About Bible Thianghlim | ©

BibleThianghlim – 1 THESSALONIKA

Genesis Exodus Leviticus Numbers Deuteronomy Joshua Judges Ruth 1 Samuel 2 Samuel 1 Kings 2 Kings 1 Chronicles 2 Chronicles Ezra Nehemiah Esther Job Psalm Proverbs Ecclesiastes Song of Solomon Isaiah Jeremiah Lamentations Ezekiel Daniel Hosea Joel Amos Obadiah Jonah Micah Nahum Habakkuk Zephaniah Haggai Zechariah Malachi

Matthew Mark Luke John Acts Romans 1 Corinthians 2 Corinthians Galatians Ephesians Philippians Colossians 1 Thessalonians 2 Thessalonians 1 Timothy 2 Timothy Titus Philemon Hebrews James 1 Peter 2 Peter 1 John 2 John 3 John Jude Revelation

1 THESSALONIKA

  • A ngantu: Paul
  • A siartu: Thessalonika kawhhran
  • Ngan kum: A.D. 51

Troas khua ah Paul in Masidonia larnak a dăwn tikcucān hi Paul, Silas le Timothy tepawl in a vei hnihnak missionary khual an tlawn laiah a si (Apo 16:6-11). Culeveten Aegean Tifinriat fehtlăngin Masidonia ah thusim dingin an fehsuak. Tiduhdahnak nasazet lakah Filipi khua ah kawhhran pakhat an dĭn (2:2; Apo 16:12-40). Cule an feh vivo ih nitlaknak thlang lamah an feh ih, Masidonia ram khawpi Thessalonika an thleng. Cuih khua cu tifinriat kap tluanih um, Rom khawpi le nisuahnak lam rampawl pehtlaihawknak zinpi kapih um mi a si. Leitlun hmun kip ih sumdâwngpawl cu cuih khawpi ah an ra. Pathian in Thessalonika khua ih mi hrekkhat a rundam ih thuthangṭha in nasazetin an nun a thleng. Cutin an zumnak thu cu a kiangkap hmunpawl le hmun dang tiang a thangsuak (1:8; 4:10).

Sikhalsehla Thessalonika khua ah hivek thlengawknak hi awlaiteih thleng mi a si lo (Apo 17:1-10). Missionary-pawl in Sabbath zarh thum sung Sinakok ih Jew-pawl hnenah thu an sim. Messiah khĕnbet a tuarnak le a thawhsalnak cu Thukham Hlun in a rak simsung cia ti annih in an hmuh. Nazaret Jesu cu cuih simsungnak famkimtertu a sizia an simfiang. Jew-mi mi hrekkhat in an rak zum, asinan thuthangṭha in Zentelpawl lakih a hnaṭuan a nasasawn (2:14). Zum duh lo Jew-pawl in zumtupawl parah tiduhdahnak an căwktho. Cuticun missionary-pawl khal an duh hnakih rangin an fehsuak a ṭul (2:15-16).

Cutivek dinhmun harsa lakah Paul in Thessalonika zumtupawl a fehsan a ṭul tikah, ziangtin an rung um tiin a dawn a har. Curuangah Athens khua ih a um laiah an zumnak sawhhnget dingin Timothy a thlahkirsal (3:1-2). Thlang lam hladeuh Korinth khua tiang Paul a thlen tikah, Paul cu Timothy in a va fĭnsal (Apo 18:5). Timothy in zumtupawl Bawipa ah hnget zetin an um ti thu a sim (3:6). Cun A.D. 51 hrawngah khan Paul in 1 Thessalonika cakuat hi a ngan.

Hi cakuat hi ṭhen hnih ih ṭhen theih a si. A hmaisa bung thum cun Thessalonika khawmipawl hnenih Paul-ih rawngbawlnak thu le cumi ihsin zohṭhim theih ding mi thupawl a tarlang. A netasawn bung hnih cun zumtupawl hnenah thapeknak dangdang thu a ngan, a hleicein Khrih ratsalnak ding thu.

Tiduhdahnak a tuar rero tu zumtupawl hnenih cakuat dingah Paul-ih thinlung ah Pathian in hna a rak ṭuan. Hi cabu hin, «a uknak le a ropitnak sungih a lo kotu Pathian lăwmtlakih nan nun theinak ding hrangah a si,» (2:12) ti mi nunpi dingin tha in pe a si.

