkappawl zulhih siar mi hmuahhmuah cu ting khat le thawng sawmriat thawngruk le zali an si ih, hipawl hi a păwksuak hmaisabik an si ṭheu pei.

Thlang lam Riahhmun

10 «Thlang lam kapah an ralkappawl zulhin Reuben thawi a kăwpaw mi ralkappawlih thantar a um pei, cule Reuben tefapawlih hotu cu Shedeur-ih fapa Elizur a si pei. 11 Cule a ralkap mipum an siar mi cu 46500 a si.

12 «Amah sangih riahhmun sâmtu dingpawl cu Simeon hnám an si pei ih, Simeon tefapawlih hotu cu Zurishaddai fapa Shelumiel a si pei. 13 Cule a ralkap mipum an siar mi cu 59300 a si.

14 «Cu ṭhehin Gad hnám, Gad tefapawlih hotu cu Reuel fapa Eliasaf a si pei. 15 Cule a ralkap mipum an siar mi cu 45650 a si. 16 Reuben ralkappawl thawi kăwpaw ih, an ralkappawl zulhih siar mi hmuahhmuah cu ting khat le thawng sawmnga le thawngkhat zali sawmnga an si ih, annih cu a pahnihnak ih păwksuaktu an si pei.

17 «Cule Tawnawknak Puanthlam cu ralkappawlih laiah Levi-mipawlih milaipawl thawn a păwksuak ṭheu ding a si. Riahhmun an khuardān dānin, mi kip anmai hmun cio in an thantar zulhin an păwksuak cio pei.

Nitlaknak lam Riahhmun

18 «Nitlaknak lamah, an ralkappawl zulhin, Efraim thawi a kăwpaw mi ralkappawlih thantar a um pei, cule Efraim tefapawlih hotu cu Ammihud fapa Elishama a si pei. 19 Cule a ralkap mipum an siar mi cu 40500 a si.

20 «Amah sangah Manasseh hnám a ra ih, Manasseh tefapawlih hotu cu Pedahzur fapa Gamaliel a si pei. 21 Cule a ralkap mipum an siar mi cu 32200 a si.

22 «Cu ṭhehin Benjamin hnám, cule Benjamin tefapawlih hotu cu Gideoni fapa Abidan a si pei. 23 Cule a ralkap mipum an siar mi cu 35400 a si. 24 Efraim ralkappawl thawi kăwpaw ih, an ralkappawl zulhih siar mi hmuahhmuah cu ting khat le thawngriat le zakhat an si ih, annih cu a pathumnak ih păwksuaktu an si pei.

Sak lam Riahhmun

25 «Sak lam kapah an ralkappawl zulhin Dān thawi a kăwpaw mi ralkappawlih thantar a um pei, cule Dân tefapawlih hotu cu Ammishaddai fapa Ahiezer a si pei. 26 Cule a ralkap mipum an siar mi cu 62700 a si.

27 «Amah sangih riahhmun sâmtu dingpawl cu Asher hnám an si pei ih, Asher tefapawlih hotu cu Okran fapa Pagiel a si pei. 28 Cule a ralkap mipum an siar mi cu 41500 a si.

29 «Cu ṭhehin Naftali hnám, cule Naftali tefapawlih hotu cu Enan fapa Ahira a si pei. 30 Cule a ralkap mipum an siar mi cu 53400 a si. 31 Dân ralkappawl thawi kăwpaw ih, an ralkappawl zulhih siar mi hmuahhmuah cu ting khat le thawng sawmnga thawng sarih le zaruk an si ih, an thantar zulhin an păwksuak cio pei,» tiin a sim.

32 Hipawl hi an pupápawlih sungkua sungkua ih mipum an siar mi Israel tefapawl an si. An ralkappawl zulhih siar mi ralkap hmuahhmuah cu ting ruk le thawngthum le zanga sawmnga an si. 33 Asinan Jehovah in Mosi thu a pek vekin Levi-mipawl cu Israel tefapawl lakah siartel an si lo.

34 Cule Israel tefapawl cun Jehovah in Mosi thu a pek mi hmuahhmuah bangtukin an tuah ṭheh. Cutivekin anmai thantar zulhin riahhmun an sâm, cule cutivekin mi kip mai hrin mai hrin in, an pupápawlih sungkua zulhin an păwksuak ṭheu.

3

Hriak Thih Puithiampawl

1 Hipawl hi Jehovah in Sinai Tlang ah Mosi a biak laiih Aaron le Mosi ih an ngankhum mipawl an si. 2 Cule hipawl hi Aaron fapapawlih hmin an si, a fatir Nadab le Abihu, Eleazar le Ithamar tla an si. 3 Hipawl hi puithiam si dingih hriak thih, puithiam dinhmun ih rawngbawl dingin Mosi ih serhhran mi Aaron fapapawlih hmin cu an si. 4 Sinai Ramṭhing ah Jehovah hmaiih meisa danglam an hlăn laiah Nadab le Abihu cu Jehovah hmaika-ah an thi. Cule annih cun tefa an nei lo. Cutin Eleazar le Ithamar in an pa Aaron hmaika-ah puithiam dinhmun in rawng an rak bâwl.

5 Jehovah in Mosi hnenah, 6 «Puithiam Aaron an rĕn theinak dingah Levi hnám kha nâi ah rak hruai hai awla, a hmaika-ah rak suahpi hai aw. 7 Cule Biakbûk hnaṭuannak ding, amai ṭul mipawl le Tawnawknak Puanthlam hmaiih mipi-umkhawm zateih ṭul mipawl an tawlrel pei. 8 Biakbûk hna ṭuan dingah, Tawnawknak Puanthlam thilri hmuahhmuah le Israel tefapawlih ṭul mipawl khal an tawlrel pei. 9 Cule Levi-mipawl cu Aaron le a fapapawl na pe hai pei. Annih cu Israel tefapawl lak ihta amah pek ṭheh an si. 10 Cutin Aaron le a fapapawl cu na ruat hai pei ih, annih in an puithiam hna an hlĕnsuak pei. Asinan a rak naihtu mi dang cu thah a si pei,» tiin a sim.

11 Cun Jehovah in Mosi hnenah, 12 «Ngai hnik, Israel tefapawl lak ihsin Levi-mipawl cu Israel tefapawl lakih sūl kēutu fatir tinkim aiah keimah rori in ka la hai zo. Curuangah Levi-mipawl cu keimai ta an si pei. 13 Ziangruangahtile fatir hmuahhmuah cu keimai ta an si. Izip ram ih fatir hmuahhmuah ka thah ṭheh ni ah, Israel-mipawl lakih fatir hmuahhmuah cu milai le rannung an pahnih in ka hrangah ka rak serhhran a si. Annih cu keimai ta an si pei. Keimah cu Jehovah ka si,» tiin a sim.

Levi-mipawl Mipum Siarnak

14 Sinai Ramṭhing ah Jehovah in Mosi hnenah, 15 «Levi tefapawl cu an pupápawlih sungkua sungkua in, an hrin an hrin in an mipum siar aw, thla khat ihsin a tlun lam mipa kip in na siar pei,» tiin a sim. 16 Cutin thu a pek vekin Mosi in, Jehovah kamsuakthu bangtukin an mipum a siar hai.

17 Himi Gershon, Kohath le Merari pawl hi Levi fapapawlih hmin an si. 18 Cule an hrin an hrin in Gershon fapapawlih hmin cu: Libni le Shimei an si. 19 Cule an hrin an hrin in Kohath fapapawl cu Amram, Izehar, Hebron le Uzziel an si. 20 Cule an hrin an hrin in Merari fapapawl cu Mahli le Mushi an si. Hipawl cu an pupápawlih sungkua sungkua in Levi-mipawlih hrinpawl an si.

Gershon-mipawl Mipum Siarnak

21 Gershon ihsin Libni-mipawlih hrin le Shimei-mipawl hrin an rung sêm, hipawl cu Gershon-mipawlih hrinpawl an si. 22 Mipum an siar mi mipa thla khat ihsin a tlun lam hmuahhmuah, an mipum siar mi cu 7500 an si.

23 Gershon-mipawlih hrinpawl cu Biakbûk dung lam nitlaknak lam kapah riahhmun an sâm. 24 Cule Gershon-mipawlih pupá sungkua hotu cu Lael fapa Eliasaf a si.

Gershon-mipawlih Rawngbawlnak

25 Tawnawknak Puanthlam ih Gershon tefapawlih ṭuanvo cu Biakbûk, puanthlam le a khuh, Tawnawknak Puanthlam luhnak puanzar, 26 tualrawn puanzarpawl, Biakbûk le Biakṭheng kimvelih tualrawn luhnak puanzar le an hripawl, tiin anmah thawi a pehtlaiaw mi hna hmuahhmuah vekin a si.

Kohath-mipawl Mipum Siarnak

27 Kohath ihsin Amram-mipawl hrin, Izhar-mipawl hrin, Hebron-mipawl hrin le Uzziel-mipawl hrin tla an ra sêm; hipawl cu Kohath-mipawlih hrin an si. 28 Mipa thla khat ihsin a tlun lam hmuahhmuah mipum an siarnak vekin, hmun thianghlim ṭuanvo latu ding cu 8600 an si. 29 Kohath tefapawlih hrinpawl cu Biakbûk thlang lam kapah riahhmun sâm ding an si. 30 Cule Kohath-mipawlih hrinpawlih pupápawl sungkua hotu cu Uzziel fapa Elizafan a si.

Kohath-mipawlih Rawngbawlnak

31 Annihpawlih ṭuanvo cu Kuang, Cabuai, Meitoṭhuam, Biakṭhengpawl, rawngbawlnak ih an hman mi hmun thianghlim bungbelpawl, puanzar le anmah thawi a pehtlaiaw mi hna hmuahhmuah a si. 32 Cule Levi-mipawlih hotupawl uktu cu puithiam Aaron fapa Eleazar a si ih, anih in hmun thianghlim ṭuanvo latupawl a hoha ding.

Merari-mipawl Mipum Siarnak

33 Merari ihsin Mahli-mipawl hrin le Mushi-mipawl hrin an sêm; hipawl cu Merari-ih hrinpawl an si. 34 Cule mipa thla khat ihsin a tlun lam hmuahhmuah an siarnak vekin, mipum an siar mi cu 6200 an si. 35 Merari hrinpawlih pupápawl sungkua hotu cu Abihail fapa Zuriel a si. Hipawl cu Biakbûk sak lam kapih riahhmun sâmtu dingpawl an si.

Merari-mipawlih Rawngbawlnak

36 Cule Merari tefapawlih ṭuanvo an thiah mi cu Biakbûk phartleppawl, a tlângpawl, a ṭhuampawl, a tawkhuarpawl, a bungruapawl tiin anmah thawi a pehtlaiaw mi hna hmuahhmuah le 37 tualrawn kimvel ṭhuampawl, an tawkhuarpawl, an hrenhngehnakpawl le an hripawl tla an si.

38 Cuihtlunah Tawnawknak Puanthlam hmai nisuahnak lam ni hawihin Biakbûk hmaiih riahhmun sâmtu ding cu, Israel tefapawlih ṭul mi tawlreltu, hmun thianghlim ṭuanvo latu, Mosi le Aaron le a fapapawl an si pei. Asinan a rak naihtu mi dang cu thah a si pei. 39 Jehovah thupek in Mosi le Aaron in Levi-mipawl mipum an siar mi hmuahhmuah cu an hrin an hrin in, mipa thla khat ihsin a tlun lam hmuahhmuah 22000 an si.

Fatir Mipum Siarnak

40 Jehovah in Mosi hnenah, «Israel tefa mipa fatirpawl, thla khat ihsin a tlun lam hmuahhmuah mipum siar awla, an hmin ngan aw. 41 Cule Israel tefapawl lakih fatir hmuahhmuah aiah Levi-mipawl le Israel-mipawlih ṭilva fatir hmuahhmuah aiah Levi-mipawlih ṭilva ka hrangah na la pei. Keimah cu Jehovah ka si,» tiin a sim. 42 Cule Jehovah in thu a pek vekin, Israel tefapawl lakih fatir hmuahhmuah cu Mosi in mipum a siar ṭheh. 43 Cule mipa fatir hmuahhmuah, thla khat ihsin a tlun lam hminpawl mipum an siarnak vekih an siar mipawl cu 22273 an si.

Fatir Tlennak

44 Cun Jehovah in Mosi hnenah, 45 «Israel tefapawl lakih fatir hmuahhmuah aiah Levi-mipawl le an ṭilva aiah Levi-mipawlih ṭilva la aw. Levi-mipawl cu keimai ta an si pei. Keimah cu Jehovah ka si. 46 Cule Levi-mipawlih mipum hnakih an tamdeuhnak, Israel tefapawlih fatir 273 tlennak ah, 47 mi pakhat hrangah shekel paisa panga ciar na la pei, hmun thianghlim shekel paisa na hmang pei, shekel paisa pakhat cu agerah 20 a si. 48 Cule mipum hlei mi tlennak ah cuih paisa cu Aaron le a fapapawl na pe pei,» tiah a sim.

3:47a gerah: Bible ih thil tahnak phunphun zoh aw.

49 Cule Levi-mipawl ih tlen mipawl tlunih mi hleipawl hnen ihsin Mosi in tlennak paisa a lâk. 50 Israel tefa fatirpawl hnen ihsin hmun thianghlim shekel bangtukin shekel 1365 paisa a la. 51 Cule Jehovah in Mosi thu a rak pek mi, Jehovah kamsuakthu bangtukin, an tlenawknak paisa cu Mosi in Aaron le a fapapawl a pe.

4

Kohath Fapapawlih Ṭuanvo

1 Jehovah in Mosi le Aaron hnenah, 2 «Levi fapapawl lak ihsin Kohath fapapawl cu an hrin an hrin in, an pupápawlih sungkua sungkua in, 3 kum 30 ihsin a tlun lam, kum 50 tiang, Tawnawknak Puanthlam sungih hna ṭuan dingah rawngbawlnak ih lut hmuahhmuah mipum siar aw.

4 «Himi hi a thianghlimbik mi thilpawl thawi pehparawin Tawnawknak Puanthlam sungih Kohath fapapawlih rawngbawlnak cu a si. 5 Riahhmun ṭhawn dingih an timtuah tikah, Aaron le a fapapawl an ra pei ih, tlun khuh puanzar an phelh pei, cule cumi in Theihpinak Kuang an khuh pei. 6 Cun cumi cu ṭhakhas phawpawl ih tuah mi khuhpuan an khuh pei, cule mepian puan hlir in an tuam pei ih, a zawnfungpawl an hrawlh pei.

7 «Sangserh Cabuai parah mepian puan an phah pei, cule cumi parah khēngpawl, haidaupawl, Inding Thilhlăn hrang khengkûmpawl le thâwlpawl an ret pei. Cule Sangserh cu cumi parah a um ringring ding a si. 8 Cupawl cu puan senlar in an khuh pei ih, ṭhakhas phawpawl ih tuah mi khuhnak in an tuambĕt pei. Cule a zawnfungpawl an hrawlh pei. 9 Cule mepian puan an la pei ih, meitleu hrang Meitoṭhuam cu cumi hrangih an hman mi a meitopawl, a caicehpawl, a suahdurpawl le hriak khēng hmuahhmuah thawn an khuh pei, cule cupawl cun meitoṭhuam cu hna an ṭuanter. 10 Cun cumi cu a bungbel hmuahhmuah thawn ṭhakhas phawpawl ih tuah mi khuhnak sungah an thun pei ih, a zawnfung an hrawlh pei.

11 «Mepian puan in Sui Biakṭheng tlun cu an phah pei ih, ṭhakhas phawpawl ih tuah mi khuhnak in an tuam pei. Cule a zawnfungpawl an hrawlh pei. 12 Cun hmun thianghlim ih an rawngbawlnak, rawngbawlnak bungbel hmuahhmuah an la pei ih, mepian puan sungah an thun ṭheh pei, cule ṭhakhas phawpawl ih tuah mi khuhnak in an tuam ṭheh pei. Cule zawnfung parah an ret pei. 13 Biakṭheng ihsin vutcâm an lawkfai pei ih, puan sendup an phah pei. 14 Cutawk ih an rawngbawlnak hmanrua hmuahhmuah, meiling suahdurpawl, salaknak hmanruapawl, vutruhnakpawl, cawhtawlhpawl le Biakṭheng bungbel hmuahhmuah a parah an ret pei, cule ṭhakhas phawpawl ih tuah mi khuhpuan kha an parah an pharh pei. Cule a zawnfungpawl an hrawlh pei. 15 Cule Aaron le a fapapawl in hmun thianghlim le hmun thianghlim thilri hmuahhmuah an khuh ṭheh tikih riahhmun an ṭhawn zik tikah, Kohath fapapawl an ra pei ih an thiar pei. Asinan an thih pang lonak dingah thil thianghlim pakhat hman an thâm lo pei. Hipawl cu Kohath fapapawl ih thiar ding mi Tawnawknak Puanthlam thilripawl an si.

16 «Puithiam Aaron fapa Eleazar ṭuanvo an thiah mi cu meitleu hrang hriak, rimhmui thaw, ni tin Thlairawl Thilhlăn, hnih mi hriak, Biakbûk pumhlum kilkhawi, a sung thil hmuahhmuah, hmun thianghlim le a thilripawl tla an si,» tiin a sim hai.

17 Cun Jehovah in Mosi le Aaron hnenah, 18 «Levi-mipawl lakih Kohath thlah hrinpawlih hnám hi hlohralter siang hlah uh. 19 Thil thianghlimbikpawl an va naih tikih thi loih an nunnak dingah, an hrangah hihi tuahsak sawn uh. Aaron le a fapapawl cu an lut pei ih, an rawngbawl ding le an thil phurh ding an thiahaw fingfing pei. 20 Asinan Kohath hrinpawl cu an thih pang lonak dingah thil thianghlimpawl khuh an si laifangah zoh dingin an lut lo pei,» tiin a sim hai.

Gershon Fapapawlih Ṭuanvo

21 Jehovah in Mosi hnenah, 22 «Gershon fapapawl khal an pupápawlih sungkua sungkua in, an hrin an hrin in mipum siar hai aw. 23 Tawnawknak Puanthlam sungih hna ṭuan dingah, rawngbawlnak ih luttu ding hmuahhmuah kum 30 ihsin a tlun lam kum 50 tiangin mipum na siar pei. 24 Gershon-mipawlih hrinpawl rawngbawlhna cu himi ṭuan le thil phurh hi a si. 25 Annih cun Biakbûk puanzarpawl le Tawnawknak Puanthlam le a khuhnakpawl, a parih ṭhakhas phawpawl ih tuah mi khuhnak, Tawnawknak Puanthlam luhnak puanzar, 26 tualrawn puanzarpawl, Biakbûk le Biakṭheng kimvelih tualrawn luhnak puanzar le an hripawl, an rawngbawlnak bungrua hmuahhmuah le himi thilpawl hrangih an tuah mi hmuahhmuah an thiar pei, cutivekcun rawng an bawl ding a si.

27 «Gershon-mipawlih fapapawlih rawngbawlnak hmuahhmuah, an ṭuanvo hmuahhmuah le an rawngbawlnak hmuahhmuah cu Aaron le a fapapawl in an thiah pei. Cule an thil phurh mi hmuahhmuah cu an ṭuanvo ah anmah nan ruat pei. 28 Himi cu Tawnawknak Puanthlam sungih Gershon fapapawlih hrinpawlih rawngbawlhna a si. Cule an ṭuanvo cu puithiam Aaron-ih fapa Ithamar thu hnuaiah a si pei.

Merari Fapapawlih Ṭuanvo

29 «Merari fapapawl cu an hrin an hrin in, an pupápawlih sungkua sungkua in, mipum na siar hai pei. 30 Kum 30 ihsin a tlun lam kum 50 tiangin, Tawnawknak Puanthlam hna ṭuan dingin rawngbawlnak ih a lut mi kip cu an zaten mipum na siar ṭheh pei. 31 Cule himi hi Tawnawknak Puanthlam hrangih an rawngbawlnak zate vekin an thiar ding mi a si: cupawl cu Biakbûk phartleppawl, a tlângpawl, a ṭhuampawl, a tawkhuarpawl, 32 le tualrawn kimvel ṭhuampawl le a tawkhuarpawl, a hrenhngehnakpawl le a hripawl, an bungrua hmuahhmuah thawn le an rawngbawlnak thil hmuahhmuah tla an si. Cule nang in an thiar ding mi vo kha an hmin an hmin in an ṭuanvo na thiah fingfing pei.

33 «Himi cu Merari fapapawlih hrinpawlih rawngbawlhna a si, puithiam Aaron-ih fapa Ithamar thu hnuaiah Tawnawknak Puanthlam hrangih an rawngbawlhna hmuahhmuah cu a si,» tiin a sim.

Levi-mipawl Mipum Siarnak

34 Mosi, Aaron le mipi-umkhawm hotupawl in Kohath-mipawlih fapapawl cu an hrin an hrin in, an pupápawlih sungkua sungkua in, 35 kum 30 ihsin a tlun lam kum 50 tiangin Tawnawknak Puanthlam sungih hna hrangih rawngbawlnak ih a lut ding mi kip in mipum an siar ṭheh. 36 Cule an hrin an hrin ih mipum an siar mi cu 2750 an si. 37 Mosi le Aaron in Jehovah in Mosi hmangih thu a pek bangtukin Kohath-mipawlih hrinpawl mipum an siar. Cupawl cu Tawnawknak Puanthlam sungih rawngbawl ding an si.

38 Cule Gershon fapapawl cu an hrin an hrin in le an pupápawlih sungkua sungkua in mipum an siar. 39 Kum 30 ihsin a tlun lam kum 50 tiangin, Tawnawknak Puanthlam sungih rawngbawl dingih a lut ding mi kip in, 40 an hrin an hrin le an pupápawlih sungkua sungkua ih an siar mi mipum cu 2630 an si. 41 Mosi le Aaron in Jehovah in Mosi hmangih thu a pek bangtukin Gershon fapapawlih hrinpawl mipum an siar. Cupawl cu Tawnawknak Puanthlam sungih rawngbawltu ding an si.

42 Merari fapapawlih hrinpawl, an hrin an hrin le an pupápawlih sungkua sungkua in mipum an siar. 43 Kum 30 ihsin a tlun lam kum 50 tiangin, Tawnawknak Puanthlam sungih hna hrangih rawngbawlnak ih a luttu ding kip in, 44 an hrin an hrin in mipum an siar mi cu 3200 an si. 45 Hipawl hi Mosi le Aaron in Jehovah in Mosi hmangih thu a pek bangtukih Merari fapapawlih hrinpawl mipum an siar mi an si.

46 Mosi, Aaron le Israel hotupawl in mipum an siar mi, Levi-mipawl an siar mi hmuahhmuah cu, an hrin an hrin in le an pupápawlih sungkua sungkua in, 47 kum 30 ihsin a tlun lam kum 50 tiangin, Tawnawknak Puanthlam sungah rawngbawlhna ṭuansuak ding le phurh thiar hna ṭuan dingih a ratu kip in, 48 mipum an siar mipawl cu 8580 an si. 49 Jehovah thupek bangtukin Mosi hmangin annih cu anmai rawngbawlhna vek cio in le anmai phurh thiar hna ciar bangtukin ṭuanvo an thiah. Jehovah in Mosi thu a pek vekin annihpawl cu mipum a siar.

5

Mithiang Lo Pawl

1 Jehovah in Mosi hnenah, 2 «Miphar pauhpauh, thilput nei mi pauhpauh le zokhal mithi ruak ruangih a bawrhbangawtertu cu riahhmun khuarnak ihsin suah dingin Israel tefapawl hnenah thu pe aw. 3 Mipa siseh, nunau siseh nan suah ding a si, ka cēnnak an riahhmun khuarnak laifang kha an bawrhbanterlonak dingah annih cu riahhmun khuarnak lengah nan suah pei,» tiin a sim. 4 Cule cutivekin Israel tefapawl in an tuah, cule riahhmun khuarnak lengah an suahter hai. Mosi hnenih Jehovah in a sim vekin Israel tefapawl cun an tuah.

Rulhsalnak

5 Jehovah in Mosi hnenah, 6 «Israel tefapawl hnenah, ‹Mipa in simaw, nunau in simaw, milaipawl in sual an tuah ṭheu mi sual pakhat khat tuahin Jehovah lakah a rinum lo tikah, cuih milai cu a mawh a si. 7 Cun a rak tuah mi sual cu a phuang pei. A mawh man cawhkuan cu kimten a pe pei, ṭhen nga ṭhen khat a bêt pei ih, a tisualnakpa hnenah a pe pei. 8 Asinan mawh man cawhkuan a pek ding mi cu dawngtu ding sungkhat mipa an um lo a si ahcun, mawh man cawhkuan cu puithiam ta dingah Jehovah hnenah a feh pei, amai hrangih sualkhuhthawinak, sualkhuhthawinak tuucang zawngah a pe pei. 9 Israel tefapawlih thil thianghlim thawhhlawm tinkim, puithiam hnenih an rak ken mi cu amai ta an si ṭheh pei. 10 Cule mi kip ih thil thianghlimpawl cu amai ta an si ṭheh pei, mi in puithiam a pek mi pauhpauh cu amai ta an si pei,› tiin sim hai aw,» tiah a ti.

Nupi Rinum Lo Thuhla

11 Jehovah in Mosi hnenah, 12 «Israel tefapawl hnenah sim awla an hnenah, ‹Mi pakhat ih nupi cu a fehpêng ih a parah rinum loin a um ih, 13 mi pakhat in amahnu a rak ihpi, cule cumi cu a pasal mit ihsin thuh a si ih, a bawrhbangawter ti khuhhlo a rak si, cule a hmutu an um lo ih, kaihngah khal a si fawn lo asile, 14 amahpaih thinlung ah thîksiatnak a ra tlŭn ih a bawrhbangtu nu, a nupi parih a thîk a sia a si ahcun, asilole amahnu cu bawrhbang si loin, amahpaih thinlung ah thîksiatnak a ra tlung ih a nupi parah a thîk a sia asile, 15 cu pa cun a nupi cu puithiam hnenah a rak hruai pei. Amahnu hrangih phût mi thilhlăn, barli sangvut phŭt efa khat ih ṭhen hra ṭhen khat a rak keng pei, a parah hriak a tawih lo pei ih, frankinsense a thuh lo pei, ziangruangahtile cumi cu thîknak Thlairawl Thilhlăn, mantersalnak ding hrang thilhlăn a si, ziangahtile mawhsualnak manternak dingah a si.

16 ‹Cule puithiam in cu nu cu nâite ah a hruai pei ih Jehovah hmaika-ah a suahpi pei. 17 Puithiam in leibel sungah tidai thianghlim a thun pei ih, Biakbûk zial parih leivut ziangmaw zât a la pei, cule tidai sungah a phulh pei. 18 Cun puithiam in cu nu cu Jehovah hmaiah a dingter pei ih cu nuih lukhuh cu a hlihsak pei, cule thîksiatnak Thlairawl Thilhlăn a si mi mantersalnak thilhlăn cu a kut ah a kengter pei. Cule puithiam in camsiatnak thlentu tidai khâ cu a kut ah a keng pei. 19 Cule puithiam in amahnu cu sia a sămter pei, cule nunaunuih hnenah, «Na hnenah zohman an it lo ih, na pasal ṭāng ihsin thianlonak ih na rak fehpêng lo asile, camsiatnak thlentu tidai khâ ihsin na luat a si. 20 Asinan na pasal ṭāng hnuaiin na rak fehpêng ih, na rak bawrhbangawter ih na pasal si lo, mi dang in an rak lo ihpi asile,» a ti hnuah, 21 puithiam in cu nu cu camsiatnak thukam hnuaiah a ret pei ih, anih in nunaunuih hnenah, «Jehovah in na mipawl lakah camsiat le thukam ah a lo tuah, Jehovah in na cāwnpi lo siatrálter sehla na pum lo thlingter seh. 22 Cule hi tidai in na pumpi camsiatnak thlĕn seh, cule na pum thlingter sehla na cāwnpi siatrálter seh,» a ti pei. Cun nunaunu in, «Amen, cuvekcun cang ko seh,» tiah a ti pei.

23 ‹Cun puithiam in hi camsiatnakpawl hi cazual pakhat ah a ngan pei ih tidai khâ sungah a thaithla pei. 24 Cule nunaunu cu siatcamnak thlentu tidai khâ a inter pei, cule camsiatnak thlentu tidai cu amahnu sungah khâter dingin a lut ding a si. 25 Cun puithiam in nunaunuih kut ihsin thîksiatnak Thlairawl Thilhlăn a la pei ih Jehovah hmaiah thilhlăn cu a sēp pei, cule Biakṭheng ah a rak keng pei. 26 Cule puithiam in a zate aiah ṭhuam khat a la pei ih, Biakṭheng parah cumi cu a ur pei, cuṭhehin nunaunu cu tidai a inter pei. 27 Anih in cu nu tidai a inter ṭhehin hitin a si pei, cu nu cu rak bawrhbangawterin a pasal lakah a rak rinum lo asile, camsiatnak thlentu tidai cu amahnu sungah a lut pei ih a khâ ding, cule a pum a thling ding ih a cāwnpi a siatrál ding, cule nunaunu cu a mipawl lakah camsiat a si ding. 28 Asinan nunaunu cu a rak bawrhbangawter lo ih a rak thiang asile, cu nu cu a luat ding ih nau a pai thei ding.

29 ‹Hihi cu thîksiatnak dān a si, nupi cu a pasal ṭāng ih a um laiah a fehpêng ih a bawrhbangawter tikah siseh, 30 mi pakhat thinlung ah thîksiatnak a ra tlung, a nupi parah a thîksiat tikah, anih in Jehovah hmaiah nunaunu cu a dingter pei. Cule puithiam in hi dān hmuahhmuah hi amahnuih parah a tuah pei. 31 Cun cu pa cu mawhsualnak lak ihsin a luat ding, asinan cuih nunaunu cun amai mawh a phur ding a si,› tiah sim aw,» tiin a sim.

