About Bible Thianghlim | ©

BibleThianghlim – SAM

Old Testament

Genesis Exodus Leviticus Numbers Deuteronomy Joshua Judges Ruth 1 Samuel 2 Samuel 1 Kings 2 Kings 1 Chronicles 2 Chronicles Ezra Nehemiah Esther Job Psalm Proverbs Ecclesiastes Song of Solomon Isaiah Jeremiah Lamentations Ezekiel Daniel Hosea Joel Amos Obadiah Jonah Micah Nahum Habakkuk Zephaniah Haggai Zechariah Malachi

New Testament

Matthew Mark Luke John Acts Romans 1 Corinthians 2 Corinthians Galatians Ephesians Philippians Colossians 1 Thessalonians 2 Thessalonians 1 Timothy 2 Timothy Titus Philemon Hebrews James 1 Peter 2 Peter 1 John 2 John 3 John Jude Revelation

SAM

12345678910
11121314151617181920
21222324252627282930
31323334353637383940
41424344454647484950
51525354555657585960
61626364656667686970
71727374757677787980
81828384858687888990
919293949596979899100
101102103104105106107108109110
111112113114115116117118119120
121122123124125126127128129130
131132133134135136137138139140
141142143144145146147148149150

• A ngantu: David le mi dangpawl
• A huap sung cān: Cān dangdang
• Ngan kum: B.C. 1400-500 hrawng

Sam a hrek hrawng hi David ih phuah mi an si. Sam tampi cu siangpahrang a si hlanih a phuah mi an si. Sam phuahtu mi dang cu: Asaf (Sam 73-83), Solomon (Sam 72, 127), Ezra-mi Ethan (Sam 89), Mosi (Sam 90) le puithiam sungkua Korah fapapawl tla an si (Sam 84, 85, 87, 88). Sam 50 zikte hi cu a phuahtu theih an si lo.

David ih phuah mi Sam tampi cu a nun lam tluanih thil thleng mi ṭansan ih a phuah mi an si (Ṭhimnakah, Sam 18, 34, 51, 52). Sam hrekkhat cun Messiah thuhla le a Siangpahrang sinak thu an simsung (Ṭhimnak ah, Sam 2, 22, 45, 110). Thlacamnak le thangṭhatnak ih a khat mi hi cabu hi Pathian in zumtupawl a pe.

Sam hla phuahtupawl in an hlapawl hmangin milai phun dangdang hnenah thu an sim. Ṭhimnak ah, a phuahtu in amah lala hnenih thu a simawknak (Sam 23, 103), mithiangpawl hnenih thusimnak (Sam 20, 29, 33, 34, 37, 47, 95), misualpawl hnenih thusimnak (Sam 52, 58) le leilung tlunih miphun hmuahhmuah hnenih thusimnak (Sam 96, 97, 100, 117) pawl tla an si. Sam hrekkhat ah cun a phuahtu in Pathian, a tumtah mipawl, a thil tipawl le a kamsuakthupawl ngunngaih zetin a ruat (Sam 1, 2, 14, 19, 24, 32, 46). Culawng si loin, Sam phuahtupawl in Pathian hnenih an ṭawngsuak mi khal tam zet kan hmu.

Sam 119 hi a saubik ih, cuih Sam cu Pathian Dān ropitzia thangṭhatnak le theihthiamnak ding hrangih thlacamnak a si. Sam tamsawn ah cun Pathian hnenih thlacamnak kan hmu ih, a hrek tluk cun câng hmaisabikah thlacamnak in an thăwk. Sam ah hin milaipawlih harsatnak, riahsiatnak, ṭahnak, beidăwnnak, thinhengnak le lungawiaipuannak an tawnteh mipawl kan hmu. A cāncān ah cun Sam phuahtupawl in humhimnak duhin an ausuak ṭheu (Sam 6, 12, 13, 69). Sam hrekkhat ah cun runsuahnak ruangih Pathian an thangṭhat thu kan hmu (Sam 7, 34). A cāncānah cun Pathian daiteih a um ruangah, an beidăwn cān khal a um (Sam 42, 88). Pathian umpinak ruangih lungawinak cān (Sam 63, 66), sual ruangih riahsiatnak cān (Sam 38, 51) le Pathian ngaidamnak ruangih lungawiaipuannak (Sam 32) cān khal an nei.

Misualrálpawl hnianghnar zetih an um tikah an beidăwn cān khal a um (Sam 73). Pathian in dik zetin mi hmuahhmuah a uk ruangah, amah biak cān an nei ih (Sam 2, 47, 52) a fimnak le a thil ti mipawl parah khawruahharih an um cān khal a um (Sam 8, 19, 103, 104). Sam tamtak ih thupi pawimawh zet kan hmuh mi cu Pathian rinsannak hi a si (Ṭhimnakah, Sam 2:13; 4:5, 8; 5:11; 7:1; 9:10; 11:1; 13:5; 16:1; 37:3, 5, 40). Kan thinlung ih um hmuahhmuah ziangtin Pathian kan sim ding ti Sam in in khihhmuh ih, ziang dinhmun ih kan um tik khalah amah rinsan dingin in zirh.

Bu 1-nak

1

Lamzin Phun Hnih

1 Pathian ngaihsak lo thurawnpeknak ih a feh lo tu,
Misualpawl lamzin khalih a ding lo tu,
Mihmuhsuamtupawl tonak khalih a to lo tu cu mithlawsuak a si.
2 Amai năwmnak cu Jehovah Dān ah a si sawn ih,
A dān cu a sun a zanin ngunngaih zetin a ngaihtuah.
3 Amah cu tiluang kapih phŭn mi thingkung,
A tikcu teih a rah rahsuak ṭheu,
A hnah khal vuai dah lo mi vek a si.
A tuah mi pauhpauh ah a hmuingil ding.
4 Pathian ngaihsak lo pawl cu cuvek an si lo,
Annih cu thli ih a sĕmhlo mi fānghi vek an si sawn.
5 Curuangah Pathian ngaihsak lo tupawl cu thuṭhennak ah an ding thei lo ding,
Misualpawl khal midingfel umkhawmnak ah an tel thei lo ding.
6 Ziangahtile Jehovah in midingfelpawlih lamzin cu a thei,
Asinan Pathian ngaihsak lo pawlih lamzin cu a siatrál ding.

2

A Hriak Thih Mi hnenih Pathian Thutiam

1 Ziangahso miphunpawl an thin a so ih,
Minungpawl hin thil ṭhahnem lo phiarsawmnak an tuah?
2 Leilung siangpahrangpawl tiar cia-in an ding ih,
Jehovah le a Hriak Thih dokalhin,
Uktupawl thu an rawnawkhawm ih,
3 «An ṭemṭawnnak hripawl siatbăl ṭheh nêknêk in,
An hrihrualpawl kan hnen ihsin hlăwnhlo uhsi,» tiah an ti.
4 Vanpawl parih a totu cu a hni ding;
Bawipa cun anmah a hnihsan hai ding.
5 Cun thinling zetin anmah a be ding ih,
A thinsonak in an thla a phângter ding:
6 «Sikhalsehla kei cun ka tlang thianghlim Zion ah,
Ka Siangpahrang ka ruat zo.»
7 «Thusuah ka thăn ding:
Jehovah in ka hnenah hitin i sim,
‹Nang cu ka Fapa na si,
Tuihsun ah ka lo hring a si.
8 I dil awla, miphunpawl cu na ro dingah ka lo pe ding,
Cule leilung cemnetnak thlengin na ta dingah.
9 Anmah cu thir kianghrăwl in na khuai hai ding;
Beltuahtuih bel vekin na hlăwnkuai nêknêk hai ding.› »
10 Curuangah Maw siangpahrangpawl, fim uh;
Nannih leilung parih thuṭhentupawl, fimkhur uh.
11 Jehovah kha ṭihzahnak thawn rian uhla,
Khūr rero in lungawiaipuangin um uh.
12 Fapa kha hnam uh, culole a thin a heng ding ih,
Nan thulunlonak ah nan hlorál pang ding,
A thinlingnak alh cu rei lo te lawng a si.
Amah a rinsantu hmuahhmuah cu mithlawsuak an si.

3

Ral lakih Pathian Rinsannak

A fapa Absalom hnen ihsin a tlansuah ṭum ih David-ih Sam.

1 Maw Jehovah, keimah harsatnak i petupawl hi ziang tlukin so an karh!
Keimah dokalhtu an tam tuk.
2 Mi tampi in ka nunnak thuhla ah,
«A hrangah Pathian băwmnak a um lo,» tiah an ti. Selah
3 Asinan Maw Jehovah, nang cu ka hrangah ralphaw na si,
Ka ropitnak le ka lu Cawisângtu na si.
4 Jehovah hnenah ka au ih,
Anih in a tlang thianghlim ihsin i rak sâng. Selah
5 Ka zau ih ka itthat;
Ka ṭhangsal, ziangahtile Jehovah in i kilhim.
6 Keimah do dingah ka kimvel hmuahhmuah ih a timlamaw mi,
Mi 10000 kha ka ṭih lo ding.
7 Maw Jehovah, tho aw;
Maw ka Pathian i run aw!
Ziangahtile nang in ka ral hmuahhmuah kha an khabe ruh na rak vuak;
Pathian ngaihsak lo pawlih ha na khiahsak.
8 Runsuahnak cu Jehovah ta a si.
Na thlawsuah cu na minungpawl parah a um. Selah

4

Runsuahnak hrang Thlacam

Hla Hruaitu Hrang. Neginoth thawi Sak ding Mi, David-ih Sam.

1 Maw ka dingfelnak Pathian, ka lo kawh tikah i thei aw!
Ka vansannak ihsin i run zo;
Ka parah zahngai awla, ka thlacam thei aw.
2 Maw nannih minung fapapawl,
Ziang tik tiang so,
Ka ropitnak hi ningzahnak ah nan canter ding?
Ziang tik tiang so thil santlailo nan duh ding ih,
Thuphan nan hawl ding? Selah
3 Jehovah in Pathian ngaihsaktu kha amai hrangah a rethran ti thei uh;
Amah Jehovah ka kawh tikah in sâng ding.
4 Nan thinheng uhla, sual tuah hlah uh.
Nan ihkhun parah nan thinlung in ngunngaih zetin ngaihtuah uhla, hnangamten um uh. Selah
5 Dingfelnak raithawinakpawl hlan uh,
Cule Jehovah rinsan uh.
6 Mi tampi in,
«Zo in so thil ṭha in hmuh ding,» tiah an ti.
Maw Jehovah, na mithmai kha kan parah tlangter aw.
7 Ka thinlung ah lungawinak na ret,
An thlairawl le sabitzu an neih tam cān ih an lungawinak hnakih tam in.
8 Hnangamten ka zau ding ih, ka itthat ding;
Ziangahtile Maw Jehovah, nangmah lawng in himten i cêngter.

5

Runsuahnak hrangih Pathian Rinsannak

Hla Hruaitu Hrang. ^aNehillot thawi Sak ding Mi, David-ih Sam.

^a Nehillot: Thli ih sĕm awn ci awnmawi thilripawl thawi sak ding tinak.

1 Maw Jehovah, ka ṭawngkampawl lamah hna tŭn aw,
Ngunngaih zetih ka ngaihtuahnak hi ngaihsak aw.
2 Ka Siangpahrang le ka Pathian,
Ka auaw hi ngaithla aw,
Ziangahtile na hnenah thla ka cam ding.
3 Maw Jehovah, zing ah ka aw na thei ding;
Zing ah cumi cu na hnen lamah ka thlengter ding,
Cule tlun lam ka zoh ding.
4 Ziangahtile nang cu, sualralnak ih lungsi Pathian na si lo ih,
Nangmah ah thil ṭhalo a um fawn lo ding.
5 Mitluangkhâwngpawl cu na mithmuhah an ding lo ding;
Nang cun mawhsualnak tuahtu hmuahhmuah na hua.
6 Nang in thuphan pertupawl na siatsuah ding;
Jehovah in thisensuahhmang le mibumhmangpa cu a fih a si.
7 Asinan kei lawngte cu, na lainatduhdawtnak tampi thawn na inn sungah ka lut ding;
Nangmah lo ṭihzahnak thawn na temple thianghlim lamah ka băwkkhup ding.
8 Maw Jehovah, ka ralpawl ruangah na dingfelnak in i hruai aw.
Ka hmaika-ah na lamzin dĭngten tuah aw.
9 Ziangahtile an kâ ah rinumnak a um lo;
An sung lam cu siatralnak a si;
An dang cu a áwngaw mi thlān vek a si;
An lei in mi an fakder.
10 Maw Pathian, anmahpawl kha mawh neiah phuang aw!
Anmai khawkhannakpawl hmangin tlu hai seh;
An mawhsualnak tampi ruangah anmah cu hlăwnsuak hai aw,
Ziangahtile annih cu na lakah an hél.
11 Asinan nangmah rinsantu hmuahhmuah cu lungawiaipuangin um hai seh;
Anmah na humhim hai ruangah, aipuangin au hai seh;
Na hmin duhdawttupawl khal nangmah ah aipuangin um hai seh.
12 Ziangahtile Maw Jehovah, nang cun midingfel na thlawsuah ding;
Amah cu duhsaknak thawn ralphaw vekin na kulh ding.

6

Damnak hrang Thlacam

Hla Hruaitu Hrang. Neginoth le ^aSheminith thawi Sak Mi, David-ih Sam.

^a Sheminith: Hri riat nei awnmawi thilri thawi sak ding tinak.

1 Maw Jehovah, na thinhengin i kawk hlah awla,
Na lunghmuilonak sosa in nun i sim fawn hlah.
2 Maw Jehovah, ka tlunah zahngai hram aw, ziangahtile kei cu micaklo ka si;
Maw Jehovah, i tidam aw, ziangahtile ka ruhpawl an buai.
3 Ka nun khal nasazetin harsatnak a táwng;
Maw Jehovah, nang cu ziang tik tiang so na rei ding?
4 Maw Jehovah, ra kir awla, ka nunnak runsuak aw!
Na lainatduhdawtnak ruangah i run aw.
5 Ziangahtile thihnak ah cun nangmah cīn ringring nak a um lo;
Sheol ah zo in so na hnenih lungawi thu sim ding?
6 Ka aihramnak ah ka cau ṭheh.
Zanvar ka ihkhun ka ciapter;
Ka lukham khal ka mitthli in ka cîarter ṭheh.
7 Thinnatnak ruangah ka mit a māl;
Ka ralpawl hmuahhmuah ruangah ka mit a māl deuhdeuh.
8 Nannih mawhsualnak tuahtu zaten, ka hnen ihsin tlânsuak uh.
Ziangahtile Jehovah in ka ṭahnak aw a thei zo a si.
9 Jehovah in ka dilnak a thei zo,
Jehovah in ka thlacamnak a cohlang ding.
10 Ka ralpawl hmuahhmuah kha ningzak le nasazetih harsa-in um hai seh;
Dung lamah kirsal hai sehla, hmakhatteah ningzakin um hai seh.

7

Băwm Dilnak

Benjamin-mi, Kush-ih Ṭawngkampawl Thuhla ih Jehovah Hnenih David ih Sak Mi ^aShiggaion.

^a Shiggaion: Vahvainak hla asilole phur zet le rang zetih sak mi hla tinak.

1 Maw Jehovah ka Pathian, nangmah ah ka béu a si;
I tiduhdahtupawl hmuahhmuah lak ihsin i run aw;
Cule i runsuak aw.
2 Culole kiosa vekin in thlek ding,
Zohman runsuaktu an um lo laiah, in thlekdip ṭheh pang ding.
3 Maw Jehovah ka Pathian, himi ka rak tuah zo asile:
Ka kut ah mawhsualnak a um asile,
4 Keimah thawn remawteih a umtu hnenah thil ṭhalo thawn ka lehrulh asile,
Asilole thu um loin ka ralpa thil ka lawn asile,
5 Ka ralpa in i dawi sehla i man seh.
A si, ka nunnak cu lei parah cīl seh,
Cule ka ropitnak kha leivut ah ret seh.
6 Maw Jehovah, na thinhengin tho aw;
Ka ralpawlih thinsonak ruangah ding aw;
Thu na rak pek mi thuṭhennak lamah ka hrangah tho aw!
7 Cutin miphun umkhawm in an lo kulh ding;
An tlun, hmun sâng ah kirsal aw.
8 Jehovah in minungpawl thu a ṭhen ding;
Maw Jehovah, ka dingfelnak zulh le ka felfainak zulhin thu i ṭhen aw.
9 Maw, misualpawlih sualralnak kha cem seh,
Asinan midikpawl cu tungding aw;
Ziangahtile a dingfel mi Pathian in thinlung le lungthin cu a hniksak a si.
10 I humhimtu cu, thinlung dĭng mipawl runtu Pathian a si.
11 Pathian cu thuṭhentu dik a si ih,
Pathian cu misualrálpawl parah ni tin a thin a heng.
12 Mi pakhat cu a sirawk lo asile,
Anih in a ralnâm a tâthriam ding;
A thál a nawp ding ih tiar cia-in a ret ding.
13 Anih cun thihnak hmanruapawl khal amai hrangah a timlam;
Anih in a thálfungpawl cu a alh mi fungpawl ah a canter.
14 Ngai hnik, misualrál cun mawhsualnak a suakter;
A si, harsatnak a pai ih, thuphan a hringsuak.
15 Anih in khur a tuah ih, cumi cu a lai,
Cule a tuah mi khur sungah amah a tla.
16 A harsatnak cu amai lu parah a kirsal ding,
Cule hrohrang zetih mi a dawrnak khal amai lallukhum tlunah a thlengsal ding.
17 Jehovah cu a dingfelnak bangtukin ka thangṭhat ding,
Cule Cungnung Bik Jehovah hmin hnenah thangṭhatnak hla ka sak ding.

8

Jehovah Hminṭhatnak

Hla Hruaitu Hrang. Gittith Thawn. David-ih Sam.

1 Maw Jehovah, kan Bawipa,
Na hmin cu leitlun hmuahhmuah ah hin a va ṭha hleice ve,
Nang cu vanpawl tlunih na ropitnak rettu na si!
2 Na ralpawl ruangah,
Nausentepawl le hnawifawp nautepawl kâ ih suak mi in cahnak na rak remruat,
Cutin ral le phuba latu pawl kha daiten na umter ding.
3 Na kutzung ih ṭuan mi, na vanpawl,
Na rak remruah mi thlapi le arsipawl ka ruah tikah,
4 Minung hi ziangso maw a si, na ngaihsak ih,
Minung fapa hi na vehvaih ṭheu?
5 Ziangahtile anih cu ^avancungmipawl hnakih málte niamdeuhin na rak tuah ih,
Amah cu ropitnak le upatnak na khumter.
6 Anih cu na kut hnaṭuanpawl tlunah uknak nei dingin na rak tuah;
Thil hmuahhmuah cu a ke hnuaiah na ret ṭheh.
7 Tuu le câwcang hmuahhmuah, ramlak ih ramsapawl khal,
8 Tlun zuang vâtepawl le,
Tifinriat zin ih a feh mi,
Tifinriat sungih leng pauhpauh thawn.
9 Maw Jehovah, kan Bawipa,
Na hmin cu leitlun hmuahhmuah ah hin a va ṭha hleice ve!

8:5^a vancungmipawl: Hebru ah cun Elohim (Pathian) ti a si.

9

Pathian Huham

Hla Hruaitu Hrang. ^aMuth-labben Hla Thlûk ih Sak Ding. David-ih Sam.

^a Muth-labben: «Fapa thihnak» ti mi hla thluk ih sak ding tinak.

1 Maw Jehovah, ka thinlung zaten ka lo thangṭhat ding;
Na mangbangza hnaṭuan hmuahhmuah ka sim ding.
2 Nangmah ah ka lung a awi ding ih ka ai a puang ding;
Maw Cungnung Bik, na hmin thangṭhatnak hla ka sak ding.
3 Ka ralpawl an kirsal tikah,
Na hmaiah an tlu ding ih an hlorál ding.
4 Ziangahtile ka diknak le ka ṭannak pawl i kilkhawisak;
Na laltokham parah toin dingfelnak in thu na ṭhen.
5 Miphunpawl na rak kawk,
Misualrálpawl na rak siatsuah;
An hmin cu kumkhuaih kumkhua tiang na rak thaihlo.
6 Maw rál, kumkhaw daihin siatsuahnak cu a cem!
Cule khawpipawl na rak siatsuah;
An cīn ringring nak tiangin a hlorál.
7 Asinan Jehovah cu kumkhua a hmun ding;
Anih in a laltokham cu thuṭhennak hrangah a timlam.
8 Anih in leilung cu dingfelnak in thu a ṭhen ding ih,
Miphunpawl hrangah diktakin thuṭhennak khal a kilkhawi ding.
9 Cuihhleiah Jehovah cu palbĕt mipawl hrangah răwlhimnak a si,
Harnak cān ih răwlhimnak.
10 Cule na hmin a theitupawl in nangmah an lo rinsan ding;
Ziangahtile Jehovah, nang cun nangmah a lo hawltupawl na rak thlauthla lo.
11 Zion ih um Jehovah hnenah thangṭhatnak hla sak uh!
Miphunpawl lakah a thil tuah mipawl thăn uh.
12 Thisen phuba a lâk tikah, anmah a máng;
Mităngdawrpawlih ṭahnak a hngilh lo.
13 Maw Jehovah, ka parah zahngai aw!
I huatupawl hnen ihsi ka harnak hi ruat aw,
Thihnak kăwtkapawl ihsin i khaisotu cu nangmah na si.
14 Cuticun Zion fanuih kăwtkapawl ah na thangṭhatnak hmuahhmuah ka sim thei ding.
Na runsuahnak ah lungawiaipuangin ka um ding.
15 Anmai tuah mi khur sungah miphunpawl an tla;
An thuh mi sûr ah, anmai ke an awkaw.
16 Jehovah cu amai tuah mi a thuṭhennak ihsin a phuangaw a si;
Misualrál cu amai kut hnaṭuan ihsi awh a si.
^aHiggaion. Selah
17 Misualrálpawl cu Sheol ah thlak an si ding ih,
Pathian a hngilhtu miphun hmuahhmuah khal.
18 Ziangahtile mitlasampawl kha hngilh ringring an si lo ding;
Mifarahpawlih ruahsannak cu a hlorál kumkhua lo ding.
19 Maw Jehovah, tho aw,
Milai in lo neh hlah seh;
Miphunpawl kha na mithmuhah thuṭhensak si hai seh.
20 Maw Jehovah, anmahpawl kha an thlaphângter aw;
Cutin miphunpawl kha minung menmen an sizia theiawter hai aw. Selah

9:16^a Higgaion: Awnmawi ṭawngkam a si ih, awnmawi tumsal tinak a si men thei.