Thuhlawm Ṭhen

  • I. Thuhmaihruai (1:1)
  • II. Thuthangṭha na cohlandān kha cîng ringring aw (1:2-2:16)
  • III. Nundān mawi in nung aw (2:17-5:22)
  • IV. Thukharnak (5:23-28)

1

Cibaibûknak

1 Paul, Silas le Timothy in,

Pa Pathian le Bawi Jesu Khrih ih a um mi, Thessalonika kawhhran hnenah:

Kan Pa Pathian le Bawi Jesu Khrih hnen ihsin zangfahnak le hnangamdaihnak nan hnenah um seh.

Thessalonika-mipawlih Zumnak

2 Kan thlacamnak ah nan hmin sâlin nan zate hrangah Pathian hnenah lungawi thu kan sim ringring. 3 Zumnak ih nan hnaṭuan, duhdawtnak ruangih nasazetih hna nan ṭuanzia le kan Bawipa Jesu Khrih ah ruahsannak ruangih nan tuarfainakpawl kha, kan Pathian le paih mithmuhah catbang loin kan cîng ringring. 4 Duhdawt mi u le nau tla, Pathian ih a lo hrilnak kha kan thei. 5 Ziangahtile nan lakah nanmai hlawknak ding hrangah ziang vek minung kan si ti nan theih bangin, kan thuthangṭha cu ṭawngkam lawngin nan hnenah a thleng lo ih, huham le Thlarau Thianghlim le theihfĕngnak nasazet thawn a thleng sawn a si kha!

6 Cule zăwnzaihnak nasazet tuarin, Thlarau Thianghlim ihsin aipuannak thawn kamsuakthu cu nan rak cohlang ih, nannih cu kanmah le Bawipa cawngtu ah nan cang. 7 Curuangah nannih cu Masidonia peng le Akaia peng ih zumtu hmuahhmuah ih zohṭhim mi nan si. 8 Ziangahtile nan hnen ihsin Masidonia peng le Akaia peng lawngah Bawipaih kamsuakthu cu a thang a si lo ih, hmun tin khalah a thang a si. Pathian lamih nan zumnak cu a thangsuak, cutin zianghman kannih ih rel a ṭul lo. 9 Ziangahtile nan hnenih kan rat laiah, ziangvekin in zohṭha ti le a nung mi le a dik mi Pathian rian dingah milempawl hnen ihsin Pathian lamah ziangtin nan kir ti thu anmah rori in in thăn. 10 Cule van ihsi rung ṭum ding mi Pathian Fapa nan hngah thu khal in sim. Amah cu Jesu, mithi lak ihsin kaihthawh mi, thinlingnak ra thleng ding mi lak ihsin in runsuaktu a si.

2

Thessalonika ih Paul Rawngbawlnak

1 Ziangahtile u le nau tla, nan hnenih kan ratnak kha a lak men a si lo ti nanmah rori in nan thei. 2 Asinan a hlanah, Filipi ah harsatnak tuarin le ningzakza ih tuahin kan um hnu khalah, cuihhnu ah nan theih vekin, dodalnak tam zet karlakah Pathian thuthangṭha nan hnenih sim dingah kan Pathian ah kan ral a ṭha a si. 3 Ziangahtile nan hnenih thazangpeknak thu kan phuan mi hi bumnak thu men simaw, bawrhhlawhnak thu simaw, hrăwkhrawlnak thu men simaw ihsi suak a si lo.

4 Cuhnakin thuthangṭha kiltlak ah Pathian ih in pawm vekin, minung lunghmuiter tum loin, kan thinlung hniksaktu Pathian lunghmuizawngin thu kan phuang sawn a si. 5 Ziangahtile nan theih bangin ziang tik hmanah fakdernak ṭawngkampawl kan hmang dah lo ih, duhhamnak thup hmang khal kan si dah lo ti nan thei, Pathian cu in theihpitu a si. 6 Khrih-ih apostol kan si vekin, phurrit lo pek theinak kan nei ko nân, minung lakah siseh, nanmah le mi dangpawl lak khalah sunlawinak kan hawl dah lo.

7 Sikhalsehla nu nau pawm in amai fāte a duat vekin, nan lakah zaidam zetin kan um sawn a si kha. 8 Cutivekcun nannih cu kan hrangah duhnung zet mi nan si ruangah kan lo ngai tuk lawmmam ih, nan hnenih Pathian thuthangṭha sim lawng si loin, kanmai nunnak khal lo pek kan duh. 9 Ziangahtile u le nau tla, nan lakah zohman sumpai thu ah nan phur kan lo rihterlonak dingah, kan ṭuanbăngzia le kan harsatdān pawl, a sun a zan hnaṭuanin nan hnenah Pathian thuthangṭha kan lo sim kha nan cîng ringring.