6

Nazir-mi hrang Dān

1 Jehovah in Mosi hnenah, 2 «Israel tefapawl be awla an hnenah, ‹Mipa in simaw, nunau in simaw, Jehovah hrangah serhhranaw dingah, Nazir-mi sinak thutiam hleice a lâk tikah, 3 anih cun sabitzu le zureu lak ihsin a serhhran aw pei, sabitzu asilole zureu ihsin tuah mi zu thûr a in lo pei, sabit ti a in lo pei ih, sabit rah tharhlâm siseh, sabit rah carpawl siseh a ei lo pei. 4 A serhhranawk ni hmuahhmuah cu sabit hri ihsin a ci simaw, a hâwng simaw ihsin tuah mi zianghman a ei lo pei.

5 ‹Thutiam ih a serhhranawk ni hmuahhmuah cu sám ziahnak nâmte in a lu a dai lo pei. Jehovah hnenih a serhhranawk ni a kim hlanlo, anih cu a thianghlim pei. Cun a lusám a zuah pei. 6 Jehovah hnenih a serhhranawk ni hmuahhmuah cu mithi ruang a naih lo pei. 7 A pa lole a nu ruang hmanah siseh, a unaupa lole a farnu ruangah siseh, an thih tikah a bawrhbangawter lo pei, ziangruangahtile Pathian hnenih a serhhranawknak cu a lu parah a um. 8 A serhhranawk ni hmuahhmuah cu Jehovah hrangah ni thianghlim a si.

9 ‹Cule rinlopiin mi pakhat khat a kiangah a thi hruak asile, anih cun a serhhran mi a lu a bawrhhlawhter a si ih, thianawkternak ni ah a sám a met pei, a ni sarihnak ah a ziat ding a si. 10 Cun a ni riatnak ah thuro pahnih simaw, laileng no pahnih simaw puithiam hnen, Tawnawknak Puanthlam luhnak hramah a rak keng pei. 11 Cule puithiam in a hrangah sualkhuhthawinak tuahsak dingin Sual Thilhlăn ah pakhat, Meiur Thilhlăn ah a dang pakhat a hlan pei, ziangruangahtile anih cu mithi ruak ruangah a rak sual a si. Cule cumi ni rori ah a lu a tithianghlim ding a si. 12 Anih in a serhhranawknak nipawl cu Jehovah hnenah a hlansal pei, cule Mawh Thilhlăn hrangah tuufa no a pa kum khat ti a rak keng pei. Asinan a ni hmaisapawl cu siar cih a si lo pei, ziangruangahtile a serhhranawknak cu bawrhhlawhter a rak si.

13 ‹Himi cu Nazir-mi hrangih dān a si. A serhhranawk nipawl a kim tikah, Tawnawknak Puanthlam luhnak hramah anih cu hruai a si pei. 14 Cule anih in Jehovah hnenah Meiur Thilhlăn dingah sawisel ding um lo tuufa no a pa kum khat ti pakhat, Sual Thilhlăn dingah sawisel ding um lo tuufa no a nu kum khat ti pakhat, Remnak Thilhlăn dingah sawisel ding um lo tuucang pakhat, 15 hriak rawi mi sangvut phŭt ih tuah mi sangperpawl le hriak măn mi thilnu telh lo sangper pátepawl ih tuah mi thilnu telh lo sang kho khat le an Inding Thilhlănpawl thawn an Thlairawl Thilhlănpawl cu a rak keng pei.

16 ‹Cun puithiam in Jehovah hmaiah cupawl cu a rak keng pei ih, a Sual Thilhlăn le a Meiur Thilhlăn cu a hlănsak pei. 17 Cule anih in Jehovah hnenah Remnak Thilhlăn raithawinak ah tuucang cu thilnu telh lo sang kho khat thawn a hlan pei, puithiam in cumi ih Thlairawl Thilhlăn le Inding Thilhlăn khal a hlan fawn pei. 18 Cun Nazir-mi cun Tawnawknak Puanthlam luhnak hramah a serhhran mi lu cu a ziat pei, cule a rak serhhran mi a lusám cu a la pei ih Remnak Thilhlăn raithawinak hnuaiih meisa parah a paih pei.

19 ‹Cule amahpa in a serhhran mi-ih sám a ziah hnuah puithiam in tuucang liang suan hmin cia, kho ihsin thilnu telh lo sangper pakhat le thilnu telh lo sangper páte pakhat a la pei, cule cupawl cu Nazir-miih kut parah a ret pei. 20 Cule puithiam in Jehovah hmaiih sēp thilhlăn dingah cupawl cu a sēp pei. Cupawl cu sēp thilhlăn a ṭâng le cawikhai thilhlăn a cāwn thawn puithiam ta dingah an thianghlimtlangkhawm hai a si. Cuih hnuin Nazir-mi cun sabitzu a in thei thlang,› tiah ti aw.

21 «Himi cu a serhhranawknak hrangah Jehovah hnenih a thilhlăn thutiam hleiah amai tlin tawkteih pe dingin thu a tiam asile, a serhhranawknak dān milin a thutiam cia bangtukin a tuah tengteng ding ti hi Nazir-mi hrangih dān a si,» tiin a sim.

Aaron-ih Malsawm

22 Jehovah in Mosi cu a bia ih, 23 «Aaron le a fapapawl hnenah hitin sim aw, ‹Israel tefapawl mal nan sawmdān ding cu hitin a si pei; an hnenah,

24 «Jehovah in lo malsawm sehla, lo kilveng seh.
25 Jehovah in na parah a mithmai êngter sehla,
Lo zangfah hram seh.
26 Jehovah in na parah a hmel lo hawih sehla,
Hnangamdaihnak lo pe seh,»

tiin.›

27 «Cule Israel tefapawl parah ka hmin an puter ding ih anmah mal ka sawm hai ding,» tiah a sim.

7

Biakbûk Hlănnak

1 Mosi in Biakbûk dĭn a ṭhehfel ni ah hitin a si, cumi cu hriak a thih ih, cumi le a thilri hmuahhmuah le Biakṭheng le a bungbel hmuahhmuah cu a serhhran hai, cutin cupawl cu hriak a thih hai ih a serhhran hai a si. 2 Cun Israel hotupawl a si mi, an pupápawlih sungkuapawlih lubânpawl, hnám hotupawl le mipum an siar mi uktupawl cun thilhlăn an hlan. 3 Cule annih in tlun khuh nei lêng paruk le câwcang hleihnih cu hotu pahnih ah lêng pakhat vivo le hotu pakhat ah câwcang pakhat ciar in Jehovah hmaiah an thilhlăn an rak keng. Cule annih in cupawl cu Biakbûk hmaiah an rak suahpi.

4 Cun Jehovah in Mosi hnenah, 5 «Hibangpawl hi Tawnawknak Puanthlam hnaṭuannak ih an hman theinak dingah an hnen ihsin cohlang aw. Cule an rawngbawlnak zulhin Levi-mi mi kip hnenah cupawl cu na pe pei,» tiin a sim. 6 Cule Mosi in lêngpawl le câwcangpawl cu a la hai ih, Levi-mipawl a pe. 7 Anmai rawngbawlnak mil tawkin Gershon fapapawl hnenah lêng pahnih le câwcang pali a pe. 8 Cule anmai rawngbawlnak mil tawkin puithiam Aaron fapa Ithamar thu hnuaiih um Merari fapapawl hnenah lêng pali le câwcang pariat a pe. 9 Asinan Kohath fapapawl cu zianghman a pe hai lo, ziangruangahtile thil thianghlim rawngbawlhna cu anmai ta a si. Cupawl cu an liang in an thiar.

Hotupawl in an Thilhlănpawl an rak Keng

10 Biakṭheng hriak thih a si ni ah, hotupawl in Biakṭheng hrangah apnak thilhlăn an rak hlan, cutin hotupawl in Biakṭheng hmaiah an thilhlăn an rak hlan. 11 Cule Jehovah in Mosi hnenah, «Biakṭheng apnak hrangah ni khat ah hotu pakhat ciar in an thilhlăn an hlan pei,» tiah a ti.

12 Cule a ni khatnak ih a Thilhlăn hlantu cu Judah hnám ihsin Amminadab fapa Nahshon a si. 13 Anih in a thilhlăn cu Thlairawl Thilhlăn dingih hriak rawi mi sangvut phŭt a khat veve mi hmun thianghlim shekel bangtukih shekel 130 rit ngun cawhtawlh pakhat le shekel 70 rit ngun khengkûm pakhat, 14 rimhmui thawi a khat mi shekel pahra rit sui haidau pakhat, 15 Meiur Thilhlăn dingah câwpa tûai pakhat, tuucang pakhat le tuufa no kum khat ti a pa pakhat, 16 Sual Thilhlăn dingah mepa pakhat, 17 cule Remnak Thilhlăn raithawinak hrangah câwcang pahnih, tuucang panga, mepa panga le kum khat ti tuufa no a pa panga tla an si. Himi cu Amminadab fapa Nahshon-ih thilhlăn a si.

18 A ni hnihnak ah Issakar hotu, Zuar fapa Nethanel in thilhlăn a rak keng. 19 Anih in a thilhlăn cu Thlairawl Thilhlăn dingih hriak rawi mi sangvut phŭt a khat veve mi hmun thianghlim shekel bangtukih shekel 130 rit ngun cawhtawlh pakhat le shekel 70 rit ngun khengkûm pakhat, 20 rimhmui thawi a khat mi shekel pahra rit sui haidau pakhat, 21 Meiur Thilhlăn dingah câwpa tûai pakhat, tuucang pakhat le tuufa no kum khat ti a pa pakhat, 22 Sual Thilhlăn dingah mepa pakhat, 23 cule Remnak Thilhlăn raithawinak hrangah câwcang pahnih, tuucang panga, mepa panga le kum khat ti tuufa no a pa panga tla an si. Himi cu Zuar fapa Nethanel-ih thilhlăn a si.

24 A ni thumnak ah Zebulun tefapawl hotu, Helon fapa Eliab in thilhlăn a rak keng. 25 Anih in a thilhlăn cu Thlairawl Thilhlăn dingih hriak rawi mi sangvut phŭt a khat veve mi hmun thianghlim shekel bangtukih shekel 130 rit ngun cawhtawlh pakhat le shekel 70 rit ngun khengkûm pakhat, 26 rimhmui thawi a khat mi shekel pahra rit sui haidau pakhat, 27 Meiur Thilhlăn dingah câwpa tûai pakhat, tuucang pakhat le tuufa no kum khat ti a pa pakhat, 28 Sual Thilhlăn dingah mepa pakhat, 29 cule Remnak Thilhlăn raithawinak hrangah câwcang pahnih, tuucang panga, mepa panga le kum khat ti tuufa no a pa panga tla an si. Himi cu Helon fapa Eliab-ih thilhlăn a si.

30 A ni litnak ah Reuben tefapawl hotu, Shedeur fapa Elizur in thilhlăn a rak keng. 31 Anih in a thilhlăn cu Thlairawl Thilhlăn dingih hriak rawi mi sangvut phŭt a khat veve mi hmun thianghlim shekel bangtukih shekel 130 rit ngun cawhtawlh pakhat le shekel 70 rit ngun khengkûm pakhat, 32 rimhmui thawi a khat mi shekel pahra rit sui haidau pakhat, 33 Meiur Thilhlăn dingah câwpa tûai pakhat, tuucang pakhat le tuufa no kum khat ti a pa pakhat, 34 Sual Thilhlăn dingah mepa pakhat, 35 cule Remnak Thilhlăn raithawinak hrangah câwcang pahnih, tuucang panga, mepa panga le kum khat ti tuufa no a pa panga tla an si. Himi cu Shedeur fapa Elizur-ih thilhlăn a si.

36 A ni ngatnak ah Simeon tefapawl hotu, Zurishaddai fapa Shelumiel in thilhlăn a rak keng. 37 Anih in a thilhlăn cu Thlairawl Thilhlăn dingih hriak rawi mi sangvut phŭt a khat veve mi hmun thianghlim shekel bangtukih shekel 130 rit ngun cawhtawlh pakhat le shekel 70 rit ngun khengkûm pakhat, 38 rimhmui thawi a khat mi shekel pahra rit sui haidau pakhat, 39 Meiur Thilhlăn dingah câwpa tûai pakhat, tuucang pakhat le tuufa no kum khat ti a pa pakhat, 40 Sual Thilhlăn dingah mepa pakhat, 41 cule Remnak Thilhlăn raithawinak hrangah câwcang pahnih, tuucang panga, mepa panga le kum khat ti tuufa no a pa panga tla an si. Himi cu Zurishaddai fapa Shelumiel-ih thilhlăn a si.

42 A ni ruknak ah Gad tefapawl hotu Deuel fapa Eliasaf in thilhlăn a rak keng. 43 Anih in a thilhlăn cu Thlairawl Thilhlăn dingih hriak rawi mi sangvut phŭt a khat veve mi hmun thianghlim shekel bangtukih shekel 130 rit ngun cawhtawlh pakhat le shekel 70 rit ngun khengkûm pakhat, 44 rimhmui thawi a khat mi shekel pahra rit sui haidau pakhat, 45 Meiur Thilhlăn dingah câwpa tûai pakhat, tuucang pakhat le tuufa no kum khat ti a pa pakhat, 46 Sual Thilhlăn dingah mepa pakhat, 47 cule Remnak Thilhlăn raithawinak hrangah câwcang pahnih, tuucang panga, mepa panga le kum khat ti tuufa no a pa panga tla an si. Himi cu Deuel fapa Eliasaf-ih thilhlăn a si.

48 A ni sarihnak ah Efraim tefapawl hotu, Ammihud-ih fapa Elishama in thilhlăn a rak keng. 49 Anih in a thilhlăn cu Thlairawl Thilhlăn dingih hriak rawi mi sangvut phŭt a khat veve mi hmun thianghlim shekel bangtukih shekel 130 rit ngun cawhtawlh pakhat le shekel 70 rit ngun khengkûm pakhat, 50 rimhmui thawi a khat mi shekel pahra rit sui haidau pakhat, 51 Meiur Thilhlăn dingah câwpa tûai pakhat, tuucang pakhat le tuufa no kum khat ti a pa pakhat, 52 Sual Thilhlăn dingah mepa pakhat, 53 cule Remnak Thilhlăn raithawinak hrangah câwcang pahnih, tuucang panga, mepa panga le kum khat ti tuufa no a pa panga tla an si. Himi cu Ammihud fapa Elishama-ih thilhlăn a si.

54 A ni riatnak ah Manasseh tefapawl hotu, Pedahzur fapa Gamaliel in thilhlăn a rak keng. 55 Anih in a thilhlăn cu Thlairawl Thilhlăn dingih hriak rawi mi sangvut phŭt a khat veve mi hmun thianghlim shekel bangtukih shekel 130 rit ngun cawhtawlh pakhat le shekel 70 rit ngun khengkûm pakhat, 56 rimhmui thawi a khat mi shekel pahra rit sui haidau pakhat, 57 Meiur Thilhlăn dingah câwpa tûai pakhat, tuucang pakhat le tuufa no kum khat ti a pa pakhat, 58 Sual Thilhlăn dingah mepa pakhat, 59 cule Remnak Thilhlăn raithawinak hrangah câwcang pahnih, tuucang panga, mepa panga le kum khat ti tuufa no a pa panga tla an si. Himi cu Pedahzur-ih fapa Gamaliel-ih thilhlăn a si.

60 A ni kuatnak ah Benjamin tefapawl hotu Gideoni fapa Abidan in thilhlăn a rak keng. 61 Anih in a thilhlăn cu Thlairawl Thilhlăn dingih hriak rawi mi sangvut phŭt a khat veve mi hmun thianghlim shekel bangtukih shekel 130 rit ngun cawhtawlh pakhat le shekel 70 rit ngun khengkûm pakhat, 62 rimhmui thawi a khat mi shekel pahra rit sui haidau pakhat, 63 Meiur Thilhlăn dingah câwpa tûai pakhat, tuucang pakhat le tuufa no kum khat ti a pa pakhat, 64 Sual Thilhlăn dingah mepa pakhat, 65 cule Remnak Thilhlăn raithawinak hrangah câwcang pahnih, tuucang panga, mepa panga le kum khat ti tuufa no a pa panga tla an si. Himi cu Gideoni fapa Abidan-ih thilhlăn a si.

66 A ni hratnak ah Dân tefapawl hotu Ammishaddai fapa Ahiezer in thilhlăn a rak keng. 67 Anih in a thilhlăn cu Thlairawl Thilhlăn dingih hriak rawi mi sangvut phŭt a khat veve mi hmun thianghlim shekel bangtukih shekel 130 rit ngun cawhtawlh pakhat le shekel 70 rit ngun khengkûm pakhat, 68 rimhmui thawi a khat mi shekel pahra rit sui haidau pakhat, 69 Meiur Thilhlăn dingah câwpa tûai pakhat, tuucang pakhat le tuufa no kum khat ti a pa pakhat, 70 Sual Thilhlăn dingah mepa pakhat, 71 cule Remnak Thilhlăn raithawinak hrangah câwcang pahnih, tuucang panga, mepa panga le kum khat ti tuufa no a pa panga tla an si. Himi cu Ammishaddai fapa Ahiezer-ih thilhlăn a si.

72 A ni hleikhatnak ah Asher tefapawl hotu Okran fapa Pagiel in thilhlăn a rak keng. 73 Anih in a thilhlăn cu Thlairawl Thilhlăn dingih hriak rawi mi sangvut phŭt a khat veve mi hmun thianghlim shekel bangtukih shekel 130 rit ngun cawhtawlh pakhat le shekel 70 rit ngun khengkûm pakhat, 74 rimhmui thawi a khat mi shekel pahra rit sui haidau pakhat, 75 Meiur Thilhlăn dingah câwpa tûai pakhat, tuucang pakhat le tuufa no kum khat ti a pa pakhat, 76 Sual Thilhlăn dingah mepa pakhat, 77 cule Remnak Thilhlăn raithawinak hrangah câwcang pahnih, tuucang panga, mepa panga le kum khat ti tuufa no a pa panga tla an si. Himi cu Okran fapa Pagiel-ih thilhlăn a si.

78 A ni hleihnihnak ah Naftali tefapawl hotu Enan-ih fapa Ahira in thilhlăn a rak keng. 79 Anih in a thilhlăn cu Thlairawl Thilhlăn dingih hriak rawi mi sangvut phŭt a khat veve mi hmun thianghlim shekel bangtukih shekel 130 rit ngun cawhtawlh pakhat le shekel 70 rit ngun khengkûm pakhat, 80 rimhmui thawi a khat mi shekel pahra rit sui haidau pakhat, 81 Meiur Thilhlăn dingah câwpa tûai pakhat, tuucang pakhat le tuufa no kum khat ti a pa pakhat, 82 Sual Thilhlăn dingah mepa pakhat, 83 cule Remnak Thilhlăn raithawinak hrangah câwcang pahnih, tuucang panga, mepa panga le kum khat ti tuufa no a pa panga tla an si. Himi cu Enan fapa Ahira-ih thilhlăn a si.

84 Himi cu Biakṭheng hriak a thih ni ih Israel hotupawl hnen ihsin Biakṭheng hrang apnak thilhlăn a si, cupawl cu ngun cawhtawlh hleihnih, ngun khengkûm hleihnih le sui haidau hleihnih tla an si. 85 Ngun khengkûmpawl cu shekel 130 an rit fingfing ih khengkûmpawl cu shekel 70 an rit fingfing. Hmun thianghlim shekel bangtukin ngun bungbel hmuahhmuah in shekel 2400 a rit. 86 Rimhmui thawi a khat mi sui haidau hleihnih pawl cu hmun thianghlim shekel bangtukin shekel pahra ciar an rit; sui haidau zateih rihnak cu shekel 120 a si. 87 Meiur Thilhlăn hrangih ṭilva hmuahhmuah cu: câwpa tûai hleihnih, tuucang hleihnih, an Thlairawl Thilhlăn zawngah kum khat ti tuufa no a pa hleihnih le Sual Thilhlăn hrang mepa hleihnih tla an si. 88 Cule Remnak Thilhlăn raithawinak hrang ṭilva hmuahhmuah cu: câwpa tûai 24, tuucang 60, mepa 60 le kum khat ti tuufa no a pa 60 tla an si. Himi cu Biakṭheng hriak an thih hnuih Biakṭheng hrangih apnak thilhlăn a si.

89 Mosi cu Jehovah thawn beaw dingin Tawnawknak Puanthlam ih a luh tikah, Theihpinak Kuang parih Tlăwnlungawithawinak Hmun tlun ihsin, cherub pahnih karlak ihsin amah betu mi pakhat aw a thei, cutin amah cu a run bia.

8

Meitoṭhuam Rĕmfelnak

1 Jehovah in Mosi hnenah, 2 «Aaron be awla a hnenah, ‹Meitopawl na rĕmfel tikah meito pasarih in Meitoṭhuam hmai lam a tlêt tengteng pei,› tiah sim aw,» tiin a sim. 3 Cule Aaron in cutivekcun a tuah. Jehovah in Mosi thu a pek vekin meitopawl in Meitoṭhuam hmai lam hawih dingin a rĕmfel. 4 Meitoṭhuam an tuahdān cu sui ser mi in a si, a kopi ihsin a parpawl tiangin a serih ser a si. Jehovah in Mosi a rak hmuh mi pianhmang bangtukin Meitoṭhuam cu a tuah.

Levi-mipawl Tithianghlimnak

5 Jehovah in Mosi hnenah, 6 «Levi-mipawl cu Israel tefapawl hnen ihsin hruaisuak awla, anmah cu thianfai hai aw. 7 Hitin anmah thianfai dingah na tuahsak hai pei: an parah athenfainak tidai theh aw, cule an takpum zaten met hai sehla, an hnipuan sawp hai seh, cutin anmah le anmah faiawter hai seh. 8 Cun hriak rawi mi sangvut phŭt ih tuah mi Thlairawl Thilhlăn thawn câwpa tûai la hai seh, cule nang in Sual Thilhlăn dingah a dang câwpa tûai na la pei. 9 Cule Tawnawknak Puanthlam hmaiah Levi-mipawl na hruai hai pei ih, Israel tefa umkhawm hmuahhmuah cu na fĭnkhawmawter hai pei. 10 Cun Jehovah hmaiah Levi-mipawl na hruai pei ih, Israel tefapawl in Levi-mipawl parah an kut an suang pei. 11 Cule Jehovah-ih hna an ṭuan theinak dingah, Aaron in Jehovah hmaiah sēp thilhlăn bangtukin Levi-mipawl cu Israel tefapawl hnen ihsin a hlan hai pei. 12 Cun Levi-mipawl in câwpa tuaipawl lu parah an kut an suang pei. Levi-mipawl hrangah sualkhuhthawinak tuah dingin, nang in Jehovah hnenih Sual Thilhlăn hrangah pakhat le Meiur Thilhlăn hrangah a dang pakhat na hlan pei.

8:7a thenfainak tidai: Hebru ṭawng cun «Sual Thilhlăn tidai» tinak a si.

13 «Cule Levi-mipawl cu Aaron le a fapapawl hmaiah na dingter hai pei, cuṭhehin Jehovah hnenah sēp thilhlăn bangtukin anmah cu na hlan hai pei. 14 Cutivekin Levi-mipawl cu Israel tefapawl lak ihsin na rethran hai pei ih Levi-mipawl cu keimai ta an si pei. 15 Cuih hnuin Levi-mipawl cu Tawnawknak Puanthlam rawngbawlhna ah an lut ding a si. Cutin anmah cu na thianfai pei ih sēp thilhlăn hrangah na hlan hai pei. 16 Ziangahtile annih cu Israel tefapawl lak ihsin ka hnenah pek pumhlum an si zo. Annih cu sūl áwngtu Israel tefa fatir hmuahhmuah aiawhah ka hrangah ka la hai zo a si. 17 Ziangahtile Israel tefapawl lakih fatir hmuahhmuah milai le ṭilva an pahnih in ka ta an si. Izip ram ih fatir hmuahhmuah ka thah ṭheh ni ah khan annih cu ka hrangah ka rak serhhran hai. 18 Israel tefa fatir hmuahhmuah aiah Levi-mipawl cu ka la zo a si. 19 Cule Israel tefapawl in hmun thianghlim an rak naih tikah Israel tefapawl lakah hremnak a umlonak dingah, Tawnawknak Puanthlam sungah Israel tefapawl hrangih hna ṭuan dingah le Israel tefapawl hrangih sualkhuhthawinak tuahsak dingah Israel tefapawl lak ihsin Levi-mipawl cu thilpek vekin Aaron le a fapapawl ka rak pe,» tiin a sim.

20 Cule Mosi le Aaron le Israel tefa umkhawm hmuahhmuah in Levi-mipawl hnenah an tuah, cutin Israel tefapawl in Jehovah in Levi-mipawl thuhla ih Mosi thu a rak pek bangtukin an parah an tuah a si. 21 Cule Levi-mipawl cu an thianfaiaw ih an hnipuanpawl an sawp. Cun Aaron in Jehovah hmaiah sēp thilhlăn hrangah anmah cu a hlan hai, cule Aaron in anmah thenfainak dingah an hrangah sualkhuhthawinak a tuahsak hai. 22 Cuihhnu ah Levi-mipawl cu Tawnawknak Puanthlam sungih an hna ṭuan dingah Aaron le a fapapawl hmaiah an lut. Levi-mipawl thuhla ah Jehovah in Mosi thu a pek vekin annih in an hnenah an tuah.

23 Cun Jehovah in Mosi hnenah, 24 «Himi cu Levi-mipawl thawi pehtlaiaw mi a si. Kum 25 ihsin a tlun lam minung cu Tawnawknak Puanthlam hna rawngbawlnak ah an lut thei. 25 Cule kum 50 an tiin himi rawngbawlhna cu an cawlhsan pei ih hna an ṭuan nawn lo pei. 26 Ṭulhai mi tawlrel dingin an unaupawl zawngah Tawnawknak Puanthlam sungah rawng an bawl thei, asinan an hna kêl an ṭuan ding a si lo. Hitin an ṭuanvo thuhla ah Levi-mipawl hnenah na tuah ding a si,» tiah a sim.

9

Lanta Puai

1 Izip ram ihsin an ra suah hnu a kum hnihnak thla khatnak ah Jehovah in Sinai Ramṭhing ah Mosi hnenah, 2 «Israel tefapawl in tikcu khiah mi cān ah Lanta Puai hmang hai seh. 3 Himi thla a ni hleilitnak, khawthim zawng, tikcucān khiah cān ah nan hmang pei. A sakhaw dānpawl le a cīn le dān hmuahhmuah bangtukin nan hmang ding a si,» tiin a sim. 4 Cun Lanta Puai hmang dingin Mosi in Israel tefapawl a sim. 5 Cule Sinai Ramṭhing ah a thla khatnak, ni hleilitnak khawthim zawngah Lanta Puai an hmang. Jehovah in Mosi thu a rak pek bangtukin Israel tefapawl cun an tuah.

6 Milai ruak ruangah a bawrhbangawtertu mi hrekkhat an rak um, cutin annih cun cuih ni cu Lanta Puai an hmangngah lo, cule anmah cu Mosi le Aaron hnenah cuih ni ah an ra. 7 Cule cupawl in a hnenah, «Milai ruak ruangah mibawrhbang ah kan rak cang. Ziangahso Israel tefapawl lakih tikcu khiah mi cān ah Jehovah-ih thilhlăn va hlăn ding dawnkham ih ka um?» tiah an ti.

8 Cule Mosi in an hnenah, «Nan thuhla ah Jehovah ih thu in pek ding mi hna ih ka theih theinak dingah rak hngak hrih uh,» tiah a ti hai.

9 Cun Jehovah in Mosi hnenah, 10 «Israel tefapawl hnenah, ‹Nan lakih mi pakhat khat simaw, nan tesinfa pakhat khat simaw, miruak ruangah a thianglo asilole lamhla ih khual a rak tlâwnghlo a si ahcun, Jehovah-ih Lanta Puai a hmang thei hrih lai ko. 11 A thla hnihnak ni hleilitnak khawthim zawngah an hmang pei. Thilnu telh lo sang le thlai khâ thawn cumi cu an ei cih pei. 12 A thaizing tiangah pakhat hman an hlah lo pei, a ruh khal pakhat hman an khiak fawn lo pei. Lanta Puai sakhaw dān hmuahhmuah bangtukin cumi cu an thlun pei. 13 Asinan mithiangfai le khualtlawng lo mi, Lanta Puai hmang lo tu cu, a mipawl lak ihsin cuih milai cu sahcat a si pei. Ziangruangahtile a tikcu thiah cān ah Jehovah-ih thilhlăn a rak keng lo, cuih milai cun amai sual a phur ding a si. 14 Cule nan lakih cêng ram dang mi in Jehovah-ih Lanta Puai a hmang asile, Lanta Puai sakhaw dān bangtuk le cīn le dān bangtukin a tuah tengteng pei, ram dang mi le rammi an pahnih hrangah sakhaw dān hmunkhat nan nei pei,› tiin sim aw,» tiah a sim.