10

Runsuahnak hrang Thlacam

1 Maw Jehovah, ziangahso hlatpi ih na din?
Ziangahso harsat cān ah na thuhawk?
2 Misualrál in a hngalnak in mifarah a tiduhdah;
Anmah ih an ruahsuak mi phiarsawmnak ah awkaw hai seh.
3 Ziangahtile misualrálpa cu a thinlung ih câk mi parah tluang a khâwng;
Miduhham cun Jehovah a camsiat ih, a hnáwng.
4 Misualrál cun a pawrhawknak ah Pathian a hawl lo;
A khawruahnak hmuahhmuah ah Pathian a um lo.
5 A lamzinpawl ah a hmuingil ringring;
Na cīn le dānpawl cu a hmuh bănlonak, tlun lam sângpi ah an si;
A ralpawl hmuahhmuah a hnihsan hai men.
6 Anih in a thinlung in, «Ka hnîn lo ding;
San tluansuakin harsatmangbangnak ah ka um lo ding,» tiah a ti.
7 A kâ cu camsiatnak le bumnak le nekrawknak in a khat;
A lei tăngah harsatnak le mawhsualnak a um.
8 Anih cu khaw kip ih mi bawhthupnak hmun ah a to;
Hmun thuppawl ah mawh nei lo pawl a that;
A mit in bawmtu nei lo pawl a bihthup.
9 Kiosa a pûk sungih a bawh vekin, athupten mi a bawh;
Mifarah kaingah dingah a bawh;
Mifarah cu a tháng ih a awhngah hnuah a kai.
10 Bawmtu nei lo kha a thazang thawi a thlûk theinak dingah,
Lei ah băwkvâkin a pêl.
11 A thinlung in,
«Pathian in a hngilh zo;
A hmai a thup;
A hmu dah nawn lo ding,» tiah a ti.
12 Maw Jehovah, tho aw!
Maw Pathian, na kut thlir aw!
Mităngdawrpawl kha hngilh hlah.
13 Ziangruangah misualrál in Pathian a hnáwng?
A thinlung in, «Nang in himi thu cu na zăwihliah nawn lo ding,» tiah a ti.
14 Asinan nang cun na rak hmu, ziangahtile na kut ih lehrūl dingah nang in harsatnak le thinnatnak na hminsin.
Bawmtu nei lo cu na hnenah a peaw;
Nang cu pa nei lo pawl bawmtu na si.
15 Misualrál le miṭha lo ih bān cu khiak aw;
Pakhat hman na hmuh nawn lo tiangin a sualralnak hawl aw.
16 Jehovah cu kumkhuain kumkhua tiang Siangpahrang a si;
Miphunpawl cu a ram ihsin an hlorál ṭheh zo.
17 Maw Jehovah, mităngdawr mi ih saduhthah cu na theihsak;
An thinlung na hngetter ding;
Na hna in na theihsak ding.
18 Pa nei lo le palbĕt mipawl hrangah diknak tuahsak dingah a si,
Cutin lei parih minung in mi a palbĕt nawn lo ding.

11

Jehovah Rinsannak Hla

Hla Hruaitu Hrang. David-ih Sam.

1 Jehovah ah ka béu,
Ziangtin so ka nunnak hnenah,
«Vate vekin na tlang ah zuang aw,» na ti thei.
2 Ziangahtile zoh hnik!
Misualrálpawl in an thál an nawp,
An thálfungpawl thálhri parah an thluah cia,
Cutin thinlung ih midĭngpawl kha a thupteih an saingah theinak dingah a si.
3 Lungphumpawl an siat asile,
Midingfel in ziangso a tuah thei ding?
4 Jehovah cu a temple thianghlim ah a um,
Jehovah laltokham cu van ah a si,
A mit in a zoh,
A mittlângpawl in minung fapapawl a hniksak.
5 Jehovah in midingfel a hniksak,
Asinan misualrál le hrohran duhpawl cu a thinlung in a hua.
6 Anih in misualrál parah meiling a surter ding,
Meisa, kât le a alh rero mi thli cu an covo a si ding.
7 Ziangahtile Jehovah cu a dingfel,
Anih cun dingfelnak a duh,
Midĭng cun a mithmai an hmu ding.

12

Harsat Cān ih Băwm Dilnak

Hla Hruaitu Hrang. ^aSheminith thawi Sak Ding. David-ih Sam.

^a Sheminith: Hri riat nei awnmawi thilri thawi sak ding tinak.

1 I bawm aw, Jehovah, ziangahtile Pathian ngaihsakpa a um nawn lo!
Ziangahtile minung fapapawl lakah mirinum an um nawn lo.
2 Mi kip in an innhnen thawn thulolak men lawng an simaw;
Fakdernak lei le thinlung phir neiin thu an sim.
3 Jehovah in fakdernak hmur hmuahhmuah le,
A pawrhaw mi lei cu sattán thluh seh.
4 «Kan lei thawn kan neh ding;
Kan hmur cu kanmah ta a si;
Zo so kan tlunih thuneitu?» titupawl cu.
5 «Mifarah namnehnak ruangah, mitlasam aihramnak ruangah,
Atu cu ka tho thlang ding,
Amah cu a duhthusam mi himnak hmun ah ka ret ding,» tiah Jehovah in a ti.
6 Jehovah kamsuakthupawl cu an thiang,
Leilung ih tuah mi rawhtitnak mei sungih hniksak mi ngun,
Vei sarih tifai mi vek a si.
7 Maw Jehovah, cupawl cu nang in na kilveng hai ding,
Tuih san minungpawl hnen ihsin kumkhua tiang na kilhim ding a si.
8 Misualrál cu hmun kip ah a tawivâk,
Hlohthlaunak kha minung fapapawl lakih khaisan a si tikah.

13

Runsuah Dilnak

Hla Hruaitu Hrang. David-ih Sam.

1 Maw Jehovah, ziang tik tiang so?
In hngilh kumkhua ding maw?
Ziang tik tiang so ka hnen ihsin na hmai na thuh ding?
2 Ka thinlung ah ni tin riahsiatnak neiin,
Ziang tik tiang so ka thinlung a elawk ding?
Ka tlunah ziang tik tiang so ka ralpawl khaisan an si ding?
3 Maw Jehovah ka Pathian, zawn i ruat awla, i ngai hram aw;
Ka mit vângter aw,
Culole thih ihthat in ka itthat pang ding.
4 Culole ka ralpa in, «Amah ka neh zo,» a ti pang ding;
Culole ka hnin tikah harsatnak i petupawl lungawiaipuangin an um pang ding.
5 Asinan kei cu na lainatduhdawtnak ka rinsan;
Ka thinlung cu na runsuahnak ah lungawiaipuangin a um ding.
6 Jehovah hnenah hla ka sak ding,
Ziangruangahtile anih cu ka parah ṭha zetin thil a ti.

14

Pathian Ngaihsak lo pawl Bawrhhlawhnak

Hla Hruaitu Hrang. David-ih Sam.

1 Mi-â in a thinlung in,
«Pathian a um lo,» tiah a ti.
Annih cu an bawrhhlawh ih,
Thil fihnungza an tuah,
Thil ṭha tuah zohman an um lo.
2 Jehovah in van ihsin minung fātepawl a run zoh,
Thu theithiam ih Pathian hawltu zo tal an um maw ti theih duhin.
Jehovah in van ihsin minung falepawl a run zoh.
3 An zaten an rak pial ṭheh,
Hmunkhatah mibawrhhlawh ah an cang;
Thil ṭha tuah zohman an um lo,
An um lo, pakhat hman.
4 Sang an ei vekih ka mipawl ei thluhtupawl,
Pathian hlâm lo, mawhsualnak tuahtupawl in theihnak an nei lo maw si?
5 Cu tawkah annihpawl cun nasazetin an ṭih,
Ziangahtile Pathian cu midingfel san minungpawl hnenah a um.
6 Mifarahpaih ruahmannak cu mualpho ko na tuah thei,
Asinan Jehovah cu amai răwlhimnak a si.
7 Zion ihsin Israel runsuahnak ra suak sehla maw!
Jehovah in a minungpawl vanneihnak a pekkirsal tikah,
Jakob cu lungawiaipuangin um sehla, Israel cu lungawi seh.

15

Tlang Thianghlim ih Cêngtu ding Mipawl

David-ih Sam.

1 Maw Jehovah, na puanthlam ah zo so um ringring thei ding?
Na tlang thianghlim ah zo so cêng thei ding?
2 Dĭng teih a nungtu le,
Dĭngfel teih a ṭuantu le,
A thinlung ih thudik a ṭawngtu;
3 A lei ih mi a relse lo tu,
A innhnen par khalih thil ṭhalo a tuah lo tu,
A rualpi a mawhthluk lo tu;
4 A mit in mihlothlau hmuhsuamtu,
Asinan Jehovah ṭihzahtupawl upattu;
Sesăm ih, amai siatnak ding khal siseh, thinlung thlengsal lo tu;
5 A paisa a ṭhang ih mi cawih lo tu,
Mawh nei lo dokalh zawngih nawhthuh la lo tu.
Hivek thilpawl a tuahtu cu a hnîn dah lo ding.

16

Rinnak Hla

David-ih Mikhtam.

1 Maw Pathian, i kilveng aw, ziangahtile nangmah ah ka béu a si.
2 Jehovah hnenah,
«Nangmah cu ka Bawipa na si,
Nangmah siarlo ṭhatnak ka nei lo,» tiah ka ti.
3 Leitlun ih um mithiangpawl hrang lawngte ah cun,
«Annih cu micungcuang an si, an parah ka lungsinak hmuahhmuah a um,» tiah a ti.
4 A dang pathian dawi rero tupawl cu, an riahsiatnak a pungzai;
An thisen Inding Thilhlăn cu ka hlan lo ding ih,
An hmin khal ka hmur in ka sál lo ding.
5 Maw Jehovah, nang cu ka co mi ro le ka no na si;
Nang in ka covo na kaihnget.
6 Ramripawl cu hmunnuampawl ah ka hrangah an tla;
A si, ka ro cu ka hrangah an mawi a si.
7 In kaihruaitu Jehovah cu ka thangṭhat ding;
Ka thinlung khal in zan tikcucānpawl ah thu i zirh.
8 Jehovah cu ka hmaiah ka ret ringring;
Amah cu ka vawrh lamih a um ruangah ka hnîn lo ding.
9 Curuangah ka thinlung cu a lung a awi ih, ka sunlawinak cu lungawiaipuangin a um;
Ka taksa khal ruhsannak ah a cawlhahdam ding.
10 Ziangahtile nang cun ka thlarau Sheol ah na tân ta lo ding ih,
Na Mi Thianghlim cu a ṭawihral khal na siang lo ding.
11 Nang in nunnak zin i hmuh ding;
Na hmaiah aipuannak famkim a um;
Na vawrh lam kut ah lunghmuinak a um kumkhua.

17

Runsuahnak hrang Thlacam

David-ih Thlacam.

1 Maw Jehovah, a dik mi ka ṭannak hi ngaithla aw,
Ka aunak lamah na hna tŭn aw;
Thuphan simhmang hmur ihsin si lo, ka thlacamnakpawl ah hna tŭn aw.
2 Ka diknak cu na hmai ihsin phuansuah si seh;
Na mit in thleidăn nei loin zoh seh.
3 Nang in ka thinlung na rak hniksak;
Zan ah nang in i rak zohhliah;
Nang in i hniksak ih, zianghman na hmu lo;
Ka kâ in dānpahbăl lo dingin thutluknak ka tuah.
4 Minungpawlih hnaṭuan mi thuhla ah cun,
Na hmur kamsuakthu ruangah,
Mi siatsuahtu zinpawl ka rak pialsan a si.
5 Ka kekarpawl na zinpawl ah kaihnget aw,
Cuticun ka kekarpawl an tawlh lo ding.
6 Maw Pathian, nangmah ka lo ko, ziangahtile nang in i sâng ding;
Ka lamah na hna tháwng aw, cule ka ṭawng ngai aw.
7 Na lainatduhdawtnak cu mak zetin langter aw,
Maw nang, anmah dotupawl lak ihsin nangmah a lo rinsantupawl na kut vawrh lam hmangih Runtu.
8 Na mitmu vekin i kilveng aw;
Na thlazar hnuaiah i thup aw.
9 I palbĕttu, misualrálpawl lak ihsin,
I kulhtu thihnak ralpawl lak ihsin.
10 An thinlung hĭt cu an khar ih,
An kâ in puarthau zetin an ṭawng.
11 Atu ah annih in kan fehnak lamzinpawl an kulh ṭheh,
Leilung ih in năwrthluk an tum,
12 Kiosa in a sa deh mi bawhthlek thluh a hiar vekin le,
Kiosa vanglai in a thupteih sa a bawh vekin.
13 Maw Jehovah, tho aw,
Amah cu va do awla, tluter aw;
Misualrál hnen ihsin na ralnâm in ka nunnak runsuak aw.
14 Maw Jehovah, minungpawl lak ihsin, na kut in,
Hi damsung nun ih covo neitu leilung minungpawl lak ihsin le,
Na thuh mi hlawnthil thawi an pumpi na khahter mipawl lak ihsin.
Annihpawl cu an fāte parah an di a riam ih,
An neih thil a tāng lai mi cu an fasentetepawl hrangah an tân ta.
15 Kei hrang lawngte ah cun,
Dingfelnak thawn na mithmai ka hmu ding;
Nangmah băngnak nei ih ka ṭhangharh tikah ka di a riam ding.

18

Nehnak Hla

Hla Hruaitu Hrang. A doralpawl kut ihsin le Saul kut ihsin Jehovah ih a runsuah ni ih hi hla thupawl Jehovah hnenih sāltu Jehovah siahhlawh David-ih Sam. Hitin a ti:

1 Ka lo duhdawt, Maw Jehovah, ka cahnak.
2 Jehovah cu ka lungpi le ka kulhhnget le i runsuaktu a si;
Ka Pathian, ka lungpi, ka beunak ding;
Ka ralphaw le ka runsuahnak ki, ka ralhruangkulh a si.
3 Thangṭhat a tlak mi Jehovah cu ka ko ding;
Cutin kei cu ka ralpawl kut ihsin rŭn ka si ding.
4 Thihnak hrihrualpawl in i kulh ṭheh ih,
Pathian ngaihsaklonak tilian in i thlaphangter.
5 Sheol hrihrualpawl in in kulh;
Thihnak thangpawl in in pah.
6 Ka vansannak ihsin Jehovah ka ko ih,
Ka Pathian hnenah ka ausuak;
Anih in a temple ihsin ka aw a thei,
Cule ka aunak cu a hmaiah a thleng, a hna rori ah.
7 Cun leilung cu a thir ih a khūr;
A thin a heng ruangah tlang ṭohrampawl khal an hnîn ih an thir.
8 A hnarpawl ihsin meikhu a suak ih,
A kâ ihsin mikāngraltu meisa;
Meiholpawl cu cumi in alhter an si.
9 Anih in vanpawl khal a kûnter hai ih, a ke tăngih khawdur sah zet thawn a rung suk.
10 Cule anih cu cherub parah a cuang ih, a zám;
Thli thlapawl hmangin a zám.
11 Thim cu amah tuamtu ah a tuah;
A umnak kimvelah cun tipi thim le van khawdur sahpi an um.
12 A hmaiih tleu ihsin,
A khawdur sahpipawl cu rialruah le meiling vâm thawn an fehtlăng.
13 Jehovah cu van ihsin khawpiri vekin a thang ih,
Cungnung Bik cun a aw a suah,
Cule rialruah le meiling vâm a suak.
14 A thálfungpawl a fehsuakter ih ralpawl a tlândarhter,
Anmah cu nimthlakau tampi thawn a vaivuanter hai.
15 Cule tiluannakpawl an lang,
Maw Jehovah, na mi kawknak le na hnar thaw ih na sĕmnak ruangah leilung ṭohrampawl an langsuak.
16 Anih in tlun lam ihsin a run dawh ih, i la;
Tidai nasazet sung ihsin i dirsuak.
17 A cak mi ka ral lak ihsin i runsuak,
I huatupawl hnen ihsi khalin,
Ziangahtile annihpawl cu ka hrangah an cak tuk.
18 Annih cun ka vanduai ni ah keimah dokalhin in hmuak,
Asinan Jehovah cu i ka ṭhumawknak a si.
19 Cuihhleiah anih cun hmun kaupi ah i hruaisuak;
Ka parih a lungsi ruangah i runsuak.
20 Jehovah in ka dingfelnak zulhin lawmman i rak pe;
Ka kut thianfainak zulhin anih in i rak rūl.
21 Ziangahtile Jehovah lamzinpawl ka rak thlun ih,
Ka Pathian hnen ihsin sualrál zetin ka tlânsuak lo.
22 Ziangahtile a cīn le dānpawl hmuahhmuah ka hmaiah an um,
Cule a sakhaw dānpawl cu ka hnen ihsin ka hlăwn lo.
23 Keimah khal a hmaiah sawihnăwm kâi lo ka si ih,
Ka mawhsualnak lak ihsin ka kilhimaw.
24 Curuangah Jehovah in ka dingfelnak zulhin,
A mithmuhih ka kut thiannak zulhin i rak lehrūl.
25 Zahngainak thawi khat mi hnenah na zahngainak na hmuh ding;
Sawihnăwm kâi lo hnenah na sawihnăwm kâi loin na langawter ding;
26 Mithiang hnenah na thianzia na hmuh ding;
Cule mikhêrmei hnenah na khermeizia na hmuh ding.
27 Ziangahtile nang in mităngdawrpawl na run ding,
Asinan mihngalpawl cu na námthla ding.
28 Ziangahtile nang in ka meito na vâng ding;
Jehovah ka Pathian in ka thimnak a tleuter ding.
29 Zianahtile nangmah ruangah ralkap burpi ka năwr thei,
Ka Pathian ruangah hruang tlunah ka khir thei.
30 Pathian hrangah cun, a lamzin cu a famkim a si;
Jehovah kamsuakthu cu hniksak a si;
Amah rinsantu hmuahhmuah hnenah amah cu an ralphaw a si.
31 Ziangahtile Jehovah siarlo Pathian zo so um?
Cule kan Pathian siarlo lungpi zo so um?
32 Cahnak thawi i thuamtu le,
Ka lamzin famkimtertu cu Pathian a si.
33 Anih in zuknêng ke vekin ka ke a tuah ih,
Ka hmun sângpawl ah i ret.
34 Ka banpawl in dar thál kūlter thei dingin
Amah in ka kutpwl tla ral do dingin a zirh.
35 Na runsuahnak ralphaw khal i rak pe,
Na vawrh lam kut in i rak tungding, na nunnemnak in miropi ah i tuah.
36 Ka hnuaiah ka zin na kauter,
Cutin ka ke a nâl lo.
37 Ka ralpawl ka dawi ih ka man hai;
Anmah thah an si lai hlanlo ka kirsal lo.
38 Anmahpawl cu hriamhma ka baih hai,
Cutin an tho thei lo;
Ka ke tăngah an tlu.
39 Ziangahtile nang in raldonak hrangah cahnak thawn i rak thuam;
Keimah i dokalhih thotupawl kha ka ke hnuaiah na rak duaiter hai.
40 I rak huatupawl ka hlohralter theinak dingah
Ka ralpawlih ^ahngawngpawl khal i rak pe.
41 Băwm duhin an ausuak nân, zohman runtu ding an um lo;
Jehovah hnen rori khalah, asinan anih in a let hai lo.
42 Cun anmah cu thli hmaiih leivut vekin ka vawdip fai ṭheh;
Kăwtthler ih ciarbêk hnawm vekin anmah cu ka hlăwn hai.
43 Nang in mipi buainak lak ihsin i runsuak;
Miphunpawlih lu ah i tuah;
Ka rak theih lo mi minungpawl in in rian ding.
44 Ka thuhla an theih veten ka thu an thlun;
Ram dang mipawl ka hnenah an tlulut.
45 Ram dang mipawl cu an cau,
An hruangkulh ihsin thlaphângin an ra suak.
46 Jehovah cu a nung a si!
Ka lungpi cu thangṭhatin um seh!
Ka runsuahnak Pathian cu khaisan si seh.
47 Phuba i laksaktu cu Pathian a si ih,
Ka hnuaiah miphunpawl a duaiter.
48 Anih in ka ralpawl lak ihsin i runsuak.
I dotupawl tlunah nang in i khaisâng;
Nang in mihrohrangpa lak ihsin i runsuak.
49 Curuangah Maw Jehovah, miphunpawl lakah na hnenah lungawi thu ka sim ding,
Cule na hmin thangṭhatnak hla ka sak ding.
50 Anih in a siangpahrang hnenah runsuahnak maksak a pe,
Cule a hriak thih mi parah lainatduhdawtnak a langter,
David le a cithlahpawl hnenah kumkhuain.

18:40^a hngawngpawl: Siangpahrang in a neh mi siangpahrang cu a băwkter ding ih a hngawng a pál.

19

Sersiam Mipawlih Pathian Thangṭhatnak

Hla Hruaitu Hrang. David-ih Sam.

1 Vanpawl khin Pathian ropitnak an thăn;
Cule van rāng kulhpi in a kutsuak a langter.
2 Ni tin thu a sim ih,
Zan tin theihnak a phuanglang.
3 Thusim a um lo, ṭawng a um lo, an aw theih a si lo.
4 An ^aaw cu leilung tlun hmuahhmuah a thangsuak ih,
An ṭawngkampawl cu leitlun dĕng tiang a thleng.
Vanpawl ah cun anih in ni hrangah puanthlam a dĭn.
5 Cuih ni cu mo neitu a pindan sung ihsi ra suak vek a si,
Cule micakpa tlan zuamawknak ih tlân ding vekin a ai a puang.
6 A ra suahnak cu van netnak khat lam ihsin a si ih,
A fehkualnak cu khat lam dĕng tiang a si,
Cule a sătnak ihsin thuh thei mi zianghman a um lo.
7 Jehovah-ih dān cu a famkim, nun a danglamter;
Jehovah-ih thutheihternak cu a fiangfel, mimâwl a fimter.
8 Jehovah-ih sakhaw dānpawl cu an dik, thinlung lungawiaipuang ko a tuah;
Jehovah-ih thupek cu a thiang, mit a vângter.
9 Jehovah ṭihzah cu a thiangfai, kumkhua a daih;
Jehovah-ih thuṭhennakpawl cu thutak an si ih an dingfel pumhlum.
10 Sui hnakih duh sawn ding an si,
A si, sui hlirhlăng tampi hnakin;
Khuaitizu le khuaithlar hnak khalin an thlumsawn.
11 Cuihtlunah cupawl hmangin na siahhlawh cu ralrinnak pek a si,
Cumipawl thlunnak ah lawmman ropi a um.
12 Zo in amai tisual mi theithiam thei?
Thupte tisualnakpawl lak ihsin i thianfai aw.
13 Na siahhlawh hi tuah hrim sualnakpawl lak ihsi khalin kilhim aw;
Cupawl cun ka tlunah in uk hram hlah hai seh.
Cun kei cu sawihnăwm kâi lo ka si ding,
Cule dānpahbălnak tumpi lakah mawh nei lo ka si ding.
14 Ka kamsuak ṭawngkampawl le ka thinlung ih ngunngaih zetih ngaihtuahnak cu na hmaiah cohlantlak si hram hai seh,
Maw Jehovah, ka lungpi le i tlentu.

19:4^a aw: Hebru ah cun, «Tahnak rīn,» ti a si.

20

Nehnak hrang Thlacam

Hla Hruaitu Hrang. David-ih Sam.