10 Zumtu nannihpawl lakah ziangti vekin thianghlim le dik le sawihnăwm kâi loin kan nung ti kha Pathian le nannih hi in theihpitu nan si. 11 Pa in a falepawl parih a tuah bangin, nan zaten ziang tlukin tha kan lo pe, kan lo hnem ih kan lo theihter ti nan theih vekin, 12 cutin a uknak le a ropitnak sungih a lo kotu Pathian lăwmtlakih nan nun theinak ding hrangah a si.

13 Kan hnen ihsin nan rak theih mi Pathian kamsuakthu nan rak cohlan tikah milai ṭawngkam vekin si loin, a zumtu nanmah hnen khalih hmual nei zetih ṭuantu Pathian kamsuakthu diktak a sinak vek sawnin nan rak cohlang, cumi ruangah catbang loin Pathian hnenah lungawi thu kan sim. 14 Ziangahtile nannih, u le nau tla, Khrih Jesu ih a um mi Judia peng ih Pathian kawhhranpawl nun cawngtu ah nan cang. Annih in Jew-pawl hnen ihsin an tuar bangin nannih khal nan khawpipawl hnen ihsin cuvek thilpawl cu nan tuar ve. 15 Cuih Jew-pawl cun Bawi Jesu le anmai profetpawl an that ih, kannih khal in tiduhdah; cule Pathian lung an hmuiter lo ih, mi hmuahhmuah an dokalh. 16 Annih cun Zentelpawl rundam an si theinak dingih Zentelpawl hnenih thusim in kham, cutivekcun an sualpawl tahnak cu an kimter ringring. An parah thinlingnak cu a zaten a thleng thluh.

Paul in Thessalonika-mipawl Hmuh a Hiar

17 Asinan u le nau tla, thinlung lamah si loin, taksa in rei lo te sung kan ṭhenaw, hmaităwnih lo hmuh ding hi kan hiar zet, lo hmuh ding khal hngakhlap zetin kan zuam a si. 18 Curuangah nan hnenih rat kan rak duh ṭheu. Keimah, Paul rori khal vei khat rat ka rak tum ih, cuihhnu ah ka tum lehsal nân, Setan in i kham. 19 Ziangahtile kan ruahsannak le kan aipuannak le kan aipuannak lallukhum cu zo so a si? Bawi Jesu Khrih a rat tikah, a hmaika-ah nanmah rori hi nan si lo ding maw? 20 Ziangahtile nanmah hi kan ropitnak le kan aipuannak cu nan si.

3

1 Curuangah kan tuar thei nawn lo tikah, keimah lawng hi Athen khua ah tāng ta sehla a ṭha ding tiah kan ruat. 2 Cule kan unaupa Timothy, Pathian rawngbawltu le Khrih thuthangṭha ih kan hnaṭuanpi hi lo hngetter ding le nan zumnak thu ah tha lo pe dingin kan rak thlah. 3 Cuticun tuih cān ih zăwnzaihnakpawl hin zohman a hnînter lo ding; ziangahtile hivek tuar dingih ruat mi kan si ti cu nanmah rori in nan thei. 4 Ziangahtile nan hnenih kan um lai khalah khan harsatnak kan tuar cing ding tiah kan lo sim cia zo, kan sim vek taktakin a rak thleng ti nan thei. 5 Himi ruangih ka tuar thei nawn lo tikah, nan zumnak thei dingin amah kha ka run thlah, culoasile ziangti zawngin simaw sualfawrhtu cun sual a lo fawrh pang ding ti ka phâng ih, nasazetih kan hnaṭuan cu a lak menah a cang pang ding.

Timothy-ih Thusim Mi Lungawiumza

6 Asinan atu ah Timothy cu nan hnen ihsin kan hnenah a ra thleng zo ih, nan zumnak le nan duhdawtnak thuhla ah thu lungawium zet in rak sum. A ṭha lamih in man ringring thupawl siseh, nasazetih hmuh kan lo hiar vekin nannih khal in hmuh in hiar ve ti thupawl in sim. 7 Curuangah, u le nau tla, kan zăwnzaihnak le vansannak hmuahhmuah ah nan zumnak ruangah nan thuhla ah hnangam zetin kan um. 8 Bawipa ih nan dinhngeh ruangah atu ah cun kan nung hlunhlo a si.