Mero le Meisa

15 Biakbûk dĭn a si ni ah, Biakbûk, Theihpinak Puanthlam cu mero in a khuh, cumi cu meisa pianhmang kengin zan lam ihsin zing lam tiang Biakbûk tlunah a um ringring. 16 Sun ah mero in a khuh ih, zan ah meisa pianhmang kengin a khuh, cutivekcun a um tlaitluan. 17 Puanthlam tlun ihsin mero lakso a si tinten, cumi hnuin Israel tefapawl cu an ṭhawn ṭheu. Cule mero a ṭhumawknak hmun hmun ah, Israel tefapawl cun riahhmun an sâm ṭheu. 18 Israel tefapawl cu Jehovah thupek in an ṭhawn ṭheu ih, Jehovah thupek in riahhmun an sâm ṭheu. Biakbûk tlunih mero a cām sung pauh cu riahhmun ah an tâp ringring. 19 Ni tampi sung Biakbûk tlunih mero a campeh hmanah, Israel tefapawl cu Jehovah thucah an thlun ih an ṭhawn dah lo. 20 Biakbûk tlunah ni málte sung mero a um tikah, hitin a si, Jehovah thupek bangtukin riahhmun ah an tâp ṭheu ih Jehovah thupek bangtukin an ṭhawn ṭheu. 21 Zan lam ihsin zing lam tiang lawng mero a tâp tikah hitin a rak si, zing ah mero laksoh a si tikah an ṭhawn ṭheu. Sun a si khalle zan a si khalle mero lakso a si tiktikah an ṭhawn ṭheu. 22 Biakbûk tlunah ni hnih maw, thla khat maw, kum khat maw mero a tâp khalle, Israel tefapawl cu riahhmun ah an tâp ṭheu ih, an ṭhawn dah lo, asinan cumi cu laksoh a si tikah an ṭhawn ṭheu. 23 Jehovah thupek in riahhmun ah an tâp ṭheu ih, Jehovah thupek in an ṭhawn ṭheu. Mosi hmangih Jehovah ih thupeknak in Jehovah thucah cu an thlun.

10

Ngun Tawtawrawt Pahnih

1 Jehovah in Mosi hnenah, 2 «Na hrangah ngun tawtawrawt pahnih tuah aw, a serih serin na tuah hai pei, mipi-umkhawm kawhnak le ralkappawl pawhsuahnak ding theihternak ah na hmang pei. 3 An pahnih in an phawt tikah mipi-umkhawm zaten Tawnawknak Puanthlam luhnak ih na hmaiah an fĭnkhawmaw pei. 4 Asinan pakhat lawng phawt asile, hotu a si mi Israel ralkap rual lubânpawl na hnenah an pungkhawm pei. 5 Theihternak na phawt tikah nisuahnak lam kapih ralkappawl an păwksuak pei. 6 A vei hnihnak theihternak na phawt tikah thlang lam kapih ralkappawl an păwksuak pei, annih in pawhsuah thăwknak ding theihternak an phaw pei. 7 Cule mipungkhawm hmunkhatih táwngawkhawm ding an si tikah, nan phaw pei, asinan pawhsuahnak theihternak cu nan phaw lo pei. 8 Aaron fapa puithiampawl in tawtawrawtpawl cu an phaw pei ih, hipawl cu nan tefa san tiangin kumkhuain nan hrangah sakhaw dān an si pei.

9 «Nan ram sungah nanmah a lo palbĕttu doral do dingih nan feh tikah, tawtawrawtpawl in ralkhēlnak nan phaw pei, cule Jehovah nan Pathian hmaika-ah cīn ringring nan si ding ih nan ralpawl lak ihsin rŭn nan si ding. 10 Nan lungawi ni, nan puai thiah mipawl le nan thla thăwktirpawl khalah, nan Meiur Thilhlăn tlunah le Remnak Thilhlăn raithawinak tlunah nan tawtawrawtpawl nan phaw pei, cule cupawl cu nan Pathian hmaiah nanmah hngilhlonak an si ding. Keimah cu Jehovah nan Pathian ka si,» tiin a sim.

Pawhsuahnak

11 A kum hnihnakih a thla hnihnak ni 20-nak ah, hitin a si, Theihpinak Biakbûk tlun ihsin mero cu lakso a rak si. 12 Cule Israel tefapawl cu Sinai Ramṭhing ihsin feh vivo dingin an păwksuak, cun Paran Ramṭhing ah mero a ṭhumaw. 13 Cutin Mosi hmangih Jehovah in thu a pek mi bangtukin a vei khatnak an păwksuak.

Judah Ralkappawl Pawhsuahnak

14 An ralkappawl zulhin Judah tefapawlih ralkap thantar cu a hmaisabikah a păwksuak, an ralkap hotu cu Amminadab fapa Nahshon a si. 15 Issakar tefapawl hnám ralkap hotu cu Zuar fapa Nethanel a si. 16 Cule Zebulun tefapawl hnám ralkap hotu cu Helon fapa Eliab a si. 17 Cun Biakbûk cu phelh a si, cule Gershon fapapawl le Merari fapapawl an păwksuak ih Biakbûk an thiar.

Reuben Ralkappawl Pawhsuahnak

18 Cule an ralkappawl zulhin Reuben ralkap thantar a păwksuak, an ralkap hotu cu Shedeur fapa Elizur a si. 19 Simeon tefapawl hnám ralkap hotu cu Zurishaddai fapa Shelumiel a si. 20 Cule Gad tefapawl hnám ralkap hotu cu Deuel fapa Eliasaf a si.

21 Cun thil thianghlimpawl thiar phahin Kohath-mipawl an păwksuak. An thlen hlanah Biakbûk rak tundīn cia ding a si.

Efraim Ralkappawl Pawhsuahnak

22 Cule an ralkappawl zulhin Efraim tefapawlih ralkap thantar a păwksuak, an ralkap hotu cu Ammihud fapa Elishama a si. 23 Manasseh tefapawl hnám ralkap hotu cu Pedahzur fapa Gamaliel a si. 24 Cule Benjamin tefapawl hnám ralkap hotu cu Gideoni fapa Abidan a si.

Dân Ralkappawl Pawhsuahnak

25 Cun ralkappawl zate nekhawrtu Dân tefapawlih ralkappawl cu an ralkappawl zulhin thantar thawn an păwksuak, an ralkap hotu cu Ammishaddai fapa Ahiezer a si. 26 Asher tefapawl tlunih ralkap hotu cu Okran fapa Pagiel a si. 27 Cule Naftali tefapawl tlunih ralkap hotu cu Enan fapa Ahira a si. 28 Cutivekcun an pawhsuak tikih an ralkappawl zulhin Israel tefapawl an ralṭhuang fehsuahdān cu a si.

Mosi-ih Pu

29 Cun Midian-mi, Mosi-pu Reuel fapa Hobab hnenah Mosi in, «Jehovah in, ‹Ka lo pe ding,› tiih in ti mi hmun kan pan rero, kan zawngah ra ve awla ṭha zetin kan lo kilkhawi ding, ziangahtile Jehovah in Israel hnenah thil ṭhapawl a rak tiamkam sokhaw,» tiah a ti.

30 Cule anih in a hnenah, «Ka feh lo ding, ka ram le ka sungkhatpawl hnenah ka păwksuak sawn ding,» tiah a ti.

31 Cule Mosi in, «Cuti asile ramṭhing ah khuiah riahhmun kan sâm ding ti na theihngah tiang zangfahten in tlansan hlah aw, cule nang cu kan mit na si ding. 32 Cule kan zawngih na feh asile, hitin a si ding, Jehovah in kan parih a tuah ding mi thil ṭha pauhpauh cu bangrepin na parah kan tuah ding,» tiah a ti.

33 Cule annih cu Jehovah tlang ihsin an păwksuak ih ni thum sung an feh, cule an hrangih cawlhhmun hawlsak dingin, Jehovah-ih Thukham Kuang cu an hmaiah ni thum feh tiang a feh. 34 Cule riahhmun khuarnak ihsin an fehsuak tikah Jehovah-ih mero cu sun ah an tlunah a um. 35 Hitin a rak si ṭheu, Kuang a pawhsuak tinten, Mosi in,

«Tho law, Maw Jehovah!
Na ralpawl cu ṭekdarh hai sehla,
Nangmah huatupawl cu na hmaiah tlân hai seh,»

tiah a ti.

36 Cule a cawlh tikah anih in,

«Ra kirsal aw, Maw Jehovah,
Israel mipi thawngza tampi hnenah hin,»

tiah a ti ṭheu.

11

Jehovah Meisa

1 Mipi an phunzai tikah Jehovah a lung a awi lo, ziangahtile cumi cu Jehovah in a hna in a thei ih a thinhengnak a alhin a alh. Cun an lakah Jehovah-ih meisa a kāng ih riahhmun pawnsapawl hrekkhat a kāng hai. 2 Cun Mosi hnenah mipi an au, cule Jehovah hnenah Mosi thla a cam ih meisa cu a mit. 3 Cun an lakah Jehovah-ih meisa a kăng ruangah, cuih hmun cu aTaberah tiah hmin a sak.

11:3a Taberah: Hi mi cu «a kāng» ti mi ṭawngfáng ihsi ra a si.

Manna ruangih Phunzainak

4 An lakih kahpia mipi cu a nasazet mi câkhiarnak in an khat, Israel tefapawl khal an ṭapsal ih, «Zo in so sa ei ding in pe ding? 5 Izip ram ih ngasa man loih kan ei mi, fanghmapawl, dawnfawhpawl, purunpawl, khasuansenpawl le khasuanrangpawl kan máng a si, 6 atu ah kan pumhlum in a car ṭheh zo, manna siarlo kan mithmuhah zianghman an um lo lawlaw,» tiah an ti.

7 Manna cu anannan ci vek a si ih, a răwng cu bbdellium răwng vek a si. 8 Mipi an vakkûal ih manna cu an sarkhawm, riallungpawl in an rial asilole sum ah an phăwm ih, khēngdaupawl in an sûang ih sangper ah an tuah, a thawtdān cu hriak thawi tuah mi vek a si. 9 Cule zan ah riahhmun khuarnak ih dai a tlak tikah manna cu a tla ve.

11:7a nannan: Thlai phun khat a si ih, Mediterenian tipi kap tluan le Israel ram nisuahnak lam rampawl ih um a si. Cuih thlai kung cun pangpar var fate zet le sen dâng nawn a nei; a ci cu rimhmui hrangih hman a si.

11:7b bdellium: Thing hnâi phun khat a si ih a răwng cu a var nawn, a rim a hmui zet.

10 Cun mipi cun an hrin an hrin in mi kip anmai puanthlam luhnak ah an ṭap celcel ti Mosi in a hna in a thei, cule Jehovah thinhengnak cu nasazetin a alh, Mosi mithmuh khalah thil ṭhalo a si. 11 Cutin Mosi in Jehovah hnenah, «Ziangah so na sálpa hi na zawnzaiter? Ziangahso na mithmuhah duhsaknak ka co lo? Hi mipi hmuahhmuah ih phur cu ka parah na ṭhum zo. 12 Hi mipi hmuahhmuah hi ka vun hai maw si? Anmah cu ka hring hai maw si? An pupápawl hnenah sesăm ih na tiamkam mi ram ah, ‹Naupâwmtu in nau hnawifawp lai a pawm bangin na ṭāngnêm ah pawm aw,› tiih ka hnenih na ti? 13 Hih mipi hmuahhmuah pek ding sa cu khuiah so ka hmuh ding? Ziangahtile annih cu ka tlunah, ‹Kan ei ding sa in pe aw,› tiin an ṭap. 14 Keimah lawng cun hi mipi hmuahhmuah hi ka phur thei lo ding, ziangruangahtile ka hrangah phur hi a rit tuk. 15 Nang in hivekih i sawisa ding a si ahcun, zangfahten i that lohli awla, na mithmuhih duhsaknak ka co asile, thinpihmangbangnak i táwngter hlah aw!» tiah a ti.

Upa 70

16 Cule Jehovah in Mosi hnenah, «Mipi parih hotu le mipi lakih upa si ih na theih mi Israel upa pacang 70 ka hnenah rak khawm aw. Nangmah thawi dingtlâng dingin Tawnawknak Puanthlam ah rak hruai hai aw. 17 Cun ka rung ṭum pei ih cu tawkah ka lo be ding. Na parih Thlarau hrekkhat ka la ding ih an parah ka ret ding, nangmah te lawngih na phurhlonak dingah, annih in mipi phur an phur ve ding a si. 18 Cun mi senpi hnenah nang in, ‹Thaizing hrangah tithianghlim aw uh, cule sa nan ei ding, ziangahtile Jehovah theih ah, «Zo in so ei ding sa in pe ding? Izip ah cun kan rak nuam tuk nan si khawh,» tiin nan rak ṭap. Curuangah Jehovah in sa a lo pe ding ih nan ei ding. 19 Ni khat, ni hnih, ni nga, ni hra, asilole ni 20 simaw lawng nan ei lo ding, 20 nan hnarkua ihsin a pawtsuak le nan hrangih luaksuak umzaih a can hlanlo a thla pumpi in nan ei ding. Ziangruangahtile nan lakih um Jehovah cu nan rak hnáwng ih a hmaiah ṭapin, «Ziangah so Izip ihsin kan rak suah?» tiin nan ti,› tiah na ti pei,» tiah a ti.

21 Cule Mosi in, «Ka umpi mi mi senpi cu ke ralkap thawng zaruk an si, cucingin ‹Thla khat pumpi an ei dingah sa ka pe ding,› tiah na ti! 22 An daihtawk pe dingin an hrangah ranpi rual le rante rual thah an si ding maw si? Asilole anmah daihtawk pe dingin tifinriat ih nga hmuahhmuah fĭnkhawm an si ding maw si?» tiah a ti.

23 Cule Jehovah in Mosi hnenah, «Jehovah-ih bân cu tawiter a si maw si? Atu ah ka kamsuakthu na parah a thleng taktak maw taktak lo ti na hmu ding,» tiah a ti.

24 Cule Mosi cu a va suak ih mipi hnenah Jehovah kamsuakthupawl a va sim hai, cule mipi upapawl lakih pacang 70 pawl cu a kokhawm ih Puanthlam kimvelah a ret. 25 Cun mero sungin Jehovah a rung ṭum ih amah cu a run bia, cule a parih Thlarau hrekkhat a lâk ih upapawl lakih pacang 70 pawl parah a ret, cule hitin a rak cang, an parih Thlarau a ṭhumawk tikah thu an phuang, asinan cuvekin an phuang lehsal nawn cuang lo.

Eldad le Medad

26 Asinan pacang pahnih cu riahhmun khuarnak ah an tâp lan ta, pakhat ih hmin cu Eldad a si ih, a dang pakhat ih hmin cu Medad a si. Cule an parah Thlarau a ṭhumaw. Annih cu hmin ngan mipawl lak ihta an si, asinan Puanthlam sungah an va feh lo, cuticingin riahhmun khuarnak ah thu an phuang rero. 27 Cule Mosi hnenah tlangval pakhat a va tlân ih a hnenah, «Eldad le Medad cu riahhmun ah thu an phuang rero sokhaw,» tiah a sim.

28 Cun a hril mi pacangpawl lakih pakhat, Mosi bawmtu, Nun fapa Joshua in a sawn ih a hnenah, «Ka bawipa Mosi, annih cu dawn hai aw!» tiah a ti.

29 Cun Mosi in a hnenah, «Keimai hrangah na thîk maw? Jehovah-ih mi hmuahhmuah in profet si hai sehla, Jehovah in an parah a Thlarau ret sehla ka va ti em!» tiah a ti. 30 Cule Mosi cu amah le Israel upapawl thawn riahhmun khuarnak ah a kir.

Jehovah in Vanîm a Pe

31 Jehovah hnen ihsin thli a ra hrang, cule tifinriat ihsin vanîm a rak hranpi ih, hi lamah ni khat feh hrawng, khat lamah ni khat feh hrawng, riahhmun khuarnak kimvel hmuahhmuah ah lei hmai ihsin dawng hnih tluk sangin riahhmun khuarnak kiangah an ṭum. 32 Cule mi senpi cu cuih ni sunvu, zanvar le a thaisun sunvu an ding ih vanîm cu an khawm, a khawm málbik in ahomer pahra an khawm. Cule riahhmun khuarnak kimvel hmuahhmuah ah an pharh ciamco. 33 Asinan an ha karlakih sa a um lai, an ṭhial man hlanah mi senpi dokalhin Jehovah thinhengnak cu a alh, cule Jehovah in a nasazet mi hremnak in mi senpi a vuak hai. 34 Cule mihrawngpawl cutawk ih an phum ruangah, cuih hmun cu bKibroth Hattaavah tiah hmin a sak. 35 Mipi cu Kibroth Hattaavah ihsin Hazeroth ah an ṭhawn, cule Hazeroth ah riahbûk an sâm.

11:32a homer: Pui 27:16 simfiangnak zoh aw.

11:34b Kibroth Hattaavah: «Mihrawngpawl thlān» tinak a si.

12

Aaron le Miriam Vuivainak

1 Kush-mi nunau a ṭhit ruangah Miriam le Aaron in Mosi an mawhsiat, ziangahtile anih in Kush-mi nunau a rak ṭhi. 2 Cun annih in, «Jehovah in Mosi lawng hmangin maw thu a rel taktak? Kanmah hmang khal in thu a rel ve lo maw si?» tiah an ti. Cule cumi cu Jehovah in a hna in a thei. 3 (Mosi ti mi pa cu mităngdawr tuk a si, leilung vangdâp parih milai hmuahhmuah hnakin a tăngdawr cuang.)

4 Hmakhatteah Jehovah in Mosi, Aaron le Miriam tepawl hnenah, «Nannih pathum kha Tawnawknak Puanthlam ah ra suak uh,» tiah a ti. Cun an pathum in an ra suak. 5 Cun Jehovah cu mero ṭhuam lakah a rung suk ih Puanthlam luhnak ah a ding, cule Aaron le Miriam a run ko. Cule an pahnih in hmaiah an ra. 6 Cun anih in,

«Ka kamsuakthupawl ngai hnik uh,
Nan lakah profet a um asile,
Kei Jehovah in larawknak in a hnenah ka theihawter ṭheu,
Mang in a hnenah ka ṭawng ṭheu.
7 Ka siahhlawh Mosi hnenah cun cuvek a si lo,
Anih cu ka sungkua zate lakah a rinum a si.
8 Hmaităwnin a hnenah ka ṭawng ṭheu, ṭawng thûk si loin, fiang zetin,
Cule anih cun Jehovah pianhmang a hmu.
Ziangahso ka siahhlawh mawhsiat ding ṭih loih nan um?»

tiah a ti.

Miriam a Phâr

9 Jehovah thinhengnak cu an parah a alh ih anih cu a fehsuak. 10 Cule Puanthlam tlun ihsin mero a kianhloh tikah, ngai hnik, Miriam cu vur vekih varin a phâr. Cun Miriam lamah Aaron cu a va hawi, cule ngai hnik, anih cu a rak phâr! 11 Cule Aaron in Mosi hnenah, «Maw, ka bawipa! Â zetih kan rak tuah mi le kan rak sualnak ah zangfahten hi sualnak hi kan parah ret hram hlah. 12 Amahnu cu a nuih sūl sung ihsin a rak suah tikih a taksa hrek a se mi mithi vekah cangter hram hlah,» tiah a ti.

13 Cule Mosi cu Jehovah hnenah, «Maw Pathian, ka lo ngen a si, amahnu hi damter hram aw,» tiin a au.

14 Cun Jehovah in Mosi hnenah, «A pa in a hmaiih cil a phui men lawng hmanah ni sarih sung ningzakin a um ding a si lo maw? Amahnu cu riahhmun khuarnak ihsin ni sarih sung suah si seh, cule cuihhnu ah anih cu cohlan a sisal ding,» tiah a ti. 15 Cule Miriam cu riahhmun khuarnak ihsin ni sarih sung suahter a si ih, Miriam hruailuhsal a si hlanlo mi senpi cu an feh lo. 16 Cule cuih hnuin mi senpi cu Hazeroth ihsin an ṭhawn ih Paran Ramṭhing ah riahhmun an sâm.

13

Thlingthlatu Hleihnih Thlahnak

1 Jehovah in Mosi hnenah, 2 «Israel tefapawl ka pek mi Kanaan ram ah thlingthla dingin milai thlah hai aw, an lakih hotu pakhat fingfing an pupápawlih hnám pakhat ciar ihsin milai pakhat na thlah pei,» tiin a sim. 3 Cule Mosi in Jehovah thupek bangtukin cupawl cu Paran Ramṭhing ihsin a thlah hai. An zaten Israel tefapawlih hotu pacang an si.

4 Cule hipawl hi an hmin a si. Reuben hnám ihsin Zakkur fapa Shammua, 5 Simeon hnám ihsin Hori fapa Shafat, 6 Judah hnám ihsin Jefunneh fapa Kaleb, 7 Issakar hnám ihsin Joseph fapa Igal, 8 Efraim hnám ihsin Nun fapa Hoshea, 9 Benjamin hnám ihsin Rafu fapa Palti, 10 Zebulun hnám ihsin Sodi fapa Gaddiel, 11 Joseph hnám ihsin, cumi cu Manasseh hnám ihsin a si, Susi fapa Gaddi, 12 Dân hnám ihsin Gemalli fapa Ammiel, 13 Asher hnám ihsin Maikal fapa Sethur, 14 Naftali hnám ihsin Vofsi fapa Nahbi, 15 Gad hnám ihsin Maki fapa Geuel tla an si. 16 Hipawl cu ram thlingthla dingih Mosi in a thlah mi pacangpawlih hmin an si. Cule Mosi in Nun fapa Hoshea cu Joshua tiah hmin a sak.

17 Cun Mosi in Kanaan ram thlingthla dingin annihpawl cu a thlah hai ih an hnenah, «Himi lamzin ihsin Negev ah hung so uhla, tlang ah kaiso uh, 18 cule ram cu ziang a bang ti va zoh uh, a sungih cêng mi senpi an cak maw cak lo, an tam maw an mál, 19 an cēnnak ram cu a ṭha maw a sia, an luah mi khuapawl cu riahhmun khuarnak vek men maw ralhruangkulh an si, 20 ram cu a lian maw a farah, thingrûl a si maw si lo ti va zoh uh. Ralṭha zetin um uhla, a ram thingtheirah hrekkhat rak la uh,» tiah a ti. Cule a tikcu cu sabit cût hmaisabik cān a si.

21 Cutin annihpawl cu an feh ih Zin Ramṭhing ihsin Hamath luhnak kiang Rehob tiangin ram cu an thlingthlasuak ṭheh. 22 Cule Negev an fángsuak ih Hebron ah an ra. Cu tawkah Anak cithlah Ahiman, Sheshai le Talmai tepawl an um. Hebron cu Izip ram ih Zoan dĭn hlan kum sarih ah dĭn a si. 23 Cun Eshkol Phaikuam ah an ra ih sabit hnge bawr khat an satthla, zawnfung in mi pahnih in an zâwn. Talê rah le theipi khal an rak phur. 24 Israel tefapawl in cutawk ih sabit bawr an sahthlak ruangah cuih hmun cu aEshkol Phaikuam tiah hmin an sak. 25 Cule annihpawl cu ni 40 hnuah ram an thlingthlaknak ihsin an ra kirsal.

13:24a Eshkol: «Sabit bawr» tinak a si.

Mosi hnenih Thawngthannak

26 Cule annihpawl cu an păwk ih Paran Ramṭhing ih Kadesh hmun ah Mosi le Aaron le Israel tefa umkhawm hmuahhmuah hnenah an ra kirsal. Annih in anmahpawl le mipi-umkhawm hmuahhmuah hnenah thuhla an rak thlĕn ih a ram thingtheirahpawl tla an hmuh. 27 Cun annih in a hnenah, «In thlahnak ram ah cun kan va feh. A ram cu hnawiti le khuaitizu a luang ngaingai, cule himi hi a thingtheirah cu a si. 28 Cutisikhalsehla a ram ih cêng mipawl cu an cak tuk, an khuapawl cu kulhhnget nei an si ih an tûm tuk lawmmam. Cuihhleiah cutawk ih Anak cithlahpawl tla kan va hmu. 29 Negev ah Amalek-mipawl an cêng, tlang rampawl ah Heth-mipawl, Jebus-mipawl le Amor-mipawl an cêng, cule Kanaan-mipawl cu tifinriat kapah le Jordan tiva kap tluanah an cêng,» tiah an ti.

30 Cun Kaleb in mi senpi cu Mosi hmaiah daiten a umter hai ih an hnenah, «Hmakhatteah hung so uh sila, cuih ram cu hung la uhsi, ziangahtile cumi cu kan neh thei tuk ding,» tiah a ti hai.

31 Asinan a zawngih a hung sotu pacangpawl in, «Cuih mi senpi do dingin kan so thei lo, ziangahtile annihpawl cu kannih hnakin an caksawn a si,» tiah an ti. 32 Cule an hung thlingthlak mi ram thuhla cu a se zawngin Israel tefapawl an sim ih, «Kan hung feh ih kan thlingthlaksuak mi ram cu a luahtupawl eirál ṭhehtu a si ih, kan hmuh mi mipi hmuahhmuah cu mitumpi pi an si. 33 Cu tawkah mimangkawngpawl kan va hmu, Anak cithlahpawl cu mimangkawngpawl thlah an si; cule kharbawk vek fangin kan hmu-aw ih, annih khal in cuvekcun in hmu,» tiah an ti.

14

Israel Helnak

1 Mipi-umkhawm hmuahhmuah cu an aw suahin an au ih, cumi zan cu mi senpi an ṭap ciamco. 2 Cule Israel tefa hmuahhmuah in Mosi le Aaron an mawhthluk ih an hnenah mipi-umkhawm hmuahhmuah in, «Izip ram ih kan rak thih men lo cu aw! Asilole hi ramṭhing ah hin kan rak thih men lo ee! 3 Kan nupipawl le kan fanau tetepawl mi ih thiarhloh men dingah ziangahso Jehovah in ralnâm ih tlu dingih hi ram ih in hruai? Izip ram ih kirsal hi kan hrangah a ṭhasawn lo ding maw?» tiah an ti. 4 Cule annih cu pakhat le pakhat, «Hruaitu hril uh sila, Izip ah kir uhsi,» tiah an tiaw.

5 Cun Mosi le Aaron cu Israel tefa umkhawm pungkhawm hmuahhmuah hmaiah an băwkkhup. 6 Asinan ram va thlingthlasuaktu lakih tel Nun fapa Joshua le Jefunneh fapa Kaleb cun an hnipuan an thlek. 7 Cule annih in Israel tefa umkhawm hmuahhmuah hnenah, «Thlingthla dingih kan va fansuah mi ram cu ram ṭha tuk a si. 8 Kan parah Jehovah a lungsi ahcun, hnawiti le khuaitizu luannak ram, himi ram sungah in hruailut ding ih, cumi cu kanmah in pe ding. 9 Jehovah lakah hél loin rammipawl cu ṭih fawn lo phawt sehla, ziangahtile anmah cu kan rawl an si. An ahumhimawknak in a suahsan hai zo ih, kan hnenah Jehovah a um. Anmah cu ṭih hlah uh,» tiah an ti.

14:9a humhimawknak: Hebru ṭawng ah cun «thlahlim» a si ih, humhimnak hmuhsaknak thlahlim a si.

10 Cule mipi-umkhawm hmuahhmuah in lung in kan lo deng ding tiah an ti. Cun Israel tefa zate hmai, Tawnawknak Puanthlam sungah Jehovah ropitnak a rung lang.

Mipi hrangah Mosi Thla a Cam

11 Jehovah in Mosi hnenah, «Hi mi senpi hin ziang tik tiang so in hnawn ding? Hminsinnak hmuahhmuah an lakah tuah cingin, ziang tik tiang so in zum lo ding? 12 Nathrisia rapthlak zetin ka vaw hai ding ih ro ka coter hai lo ding, cule anmah hnakih ropisawn le caksawn miphun ah ka lo tuah ding,» tiah a ti.

13 Cule Mosi in Jehovah hnenah, «Anmai lak ihsin hi mi senpi hi na cahnak in na hruaisoh mi an si. Asinan na vuak hai thu cu Izip-mipawl in an thei ding ih, 14 annih in cumi cu hi rammipawl hnenah an sim ding. Nang, Jehovah cu hi minungpawl lakah na um ti le, Jehovah, nangmah cu hmaităwnin an lo hmu zo ih an tlunah na mero a dîng, cule sun ah mero ṭhuam in, zan ah meisa ṭhuam in, an hmaiah na feh ti annihpawl hin an hna in an thei zo. 15 Hi mi senpi hi mi pakhat tluk fangih na thah ṭheh asile, na thuhla a rak theitu miphun dangpawl in, 16 ‹Anmah pe dingih sia a săm mi ram ah hi mi senpi hi Jehovah in a hruailut thei lo ruangah a si, curuangah anmah cu ramṭhing ah a that hai,› tiin an lo ti ding. 17 Cule atu ah ka lo ngen a si, ka Bawipaih thiltitheinak cu ropi seh law, nangmah in, 18 ‹Jehovah cu mithinsau le zahngaihnak ngah mi, mawhsualnak le dānpahbălnak ngaidamtu a si, asinan ziangti lam khalih mawhnak luatter dah lo, tefapawl parah san thum san li tiang palepawlih mawhsualnak lehrūltu a si,› tiin na rak ti zo kha! 19 Izip ram ihsin atu tiang rori hi mi senpi na ngaidam vekin, na zahngainak ropi zet zulhin, ka lo ngen a si, hi mipipawlih mawhsualnak hi ngaidam hram aw,» tiah a ti.

20 Cun Jehovah in, «Na ṭawngkam bangtukin ka ngaidam hai a si, 21 asinan keimah ka nun taktak vekin, leilung pumpuluk ah Jehovah ropitnak cu a khat taktak ṭheh ding. 22 Ziangruangahtile ka ropitnak le Izip ram le ramṭhing ih ka tuah mi hminsinnakpawl a hmu zotu le vei hra lai i hniksak ih ka aw ngaithla duh lo tu hi milaipawl hmuahhmuah hin, 23 an pupápawl hnenih sia ka rak săm zo mi ram cu an hmu hrimhrim lo ding ih, in hnáwngtu pauhpauh khal in cumi cu an hmu fawn lo ding. 24 Asinan ka siahhlawh Kaleb cu thinlung danglam a neih ruangah le pumhlum in keimah i thlun ruangah a va fehnak ram ah cun ka hruailut ding ih a cithlahpawl in ram cu ro ah an co ding. 25 Atu ah phaikuam ah Amalek-mipawl le Kanaan-mipawl an cêng. Thaizing ah her uhla, Tipi Sen zin lamin ramṭhing ah ṭhawnlut uh,» tiah a ti.