1 Jehovah in harsat ni ah lo let hram seh;
Jakob-ih Pathian hmin cun lo humhim hram seh.
2 Anih in hmun thianghlim ihsin băwmnak lo pe hram sehla,
Zion ihsin na tha lo cakter hram seh.
3 Anih in na thilhlăn hmuahhmuah cîng ringring hram sehla,
Na Meiur Thilhlăn lo cohlang hram seh. Selah
4 Anih in na thinlung saduhthah vekin lo pe hram sehla,
Na tumtah mi hmuahhmuah lo tlamtlingter hram seh.
5 Na ral nehnak ah lungawiaipuangin kan au ding ih,
Kan Pathian hmin in kan thantarpawl kan tar ding!
Jehovah in na dil mi hmuahhmuah tlamtlingter hram seh.
6 Jehovah in a hriak thih mi a runsuak ti ka thei;
A van thianghlim ihsin a vawrh lam kut rundamnak tha thawn amah cu a run let ding.
7 Mi hrek in ránglêngpawl an rinsan ih, mi hrek in rángpawl an rinsan;
Asinan kannih cun Jehovah kan Pathian hmin kan máng ringring ding.
8 Annih cu an kûn ih an tlu;
Asinan kannih cu kan tho ih dĭng zetin kan ding.
9 Maw Jehovah, runsuak aw!
Kan kawh tikah Siangpahrang in in sawn hram seh.

21

Nehnak ruangih Lungawi Thu Simnak

Hla Hruaitu Hrang. David-ih Sam.

1 Maw Jehovah, na cahnak ah siangpahrang in aipuannak a nei ding,
Cule na runsuahnak ah ziangtluk nasa lungawiaipuangin um tak pei maw!
2 Nang in a thinlung saduhthah na rak pe zo ih,
A hmur ih dil mi cu na ui lo.
3 Ziangahtile a hnenah ṭhatnak malsawmpawl thawn na ra,
A lu parah sui hlirhlăng lallukhum na khumter.
4 Na hnen ihsin nunnak a lo dil ih,
Nang in cumi cu na pek,
Kumkhuain kumkhua tiang dam reinak thawn.
5 Na runsuahnak ah amai ropitnak cu a nasa,
A parah upatnak le cungnunnak na ret.
6 Ziangahtile amah kha kumkhuaih thlawsuah cotubik ah na tuah,
Na umpinak in lungawinak nasazet na pe.
7 Ziangahtile siangpahrang in Jehovah a rinsan ih,
Cungnung Bik-ih lainatduhdawtnak thawngin amah cu a hnîn lo ding.
8 Na kut in na ral hmuahhmuah a hmusuak ding,
Na vawrh lam kut in nangmah a lo huatupawl a hmusuak ding.
9 Na thinheng cān ah anmah cu thŭk ling zet vekin na tuah hai ding,
Jehovah in a thinlingnak in anmah cu a dawlh hai ding ih,
Meisa in a kangrál hai ding.
10 An tesinfapawl cu leilung par ihsin na that hai ding ih,
An cithlahpawl cu minung fapapawl lak ihsin.
11 Ziangahtile nangmah dokalhin thil ṭhalo an rak tum,
Phiarthupnak khua an khâng ih, an hlawhtling lo ding.
12 Curuangah anmah cu na dawikirsal hai ding,
Na thálfungpawl kha tiar cia-in an hmai zawnah na tĭn ding.
13 Maw Jehovah, nangmai cahnak ah khaisanin um aw!
Na huham cu hla sak in kan thangṭhat ding.

22

Runsuahnak hrang Ngĕnnak

Hla Hruaitu Hrang. ^aAijeleth Hashshahar Hla Thlûk In, David-ih Sam.

^a Aijeleth Hashshahar: «Khawfingcat sakhi» ti mi hla thluk ih sak ding tinak.

1 Ka Pathian, ka Pathian, ziangahso i fehsan?
Keimah băwmnak ihsin le ka aihramnak ṭawngkampawl ihsin ziangahso hla tukih na um?
2 Maw ka Pathian, sun cān ah ka lo ko, asinan in sawn lo.
Cule zan cān ah, daiten ka um lo.
3 Asinan nang cu na thianghlim,
Israel-mipawlih thangṭhatnak ah na to.
4 Kan pupápawl in nangmah an rak lo rinsan;
An lo rinsan ih, nang in anmah cu na runsuak hai.
5 Na hnenah an au ih, runsuah an si;
Nangmah an lo rinsan ih, an mualpho lo.
6 Asinan kei cu pangāng men ka si ih, minung ka si lo;
Mi ih hmuhsuam le minungpawl ih nautat mi ka si.
7 Keimah i hmutu hmuahhmuah in hnihsuahsainak ah in hmang;
An hmur an kû ih, an lu an thing.
8 «Anih in Jehovah a rinsan, amah cun runsuak hnik seh;
Amah cun runsuak hnik seh, a parih a lungsi ruangah,» tiah an ti.
9 Asinan nang cu sūl sung ihsin i lasuaktu na si;
Ka nuih hnawi ka fawh laiah khan nangmah rinsan ko i tuah.
10 Sūl sung ihsin na hnenih ap mi ka si.
Ka nuih pum sungih ka um lai ihsin
Nang cu ka Pathian na rak si.
11 Ka hnen ihsin a hlatnak ah um hlah,
Ziangahtile harsatnak a nâi a si;
Ziangahtile in bawmtu ding zohman an um lo.
12 Câwpa tampi in in kulh;
Bashan câwpa cakpawl in in kulh.
13 An kâ in ānhnawh,
A thinso ih a hûk mi kiosa bangin.
14 Kei cu tidai vekih thlet ka si,
Cule ka ruhpawl hmuahhmuah an pelh;
Ka thinlung cu khuailûl vek a si;
Ka sungah a zŭp ṭheh.
15 Ka tha cu hlamphei vekin a ro ih,
Ka lei khal ka dang ah a bĕt;
Nang in thihnak leivut ah in rak ret.
16 Ziangahtile uicopawl in in kulh,
Misualrál umkhawm in in kulhpit ṭheh.
Annih in ka kut le ka ke an sŭn.
17 Ka ruhpawl hmuahhmuah ka siar thei ṭheh.
Annih in in zoh ih in mét.
18 Anmah lakah ka sinfen an ṭhenaw ih,
Ka hnipuan hrangah camcawhfung an zûk.
19 Asinan Maw Jehovah, ka hnen ihsin a hlatnak ah um hram hlah aw;
Maw ka cahnak, i bawm zâng aw.
20 Ralnâm lakin ka nunnak runsuak aw,
Ka neihsŭn nunnak cu uico thiltitheinak lak ihsin.
21 Kiosa kâ ihsin le câwcang hrangpawlih kipawl lak ihsin in run aw!
Nang cun in rak sâng zo!
22 Ka unaupawl hnenah na hmin ka thăn ding;
Mipungkhawm lakah ka lo thangṭhat ding.
23 Nannih Jehovah a ṭihzahtupawl, amah cu thangṭhat uh!
Nannih Jakob cithlah hmuahhmuah, amah cu sunlawih uhla,
Nannih Israel tesinfa hmuahhmuah amah cu ṭihzah uh.
24 Ziangahtile anih cun zăwnzaih tuar miih zăwnzaihnak kha a hmuhsuam lo ih, a fih fawn lo;
A hnen ihsin a hmai khal a thup lo;
Cuhnakin a hnenih a au tikah, a theihsak sawn.
25 Punkhawmnak ropi ih ka thangṭhatnak cu nangmai hnen ihsi ra a si;
Amah ṭihzahtupawl hmaiah ka thutiampawl ka tuahsuak ding.
26 Mifarahpawl in an ei ding ih an khawp ding;
Amah hawltupawl in Jehovah an thangṭhat ding.
Kumkhuain nung law!
27 Leilung netnakpawl hmuahhmuah in an máng ringring ding ih,
Jehovah hnenah an kirsal ding,
Cule miphunpawlih innsungsang hmuahhmuah cu na hmaiah an băwkkhup ding.
28 Ziangahtile lalram cu Jehovah ta a si,
Cule anih in miphunpawl tlunah a uk.
29 Leitlun ih mihlawhtlingpawl hmuahhmuah in an ei ding ih an băwkkhup ding;
Leivut ih a feh zo mipawl hmuahhmuah khal a hmaiah an kûn ding,
A nunnak humhimaw thei lo mi tiangin.
30 Cithlah in amah a rian ding.
A ra lai ding mi san minungpawl hnenah Bawipaih thu an simsal ding.
31 A suak lai ding mipawl hnen khalah an ra ding ih a dingfelnak an thăn ding,
Himi hi amah in a tuah tiin.

23

Tuukhāltu Ropi

David-ih Sam.

1 Jehovah cu ka tuukhāltu a si;
Ka tlasam lo ding.
2 Anih cun tlimno lakah i băwkter;
^aTidai dam diaidi kiangah i hruai.
3 Anih cun ka nunnak tha a tlungtersal;
A hmin ruangah dingfelnak zinpawl ah i hruai.
4 A si, thihnak thlahlim phaikuam zawh hman ningla,
Thil ṭhalo ka ṭih lo ding;
Ziangahtile ka hnenah nang na um;
Na fungfek le na kianghrăwl in ka hna in ngamter.
5 Ka ralpawl hmaika-ah ka hrangah cabuai na timlam;
Ka lu hriak na thih;
Ka no a liam.
6 Thungaiin ṭhatnak le lainatduhdawtnak in
Ka damsung ni hmuahhmuah in thlun ding;
Cule Jehovah inn ah ka cêng kumkhua ding.

23:2^a Tidai dam diaidi: A ṭawng hrampi ah cun, «a cawl mi tidai,» ti a si.

24

Temple sungih Lut thei Mipawl

David-ih Sam

1 Leilung cu Jehovah ta a si, a sungih um hmuahhmuah thawn,
Leitlun le a sungih a cêngtupawl khal.
2 Ziangahtile anih in leilung cu tifinriat parah a toter ih,
Tipi parah a dĭnhnget.
3 Jehovah tlang ah zo so kai thei ding?
Asilole a hmun thianghlim ah zo so ding thei ding?
4 Kut thiangfai le thinlung thiang a nei tu,
Zianghmanlo lamih thinlung pe lo tu,
Diklo zetih sia a săm fawn lo tu.
5 Anih cun Jehovah hnen ihsin thlawsuah a ngah ding ih,
A runsuahnak Pathian hnen ihsin dingfelnak.
6 Hihi amah hawltupawlih san minung, a mithmai hawltu, Jakob rori a si. Selah
7 Nannih kăwtkapawl nan lu khaisâng uh!
Cule nannih khuahlan sângkapawl, khaisâng aw uh!
Cule ropitnak Siangpahrang cu a rung lut ding.
8 Himi a ropi mi Siangpahrang cu zo a si?
Jehovah, thazangcak le micak,
Jehovah, raldonak ih micak a si.
9 Nannih kăwtkapawl, nan lu khaisâng uh!
Nannih khuahlan sângkapawl, khaisâng aw uh!
Cule ropitnak Siangpahrang cu a rung lut ding.
10 Ropitnak Siangpahrang cu zo a si?
Ralkap rualpawlih Jehovah,
Amah cu ropitnak Siangpahrang a si.

25

Lamhruainak hrang Thlacam

David-ih Sam.

1 Maw Jehovah, nangmah ka lo ngai.
2 Maw ka Pathian, nangmah ka lo rinsan;
Mualphoin um hlah ning;
Ka ralpawl in in neh hlah hai seh.
3 Thungaiten, nangmah a lo hngaktu zohman an mualpho lo ding;
A săn um loih, zumtlak loih umtu cu mualphoin um seh.
4 Maw Jehovah, na lamzinpawl i hmuh aw;
Na zinpawl i zirh aw.
5 Na thutak ah i hruai awla i zirh aw,
Ziangahtile nang cu ka runsuahnak Pathian na si;
Sunvu-in nangmah ka lo hngak.
6 Maw Jehovah, na lainatnak le na lainatduhdawtnak cu máng ringring aw,
Ziangahtile cupawl cu hlanlai ihsin a um mi an si.
7 Ka no lai sualpawl cîng hlah aw, ka dānpahbălnakpawl khal;
Na lainatduhdawtnak bangtukin i máng aw,
Na ṭhatnak ruangah, Maw Jehovah.
8 Jehovah cu a ṭha ih a dĭng;
Curuangah anih cun misualpawl cu lamzin a zirh hai.
9 Mităngdawrpawl kha diknak ah a hruai hai ih,
Mităngdawrpawl kha amai lamzin a zirh.
10 Jehovah zin hmuahhmuah cu lainatduhdawtnak le thutak an si,
A thukham le a thutheihtermipawl a thluntu hrangah.
11 Maw Jehovah, na hmin ruangah,
Ka mawhsualnak ngaithiam aw, ziangahtile cumi cu a tam tuk lawmmam.
12 Jehovah a ṭihtu cu zo so a si?
Anih in cu pa cu a hril mi lamzin a zirh ding.
13 Amah rori cu hmuingilnak ah a cêng ding ih,
A tesinfapawl in leilung an luah ding.
14 Jehovah thuthup cu amah ṭihzahtupawl hnenah a um ih,
Anmahpawl kha a thukham a theihter hai ding.
15 Ka mit in Jehovah lam a zoh ringring,
Ziangahtile anih in sûr ihsin ka ke a lasuak ding.
16 Nangmah kha ka lamah hawi awla, ka parah zahngai aw,
Ziangahtile kei cu lileng le zawnzaiin ka um.
17 Ka thinlung harsatnakpawl a tûm vingvo;
Ka vansannak ihsin i hruaisuak aw.
18 Ka zăwnzaihnak le ka harsatnak hi zoh awla,
Ka sualpawl hmuahhmuah ngaidam aw.
19 Ka ralpawl hi zoh hnik, ziangahtile annih cu an tam tuk lawmmam;
Annih in nasatukin in hua.
20 Ka nunnak kilhim awla, i runsuak aw;
Ningzakin um hlah ning, ziangahtile nangmah ah ka béu a si.
21 Felfainak le dĭngnak in i humhim seh,
Ziangahtile nangmah ka lo hngak a si.
22 Maw Pathian, Israel tlen aw,
An harsatnak hmuahhmuah ihsin!

26

Dik zetih Thuṭhen dingih Ngĕnnak

David-ih Sam.

1 Maw Jehovah, ka dikzia langter aw,
Ziangahtile felfai zetin ka nung.
Jehovah khal ka rinsan;
Ka hnîn dualdo lo ding.
2 Maw Jehovah i cek awla, i hniksak aw;
Ka lungthin le ka thinlung khīngkhai aw.
3 Ziangahtile na lainatduhdawtnak cu ka mit hmaika-ah a um,
Cule na thutak ah ka nung.
4 Misantlailopawl hnenah ka to dah lo ih,
Midepdepawl zawng khalah ka feh lo ding.
5 Thil ṭhalo tuahtupawl punkhawmnak ka hua ih,
Misualrálpawl hnenah ka to lo ding.
6 Mawh nei loin ka kutpawl hi ka khawlh ding;
Cun na biakṭheng ka hél ding, Maw Jehovah,
7 Cutin lungawi thu simnak aw ka suah ding ih,
Na mangbangza hnaṭuan hmuahhmuah ka sim ding.
8 Maw Jehovah, na umnak na inn ka duhdawt ih,
Na ropitnak cēnnak hmunpawl khal.
9 Ka nunnak misualpawl hnenah khawm hlah aw,
Thisen suahhmangpawl hnenah ka nunnak khal.
10 An kut ah tumtahnak ṭhalo a um ih,
An vawrh lam kut cu nawhthuh in a khat.
11 Kei lawngte cu, felfai zetin ka nung ding;
I tlen awla, ka parah zahngai hram aw.
12 Ka ke cu hmunrawn ah a ding;
Mipi-umkhawmnak ah Jehovah ka thangṭhat ding.

27

Pathian Rinsan Pumhlumnak

David-ih Sam.

1 Jehovah cu ka tleunak le ka runsuahnak a si;
Zo so ka ṭih ding?
Jehovah cu ka nun humhimnak a si;
Zo so ka ṭih ding?
2 Misualrálpawl in keimah dokalhin ka sa ei dingih an rat tikah,
Ka ralpawl le i huatupawl cu,
An bah ih an tlu.
3 Ralkappawl in keimah do dingin in kulh khal hai sehla,
Ka thinlung in a ṭih lo ding;
Keimah do dingah raltho khal sehla,
Himi ah hnget zetin ka um ding.
4 Jehovah hnenah thil pakhat saduhthah mi ka nei,
Cumi cu ka hawl ding:
Ka damsung hmuahhmuah Jehovah inn ih cêng dingin,
Jehovah mawinak hmu ding le,
A temple ih thusut dingin.
5 Ziangahtile harsat tikcucān ah anih in a thlam sungah i thup ding;
A puanthlam sungih a thupnak hmun ah anih in i thup ding;
Lungpi par hmun sâng ah i ret ding.
6 Cule ka kimvel hmuahhmuah ih ka ralpawl tlunah ka lu a khaisâng ding;
Curuangah a puanthlam sungah aipuang zetin thawinak ka hlan ding;
Hla ka sak ding, a si, Jehovah hnenah thangṭhatnak hlapawl ka sak ding.
7 Maw Jehovah, ka au tikah thei hram aw!
Ka parah zahngai awla, i sawn aw.
8 «Ka mithmai hawl aw,» na ti tikah,
Ka thinlung in na hnenah, «Maw Jehovah, na mithmai ka hawl ding,» tiah a ti.
9 Ka hnen ihsin na hmai thup hlah aw;
Thinhengin na siahhlawh hi dungtŭn hlah aw;
Nang cu i bawmtu na si;
I tansan hlah awla, i thlauthla fawn hlah,
Maw ka runsuahnak Pathian.
10 Ka nu le ka pa in in thlauthlak tikah,
Jehovah in i cawi ding.
11 Maw Jehovah, na lamzin i zirh awla,
Ka ralpawl ruangah zin tluang ah i hruai aw.
12 I dotupawlih duhnak ah i thlĕn hlah aw;
Ziangahtile thutheitu diklopawl cu keimah dokalhin an tho ih,
Hrohrang zetin an thaw an suah.
13 A nungdam mipawlih ram ah Jehovah ṭhatnak ka hmu ding tiah rak zum lo ningla cu, ka bei a dawng zo ding.
14 Jehovah cu hngak aw;
Tha la awla, na thinlung cakter aw;
Jehovah cu hngak aw.

28

Băwmnak hrang Thlacam

David-ih Sam.

1 Maw Jehovah, ka lungpi, na hnenah ka au ding:
Ka hnenah daiten um hlah aw,
Daiteih i umsan asile,
Kei cu khur sungih lutpawl vek ka si pang ding.
2 Na hnenih ka au tikah,
Ka dilnak aw thei aw,
Na hmun thianghlim lam hawi ih ka kut ka phar tikah.
3 Remawten an innhnen be siin,
An thinglung sungih thil ṭhalo um,
Misualrálpawl le mawhsualnak a tuahtupawl zawngah i hruaihlo hlah aw.
4 An thil ti zulhin anmah cu lehrūl hai aw,
Cule sualrál zetih an ṭanlaknak zulhin;
An kut hnaṭuan zulhin anmah cu lehrūl hai aw;
An phu tawkin lehrūl hai aw.
5 Ziangruangahtile annih cun Jehovah hnaṭuanpawl ziang an siar lo,
A kut ṭuansuah mipawl khal,
Anih in anmahpawl cu a siatsuah hai ding ih,
A dĭnsal hai nawn lo ding.
6 Jehovah cu thangṭhatin um seh,
Ziangruangahtile anih cun ka dilnak aw i theihsak!
7 Jehovah cu ka cahnak le ka ralphaw a si;
Ka thinlung in amah a rinsan ih, băwmin ka um;
Curuangah ka thinlung cu nasazetin a ai a puang ih,
Ka hla thawn amah ka thangṭhat ding.
8 Jehovah cu an cahnak a si ih,
Amah cu a hriak thih mi hrangah himteih răwlhimnak a si.
9 Na minungpawl run awla,
Na ro a si mipawl thlawsuah pe aw;
Anmah cu khāl awla,
Kumkhuain cawi ringring hai aw.

29

Thiltithei Pathian Aw

David-ih Sam.

1 Maw nannih Pathian fapapawl, Jehovah hnenah pe uh,
Jehovah hnenah sunlawihnak le cahnak cu pe uh.
2 Amai hmin ih phutawk ropitnak cu Jehovah hnenah pe uh;
Thianhlimnak mawinak thawn Jehovah cu bia uh.
3 Jehovah aw cu tipi tlunah a um;
Pathian ropitnak cu khawri vekin a ri;
Jehovah cu tidai tampi tlunah a um.
4 Jehovah aw cu huham a nei zet;
Jehovah aw cu cungnunnak in a khat.
5 Jehovah aw in sidar thingpawl a kiakter,
A si, Jehovah in Lebanon ih sidar thingpawl a khuaidarh.
6 Anih in cupawl cu câwpa no vekin a khirter hai,
Lebanon le Sirion cu câwcang hrang vekin.
7 Jehovah aw in meialh a ṭeksuakter.
8 Jehovah aw in ramṭhing a hnînter;
Jehovah in Kadesh Ramṭhing a hnîn.
9 Jehovah aw in zukneng fa a hringter ih,
Tupi thing hnahpawl a kawlhter;
Cule a temple sungah mi kip in «Ropitnak!» tiah an ti.
10 Jehovah cu tilian lakah a to ih,
Jehovah cu Siangpahrang vekin a to kumkhua.
11 Jehovah in a mipawl hnenah cahnak a pe ding;
Jehovah in a mipawl kha hnangamdaihnak thawn thlawsuah a pe ding.

30

Băwmnak ruangih Pathian Ṭhatnak Hla

Sam. Inn Hlănnak Hla, David ih Phuah Mi.

1 Maw Jehovah, ka lo cawimawi ding, ziangahtile nang cun i rak khaisâng ih,
Ka ralpawl kha ka parah lungawiaipuang ko na rak tuah lo.
2 Maw Jehovah ka Pathian, na hnenah ka au ih,
Nang in i rak damter.
3 Maw Jehovah, nang in ka nunnak cu Shoel ihsin na hruaisuak;
Khur sungih ka vung suhlonak dingah, nang in nungdamin i rak kilkhawi.
4 Nannih a mithiangpawl, Jehovah hnenah thangṭhatnak hla sak uhla,
A hmin thianghlim cīn ringring nak ah lungawi thu sim uh.
5 Ziangahtile a thinheng cu rei lo te lawng a si,
A duhsaknak cu damsung hrang a si;
Ṭahnak cu zan khat a daih thei,
Asinan zing lamah aipuannak a ra.
6 Ka hmuingilnak ah,
«Ziangtik hmanah ka hnîn lo ding,» tiah ka ti.
7 Jehovah, nangmai duhsaknak in ka tlang cu hnget zetih ding ko na rak tuah;
Na hmai na thup ih, harsatnak ka tuar.
8 Maw Jehovah, na hnenah ka ausuak;
Cule Bawipa, na hnenah dilnak ka thlĕn:
9 «Khur sungah sukthla hnik ningla,
Ka thisen ah ziang hlawknak so a um?
Leivut in a lo thangṭhat ding maw?
Cumi cun na thutak a thăn ding maw?
10 Maw Jehovah, i ngaithla awla, ka parah zahngai aw;
Maw Jehovah, nang cu i bawmtu si aw!» tiin.
11 Nang in ka lusûnṭahnak cu lāmnak ah i rak thlengsak zo;
Ka buri-hnipuan na hlít ih, lungawinak thawn i thuam.
12 Cutin a net tiang daiten um loin ka nunnak in na hnenah thangṭhatnak hla a sak ding.
Maw ka Pathian, Jehovah na hnenah lungawi thu ka sim kumkhua ding.