9 Curuangah nanmah hrangah Pathian hnenah ziang lungawi thu so kan simsal thei ding? Kan Pathian hmaika-ah nanmah ruangah aipuannak phun zakip thawn lungawiaipuangin kan um a si. 10 Nan hmel kan hmuh theinak dingah le nan zumnak lamih tlaksăm mi kan lo silhkhahsak theinak dingah, a sun a zan cawl loin thla kan cam.

Kawhhran hrang Thlacam

11 Cun kan Pathian le Pa rori le kan Bawipa Jesu Khrih in nan lam panin kan lamzin in hruai hram seh. 12 Cule nanmah lamih duhdawtnak kan neih vekin, pakhat le pakhat nan duhdawtawknak le mi hmuahhmuah nan duhdawtnak cu Bawipa in karhzaiterin luangliamter hram seh. 13 Cuticun kan Bawipa Jesu Khrih, a mithiangpawl hmuahhmuah thawi a rat tikah, kan Pathian le Pa hmaika-ah nan thinlung cu thianhlimnak ah sawihnăwm kâi loin, lo dĭnhnget hram seh.

4

Pathian Lungawiter dingih Nun

1 Cuihhleiah, u le nau tla, nan umtudān ding le Pathian nan lunghmuiterdān ding kan hnen ihsin nan ngah zo vekin nei sinsin dingin Bawi Jesu ah kan lo ngen ih, kan lo fawrh a si. 2 Ziangahtile Bawi Jesu thawngin ziang thupekpawl kan lo pe ti nan thei.

3 Ziangahtile Pathian duhzawngih nan serh thianhlimawknak ding cu hihi a si: nunau-mipa sualnak hrial uh. 4 Nan lakih mi tin in anmai abungbel cu thianhlimnak le zahumnak ah ziangtin an nei thei ding ti thei hai seh. 5 Pathian thei lo tu Zentelpawl bangin, câkhiar zekzeknak ah um hlah uh. 6 Cutin mi zohman in a unau parah sual tuah hlah sehla, a hnen ihsin thil zianghman bumnak in la hlah seh. Ziangruangahtile kannih khal in ralrinnak kan lo pek le kan lo theihter zo bangin, Bawipa cu cuvek titupawl hmuahhmuah phuleisamtu a si. 7 Ziangahtile Pathian in bawrhhlawh dingin si loin, thianghlim dingin in ko sawn a si. 8 Curuangah himi ziangsiar lo tu cu, milai ziangsiar lo a si lo ih, a Thlarau Thianghlim in petu Pathian ziangsiar lo a si sawn.

4:4a bungbel: Grik ṭawng ih umtuzia ah cun hman ṭangkai mi thil ziangkim a sawhkhih thei, asinan hi tawkah cun nupi a sim duhnak a si a zumum.

9 Asinan unau duhdawtnak thu ah cun nan hnenih ka ngan nan ṭul lo, ziangahtile pakhat le pakhat duhdawawtăwn dingin, nanmah rori kha Pathian in a lo zirh. 10 Masidonia peng ih um unaupawl hmuahhmuah hnenah cucu nan tuah taktak ko nân, u le nau tla, nasa sinsinih tuah dingin kan lo ngen a si.

11 Cun thu kan lo pek zo bangin ngawingam teih nun zuam uhla, nanmai hnaṭuan cio ṭuanin, nanmai kut rori in hna ṭuan uh. 12 Cutin leng lam mipawl hmuhah mawi zetin nan nung thei ding ih, cutin tlaksăm mi zianghman nan nei lo ding.

Bawipaih Ratnak

13 Sikhalsehla u le nau tla, mi dang ruahsannak nei lo pawl vekih nan riah a siatlonak dingah, a itthatpawl thuhla thei loih nan um ka duh lo. 14 Ziangahtile Jesu cu a thi ih a thosal ti kan zum asile, Jesu ih a itthat mipawl cu Pathian in amai zawngah a run hruai hai leh ding.