Mihĕlpawl an Thi

26 Jehovah in Mosi le Aaron hnenah, 27 «Keimah i mawhthluktu hi miṭha lo mipi-umkhawm hi ziang tik tiang so ka zāwi hai ding? Ka parih Israel tefapawl ih an tuah mi phunzainak cu ka hna in ka rak thei a si. 28 An hnenah Jehovah in, ‹Ka nun rori vekin, ka hnatheihih nan rel vek rori in nan parah ka tuah ding a si. 29 Kum 20 ihsin a tlun lam, nan mipum zateih siar mi nan zaten, keimah i mawhthluktu nan ruangpawl cu hi ramṭhing sungah an rīl ṭheh ding a si. 30 Ka lo cêngter hai ding a si tiih asia ka săm mi ram ah, Jefunneh fapa Kaleb le Nun fapa Joshua siarlo, ziangti lamlam hmanin nan lut lo ding. 31 Asinan mi ih thiarhloh men mi an si ding tiih nan ti mi nan fanau tetepawl cu ka hruailut hai ding ih nan hnawn mi ram cu an theingah ding. 32 Asinan nannih tu cu, hi ramṭhing ah nan ruang an rīl ṭheh ding. 33 Cule ramṭhing ah nan ruang an ziam ṭheh hlanlo nan fapapawl cu ramṭhing ah kum 40 sung tuukhāl ah an cang ding ih nanmai rinumlonak man an tuar ding. 34 Ram nan va thlingthlak ni zât zulhin, ni 40 cu, ni khat hrangah kum khat ciar in kum 40 sung nan mawh nan tuar ding ih, ka lo hnawnnak nan thei ding. 35 Himi hi keimah Jehovah in ka rel zo a si. Keimah dokalhih hmunkhatih fĭnkhawmaw hi miṭha lo mipi-umkhawm parah cutiin ka tuah taktak ding a si. Hi ramṭhing ah hin an hlorál ṭheh ding ih, cu tawkah an thi ṭheh ding,› tiah a ti,» tiin a sim hai.

14:30a sia ka săm: A ṭawng hrampi ah «ka kut ka phar» ti a si.

36 Curuangah ram thlingthla dingin Mosi in a thlah mi pacangpawl, rak kirsal tahratih ram thuhla cu a se zawngih thlennak in amah mawhthluk dingin mipi-umkhawm hmuahhmuah tuahtupawl, 37 ram thuhla ah thu sia a thlentu pacangpawl rori cu Jehovah hmaiah hremnak in an thi. 38 Asinan ram va thlingthla dingih va fehtu pacangpawl lakah Nun fapa Joshua le Jefunneh-ih fapa Kaleb cu an nung.

39 Cun Mosi in hi thupawl hi Israel tefapawl hmuahhmuah hnenah a sim ih, mi senpi cu nasazetin an ṭap ciamco. 40 Cule zingpit teah an tho ih tlang zimah an hung kai, cule annih in, «Ngai hnik, hi tawkah kan um e, Jehovah in in tiamkam mi hmun ah cun kan hung so ding, ziangahtile kan rak sual zo a si!» tiah an ti.

41 Cule Mosi in, «Ziangah so Jehovah thupek nan pahbăl? Nan thil tum cu a hlawhtling lo ding. 42 Hung so hlah uh, culole nan ralpawl in an lo neh pang ding, nan lakah Jehovah a um si lo. 43 Nan hmaiah Amalek-mipawl le Kanaan-mipawl an um si ih, ralnâm in nan thi ding, Jehovah hnen ihsin nan pial zo ruangah, nan hnenah Jehovah a um lo ding,» tiah a ti hai.

44 Asinan annih cun tlang zimih soh an tumruh thotho. Cutisikhalsehla Jehovah-ih Thukham Kuang siseh, Mosi khal siseh riahhmun khuarnak ihsin an păwksuak ve lo. 45 Cun cuih tlang ih a cêng mi Amalek-mipawl le Kanaan-mipawl an rung suk ih anmah cu an run do, cule Hormah tiang an run neh hai.

15

Meisa ih Ur Mi Thilhlăn

1 Jehovah in Mosi hnenah, 2 «Israel tefapawl be awla, an hnenah, ‹Ka lo pek mi, nan luah ding mi ram nan thlen tikah, 3 ranpi rual le rante rual lak ihsin Jehovah hnenih rimthaw tuah dingah, thutiam tlamtlingter dingin simaw, lungpuak thawhhlawm ah maw, nan puai thiah mipawl hrangah simaw, Meiur Thilhlăn asilole raithawinak cu Jehovah hnenah meisa in thilhlăn tuah uh. 4 Cun Jehovah hnenih a thilhlăn run suahpitu cun hriak kalān khat ih ṭhen li ṭhen khat rawi mi sangvut phŭt efa khat ih ṭhen hra ṭhen khat Thlairawl Thilhlăn a rak suahpi pei. 5 Cule tuufa no pakhat ciar thawn Meiur Thilhlăn maw raithawinak simaw zawngah, Inding Thilhlăn hrangah sabitzu kalān khat ih ṭhen li ṭhen khat na timtuah pei. 6 Tuucang pakhat thawn asile, Thlairawl Thilhlăn hrangah hriak kalān khat ih ṭhen thum ṭhen khat thawi rawi mi sangvut phŭt efa khat ih ṭhen hra ṭhen hnih na timtuah pei. 7 Cule Jehovah hrangih rimthaw si dingah Inding Thilhlăn ah sabitzu kalān khat ih ṭhen thum ṭhen khat na hlan pei. 8 Cule Jehovah hnenah Meiur Thilhlăn dingah simaw, thutiam tlamtlingter dingih raithawi dingah simaw, Remnak Thilhlăn dingah simaw, câwpa tûai na timtuah tikah, 9 câwpa tûai zawngah hriak kalān hrek thawi rawi mi sangvut phŭt efa khat ih ṭhen hra ṭhen thum in Thlairawl Thilhlăn a hlan pei. 10 Cule meisa ih ur mi thilhlăn hrangah, sabitzu kalān hrek in Inding Thilhlăn cu Jehovah hrangih rimthaw si dingah na rak keng pei.

11 ‹Cutivekin câwpa tûai hrangah simaw, tuucang hrangah simaw, tuufa no pakhat ciar hrangah simaw meno hrangah simaw tuah ding a si. 12 Nan hlăn mi mipum zât zulhin, an pum zât ihzirin rannung kip parah cutin nan tuah pei. 13 Jehovah hrangih rimthaw a si mi meisa ih ur mi thilhlăn suahpinak cu a rammi hmuahhmuah in hi thilpawl hi hibang tukin an tuah pei. 14 Cule zokhal nan hnenih cêng mi ram dang mi le nan tesinfa san tiangih nan lakih um meisa ih ur mi thilhlăn, Jehovah hrangih rimthaw a hlantu cun nanmai tuahdān vek cekci in a tuah ve pei. 15 Mipungkhawm lak ihta nanmah hrang le nan hnenih cêng ram dang mi hrangah sakhaw dān hmunkhat a si pei, nan tesinfa san tiang kumkhuain sakhaw dān pakhat a si pei. Jehovah hmaiah ram dang mi cu nanmah vek thotho a si ve pei. 16 Nanmai hrang le nan hnenih cêng ram dang mi hrangah dān le cīn le dān pakhat a um pei,› tiah ti hai aw,» tiin a sim.

17 Jehovah in Mosi a besal ih, 18 «Israel tefapawl be awla, an hnenah, ‹Ka lo hruainak ram nan thlen tikah, 19 hitin a si ding, a ram sang nan ei tikah, Jehovah hnenah cawikhai thilhlăn nan hlan pei. 20 Cawikhai thilhlăn hrangah nan nāwn hmaisabik mi sangper nan hlan pei, hruihhmun ihta cawikhai thilhlăn vekin nan hlan pei. 21 Nan nāwn hmaisabik mi sang in cawikhai thilhlăn cu nan tesinfa san tiangin Jehovah hnenah nan pe pei.

Tumlopi Sual hrang Thilhlăn

22 ‹Tum lo piin sual nan tuah ih Jehovah in Mosi hnenih a rak sim mi hi thupekpawl hmuahhmuah nan thlun lo ih, 23 Mosi hmangih Jehovah in thu a lo pek mi hmuahhmuah kha Jehovah in thu a lo pek ni ihsin nan tesinfa san vivo tiang nan thlun lo asile, 24 hitin a si ding, mipi-umkhawm theih loin, tum lo piin sual tuah asile, mipi-umkhawm zaten cīn le dān bangtukin a Thlairawl Thilhlăn le a Inding Thilhlăn zawngah Jehovah hrangih rimthaw Meiur Thilhlăn dingah câwpa tûai pakhat, Sual Thilhlăn dingah mepa no pakhat an hlan pei. 25 Cutin puithiam in Israel tefa umkhawm hmuahhmuah hrangah sualkhuhthawinak a tuah pei, cule an sual ngaidam a si ding, ziangahtile cumi cu tum lo piih ti mi a si. Tum lo piih an tuah mi sual hrangah annih in Jehovah hrangih meisa ih ur mi thilhlăn, an thilhlăn le an Sual Thilhlăn cu Jehovah hmaiah an rak keng pei. 26 Israel tefa umkhawm zate le an lakih cêng ram dang mi khal ngaidam an si pei, ziangruangahtile mipi-umkhawm hmuahhmuah in tum lo piin an tuah mi a si.

27 ‹Cule mi pakhat in tum lo piin sual a tuah asile, Sual Thilhlăn hrangah menu kum khat ti a rak keng pei. 28 Cutin puithiam in tum lo piih thilsual a tuahtupa hrangah sualkhuhthawinak a tuahsak pei, Jehovah hmaiah tum lo piih sual a tuah tikah, a hrangah sualkhuhthawinak tuah ding a si, cule anih cu ngaidam a si ding. 29 Tum lo piih thilsual a tuahtu hrangah, Israel tefapawl lakih rammi hrangah le an lakih cêng ram dang mi hrangah dān pakhat lawng nan nei pei.

Tumhrim Sual hrang Dāntatnak

30 ‹Asinan tumhrimnak thawi thil pakhat a tuahtu cu, rammi a si ah siseh, ram dang mi a si ah siseh, cu pa cun Jehovah a thangsiat a si, anih cu a mipawl lak ihsin sahcat a si pei. 31 Ziangruangahtile Jehovah kamsuakthu a nautat ih a thupek a pahbăl a si, cu pa cu sahcat verver ding a si, amai mawh cu amah in a phur ding,› tiah sim aw,» tiin a sim.

Sabbath Buartu

32 Israel tefapawl ramṭhing ih an um laiah, mi pakhat Sabbath ni ah thinghreu a fâwm lai an hmu. 33 Cule thinghreu a fâwm lai hmutupawl in cu pa cu Mosi le Aaron le mipi-umkhawm hmuahhmuah hnenah an rak hruai. 34 Cu pa cu kiltupawl hnenah an ap, ziangruangahtile a parah ziangtiih tuah ding ti simfiang a si hrih lo.

35 Cun Jehovah in Mosi hnenah, «Cu pa cu thah tengteng ding a si, riahhmun khuarnak lengah mipi-umkhawm hmuahhmuah in lung in an deng pei,» tiah a ti. 36 Cule Jehovah in Mosi thu a pek vekin, mipi-umkhawm hmuahhmuah in cu pa cu riahhmun khuarnak lengah an hruai ih, lung in an deng, cule anih cu a thi.

Sinfen hrang Dān

37 Jehovah in Mosi a bia ih a hnenah, 38 «Israel tefapawl be awla, an tesinfa san tiangin an sinfen tlâng zimpawl ah a fêm tuah dingin le a tlangfêmpawl ah mepian patphâng ther dingin sim hai aw. 39 Cule cumi cu na zoh ih, Jehovah thupek hmuahhmuah na cing ih na tuahsuak hainak dingah angki fêm nan nei pei, cutin lo hlawhhlângtertu ding nan thinlung le nan mit nan thlun lo ding ih, 40 ka thupek hmuahhmuah nan máng ding ih nan tuah thei ding, cule nan Pathian hrangah nan thianghlim ding a si. 41 Nan Pathian si dingih Izip ram ihsin a lo hruaisuaktu Jehovah nan Pathian ka si. Keimah cu Jehovah nan Pathian ka si,» tiin a sim.

16

Korah Helnak

1 Levi fapa Kohath, cumiih fapa Izhar, cumiih fapa Korah cu Eliab fapapawl Dathan le Abiram le Peleth fapa On, Reuben tefapawl thawn paho an hruai, 2 cule annihpawl cu Israel tefa hrekkhat, micallang deuhdeuh, mipi-umkhawm aiawhtu, mipi-umkhawm hotu mi 250 thawn Mosi hmaika-ah an tho. 3 Annihpawl cu Mosi le Aaron dokalhin an fĭnkhawmaw ih an hnenah, «Kan tlunah nanmah le nanmah nan titumaw tuk, ziangahtile mi kip, mipi-umkhawm hmuahhmuah cu an thianghlim ih Jehovah khal an lakah a um. Ziangahso Jehovah-ih mipungkhawm tlunah nanmah le nanmah nan khaisanawk?» tiah an ti.

4 Cun cumi cu Mosi in a theih tikah, lei ah a băwkkhup, 5 cule anih in Korah le a mipi-umkhawm hmuahhmuah hnenah, «Thaizing ah Jehovah in amai ta cu zo a si ti le zo so a thianghlim ti a langter ding ih, a hnenah in naihter ding. A hril mi cu a hnen a naihter ding. 6 Hitin tuah uh, Korah le nan mipi-umkhawm hmuahhmuah in meiling suahdur rak keng uh, 7 thaizing ah Jehovah hmaiah cupawl sungah meisa ret uhla rimhmui ret uh, cule Jehovah ih hril mi pa cu mithianghlim a si ti a lang ding. Nannih Levi fapapawl, nanmah le nanmah nan titumaw tuk!» tiin a sim hai.

8 Cun Mosi in Korah hnenah, «Levi fapapawl i ngai hnik uh, 9 amah lo naihter dingah, Jehovah-ih Biakbûk hna ṭuan dingah le anmah rian dingih mipi-umkhawm hmaiih ding dingah, Israel mipi-umkhawm lak ihsin Israel Pathian in a lo rethran hai hi nan hrangah thil tenau maw a si? 10 Cule anih in nangmah le na hnenih um Levi fapa na unaupawl hmuahhmuah amah naih ko a lo hruai hai a si. Puithiam si ding nan duh hrih maw? 11 Curuangah nangmah le na mipi-umkhawm hmuahhmuah cu Jehovah dokalhin hmunkhatah nan pungkhawm. Ziang a rak tuah ruangah so Aaron parih nan phunzai?» tiah a ti.

12 Cule Mosi in Eliab-ih fapapawl, Dathan le Abiram cu ko dingin mi a thlah, asinan annih in, «Kan hung so lo ding! 13 Ramṭhing ah that ṭheh dingin, hnawiti le khuaitizu luannak ram ihsin in hruaisuah hi thil tenau maw a si? Kan tlunah na lal awter vivo ding maw? 14 Cuihhleiah hnawiti le khuaitizu luannak ram ah in hruailut lo ih, lórampawl le sabit hmuanpawl khal ro ah in pe fawn lo. Hi milaipawlih mit hi na phawrhsuak tum a si maw? Kan hung so lo ding!» tiah an ti.

15 Cun Mosi cu a thin a heng tuk ih Jehovah hnenah, «An thilhlăn rak cohlansak hlah aw. An hnen ihsin lāk pakhat hman ka laksak dah lo ih, an lakih mi pakhat khal ka nater dah fawn lo,» tiah a ti. 16 Cule Mosi in Korah hnenah, «Thaizing ah nangmah le na mipi-umkhawm hmuahhmuah cu nangmah le anmahpawl le Aaron telin Jehovah hmaiah nan ra suak pei. 17 Mi kip an meiling suahdur rak keng fingfing hai sehla, a sungah rimhmui ret ciar hai seh, cule mai meiling lâknak ciar, meiling lâknak 250 cu Jehovah hmaiah rak keng hai seh. Nang le Aaron khal in nan pahnih in meiling lâknak nan rak keng veve pei,» tiah a ti. 18 Cule mi kip in anmai meiling suahdur an rak keng fingfing ih, a sungah meisa an ret, cumi parah rimhmui an ret, cule Tawnawknak Puanthlam luhnak hramah Mosi le Aaron te thawn an ding. 19 Cule Korah in anmah dokalhin mipi-umkhawm hmuahhmuah cu Tawnawknak Puanthlam luhnak hramah a fĭnkhawm hai. Cun mipi zate hnenah Jehovah ropitnak a rung lang.

20 Cule Jehovah in Mosi le Aaron hnenah, 21 «Hmakhatteah anmah ka run kangrál ṭheh theinak dingah, hi mipi-umkhawm lak ihsin rak thiarfihlim aw uh,» tiah a ti.

22 Cun annih cu an băwkkhup ih, «Maw Pathian, titsa hmuahhmuah thlaraupawlih Pathian, mi pakhat ih sualnak ruangah mipi-umkhawm zate parah na thin a heng ding maw si?» tiah an ti.

23 Cule Jehovah in Mosi hnenah, 24 «Mipi-umkhawm hnenah, ‹Korah, Dathan le Abiram teih cēnnak hmunpawl kiangkap ihsin rak kiang uh,› tiin sim aw,» tiin a sim.

25 Cun Mosi cu a tho ih, Dathan le Abiram hnenah a feh, cule Israel upapawl in amah cu an thlun. 26 Cule anih in mipi-umkhawm hnenah, «Hi misualrálpawlih puanthlam hi rak suahsan uh! An thil zianghman thâm hlah uh, culoahcun anmai sualpawl hmuahhmuah ah nan hlorál ding. 27 Cutin annihpawl cu Korah, Dathan le Abiram teih cēnnak hmunpawl kiangkap ihsin an sîp, cule Dathan le Abiram cu an nupipawl, an fapapawl le an fanau tetepawl thawn an ra suak ih an puanthlampawl luhnak ah an ra ding. 28 Cule Mosi in, «Himi ihsin hi hna hmuahhmuah ṭuan dingah Jehovah in in rak thlah a si ti nan thei ding, ziangahtile keimai lungpuak menin hibangpawl hi ka ti hai lo. 29 Hih milaipawl hi milai zate thihdān kēl vekih an thih ih, milai zate tawn kêl an tawn asile, Jehovah in i rak thlah lo a si ding. 30 Asinan Jehovah in thil thar a sersiam ih, leilung in a kâ a an ih, anmah le an ta hmuahhmuah cu a dawlh thluh ih, Sheol sungah an nungcungih an tlakthlak ṭheh asile, nannih in hi milaipawl hin Jehovah an rak hnáwng ti nan theithiam ding,» tiah a ti.

31 Cule hitin a rak si, hi thupawl a ṭawng ṭheh veten an hnuaiih lei cu a kakcat, 32 cule leilung in a kâ a âng ih, an sungkuapawl le Korah hnenih a um mi milai hmuahhmuah cu an neih mi hmuahhmuah thawn a dawlh ṭheh. 33 Anmah le an hnenih a um mipawl hmuahhmuah cu an nungcung in Sheol ah an tla ṭheh, leilung in anmah a kharnĕn hai ih mipungkhawm lak ihsin an hlorál. 34 Cun an kimvelih a um mi Israel hmuahhmuah cu an ṭaprâk awn ruangah an tlânhlo ṭheh, ziangahtile annih in, «Leilung in in dawlh ṭheh ve pang ding,» tiah an ti. 35 Cule Jehovah hnen ihsin meisa a rak suak ih rimhmui hlantu pacang 250 pawl cu a kangrál ṭheh.

36 Cun Jehovah in Mosi hnenah, 37 «Meialh sung ihsin meiling suahdurpawl lasuak dingin puithiam Aaron fapa Eleazar kha sim aw, ziangahtile annih cu an thianghlim ih, ziangmaw zât a hlatnak ah meisa kha hlăwndarh aw. 38 Anmai nunnak siatsuahawknak dingih sual tuahtu hi milaipawlih meiling suahdurpawl cu Biakṭheng khuhnak tlêp hrangah ser hai seh, ziangruangahtile Jehovah hmaiih an hlăn mi a si, curuangah cupawl cu an thianghlim a si, cule cupawl cu Israel tefapawlih hminsinnak an si pei,» tiah a sim. 39 Cule mei ih kangrál mipawl ih an hlăn mi dar meiling suahdurpawl cu puithiam Eleazar in a la hai, cule cupawl cu Biakṭheng khuhnak dingah a ser. 40 Jehovah in Mosi hmangih a hnenih a rak sim vekin Korah le a mipi-umkhawm vekih an canlonak dingah, Aaron cithlah a si lo mi, mi dang zohman in rimhmui ur dingin Jehovah hmaiah an rak naih ding a si lo ti Israel tefapawl hrangih mansalnak ding a si.

41 A thaisun ah Israel tefa umkhawm hmuahhmuah in Mosi le Aaron hnenah, «Jehovah-ih minungpawl nan that a si,» tiin an mawhthluk. 42 Cule hitin a rak cang, Mosi le Aaron dokalhin mipi-umkhawm an fĭnkhawmawk tikah, Tawnawknak Puanthlam lam an hawi ih, ngai hnik, mero in cumi cu a run khuh, cule Jehovah ropitnak a rung lang. 43 Cun Mosi le Aaron cu Tawnawknak Puanthlam hmaiah an ra.

44 Cule Jehovah in Mosi hnenah, 45 «Hmakhatteih anmah ka run kangrál ṭheh theinak dingah hi mipi-umkhawm lak ihsin rak sīp uh,» tiin a sim hai. Cule annih cu an băwkkhup.

Aaron in Hremnak a Cemter

46 Cule Mosi in Aaron hnenah, «Meiling suahdur la aw, Biakṭheng ih meisa parah ret awla, a parah rimhmui ret aw, cule cumi cu mipi-umkhawm hnenah zamrang zetin keng awla, an hrangah sualkhuhthawinak tuah aw. Ziangahtile Jehovah hnen ihsin thinlingnak a ra păwksuak zo. Hremnak cu a thăwk zo a si,» tiah a ti. 47 Cun Aaron in Mosi thupek vekin cumi cu a la ih, mipungkhawm lakah a tlânlut, hremnak cu mi senpi lakah a rak thăwk zo. Cutin rimhmui a ret ih mipi hrangah sualkhuhthawinak a tuah. 48 Cule anih cu mithipawl le a nung mipawl karlakah a ding, cutin hremnak cu rehter a si. 49 Korah ruangih a thi mipawl hleiah hremnak ih a thi mipawl cu 14700 an si. 50 Cule Tawnawknak Puanthlam luhnak ih Mosi hnenah Aaron cu a kirsal, ziangahtile hremnak cu a reh zo.

17

Aaron Kianghrăwl a Cerh

1 Jehovah in Mosi hnenah, 2 «Israel tefapawl hnenah sim awla, an pupá sungkua ciar hnen ihsin kianghrăwl, an pupápawlih sungkua zulhih an hotupawl hmuahhmuah ih kianghrăwl hleihnih in la aw. Kianghrăwl parah an hmin ciar ngan aw. 3 Cule Levi-mipawlih kianghrăwl parah Aaron-ih hmin na ngan pei. Ziangahtile pupá sungkaw lubân pakhat ciar hrangah pakhat fingfing a si ding a si. 4 Cun nang in ka lo tawnnak hmun, Theihpinak hmaiih Tawnawknak Puanthlam sungah cupawl cu na ret pei. 5 Cule hitin a si ding, ka hril mi paih kianghrăwl cu a par ding. Cutin keimah in nangmah an lo dokalhnak, Israel tefapawlih phunzainak ka cemter ding,» tiin a sim.

6 Cule Mosi in Israel tefapawl a bia ih, an hotupawl in kianghrăwl pakhat ciar an pe fingfing, an pupápawlih sungkuapawl zulhin hotu pakhat in kianghrăwl pakhat ciar tiin kianghrăwl hleihnih a kim. Cule Aaron-ih kianghrăwl cu an kianghrăwlpawl lakah a um. 7 Cule Mosi in kianghrăwlpawl cu Theihpinak Puanthlam sungih Jehovah hmaiah a ret hai.

8 Hitin a rak si, a thaisun ah Theihpinak Puanthlam sungah Mosi a lut, cule ngai hnik, Levi sungkaw ta a si mi Aaron kianghrăwl cu a cerh ih par mûmpawl a suah, parpawl a suah ih almond rahpawl a rahsuak. 9 Cun Mosi in kianghrăwl zaten Jehovah hmaika ihsin Israel tefa hmuahhmuah hnenah a rak kengsuak hai, cule an rak zoh ih mi kip in anmai kianghrăwl ciar an rak la.

Kuang sungah Kianghrăwl Ret a Si

10 Cule Jehovah in Mosi hnenah, «Mihĕlpawl hrangih hminsinnak ah retṭha dingin Aaron-ih kianghrăwl kha Theihpinak hmaiah rak kengkir aw, cutin an phunzainak kha ka hnen ihsin na cemter thei ding, cuti a si lo ahcun, an thi pang ding,» tiah a ti. 11 Cutivekcun Mosi in a tuah, Jehovah in amah thu a rak pek vekin a tuah.

12 Cule Israel tefapawl in Mosi hnenah, «Ngai hnik, kan thi ṭheh, kan hlorál ṭheh, kan zaten kan hlorál ṭheh hi! 13 Jehovah-ih Biakbûk a rak naihtu pauhpauh an thi tengteng ding a si. Kan zaten kan thi verver ding maw si?» tiah an ti.

18

Puithiam Sinak

1 Jehovah in Aaron hnenah, «Nangmah le na fapapawl le na pupáih sungkua in na zawngah hmun thianghlim thawi a pehpar mi mawhsualnak nan phur ding, cule nangmah le na fapapawl in nangmah thawn puithiam sinak thawi a pehtlaiaw mi mawhsualnak an phur ding. 2 Theihpinak Puanthlam hmaiah nangmah le na hnenih na fapapawl an um laiah, Levi hnám na unau, na pupáih hnám in an lo kăwp ih an lo rĕn theinak dingah, na zawngah rak hruai ve hai aw. 3 Annih in na ṭulhai mipawl le Puanthlam ṭulhai hmuahhmuah an tawlrel ding, asinan hmun thianghlim thilripawl le Biakṭheng cu an rak naih lo pei, culoahcun annih le nanmah khal, nan thi pang ding. 4 Biakbûk hna hmuahhmuah hrangah annih in nangmah an lo kăwp pei ih, Tawnawknak Puanthlam pawiṭul mipawl an tawlrel pei, asinan mi dang cun nan kiang an lo naih lo pei. 5 Cule Hmun Thianghlim ṭuanvo le Biakṭheng ṭuanvo cu nanmah in nan la pei, cutin Israel tefapawl parah thinlingnak a um nawn lo ding. 6 Ngai hnik, nan unau Levi-mipawl cu keimah in Israel tefapawl lak ihsin ka la hai zo, annih cu Tawnawknak Puanthlam hna ṭuan dingah Jehovah in nan hnenih a lo pek mi thilpek an si. 7 Curuangah nangmah le na fapapawl in nangmah thawn Biakṭheng thil tinkim hrang le puanzar dungih puithiam hna nan hlĕnsuak ding, cule nannih in nan hna nan ṭuan ding. Rawngbawlnak thilpek ah nan puithiam hna hi ka lo pe a si, asinan a rak naihtu mi dang cu thah an si pei,» tiah a ti.

Puithiam hrang Rawl

8 Cule Jehovah in Aaron hnenah, «Ngai hnik, keimah rori in keimai cawikhai thilhlănpawl ṭuanvo, Israel tefapawlih thilpek thianghlim hmuahhmuah na hnenah ka lo pebêt a si, kumkhaw sakhaw dān hrangah cupawl cu nangmah le na fapapawl covo ah ka lo pebêt a si. 9 Hih meisa ih ur lo mi, a thianghlim zet mi thilpawl cu nangmai ta an si pei: ka hnenih an hlăn mi an thilhlăn tinkim, Thlairawl Thilhlăn tinkim le Sual Thilhlăn tinkim le Mawh Thilhlăn tinkim pawl cu nangmah le na fapapawl hrangah a thianghlim zet mi an si pei. 10 Cumi cu a thianghlim zet mi hmun ah na ei hai pei, mipa kip in nan ei ding a si. Cumi cu nan hrangah thil thianghlim a si pei. 11 Himi Israel tefapawlih sēp thilhlăn hmuahhmuah thawn an thilpek cawikhai thilhlăn khal hi nangmai ta a si. Kumkhaw sakhaw dān hrangah cupawl cu nangmah ka lo pe a si, na fapapawl le na fanupawl khal nangmai zawngah ka pe hai a si. Na sungkua lakih a thiang mi kip in cumi cu an ei pei. 12 Hriak thar ṭhabik hmuahhmuah, sabitzu thar le thlairawl thar ṭhabik hmuahhmuah, Jehovah hnenih an pek mi rah hmaisabikpawl cu nangmah ka lo pe a si. 13 Jehovah hnenih an rak ken mi an ram ih an khawm hmaisabik mi rah pauhpauh cu nangmai ta an si pei. Na sungkua lakih a thiang mi kip in cumi cu an ei thei pei.