31

Runsuahnak hrang Thlacam

Hla Hruaitu Hrang. David-ih Sam.

1 Maw Jehovah, nangmah ka lo rinsan;
Ningzakin um dah hram hlah ning;
Na dingfelnak in i runsuak aw.
2 Ka lamah na hna run tŭn aw,
Zamrang zetin i runsuak aw;
Ka răwlhimnak lungpi si awla,
Keimah run dingih ṭanlâknak kulhhnget si aw.
3 Ziangahtile nang cu ka lungpi le ka kulhhnget na si;
Curuangah nangmai hmin ruangah,
I hruai awla lamzin i hmuh aw.
4 Keimah awhnak dingah a thupteih an kăm mi sûr ihsin i dirsuak aw,
Ziangahtile nang cu ka cahnak na si.
5 Na kut ah ka thlarau ka lo ap;
Nang cun i tlen zo, Maw Jehovah thutak Pathian.
6 Ṭhathnemnak nei lo milempawl ngaisangtupawl cu ka hua hai;
Asinan kei cu Jehovah ka rinsan.
7 Na lainatduhdawtnak ah lungawi le aipuangin ka um ding;
Ziangahtile nang in ka harsatnak i ngaihsak;
Harsatbuainakpawl lak khalah ka nunnak i theihsak.
8 Cule ka ralpawl kut ah i kharkhum lo;
Nang in hmun kau ah ka ke na ret.
9 Maw Jehovah ka tlunah zahngai aw, ziangahtile harsatnak ka táwng a si;
Thinnatnak ruangah ka mit an cak lo,
A si, ka nunnak le ka taksa tiangin.
10 Ziangahtile ka nun hi thinnatnak thawn ka hmang ih,
Ka dam kumpawl khal aihramnak thawn;
Ka mawhsualnak ruangah ka cahnak a mál vivo ih,
Ka ruhpawl an mawih.
11 Ka ralpawl hmuahhmuah lakah mawhsiat mi ka si,
A hleicein ka innhnenpawl lakah,
Cule ka theih mipawl hnen khalah mitkemza ka si;
Khaw lengih i hmutupawl in in tlansan.
12 Kei cu mithi vekih hngilh ka si, theih ka si lo;
Kei cu a kekkuai mi bel vek ka si.
13 Ziangahtile mi tampi ih in relsiatnak ka thei;
Ṭihnak cu kil kip ah a um;
Keimah dokalhin thu an rawnawkkhawm laiah,
Ka nunnak la dingin khua an khâng.
14 Asinan kei cun, Maw Jehovah, nangmah ka lo rinsan.
«Nang cu ka Pathian na si,» tiah ka ti.
15 Ka damsung cānpawl cu nangmai kut ah an um;
Ka ralpawl le i tiduhdahtupawl kut ihsin i runsuak aw.
16 Na siahhlawh parah na hmel êngter aw;
Na lainatduhdawtnak ruangah i run aw.
17 Maw Jehovah, i ningzakter hram hlah aw, ziangahtile nangmah ka lo ko a si;
Misualrálpawl kha ningzak hai seh;
Sheol ah daiten um hai seh.
18 Thuphan per hmurpawl kha daiten um hai seh,
Cupawl cun mi nautatnak thilpawl kha puarthau zetin an ṭawng ih, midingfelpawl dokalhin an hminsiatnak an ṭawng.
19 Na ṭhatnak cu ziang tlukin so a natsat,
Minung fapapawl mithmuhah,
Nangmah a lo ṭihzahtupawl hrangih na khawl mi,
Nangmah a lo rinsantupawl hrangih na timlam mi cu!
20 Annihpawl cu mi ih phiarthupnakpawl lak ihsin na umnak hmun thup ah na ret hai ding;
Tawhawknak leipawl lak ihsin na thlam sungah a thuptein na kilkhawi hai ding.
21 Jehovah cu thangṭhat si ko seh,
Ziangahtile anih in khawpi hnget sungah a mangbangza lainatduhdawtnak cu i hmuh zo.
22 Ziangahtile hmanhmawh zetin,
«Kei cu na mithmuhnak ihsin sahcat ka si,» tiah ka ti;
Sikhalsehla na hnenih ka au tikah, nang in ka dilnak aw i rak theihsak.
23 Maw nannih a mithiangpawl hmuahhmuah, Jehovah cu duhdawt uh!
Ziangahtile Jehovah cun mirinumpawl a kilhim ih,
Mipuarthaupawl cu kim zetin a lehrūl hai.
24 Tha la awla, na thinlung cakter aw,
Nannih Jehovah hnenih ruahsannak neitu hmuahhmuah.

32

Ngaidamnak ruangih Aipuannak

David-ih Sam. Maskil.

1 A dānpahbălnak ngaithiamsak si ih,
A sualnak khuhsak a si mi cu mithlawsuak a si.
2 Jehovah in mawh ih a puh lo mi le,
A thinlung ih mi bumnak a um lo mi milai cu mithlawsuak a si.
3 Daiteih ka um men tikah,
Sunvu-ih ka aihramnak ruangah ka ruhpawl an cak lo ṭheh.
4 A sun a zanin na kut cu ka parah a rit zet;
Ka hninhnonak khal ṭhâl khawkheng vekah an cang ṭheh. Selah
5 Na hnenah ka sualnak ka phuanglang ih,
Ka mawhsualnak ka thup lo.
«Jehovah hnenah ka dānpahbălnakpawl ka phuang ding,» tiah ka ti.
Cule nang in ka mawhsualnak i rak ngaithiam. Selah
6 Himi ruangah Pathian ngaihsaktu kip in,
Hmuh theih na si tikcucān ah,
Na hnenah thlacam cio hai seh;
Nasa zetih ti a len tikah na kiangah, an ra thei lo ding.
7 Nang cu ka relhnak hmun na si;
Harnak lak ihsin i kilhim ding;
Runsuahnak hlapawl thawn i kulh ding. Selah
8 Na fehnak ding lamzin ka lo sim ding ih ka lo zirh ding;
Ka mit in lam ka lo khihhmuh ding.
9 Theihthiamnak nei lo ráng le lākrang vekin um hlah,
Annih cu kakharh le hmur hri thawi dirh ṭul an si,
Cuti lo cun na hnen an ra lo naih lo ding.
10 Misualrálpawl hnenah riahsiatnak tampi a thleng ding;
Asinan Jehovah a rinsantu hnenah cun, lainatduhdawtnak in amah cu a kulh ding.
11 Nannih midingfelpawl, Jehovah hnenah lungawi uhla, aipuang uh;
Cule aipuan ruangah au uh, nannih thinlung dĭngpawl hmuahhmuah!

33

Sersiamnak le Thuanthu ih Jehovah Thuneihnak

1 Maw nannih midingfelpawl, Jehovah ah lungawiaipuangin um uh!
Ziangahtile midĭng hnen ihsi thangṭhatnak cu a mawi a si.
2 Jehovah cu ṭingṭang thawn thangṭhat uh;
Hri hra nei ṭingṭang in a hrangah awnmawi tuah uh.
3 A hnenah hla thar sak uh;
Thiam zetin tum uhla aipuangin au uh.
4 Ziangahtile Jehovah kamsuakthu cu a dik a si,
Cule a hnaṭuan mi hmuahhmuah cu a taktak ih ṭuan a si.
5 Anih cun dingfelnak le diknak a duh;
Leilung hi Jehovah lainatduhdawtnak in a khat.
6 Jehovah kamsuakthu in vanpawl khi tuah a si ih,
A kâ ihsi suak mi thaw in cutawk ih um mi hmuahhmuah a tuah.
7 Tifinriat tipi kha hmunkhatah penkhawm mi vekin a khawm;
Tipithuanthum thûk zet cu retkhawmnak ah a ret.
8 Leilung hmuahhmuah in Jehovah cu ṭihzah hai seh;
Leitlun ih a umtu hmuahhmuah in amah ṭihzahupatin ding hai seh.
9 Ziangahtile anih cu a ṭawng ih, cumi cu a cangsuak;
Thu a pe ih, cumi cu a dinghnget.
10 Jehovah in miphunpawlih thurawnpek cu zianghmanlo ah a tuah;
Minungpawlih ruahmannak khal a hlawhsamter.
11 Jehovah-ih thurawnpek cu a dinghnget kumkhua,
A thinlung ih ruahmannak cu san hmuahhmuah daih a si.
12 A Pathian ih Jehovah a neitu miphun cu mithlawsuak an si,
A ro dingih a hril mi minungpawl khal.
13 Jehovah in van ihsin a zoh;
Minung fapapawl hmuahhmuah a hmu.
14 A cēnnak hmun ihsin leilung ih a um mi hmuahhmuah a run zoh.
15 An zateih thinlung tuahtu cu amah a si;
An hnaṭuan hmuahhmuah khal a theithiam.
16 Siangpahrang zohman ralkap tamnak in a run lo;
Micak khal cahnak nasazetin a runsuak lo.
17 Ráng hi himnak dingah ruahsannak ṭhahnem lo a si;
A cahnak in zohman a runsuak thei lo.
18 Ngai hnik, Jehovah mit cu amah a ṭihzahtupawl,
A lainatduhdawtnak ruahsantupawl parah,
19 Thihnak ihsin an nunnak runsuak dingah le,
Mangṭam sungah anmah nungdamih kilkhawinak dingah a um.
20 Kan nunnak in Jehovah a hngak;
Amah cu in bawmtu le kan ralphaw a si.
21 Ziangahtile kan thinlung cu amah ah lungawiaipuangin a um ding,
Ziangruangahtile a hmin thianghlim kan rinsan a si.
22 Nangmah ih ruahsannak kan neih bangtukin
Maw Jehovah, kan tlunah na lainatduhdawtnak um hram seh.

34

Runsuahnak ruangih Thangṭhatnak

Abimelek hmaiah mi-â vekin a umawter, anih in a dawisuak ih, a fehsuak laiih David-ih Sam.

1 Ziang tikcān khalah Jehovah ka thangṭhat ding;
Amah thangṭhatnak cu ka kâ ah a um tlaitluan ding.
2 Ka nunnak in Jehovah ah tluang a khawng ding;
Mităngdawrpawl in cumi cu an thei ding ih an lung a awi ding.
3 Jehovah cu ka zawngah cawimawi uhla,
A hmin khaisângtlang uhsi.
4 Jehovah ka hawl ih, anih in i sawn,
Cule ka ṭihphannak hmuahhmuah lak ihsin i runsuak.
5 Hnangam zetin amah an zoh ih, annih cu an rung tle ih,
An mithmai ah ningzahnak a um lo.
6 Hi mifarahpa cu a au ih, Jehovah in a ngaithla,
Cule a harsatnak hmuahhmuah lak ihsin a run.
7 Jehovah-ih vancungmi in amah a ṭihzahtupawlih kimvel hmuahhmuah a kulh ṭheh,
Cule anmah a runsuak.
8 Jehovah cu a ṭha a si ti hi tep in hmu hnik uh!
Amah a rinsantupa cu mithlawsuak a si.
9 Maw, nannih a mithiangpawl, Jehovah cu ṭihzah uh!
Amah a ṭihzahtu in zianghman a tlasam lo.
10 Kiosa vanglaipawl tlasam in an ril a râwng ṭheu.
Asinan Jehovah a hawltu cu thil ṭha zianghman a tlasam lo ding.
11 Nannih falepawl tla ra uh, i ngai hnik uh;
Jehovah ṭihzahdān ka lo zirh ding.
12 Thil ṭha a hmuh theinak dingah, nun ding saduhthat ih,
Nun khawsau duhtupa cu zo a si?
13 Na lei kha thil ṭhalo lak ihsin kilveng awla,
Mi bumnak ihsin na hmur kilveng aw.
14 Thil ṭhalo ihsin tlân awla, thil ṭha tuah aw;
Remdaihnak hawl awla, cumi cu dawi aw.
15 Jehovah mit cu midingfelpawl parah a fu ih,
A hna cu an auaw lamah a tháwng.
16 Anmah cīn ringring nak kha leilung ihsin sâtcat dingin,
Jehovah-ih mithmai cun thil ṭhalo tuahtupawl a dokalh.
17 Midingfelpawl an ausuak ih, Jehovah in a thei,
Cule an harsatnak hmuahhmuah ihsin anmah a runsuak hai.
18 Jehovah cun thinlung kekkuaipawl a naih ih,
Sirawknak lungthin neipawl kha a rūn.
19 Midingfel khal zăwnzaihnak tampi a tuar,
Asinan amah cu Jehovah in cupawl hmuahhmuah lak ihsin a runsuak.
20 A ruhpawl hmuahhmuah a kilvensak;
Pakhat hman a kiak lo.
21 Thil ṭhalo in misualrál a that ding ih,
Midingfel huatupawl cu thiamlo coter an si ding.
22 Jehovah in a siahhlawh nunnak a tlen ih,
Amah a rinsantu zohman thiamlo coter an si lo ding.

35

Runsuahnak hrang Thlacam

David-ih Sam.

1 Maw Jehovah, i beitupawl bei aw;
I dotupawl do aw.
2 Na ralphaw le na ralphaw pi keng awla,
Keimah bawm dingin ding aw.
3 Na feipi khal phawi awla,
I dawitupawl cawlter hai aw.
Ka hnenah, «Keimah cu na runsuahnak ka si,» tiah sim aw.
4 Ka nunnak thah duh ih hawltupawl hi ningzahter le mualphoter si hai seh;
Keimah tuahmawh dingih phiarthuptupawl hi
Kirtersal le buaiter si hai seh.
5 Cupawl cu thli hmaiih fānghi vek si hai sehla,
Jehovah-ih vancungmi in dûm hai seh.
6 An lamzin cu thim le bahnak si sehla,
Jehovah-ih vancungmi in dawi hai seh.
7 Ziangahtile săn um loin keimah awhnak dingah sûr an thup,
Ka nunnak la dingin săn um loin khur an lai.
8 Rinlopiin a parah siatralnak thleng sehla,
A rak thuh mi a sûr in amah awk seh;
Cumi siatralnak rori ah amah tla seh.
9 Cule ka nunnak cu Jehovah ah lungawiaipuangin a um ding;
A runsuahnak ah a ai a puang ding.
10 Ka ruhpawl hmuahhmuah in,
«Maw Jehovah, amah hnakih a cak zet mi hnen ihsi mifarah runsuaktu le,
Mifarah le mitlasam a neih mi lawnsaktu hnen ihsin runsuaktu,
Nangmah vek zo so um?» tiah an ti ding.
11 Thutheitu diklopawl an tho;
Annih in ka theih lo mi thilpawl in sut.
12 Ka thil tiṭhat kha thil ṭhalo in in lehrūl ih,
Ka thinlung an riahseter.
13 Asinan kei ka hrangah cun, an dam lo tikah,
Ka hnipuan cu buri an si;
Rawlulin ka thinlung ka riahseter ih,
Ka thlacamnak cu ka thinlung ah a kirsal.
14 Ka rualpi ṭha le ka unau vekin a parah ka tuah,
Mi a nu a sūn mi vekin rit tuar tukin ka kûn.
15 Asinan ka bah tikah lungawiaipuangin an um ih,
An táwngawkhawm;
Ka theih dah mi i dotupawl an tawngkhawmaw ih,
In băwtthlek, cawl loin.
16 Puai ah Pathian ngaihsak lo pawl tidān vekin,
An hacâng in rialhnawh.
17 Bawipa, ziang tik tiang so na zoh men hai ding?
An mi siatsuahnakpawl ihsin i run awla,
Ka neihsŭn ka nunnak hi kiosapawl lak ihsin.
18 Punkhawmnak ah lungawi thu ka lo sim ding;
Mi tampi lakah ka lo thangṭhat ding.
19 Diklo zetih nung ka ralpawl in ka parah lungawiaipuangin um hlah hai seh;
Thu um loih i huatupawl in mitkemin in mét hlah hai seh.
20 Ziangahtile annih cun remdaihnak thu an rel lo,
Hih ram sungih thlangam teih a um mipawl bumnak ding thu an ruat sawn.
21 Keimah dokalhin an kâ kau zetin an âng ih,
«A ze, A ze!
Kan mit in a hmu zo,» tiah an ti.
22 Maw Jehovah, himi hi na hmuh zo mi a si;
Daiten um hlah aw.
Maw Bawipa, ka hnen ihsin a hlatnak ah um hlah aw.
23 Harhawter awla, ka dikzia langter dingin ṭhang aw,
Ka thuhla ah, ka Pathian le ka Bawipa.
24 Maw Jehovah ka Pathian, na dingfelnak zulhin ka dikzia langter awla,
Annihpawl kha ka parah lungawiaipuang hlah hai seh.
25 An thinlung in, «A ze, kan duh a tling,» ti hlah hai seh.
Annih in, «Amah cu kan dawlh zo,» ti hlah hai seh.
26 Ka tuarnak parih lungawiaipuangtupawl cu,
Ningzak le buainak ah hruai si hai seh;
Keimah dokalhih khaisângawpawl khal
Ningzak le mualphonak hnipuan hruk hai seh.
27 Ka thiamconak i duhsaktupawl cu,
Aipuang le lungawiin au hai seh;
Cule annih in, «A siahhlawh hmuingilnak ih a lungsitu Jehovah cu cawimawiin um seh,» tiin tlaitluanin sim hai seh.
28 Cule ka lei in na dingfelnak le na thangṭhatnak cu sunvu in a sim ding.

36

Milai Sualnak le Pathian Ṭhatnak

Hla Hruaitu Hrang. Jehovah Siahhlawh David-ih Sam.

1 Misualrálpawl dānpahbălnak thuhla ah ka thinlung sungah thucah a um:
A mit ah Pathian ṭihzahnak a um lo.
2 Ziangahtile amai mawhsualnak hmuhsuah thu le huatnak thu ah,
A mithmuhah amah le amah a pawrhaw.
3 A kamsuak ṭawngkampawl cu sualralnak le bumnak an si,
Anih cun fim ih um le thil ṭha tuah a cawlhsan.
4 A ihkhun parah sualralnak a ngaihtuah,
Amah le amah thil ṭhalo ti dingin a tuahaw,
Thil ṭhalo kha a fih lo.
5 Maw Jehovah, na lainatduhdawtnak cun vanpawl a dai ih,
Na rinumnak cu khawdurpawl a thleng.
6 Na dingfelnak cu Pathian tlangpawl vek a si,
Na thuṭhennakpawl cu ti thûkpi vek a si,
Maw Jehovah, nang in minung le ramsa na humhim.
7 Maw Pathian, na lainatduhdawtnak cu a va hlu tak ve!
Curuangah minung fātepawl in na thlazar tăngah an rinsannak an ṭhum.
8 Annih cu na inn ih neihnunnak luangliam cu khăwpkham zetin an in ih,
Na lungsinak tiva ihta in ding na pe hai.
9 Na hnenah nunnak tihna a um,
Na tleu ah tleunak kan hmu.
10 Maw, nangmah a lo theitu hnenah na lainatduhdawtnak catbang loin um sehla,
Na dingfelnak cu thinlung dĭngpawl hnen khalah.
11 Mihngalpawl ke cu keimah dokalh dingin ra hlah hai sehla,
Misualrálpawlih kut in i dawihlo hlah seh.
12 Cu tawkah mawhsualnak tuahtupawl an tlu,
Namthluk an si ih an tho thei nawn lo.

37

Tuarfai dingih Thapeknak

David-ih Sam.

1 Thil ṭhalo tuahtupawl ruangah na thinbāng hlah,
Mawhsualnak a tuahtupawl kha daw fawn hlah.
2 Ziangahtile annih cu hrampi vekin an ziam cing ding ih,
Thlai hring vekin an vuai ding.
3 Jehovah rinsan awla, thil ṭha tuah aw,
Ram sungah cêng awla, a rinumnak nunpi aw.
4 Jehovah parah nuamaw awla,
Anih in na lungthlitum a lo pe ding.
5 Jehovah hnenah na lamzin cu ap aw,
Amah rinsan awla,
Amah in cumi cu a cangsuakter ding.
6 Anih in na dingfelnak cu tleu vekin le,
Na diknak cu sunlai vekin a tleuter ding.
7 Jehovah hmaiah daiten um awla, amah kha thinsauten hngak aw,
A lamzin hmuingilpa ruangah na thinbāng hlah,
A sualrál mi khawkhannak a tuahtupa ruang khalah.
8 Thinhengnak ihsin bāng awla, thinlingnak tansan aw,
Na thinbāng hlah, cumi cun siatnak lawng a suahpi.
9 Ziangahtile thil ṭhalo tuahtupawl cu hlohralter an si ding,
Asinan Jehovah a hngaktupawl cun,
Leilung hi ro ah an co ding.
10 Ziangahtile rei lo teah misualrálpa cu a um nawn lo ding,
A si, a umnak kha fimkhurten na hawl ding,
Asinan anih cu a um nawn lo ding.
11 Asinan mităngdawrpawl in leilung an luah ding ih,
Hmuingilnak nasazetah an nuamaw ding.
12 Misualrál in midik dokalhin a phiar ih,
A parah a hacâng a rialhnawh.
13 Bawipa in cu pa cu a hnihsan,
Ziangahtile cu paih ni a thleng ding ti kha a hmu.
14 Misualrálpawl in mifarah le tlasam pawl thlu dingah le,
Midingpawl that dingah,
An ralnâm an phawi ih,
An thál an nawp.
15 An ralnâmpawl anmai thin rori ah a lut ding ih,
An thálpawl cu an kiak ding.
16 Midingfel pakhat in thil málte a neih mi cu,
Misualrál tampi ih lennak hnakin a ṭhasawn.
17 Ziangahtile misualrálpawlih bān cu khiah an si ding,
Asinan midingfel cu Jehovah in a kaihnget ding.
18 Jehovah in midĭngpawlih nipawl a thei ih,
An co mi ro cu kumkhaw hrangah a si ding.
19 Annih cu cān ṭha lo khalah an ning a zak lo ding ih,
Mangṭam nikhua khalah an khăwpkham ding.
20 Asinan misualrálpawl cu an hlorál ding,
Jehovah-ih ralpawl khal,
Hramhring ropitnak vek men an si ding, an hlorál ding,
Meikhu bangin an hlorál ding.
21 Misualrál cun a cawi ih a samsâl nawn lo,
Asinan midingfel cun zah a ngai ih a pe.
22 Ziangahtile Jehovah ih thlawsuah a pek mipawl in leilung an luah ding,
Asinan a camsiat mipawl cu sahtan an si ding.
23 Miṭhapaih kekarpawl cu Jehovah in a hruai ih,
A lamzin ah lungsinak a nei.
24 A tlûk a si khalle, a tlulan ta lo ding,
Ziangahtile Jehovah in a kut in amah cu a kaihnget ding.
25 Mino ka rak si dah ih, atu cu ka upa thlang,
Midingfel thlauthlakih a um le,
A tesinfapawl rawl an dil ka hmu dah lo.
26 Anih cu sunnihlawh in zahngainak in a khat ih, mi a cawih,
Cule a tesinfapawl cu thlawsuah an co.
27 Ṭhatlonak tlansan awla, thil ṭha tuah aw;
Cule kumkhuain thlangamten cêng aw.
28 Ziangahtile Jehovah in diknak a duh ih,
A mithiangpawl a thlauthla lo,
Annih cu kumkhuain a humhim,
Asinan misualrálpawlih tesinfapawl cu sahcat an si ding.
29 Midingfel in ram an luah ding ih,
Cumi sungah kumkhuain an cêng ding.
30 Midingfel kâ in fimnak a sim ih,
A lei in diknak a rel.
31 A Pathian-ih dān cu a thinlung sungah a um,
A kekarpawl an nâl dah lo ding.
32 Misualrálpa in midingfel kha a thlingthla ih,
Amah thah tumin a hawl.
33 Jehovah in midingfelpa cu misualrálpaih kut ah a tân ta lo ding,
Thuṭhensak a si tik khalah thiam lo a coter lo ding.
34 Jehovah kha hngak awla,
A lamzin thlun aw,
Cule ram luah dingin a lo khaisâng ding,
Misualrálpawl hlohralter an si tikah na hmu ding.
35 A ṭonak ding hmun ih a hnah nîm ciaiciai thingkung vekih zarpharhaw, minunrâwng, misualrál ka hmu.
36 Asinan anih cu a thi ih a um nawn lo, cule ngai hnik, amah cu a um nawn lo,
A si, amah ka hawl nân, hmuh theih a si nawn lo.
37 Sawihnăwm kâi lo pa kha hminsin awla, midĭngpa kha zohhliah aw;
Ziangahtile cu paih hmai lam cān cu hnangamdaihnak a si.
38 Asinan dānpahbăltupawl cu hmunkhatah siatsuahtlang an si ding,
Misualrálpawlih hmai lam cān cu siatsuah a si ding.
39 Asinan midingfelih runsuahnak cu Jehovah hnen ihsin a si,
Amah cu harsat cān ah an cahnak a si.
40 Cule Jehovah in annihpawl kha a bawm ding ih a runsuak ding,
Misualrálpawl lak ihsin a runsuak hai ding ih,
A hum ding,
Ziangruangahtile annih in amah cu an rinsan.