15 Cumi ruangah Bawipaih kamsuakthu hmangin hihi nan hnenah kan lo sim, kannih Bawipaih rat tiang nungdam ih a tāngtupawl in a itthatpawl kan khelh hrimhrim lo ding. 16 Ziangahtile Bawipa amah rori cu authâwm thawn, vancungmi lubikih aw le Pathian tawtawrawt aw thawn, van ihsin a rung ṭum ding. Cule Khrih ih mithipawl an tho hmaisa ding. 17 Cun kannih nungih a rak umtupawl cu boruak ah Bawipa táwng dingah anmahpawl thawn hmunkhatah mero lakah laksohtlang kan si ding. Cuticun Bawipa hnenah a kumkhuain kan um ding. 18 Curuangah hih ṭawngkampawl hin pakhat le pakhat hnem awtăwn uh.

5

Bawipaih Ni

1 Sikhalsehla u le nau tla, a tikcu le a cān thu ah cun ka lo ngansak nan ṭul lo. 2 Ziangahtile Bawipaih Ni cu zan ih fifir a rat vekin, a ra ding ti famkim zetin nanmah rori in nan thei. 3 Ziangahtile mi in, «Daihnak le himnak!» tiih an ti laitakah, nunau fahrinnat tuar vekin, hmakhatteah siatralnak an parah a thleng ding ih, an tlânsuak thei hrimhrim lo ding.

4 Asinan u le nau tla, nannih cu cuih Ni in fifir bangih lo kaingah dingin thim ah nan um lo. 5 Nan zaten tleu fāte le sun khawvâng fāte nan si. Zan fāte kan si lo ih, thim fāte khal kan si lo. 6 Curuangah mi dangpawl vekin itthat hlah uhsi, ralringin le harhvângin um sawn uhsi. 7 Ziangahtile a itthatpawl cu zan ah an itthat ṭheu ih, zuripawl khal zan ah an ri ṭheu. 8 Asinan kannih sun ihta a si mipawl hi cun, zumnak le duhdawtnak cu awmphaw ah hmangin, rundam si theihfĕngnak cu lukhum ah hmangin harhvângin um uhsi. 9 Ziangahtile Pathian in thinlingnak tuar dingah si loin, kan Bawipa Jesu Khrih zarah rundamnak co dingah in ruat sawn a si. 10 Kan men ah simaw, kan ihthah ah simaw, amah thawi kan nuntlang theinak dingah, anih cu kan hrangah a thi. 11 Curuangah nan tuah rero zo bangin, pakhat le pakhat hnem aw uhla, pakhat le pakhat tuahṭha aw uh.

Thucah Netabik

12 Cule u le nau tla, nan lakih bāng zetih hna a ṭuantu le Bawipa ah nan hotupawl le nun a lo zirhtupawl kha ṭihzah dingah ka lo ngen a si. 13 Cun an hnaṭuannak ruangah duhdawtnak ah nasazetin anmah cu ngaisang dingin ka lo ngen. Nanmah lakah remawten um uh. 14 Atu ah u le nau tla, mizāngzêlpawl cu ralrinnak pe uhla, thanaupawl kha thape uh, a ṭawnṭai mipawl cu săwmdawl uhla, mi hmuahhmuah hnenah nan thinsau uh tiah kan lo fawrh a si. 15 Zohman in sual cu sual in zo hnen hmanah va lehrūl loin, nanmai lakah le mi hmuahhmuah hnenih tuah dingih a ṭha mi kha va dawi ringring sawn uh.

16 Lungawiaipuangin um ringring uh, 17 catbang loin thlacam uh, 18 ziangkim ah lungawi thu sim uh; ziangahtile cucu Khrih Jesu ah nanmai hrangah Pathian duh zawng a si. 19 Thlarau mitter hlah uh. 20 Profet vekih thuphuannak cu ziang siarloin um hlah uh. 21 Thil ziangkim hniksak uhla, a ṭha mi cu fekten kai uh. 22 Thil ṭhalo vekih lang mi hmuahhmuah hrial uh.

23 Cun hnangamdaihnak Pathian rori cun famkimten lo thianghlimterin, nan thlarau, nan thinlung le nan taksaruangpi pumhlum cu kan Bawipa Jesu Khrih a rat tikah sawihnăwm kâi loin, humhim in um hram seh. 24 A lo kotu a rinum vekin, cumi cu a tuah khal a tuah ding.

25 U le nau tla, kan hrangah thlacam uh. 26 Unau zaten a thianghlim mi hnămawknak in cibaibûk uh. 27 Hi cakuat hi unau mithianghlimpawl hmuahhmuah hnenih siar dingin Bawipaih hmin in ka lo cah a si.

28 Kan Bawipa Jesu Khrih-ih zangfahnak cu nan hnenah um hram seh. Amen.