14 «Israel ram sungih serhhran zo mi thil pauhpauh cu nangmai ta a si ding. 15 Jehovah hnenih an rak ken mi, titsa hmuahhmuah lakih sūl áwng hmaisabiktu pauhpauh cu, milai a si ah maw, ṭilva a si ah maw nangmai ta an si pei. Sikhalsehla milai fatir cu na tlen tengteng pei ih, a thianglo mi ṭilva fatir khal na tlen pei. 16 Cule tlen ding mipawl cu thla khat an ti tikah tlen ding an si ih, an man cu nangmah ih na khiah vekin, hmun thianghlim shekel bangtukin ngun tangka shekel panga na pe pei, shekel pakhat cu gerah 20 thawn an tlukaw. 17 Asinan câw fatir, tuu fatir le me fatir cu na tlen lo pei, cupawl cu an thianghlim a si. Nang in an thisen cu Biakṭheng parah na theh pei ih, Jehovah-ih rimthaw dingah meisa ih ur mi thilhlăn ah an thau na ur pei. 18 Cule sēp thilhlăn a ṭâng le a vawrh lam cāwn cu na ta a si vekin an tit cu nangmai ta an si pei.

19 «Israel tefapawl in Jehovah hnenih an hlăn mi cawikhai thilhlăn thianghlim hmuahhmuah cu kumkhaw sakhaw dān dingah na hnenah ka lo pe, na fapapawl le na fanupawl khal nangmah zawngah ka pe hai a si. Cumi cu nangmah le na hnenih um na cithlahpawl thawi Jehovah hmaiih kumkhaw cite thukham a si,» tiah a ti.

20 Cun Jehovah in Aaron hnenah, «Nang cun an ram sungah ro na nei lo pei ih an lakah covo ziangkhal na nei fawn lo pei. Keimah cu Israel tefapawl lakah na covo le na ro ka si. 21 Ngai hnik, Levi tefapawl cu Tawnawknak Puanthlam hna an ṭuan mi hna aiah Israel ram sungih ṭhen hra ṭhen khat hmuahhmuah ro ah ka pe hai a si. 22 Israel tefapawl cun Tawnawknak Puanthlam an rak naih nawn lo pei, culoahcun sual phurin an thi pang ding. 23 Asinan Levi-mipawl cun Tawnawknak Puanthlam hna an ṭuan pei ih, anmai mawhsualnak cu anmah in an phur ding. Israel tefapawl lakah ro an nei lo pei ti mi cu nan tesinfa san tiangin, cumi cu kumkhaw sakhaw dān a si ding. 24 Ziangahtile Jehovah hnenih cawikhai thilhlăn hrangih an hlăn mi, Israel tefapawlih ṭhen hra ṭhen khat cu an ro dingah Levi-mipawl ka pe zo a si. Curuangah an hnenah, ‹Israel tefapawl lakah ro an nei lo pei,› ka rak tinak a si,» tiah a ti.

25 Cun Jehovah in Mosi hnenah, 26 «Levi-mipawl hnenah hitin sim awla, an hnenah, ‹Nan ro dingah an hnen ihsin ka lo pek mi Israel tefapawlih ṭhen hra ṭhen khat sung ihta nan lâk tikah, cumiih ṭhen hra ṭhen khat cu Jehovah hnenih cawikhai thilhlăn hrangah cumi cu na hlan pei. 27 Cule nan cawikhai thilhlăn cu nan hrangah thlairawl hruihhmun ih thlai vekah le sabit sawrkhur luangliam vekah lo ruahsak a si ding. 28 Cutivekin nannih in Israel tefapawl hnen ihsin nan ngah mi nan ṭhen hra ṭhen khat zate ihsin Jehovah hnenah cawikhai thilhlăn nan hlan fawn ding a si, cule cumi ihta Jehovah-ih cawikhai thilhlăn cu puithiam Aaron hnenah nan pe ding a si. 29 Thawhhlawm nan ngah mi hmuahhmuah lakih Jehovah covo ding cawikhai thilhlăn pauhpauh cu an lakih a ṭhabik ihsin an lak ihta serhhran mi si dingah nan hlan pei,› tiah ti aw. 30 Curuangah nang in an hnenah, ‹Cumi lakih a ṭhabik nan cawikhai tikah, a hlei mi cu Levi-mipawl hrangah hruihhmun ih suak mi le sabit sawrkhur ih suak mi vekah siar a si pei. 31 Nanmah le nan sungkuapawl in cumi cu khui hmun khalah nan ei thei, ziangahtile cumi cu Tawnawknak Puanthlam sungih nan hna hrangih nan hlawhman a si. 32 Cule cupawl lakih a ṭhabik nan hlăn tikah, cumi ruangah sual nan phur lo ding. Asinan nannih in Israel tefapawlih thilpek thianghlimpawl nan bawrhbangter lo pei, culole nan thi pang ding,› tiah na ti hai pei,» tiah a ti.

19

Câwlá Sen

1 Jehovah in Mosi le Aaron hnenah, 2 «Himi hi Jehovah thupek mi dānih sakhawdān a si, ‹Israel tefapawl hnenah, taksa himlonak a nei lo mi le hngawngkol bât dah lo mi, sawisel ding um lo câwla sen pakhat nan hnenih rak keng dingin sim hai uh. 3 Cumi cu anih in riahhmun khuarnak lengah a hruai ih a hmaika-ih thah a sinak dingah nannih in cumi cu puithiam Eleazar nan pe pei. 4 Cule puithiam Eleazar in a kutzung in a thisen hrekkhat a la pei ih, Tawnawknak Puanthlam hmai lam rori ah a thisen cu vei sarih a theh pei. 5 Cun câwla cu amai mithmuhah ur a si pei, a vun, a tit, a thisen le a êk pawl cu ur a si pei. 6 Cule puithiam in sidar thing le hissop le pat senlar a la pei ih, câwla kāng rero laifangah a denglut pei. 7 Cun puithiam cu a hnipuan a sawp pei, tidai ah a takpum a khawlh pei ih cuṭhehin riahhmun khuarnak ah a lut pei. Puithiam cu zan lam tiang mithiang lo a si pei. 8 Cule cumi a urtupa cun tidai ah a hnipuan a sawp pei, tidai ah a takpum a khawlh aw pei ih, zan lam tiang mithiang lo a si pei. 9 Cun a thiang mi mi pakhat in câwla vutcâm cu a rutkhawm pei ih riahhmun khuarnak leng hmun thiangfai ah cupawl cu a retṭha hai pei. Cule cumi cu Israel tefa umkhawm hrangah thianternak tidai si dingah na retṭha pei. Cumi cu sual ihsin thianawkternak hrangah a si. 10 Cule câwla vutcâm khawmtu cun a hnipuan a sawp pei ih, zan lam tiang mithiang lo a si pei. Cumi cu Israel tefapawl hrangah thenfainak le an lakih a cêngtu ram dang mi hrangah kumkhaw sakhaw dān a si pei.

Mithiang lo hrang Tidai

11 ‹Mithi pakhat ih taksa a daingahtu pauhpauh cu ni sarih sung mithiang lo an si pei. 12 Anih in a ni thumnak le a ni sarihnak ah amah le amah ti thawn a thianfaiaw pei, cule mithiang a si ding. Asinan a ni thumnak le a ni sarihnak ih a thianfaiawk lo asile anih cu mithiang a si lo ding. 13 Mithi zo pakhat khat ih taksa a dai ih a thianfaiaw lo tu pauhpauh cun Jehovah-ih Biakbûk an bawrhhlawhter a si. Cu pa cu Israel-mipawl lak ihsin sahcat a si pei. Anih cu mithiang lo a si pei, ziangruangahtile thianternak tidai a parah theh a si lo, a thianlonak cu a parah a um lai a si.

14 ‹Himi hi mi pakhat puanthlam sungih a thih tikih dān a si. Cuih Puanthlam sungih a luttu le cuih puanthlam sungih a umtu hmuahhmuah cu ni sarih sung mithiang lo an si pei, 15 cule sinhnget lo mi, a áwngaw mi bungbel pauhpauh cu an thiang lo. 16 Ramlak ah ralnâm ih thah mi maw, mah te thi mi maw, mi pakhat ih ruh maw, thlān simaw a thâmngahtu pauhpauh cu ni sarih sung mithiang lo an si pei. 17 Cule annih in mithiang lopa hrangah sual thenfainak câwla urnak vutcâm hrekkhat an la pei ih, cupawl cu bel sungah an ret pei, cule a parah ti luanglai thun a si pei. 18 A thiang mi mi pakhat in hissop a la pei ih, cumi cu cuih tidai sungah a hnim pei, cumi cu puanthlam, bungbel hmuahhmuah, cutawk ih um milai hmuahhmuah, asilole mithi ruh, mi ih thah mi, mithi simaw, thlān simaw a thâmngahtu parah a theh pei. 19 A thiang mi pa in a thianglo mi pa kha a ni thumnak le a ni sarihnak ah a theh pei, cule a ni sarihnak ah a thianfaiaw pei, a hnipuan a sawp pei ih, tidai in a khawlh aw pei, cule zan lam a si tikah a thiang ding a si.

20 ‹Asinan a thianglo le a thianfaiaw lo pa cu mipungkhawm lak ihsin sahcat a si pei, ziangruangahtile Jehovah-ih hmun thianghlim a rak bawrhbangter a si. A parah thianternak tidai theh a rak si lo, anih cu mithiang lo a si. 21 Cumi cu an hrangah sakhaw dān a si lan ta pei. Thianternak tidai a thehtupa cun a hnipuan a sawp pei, cule thianternak tidai a thâmtu cu zan lam tiang mithiang lo a si pei. 22 Mithiang lo pa in a thamngah mi cu ziangkhal a thianglo pei. Cule cumi thâmtu cu zan lam tiang mithiang lo a si pei,› tiin sim uh,» tiah a ti.

20

Miriam a Thi

1 Israel tefa, mipi-umkhawm hmuahhmuah cu a thla khatnak ah Zin Ramṭhing an ra thleng ih, mi senpi cu Kadesh ah an câm, cule cu tawkah Miriam a thi ih, cu tawkah cun an phum ta.

Lungpi ihsin Tidai

2 Mipi-umkhawm hrangah tidai a um lo, cule Mosi le Aaron dokalhin an fĭnkhawmaw. 3 Cule mi senpi cun Mosi an to ih, «Jehovah hmaiih kan unaupawl an thih laiah khan rak thi ve men nungla maw! 4 Kanmah le kan ṭilvapawl hitawk ih thi dingin ziangahso hi ramṭhing ah Jehovah-ih mipungkhawm hi in hruaisoh? 5 Ziangahso himi hmun ṭhalo ih in hruai dingin Izip ihta in suahter? Thlairawl siseh, theipipawl siseh, sabit hripawl siseh, talê rahpawl siseh a umlonak hmun a si ih, in ding tidai khal a um lo,» tiin an ṭawng ciamco. 6 Cule Mosi le Aaron cu mipungkhawm hmaika ihsin Tawnawknak Puanthlam luhnak ah an feh ih, lei ah an băwkkhup. Cule an hnenah Jehovah-ih ropitnak a rung lang.

7 Cun Jehovah in Mosi hnenah, 8 «Na kianghrăwl la aw, nangmah le na unaupa Aaron in mipi-umkhawm fĭnkhawmawter uh. An mithmuhah lungpi hnenah ṭawng awla, a tidai a suah ding, cutin nang in lungpi sung ihsin an hrangah tidai na suakter ding ih mipi-umkhawm le an ṭilvapawl na inter pei,» tiin a sim. 9 Cule anih in thu a pek vekin Mosi in Jehovah hmai ihsin kianghrăwl cu a la.

10 Cule Mosi le Aaron in mipungkhawm cu lungpi hmaiah an fĭnkhawm, cule anih in an hnenah, «Ngai hnik uh, nannih mihĕlpawl! Himi lungpi sung ihsin nan hrangah tidai kan suakter ding maw si?» tiah a ti. 11 Cun Mosi in a kut a hawi ih a kianghrăwl in lungpi cu vei hnih a vuak, cule a tawrih tawrin tidai a ra suak ih mipi-umkhawm le an ṭilvapawl in an in.

12 Cun Jehovah in Mosi le Aaron hnenah, «Israel tefapawl ka thianhlimnak hmuter dingin keimah in zum lo ruangah, nannih in hi mipungkhawm hi anmah ka pek mi ram ah nan hruailut lo pei,» tiah a ti. 13 Himi cu Meribah tidai a si, ziangruangahtile Israel tefapawl in Jehovah an to a si, cule amah in an lakah a thianhlimnak a hmuh hai.

Edom-mipawlih Khīrnak

14 Cule Mosi in Edom siangpahrang hnenah Kadesh ihsin palaipawl a thlah hai ih, «Na unaupa Israel in, ‹Kan parih a tla mi retheihzăwnzaihnak, 15 ziangti vekin Izip ah kan pupápawl an sukthla ti le Izip ah cān reipi kan cêng ti le Izip-mipawl in kanmah le kan pupápawl in zawnzaiter ti na thei ṭheh. 16 Jehovah hnenih kan ausuak tikah, anih in kan aw in thei, cule vancungmi a thlah ih Izip ihta in lasuak. Ngai hnik, hitawk na ramri zimteih a um mi khua, Kadesh ah kan um a si. 17 Zangfahten na ram in paltlăngter hram aw. Lópawl siseh, sabit hmuanpawl siseh kan pahtlăng lo ding, tikhur tidai khal kan in fawn lo ding, siangpahrang zinpi kan zawh ding. Na ramri kan lan hlanlo vawrh lamah siseh, keh lamah siseh kan pial lo ding,› tiin a ti a si,» tiah an ti.

18 Cun Edom in a hnenah, «Ka ram na paltlăng lo pei, culoahcun ralnâm thawn nangmah lo do dingin ka ra păwk ding,» tiah a ti.

19 Cule Israel tefapawl in a hnenah, «Zinpi in kan feh ding sokhaw, keimah in maw ka sumhnám in simaw na tidai kan in pang asile, a man ka lo pe ding, thil dang zianghman ti loin, ke in lo paltlăng menmen ning,» tiah an ti.

20 Cun anih in, «Na paltlăng ding a si lo,» tiah a ti. Cule Edom cu anmah do dingin mi tampi le a cak mi kut thawn a ra suak. 21 Cutiin Edom in Israel cu a ramkulh sung paltlăngter a siang lo, cutin Israel cu a hnen ihsin a pial.

Eleazar Puithiam Lubik ah a Cang

22 Israel tefa, mipi-umkhawm hmuahhmuah cu Kadesh ihsin an suak ih Hor Tlang an thleng. 23 Cule Edom ramri kiang Hor Tlang ah Jehovah in Mosi le Aaron hnenah, 24 «Aaron cu a mipawl hnenah fĭn a si thlang ding. Ziangahtile anih cu Israel tefapawl ka pek mi ram ah a lut lo ding, ziangruangahtile Meribah tidai hmun ah ka kamsuakthu dokalhin nan hél. 25 Aaron le a fapa Eleazar kha hruai awla, Hor Tlang ah hun hruaiso aw. 26 Cule Aaron in a sinfen hlít sehla a fapa Eleazar hruhter seh, Aaron cu a mipawl hnenah fĭn a si ding ih, cu tawkah a thi ding a si,» tiah a ti. 27 Cule Jehovah ih thu a pek vekin Mosi in a tuah ih, mipi-umkhawm hmuahhmuah mithmuhah Hor Tlang ah an fehso. 28 Mosi in Aaron-ih sinfen cu a hlihsak ih, cupawl cu a fapa Eleazar a hruhter, cule cutawk tlang zimah Aaron a thi. Cun Mosi le Eleazar cu tlang ihsin an rung ṭum.

Aaron a Thi

29 Mipi-umkhawm hmuahhmuah in Aaron a thi ti an hmuh tikah Israel sungkua hmuahhmuah in Aaron cu ni 30 sung an ṭah.

21

Arad Neh a Si

1 Negev ih a cêng mi Kanaan-mi siangpahrang Arad in Israel cu Atharim lamzin in an ra lai ti hna in a thei. Cun anih in Israel cu a rak do ih, mi hrekkhat a kai hai. 2 Cule Israel in Jehovah hnenah thutiam a tuah ih, «Hi mipi hi ka kut ih in pek taktak asile, an khuapawl khi ka siatsuah ṭheh verver ding,» tiah a ti. 3 Cule Jehovah in Israel-ih auaw cu a ngai ih, Kanaan-mipawl cu an kut ah a pe, cule annih in anmah le an khuapawl cu an siatsuah ṭheh verver. Cule cumi hmun hmin cu aHormah tiah kawh a si.

21:3a Hormah: «Siatsuah ṭheh verver» tinak a si.

Rul

4 Cun annih cu Edom ram helkûal dingin Hor Tlang ihsin Tipi Sen zinpi zawhin an feh, lam tluanah mi senpi thinlung a nau ṭheh. 5 Cule mi senpi in Pathian dokalhin le Mosi dokalhin, «Ziangah so ramṭhing ih thi dingin Izip ihta in hruaisuak? Rawl a um si lo, tidai a um si lo, hi sang santlailo hi kan nunnak in a fihin a fih,» tiah an ti. 6 Curuangah Jehovah in mi senpi lakah arulpawl a thlah ih, mi senpi an cuk ciamco, cule Israel mi senpi lakih mi tampi an thi.

21:6a rulpawl: rulngân a si.

7 Curuangah mi senpi cu Mosi hnenah an ra ih, a hnenah, «Thilsual kan rak tuah a si, ziangahtile Jehovah dokalhin le nangmah dokalhin kan rak ṭawng. Kan hnen ihsin rulpawl a lâkhlohnak dingah Jehovah hnenah thlacam aw,» tiah an ti. Cule Mosi in mi senpi hrangah thla a cam.

Dar Rul

8 Cun Jehovah in Mosi hnenah, «Rul pakhat in tuah awla, ṭhuam parah tar aw, cule hitin a si ding, rul cuk mi kip in cumi an zoh tikah an nung ding,» tiah a ti. 9 Cule Mosi in dar rul a tuah ih, ṭhuam parah a tar, cule hitin a rak cang, rul in mi pakhat khat a cuk asile, anih in dar rul cu a zoh ih a nung.

Moab Ram Pannak

10 Israel tefapawl cu an păwk ih Oboth ah riahhmun an sâm. 11 Cule Oboth ihsin an feh ih, nisuahnak lam, Moab nisuahnak lam kap ramṭhing ih aIje Abarim ah riahhmun an sâm. 12 Cutawk ihsin an ṭhawn ih Zered Phaikuam ah riahhmun an sâm. 13 Cutawk ihsin an ṭhawn ih Amor-mipawl ramri ihsin a thăwk mi ramṭhing ih Arnon tiva khat lam kapah riahhmun an sâm, ziangahtile Arnon cu Moab le Amor-mipawl karlakih um Moab ramri a si. 14 Curuangah Jehovah-ih Raldonakpawl Cazual ah hitin an rel:

21:11a Ije Abarim: Hebru ṭawng a si ih, a sullam cu «Abarim lei vurpâwng» tinak a si.

«Sufah ih a um mi Waheb,
Arnon ih lihăwngvapawl tla,
15 Lihăwngvapawlih kap hrâpnak,
Ar cēnnak a rung thleng mi,
Moab ramri ih ṭhumaw cu,»

tiin.

16 Cutawk ihsin Beer ah an feh, cumi cu Jehovah in Mosi hnenah, «Mipi fĭnkhawmter aw, cule tidai ka pe hai ding,» tiih a tinak tikhur kha a si. 17 Cun Israel-mipawl in,

«Ra irhsuak aw, maw tikhur!
Nan zaten a hnenah hla sak uh,
18 Uktupawl ih an laih mi tikhur,
Miphun upawl ih laih mi,
An fungpawl hmangin, dān petu ih thupeknak in,»

ti mi hi hla hi an sak.

Cule ramṭhing ihsin Mattanah ah, 19 Mattanah ihsin Nahaliel ah, Nahaliel ihsin Bamoth ah, 20 cule Moab ram ih phaikuam ih um Bamoth ihsin ramcar an run thlirnak Pisgah tlang zimah an feh.

Sihon le Og Nehnak

21 Cun Israel in Amor-mipawlih siangpahrang Sihon hnenah palaipawl a thlah ih, 22 «Na ram paltlăng ning. Lópawl simaw, sabit hmuanpawl ah simaw kan pial lo ding, tikhur tidai kan in lo ding. Na ramri kan lan hlanlo siangpahrang lampi kan zawh ding,» tiah a ti. 23 Asinan Israel in a ramkulh sung a paltlăng ding Sihon in a siang lo. Cun Sihon in a minung hmuahhmuah a khawm ih ramṭhing ih Israel do dingin an ra păwksuak, cule anih cu Jahaz ah a ra ih Israel cu a do. 24 Cun anih cu Israel in ralnâm hriam in a neh ih Arnon tiva ihsin Jabbok tiva tiang, Ammon tefapawl ramri tiang rori a ram a lawn, ziangahtile Ammon tefapawlih ramri cu a kilhim. 25 Cule Israel in khua hmuahhmuah cu a lâk ṭheh, cule Israel cu Amor-mipawlih khawpi hmuahhmuah, Heshbon le a kiangkap khawte hmuahhmuah ah a cêng. 26 Ziangahtile Heshbon cu Moab siangpahrang hmaisa a dotu le a kut ihsin Arnon tiva tiang rori a ram pumpi rak laksak thluhtu Amor-mipawlih siangpahrang Sihon-ih khawpi a si. 27 Curuangah thufim simtupawl in,

«Heshbon ah ra uh, cumi cu dĭn si seh,
Sihon khawpi cu rĕmṭhat si seh.
28 Ziangahtile Heshbon ihsin meisa a darh,
Sihon khawpi ihsin meisa a darh,
Cumi in Moab-ih Ar khua a kangrál,
Arnon tiva hmun sâng pawl ih lalpawl cu.
29 Camsiat na si, nang Moab!
Nan hlorál e, maw Kemosh minungpawl!
Kemosh in a fapapawl cu raltlân vekin a pe hai,
A fanupawl cu sáltannak ah,
Amor-mipawlih siangpahrang Sihon hnenah.
30 Asinan anmah kan rak kap,
Heshbon cu Dibon tiang rori a siatrál.
Medeba kiang, Nofah tiang rori an ram ṭhing ko kan tuah,»

tiah a ti.

31 Cutiin Israel cu Amor-mipawl ram ah a cêng. 32 Cun Mosi in Jazer thlingthla dingin mi a thlah hai. Cule a kiangnai khawtepawl an la ih cutawk ih Amor-mipawl cu an dawisuak.

33 Cule an her ih Bashan zin in an so. Cun Bashan siangpahrang Og cu anmah do dingah amah le a mipawl hmuahhmuah cu Edrei ah doaw dingin an ra suak. 34 Cun Jehovah in Mosi hnenah, «Amah cu ṭih hlah, ziangahtile a minung hmuahhmuah le a ram thawn amah cu na kut ah ka lo pe zo. Heshbon ih cêng Amor-mipawlih siangpahrang Sihon parih na tuah vekin a par khalah na tuah pei,» tiah a ti. 35 Cule annih in amah, a fapapawl le a miphun hmuahhmuah cu pakhat te hman nungdam tâng nawn lo tiangin an neh, cule a ram cu an lawnsak.

22

Balak in Balaam a Ko

1 Israel tefapawl cu an ṭhawn ih Jeriko ralden Jordan tiva kapih Moab phairawn ah riahhmun an sâm. 2 Cule Zippor fapa Balak in Amor-mipawl parih Israel in a tuah mi hmuahhmuah cu a hmu ṭheh. 3 Cule Moab cun mi senpi cu a ṭih tuk lawmmam, ziangruangahtile annih cu an tam tuk, cule Moab cu Israel tefapawl ṭih ah a thin a phâng. 4 Cule Moab in Midian upapawl hnenah, «Atu ah hi mipungkhawm hin, câwcang in lóram hrampi a piatfai thluh bangin kan kimvelih ziangtinkimin a piatfai ṭheh zik a si hi,» tiah a ti. Cule cuih cān ah Zippor fapa Balak cu Moab rammipawlih siangpahrang a si. 5 Cun anih in Pethor ih a um mi Beor fapa Balaam hnenah amah ko dingin palaipawl a thlah. Pethor cu amai miphunih fapapawl ram ih Tiva kiangih um a si. Cule, «Zoh hnik, Izip ihsin miphun pakhat an ra. Ngai hnik, leilung vangdâp an khuh ṭheh ih keimah rite ah an um zo! 6 Curuangah atu ah ra awla, anmah ka neh ih ram ihsin ka dawisuak thei pangah ka hrangah hi mi senpi hi ra camsiat hram aw, ziangahtile annih cu ka hrangah an cak tuk. Ziangahtile thlawsuah na pek mi cu thlawsuah a si ih, na camsiat mi cu camsiat a si ti ka thei,» tiah a ti.

7 Cule Moab upapawl le Midian upapawl cu an kut ih tinzoh man thawn an păwksuak, cule Balaam hnenah an thleng ih Balak-ih ṭawngkampawl cu amah an sim. 8 Cule anih in an hnenah, «Tuihzan cu hi tawkah riak uhla, Jehovah in ka hnenih a rel vekin nan hnenah thu ka lo thlĕnkir ding,» tiah a ti. Cule Moab tlangsuakupapawl cu Balaam hnenah an câm.

9 Cun Balaam hnenah Pathian a ra ih, «Na hnenih umpawl hi zo so an si?» tiah a ti.

10 Cule Balaam in Pathian hnenah, «Moab siangpahrang, Zippor fapa Balak in ka hnenah mi a rak thlah ih, 11 ‹Ngai hnik, Izip ihsin miphun pakhat an ra suak ih leilung vangdâp an khuh ṭheh. Atu ah ra awla, anmah ka neh ih ka dawisuak thei hai pangah ka hrangah anmah cu camsiat hai aw,› tin i ti,» tiah a ti.

12 Cule Pathian in Balaam hnenah, «An hnenah na feh lo pei, mi senpi na camse lo pei, ziangahtile annih cu thlawsuah co mi an si,» tiah a ti.

13 Cule Balaam cu zing ah a tho ih Balak-ih tlangsuakupapawl hnenah, «Nan ram ah va tlungkir uh, ziangahtile Jehovah in nan hnenih feh ding in siang lo,» tiah a ti hai.

14 Cule Moab tlangsuakupapawl cu an tho ih Balak hnenah an tlung, cule a hnenah, «Balaam in kan hnenih rat ding in êl,» tiah an ti.

15 Cun Balak in anmah hnakih tam le anmah hnakih upattlak tlangsuakupapawl a thlahsal. 16 Cule annih cu Balaam hnenah an ra ih a hnenah, «Zippor fapa Balak in, ‹Ka hnenih ra dingah zianghman in lo kham hlah seh. 17 Ziangahtile keimah in nasazetin ka lo sunlawih tengteng ding ih, ka hnenih na sim mi pauhpauh ka tuah ding. Curuangah zangfahten ra awla, hi mi senpi hi i camsiatsak aw,› a lo ti,» tiah an ti.

18 Cun Balaam in a sawn ih, Balak-ih siahhlawhpawl hnenah, «Balak cun sui le ngun ih khat mi a inn hman i pe sehla, a te khal a tûm khal tuah dingah Jehovah ka Pathian kamsuakthu leng ka lan thei lo. 19 Curuangah atu ah zangfahten hi tawkah tuihzan khal cām uhla, Jehovah in ka hnenah ziang a simbêt ding ti ka thei ding,» tiah a ti hai.

20 Cule zan ah Balaam hnenah Pathian a ra ih, a hnenah, «Nangmah ko dingin milaipawl an rat ahcun tho awla, an hnenah feh aw, asinan na hnenih ka lo sim mi kamsuakthu lawng na tuah pei,» tiah a ti. 21 Cule Balaam cu zingte ah a tho ih, a lāk a dăm, cule Moab tlangsuakupapawl zawngah cun a feh ve.

Lāk le Vancungmi

22 Cun a feh ruangah Pathian thinhengnak cu a alh ih a doral vekin lamzin ah Jehovah-ih vancungmi cu a ding. Cule anih cu a lāk a to rero lai a si ih a hnenah a siahhlawh pahnih an um. 23 Lāk in a kut ih ralnâm phawi cia thawi lamzin ih ding Jehovah-ih vancungmi cu a hmu, cule lamzin kapah lāk cu a pial ih ló lakah a lut. Curuangah Balaam in lāk cu lamzin lamah herkir dingin a thawi. 24 Cun Jehovah-ih vancungmi cu kap hnih ih hruang umnak sabit hmuanpawl karlak zin bitnak ah a ding. 25 Cule lāk in Jehovah-ih vancungmi a hmuh tikah hruang a va tâwt ih Balaam-ih ke cu hruang ah a rekbĕt, curuangah anih in lāk cu a thawisal.

Lāk a Ṭawng

26 Cun Jehovah-ih vancungmi cu a va fehbêt ih, vawrh lamah siseh, keh lamah siseh hernak ding a umlonak hmun a cêpnak hmun ah a va ding. 27 Cule lāk in Jehovah-ih vancungmi a hmuh tikah Balaam-ih tăngah a băwk, curuangah Balaam-ih thinheng cu a alh ih a fung in lāk cu a thawi. 28 Cun Jehovah in lāk kâ a ăwnsak ih Balaam hnenah, «Ziang ka lo ti ruangah so hitiih vei thum rori i thawi ciamco?» tiah a ti.

29 Cule Balaam in lāk hnenah, «I dekcăwk ruangah a si. Ka kut ah ralnâm rak um sehla cu aw, atu ah ka lo that ding nan!» tiah a ti.

30 Cun lāk in Balaam hnenah, «Na ta ka si ihsi thăwkin tuihni tiang na to ṭheu mi na lāk ka si ko lo maw? Hivekin ka lo ti dah maw si?» tiah a ti.

Cule anih in, «Ti dah lo,» tiah a ti.