38

Băwmnak hrang Thlacam

Mansuahsalternak Hrang, David-ih Sam.

1 Maw Jehovah, na thinlingnak ah i kawk hlah awla,
Na lungawilonak sosa ah nun i sim fawn hlah.
2 Ziangahtile na thálfungpawl in thûkpin in sun ih,
Na kut in i nambĕt a si.
3 Na thinhengnak ruangah
Ka taksa ah harhdamnak lai khal a um lo,
Cule ka sualnak ruangah
Ka ruhpawl ah harhdamnak a um lo.
4 Ziangahtile ka mawhsualnakpawl in ka lu an cîmpil;
Phur rit zet vekin cupawl cu ka hrangah an rit tuk.
5 Ka atnak ruangah,
Ka hmapawl an thu ih hnai an khuar.
6 Ka buai a si, nasazetih namthlak ka si;
Sunnihlawh in ka hrûm.
7 Ziangahtile ka tâi hi meialh vekin a sa ṭheh,
Cule ka taksa ah harhdamnak lai a um lo.
8 Ka tha a cem ih, nasazetin ka tlu;
Ka thinlung buainak ruangah ka hrûm.
9 Maw Bawipa, ka saduhthah hmuahhmuah cu na hmaiah an um;
Cule ka thawpi suah mi khal thei loin na um lo.
10 Ka thin a tûr, ka tha a cem;
Ka hmuh theinak cu, ka hnen ihsin an hlo.
11 Ka duhdawt mipawl le ka rualpipawl cu ka natnak ihsin a hlatnak ah an um ih,
Ka sungkhatpawl khal hlatpi ah an ding.
12 Ka nunnak hawltupawl khal in in awhnak dingah tháng an kăm;
Tuahmawh i tumtupawl in siatnak thu an rel ih,
Sunnihlawh in bumnak khua an khâng.
13 Asinan kei cu, hnasetpa vekin, ka hna in zianghman ka thei lo;
Cule kei cu kâ âng lo, ṭawng thei lo pa vek ka si.
14 Cutin kei cu hna ih zianghman thei lo pa,
A kâ ih letsal thei lo pa vek ka si.
15 Ziangahtile maw Jehovah, nangmah ah ruahsannak ka nei.
Maw Bawipa ka Pathian, nang in i ngaithla ding.
16 Curuangah kei in, «Ka ke a nal tikah, ka parih khaisângawtupawl kha lungawiaipuangin umter hai hlah aw,» tiah ka ti.
17 Ziangahtile, kei cu ka tlu zikte,
Cule ka hmaiah ka riahsiatnak a pehaw vingvo.
18 Ziangahtile ka mawhsualnak ka thăn ding;
Ka sualnak ruangah thinnain ka um ding.
19 Asinan ka ralpawl cu an virvat a ṭha ih, an tam;
Cule diklo zetih i huatu an pung vingvo.
20 Annih cu thil ṭha kha thil ṭhalo ih lehrūl duhtu an si,
Annih cu i dodaltu an si, ziangruangahtile kei in thil ṭha ka thlun.
21 Maw Jehovah, i thlauthla hlah aw;
Maw ka Pathian, ka hnen ihsin hla ah um hlah.
22 Maw Bawipa, ka runsuahnak,
Zamrangin i ra bawm aw!

39

Fimnak hrang Thlacam

Hla Hruaitu Hrang. ^aJeduthun Hrang. David-ih Sam.

^a Jeduthun: Jeduthun hi Temple ih hla hruaitupawl lakih pakhat David in khawm hruaitu dingih a hril mi a si (1San 16:41-42 zoh aw).

1 Kei in, «Ka nun lamzinpawl ka kilṭha ding,
Culole ka lei in sual ka tuah pang ding;
Ka hmaiih misualrálpawl an um sung cu,
Ka kâ hi hmurṭēmnak in ka ṭembĕt ding,» tiah ka ti.
2 Kei cu ṭawng loin daiten ka rak um,
Thil ṭha rori hman sim loin daiten ka rak um;
Cule ka riahsiatnak a luar sinsin.
3 Ka thinlung cu ka sungah a sa;
Thu ka ruah laiah, meisa a alh.
Cun ka lei in ka ṭawngsuak.
4 Maw Jehovah, ka nun cemnetnak le,
Ka dam zât ding nipawl i theiter aw,
Ka nun tawizia in theiter aw.
5 Ngai hnik, ka damsung cān hi ^azabăwk khat tluk fangah na rak tuah,
Cule ka kum khal na hmaiah cun zianghmanlo a si;
A taktak ah cun, mi kip ih ṭhat vanglai khal tikhu vek a si. Selah
6 Thungaiten mi kip hi thlahlim vekih vâk men mi an si.
Zianghman santlailo mi ah an buaiawter men,
Lennak an pengkhawm ih,
Cupawl cu zo in an lakhawm ding ti khal an thei lo.
7 «Cule atu ah, Maw Bawipa, ziangso ka hngah?
Ka ruahsannak cu nangmah na si.
8 Ka dānpahbălnak hmuahhmuah ihsin i runsuak aw;
Mi-âpawlih hnihsuahsainak ah i tuah hlah aw.
9 Ṭawng thei lo ka rak si, ka kâ ka rak âng lo,
Ziangruangahtile cumi cu nangmah ih tuah mi a si.
10 Na hremnak hi ka hnen ihsin ṭhawn aw;
Na kut ih i vuaknak in ka cemrál.
11 Mawhsualnak ruangah kawknak in mi nun na rĕmsak,
Amai mawinak kha sunhrûl ei vekin na rálter ṭheh;
Thungaiten mi kip cu tikhu men an si. Selah
12 Maw Jehovah, ka thlacam hi ngai awla,
Ka aunak lamah na hna tŭn aw;
Ka mitthlipawl hi daiten umsan men hlah;
Ziangahtile kei cu nangmah lakah ka mikhual a si,
Ka pupápawl vekin khualtlawng lamvai men ka si.
13 Aipuannak ka ngah theinak dingah, khat lam i hawisan aw,
Ka fehhlo ih ka um nawn lo hlanah.

39:5^a zabăwk: Bible ih thil tahnak phunphun ih sau lam tahnak zoh aw.

40

Runsuahnak ruangih Lungawi Thu Simnak

Hla Hruaitu Hrang. David-ih Sam.

1 Jehovah cu thinsau zetin ka hngak;
Cule anih cun ka lam a hawi ih,
Ka aunak a thei.
2 Cuihhleiah anih in ṭihnungza khur sung ihsin le
Tlak leibêk sung ihsin i dirsuak ih,
Lungpi parah ka ke a ret,
Cule ka kekarpawl a hngetter.
3 Anih in kan Pathian thangṭhatnak, ka kâ ah hla thar a ret,
Mi tampi in cumi cu an hmu ding ih, an ṭih ding,
Cule Jehovah an rinsan ding.
4 Mipuarthau upat lo ih, thuphan pernak lamih a pial lo tu,
Jehovah a rinsantupa cu, mithlawsuak a si.
5 Maw Jehovah ka Pathian, na thil tuah mangbangzapawl hi an tam tuk,
Kan hrangih na ruah mipawl thawn;
Na hnenah a sangsángten siar theih cawk a si lo.
Cupawl cu thăn in sim tum hnik ningla, siar ding cun an tam tuk.
6 Thawinak le thilhlăn na duh lo;
Nang in ka hnapawl na rak ăwngter.
Nang in Meiur Thilhlăn le Sual Thilhlăn na ngen lo.
7 Cun kei in, «Ngai hnik, ka ra;
Cazual sungah ka thuhla nganin a um.
8 Maw ka Pathian, na duhnak tuah ding hi nuam ka ti zawng a si ih,
Na dān cu ka thinlung ah a um,» tiah ka ti.
9 Punkhawmnak pi ah
Dingfelnak lungawiumza thuthang ka rak phuang;
Thungaiten, ka hmur ka sûp lo,
Maw Jehovah, nangmah rori in na thei.
10 Ka thinlung sungah na dingfelnak ka thup lo;
Na rinumnak le na runsuahnak ka thăn;
Mipungkhawm pi lakah
Na lainatduhdawtnak le na thutak ka zep lo.
11 Maw Jehovah, ka hnen ihsin na zahngainak duhum cu sūp hlah;
Na lainatduhdawtnak le na thutak cun i humhim tlaitluan seh.
12 Ziangahtile siar cawk lo thil ṭhalo in i kulh;
Ka mawhsualnakpawl in in man,
Curuangah tlun lam ka zoh thei lo;
Cupawl cu ka lu parih sám hnakin an tamsawn;
Cule ka thinlung a cau.
13 Maw Jehovah, i runsuak dingin lunghmui aw;
Maw Jehovah, i bawm dingin hmanhmawh aw!
14 Ka nunnak la dingih hawltupawl hi
Ningzahter le mualphoterin um hai seh;
Ka siatnak ding duhtupawl cu
Dung lamah kirter le mualphoterin um hai seh.
15 Ka hnenih, «A ze, a ze!» i titupawl cu
An ningzah ruangah thinpit khawruahharin um hai seh.
16 Nangmah a lo hawltupawl hmuahhmuah cu nangmah ah aipuang le lungawiin um hai seh;
Na runsuahnak duhdawtupawl cun,
«Jehovah cu a ropi a si,» ti tlaitluan hai seh.
17 Asinan kei cu mifarah le mitlasam ka si;
Bawipa in i ngaihsak.
Nang cu i bawmtu le i runsuaktu na si;
Maw ka Pathian, muang hlah aw.

41

Rinsantlak Jehovah Băwmnak

Hla Hruaitu Hrang. David-ih Sam.

1 Mifarah ngaihsaktu cu mithlawsuak a si;
Jehovah in amah cu harsat cān ah a runsuak ding.
2 Jehovah in amah cu a humhim ding ih, a nungter ding,
Cule anih cu leilung tlunah thlawsuah a co ding;
Nang in amah cu a ralpawlih duhnak ah na thlengter lo ding.
3 Jehovah in damlonak ihkhun parah cahnak a pe ding;
Nang in a natnak na tidam ṭheh ding.
4 Kei in, «Maw Jehovah, ka parah zahngai hram aw;
Ka nunnak tidam aw, ziangahtile na hnenah ka sual a si,» tiah ka ti.
5 Ka ralpawl in in relsia:
«Ziangtik ah a thi ding ih, a hmin a hlo ding,» tiah an ti.
6 Cule keimah táwng dingih a rat tikah, thuphan a per;
A thinlung in mawhsualnak a khâwl;
A fehsuak tikah, cumi cu a relsuak.
7 I huatupawl hmuahhmuah in keimah dokalhnak athupten an reltlang;
Keimah tuahmawhnak ding thu an ruattlang.
8 Annih in, «Anih cu nathri ṭhalo in a kai.
Cule a tlu, a thosal thei nawn lo ding,» tiah an ti.
9 Ka sang eitu,
Ka rak rinsan mi ka rualpi nēl mi hman in,
Keimah dokalhin a kedil a rak khai.
10 Asinan Maw Jehovah, nang in ka parah zahngai awla, i kaitho aw,
Cutin anmah ka lehrūl thei ding.
11 Ka parah na lung a hmui ti ka theihnak cu,
Ka ral in nehnak aw a suah thei lo hi a si.
12 Kei lawngte cu, ka felfainak ah nang in i tungding ih,
Na hmaiah i ret kumkhua.
13 Israel-ih Pathian Jehovah cu
Kumkhuain kumkhua tiang thangṭhatin um seh!
Amen, Amen.

Bu 2-nak

42

Pathian Ngainak

Hla Hruaitu Hrang. Korah Fapapawlih Maskil.

1 Sakhi in tivate ti a hāl duahdo vekin,
Maw Pathian, ka nunnak in nangmah a lo hâl.
2 Ka nunnak in Pathian a hâl, a nung mi Pathian cu.
Ziang tikah Pathian hmaiah feh in lang lai ing?
3 Ka mitthli hi a sun a zanin ka rawl a si,
Annih in, «Na Pathian cu khuiah so a um?» tiah sunnihlawhih in ti laiah.
4 Cuih thilpawl ka mansal tikah,
Ka sungah ka nunnak ka sûngbung.
Ziangahtile kei cu mi tampi zawngah ka feh ṭheu;
Pathian inn ah an zawngah ka feh,
Aipuannak aw le thangṭhatnak thawn,
Biaknak puai hmangtu mipi tampi thawn.
5 Maw ka nunnak, ziangahso na kūn?
Ziangahso ka sungah na būai?
Pathian ruahsan aw, ziangahtile amah ka thangṭhatsal ding a si,
Amai hmel ih um băwmnak ruangah.
6 Maw ka Pathian, ka nunnak cu ka sungah a kûn ringring;
Curuangah nangmah kha, Jordan ram ihsin le,
Hermon le,
Mizar tlang ihsin ka lo máng ringring ding.
7 Na titlaserpawl thâwm ah ti thûk in ti thûk a ko;
Na tisuar le tihlăwk pawl in in cîmpil a si.
8 Jehovah in a lainatduhdawtnak cu sun cān ah thu a pek ding ih,
A hla kha zan ah ka hnenah a um ding,
Ka nunnak Pathian hnenih thlacamnak.
9 Pathian ka lungpi hnenah,
«Ziangruangah so i rak hngilh?
Ziangruangah so ral ih nekrawknak ruangah ka aihram rero?» tiah ka ti ding.
10 Ka ralpawl in in hmuhsuam,
Annih in sunnitlakin,
«Na Pathian khuiah so a um?» in ti tikah,
Cumi cu ka ruh khiah tluk a si.
11 Maw ka nunnak ziangahso na kūn?
Ziangahso ka sungah na būai?
Pathian ah ruahsannak nei aw;
Ziangahtile amah ka thangṭhatsal ding,
I runsuaktu le ka Pathian cu.

43

Harsat Cān ih Pathian hnenih Thlacam

1 Maw Pathian, ka dikzia langter awla,
Pathian ngaihsak lo miphun dokalhin ka diknak i phuansak aw;
Mibumhmang le midik lo pa hnen ihsin i runsuak aw.
2 Ziangahtile nang cu ka cahnak Pathian na si;
Ziangahso in hnáwn?
Ziangahso ralpawlih palbĕtnak ruangah ka aihram ding?
3 Maw, na tleunak le na thutak kha thlahsuak aw!
Cupawl in in hruai hai seh;
Cupawl in na tlang thianghlim le,
Na cēnnak ah in thlĕn hai seh.
4 Cun Pathian biakṭheng ah ka feh ding,
Ka aipuannak maksak Pathian hnenah;
Maw Pathian, ka Pathian, ṭingṭang thawn ka lo thangṭhat ding.
5 Maw ka nunnak, ziangahso na kūn?
Ziangahso ka sungah na būai?
Pathian ruahsan aw;
Ziangahtile amah ka thangṭhatsal ding,
^aI runsuaktu le ka Pathian cu.

43:5^a I runsuaktu: A ṭawng hrampi Hebru ah «Ka hmel runsuaktu» ti a si.

44

Israel Miphun Ṭahnak

Hla Hruaitu Hrang. Korah Fapapawlih Maskil.

1 Maw Pathian, khuahlan lai,
Kan pupápawl dam laiih na tuah mipawl kha,
Anmah in in sim ih,
Kan hna in kan rak thei.
2 Nangmah in miphunpawl kha na kut in na dawisuak hai,
Asinan kan palepawl cu na dĭnhnget,
Minungpawl na zawnzaiter ih, na dawisuak hai.
3 Ziangahtile anmai ralnâm hmangin ram an la a si lo ih,
Anmai bān in anmah a run fawn lo;
Cumi tuahtu cu na vawrh lam kut,
Na bân le na hmel tleu a si sawn,
Ziangruangahtile anmah na duhsak.
4 Maw Pathian, nang cu ka Siangpahrang na si;
Jakob hrangah nehnakpawl thu pe aw.
5 Nangmah thawngin kan ralpawl kan námthlu ding;
Nangmai hmin in in dotupawl kan pál ding.
6 Ziangahtile ka thál ka rinsan lo ding,
Ka ralnâm khal in i run fawn lo ding.
7 Nangmah in kan ralpawl lak ihsin in runsuak sawn ih,
Kanmah huatupawl na mualphoter.
8 Pathian ah sunnitlakin tluang kan khawng ih,
Na hmin kumkhuain kan thangṭhat. Selah
9 Asinan nang cun in hnáwng ih in ningzakter,
Cule kan ralkappawl zawngah na feh lo.
10 Nang cun kan ralpawl hnen ihsin dung in sipter ih,
In huatupawl in anmai hrangah kan thilripawl in láwng ṭheh.
11 Nang in thah ding mi tuu vekin in ap ih,
Miphunpawl lakah in ṭhekdarh ṭheh.
12 Na mipawl kha man um loin na zuar ih,
Anmah na zuarnak in zianghman na ngah lo.
13 Nang in kan innhnenpawlih hmuhsuam dingah in tuah,
Kan kimvelih umpawl hmuahhmuah ih hmuhsuam le hnihsan dingah in tuah.
14 Nang in miphunpawl lakah hnihsuahsainak ah,
Minungpawlih lu thinhnawhsan men dingah in tuah.
15 Ka hminsiatnak kha sunnivu ka hmaiah a um ih,
Ka mithmai ningzahnak in i khuh,
16 Kanmah in hmuhsuamtu le in zăwkzettu ih aw ruangah,
Kan ral le phuba latu ruangah a si.
17 Hipawl hmuahhmuah hi kan parah an thleng;
Asinan nangmah kan lo hngilh lo,
Na thukham khal diklo zetin kan hmang cuang lo.
18 Kan thinlung a kirsal lo ih,
Kan kekarpawl khal na lamzin ihsin an pial fawn lo.
19 Asinan nang cun cinghniapawlih hmun ah in khuai ih,
Thihnak thlahlim in in khuh.
20 Pathian hmin kan hngilh,
Asilole ram dang pathian hnenih kan kut kan pharh asile,
21 Pathian in cumi cu a hmusuak lo ding maw?
Ziangahtile anih cun thinlung thuthuppawl a thei.
22 Cucingin nangmah ruangah sunnivu thahin kan um;
Kannih cu sathattu hrangih tuu vekih ruah mi kan si.
23 Maw Bawipa, ṭhang aw, ziangahso na itthat?
Tho aw! In hnáwng kumkhua hlah aw.
24 Ziangruangah na hmai na thuh ih,
Kan zăwnzaihnak le palbĕt kan sinak na hngilh?
25 Ziangahtile kan nunnak cu leivut ah a pil;
Kan taksaruangpum khal lei ah a bĕt.
26 Kanmah bawmtu dingah tho awla,
Na lainatduhdawtnak ruangah in tlen aw.

45

A Ropi Mi Ṭhitawknak Hla

Hla Hruaitu Hrang. ^aShoshannim Hla Thlûk In Korah Fapapawlih Maskil. Duhdawtnak Hla.

^a Shoshannim: «Lily Parpawl» ti mi hla thluk ih sak ding tinak.

1 Ka thinlung hi thil ṭha in a khatliam;
Siangpahrang hnenah ka hnaṭuanpawl ka sim ding;
Ka lei hi cangan thiampaih cafung a si.
2 Nang cu minung fapapawl hnakin na mawisawn;
Na hmur ah zangfahnak burh a si;
Curuangah Pathian in kumkhaw daihin a lo thlawsuah.
3 Maw, Micak Pa, na ralnâm kha na tâi ah thlaih aw,
Na ropitnak le na cungnunnak thawn.
4 Cule thutak, tăngdawrnak le dingfelnak humhim dingin, na cungnunnak thawn hmuingil zetin cuang aw;
Cule na vawrh lam kut in thil maksakpawl lo zirh seh.
5 Na thálfungpawl cu an hriam zet, miphunpawl cu na tăngah an tlu,
Siangpahrang ralpawlih lungkál hrangah na thâlfungpawl cu an hriam.
6 Maw Pathian, na laltokham cu kumkhuain kumkhua tiang hrangah a si;
Dingfelnak kianghrăwl cu na lalram kianghrăwl a si.
7 Dingfelnak na rak ngaina ih, sualralnak na hua;
Curuangah Pathian, na Pathian in na hawipipawl hleihin lungawinak hriak a lo thih a si.
8 Na sinfen hmuahhmuah cu mura le aloe le kassia pawl hnih an si,
Vuiho ih sak mi siangpahrang innpawl ah, ṭingṭangpawl in lungawi ko an lo tuah.
9 Siangpahrang fanupawl lakah upattlak na nunaupawl an um;
Na vawrh lamah Ofir sui thawi thuamaw siangpahrangbawinu a ding.
10 Maw ka fanu, ngai hnik,
Ruat awla, na hna tháwng aw;
Na mipawl hngilh awla, na paih sungkuapawl khal.
11 Cutin Siangpahrang in na mawinak hi nasazetin a ha a hio ding a si;
Ziangruangahtile amah cu na Bawi a si, a hmaiah băwkkhup aw.
12 Cule Ṭaiar fanu kha thilpek thawn a ra ding;
Minungpawl lakih milianpawl in na duhsaknak an hawl ding.
13 Siangpahrang fanu cu siangpahrang inn sungah ropitnak in a kulh;
A hnipuan cu sui thawi ṭelh mi a si.
14 Cu nu cu siangpahrang hnenah kâwrfual răwng tampi nei hruk in hruai a si ding;
A hawipi amah thluntu, fala himpawl in amah cu na hnenah an rak hruai ding.
15 Lungawinak le aipuannak thawn amah cu an rak hruai ding;
Siangpahrang inn sungah an lut ding.
16 Na falepawl in na palepawl ai an awh ding;
Leilung tlun hmuahhmuah ah uktu ah na tuah ding.
17 Na hmin cu san hmuahhmuah tiang cīn ringring dingah ka tuah ding;
Curuangah minungpawl in kumkhuain kumkhua tiang an lo thangṭhat ding.

46

Jerusalem Kulhhnget

Hla Hruaitu Hrang. Korah Fapapawlih Sam. ^aAlamoth Hla Thlûk In.

^a Alamoth: Soprano asilole key sang zetih sak ding tinak.

1 Pathian cu kan răwlhimnak le kan cahnak a si,
Harsat tawn tikih bawmtu naibik a si.
2 Curuangah kan ṭih lo ding,
Leilung hi ṭhawn in,
Tlangpawl khi tifinriat sungih thiar si hman hai sehla.
3 A tipi hi hûk in, so khal sehla,
Cuih tisuarpawl in tlangpawl hnînter hman hai sehla kan ṭih lo ding.
4 Tiva pakhat, a ṭêkpawl in Cungnung Bik-ih cēnnak hmun thianghlim,
Pathian khawpi lungawitertu ding a um.
5 Pathian cu cuih khawpi ah a um, cucu a hnîn lo ding;
Pathian in a bawm ding, khawvâng zawngah.
6 Miphunpawl an thin a so, lalrampawl an hnîn;
Pathian in a aw a suah ih, leilung a tirál.
7 Ralkap rualpawlih Jehovah cu kan lamah a ṭang;
Jakob-ih Pathian cu kan răwlhimnak a si. Selah
8 Ra uh, Jehovah thil tipawl ra zoh hnik uh,
Leilung a lawnglakter.
9 Leilung dĕng tiang ral doawknak a rehter;
Thál a khiak ih feipi hmun hnih ah a tán;
Ránglêngpawl meisa ah a ur.
10 Thlangamten um uhla, keimah hi Pathian ka si ti thei uh;
Miphunpawl lakah khaisan ka si ding,
Leilung tlunah cawisan ka si ding.
11 Ralkap rualpawlih Jehovah cu kan lamah a ṭang;
Jakob-ih Pathian cu kan răwlhimnak a si. Selah

47

Leitlun Pumpi Siangpahrang Jehovah

Hla Hruaitu Hrang. Korah Fapapawlih Sam.

1 Maw nannih miphun hmuahhmuah tla, nan za bēng uh!
Nehnak aw thawn Pathian hnenah au uh!
2 Ziangahtile Cungnung Bik Jehovah cu a maksak a si;
Amah cu leilung tlun hmuahhmuah ah Siangpahrang ropi a si.
3 Anih in minungpawl kha kan tăngah,
Miphunpawl kha kan ke hnuaiah a duaiter hai ding.
4 Kan co ding mi ro,
A duhdawt mi Jakob-ih ropitnak cu in hrilsak ding.
5 Pathian cu authâwm thawn a hung so,
Jehovah cu tuupa ki phawt aw thawn.
6 Pathian hnenah thangṭhatnak hla sak uh, thangṭhatin hla sak uh!
Kan Siangpahrang hnenah thangṭhatnak hla sak uh, thangṭhatin hla sak uh!
7 Ziangahtile Pathian cu leilung tlun hmuahhmuah ih Siangpahrang a si;
Thiam zetin thangṭhatnak hla sak uh.
8 Pathian in miphunpawl a uk;
Pathian cu a laltokham thianghlim ah a to.
9 Minungpawlih mipawimawhpawl cu hmunkhatah an khawmaw,
Abraham Pathian-ih minungpawl cu.
Ziangahtile leilung ralphawpawl cu Pathian ta an si;
Amah cu nasazetih khaisan a si.

48

Zion Ropitnak

Hla. Korah Fapapawlih Sam.

1 Jehovah cu a ropi a si,
Kan Pathian khawpi sung,
A tlang thianghlim ah, nasazetih thangṭhat ding a si.
2 A san lam a mawi zet mi,
Leilung pumpuluk ih aipuannak cu,
Sak lamih um Zion Tlang,
Siangpahrang ropiih khawpi a si.
3 Cuih khawkulh sungah cun Pathian a um;
Anih cu răwlhimnak ah a tuahaw.
4 Ziangahtile ngai hnik, siangpahrangpawl an tawngkhawmaw ih,
An suakkhawm.
5 Annih in an hmu ih, an mang a bang;
An thin a buai, zamrang zetin an tlânhlo.
6 Cu tawkah ṭihnak in a tuam hai,
Cule nunau nau nei zik nat vekin an nâ.
7 Nisuahnak lam thli hmangin
Tarshish lăwngpawl na siatbăl ṭheh.
8 Kan hna ih kan rak theih zo vekin,
Ralkap rualpawlih Jehovah khawpi sung,
Kan Pathian khawpi sungah kan hmu.
Pathian in cuih khawpi cu kumkhua hrangah a dĭnhnget ding a si. Selah
9 Maw Pathian, na temple sungah,
Na lainatduhdawtnak thu kan rak ruat zo.
10 Maw Pathian, na hmin a than bangtukin,
Nangmah thangṭhatnak cu leilung dĕng tiangin a thang;
Na vawrh lam kut cu dingfelnak in a khat a si.
11 Na thuṭhennakpawl ruangah,
Zion Tlang cu aipuang seh,
Judah fanupawl khal lungawi hai seh.
12 Zion kiangah vakkûal aw,
Cule a kimvel hmuahhmuah hêl aw,
A dawlsângpawl siar aw.
13 An ralkulhpawl cu hminsin aw;
A siangpahrang innpawl fáng thluh aw;
Cule a ra lai ding san minungpawl hnenah cumi cu na sim thei ding.
14 Ziangahtile hihi Pathian,
Kumkhuain kumkhua tiang kan Pathian a si;
Anih cu kan thih tiang
Lam in hruaitu a si ding.

49

Lennak Rinsan Atthlakzia

Hla Hruaitu Hrang. Korah Fapapawlih Sam.

1 Nannih miphunpawl hmuahhmuah tla, hihi thei uh;
Leilung tlunih um hmuahhmuah tla, nan hna tŭn hnik uh,
2 Miniam le misâng,
Milian le mifarah nan zaten.
3 Ka kâ in fimnak a rel ding ih,
Ka thinlung ih ngunngaih zetih ngaihtuahnak in theihthiamnak a pe ding.
4 Thufim lamah ka hna ka tháwng ding;
Ka thupawlhpawl kha ṭingṭang thawn ka phuanglang ding.
5 Ka ralpawlih mawhsualnak ih in kulhvel tikah,
Harsat cān ah ziangahso ka ṭih ding?
6 An neihnunnak rinsantupawl le,
An lennak tampi parih tluang a khâwngtupawl khal.
7 Anmah lakah zohman in ziangti lam khalin a unaupa a tlen thei lo ih,
Pathian hnenah cu pa hrangah tlennak khal a pe thei lo.
8 Ziangahtile an nunnak tlennak man cu a khung tuk,
Cumi cu a cemlan kumkhua ding a si.
9 Cutin anih cu kumkhuain a nung tlaitluan ding ih,
Khur a hmu lo ding.
10 Ziangahtile mifimpawl an thih kha a hmu;
Cuvek thothoin mi-â le ruahnak nei lo khal an hlorál,
Cule an neihnunnak kha mi dang hnenah an tan.
11 An sungmuril cun an innpawl hmun kumkhua dingah an ruat,
An cēnnak hmunpawl cu cithlahsâwng vivo tiang hmun dingah;
An leirampawl cu anmai hmin an sak.
12 Minung cu, upat si khal sehla, a hmun ringring lo;
Amah cu a hlorál ding mi ramsa vek a si.
13 Himi hi mi-âpawlih lamzin a si ih,
An thusim pawmtu an tesinfapawlih lamzin a si. Selah
14 Anmahpawl cu tuu vek an si ih, Sheol hrangih ruat an si;
Thihnak cu an hrangah tuukhāltu vek a si ding;
Midingpawl in zing lamah an tlunah thuneihnak an nei ding;
Cule an mawinak cu Sheol ah eirál a si ding, cēnnak ding an nei lo ding.
15 Asinan Pathian in ka nunnak cu Sheol thiltitheinak ihsin i tlen ding,
Ziangahtile anih in i cohlang ding. Selah
16 Mi pakhat milian ih a can tikah,
A sungkua neihnunnak a pun tikah thinphâng hlah.
17 Ziangahtile a thih tikah zianghman a keng lo ding;
A ropitnak khal in a thlun lo ding.
18 A dam laiah amah le amah thlawsuah peaw hmansehla,
Ziangahtile nangmai hrangih na lam a tluan tikah mi in an lo thangṭhat ding,
19 Anih cu a palepawlih san minungpawl hnenah a feh ding;
Annih in tleu an hmu dah lo ding.
20 Theihthiamnak nei loih upat hlawh milai cu,
A hlorál ding mi ramsa vek a si.

50

Raithawinak Pawmtlak

Asaf-ih Sam.

1 A cak mi Pathian, Jehovah cu a ṭawngsuak ih,
Leilung hi nisuahnak ihsin nitlaknak tiang a ko.
2 Mawinak ṭha famkim Zion ihsin
Pathian cu a êngsuak.
3 Kan Pathian cu a ra ih, daiten a um lo;
A hmaiah mei a kāng vivo ih,
A kiangkap hmuahhmuah ah thlisia napin a hrang.
4 Anih in a mipawl thu a ṭhen theinak dingah,
Tlun lam ihsin vanpawl le leilung a ko.
5 «Keimah thawi, thawinak hmangih thukham a tuahtupawl,
Ka mithiangpawl ka hnenah ratlang uh,» tiin.
6 Vanpawl in Pathian dingfelnak an thăn,
Ziangahtile amah Pathian rori kha thuṭhentu a si. Selah.
7 Maw ka mipawl, ngai uh, thu ka sim ding,
Maw Israel, nanmah dokalhin thu ka theihter ding;
Keimah hi Pathian, nan Pathian ka si!
8 Ka hmaiih a tlaitluanih nan tuah mi,
Nan thawinakpawl asilole nan Meiur Thilhlănpawl ruangah ka lo kawk hai lo.
9 Nan inn ihsin câwpa ka la lo ding ih,
Nan ran rual lak ihsin nan mepapawl khal ka la lo ding.
10 Ziangahtile tupi sungih ramsa hmuahhmuah le,
Tlang a thawng a thawng parih a um mi rannungpawl khi ka ta an si.
11 Tlang parih a um mi vâte hmuahhmuah ka thei ṭheh,
Cule ramsa hmuahhmuah khal ka ta an si.
12 Ka rilrâwng hnik khal sehla, nang ka lo sim lo ding.
Ziangahtile leilung le a sungih um mi hmuahhmuah hi ka ta an si.
13 Câwpapawlih sa ei in,
Mepapawlih thi ka in ding maw?
14 Pathian hnenah lungawi thu simnak hlan uhla,
Cungnung Bik hnenah nan thutiampawl hlĕnsuak uh.
15 Harsat nikhua ah i ko aw;
Ka lo runsuak ding ih, nang in i sunlawih ding.
16 Asinan misualrál hnenah cun Pathian in,
«Ka sakhaw dānpawl thăn dingah, asilole ka thukham na kâ ih rel dingah
Ziang thuneihnak so na neih?
17 Nang cun thuzirhnak na hua ih,
Ka kamsuakthupawl na hnáwng.
18 Fifir na hmuh tikah, amah cu na rak lungkimpi men,
Uirepawl lak khalah na tel ve.
19 Na kâ kha thil ṭhalo lamah na pek ih,
Na lei in bumnak ruang a zĭng.
20 Na to ih na unau dokalhin na ṭawng;
Na nu rori ih fapa na relsia.
21 Hipawl na tuah ih, kei cu daiten ka um;
Kei cu nangmah thawi bangreptlang ah i ruat;
Asinan ka lo kawk ding ih,
Na tuah mipawl na hmaiah a sangsángten ka lo sim ding.
22 Nang Pathian hngilhtu, hihi ngaihtuah aw,
Culole ka lo thlekdip ṭheh ding ih,
Lo runsuaktu ding zohman an um lo ding.
23 Zokhal thangṭhatnak hlantu cun i sunlawih a si;
Cule dik zetih a nungtuih hnenah,
Pathian runsuahnak ka hmuh ding,» tiah a ti.

51

Ngaidamnak hrang Thlacam

Hla Hruaitu Hrang. Bathsheba a sualpi hnu, Profet Nathan a hnenih a rat hnuih, David-ih Sam.

1 Maw Pathian, na lainatduhdawtnak zulhin ka parah zahngai hram aw;
Na lainatnak nasazet zulhin,
Ka dānpahbălnakpawl thaihlo aw.
2 Ka mawhsualnak ihsin i sawpfai ṭheh awla,
Ka sualnak ihsin i thiangter aw.
3 Ziangahtile ka dānpahbălnakpawl ka thei ih,
Ka sualnak cu ka hmaiah a um ringring.
4 Na parah, nangmah par lawngah ka rak sual ih,
Na mithmuhah hi thil ṭhalo hi ka rak tuah a si.
Cutin nang cu na ṭawng tikah thiam na co,
Thu na ṭhen tikah sawihnăwm kâi lo na si.
5 Ngai hnik, kei cu mawhsualnak thawi hrinsuah ka si ih,
Sual thawn ka nu in i pai.
6 Ngai hnik, nang cun sung lamih thutak kha na duh ih,
Lang lo lamah nang in fimnak i theihter ding.
7 Hissop thawn i thianfai aw, cule ka thiang ding;
I khawlh aw, cule vur hnakin ka var ding.
8 Aipuannak le lungawinak ka hna in i theihter aw,
Cutin na khiah zo mi ruhpawl an ai a puang thei ding.
9 Ka sualpawl ihsin na hmai thup aw,
Cule ka mawhsualnak hmuahhmuah thaihlo aw.
10 Maw Pathian, keimah ah a thiang mi thinlung sersiam aw,
Cule ka sungah a hnget mi thinlung titharsal aw.
11 Na umnak ihsin i hlăwnhlo hlah awla,
Ka hnen ihsin na Thlarau Thianghlim lahlo hlah aw.
12 Na runsuahnak aipuannak ka hrangah thartersal aw,
Cule ṭhahnemngainak thinlung thawn in tungding aw.
13 Cun dānpahbăltupawl kha na lamzinpawl ka zirh hai ding,
Cule misualpawl kha nangmah lamah an lamlêt ding.
14 Maw Pathian, ka runsuahnak Pathian,
Thisen suah mawhnak ihsin i runsuak aw.
Cule ka lei in na dingfelnak thuhla aipuang zetin hla in a sak ding.
15 Maw Bawipa, ka hmurpawl áwng awla,
Ka kâ in nangmah thangṭhatnak a langter ding.
16 Ziangahtile raithawinak ah na di a riam lo, cuti si lo sehla cu ka lo hlan zo ding;
Meiur Thilhlăn khalah na lung a si lo.
17 Pathian duh mi thawiawknakpawl cu thinlung kekkuai a si,
Maw Pathian, a kekkuai mi le a siraw mi thinlung cu na hnáwng lo ding.
18 Na duhthusam vekin, Zion parah thil ṭha tuah aw;
Jerusalem hruangkulh dâwl aw.
19 Cun nang cu dingfelnak raithawinakpawl,
Meiur Thilhlăn le pumhlum Meiur Thilhlăn parah na lung a hmui ding;
Cule na biakṭheng parah câwpapawl an hlan ding.

52

Mibumhmang parih Thuṭhennak

Hla Hruaitu Hrang. Edom-mi, Doeh in Saul hnenah, «David cu Ahimelek-ih inn ah a feh,» tiih a sim tikih David-ih Maskil.

1 Maw micakpa, ziangahso thil ṭhalo parih tluang na khawn?
Pathian-ih lainatduhdawtnak cu sunnihlawh in a hmun.
2 Na lei in siatralnak khua a khâng,
Nâmte hriam vekin, mi bumnak lawnglawng a ṭuan.
3 Nang cun thil ṭha hnakin thil ṭhalo na duh,
Dingfelnak hnakin thuphan sim na duh. Selah
4 Nang mibumhmang lei,
Mi siatsuahnak ṭawngkam hmuahhmuah na duh.
5 Cuvekin Pathian in nang khal kumkhua daihin a lo siatsuah ding;
A lo lahlo ding ih, na cēnnak hmun ihsin a lo dirsuak ding,
Cule a nungdam mipawlih ram ihsin na hram ihsin a lo phawi ding.
6 Midingfelpawl khal in an hmu ding ih an ṭih ding,
Cule amah cu an hnihsan ding ih,
7 «Mi pakhat amai răwlhimnak ih Pathian hmang lo tupa a um,
Anih cun a lennak tampi kha a rinsan sawn,
Cule a sualralnak ah amah le amah a cakawter,» tiah an ti ding.
8 Asinan kei bélte cu Pathian inn sungih Olif thing hring vek ka si;
Pathian-ih lainatduhdawtnak kha kumkhuain kumkhua tiang ka rinsan ding.
9 Hipawl na tuah zo ruangah,
Ka lo thangṭhat kumkhua ding;
Cule na mithiangpawl umnak hmun ah na hmin ka hngak ding,
Ziangahtile cumi cu a ṭha.

53

Pathian Ngaihsaklonak Dĕmnak

Hla Hruaitu Hrang. ^aMahalath Hla Thlûk In, David-ih Maskil.

^a Mahalath: Natnak asilole riahsiatnak tinak a si men thei. Curuangah Ṭah hla tinak a si ding. Natnak asilole riahsiatnak tinak a si men thei. Curuangah Ṭahhla tinak a si ding.

1 Mi-â in a thinlung in,
«Pathian a um lo,» tiah a ti.
Annih cu an bawrhhlawh ih, fihnungza mawhsualnak an tuah;
Thil ṭha tuah zohman an um lo.
2 Pathian in van ihsin minung fātepawl a run zoh,
Thu theithiam ih Pathian hawltu zo tal an um maw ti hmu dingin.
3 An zaten an rak pial ṭheh;
Hmunkhatah mibawrhhlawh ah an cang;
Thil ṭha tuah zohman an um lo,
An um lo, pakhat hman.
4 Sang ei vekih ka mipawl ei thluhtupawl,
Pathian khal ko lo, mawhsualnak tuahtupawl in theihnak an nei lo maw si?
5 Ṭih ding umlonak hmun ah annihpawl cun nasazetin an ṭihṭih;
Ziangahtile Pathian in nangmah dokalhih hmunkhuartupaih ruhpawl a thehdarh ṭheh a si;
Anmahpawl cu Pathian in a hnawn hai ruangah,
Nang in mualpho ko na tuah hai.
6 Zion ihsin Israel runsuahnak ra suak sehla maw!
Pathian in a minungpawl vanneihnak a pekkirsal tikah,
Jakob cu lungawiaipuangin um sehla, Israel cu lungawi seh.

54

Băwmnak hrang Thlacam

Hla Hruaitu Hrang. Neginoth thawi Sak Ding. Zif-mipawl in, «Kan hnenah David a relh a si lo maw?» tiah Saul hnenih an ti laiih David-ih Maskil.

1 Maw Pathian, na hmin in i run aw,
Cule na cahnak in ka dikzia nĕmhnget aw.
2 Maw Pathian, ka thlacamnak hi thei aw;
Ka kamsuak ṭawngkampawl lamah na hna tŭn aw.
3 Mikhualpawl keimah dokalhin an tho ih,
Mipalbĕttupawl ka nunnak la dingin in hawl;
Annih cun an hmaiah Pathian an ret lo. Selah
4 Ngai hnik, Pathian cu i bawmtu a si;
Bawipa cu ka nunnak tungdingtupawl hnenah a um.
5 Ka ralpawl kha an ṭhat lo man a lehrūl hai ding.
Na thutak in anmah cu sâtcat hai aw.
6 Na hnenah keimai duhnak in thawinak ka hlan ding;
Maw Jehovah, na hmin ka thangṭhat ding, ziangahtile cumi cu a ṭha a si.
7 Ziangahtile amah in harsatnak hmuahhmuah lak ihsin i runsuak;
Cule ka mit in ka ralpawl parih a duhthusampawl a hmu zo.

55

Rualpi Rinumlonak ruangih Phunzainak

Hla Hruaitu Hrang. Neginoth thawi Sak Mi, David-ih Maskil.

1 Maw Pathian, ka thlacamnak lamah na hna tŭn aw,
Cule ka dilnak ihsin thup aw hlah aw.
2 I ngaithla awla, i sâng aw;
Ka vuivainak ah cawlhhahdam ka nei dah lo ih, ka hrûm ruangro.
3 Ka ralpawlih aw ruangah,
Misualrálpawlih palbĕtnak ruangah a si.
Ziangahtile ka parah harsatnak an run thlĕn ih,
An thinlingnak ah keimah in hua.
4 Ka sungah ka thinlung besia zetin a na ih,
Ṭihnungza thihnak in i nĕn.
5 Ṭihphannak le khurhnak ka parah a thleng,
Cule tuksumzain i khuh.
6 Kei in, «Thuro vekin thla nei ningna maw!
Ka zamhlo ding ih, ka cawlhahdam ding.
7 Ngai hnik, hlapi ah ka vâkvai ding ih,
Ramṭhing ah ka va tâp ta ding. Selah
8 Thlisia le thlipi lak ihsin,
Ka răwlhimnak lam panin ka hmanhmawh ding,» tiah ka ti.
9 Maw Bawipa, buaiter hai awla, an ṭawngpawl hnăwkter aw,
Ziangahtile khawpi sungah nunrawnnak le tawhawknak ka hmu.
10 A sun a zanin khawpi kulhnak parin an helkûal;
Mawhsualnak le harsatnak pawl khal khawpi sungah an um.
11 Siatralnak cu a sungah a um;
Mipalbĕtnak le bumawknak in a kăwtthler a suahsan lo.
12 Ziangahtile keimah i hmuhsuamtu hi ka ral a si lo;
Si sehla cu ka tuar thei tuk ding.
Keimah dokalhih khaisângaw ih i huatu khal a si lo;
Si sehla cu, a hnen ihsin ka relh ding nân.
13 Asinan cumi cu nangmah na rak si, ka tlukpi milai,
Ka hawipi le theih zet mi.
14 Pawlkawmawknak ṭha kan rak nei ih,
Mipi lakah Pathian inn ah kan rak fehtlang.
15 Thihnak in anmahpawl cu kai seh;
Nung cingin Sheol ah suk hai seh,
Ziangahtile sualralnak cu an cēnnak hmun ah le anmah lakah a um.
16 Kei lawngte cu, Pathian ka ko ding ih,
Jehovah in i runsuak ding.
17 Zan lam, zing lam le sun ah
Ka aihram ding ih, ka hrûm ding,
Cule anih in ka aw a ngaithla ding.
18 Anih in ka nunnak cu keimah in donak hmun ihsin remdaihnak thawn a tlen zo,
Ziangahtile in dotupawl an rak tam tuk.
19 Khuahlan ihsi a rak um ringring mi,
Pathian cun i ngaithla ding ih,
Anmah cu a zawnzaiter hai ding. Selah
Ziangruangahtile anmah ah thlengawknak a um lo ih,
Pathian an ṭihzah lo.
20 Anih in amah thawi remaw zetih a um mipawl parah a kut a thlak;
A thukham cu a rak pahbăl.
21 A kamsuak ṭawngkampawl cu hnawikhăl hnakin a nâl sawn,
Asinan a thinlung sungah ral do duhnak a um;
A kamsuakthupawl cu hriak hnakin a nem sawn,
Cutisikhalsehla, cupawl cu ralnâm zûk cia an si.
22 Na phurrit kha Jehovah parah ṭhum aw,
Cule anih in a lo dăwmcawi ding;
Midingfel cu hninter a siang dah lo ding.
23 Asinan Maw Pathian, nang cun anmahpawl kha siatralnak khur sungah na thlak hai ding;
Thisen suahhmangpawl le mi bumhmangpawl cu an san hrek hman an nung lo ding;
Asinan kei cu nangmah ka lo rinsan ding.