31 Cun Jehovah in Balaam-ih mit a vanter ih a kut ih ralnâm phawi cia, lamzin parih ding Jehovah-ih vancungmi cu a hmu, cule a kûn ih a băwkkhup. 32 Cule Jehovah-ih vancungmi in, «Ziangruangah na lāk vei thum tiang na thawi ciamco? Ngai hnik, na lamzin in i kalh ruangah nangmah lo kham dingin ka ra a si. 33 Lāk in keimah i hmu ih hitin vei thum rori i rak kian a si. Amah in i kian lo ta sehla cu atu ah ka lo that zo tengteng ding ih, anih cu ka nungter ding,» tiah a ti.

34 Cule Balaam in Jehovah-ih vancungmi hnenah, «Sual ka rak tuah a si, ziangahtile keimah khamin lamzin ah na rak ding ti ka thei lo. Atu ah na mithmuhih thil ṭhalo a si ahcun, ka kirsal ding,» tiah a ti.

35 Cun Jehovah-ih vancungmi in Balaam hnenah, «Milaipawl hnenah va feh ko, asinan na hnenih ka lo sim mi kamsuakthu lawng na sim pei,» tiah a ti. Cutin Balaam cu Balak-ih tlangsuakupapawl hnenah a feh.

36 Balaam a ra ti Balak ih a theih tikah, amah hmuak dingin an ramri ih Moab-mipawlih khua pakhat ah a va feh. Cumi cu ramri a si mi Arnon tiva kiangah a um. 37 Cun Balak in Balaam hnenah, «Nangmah ko dingin na hnenah thungaithlakin mi ka rak thlah hai a si lo maw? Ziangahso ka hnenih na rat lo? Kei hin ka lo sunlawih thei lo maw si?» tiah a ti.

38 Cule Balaam in Balak hnenah, «Ngai hnik, na hnenah ka ra zo! Atu ah hin, ziang tal rel theinak ka nei maw si? Pathian in ka kâ ih kamsuakthu a ret mi ka sim ding,» tiah a ti. 39 Cule Balaam cu Balak zawngah a feh ih Kirjath Huzoth an thleng. 40 Cun Balak in câwcangpawl le tuupawl in rai a thawi ih, Balaam le a zawngih um tlangsuakupapawl cu a hrekkhat a kuat hai. 41 A thaizing ah cun hitin a si, Balak in Balaam cu a hruai ih Baal hmun sângpawl ah a kaipi. Cutin cutawk ihsin mi senpi hrekkhat umnak hliah dingah a si.

23

Balaam Thuphuan Vei Khatnak

1 Balaam in Balak hnenah, «Hi tawkah ka hrangah biakṭheng pasarih in i tuahsak aw, cule hi tawkah ka hrangah câwpa tûai pasarih le tuucang pasarih timtuah aw,» tiah a ti.

2 Balaam ih a sim vekin Balak in a tuah ih, Balak le Balaam in biakṭheng pakhat fingfing parah câwpa le tuucang an hlan. 3 Cun Balaam in Balak hnenah, «Na Meiur Thilhlăn kiangah rak ding awla, kei ka va feh ding. Keimah táwng dingin Jehovah a ra mahna, cule ka hnenih a phuan mi ka lo sim ding,» tiah a ti. Cutin hmun sâng phūl pakhat ah a hung so. 4 Cule Pathian in Balaam a táwng ih, Balaam in a hnenah, «Biakṭheng pasarih ka timlam zo, cule biakṭheng pakhat ah câwpa pakhat le tuucang pakhat ka hlan fingfing,» tiah a ti.

5 Cun Jehovah in Balaam kâ ah kamsuakthu a ret ih a hnenah, «Balak hnenah kir awla, hitin na sim pei,» tiah a ti. 6 Cutin a hnenah a kirsal ih, a Meiur Thilhlăn kiangah ngai hnik, amah le Moab tlangsuakupapawl hmuahhmuah an rak ding. 7 Cule anih in a thusim a thăwk ih,

«Moab siangpahrang Balak in Aram ihsin i ra hruai,
Nisuahnak lam tlangpawl ihsin,
‹Ra aw, ka hrangah Jakob ra camsiat aw,
Cule ra awla, Israel simse aw!› i ti.
8 Pathian ih camsiat lo mi ziangtin ka camsiat ding?
Cule Jehovah-ih simsiat lo mi ziangtin ka simse ding?
9 Ziangahtile lungpi zimpawl ihsin amah ka hmu,
Tlangpawl ihsin amah ka cuan,
Ngai hnik! Miphun pakhat cu anmah te lawng an cêng,
Anih cu miphun dangpawl lakah siartel a si lo.
10 Zo in so Jakob-ih leivut siar thei ding,
Cule Israel-ih ṭhen li ṭhen khat teh siar thei ding?
Midĭng thihin thi ning,
Cule ka netnak cu amai cemnetnak vek si sehla maw!»

tiah a ti.

11 Cun Balak in Balaam hnenah, «Ka parih na thil tuah mi hi ziang vek so a si? Ka ralpawl camsiat dingah ka lo hruai ih, ngai hnik, nang in tirhsiang lutukin anmah na thlawsuah hi!» tiah a ti.

12 Cule anih in a sawn ih, «Jehovah in ka kâ ih a ret mi cu sim dingin fimkhur loin maw ka um ding?» tiah a ti.

Balaam Thuphuan Vei Hnihnak

13 Cun Balak in a hnenah, «Anmah na hmuh theinak ding hmun dang ah ka zawngah zangfahten ra hram aw, a pawnsadeuhpawl lawng na hmu hai ding ih an zate cun na hmu lo ding, cutawk ihsin ka hrangah annih cu camse hai aw,» tiah a ti. 14 Cule anih in Zofim-ih ló, Pisgah tlang zimah amah cu a hruai, cule biakṭheng pasarih an tuah ih, biakṭheng parah câwpa pakhat le tuucang pakhat ciar an hlan.

15 Cule anih in Balak hnenah, «Khitawk ih Jehovah ka va tawn sung cu na Meiur Thilhlăn kiang hi tawkah rak ding aw,» tiah a ti.

16 Cun Jehovah in Balaam a táwng ih, a kâ ah kamsuakthu a ret, cule, «Balak hnenah kir awla, hitin na sim pei,» tiah a ti.

17 Cutin anih cu a hnenah a ra ih, ngai hnik, a Meiur Thilhlăn kiangah a rak ding, cule a zawngah Moab tlangsuakupapawl an rak um. Cule Balak in a hnenah, «Jehovah in ziangso a sim?» tiah a ti.

18 Cun anih in a thusim a thăwk ih,

«Tho aw, Balak, ngai aw!
I ngai hnik, nang Zippor fapa!
19 Thuphan per dingin Pathian cu milai a si ve lo,
Lung thleng ding khal in milai fa a si fawn lo.
A rel zo mi cu, a tuah lo ding maw si?
A sim zo mi cu a famkimter lo ding maw?
20 Ngai hnik, thlawsuah dingin thupek ka rak dáwng,
Anih in mal a sawm zo,
Cumi cu kei in ka danglamter thei lo.
21 Anih cun Jakob-ih mawhsualnak a zohhliah lo,
Israel ah sualralnak a hmu fawn lo.
Jehovah a Pathian cu a hnenah a um,
Siangpahrang ih aunak cu an lakah a um.
22 Pathian in Izip ihta a hruaisuak hai,
Anih cu ramlak câwcang vekin a cak.
23 Ziangahtile Jakob dokalhtu dawithiam an um lo,
Israel dokalhtu tinzohthiam an um fawn lo.
Atu ah Jakob le Israel hnenah,
‹Maw, Pathian ih thil tuah mi hi!› tiah an ti tengteng ding.
24 Ngai hnik, kiosa pinu vekin miphun pakhat an ra tho,
Cule kiosa bangin a ding,
A sa deh mi a ei hlanlo,
A thah miih thisen a in hlanlo cu a băwk lo ding,»

tiah a ti.

25 Cun Balak in Balaam hnenah, «A cam khal camse citcet hai hlah, mal khal sawm citcet fawn hlah!» tiah a ti.

26 Curuangah Balaam in a sawn ih, Balak hnenah, «Na hnenah, ‹Jehovah ih sim mi hmuahhmuah cu ka tuah tengteng ding a si,› tiah ka lo sim cia ko lo maw?» tiah a ti.

Balaam Thuphuan Vei Thumnak

27 Cun Balak in Balaam hnenah, «Zangfahten ra aw, hmun dang ah ka lo hruai ding, cutawk ihsin ka hrangah anmah na camsiat ding cu Pathian mithmuhah thildik tla a si pangah,» tiah a ti. 28 Cule Balak in Balaam cu ramcar vun thlirnak Peor Tlang zimah a hruai.

29 Cun Balaam in Balak hnenah, «Hi tawkah ka hrangah biakṭheng pasarih tuah aw, cule hi tawkah câwpa tûai pasarih le tuucang pasarih timlam aw,» tiah a ti. 30 Cule Balak cun Balaam ih a sim vekin a tuah, cule biakṭheng pakhat par ciar ah câwpa pakhat le tuucang pakhat an hlan.

24

1 Israel malsawm ding hi Jehovah lunghmui zawng a si ti Balaam in a hmuh tikah dawithiamnak hman ding zuam dingin cān dang vekin a feh lo, cuhnakin ramṭhing lam hmai a hawih sawn. 2 Cule Balaam in khua a cuan ih Israel-mipawl cu anmah le an hnám an hnám in riahhmun an sâm ti a hmu. Cule Pathian Thlarau a parah a rung thleng. 3 Cun anih in a thusim a thăwk ih,

«Beor fapa Balaam kamsuak cu,
A mit vanter mi milaiih kamsuak cu,
4 Pathian kamsuakthupawl a theituih kamsuak cu,
Ziangkimtithei hnen ihta larawknak hmutu cu,
Mit meng cingih băwkkhuptu cu.
5 Na puanthlampawl cu ziangtluk duhnungza so an si, maw Jakob,
Na cēnnakpawl tla, maw Israel!
6 Annih cu a pharhaw mi phaikuam vek,
Tiva kiangih hmuanpawl vek,
Jehovah ih phŭn mi aloe kungpawl vek,
Tipi kiangih sidar kungpawl vek an si.
7 Amai tithâwlpawl ihsin tidai a tawih ding,
A cithlahpawl cu tidai tampi ah an um ding,
A siangpahrang cu Agag hnakin a sângsawn ding,
A lalram cu khaisan a si ding.
8 Anih cu Izip ihsin Pathian in a hruaisuak,
Anih cu ramlak câwcang vekin a cak,
A ralpawl, miphunpawl a eirál ṭheh ding,
An ruhpawl a khiak ding ih,
A thálfungpawl in anmah a suntlăng hai ding.
9 Anih cu a kûn ih, kiosa vekin a băwk,
Kiosa vek a si, zo in so amah cu thoharhter ding?
Nangmah mal lo sawmtu cu malsawm co mi a si,
Nangmah lo camsetu cu camsiat mi a si,»

tiah a ti.

10 Cun Balak-ih thinheng cu Balaam parah a alh ih, a kut a bêng, cule Balak in Balaam hnenah, «Ka ralpawl camse dingah ka lo ko ih, zoh hnik, vei thum rori tirhsiang zetin anmah mal na sawm! 11 Atu ah nangmai hmun lamah tlânhlo aw, nasazetin ka lo sunlawih ding ka ti nân, ngai hnik, nangmah sunlawih ding Jehovah in a kham a si hi!» tiah a ti.

12 Cule Balaam in Balak hnenah, «Ka hnenih na rak thlah mi na palaipawl hnenah, 13 ‹Balak in sui le ngun ih khat mi a inn i pe khal sehla, keimai lungpuak in a ṭha maw a sia simaw tuah dingin, Jehovah kamsuakthu pahbălin ka feh thei lo. Jehovah ih a rel mi ka rel ve ding,› ka ti tho lo maw? 14 Cule atu ah ngai hnik, ka mipawl hnenah ka tlung thlang ding. Ra aw, ni neta ah hi mi senpi in na mipawl hnenah ziang an tuah ding ti ka lo sim ding,» tiah a ti.

Balaam Thuphuan Vei Litnak

15 Cule anih in a thusim a thăwk ih,

«Beor fapa Balaam kamsuak le,
A mit vanter mi milai kamsuak cu,
16 Pathian kamsuakthupawl a theituih kamsuak cu,
Cungnung Bik-ih theihnak a neitu cu,
Ziangkimtithei ihta larawknak hmutu cu,
Mit meng cingih băwkkhuptu cu.
17 Amah ka hmu ding, atu ah si sawn loin,
Amah ka cuan ding, naite mi si sawn loin,
Jakob ihsin Arsi a ra suak ding,
Israel ihsin Siangpahrang Kianghrăwl a ra thosuak ding,
Moab caldar a sawhkek ding,
Mi bur fapapawl hmuahhmuah a ṭhekdarh ṭheh ding.
18 Cule Edom cu a ta a si ding,
Seir khal a ta an si ding, a ralpawl cu.
Israel in ralṭha zetin a tuah.
19 Jakob ihsin Uktu a suak ding,
Cule khua ih a tāng mipawl a that ṭheh ding,»

tiah a ti.

20 Cun anih in Amalek a zoh, cule anih in a thusim a thăwk ih,

«Amalek cu miphunpawl lakah a hmaisabik a si,
Asinan a siatrál hlanlo, a netabik a si ding,»

tiah a ti.

21 Cun Ken-mipawl a zoh ih, anih in a thusim a thăwk,

«Na cēnnak hmun cu a hnget ih,
Na bu cu lungpi sungah na sak.
22 Cutisikhalsehla Kain cu urkăng a si ding.
Assiria in ralkaih ih a lo thiar hlanlo maw a rei ding?»

tiah a ti.

23 Cun anih in a thusim a thăwk ih,

«Ai law! Hi thil Pathian in a ti tikah teh zo so nungdam ding?
24 Asinan Kittim tipi kap tluan ihsin lăwngpawl an ra ding,
Annih in Assiria an zawnzaiter ding ih,
Eber khal an zawnzaiter ding,
Cule anihih cemnetnak cu siatralnak a si ding,»

tiah a ti.

25 Cule Balaam cu a tho ih, a păwksuak, cule a umnak ah a kir, Balak khal a tlung ve.

25

Balaam Zirhnak

<reference type="parallel">Jud 11; Thu 2:14</reference>

1 Israel-mipawl cu Sittim hmun ah an tâp hrih, cule mi senpi cu Moab nunaupawl thawn nunau-mipa sualnak tuah an thăwk. 2 Moab nunaupawl cun mi senpi cu an pathianpawl raithawinak ah an sawm, cule mi senpi cun an ei ih an pathianpawl an bia. 3 Cule Israel-mipawl in Peor Baal an kăwp, cule Jehovah thinhengnak cu Israel-mipawl parah a alh. 4 Cun Jehovah in Mosi hnenah, «Mipi hotu hmuahhmuah hruai awla, Israel-mipawl hnen ihsin Jehovah-ih tuksumza thinhengnak a kirhloh theinak dingah thilsual tuahtupawl kha sunvâng ah Jehovah hmaiah thlai hai aw,» tiah a ti.

5 Cule Mosi in Israel-mi thuṭhentupawl hnenah, «Mi kip in Peor Baal a kăwptu mai milaipawl kha that uh,» tiah a ti.

6 Cule ngai hnik, Israel tefapawl lakih mipa pakhat a ra ih, Tawnkhawmawknak Puanthlam luhnak hramih a ṭap rero mi, Mosi ih mithmuh le Israel tefa umkhawm zate mithmuhah Midian nunau pakhat a unaupawl hnenah a rak hruai. 7 Puithiam Aaron fapa Eleazar, cumiih fapa Finehas in cumi cu a hmuh tikah mipi-umkhawm lak ihsin a tho ih a kut in feite a la. 8 Cule Israel-paih puanthlam ah a luhhnawh ih an pahnih in a suntlăng hai, Israel-pa le nunaunuih pum cu a tlăng. Cutin Israel tefapawl lakih hremnak cu a reh. 9 Cule hremnak ih a thi mi cu 24000 an si.

Finehas Fak a Si

10 Jehovah in Mosi hnenah, 11 «Puithiam Aaron fapa Eleazar, cumiih fapa Finehas in Israel tefapawl hnen ihsin ka thinlingnak a kirter a si, ziangruangahtile anih cu an lakah ka ṭhahnemngai tlukin ṭhahnem a ngai, cutin ka ṭhahnemngainak in Israel tefapawl cu ka siatrálter hai lo. 12 Curuangah, ‹Ngai hnik, ka remnak thukham cu amah ka pe. 13 Cule cumi cu amah le amai hnuih a cithlahpawl hnenah kumkhaw puithiam sinak thukham a si pei, ziangruangahtile anih cu a Pathian hrangah ṭhahnem a ngai ih Israel tefapawl hrangah sualkhuhthawinak a tuah,› ti aw,» tiah a ti.

14 Cule an thah mi, Midian nunau thawi an thah mi Israel-paih hmin cu Salu fapa Zimri a si, Simeon-mipawl lakih pupá sungkua pakhat hotu a si. 15 Cule an thah mi Midian nunauih hmin cu Zur fanu Kozbi a si. Zur cu Midian-mipawl lakih pupá sungkua mipi lubân a si.

16 Cun Jehovah in Mosi hnenah, 17 «Midian-mipawl hnaihnăwk awla, do hai aw. 18 Ziangruangahtile annih in Peor thuhla ah le Peor ruangih hremnak a tlun cān ih an thah mi, an farnu, Midian hotu-ih fanu Kozbi thuhla ah an hrăwkhrawlnak in an lo bum, cumi hmangin an lo hnaihnăwk kha,» tiin a sim.

26

Mipum Siar a Vei Hnihnak

1 Cule hitin a si, hremnak hnuah Jehovah in Mosi le puithiam Aaron fapa Eleazar hnenah, 2 «Israel tefa umkhawm hmuahhmuah, anmai pupápawlih sungkua sungkua in, Israel-mipawl lakih kum 20 ihsin a tlun lam ral do thei hmuahhmuah mipum siar uh,» tiah a ti. 3 Cule Mosi le puithiam Eleazar in Jeriko khat lam ral, Jordan tiva kapih Moab phairawn ah anmah hnenah, 4 «Jehovah in Mosi le Izip ram ihta a hung suak mi Israel tefapawl thu a pek vekin, kum 20 ihsin a tlun lam mi senpi mipum siar uh,» tiah a ti.

5 Reuben cu Israel fatir a si: Reuben-ih tefapawl cu Hanok ihsin Hanok-mipawl hrin, Pallu ihsin Pallu-mipawl hrin, 6 Hezron ihsin Hezron-mipawl hrin, Karmi ihsin Kar-mipawl hrin tla an si. 7 Hipawl cu Reuben-mipawlih hrinpawl an si, anmah lakih mipum an siar mi cu 43730 an si. 8 Cule Pallu fapa cu Eliab a si. 9 Eliab fapapawl cu: Nemuel, Dathan le Abiram an si. Hipawl cu mipi-umkhawm aiawhtu Dathan le Abiram kha an si. Jehovah an tawh ṭum ah Mosi le Aaron a rak totu Korah-ih ho ah an ṭang. 10 Cule meisa in pacang 250 a kangrál ṭheh ṭum ih cumi mipi-umkhawm an thih laiah, leilung cun a kâ a âng ih annih cu Korah thawn a dawlh ṭheh hai, cule annih cu hminsinnak ah an rung cang ta. 11 Cutisikhalsehla Korah tefapawl cu an rak thi lo.

12 An hrinpawl bangtukin Simeon fapapawl cu: Nemuel ihsin Nemuel-mipawlih hrin, Jamin ihsin Jamin-mipawlih hrin, Jakin ihsin Jakin-mipawlih hrin, 13 Zerah ihsin Zerah-mipawlih hrin, Shaul ihsin Shaul-mipawlih hrin tla an si. 14 Hipawl cu Simeon-mipawlih hrinpawl an si ih, an mipum cu 22200 an si.

15 An hrinpawl bangtukin Gad fapapawl cu: Zefon ihsin Zefon-mipawlih hrin, Haggi ihsin Haggi-mipawlih hrin, Shuni ihsin Shuni-mipawlih hrin, 16 Ozni ihsin Ozni-mipawlih hrin, Eri ihsin Eri-mipawlih hrin, 17 Arod ihsin Arod-mipawlih hrin, Areli ihsin Areli-mipawlih hrin tla an si. 18 Hipawl cu mipum an siar mi bangtukin Gad fapapawlih hrinpawl an si ih, an mipum cu 40500 an si.

19 Judah fapapawl cu Er le Onan an si. Er le Onan cu Kanaan ram ah an rak thi. 20 An hrinpawl bangtukin Judah fapapawl cu: Shelah ihsin Shelan-mipawlih hrin, Perez ihsin Perez-mipawlih hrin, Zerah ihsin Zerah-mipawlih hrin tla an si. 21 Cule Perez fapapawl cu: Hezron ihsin Hezron-mipawlih hrin, Hamul ihsin Hamul-mipawlih hrin tla an si. 22 Hipawl cu mipum an siar mi bangtukin Judah hrinpawl an si ih, an mipum cu 76500 an si.

23 An hrinpawl bangtukin Issakar fapapawl cu: Tola ihsin Tola-mipawlih hrin, Puah ihsin Pun-mipawlih hrin, 24 Jashub ihsin Jashub-mipawlih hrin, Shimron ihsin Shimron-mipawlih hrin tla an si. 25 Hipawl cu mipum an siar mi bangtukin Issakar hrinpawl an si ih, an mipum cu 64300 an si.

26 An hrinpawl bangtukin Zebulun fapapawl cu: Sered ihsin Sered-mipawlih hrin, Elon ihsin Elon-mipawlih hrin, Jahleel ihsin Jahleel-mipawlih hrin tla an si. 27 Hipawl cu mipum an siar mi bangtukin Zebulun-mipawlih hrinpawl an si ih, an mipum cu 60500 an si.

28 An hrinpawl bangtukin Joseph fapapawl cu Manasseh le Efraim an si. 29 Manasseh fapapawl: Makir ihsin Makir-mipawlih hrin, cule Makir in Gilead a hring, Gilead ihsin Gilead-mipawlih hrin tla an si. 30 Hipawl cu Gilead fapapawl an si: Jeezer ihsin Jeezer-mipawlih hrin, Helek ihsin Helek-mipawlih hrin, 31 Asriel ihsin Asriel-mipawlih hrin, Shekem ihsin Shekem-mipawlih hrin, 32 Shemida ihsin Shemida-mipawlih hrin, Hefer ihsin Hefer-mipawlih hrin. 33 Hefer fapa Zelofehad in fapa nei loin fanu lawnglawng a nei, Zelofehad fanupawlih hmin cu Mahlah, Noah, Hoglah, Milkah le Tirzah tla an si. 34 Hipawl cu Manasseh-ih hrinpawl an si ih, mipum an siar mi cu 52700 an si.

35 Hipawl cu an hrinpawl bangtukin Efraim fapapawl an si: Shuthelah ihsin Shuthelah-mipawlih hrin, Beker ihsin Beker-mipawlih hrin, Tahan ihsin Tahan-mipawlih hrin tla an si. 36 Cule hipawl cu Shuthelah fapapawl an si: Eran ihsin Eran-mipawlih hrin an si. 37 Hipawl cu mipum an siar mi bangtukin Efraim fapapawlih hrinpawl an si ih, an mipum cu 32500 an si. Hipawl hi an hrinpawl bangtukin Joseph fapapawl an si.

38 An hrinpawl bangtukin Benjamin fapapawl cu: Bela ihsin Bela-mipawlih hrin, Ashbel ihsin Ashbel-mipawlih hrin, Ahiram ihsin Ahiram-mipawlih hrin, 39 Shufam ihsin Shufam-mipawlih hrin, Hufam ihsin Hufam-mipawlih hrin tla an si. 40 Cule Bela fapapawl cu Ard le Naaman an si: Ard ihsin Ard-mipawlih hrin, Naaman ihsin Naaman-mipawlih hrin tla an si. 41 Hipawl cu an hrinpawl bangtukin Benjamin fapapawl an si, cule mipum an siar mi cu 45600 an si.

42 Hipawl cu an hrinpawl bangtukin Dân fapapawl an si: Shuham ihsin Shuham-mipawlih hrin tla an si. Hipawl cu an hrinpawl bangtukin Dân hrinpawl an si. 43 An mipum an siar mi bangtukin Shuham-mipawlih hrin hmuahhmuah cu 64400 an si.

44 An hrinpawl bangtukin Asher fapapawl cu: Jimna ihsin Jimna-mipawlih hrin, Jesui ihsin Jesui-mipawlih hrin, Beriah ihsin Beri-mipawlih hrin tla an si. 45 Beriah fapapawl: Heber ihsin Heber-mipawlih hrin, Malkiel ihsin Malkiel-mipawlih hrin tla an si. 46 Cule Asher fanu hmin cu Serah a si. 47 Hipawl cu mipum an siar mi bangtukin Asher fapapawlih hrinpawl an si ih, an mipum cu 53400 an si.

48 An hrinpawl bangtukin Naftali fapapawl cu: Jahzeel ihsin Jahzeel-mipawlih hrin, Guni ihsin Guni-mipawlih hrin, 49 Jezer ihsin Jezer-mipawlih hrin, Shillem ihsin Shillem-mipawlih hrin tla an si. 50 Hipawl cu an hrinpawl bangtukin Naftali hrinpawl an si, cule mipum an siar mi cu 45400 an si.

51 Hipawl cu Israel tefa mipum an siar mipawl an si ih, an mipum cu ting ruk le thawngkhat zasarih sawmthum an si.

52 Cun Jehovah in Mosi hnenah, 53 «Hmin zât zulhin, an ro dingah ram cu hipawl hnenah zĕm an si pei. 54 Hnám tûm hnenah ro tumdeuh na pe pei ih hnám tedeuh hnenah ro tedeuh na pe pei. An mipum siar mipawl zulhin an ro pek fingfing an si pei. 55 Asinan ram cu camcawhfung zûkin zem an si pei, an pupápawlih hnám hminpawl bangtukin annihpawl in ro an co pei. 56 Camcawhfung zûk mi bangtukin an ro cu a tumdeuh le a tedeuh lakah zĕm a si pei,» tiin a sim.

57 Cule hipawl cu an hrinpawl bangtukin Levi-mipawl mipum an siar mi an si: Gershon ihsin Gershon-mipawlih hrin, Kohath ihsin Kohath-mipawlih hrin, Merari ihsin Merari-mipawlih hrin tla an si. 58 Hipawl cu Levi-mipawlih hrinpawl an si: Libni-mipawlih hrin, Hebron-mipawlih hrin, Mahli-mipawlih hrin, Mushi-mipawlih hrin le Korath-mipawlih hrin tla an si. Cule Kohath in Amram a hring. 59 Amram nupi hmin cu Jokebed a si, Levi fanu a si, amah cu Izip ram ah Levi ih a hrin mi a si. Cule cu nu in Aaron le Mosi le an farnu Miriam cu Amram a hrinsak. 60 Aaron in Nadab, Abihu, Eleazar le Ithamar a hring. 61 Cule Nadab le Abihu cu Jehovah hmaiih meisa danglam an hlăn laiah an rak thi. 62 Thla khat le a tlun lam mipa kip mipum an siar mi cu 23000 an si. Ziangtintile annih cu Israel tefa dangpawl lakah siartel an si lo, ziangruangahtile Israel tefapawl lakah annih cu ro pek an si lo.

63 Hipawl cu Jeriko khat lam ral, Jordan tiva kapih Moab phairawn ih Israel tefa mipum an siar mi, Mosi le puithiam Eleazar ih mipum an siar mipawl an si. 64 Asinan hipawl lakah, Sinai Ramṭhing ah Israel tefa mipum siar laiih Mosi le puithiam Aaron in mipum an rak siar mi cu mi pakhat hman an um nawn lo. 65 Ziangahtile Jehovah in anmai thuhla ah, «Annih cu ramṭhing ah an thi tengteng ding a si,» a rak ti a si. Cule Jefunneh fapa Kaleb le Nun fapa Joshua siarlo an lakih mi pakhat hman an tâng nawn lo.

27

Zelofehad Fanupawl

1 Joseph fapa Manasseh hrinpawl ihsin, Manasseh fapa Makir, cumiih fapa Gilead, cumiih fapa Hefer-ih fapa Zelofehad-ih fanupawl an ra, cule hipawl hi a fanupawlih hminpawl cu an si: Mahlah, Noah, Hoglah, Milkah le Tirzah tla an si. 2 Cule annih cu Tawnawknak Puanthlam luhnak kiangih Mosi hmai, puithiam Eleazar hmaiah le hotupawl le mipi-umkhawm hmuahhmuah hmaiah an ding ih, 3 «Kan pa cu ramṭhing ah a rak thi. Anih cu Jehovah dokalhih a fĭnkhawmaw mi, Korah-ih mipi-umkhawm lakah cun a tel lo, asinan amai bulpak sualnak ruangah a thi. Cule fapa a nei lo. 4 Ziangahso fapa a neih lo ruangih a hrinpi lak ihsin kan paih hmin a hloh ding? Kan paih unaupawl lakah covo in pe ve uh,» tiah an ti.

5 Cule Mosi in Jehovah hmaiah an thuhla cu a thlĕn. 6 Cule Jehovah in Mosi hnenah, 7 «Zelofehad fanupawl hin thudik an rel a si. An paih unaupawl lakah ro ding covo na pe tengteng hai pei, cule an paih ro cu an hnenah na pesâwng ding a si. 8 Cule nang in Israel tefapawl hnenah, ‹Mi pakhat cu thi in fapa a neih lo asile, a ro cu a fanu nan pesâwng pei. 9 Anih in fanu a neih lo asile, a ro cu a unaupawl nan pe pei. 10 Anih in unau a neih lo asile, a ro cu a paih unaupawl nan pe pei. 11 Cule a pa in unau a neih lo asile, an hrin lakih amah naibik hnenah a ro cu nan pe pei, cule anih in a co pei,› tiah ti aw. Cule Jehovah in Mosi thu a pek vekin cumi cu Israel tefapawl hrangah sakhaw dān le cīn le dān a si pei,» tiin a sim.

12 Jehovah in Mosi hnenah, «Abarim Tlang ah hung so awla, Israel tefapawl ka pek mi ram cu hung zoh aw. 13 Cule cumi na hmuhngah in na unaupa Aaron fĭn a si bangin, nang khal na mipawl hnenah fĭn na si ding. 14 Ziangahtile Zin Ramṭhing ih mipi-umkhawm in in tawh laiah, an hmaika-ih tidai hmun ah ka thianhlimnak hmuter dingin ka thupek lakah nan rak hél a si,» tiah a ti. Cumi cu Zin Ramṭhing sung, Kadesh hmun ih Meribah tidai a si.

Hruaitu Thar Joshua

15 Cun Mosi in Jehovah hnenah, 16 «Jehovah, titsa hmuahhmuah ih thlaraupawlih Pathian in mipi-umkhawm tlunah mi pakhat ret seh. 17 Anih cu an hmaiah a lutin a suak ding, anih in a hruaisuakin a hruailut hai ding. Cutin Jehovah-ih mipi-umkhawm cu khāltu nei lo tuu rual vek an si lo ding,» tiah a ti.

18 Cule Jehovah in Mosi hnenah, «Na zawngah Nun fapa Joshua hruai aw, amah ah Thlarau a um a si, a parah na kut suang aw. 19 Puithiam Eleazar hmaika-ah le mipi-umkhawm hmuahhmuah hmaika-ah amah cu dingter awla, amah cu an mithmuhah ṭuanvo pe aw. 20 Cule Israel tefa umkhawm hmuahhmuah in a thu an lun theinak dingah nang in na thuneihnak hrekkhat amah na pe pei. 21 Amah cu thuṭhennak Urim hmangih a hrangah Jehovah hmaika-ih suthliahsaktu ding puithiam Eleazar hmaiah a ding pei. Mipi-umkhawm hmuahhmuah, Joshua le a hnenih Israel tefapawl hmuahhmuah cu Joshua ṭawngkam in an suak pei ih Joshua ṭawngkam in an lut pei,» tiah a ti.

22 Cule Jehovah in thu a pek vekin Mosi cun a tuah. Joshua cu a hruai ih puithiam Eleazar hmaiah le mipi-umkhawm hmuahhmuah hmaiah a dinter. 23 Cule Mosi hmangih Jehovah in thu a pek vekin anih in a parah kut a suang ih ṭuanvo a pek.

28

Ni Tin Thilhlănpawl

1 Jehovah in Mosi hnenah, 2 «Israel tefapawl thu pe awla an hnenah, ‹Ka thilhlăn, ka hrangih rimthaw dingih meisa ih ur mi ka thilhlănpawl hrangih ka rawl cu a tikcu khiah cān ah ka hnenah hlan dingin nan ralring pei,› tiah ti aw.

3 «Cule nang in an hnenah, ‹Himi hi Jehovah hnenih nan hlăn mi meisa ih ur mi thilhlăn a si: ni tin, sawisel ding um lo tuufa no kum khat ti pahnih hi hlăn ringring ding mi Meiur Thilhlăn an si. 4 Tuufa no pakhat cu zing lamah na hlan pei ih a dang tuufa no pakhat cu khawthim zawngah na hlan pei. 5 Cule sawr mi hriak kalān khat ih ṭhen li ṭhen khat thawi rawi mi Thlairawl Thilhlăn dingah sangvut phŭt efa khat ih ṭhen hra ṭhen khat nan keng cih pei. 6 Cumi cu Jehovah hnenih meisa ih ur mi rimthaw hrangah Sinai Tlang ihsi rak hlăn thăwk mi, hlăn ringring mi Meiur Thilhlăn a si. 7 Cule cumiih Inding Thilhlăn cu tuufa no pakhat veve hrangah kalān khat ih ṭhen li ṭhen khat a si pei, zureu cu Jehovah hnenih thilhlăn ah hmun thianghlim sungah na thle pei. 8 A dang tuufa no pakhat cu khawthim zawngah na hlan pei, zing lamih Thlairawl Thilhlăn le cumiih Inding Thilhlăn bangin cumi cu Jehovah hrangih rimthaw, meisa ih ur mi thilhlăn ah na hlan pei.

Sabbath Thilhlănpawl

9 ‹Cule Sabbath ni ah sawisel ding um lo, kum khat ti tuufa no pahnih le sangvut phŭt efa khat ih ṭhen hra ṭhen hnih kha hriak thawn rawiin Thlairawl Thilhlăn dingah cumiih Inding Thilhlăn thawn na hlan pei. 10 Himi hi a Inding Thilhlăn zawngih hlăn ringring mi Meiur Thilhlăn hleiah, Sabbath tin hrangih Meiur Thilhlăn a si.

Thla Tin Thilhlănpawl

11 ‹Nan thla thawktir tinten Jehovah hnenah Meiur Thilhlăn nan hlan pei: cupawl cu sawisel ding um lo câwpa tûai pahnih, tuucang pakhat le kum khat ti tuufa no pasarih an si, 12 câwpa pakhat fingfing hrangah Thlairawl Thilhlăn dingah, hriak rawi mi sangvut phŭt efa khat ih ṭhen hra ṭhen thum, tuucang pakhat hrangah Thlairawl Thilhlăn dingah, hriak rawi mi sangvut phŭt efa khat ih ṭhen hra ṭhen hnih, 13 cule tuufa no pakhat fingfing hrangah Thlairawl thilhlăn dingah, hriak rawi mi sangvut phŭt efa khat ih ṭhen hra ṭhen khat pawl cu Jehovah hnenih meisa ih ur mi Thilhlăn, rimthaw Meiur thilhlăn a si. 14 An Inding Thilhlăn cu, câwpa pakhat hrangah sabitzu kalān hrek, tuucang pakhat hrangah kalān khat ih ṭhen thum ṭhen khat le tuufa no pakhat hrangah kalān khat ih ṭhen li ṭhen khat a si pei. Himi cu kumtluanin thla tin hrangih Meiur Thilhlăn a si pei. 15 Hlăn ringring mi Meiur Thilhlăn le cumiih a Inding Thilhlăn hleiah Jehovah hnenih Sual Thilhlăn hrangah mepa pakhat hlăn a si fawn pei.

Lanta Puai

16 ‹Thla khatnak, ni hleilitnak cu Jehovah-ih Lanta Puai a si. 17 Cule hi thla, ni hleingatnak cu puai a si, ni sarih sung thilnu telh lo sang ei a si pei. 18 A ni khatnak ah tawnkhawmawknak thianghlim nan nei pei, hna kêl nan ṭuan lo pei. 19 Cule Jehovah hrangih Meiur Thilhlăn dingah meisa ih ur mi thilhlăn pakhat nan hlan pei: cupawl cu câwpa tûai pahnih, tuucang pakhat le kum khat ti tuufa no pasarih tla an si. Cupawl cu sawisel ding um lo an si tengteng pei. 20 An Thlairawl Thilhlăn cu hriak rawi mi sangvut phŭt a si pei, câwpa pakhat hrangah efa khat ih ṭhen hra ṭhen thum le tuucang pakhat hrangah efa khat ih ṭhen hra ṭhen hnih nan hlan pei, 21 tuufa no pasarih lakih pakhat ciar hrangah efa khat ih ṭhen hra ṭhen khat na hlan pei. 22 Nan hrangih sualkhuhthawinak tuahnak ah Sual Thilhlăn dingah mepa pakhat nan hlan fawn pei. 23 Hlăn ringring mi Meiur Thilhlăn, zing lamih Meiur Thilhlăn hleiah hibangpawl hi nan hlan ding a si. 24 Cutivekcun Jehovah hrangih rimthaw dingah ni tin ni sarih sung meisa ih ur mi thilhlăn rawl nan hlan pei, cumi cu hlăn ringring mi Meiur Thilhlăn le cumiih a Inding Thilhlăn hleiih hlăn ding mi a si. 25 Cule a ni sarihnak ah tawnkhawmawknak thianghlim nan nei pei, hna kêl nan ṭuan lo pei.

Zarhkar Sarih hnu Puai

26 ‹Rah hmaisabikpawl ni ah, Zarhkar Sarih hnu Puai ah Jehovah hnenah thlairawl thilhlăn thar nan rak ken tikah, tawnkhawmawknak thianghlim nan nei pei. Hna kêl zianghman nan ṭuan lo pei. 27 Jehovah hrangih rimthaw dingah Meiur Thilhlăn nan hlan pei, cupawl cu: câwpa tûai pahnih, tuucang pakhat le kum khat ti tuufa no pasarih le, 28 hriak rawi mi sangvut phŭt an Thlairawl Thilhlăn thawn a si, câwpa pakhat ciar hrangah efa khat ih ṭhen hra ṭhen thum, tuucang pakhat hrangah ṭhen hra ṭhen hnih le, 29 tuufa no pasarih lakih pakhat ciar hrangah ṭhen hra ṭhen khat tiin, 30 nan hrangih sualkhuhthawinak tuahnak ah mepa pakhat khal nan hlan pei. 31 Cupawl cu sawisel ding um lo an si tengteng pei. Cupawl cu hlăn ringring mi Meiur Thilhlăn le a Thlairawl Thilhlăn hleiah an Inding Thilhlănpawl thawn nan hlan pei.

29

Tawtawrawt Puai

1 ‹Cule thla sarihnak, cuih thla ni khatnak ah tawnkhawmawknak thianghlim nan nei pei. Hna kêl zianghman nan ṭuan lo pei. Cumi cu nan hrangah tawtawrawtpawl phawt ni a si. 2 Jehovah hrangih rimthaw dingah Meiur Thilhlăn nan hlan pei, cupawl cu: sawisel ding um lo câwpa tûai pakhat, tuucang pakhat le kum khat ti tuufa no pasarih an si pei. 3 An Thlairawl Thilhlăn cu hriak rawi mi sangvut phŭt, câwpa hrangah efa khat ih ṭhen hra ṭhen thum tuucang hrangah ṭhen hra ṭhen hnih le, 4 tuufa no pasarih pawl hrangah efa khat ih ṭhen hra ṭhen khat ciar a si pei. 5 Nan hrangih sualkhuhthawinak tuahnak ah Sual Thilhlăn hrangah mepa pakhat thawn, 6 Thla Thar hrangih Meiur Thilhlăn le a Thlairawl Thilhlăn hleiah, rimthaw dingah, Jehovah hnenah meisa ih ur mi thilhlăn pakhat cu hlăn ringring mi Meiur Thilhlăn le a Thlairawl Thilhlăn, an cīn le dān bangtukin an Inding Thilhlăn pawl nan hlan pei.

Sualkhuhthawinak Ni

7 ‹Himi thla sarihnak, ni hratnak ah tawnkhawmawknak thianghlim nan nei pei. Nan phahniam aw pei, ziang hna hman nan ṭuan lo pei. 8 Rimthaw dingah Jehovah hnenah Meiur Thilhlăn nan hlan pei, cupawl cu: câwpa tûai pakhat, tuucang pakhat le kum khat ti tuufa no pasarih an si pei. Cupawl cu sawisel ding um lo an si tengteng pei. 9 An Thlairawl Thilhlăn cu hriak rawi mi sangvut phŭt a si pei ih, câwpa hrangah efa khat ih ṭhen hra ṭhen thum, tuucang pakhat hrangah efa khat ih ṭhen hra ṭhen hnih, 10 cule tuufa no pasarih lakih pakhat ciar hrangah efa khat ih ṭhen hra ṭhen khat an si pei. 11 Sualkhuhthawinak hrangih Sual Thilhlăn, hlăn ringring mi Meiur Thilhlăn le a Thlairawl Thilhlăn le an Inding Thilhlăn pawl hleiah, Sual Thilhlăn hrangah mepa pakhat khal nan hlan pei.

Bûkte Puai

12 ‹A thla sarihnak ih a ni hleingatnak ah tawnkhawmawknak thianghlim nan nei pei. Hna kêl zianghman nan ṭuan lo pei ih, ni sarih sung Jehovah-ih puai nan hmang pei. 13 Jehovah hrangih rimthaw dingah meisa ih ur mi thilhlăn, Meiur Thilhlăn nan hlan pei, cupawl cu: câwpa tûai hleithum, tuucang pahnih le kum khat ti tuufa no hleili an si pei. Cupawl cu sawisel ding um lo mi an si pei. 14 An Thlairawl Thilhlăn cu hriak rawi mi sangvut phŭt a si pei ih, câwpa hleithum pawl hrangah efa khat ih ṭhen hra ṭhen thum fingfing, tuucang pahnih hrangah efa khat ih ṭhen hra ṭhen hnih veve le, 15 tuufa no hleili pawl hrangah efa khat ih ṭhen hra ṭhen khat fingfing an si. 16 Hlăn ringring mi Meiur Thilhlăn, a Thlairawl Thilhlăn le a Inding Thilhlăn pawl hleiah Sual Thilhlăn dingah mepa pakhat khal nan hlan pei.

17 ‹A ni hnihnak ah sawisel ding um lo câwpa tûai hleihnih, tuucang pahnih le kum khat ti tuufa no hleili le, 18 a cīn le dān bangtukin an pum zât pum zât in câwpapawl hrang, tuucangpawl hrang le tuufa nopawl hrangah an Thlairawl Thilhlăn le an Inding Thilhlănpawl khal, 19 hlăn ringring mi Meiur Thilhlăn le a Thlairawl Thilhlăn le an Inding Thilhlănpawl hleiah, Sual Thilhlăn hrangah mepa pakhat khal nan hlan pei.

20 ‹A ni thumnak ah sawisel ding um lo câwpa tûai hleikhat, tuucang pahnih, kum khat ti tuufa no hleili le, 21 a cīn le dān bangtukin an pum zât pum zât in câwpa hrang, tuucangpawl hrang, tuufa nopawl hrangah an Thlairawl Thilhlăn le an Inding Thilhlănpawl, 22 hlăn ringring mi Meiur Thilhlăn, a Thlairawl Thilhlăn le an Inding Thilhlănpawl hleiah Sual Thilhlăn dingah mepa pakhat khal nan hlan pei.

23 ‹A ni litnak ah sawisel ding um lo câwpa tûai pahra, tuucang pahnih le tuufa no kum khat ti hleili le, 24 a cīn le dān bangtukin an pum zât pum zât in, câwpapawl hrang, tuucangpawl hrang le tuufa nopawl hrangah an Thlairawl Thilhlăn le an Inding Thilhlăn pawl, 25 hlăn ringring mi Meiur Thilhlăn, a Thlairawl Thilhlăn le a Inding Thilhlăn hleiah Sual Thilhlăn dingah mepa pakhat khal nan hlan pei.

26 ‹A ni ngatnak ah sawisel ding um lo câwpa tûai pakua, tuucang pahnih le kum khat ti tuufa no hleili, 27 a cīn le dān bangtukin an pum zât pum zât in, câwpapawl hrang, tuucangpawl hrang le tuufa nopawl hrangah an Thlairawl Thilhlăn le an Inding Thilhlănpawl, 28 hlăn ringring mi Meiur Thilhlăn, a Thlairawl Thilhlăn le a Inding Thilhlăn hleiah Sual Thilhlăn dingah mepa pakhat khal nan hlan pei.

29 ‹A ni ruknak ah sawisel ding um lo câwpa tûai pariat, tuucang pahnih le kum khat ti tuufa no hleili le, 30 a cīn le dān bangtukin an pum zât pum zât in, câwpapawl hrang, tuucangpawl hrang le tuufa nopawl hrangah an Thlairawl Thilhlăn le an Inding Thilhlănpawl, 31 hlăn ringring mi Meiur Thilhlăn, a Thlairawl Thilhlăn le a Inding Thilhlăn hleiah Sual Thilhlăn dingah mepa pakhat khal nan hlan pei.

32 ‹A ni sarihnak ah, sawisel ding um lo câwpa tûai pasarih, tuucang pahnih le kum khat ti tuufa no hleili le, 33 a cīn le dān bangtukin an pum zât pum zât in, câwpapawl hrang, tuucangpawl hrang le tuufa nopawl hrangah an Thlairawl Thilhlăn le an Inding Thilhlănpawl, 34 hlăn ringring mi Meiur Thilhlăn le a Thlairawl Thilhlăn le a Inding Thilhlăn hleiah Sual Thilhlăn dingah mepa pakhat khal nan hlan pei.

35 ‹A ni riatnak ah tawnkhawmawknak hleice nan nei pei. Hna kêl zianghman nan ṭuan lo pei. 36 Jehovah hrangih rimthaw dingah meisa ih ur mi thilhlăn pakhat, Meiur Thilhlăn pakhat cu: câwpa tûai pakhat, tuucang pakhat, sawisel ding um lo kum khat ti tuufa no pasarih le, 37 a cīn le dān bangtukin an pum zât pum zât in, câwpa hrang, tuucang hrang le tuufa nopawl hrangah an Thlairawl Thilhlăn le an Inding Thilhlănpawl hleiah, 38 hlăn ringring mi Meiur Thilhlăn, a Thlairawl Thilhlăn le a Inding Thilhlăn hleiah Sual Thilhlăn dingah mepa pakhat khal nan hlan pei.

39 ‹Nan thutiam thilhlănpawl le nan lungpuak thawhhlawmpawl hleiah, hipawl hi nan Meiur Thilhlănpawl le nan Thlairawl Thilhlănpawl ah, nan Inding Thilhlănpawl le nan Remnak Thilhlănpawl ah nan puai cān thiah mipawl ah Jehovah hnenah nan hlan pei,› tin na ti pei,» tiah a ti. 40 Cule Jehovah in Mosi thu a pek vekin Mosi in Israel tefapawl ziangtinkimin a sim hai.

30

Thutiampawl

1 Israel tefapawl thuhla ah Mosi in hnám lubânpawl hnenah, «Himi cu Jehovah ih thupek mi a si. 2 Mi pakhat in Jehovah hnenah thutiam a tuah simaw, kaihhrenawknak pakhat khat hmangin amah kaihrengtu ding thukam pakhat sia a săm simaw asile, amai ṭawngkam cu a pahbăl lo pei, a kâ ihsin a pawtsuak mi hmuahhmuah bangtukin a tuah pei.

3 «Nunau pakhat in Jehovah hnenah thutiam a tuah ih a no laiih a paih inn ih a um laiah kaihhrenawknak pakhat khat hmangin amah le amah a kaihrengaw ih, 4 a thutiam le amah le amah a kaihhrenawknak kaihhrenawknak cu a pa in hna in a thei ih a pa in cu nu cu a nguisan men asile, a thutiam hmuahhmuah cu an nung pei ih, amah a kaihhrenawknak kaihhrenawknak kip cu a nung pei. 5 Asinan a pa in a theih ni ah a dăwn asile, a thutiampawl le amah le amah a kaihhrenawknak kaihhrenawknakpawl khal an nung lo pei, a pa in a dăwn ruangah, Jehovah in amah cu a phawih ding.

6 «A thutiampawl in amah le amah a kaihrengaw asilole thlahdahaw zetih a hmur ih a ṭawngsuak mi in a kaihrenawk laiah cu nu in pasal a nei ih, 7 cumi cu a pasal in hna in a theih ni ah cu cu a nguisan men asile, a thutiampawl cu an nung pei ih, amah le amah a kaihhrenawknak kaihhrenawknakpawl khal an nung ding a si. 8 Asinan a pasal in cumi cu hna in a theih ni ah a dăwn a si ahcun, a lâk mi a thutiam le amah le amah a kaihhrenawknak a hmur ih a ṭawngsuak mi cu anih in zianghmanlo ah a tuah pei, cule Jehovah in cu nu cu a phawih ding.

9 «Nuhmei pakhat in asilole mâk mi nunau pakhat in amah le amah a kaihhrenawknak thutiam pauhpauh cu cu nuih hrangah a nung pei.

10 «A pasalih innsang ah thutiam a la, asilole thukam pakhat thawn amah le amah kaihhrenawknak pakhat hmangin a kaihrengaw, 11 cule cumi cu a pasal in hna in a thei ih, cu nu cu a nguisan men ih a dăwn fawn lo asile, a thutiam hmuahhmuah in an nung pei ih, kaihhrenawknak tinkim thawi amah le amah a kaihhrenawknak cu a nung pei. 12 Asinan cupawl cu a pasal in hna in a theih ni ah cupawl cu zianghmanlo ah a tuah taktak a si ahcun, a thutiampawl thawi pehparaw, asilole amah kaihhrennak kaihhrenawknak thawi pehparih a hmur ihsin a ṭawngsuak mi pauhpauh an nung lo pei, a pasal in zianghmanlo ah a tuah, cule Jehovah in cu nu cu a phawih ding. 13 Cu nu phahniamawtertu thutiam kip le kaihhrennak thukam kip cu a pasal in a nungter ding, asilole a pasal in zianghmanlo ah a tuah ding. 14 A pasal in ni khat hnu ni khat cu nu cu a nguisan men asile, cu nu kaihrengtu a thutiam hmuahhmuah, asilole kaihhrenawknak hmuahhmuah cu a nungter a si. A theih ni ah a nguisan men ruangah a nungter hai a si. 15 Asinan a theih hnuah cupawl cu zianghmanlo ah a tuah a si ahcun, amahpa in cu nuih mawh a phur ding,» tiah a ti.

16 Hipawl cu mi pakhat le a nupi karlak le a pa le a fanu a no laiih a paih innsang ih a um mi karlak thu ah Jehovah in Mosi thu a pek mi sakhaw dānpawl an si.

31

Midian parih Phubalaknak

1 Jehovah in Mosi hnenah, 2 «Israel tefapawl hrangah Midian-mipawl parah phuba la aw. Cuṭhehin na mipawl hnenah fĭn na si ding,» tiin a sim.

3 Cule Mosi in mi senpi hnenah, «Nan lakih mi hrekkhat cun raldonak hrang ralthuam thuam aw hai seh. Cule Midian-mipawl parah Jehovah hrangih phuba la dingin Midian-mipawl do dingah feh hai seh. 4 Israel hnámpawl hmuahhmuah lakah hnám khat ah 1000 ciar ral do dingin nan thlah pei,» tiin a sim hai. 5 Cule hnám khat ah 1000 ciar in Israel ralkap lak ihsin ral do dingah ralthuam thuamaw mi ralkap 12000 an thawh. 6 Cun hnám khat ah mi 1000 ciar in Mosi in raldonak ah a thlah hai. A kut ih thil thianghlimpawl le ralrin peknak tawtawrawtpawl keng puithiam Eleazar fapa Finehas thawn annih cu ral do dingah a thlah.

7 Cule annih in Jehovah in Mosi thu a pek vekin Midian-mipawl cu an do ih an mipa hmuahhmuah an that ṭheh. 8 Mi dang an thah zawngah, Midian-mipawlih siangpahrangpawl an that, Midian siangpahrang panga pawl cu: Evi, Rekem, Zur, Hur le Reba tla an si. Beor fapa Balaam khal ralnâm in an that cih. 9 Cule Israel tefapawl in Midian nunaupawl cu an fanau tetepawl thawn ralkaih ah an hruai hai ih, an ran rual zate, an sumhnám rual zate le an thilri zaten ralthillawn ah an lâk ṭheh. 10 An cēnnak khua hmuahhmuah le an hmunkhuarnak hmuahhmuah cu meisa in an urkāng ṭheh. 11 Cule milai le ṭilva ralthillawn hmuahhmuah le ralthillâk hmuahhmuah cu an hruai ṭheh hai. 12 Cun annih in ralkaihpawl, ralthillâkpawl le ralthillawnpawl cu Mosi hnen, puithiam Eleazar hnen le Israel tefa umkhawm hnen, Jeriko ralkhat Jordan tiva kap, Moab phairawnpawl ih riahhmun khuarnak ah an hruai ṭheh.

Ral Dotupawl Thenfainak

13 Cule Mosi, puithiam Eleazar le mipi-umkhawm hotu hmuahhmuah cu anmah hmuak dingah riahhmun khuarnak lengah an feh. 14 Asinan Mosi cu ral ram ihsin a ra tlung mi a thawng hotu le a za hotu ralbawipawl parah a thin a heng. 15 Cule Mosi in an hnenah, «Nunau hmuahhmuah in nan zuah ṭheh a si maw? 16 Zoh hnik uh, Balaam ih thurawnpeknak hmangin hi nunaupawl hin Peor ih a cang mi thil ah khan Jehovah dokalhin Israel tefapawl rinum lo ko an tuah. Cule Jehovah-ih mipi-umkhawm lakah hremnak a rak tlung. 17 Curuangah atu ah fanau tetepawl lakah mipa nauhak kip le mipa ihpi zo nunau kip cu that ṭheh uh. 18 Asinan mipa ihpi hrih lo nunau note hmuahhmuah cu nan hrangah zuah uh. 19 Cule nannih lawngte cu, riahhmun khuarnak lengah ni sarih sung nan tâp pei. Zokhal mi a rak thattu le thah mi pakhat khat a thâmngahtu cun nanmah le nan ralkaihpawl thawn a ni thumnak le a ni sarihnak ah thianfai aw uh. 20 Sinfen kip, saphaw ih tuah mi tinkim, mehmul ih tah mi tinkim le thing ih tuah mi tinkim in thianfai uh,» tiah a ti.

21 Cun puithiam Eleazar in raldonak ih a fehtu ral dotupawl a be hai ih, «Himi hi Jehovah in Mosi thu a pek mi dān lakih sakhaw dān a si. 22 Sikhalsehla sui, ngun, dar, thir, rangva le sûan, 23 ziangkim meisa tuar theipawl cu meisa ah nan hrawlh pei ih cumi cu a thiangfai ding. Cule thianternak tidai in cumi cu na thiangter pei. Asinan meisa tuar thei lo hmuahhmuah cu tidai ah nan hrawlh pei. 24 Cule a ni sarihnak ah nan hnipuan nan sawp pei ih nan thiang ding, cule cuṭhehin riahhmun khuarnak ah nan lut thei ding,» tiah a ti.

Rallâksum Zemawknak

25 Jehovah in Mosi hnenah, 26 «Nang le puithiam Eleazar le mipi-umkhawm lubân pupápawl in ralthillâk milai le ṭilva an kaih mipawl kha siar uh. 27 Cule ralthillâkpawl kha ral do mi raldonak ih fehpawl le mipi-umkhawm hmuahhmuah karlakah ṭhen hnih ah ṭhen uh. 28 Cule ral do mi raldonak ih a fehtupawl hnen ihsin milai, ranpipawl, lākpawl le rantepawl ihsin 500 ah pakhat vivo in Jehovah hrangah siah kháwng uh. 29 Ral do mipawl in a hrek an co mi lak ihta kha la uhla, Jehovah hnenih Cawikhai Thilhlăn dingah puithiam Eleazar pe uh. 30 Cule Israel tefapawl in a hrek an co mi milai, ranpipawl, lākpawl le rantepawl, sumhnám hmuahhmuah ihsin 50 ah pakhat na la pei ih Jehovah-ih Biakbûk ṭuanvo latu Levi-mipawl na pe pei,» tiin a sim. 31 Cule Mosi le puithiam Eleazar in Jehovah in Mosi thu a pek vekin an tuah.

32 Rallâksum ihsin a tāng mi ralthillâk, ral do mipawl in an lâk mi cu, rante ting ruk le thawng sawmsarih thawngnga, 33 ranpi 72000, 34 lāk 61000 le, 35 mipa ihpi hrih lo nunau hmuahhmuah an zaten mi 32000 an si. 36 Cule raldonak ih a fehtupawlih covo a hrek cu rante ting thum le thawng sawmthum thawngsarih zanga a si. 37 Cule Jehovah-ih siah rante cu 675 a si. 38 Ranpi cu 36000 an si ih, cumi ihta Jehovah-ih siah cu 72 a si. 39 Lāk cu 30500 an si ih, cumi ihta Jehovah-ih siah cu 61 a si. 40 Milai cu 16000 an si ih, cumi ihta Jehovah-ih siah cu milai 32 an si. 41 Cun Jehovah in Mosi thu a pek vekin Mosi in Jehovah-ih cawikhai thilhlăn siah cu puithiam Eleazar a pe.

42 Ral dotupawl hnen ihsin Mosi in a thliarhran mi, Israel tefapawl in a hrek an co mi ralkaih mipawl ihsin, 43 (mipi-umkhawm ih an co mi a hrek cu rante ting thum le thawng sawmsarih zanga, 44 ranpi 36000, 45 lāk 30500 le, 46 milai 16000 an si.) 47 Jehovah in Mosi thu a pek bangin Mosi in Israel tefapawl in a hrek an co mi ihsin milai le ṭilva ihsin a lâk mi 50 ah pakhat cu Jehovah-ih Biakbûk ṭuanvo latu Levi-mipawl a pe.

48 Cun a thawng hotupawl le a za hotupawl, ralkap a thawngthawng ralbawipawl cun Mosi an ra naih ih, 49 annih in Mosi hnenah, «Kan kut hnuaiih a um mi ral do mi pahopawl cu na siahhlawhpawl in an zate mipum kan siar ih kan lakih mi pakhat hman kan hlohter lo. 50 Jehovah hmaiih kanmai hrangih sualkhuhthawinak tuahnak dingah, mi kip in an sarngah mi ceiawknak sui thilri a si mi: bānnâlpawl, faupawl, zunghrukpawl, hnakhaihpawl le ṭhipawl tla Jehovah hrangih thilhlăn pakhat ah kan rak keng a si,» tiah an ti. 51 Cun sui ih tuah mi ceiawknak hmuahhmuah cu anmah hnenin Mosi le puithiam Eleazar in an rak cohlang. 52 Cule a thawng hotupawl le a za hotupawl in Jehovah hnenih an pek mi sui thawhhlawm hmuahhmuah cu shekel 16750 a si. 53 Ral do mipawl cun anmai bulpak hrang cio ah ralthillawn cu an la. 54 Cule Mosi le puithiam Eleazar in a thawng le a za hotupawl hnen ihsin sui cu an rak cohlang, cule Jehovah hmaiah Israel tefapawl hrangih hngilhlonak ah Tawnawknak Puanthlam sungah an rak kenglut.