56

Tiduhdahnak Cān ih Pathian Rinsannak

Hla Hruaitu Hrang. ^aJonath Elem Rehokim hla thlûk in. Filisṭia-mipawl in Gath khua ih David an kaih laiih David-ih Mikhtam.

^a Jonath Elem: «Ram hla zetih um mi daiteih um thuro» ti mi hla thluk ih sak ding tinak.

1 Maw Pathian, ka parah zahngai hram aw, ziangahtile mi in in pál;
Sunnivu-in i do ih i palbĕt.
2 Ka ralpawl in sunnivu in dawi,
Ziangahtile i dotu an tam tuk, Maw Cungnung Bik.
3 Ṭihphâng ih ka um tikah,
Nangmah ka lo rinsan ding.
4 A kamsuakthu ka thangṭhat mi Pathian,
Pathian ah ka rinsannak ka ṭhum;
Ka ṭih lo ding.
Minung in ka parah ziangso an tuah thei ding?
5 Sunnihlawh in ka ṭawngkampawl an herkawi,
Keimah dokalhih an ruah mi hmuahhmuah cu thil ṭhalo an si.
6 Ka nunnak lâk tumih in bawh tikah,
Buainak an căwktho,
An bawhthup, ka kenehpawl an hminsin.
7 Mawhsualnak ihsin an luat pei maw?
Maw Pathian, miphunpawl hi na thinhengin thlu hai aw.
8 Ka vahvaihnakpawl na hminsin;
Ka mitthlipawl na thâwl sungah thăn aw;
Cupawl cu na cazual ah an um a si lo maw?
9 Na hnenih ka ausuah tikah,
Ka ralpawl an kirsal ding;
Himi hi ka thei, ziangruangahtile Pathian ka lamah a ṭang.
10 A kamsuakthu ka thangṭhat mi Pathian,
A kamsuakthu ka thangṭhat mi Jehovah,
11 Pathian ah ka rinsannak ka ṭhum zo;
Ka phâng lo ding.
Minung in ka parah ziangso a tuah thei ding.
12 Na hnenih thutiampawl in in ṭawn, Maw Pathian;
Na hnenah thangṭhatnakpawl ka hlan ding,
13 Ziangahtile nang in ka nunnak kha thihnak ihsin na runsuak zo.
Ka kepawl khal tlukrilhnak ihsin na kilkhawi,
Cutin Pathian hmaiih nunnak tleu ah ka feh ding.

57

Tiduhdahnak Cān ih Pathian Thangṭhatnak

Hla Hruaitu Hrang. Al-tashheth hla thlûk in. Saul hnen ihsi a tlânsuak ih pûk ih a um laiih David-ih Mikhtam.

1 Maw Pathian, ka parah zahngai hram aw, ka parah zahngai hram aw!
Ziangahtile ka nunnak in nangmah a lo rinsan;
Na thlazar hnuai daihnem hi ka răwlhimnak ah ka tuah ding,
Vanduainakpawl an lan hlanlo cu.
2 Cungnung Bik Pathian hnenah ka ausuak ding,
Ka hrangih thil hmuahhmuah i tisaktu Pathian hnenah.
3 Amah in van ihsin băwmnak a run thlah ding ih, i runsuak ding;
Keimah păl a tumtu kha a hmuhsuam ding. Selah
Pathian in a lainatduhdawtnak le a thutak a thlahsuak ding.
4 Ka nunnak cu kiosapawl lakah a um;
Eiráltu, minung fapapawl lakah ka um,
An ha cu fei le thálfung an si ih,
An lei cu ralnâm hriam an si.
5 Vanpawl tlunah khaisângaw aw, Maw Pathian;
Na ropitnak cu leilung hmuahhmuah ih tlunah um seh.
6 Annih in ka ke hrangah sûr an kăm;
Ka nunnak cu a kûn;
Ka hmaiah khur an lai;
An laih mi khur sungah anmah rori an tla. Selah
7 Ka thinlung hi a hnget a si, Maw Pathian, ka thinlung hi a hnget;
Hla ka sak ding ih ka thangṭhat ding.
8 Tho thlang aw, maw ka nunnak!
Tho thlang uh, cawngcing le ṭingṭang!
Ka ṭhang ding khawfingcat.
9 Maw Bawipa, mi nungpawl lakah ka lo thangṭhat ding;
Miphunpawl lakah na hnenah hla ka sak ding.
10 Ziangahtile na lainatduhdawtnak hi vanpawl thleng tiangin a ropi,
Cule na thutak cu khawdurpawl tiang.
11 Vanpawl tlunah khaisângaw aw, Maw Pathian;
Na ropitnak cu leilung hmuahhmuah ih tlunah um seh.

58

Phuba Lâksak dingih Thlacam

Hla Hruaitu Hrang. Al-tashheth hla thlûk in. David-ih Mikhtam.

1 Nannih daiteih umpawl, dingfelnak nan sim taktak maw?
Nannih minung fapapawl, dik zetin thu nan ṭhen maw?
2 Lamlam ah, nan thinlung ah sualralnak nan tuah;
Leilung parah nan kut ih nan tuah mi nunrawnnak kha khīng nan khai.
3 Misualrálpawl cu sūl sung ihsin ṭhenhran an si;
An suahthlak veten an fehpêng, thuphan an sim.
4 An tûr cu rul tûr vek a si;
Annih cu a hna a phit mi cawngawr hnaset vek an si.
5 Aizelthiampawlih aw,
Ziangtluk thiamin an cam khalle ngai cuang lo ding vek an si.
6 Maw Pathian, an kâ sungah an hápawl khiak aw!
Kiosa vanglai hopawl cu khiak aw, Maw Jehovah!
7 Anmahpawl cu tipi luang bangin luanghlo hai seh;
A thál a nawp tik khalah,
A thálfung zimpawl cu kiahter si hai seh.
8 A feh phahih a rál vivo mi kharkhem vek si hai seh,
Ni hmu lo, thi cia ih suak mi nausen vek si hai seh.
9 Nan leibelpawl in hlingbûr alh meihlum an theih hlanah,
A hring khal siseh, a ro khal siseh,
Anih in cupawl cu phusîng hmangin a semhlo hai ding.
10 Midingfelpa in phubalaknak a hmuh tikah lungawiaipuangin a um ding;
Misualrálpawlih thisen ah a ke a khawlh ding.
11 Cule mi in, «Midingfel hrangah lawmman a um taktak a si;
Leilung parih thuṭhentu Pathian a um taktak,» tiah an ti ding.

59

Runsuahnak hrang Thlacam

Hla Hruaitu Hrang. Al-tashheth hla thlûk in. Saul in mi a thlah ih, that dingih a inn ih an hawl laiih David-ih Mikhtam.

1 Ka ralpawl hnen ihsin i runsuak aw, Maw ka Pathian;
Keimah dokalhih thopawl hnen ihsin i hum aw.
2 Mawhsualnak tuahtupawl hnen ihsin i runsuak aw,
Cule thisensuahhmangpawl hnen ihsin i run aw.
3 Ziangahtile zoh hnik, annih cun ka nunnak an bawh;
Maw Jehovah, ka dānpahbălnak le ka sual ruangah si loin,
Keimah dokalhin micakpawl an tawngkhawmaw.
4 Ka mawhnak zianghman a um lo nân, an tlân ih an timlamaw aw.
Keimah bawm dingah tho awla, zoh aw.
5 Curuangah nang, Maw ralkap rualpawlih Pathian Jehovah, Israel Pathian,
Miphunpawl hmuahhmuah cawhkuan pe dingin tho aw;
Misualrál dānpahbălpawl zawih par hmanah zahngainak nei hlah aw. Selah
6 Zan lamah an ra kirsal,
Uico vekin an bo ih,
Khawpi kimvel hmuahhmuah an fáng.
7 Ngai hnik, an kâ in ṭawng sia an suah;
An lei ah ralnâmpawl an um;
Ziangahtile annih in, «Zo in so ngaithla ding?» tiah an ti.
8 Asinan Maw Jehovah, annihpawl cu na hnihsan hai;
Miphunpawl hmuahhmuah cu hnihsuaksainak ah na hmang.
9 Nangmah ka lo hngak ding, nang cu ka cahnak na si;
Ziangahtile Pathian cu ka khawkulh hnget a si.
10 Lainatduhdawtnak thawn ka Pathian in i hmuak ding;
Pathian in ka ralpawl parih ka saduhthah i hmuter ding.
11 Anmah cu that hlah aw, culole ka mipawl in an hngilh pang ding;
Maw Bawipa, kan ralphaw,
Amah cu na huham in ṭhekdarh hai awla,
Duaiter hai aw.
12 An kâ ih an tuah mi sual le an hmursuak ṭawngkampawl ruangah,
An hngalnak ah awkaw hai seh,
Cule mi an camsiatnak le thuphan an pernak pawl ruang khalah.
13 Na thinlingnak ah cemrálter hai aw, an um nawn lonak dingah, cemrálter hai aw;
Cule Pathian in Jakob a uk ti kha anmah theihter aw,
Leilung tlun hmuahhmuah tiangin. Selah
14 Cule zan lamah an ra kirsal,
Uico vekin an bo ih,
Khawpi kimvel hmuahhmuah an fáng.
15 Rawl hawl ah suk le so ah an vâktawi ih,
An khawp lo asile an bo.
16 Asinan kei cun na huham kha hla in ka sak ding;
A si, na lainatduhdawtnak thuhla ah zing lamah aipuang zetin hla ka sak ding;
Ziangahtile nang cu ka khawkulh hnget le,
Ka harsat ni ih ka răwlhimnak na si.
17 Maw ka cahnak, na hnenah thangṭhatnak hla ka sak ding;
Ziangahtile Pathian cu ka khawkulh hnget,
Lainatduhdawtnak i hmuhtu Pathian a si.

60

Rampi Nehnak Co dingih Thlacam

Hla Hruaitu Hrang. ^aShoshan Eduth hla thlûk in. Ara-naharamipawl le Siria-zobahmipawl thawn an doaw ih, Joab a kir ih, Edom-mipawl thawng hleihnih Ci Phaikuam ah a thah hnuih phuah, zirh ding mi David-ih Mikhtam.

^a Shoshan Eduth: «Thutheihternak Lily Par» ti mi hla thluk ih sak ding tinak.

1 Maw Pathian, nang in in hnáwng;
Nang in in khuaidarh;
Na lung a hmui lo;
Maw, in tungdingsal aw!
2 Nang in leilung hnîn ko na tuah,
Na kakter;
A kaknakpawl damtersal aw, ziangahtile a hnîn rero lai a si.
3 Na mipawl thil harsa na hmuh hai;
Buainak sabitzu in inter.
4 Nangmah a lo ṭihzahtupawl hnenah thantar na rak pe,
Cutin thutak ruangah cumi cu lăngter a si ding.
5 Cutin na duhdawt mipawl cu runsuah an si ding,
Na vawrh lam kut in run awla, in ngaithla aw.
6 Pathian in a hmun thianghlim ihsin,
«Lungawiaipuangin ka um ding;
Shekem cu ka ṭhen ding ih,
Sukkoth Phaikuam cu ka tah ding.
7 Gilead cu ka ta a si, Manasseh cu ka ta a si;
Efraim khal ka lu hrangah lukhuh a si;
Judah cu ka siangpahrang kianghrăwl a si.
8 Moab cu ka kut khawlhnak khēng a si;
Edom parah ka kedam ka hlăwn ding;
Filisṭia cu nehnak in ka auhhnawh ding!» tiah a ti.
9 Kulhhnget nei khawpi ah zo in so i fehpi ding?
Edom ah zo in i hruai ding?
10 Maw Pathian, in hnáwngtu cu nangmah na si lo maw?
Maw Pathian, kan ralkappawl zawngih fehsuak lo tu cu nangmah na si lo maw?
11 Kan harsatnak ah băwmnak in pe aw,
Ziangahtile minung ih băwmnak cu san a tlai lo.
12 Pathian thawngin ralṭha zetin kan tuah ding,
Ziangahtile kan ralpawl páltu ding cu amah a si.

61

Pathian Kilvennak Rinsan Ngamnak

Hla Hruaitu Hrang. Ṭingṭang thawi Sak Ding. David-ih Sam.

1 Maw Pathian, ka aunak ngaithla aw;
Ka thlacamnak lamah na hna tháwng aw.
2 Ka thin a pit tuk tikah,
Leilung dĕng ihsin ka lo ko;
Keimah hnakih a sângsawn mi lungpi lamah i hruai aw.
3 Ziangahtile nang cu ka hrangah beunak na si,
Ral lak ihsin dawlsâng hnget na si.
4 Na biakbûk sungah ka um kumkhua ding;
Na thlapawlih beunak ka rinsan ding. Selah
5 Ziangahtile maw Pathian, nang cun na hnenih ka thutiampawl hna in na thei;
Na hmin ṭihzahtupawlih co mi ro i pe.
6 Nang in siangpahrangih nun na sauter ding,
A dam kumpawl cu san tampi vek an si ding.
7 Anih cu Pathian hmaiah kumkhuain a um ding.
Amah kilhim theitu ding lainatduhdawtnak le thutak timlam aw!
8 Na hmin thangṭhatnak hla kumkhuain ka sak ding,
Cutin ni tin ka thutiampawl ka tuahsuak ding.

62

Pathian Rinsannak Hla

Hla Hruaitu Hrang. ^aJeduthun Hrang. David-ih Sam.

^a Jeduthun: Jeduthun hi Temple ih hla hruaitupawl lakih pakhat David in khawm hruaitu dingih a hril mi a si (1San 16:41-42 zoh aw).

1 Thungaiten ka nunnak in daiten Pathian a hngak;
Amah hnen ihsin ka runsuahnak a ra.
2 Amah lawng hi ka lungpi le ka runsuahnak a si;
Amah cu ka khawkulh hnget a si;
Nasatuk cun hninter ka si lo ding.
3 Amah that dingin ziang tik tiang so mi pakhat cu nan do ding, nannih nan zate in,
Himi a tlu zik mi phăr le a hnîn rero mi hruang hi?
4 Annih cun a dinhmun sâng ihsi dirhthlak ding lawng an rawnaw;
Thuphan per hi nuam an ti zawng a si;
An kâ in thlawsuah an pe,
Asinan an sung lam cun an camsiat. Selah
5 Maw ka nunnak, daiten Pathian lawng hngak aw,
Ziangahtile ka ruahsannak cu amai hnen ihsin a si.
6 Amah lawng hi ka lungpi le ka runsuahnak a si;
Amah cu ka khawkulh hnget a si;
Hninter ka si lo ding.
7 Pathian ah ka runsuahnak le ka ropitnak a ṭhumaw;
Ka cahnak lungpi le,
Ka răwlhimnak cu Pathian a si.
8 Nannih minungpawl, ziang tik lai khalah amah cu rinsan uh;
A hmaiah nan thinlung thlebung uh;
Pathian cu kan răwlhimnak a si. Selah
9 Thungaiten, dinhmun niam minung fapapawl khal zianghmanlo an si,
Dinhmun sâng minung fapapawl khal bumawknak an si;
Anmah kha cuaithlai si hai sehla,
An zaten tikhu hnakin an zângsawn ding.
10 Mipalbehnak kha rinsan hlah awla,
Misuamnak ah ṭhathnemnak nei lo ruahsannak nei fawn hlah;
Lennak a karh asile,
Cupawl ah na thinlung ret hlah.
11 Pathian in vei khat a ṭawng zo,
Himi hi cu vei hnih hna in ka thei:
Huham cu Pathian ta a si ti mi hi.
12 Lainatduhdawtnak cu na ta a si, Maw Bawipa;
Ziangahtile mi kip anmai ṭuan mi bangtuk cio in na lehrūl a si.

63

Pathian Umpitnak ih Thlangamnak

Judah Ramṭhing ih a Um Laiih David-ih Sam.

1 Maw Pathian, nang cu ka Pathian na si;
Tuan teah ka lo hawl ding;
Ka nunnak in nangmah a lo hâl a si;
Ramro le
Tidai umlonak tihālnak ram ah,
Ka taksa in a lo ngai.
2 Cutin hmun thianghlim sungah ka rak lo hmu,
Na huham le na ropitnak zoh dingah.
3 Na lainatduhdawtnak cu nunnak hnakih a ṭhatsawn ruangah,
Ka hmur in a lo thangṭhat ding.
4 Cutin ka nunsung hmuah na hnenah lungawi thu ka sim ding;
Na hmin in ka kut ka phar ding.
5 Thlik le thau thawi tlăi vekin ka nunnak cu a tlâi ding ih,
Ka kâ in a aipuang zet mi hmur thawn a lo thangṭhat ding.
6 Ka ihkhun parih ka lo máng tikah,
Zan sentari kilpawl ah na thuhla ngunngaih zetin ka ngaihtuah a si.
7 Ziangruangahtile nang cu i bawmtu na si;
Na thlazar tăngah lungawiaipuangin ka um ding.
8 Ka nunnak in a lo kăwp;
Na vawrh lam kut in i tungding.
9 Asinan ka nunnak siatsuah dingih a hawltupawl cu,
Leilung tăng lamah an vung feh ding.
10 Annih cu ralnâm in an tlu ding;
Cinghniapawlih covo an si ding.
11 Asinan siangpahrang cu Pathian ah lungawiaipuangin a um ding;
Amah sālih sesămtu cu a ropi ding;
Asinan thuphan simtuih kâ cu cīpter a si ding.

64

Kilvennak hrang Thlacam

Hla Hruaitu Hrang. David-ih Sam.

1 Maw Pathian, ka vuivainak ah, ka aw ngai aw;
Ral ṭihnak ihsin ka nunnak humhim aw.
2 Misualrálpawlih phiarthupnakpawl ihsin i thup aw,
Mawhsualnak tuahtupawlih helnak ihsin.
3 An lei cu ralnâm vekin an tâthriam ih,
An thálfungpawl an tĭn bangin an ṭawngkam khâpawl an tĭn,
4 Cutin sawihnăwm kâi lo pawl hmun thup ihsi an sai theinak dingah a si;
Hmakhatteah amah cu an sai ih an ṭih lo.
5 Thil ṭhalo tumnak ah anmah le anmah tha an peaw;
A thupten thangkamnak thu an rel;
Annih in, «Zo in so anmah cu a hmu ding,» tiah an ti.
6 Mawhsualnakpawl tuah dingin khua an khâng:
«A ṭha lo mi khawkhannak kha famkim zetin kan tawlrel zo,» tiah an ti.
Sung lam ruahnak le minung thinlung cu an thûk veve a si.
7 Asinan Pathian in thálfung in a sai hai ding;
Hmakhatteah hriam an si ding.
8 Cutin annih in amah cu an tluter ding;
Anmai lei in anmah a dokalh;
A hmutu hmuahhmuah in an tlanhlohsan ding.
9 Mi hmuahhmuah in an ṭih ding ih,
Pathian thil ti mi an thăn ding;
Cule a tuah mi kha an ruat ding.
10 Midingfel cu Jehovah ah a lung a awi ding ih, amah a rinsan ding.
Cule thinlung dĭng mipawl hmuahhmuah cu an tluangkhâwng ding.

65

Leilung Malsawmnak ruangih Thangṭhatnak

Hla Hruaitu Hrang. David-ih Sam. Hla.

1 Thangṭhatnak in, Maw Pathian, Zion ah a lo hngak.
Na hnenah thutiam tuahsuak a si ding.
2 Maw nang, thlacam ngaithlatu,
Na hnenah milai hmuahhmuah an ra ding.
3 Mawhsualnakpawl in i neh;
Kan dānpahbălnak thuhla bélte ah cun,
Nang in sualkhuhthawinak na pe hai ding.
4 Na sūmtualrawnpawl ih um dingah,
Nangmah lo naih dingih na hril mi cu, mithlawsuak a si.
Na temple thianghlim, na inn ih thil ṭhapawl in kan tlăi ding.
5 Nang in a maksak mi thil tipawl hmangin dingfelnak in in sâng, Maw kan runsuahnak Pathian,
Nang cu tifinriat hlatbik le
Leilung dĕng hmuahhmuah ih rinsan mi na si.
6 Amai cahnak in tlangpawl a dĭnhnget,
Huham ih thuamawin.
7 Tifinriatpawlih thâwm na daiter,
An tisuarletpawlih thâwm le,
Miphunpawl buaihnăwknak khal.
8 A hlatnak bikih cêngpawl khal in na hminsinnakpawl an ṭih;
Zing lam le sîm lam khal lungawiaipuang ko na tuah.
9 Leilung na vehvai ih, tidai na tawih, nasazetin na ṭhatter;
Pathian tiva cu tidai in a khat;
Minung hrangah thlairawl na pe,
Ziangahtile leilung cu nangmah in na timtuah.
10 Leilehnak pâwngpawl cu tidai ciap zetin na pe,
Lei lehkuarpawl na rualter;
Ruah in cumi cu na nemter,
A thlai ṭopawl thlawsuah na pe.
11 Kum cu na ṭhatnak na khumter ih,
Na lêngzinpawl ah thlairawl an fûan.
12 Ramṭhing ran tlannak hmun ah an fûan ih,
Tlangpawl an thuamaw, lungawiaipuannak in.
13 Ran tlannak hmun ah rante rual an khat;
Phaikuampawl khal thlairawl in a khuh ṭheh.
Aipuangin an au ih, hla khal an sak.

66

Pathian Ṭhatnak ruangih Thangṭhatnak

Hla Hruaitu Hrang. Sam.