32

Miphun Pahnih le a Hrek Jordan Nisuahnak Lamah

1 Reuben tefapawl le Gad tefapawl in sumhnám tam ngaingai an nei, cule Jazer ram le Gilead ram an hmu ih, ngai hnik, cuih ram cu sumhnám hrangah hmun ṭha a si. 2 Cule Gad tefapawl le Reuben tefapawl cu an ra ih Mosi, puithiam Eleazar le mipi-umkhawm hotupawl hnenah, 3 «Ataroth, Dibon, Jazer, Nimrah, Heshbon, Elealeh, Shebam, Nebo le Beon, 4 cupawl cu Israel mipi-umkhawm hmaiih Jehovah in a lâk mi ram an si ih, sumhnám hrangah ram ṭha a si. Kannih na siahhlawhpawl hin sumhnám kan nei,» tiin an ra sim. 5 Curuangah annih in, «Na mithmuhah duhsaknak kan co asile kan neih dingah hi ram hi na siahhlawhpawl hnenah hin pek si seh. Jordan in lanter hram hlah aw,» tiah an ti.

6 Cule Mosi in Gad tefapawl le Reuben tefapawl hnenah, «Nannih hitawk ih nan to laiah nan unaupawl cu ral do dingah an feh maw? 7 Jehovah in anmah a pek mi ram ih tánkai ih an luhlonak dingah ziangahso Israel tefapawlih thinlung nan nauter? 8 Ram zoh dingih Kadesh Barnea ihsin anmah ka thlah hai laiah hitivekin nan pupápawl in an rak ti zo. 9 Eshkol Phaikuam ah an hung so ih ram an hung hmuh tikah, annih in Israel tefapawlih thinlung an nauter, cutin Jehovah in anmah a pek mi ram ah annih cu an lutngah lo. 10 Cun Jehovah thinhengnak cu cuih ni ah a alh ih anih in, 11 ‹Izip ihsin a hung sotu mipa lakah kum 20 ihsin a tlun lam mi zohman in Abraham, Isak le Jakob tepawl hnenih ka rak tiamkam mi ram cu an hmu hrimhrim lo ding, ziangruangahtile annih in pumhlum in kei in thlun lo. 12 Keniz-mi Jefunneh fapa Kaleb le Nun fapa Joshua lawngin an hmu ding, ziangahtile annih cun pumhlum in Jehovah an thlun a si,› tin thukamnak sia a rak săm. 13 Cule Jehovah thinhengnak cu Israel-mipawl parah a alh ih Jehovah mithmuhih thil ṭhalo a rak tuahtu khaih san minung hmuahhmuah an hlohral thluh hlanlo kum 40 sung ramṭhing ah a rak vâkvaiter hai. 14 Cun ngai hnik uh! Misualpawlih cithlahpawl, Israel-mipawl parih Jehovah-ih tuksumza thinhengnak tamsinih pungzaiter dingin, nan pupápawl aiawhin nan rak tho. 15 Ziangahtile amah thlun nan pialsan asile, anih in ramṭhing ah anmah cu a tāngter leh ding ih, hi miphun hmuahhmuah hi nan hlorálter ṭheh ding,» tiah a ti.

16 Cun annih in amah cu an rak naih ih, «Kannih in hi tawkah kan sumhnámpawl hrangah ranhruang kan kulh pei ih, kan fanau tetepawl hrangah khawpipawl kan dĭn pei. 17 Asinan kanmah taktak cu ralthuam kan thuamaw pei ih, an hmun kan thlenpingah hlanlo Israel tefapawl hmaiah feh dingin kan tiar ding. Asinan kan fanau tetepawl cu a rammipawl ruangah khawpi kulhhngetpawl ah an rak cêng ding. 18 Israel tefapawl mi kip in anmai ro an congah hlanlo kan inn ah kan kir lo ding. 19 Ziangahtile Jordan khat lam ral le a pawn lamah an zawngah ro kan co lo ding, ziangruangahtile kannihih ro ding cu Jordan nisuahnak lamih hi lam ral hi kan parah a tla zo,» tiah an ti.

20 Cun Mosi in an hnenah, «Hi thil nan tuah ih, ral do dingah Jehovah hmaiah ralthuam nan thuamawk ih, 21 a hmaika ihsin a ralpawl a dawisuak ṭheh hlanlo, ralthuam thuamaw mi nan pacang zaten Jehovah hmaiah Jordan an tánkai ih, 22 ram cu Jehovah hmaiah nehngah a si ahcun, cuṭhehin nan kir pei ih Jehovah hmai le Israel-mipawl hmaiah sawihnăwm kâi lo nan si ding, cule Jehovah hmaiah hi ram hi nan co mi a si ding. 23 Asinan cutivekih nan tuah lo asile, ngai hnik uh, Jehovah dokalhin sual nan tuah ding ih, nan sualnak in a lo hmusuak ding ti thei uh. 24 Nan fanau tetepawl hrangah khawpipawl dĭn uhla nan rantepawl hrangah hruangkulh tuah uh, cule nan kâ ihsin a suak mi cu tuah uh,» tiah a ti.

25 Cule Gad tefapawl le Reuben tefapawl in Mosi hnenah, «Na siahhlawhpawl in ka bawipaih thupek vekin kan tuah ding. 26 Kan fanau tetepawl, kan nupipawl, kan rante rual le kan sumhnám hmuahhmuah cu Gilead khawpipawl ah an rak um ding. 27 Asinan ka bawipaih sim vekin, Jehovah hmaiih ralthuam thuamaw kip in, na siahhlawhpawl hin ral do dingin kan tánkai ding,» tiin an sim.

28 Cutin Mosi in anmai thuhla ah puithiam Eleazar hnen, Nun fapa Joshua hnen le Israel tefapawlih hnámpawlih lubân pupápawl hnenah thupek a pe. 29 Cule Mosi in an hnenah, «Jehovah hmaiah ral do dingih ralthuam thuamaw kip in, Gad tefapawl le Reuben tefapawl nan zawngah Jordan an tánkai ih, nan hmaiah ram cu nehngah asile, an ta dingah Gilead ram hi an hnenah nan pe pei. 30 Asinan nan zawngah ralthuam thuamaw ih an tánkai lo asile, Kanaan ram sungah nan lakah co mi an nei pei,» tiah a ti.

31 Cun Gad tefapawl le Reuben tefapawl in, «Jehovah in na siahhlawhpawl hnenih a sim vekin kan tuah ding. 32 Kanaan ram ah Jehovah hmaiah ralthuam thuamawin kan tánkai ding, asinan kan ro ding covo cu Jordan-ih hi lam ralah kan hnenah a tāng pei,» tiin an sâng.

33 Curuangah Mosi in Amor-mipawl siangpahrang Sihon ih uk mi ram le Bashan siangpahrang Og ih uk mi ram cu an ramri sungih ram le a khawpipawl thawn, an kimvel ram ih khawpipawl thawn, Gad tefapawl hnen, Reuben tefapawl hnen le Joseph fapa Manasseh hnám hrek pawl hnenah a pe.

34 Cule Gad tefapawl in kulh nei khawpi: Dibon, Ataroth, Aroer, 35 Atroth, Shofan, Jazer, Jogbehah, 36 Beth Nimrah le Beth Haran pawl an dĭn, khawpi kulhhnget neipawl, cule rantepawl hrangah hruangpawl an kulh. 37 Cule Reuben tefapawl in: Heshbon, Elealeh, Kirjathaim, 38 Nebo, Baal Meon (hipawl cu an hmin an thleng ṭheh) le Shibmah khuapawl an dĭn. Cule an dĭn mi khuapawl cu hmin dang an pek ṭheh.

39 Cule Manasseh fapa Makir tefapawl cu Gilead ram ah an feh ih an va lâk, cule cutawk ih Amor-mipawl an dawisuak ṭheh. 40 Cutin Mosi in Gilead ram cu Manasseh fapa Makir a pek, cule anih cu cu tawkah a cêng. 41 Manasseh fapa Jair khal a păwk ih khuapawl a va la, cule cupawl cu Havoth Jair tiah hmin a sak hai. 42 Cun Nobah cu a păwk ih Kenath le a kiangkap khawtepawl a va la, cule amai hmin thlunin Nobah tiah hmin a sak.

33

Izip ihsin Kanaan Khualtlawnnak

1 Hipawl hi Mosi le Aaron ih hohatnak ih Izip ram ihsin an ralkap an ralkap vekih a păwksuak mi Israel tefapawl an fehsuahdān a si. 2 Jehovah ih thupeknak in Mosi in an fehsuahnak hmunpawl a ngan vivo. Cule hipawl hi an pawhsuahnak hmun bangtukih an fehsuahdān cu a si.

3 A thla khatnak, cuih thla ni hleingatnak ah Rameses ihsin an păwksuak, Lanta Puai-ih a thaisun ah Israel tefapawl cu Izip-mi hmuahhmuah ih hmuhhngan ah calhngal zetin an fehsuak. 4 Izip-mipawl cu Jehovah in an lakih a thah mi an fatirpawl an phum laifang a si. Jehovah in an pathianpawl parah thuṭhennakpawl a rak tuah fawn.

5 Cun Israel tefapawl cu Rameses ihsin an păwk ih Sukkoth ah riahhmun an sâm. 6 Sukkoth ihsin an păwk ih Etham ah riahhmun an sâm, cumi cu ramṭhing zim a si. 7 Etham ihsin an păwk ih Pi Hahiroth lamah an kirsal, cumi cu Baal Zefon-ih nisuahnak lam a si, cule Migdol kiangah riahhmun an sâm. 8 Hahiroth hmai ihsin an păwk ih tipi laifang ihsin tánkai in ramṭhing an lut, Etham Ramṭhing sungah ni thum sung an feh ih Marah ah riahhmun an sâm. 9 Marah ihsin an păwk ih Elim ah an feh. Elim ah tihna hleihnih le ṭhulhfau kung 70 a um, cutin cu tawkah riahhmun an sâm.

10 Elim ihsin an păwk ih Tipi Sen kiangah riahhmun an sâm. 11 Tipi Sen ihsin an păwk ih Sin Ramṭhing ah riahhmun an sâm. 12 Sin Ramṭhing ihsin an păwk ih Dofkah ah riahhmun an sâm. 13 Dofkah ihsin an păwk ih Alush ah riahhmun an sâm. 14 Alush ihsin an păwk ih Refidim ah riahhmun an sâm, cu tawkah mipi hrangah tidai in ding a um lo.

15 Refidim ihsin an păwk ih Sinai Ramṭhing ah riahhmun an sâm. 16 Sinai Ramṭhing ihsin an păwk ih Kibroth Hattaavah ah riahhmun an sâm. 17 Kibroth Hattaavah ihsin an păwk ih Hazeroth ah riahhmun an sâm. 18 Hazeroth ihsin an păwk ih Rithmah ah riahhmun an sâm. 19 Rithmah ihsin an păwk ih Rimmon Perez ah riahhmun an sâm. 20 Rimmon Perez ihsin an păwk ih Libnah ah riahhmun an sâm. 21 Libnah ihsin an păwk ih Rissah ah riahhmun an sâm. 22 Rissah ihsin an păwk ih Kehelathah ah riahhmun an sâm. 23 Kehelathah ihsin an păwk ih Shefer Tlang ah riahhmun an sâm. 24 Shefer Tlang ihsin an păwk ih Haradah ah riahhmun an sâm. 25 Haradah ihsin an păwk ih Makeloth ah riahhmun an sâm. 26 Makeloth ihsin an păwk ih Tahath ah riahhmun an sâm. 27 Tahath ihsin an păwk ih Terah ah riahhmun an sâm. 28 Terah ihsin an păwk ih Mithkah ah riahhmun an sâm. 29 Mithkah ihsin an păwk ih Hashmonah ah riahhmun an sâm. 30 Hashmonah ihsin an păwk ih Moseroth ah riahhmun an sâm. 31 Moseroth ihsin an păwk ih Bene Jaakan ah riahhmun an sâm. 32 Bene Jaakan ihsin an păwk ih Hor Hagidgad ah riahhmun an sâm. 33 Hor Hagidgad ihsin an păwk ih Jotbathah ah riahhmun an sâm. 34 Jotbathah ihsin an păwk ih Abronah ah riahhmun an sâm. 35 Abronah ihsin an păwk ih Ezion Geber ah riahhmun an sâm. 36 Ezion Geber ihsin an păwk ih Zin Ramṭhing ah riahhmun an sâm, cumi cu Kadesh a si. 37 Kadesh ihsin an păwk ih Edom ram ramri ih Hor Tlang ah riahhmun an sâm.

Aaron a Thi

38 Cun puithiam Aaron cu Jehovah ih thupek in Hor Tlang ah a hung kai ih Izip ram ihsin Israel tefapawl an pawhsuah hnu a kum sawmlitnak, a thla ngatnak ih a ni khatnak ah cu tawkah a thi. 39 Aaron cu Hor Tlang ih a thih tikah kum 123 a si.

Khualtlawn Peh a Si

40 Cule Kanaan ram Negev ih cêng Kanaan-mi Arad ram siangpahrang in Israel tefapawl an rat kha a rak thei.

41 Cutin Hor Tlang ihsin an păwk ih Zalmonah ah riahhmun an sâm. 42 Zalmonah ihsin an păwk ih Punon ah riahhmun an sâm. 43 Punon ihsin an păwk ih Oboth ah riahhmun an sâm. 44 Oboth ihsin an păwk ih Moab ramri Ije Abarim ah riahhmun an sâm. 45 Ijim ihsin an păwk ih Dibon Gad ah riahhmun an sâm. 46 Dibon Gad ihsin an păwk ih Almon Diblathaim ah riahhmun an sâm. 47 Almon Diblathaim ihsin an păwk ih Nebo hmai Abarim tlangpawl ah riahhmun an sâm. 48 Abarim tlangpawl ihsin an păwk ih Jeriko ralkhat Jordan tiva kapih Moab phairawnpawl ah riahhmun an sâm. 49 Jordan tiva kapah Beth Jesimoth ihsin Abel Sittim tiangin Moab phairawnpawl ah riahhmun an sâm.

Kanaan Nehdan Ding

50 Cule Jeriko ralkhat Jordan tiva kapih Moab phairawnpawl ah Jehovah in Mosi hnenah, 51 «Israel tefapawl be awla, an hnenah, ‹Jordan nan tankaingah ih Kanaan ram nan luh tikah, 52 nan hmai ihsin a ram luahtupawl hmuahhmuah cu nan dawisuak ṭheh pei, an lung kher mi hmuahhmuah cu nan siatsuah ṭheh pei, an milim bur mi hmuahhmuah nan siatsuah ṭheh pei ih an hmun sâng hmuahhmuah cu nan ṭhiat ṭheh pei. 53 A ram luahtupawl nan dawisuak pei ih, cu tawkah nan cêng pei, ziangahtile ram cu nan co dingah ka lo pe zo. 54 Cule nan hrinpawl lakah ro dingah camcawhfung zûkin ram cu nan zem aw pei, hrin tamdeuh hnenah ro kaudeuh na pe pei ih, hrin máldeuh hnenah ro bideuh na pe pei, mi kip an ro ding cu camcawhfung a tlaknak nak a si pei. Nan pupápawl hnám zulhin ro nan co ding a si. 55 Asinan a rammipawl nan hmai ihsin nan dawisuak lo asile, hitin a si ding, nan zuah mipawl cu nan mit hrangah misuntu le nan hnak hrangah hlingtáwm an si ding ih, nan cēnnak ram ah nanmah a lo hnaihnăwktu an si ding. 56 Cuihhleiah hitin a si ding, an parih ka tuah tum mi kha nan parah ka tuah ding,› tiah sim hai aw,» tiin a sim.

34

Kanaan Ramripawl

1 Jehovah in Mosi hnenah, 2 «Israel tefapawl thu pe awla an hnenah, ‹Kanaan ram nan luhngah tikah nan parih a tla mi ram kha nanmai ro ding a si. Kanaan ramripawl cu a táng lam vekin a si. 3 Thlang lam nan ramri cu Zin Ramṭhing ihsin Edom ramri tluan tiang, cun thlang lam nan ramri cu nisuahnak lamah Cite Tipi dĕng tiang a kau ding, 4 cule nan ramri cu Akrabbim Sohnak hmun thlang lam kap ihsin a kĕl ding ih, Zin tiang a feh vivo ding, cule Kadesh Barnea thlang lamah a feh vivo pei, cun Hazar Addar ah a feh ding ih Azmon ah a feh vivo ding, 5 ramri cu Azmon ihsin Izip Lihăwng vakua lamah a kĕl ding ih Tifinriat ah a net ding.

6 ‹Nitlaknak lam ramri cu, Tifinriat Tumpi kha nan ramri ah nan hmang ding. Hihi nitlaknak lam nan ramri a si ding.

7 ‹Cule hihi sak lam nan ramri a si ding: Tifinriat Tumpi ihsin Hor Tlang ah nan ramri rīn nan tuah pei, 8 Hor Tlang ihsin Hamath luhnak ah nan ramri nan tuah pei, cun ramri netnak cu Zedad lamah a feh pei, 9 cun ramri cu Zifron lamah a feh vivo pei ih, Hazar Enan ah a net ding. Hihi sak lam nan ramri ding a si.

10 ‹Nisuahnak lam nan ramri rīn cu Hazar Enan ihsin Shefam ah nan tuah pei, 11 ramri cu Shefam ihsin Ain nisuahnak lam Riblah ah a suk pei, ramri cu a suk vivo pei ih Kinnereth Tipi nisuahnak lam kapah a thleng pei, 12 Jordan tiva tluanin ramri a suk vivo pei ih, Cite Tipi ah a net ding. Hihi a kimvel ramripawl bangtukih nan ram ding a si,› tiah sim hai aw,» tiin a ti.

Kanaan Ram Ṭhendan

13 Cun Mosi in Israel tefapawl hnenah, «Hihi Jehovah in hnám kua le hnám hrek pe dingih thu a pek mi, camcawhfung zûk ih nan luah ding mi ram cu a si. 14 Ziangahtile Reuben tefapawlih hnám anmai pupápawlih sungkua bangtukin le Gad tefapawlih hnám anmai pupápawlih sungkua bangtukin an ro an co zo, cule Manasseh hnám hrek in an ro an co zo. 15 Hnám hnih le a hrek in nisuahnak lam, Jeriko-ih nisuahnak lam ralkhat, Jordan-ih hi lamah an ro an co zo,» tiin thu a pe.

16 Cule Jehovah in Mosi hnenah, 17 «Nan lakah nan ro ding ram a lo zemtu milaipawlih hmin cu puithiam Eleazar le Nun fapa Joshua an si. 18 Cule ro hrangih ram zem dingah hnám kip ihsin hotu pakhat nan rak hruai pei. 19 Hihi cuih milaipawlih hminpawl cu an si: Judah hnám ihsin Jefunneh fapa Kaleb, 20 Simeon tefapawl hnám ihsin, Ammihud fapa Shemuel, 21 Benjamin hnám ihsin Kislon fapa Elidad, 22 Dân tefapawl hnám ihsin hotu pakhat Jogli fapa Bukki, 23 Joseph fapapawl ihsin, Manasseh tefapawl hnám ihsin hotu pakhat Efod fapa Hanniel le, 24 Efraim tefapawl hnám ihsin hotu pakhat, Shiftan fapa Kemuel, 25 Zebulun tefapawl hnám ihsin hotu pakhat Parnak fapa Elizafan, 26 Issakar tefapawl hnám ihsin hotu pakhat Azzan fapa Paltiel, 27 Asher tefapawl hnám ihsin hotu pakhat, Shelomi fapa Ahihud le, 28 Naftali tefapawl hnám ihsin hotu pakhat, Ammihud fapa Pedahel pawl tla an si,» tiah a sim.

29 Hipawl cu Jehovah in Kanaan ram ah Israel tefapawl lakah ro zem dingih thu a pek mipawl an si.

35

Levi-mipawlih Khawpipawl

1 Jeriko ralkhat Jordan tiva kapih Moab phairawnpawl ah Jehovah in Mosi hnenah, 2 «Israel tefapawl kha an ro ding covo ihsin Levi-mipawlih cēnnak ding khuapawl pe dingin thu pe aw, cule cuih khuapawl kimvelih ran tlannak ram lawnglak khal Levi-mipawl nan pe pei. 3 Annih in cēnnak ding khuapawl an nei ding ih, an ran tlannak ram lawnglak cu an rannung rual hrang, an ranpi rual hrang le an ṭilva hmuahhmuah hrangah a si pei. 4 Levi-mipawl nan pek ding mi khawpipawlih ran tlannak ram lawnglak cu khawkulhnak hruang leng lam ihsin a kimvelin dawng 1000 a kau ṭheh pei. 5 Cule khaw leng lam cu nisuahnak lam sirah dawng 2000 le thlang lam sirah dawng 2000, nitlaknak lam sirah dawng 2000 le sak lam sirah dawng 2000 nan tah pei. Khua cu a laiah a um pei. Himi cu annih in khawpipawl hrangih ran tlannak ram lawnglak ah an nei pei.

Răwlhimnak Khawpipawl

6 «Levi-mipawl nan pek ding mi khuapawl lakah khaw ruk cu răwlhimnak khua ah nan ruat pei. Cutin cu tawkah mi that pang tu cu a tlânlut ding. Cule hipawl hleiah khaw dang 42 nan pebêt pei. 7 Levi-mipawl nan pek ding mi khaw zate cu khaw 48 a si ding. Hipawl hi an ran tlannak ram lawnglak thawn nan pe ding a si. 8 Cule nan pek ding mi khuapawl cu Israel tefapawlih co mi sung ihsin an si pei. Hnám tumdeuh in khaw tamdeuh nan pe pei ih, hnám tedeuh in khaw máldeuh nan pe pei. Hnám kip in an co mi ro a tûm a tet zulhin Levi-mipawl hnenah khua nan pe ding a si,» tiin a sim.

9 Cun Jehovah in Mosi hnenah, 10 «Israel tefapawl be awla, an hnenah, ‹Jordan nan tánkai ih Kanaan ram nan luh tikah, 11 nan hrangah răwlhimnak khawpipawl dingah khawpipawl nan ruat pei. Cutin tum lo piih mi pakhat khat a thattu mi that pang tu cu cu tawkah a tlânlut thei ding. 12 Cupawl cu phuba latu lak ihsin nan hrangah răwlhimnak khawpi an si ding. Cuticun mipi-umkhawm hmaiih thuṭhennak ih a din hlanlo mi that pang tu cu a thi lo ding. 13 Cule răwlhimnak khua hrangah khaw ruk nan pe ding a si. 14 Khaw thum cu Jordan-ih hi lam ralah nan ruat pei ih, a dang khaw thum cu Kanaan ram sungah nan ruat pei, cupawl cu răwlhimnak khua an si ding. 15 Hih khaw ruk pawl cu, Israel tefapawl hrang, ram dang mi hrang le an lakih um mikhual hrangah răwlhimnak an si ding. Cuticun tum lo piih mi pakhat khat a thattu pauhpauh cu cu tawkah an tlânlut thei ding a si.

16 ‹Asinan anih in thir hmanrua in a thawi ih cutin a thi a si ahcun, cu pa cu laithat a si, cuih laithatpa cu thah tengteng a si pei. 17 Cule a kut ih mi an thih theinak ding lungto in mi a su ih a thi a si ahcun, amahpa cu laithat a si, cuih laithatpa cu thah tengteng a si pei. 18 Asilole mi an thih theinak ding thing hmanrua in mi a thawi ih a thi a si ahcun, cu pa cu laithat a si, cuih laithatpa cu thah tengteng a si pei. 19 Thisen phuba latu ding cu pa rori in laithatpa cu a that pei, anih in amah a tawn tikah a that ding a si. 20 A huat ruangah a rak nám asilole athupten bawhin thil pakhat khat in a den ruangih a thi, 21 asilole ralawknak ruangah a kut in mi a cūm ih a thi a si ahcun, a cūm tupa cu thah tengteng ding a si. Cu pa cu laithat a si. Thisen phuba latu dingin laithatpa a tawn tikah a that ding a si.

22 ‹Sikhalsehla ralawknak um riai loin a nám pang asilole bawhthup loin thil pakhat khat in a dengngah pang, 23 asilole milai thih theinak ding lungto hmangin mi pakhat in hmulopiin mi a dengngah ih, a ral a si lo lai le tuahmawh a tum lo laiah a thi asile, 24 mipi-umkhawm in hi cīn le dānpawl bangtukin mi that pang tupa le thisen phuba latupaih karlak thu an ṭhen pei. 25 Cutin mipi-umkhawm in mi that pang tupa cu thisen phuba latupaih kut ihsin an runsuak pei, cule mipi in cu pa cu a rak tlanluhnak răwlhimnak khua ah an kirter pei. Cule hriak thianghlim hnih mi puithiam lubik a thih hlanlo cu tawkah a tâp ta pei.

26 ‹Asinan mi that pang tupa cu a tlanluhnak răwlhimnak khua ramri leng a feh tiktikah, 27 thisen phuba latupa in cu pa cu a răwlhimnak khua ramri lengah a táwng ih, thisen phuba latupa in mi that pang tupa cu a thah asile, thisen lakah cu pa cu mimawh a si lo pei. 28 Ziangruangahtile anih cu puithiam lubik a thih hlanlo a răwlhimnak khua ah tâp ringring ding a si. Asinan mi that pang tupa cu puithiam lubik a thih hnuin amai co mi ram ah a kirsal pei.

29 ‹Cule hi thilpawl cu nan tesinfa san tiangin nan cēnnak kip ah nan hrangah thuṭhennak sakhaw dān an si pei. 30 Mi a thattu pauhpauh cu theihpitupawlih theihpinak in cuih laithatpa cu thah ding a si, asinan theihpitu pakhat lawng cu mi pakhat thihnak tiang dāntat dingah theihpinak tling a si lo. 31 Thihnaktlak a mawh mi laithatpaih nunnak hrangah tlennak man nan cohlang lo pei, anih cu thah tengteng sawn ding a si. 32 Cule amai răwlhimnak khua ih a tlânluttupa hrangah puithiam thih hlanih amai ram ih va cêngin a kirsal theinak dingah tlennak man na cohlang lo pei. 33 Cutin nan umnak ram cu nan bawrhhlawhter ding a si lo, ziangahtile thisen cun ram a bawrhhlawhter a si. Ram ah thisen suah a si ruangah cuih ram hrangah thisensuahtuih thisen siarloin sualkhuhthawinak tuah theih a si lo. 34 Curuangah nan luah mi ram ka cēnnak hmun cu bawrhbangter hlah uh, ziangahtile Israel tefapawl lakah kei Jehovah hi ka cêng a si,› tiah sim aw,» tiin a sim.

36

Zelofehad Fanupawlih Pasal Neihnak

1 Joseph fapa hrinpawl lakih Manasseh fapa Makir, cumiih fapa Gilead tefapawlih hrinpawlih lubân pupápawl cu an ra nâi ih Mosi hmai le Israel tefapawlih lubân pupápawl a si mi hotupawl hmaiah an ra ṭawng. 2 Cule annih in, «Jehovah in Israel tefapawl hnenah camcawhfung hmangin ro dingah ram pe dingin nang ka bawipa Mosi thu a lo pe, cule kan unaupa Zelofehad fanupawl ro pe dingin Jehovah in nang ka bawipa thu a lo pe. 3 Israel tefa hnám dangpawlih fapapawl pakhat khat in anmah an neih asile, kan pupápawlih ro ihsin an ro cu lakhlo a si ding, cule an va neih mi hnámih ro ah cumi cu bêt a si ding. Cutin kan co mi ro ihsin cumi cu lakhlo a si ding. 4 Cule Israel tefapawlih aJubili a thlen tikah, an ro cu an va neih mi hnámih ro ah bêt a si ding, cutin kan pupápawlih hnám ro ihsin an ro cu lakhlo a si ding,» tiah an ti.

36:4a Jubili: Kum 50 kim tinteih tuah mi lungawi kum a si. Puithiam Hnaṭuannak bung 25 zoh aw.

5 Cun Mosi in Jehovah kamsuakthu bangtukin Israel tefapawl thu a pe ih, «Joseph fapapawl hnám ih sim mi cu a dik a si. 6 Himi hi Zelofehad fanupawl thuhla ah Jehovah ih thupek mi a si, ‹A ṭhabik ih an ruah mi cu nei ko hai seh, asinan an pupápawl hnám lakih an hrin sung ihta lawng an nei thei,› tiah a ti. 7 Israel tefa mi kip in an pupápawlih hnám ro an kilhim ding ruangah Israel tefapawlih ro cu hnám khat ihsin hnám khat ah ṭhawn a si lo ding. 8 Cule Israel tefapawl in an pupápawlih ro an co theinak dingah, Israel tefapawl ziang hnám khalah ro a cotu fanu kip cu an paih hnám lakih hrin minung pakhat khat ih nupi a si pei. 9 Israel tefa hnám kip in anmai bul ro ciar an kilhim ding ruangah hnám khat ihsin hnám dangah ro a ṭhawn ti a um lo ding,» tiin a sim hai.

10 Jehovah in Mosi thu a pek vekin Zelofehad fanupawl in an tuah. 11 Zelofehad fanu Mahlah, Tirzah, Hoglah, Milkah le Noah pawl cu an paseupawlih fapapawl in an nei. 12 Annih cu Joseph fapa Manasseh tefapawl sungih hrinpawl in an nei, cule an ro cu an paih hrinih hnám ah a tâng.

13 Hipawl cu Jeriko ralkhat, Jordan kapih Moab phairawnpawl ah Mosi hmangin Israel tefapawl hnenah Jehovah in thu a pek mi thupekpawl le cīn le dānpawl tla an si.