1 Leilung hmuahhmuah, Pathian hnenah aipuangin au uh!
2 A hmin ropitnak cu hla in sak uh;
A thangṭhatnak cu ropiter uh.
3 Pathian hnenah,
«Na thil tipawl hi ziangtluk maksak so an si!
Na huham a natsattuk ruangah,
Na ralpawl na hnenah an ra tlulut ding.
4 Leilung hmuahhmuah in nangmah an lo be ding ih,
Na hnenah thangṭhatnak hla an sak ding;
Na hmin thangṭhatnak hla an sak ding,» tiin ti uh. Selah
5 Ra uhla, Pathian thil tipawl hi zoh hnik uh;
Minung fapapawl hrangih a thil tipawl a maksak a si.
6 Tifinriat kha leiro ah a canter;
Tiva cu an ke in an tán.
Cuih hmun ah amah ah lungawiaipuangin kan um ding.
7 Anih in a huham thawn kumkhuain a uk;
A mit in miphunpawl a zoh;
Helhmangpawl kha khaisâng aw hlah hai seh. Selah
8 Maw nannih miphunpawl, kan Pathian thangṭhat uh!
Amah thangṭhatnak aw kha thangter uh,
9 Kan nunnak a kilhim ih, ka ke tlûk ding a siang lo.
10 Ziangahtile nang in kanmah in hniksak, Maw Pathian;
Ngun erfai vekin nang in in erfai.
11 Nang in sûr sungah in hruailut;
Kan zāng ah zăwnzaihnak na ret.
12 Kan lu parah minungpawl na toter hai.
Tidai le meisa kan pahtlăng;
Asinan nang in hnianghnarnak hmun ah in fehpi.
13 Na inn sungah Meiur Thilhlăn thawn ka lut ding;
Ka thutiampawl na hnenah ka hlĕnsuak ding,
14 Harsatnak ka tuar laiah,
Ka hmur ih a sim mi le ka kâ ih a ṭawngsuak mipawl cu.
15 A thau mi ṭilva-ih Meiur Thilhlănpawl ka lo hlan ding,
Tuucang meiur rimthaw thawn;
Câwpapawl le mecangpawl ka hlan ding. Selah
16 Nannih Pathian a ṭihzahtupawl hmuahhmuah ra uhla, ngai uh,
Ka nunnak hrangih a rak tuah mi ka thăn ding.
17 A hnenah ka kâ in ka au ih,
Amah cu ka lei in ka cawimawi.
18 Ka thinlung ah sualnak ka ngaihsak asile,
Bawipa in i ngaithla lo ding.
19 Asinan Pathian cun i ngaithla rori a si;
Ka thlacamnak aw lamah a hna a tháwng.
20 Pathian cu thangṭhat si ko seh,
Ka thlacamnak hnáwng lo ih,
Ka hnen ihsin a lainatduhdawtnak khal lahlo lo tu cu!

67

Pathian Thangṭhat dingih Miphunpawl Kawhnak

Hla Hruaitu Hrang. Neginoth thawi Sak Ding. Sam. Hla.

1 Pathian kan parah zahngai sehla, in thlawsuah seh,
Cule kan parah a mithmai run êngter seh, Selah
2 Cutin leilung parah na lamzin cu theih a si ding,
Miphunpawl hmuahhmuah hnenah na runsuahnak khal.
3 Miphunpawl in lo thangṭhat hai seh, Maw Pathian;
Mi hmuahhmuah in lo thangṭhat hai seh.
4 Miphunpawl cu lungawi hai sehla, aipuan ruangah hla sak hai seh!
Ziangahtile nang in minungpawl kha dingfel zetin thu na ṭhen ding ih,
Leitlun ah miphunpawl kha na uk ding. Selah
5 Miphunpawl in lo thangṭhat hai seh, Maw Pathian;
Mi hmuahhmuah in lo thangṭhat hai seh.
6 Cun leilung in a thlairawl a rahsuah;
Pathian, kanmai Pathian rori in in thlawsuah.
7 Pathian in in thlawsuah ih,
Leilung tlun mi hmuahhmuah in amah cu an ṭihzah.

68

Thangṭhatnak le Lungawi Thu Simnak

Hla Hruaitu Hrang. David-ih Sam. Hla.

1 Pathian cu tho seh,
A ralpawl ṭekdarh hai seh;
Amah huatupawl khal a hmaiah tlânse hai seh.
2 Meikhu sĕmhloh a si vekin,
Annih khal semhlo hai aw;
Khuailûl cu meisa kiangih a zŭp vekin,
Misualrálpawl cu Pathian hmaiah hlorál hai seh.
3 Asinan midingfelpawl cu lungawi hai seh;
Pathian hmaiah aipuang hai seh;
A si, nasazetin aipuang hai seh.
4 Pathian hnenah hla sak uh, a hmin thangṭhatnak hla sak uh;
Khawdurpawl parih a totu cu cawimawi uh,
A hmin cu Jehovah a si ih,
A hmaiah lungawiaipuangin um uh.
5 A hmun thianghlim ih a um mi Pathian cu,
Pa nei lo pawlih pa a si, nuhmeipawl humtu a si.
6 Pathian in mipâkpawl cu sungkua ah a dĭn;
Thawngtlapawl kha hmuingilnak ah a hruai;
Asinan helhmangpawl cu leicar ah an cêng.
7 Maw Pathian, na mipawl hmaiih na feh laiah le,
Ramṭhing pahtlăng ih na feh laiah, Selah
8 Leilung a hnîn;
Vanpawl khal in Pathian hmaiah ruah an surter;
Sinai rori khal Pathian hmaiah, Israel Pathian hmaiah a hnîn.
9 Nangmah in ruah tampi na surter, Maw Pathian;
A car laiah na co mi ro na nĕmhnget.
10 Na mipi-umkhawm cu cumi sungah an cêng;
Maw Pathian, nang in na ṭhatnak ihsin mifarahpawl na câwm.
11 Bawipa in thu a pe;
Cumi lungawiumza thuthang phuangtu nunaupawl cu an tam zet:
12 Ralkappawl hotu siangpahrangpawl cu an tlânsia, an tlânsia,
Cule inn ih a um mi nunau in ralthillawnpawl a zem.
13 Tuu rual lakih nan zau khal asile,
Nannih cu a thlapawl ngun thawi tuam mi,
A thla hmulpawl sui aihre thawi tuam mi thuro vek nan si.
14 Ziangkimtithei in cumi hmun ih siangpahrangpawl a ṭhekdarh tikah,
Zalmon ih vur vekin an var.
15 Pathian tlang cu Bashan tlang a si;
Bashan tlang ah cun tlang zim tampi a um.
16 Nannih tlang zim tampi nei tlangpawl, ziangruangah so iksiknak thawi nan thin a ṭeu?
Himi cu Pathian in a cênnak dingih a saduhthah mi tlang a si;
A si, Jehovah cu cumi ah kumkhuain a cêng ding.
17 Pathian ránglêngpawl cu siar cawk lo an si,
Thawng tampi an si;
Bawipa cu an lakah Sinai ih a um vekin, a Hmun Thianghlim ah a um.
18 Jehovah Pathian cu cutawk hmun ih a cēn theinak dingah,
Nang cu a sannak ah na rak kai,
Ralkaihpawl cu ralkaih ah na hruai;
Sáltāngpawl cu sál ah a hruai;
Minungpawl lakah thilpek tampi na ngah,
Mihĕlpawl hnen ihsi khalin.
19 Ni tin ih kan phurrit in phurhsaktu,
Bawipa cu thangṭhatin um seh,
Kan runsuahnak Pathian cu! Selah
20 Kan Pathian cu runsuahnak Pathian a si;
Cun Jehovah Bawipa ah thihnak ihsin tlansuahnak a um.
21 Asinan Pathian in a ralpawlih lu a tuahmawh ding,
A mawhsualnak ih a feh vivo tu sám i khat lu um cu!
22 Bawipa in, «Bashan ihsin ka hruaikirsal ding,
Anmah cu tifinriat thûknakpawl ihsin ka hruaikirsal hai ding,» tiah a ti;
23 Cutin anmahpawl kha na ke in thisen suak ko na pál thei ding ih,
Na uicopawlih lei in na ralpawl lak ihsin covo an nei thei ding.
24 Annih in na feh lai an lo hmu, Maw Pathian,
Ka siangpahrang, hmun thianghlim lam pan ih, ka Pathian ih feh lai cu.
25 Hlasaktupawl hmaiah an feh, awnmawi tumtupawl in an thlun;
An lakah khuangte tumtu falapawl an feh.
26 Mipi-umkhawmnak ah Pathian thangṭhat uh,
Israel tihna ihsin, Bawipa cu.
27 Anmah hruaitu cu, nautabik Benjamin a si,
Judah tlangsuakupapawl le an hopawl in an thlun,
Zebulun tlangsuakupapawl le Naptali tlangsuakupapawl thawn.
28 Nan cahnak dingah nan Pathian in thu a pe;
Maw Pathian, kan hrangih na tuah mipawl caktersin aw.
29 Jerusalem ih na temple ruangah,
Siangpahrangpawl in na hnenah laksawngpawl an run keng ding.
30 Câlte kungpawl lakih a tlanglêng mi ramsapawl,
Minungpawlih câwpapawl le câwpa no rualpawl kawk aw,
Mi tin an ngun tangka nawi thawi an păwk hlan tiang.
Ral doawknak nuam titupawl khal ṭhekdarh ṭheh aw.
31 Izip ram ihsin palaipawl an ra ding;
Kush khal in Pathian hnenah zamrang zetin a bân a phar ding.
32 Leitlun lalrampawl, Pathian hnenah hla sak uh;
Maw, Bawipa hnenah, thangṭhatnak hla sak uh. Selah
33 A sângbik van ih to, khuahlan lai ihsin a um mi amah hnenah cun!
Ngai hnik, amah in a aw a suah, a nasazet mi aw cu.
34 Pathian cahnak phuang uh;
A ṭhat hleicenak cu Israel parah a si ih,
A cahnak cu khawdurpawl ah a um.
35 Maw Bawipa, nang cu na hmun thianghlimpawl ah na maksak.
Israel-mipawlih Pathian cu a mipawl hnenih cahnak le huham petu a si. Pathian cu thangṭhatin um seh!

69

Runsuahnak hrang Thlacam

Hla Hruaitu Hrang. ^aShoshannim Hla Thlûk In. David-ih Sam.

^a Shoshannim: 45:0 simfiangnak zoh aw.

1 I run aw, Maw Pathian!
Ziangahtile tipi in ka nunnak a cîmpil zik.
2 Ke ṭhumnak um lo,
Cirhdûp sungah ka pil;
Tisuarpawl ih in cîmpilnak hmun,
Tipi thûk zet sungah ka um.
3 Ka ṭahnak ah ka cau;
Ka dang a car;
Ka Pathian ka hngah laiah, ka mit a kham.
4 Săn um lopiih i huatupawl hi ka lu parih sám hnakin an tamsawn;
Diklo zetih i siatsuah duhtu
Ka ralpawl cu an cak tuk;
Ka rûk lo mi thil,
Ka rulhsal thotho a ṭul.
5 Maw Pathian, ka atnak na thei;
Ka sualpawl cu na hnen ihsin thuh an si lo.
6 Nangmah a lo hngaktupawl cu, Maw ralkap rualpawlih Bawi Jehovah
Keimah ruangah ningzakin um hram hlah hai seh;
Nangmah a lo hawltupawl cu keimah ruangah an thinbuai hram hlah hai seh, Maw Israel Pathian.
7 Nangmah ruangah hmuhsuamnak ka táwng;
Ningzahnak in ka hmai a tuam.
8 Ka unaupawl hnenah mikhual ah ka cang ih,
Ka nuih fātepawl hnenah khawtluang mi ah;
9 Na inn hrangih ṭhahnem ka ngainak in i ei thluh ih,
A lo hmuhsuamtupawlih mi hmuhsuamnak cu ka parah a tla.
10 Rawlulhnak thawi ka thinlung ih ka ṭah tikah,
Cumi cu ka hminsiatnak ah a cang.
11 Ka sinfen dingah buri ka rak tuah fawn;
An hrangah an hnihsuahsainak ah ka cang.
12 Kăwtka ih topawl in keimah dokalhin an ṭawng ih,
Keimah cu zuripawlih hla ka si.
13 Asinan Maw Jehovah, kei lawngte cu,
Tikcu remcâng cān ah na hnenah thla ka cam a si;
Maw Pathian, na lainatduhdawtnak ropi zet ruangah,
Na runsuahnak thutak thawn i ngaithla aw.
14 Cirhdûp lak ihsin i runsuak aw,
I pilter hram hlah aw;
Keimah huatupawl lak ihsin runsuah si hram ning,
Tipi thûk zet sung ihsi khalin.
15 Tilik in i cîmpil hlah seh,
Ti thûk khal in i dawlh hlah seh;
Cule khur khal in a kâ sungah i hmawm hlah seh.
16 I ngaithla aw, Maw Jehovah, ziangahtile na lainatduhdawtnak cu a ṭha a si;
Na lainatnak nasatak zulhin ka hnen lamah ra hawikir aw.
17 Cule na siahhlawh hnenin na hmai thup hlah aw,
Ziangahtile harsatnak ka táwng;
Zamrang zetin i ngai aw.
18 Ka nunnak run naih awla, tlen aw;
Ka ralpawl ruangah i runsuak aw.
19 In hmuhsuamnak, ka ningzahnak le ka hminsiatnak pawl na thei;
I dotupawl hmuahhmuah cu na hmaiah an um.
20 Hmuhsuamnak in ka thinlung a kûaiter ih,
Ka dam lo;
Zangfahnak ka hawl nân, ka hmu lo;
Cule hnemtu ding ka hawl, asinan zohman ka hmu lo.
21 Ka rawl dingah thil khâ in pe ih,
Ka ti a hāl tikah sabit ti thûr in dingah in pek.
22 An cabuai kha an hmaiah tháng ah cang sehla,
An hlawhtlinnak cu, an awkawknak ah.
23 Khua an hmuh theilonak dingah, an mit thim sehla;
An tâi hnîn tlaitluan seh.
24 Na aithawknak an parah burh awla,
Na thinheng sosa in anmah dawiman seh.
25 An cēnnak hmun cu lawnglakin um seh;
An thlampawl ah zohman um hlah hai seh.
26 Na vuak cia mipawl kha annih in an tiduhdah ih,
Na tuahmawh cia mipawlih thinnatnak thu an rel.
27 An mawhsualnak ah mawhsualnak bêt aw,
Cule na dingfelnak ah lut hlah hai seh.
28 A nung mipawlih cazual sung ihsin anmah cu phiahhlo si hai sehla,
Midingfelpawl zawngih ngan si hlah hai seh.
29 Asinan kei cu mifarah le miriahsia ka si;
Maw Pathian, na runsuahnak in hmun sâng ah i ret seh.
30 Pathian hmin cu hla thawn ka thangṭhat ding,
Cule lungawi thu simnak thawn amah cu ka cawimawi ding.
31 Himi hin, Jehovah cu, kipawl le ketinpawl a nei mi,
Câwcang le câwpa hnakin a lung a hmuiter sawn ding.
32 Mităngdawrpawl in cumi cu an hmu ding ih an lung a awi ding;
Cule nannih Pathian a hawltupawl, nan thinlung a thar ding.
33 Ziangahtile Jehovah in mifarahpawl a ngaithla hai ih,
Sáltangpawl a hmuhsuam lo.
34 Van le leilung in amah thangṭhat hai seh,
Tifinriatpawl le an sungih tlanglêng mi pauhpauh khal in.
35 Cutawk ih an cēn ih an lâk theinak dingah,
Pathian in Zion a runsuak ding ih,
Judah khawpipawl a dĭn ding.
36 A siahhlawhpawlih tesinfapawl khal in cumi cu ro ah an co ding,
Cule a hmin a duhdawtupawl cu cu tawkah an cêng ding.

70

Runsuahnak hrang Thlacam

Hla Hruaitu Hrang. David-ih Sam. Mansuahsalternak Hrang.

1 Maw Pathian, i runsuak dingin hmanhmawh aw!
Maw Jehovah, keimah bawm dingah hmanhmawh aw.
2 Ka nunnak hawltupawl hi
An ningzakin an thinbuai seh;
Hriam ka si ding duhtupawl hi
Kirsal in buai hai seh.
3 «A ze, a ze,» titupawl cu,
An ningzah ruangah kirsal hai seh.
4 Nangmah a lo hawltupawl cu nangmah ah aipuang le lungawiin um hai seh;
Cule na runsuahnak a duhtupawl in,
«Pathian cu cawimawiin um seh!» tiah ti tlaitluan hai seh.
5 Asinan kei cu mifarah le mitlasam ka si;
Maw Pathian, ka hnenah hmanhmawh zetin ra aw!
Nang cu i bawmtu le i runsuaktu na si;
Maw Jehovah, muang hlah aw.

71

Runsuahnak Lungpi Pathian

1 Maw Jehovah, nangmah ka lo rinsan;
Ningzahin um dah hram hlah ning.
2 Na dingfelnak in i runsuak awla, i tlânsuakter aw;
Ka lamah na hna tháwng awla, i run aw.
3 Ka răwlhimnak hnget si aw;
Cuih hmun ih tlaitluan kan rat theinak dingah;
Keimah run dingah thupek na pe zo,
Ziangahtile nang cu ka lungpi le ka kulhhnget na si.
4 Maw ka Pathian, misualrálpawl kut ihsin le,
Midingfel lo pawl le minunrâwngpawl kut ihsin i runsuak aw.
5 Ziangahtile Maw Bawipa Jehovah, nang cu ka ruahsan mi na si;
Nang cu ka no lai ihsin ka rinsannak na si.
6 Ka suah ihsin nangmah cu i dăwmcawitu na si;
Nang cu ka nuih sūl sung ihsi i lasuaktu na si.
Ka thangṭhatnak cu nangmah na si tlaitluan ding.
7 Mi tampi hrangah hminsinnak ah ka cang,
Nang cu ka răwlhimnak hnget na si.
8 Ka kâ hi nangmah thangṭhatnak thawn a khat,
Sunnivu-in na sunlawinak thawn.
9 Ka tar tikah i hnáwng hlah aw;
Ka tha a ṭum tikah i thlauthla hlah aw.
10 Ziangahtile ka ralpawl in keimah dokalhin an ṭawng;
Cule ka nunnak hngakih bawhtupawl khal thu an rawnawkhawm.
11 «Amahpa hi Pathian in a thlauthla zo;
Dawi uhla, amah cu kai uh, ziangahtile amah runsuaktu ding zohman an um lo,» tiah an ti.
12 Maw Pathian, keimah thawn a hlatnak ah um hlah aw;
Maw ka Pathian, i bawm dingah hmanhmawh aw.
13 Ka nunnak dodaltupawl cu
Thinbuaiin le cemrálin um hai seh;
Hriam si dingih
I hawltupawl cu hminsiatnak le ningzahnak thawn khat hai seh.
14 Asinan kei cun ka ruahsan tlaitluan ding ih,
Nangmah ka lo thangṭhat sinsin ding.
15 Ka kâ in na dingfelnak a sim ringring ding ih,
Sunnihlawh in na runsuahnak khal,
Ziangahtile cupawl cu ka tah cawk hai lo.
16 Bawipa Jehovah cahnak in ka feh ding;
Na dingfelnak, nangmai ta lawng ka rel ding.
17 Maw Pathian, ka no lai ihsin i rak zirh ih,
Tuihni tiang na mangbangza thil tipawl ka thăn.
18 Hih san minung hnenih na cahnak ka thăn hlanlo,
A ra suak lai ding mi mi kip hnenih na huham ka thăn hlanlo cu,
Maw Pathian, ka tar ih ka sám a par tik khalah,
I thlauthla hlah aw.
19 Cuihhleiah na dingfelnak cu, Maw Pathian, a sâng tuk,
Nang thil nasazet tampi tuahtu;
Maw Pathian, nangmah vek zo so um?
20 Nang, harsatnak le vansannak tamtak i hmuhtu cun,
I nungtersal ding ih,
Leilung thûknakpawl ihsin i lasuaksal ding.
21 Ka ropitnak na ṭhangter sinsin ding ih,
A kil kip in i hnemsal ding.
22 Cuihtlunah cawngcing thawn ka lo thangṭhat ding,
Maw ka Pathian, na rinumnak cu!
Maw Israel-ih Mi Thianghlim,
Na hnenah ṭingṭang thawn hla ka sak ding.
23 Na hnenih hla ka sak tikah, ka hmur cu lungawiaipuang zetin a um ding,
Cule nangmah ih na tlen zo mi ka nunnak khal.
24 Ka lei khal in na dingfelnak sunnivu-in a rel ding;
Ziangahtile hriam dingih
I hawltupawl cu an thin a buai,
Ziangahtile annih cu mualpho ko tuah an si.

72

Lamhruainak hrang Thlacam

Solomon-ih Sam.

1 Maw Pathian, thuṭhenthiamnak siangpahrang pe aw,
Cule na dingfelnak kha siangpahrang fapa hnenah.
2 Anih in na mipawl kha dingfelnak thawn thu a ṭhen ding ih,
Na mifarahpawl kha diknak thawn.
3 Tlangpawl in mipi hnenah daihnak an thlĕn ding ih,
Tlang fatepawl in dingfelnak.
4 Anih in mipi lakih mifarahpawl hnenah diknak a thlĕn ding;
Mitlasampawlih falepawl a run ding ih,
Mipalbĕttupawl cu a khuaidip ṭheh ding.
5 Ni le thlapi an ṭunghmun sung,
San hmuahhmuah tluansuakin,
Annih in an lo ṭih ding.
6 Amah cu vah mi hrampi parih sur mi ruahti vek le,
Leilung tidai petu ruahhmai vekin a rung suk ding.
7 A san sungah, midingfel cu a ṭhangso ih,
Thlapi a um nawn lo tiangin,
Hnangam zetin a um.
8 Tifinriat ihsin tifinriat tiang le,
^aTiva ihsin leilung netnak tiang a uk ding.
9 Ramṭhing ih a cêng mipawl cu a hmaiah an kûn ding ih,
A ralpawl in leivut an liak ding.
10 Tarshish le tikulh siangpahrangpawl in laksawngpawl an rak keng ding;
Seba le Sheba siangpahrangpawl khal in
Thilpekpawl an rak hlan ding.
11 A si, siangpahrangpawl hmuahhmuah a hmaiah an băwkkhup ding;
Miphunpawl hmuahhmuah in amah an rian ding.
12 Ziangahtile mitlasam a au tikah a runsuak ding,
Mifarah le bawmtu nei lo khal.
13 Anih in mifarah le mitlasam a zangfah ding ih,
Mitlasampawlih nunnak cu a hum ding.
14 Anih in an nunnak kha, palbĕtnak le nunrawnnak ihsin a tlen hai ding;
Cule a mithmuhah an thisen cu a hlú zet ding.
15 Cule amah cu a nungdam ding;
Sheba sui kha a hnenih pek a si ding;
Catbang loin thlacamnak khal a hrangih tuah a si ding,
Cule ni tin amah cu thangṭhat a si ding.
16 Leilung ah le tlang zimpawl tiangin,
Thlairawl tam zet a um ding;
A rah cu Lebanon vekin an sawiaw ding;
Cule khawpi sungih umpawl cu leilung hrampi vekin an ṭhang ding.
17 A hmin cu a hmun kumkhua ding;
A hmin cun ni tlukin a daih rei ding.
Amah ah minungpawl thlawsuah an si ding;
Miphunpawl hmuahhmuah in amah cu mithlawsuak tiah an ti ding.
18 Jehovah Pathian, Israel Pathian,
Khawruahharza thil tuahtu amah lawng cu thangṭhatin um seh.
19 Cule a hmin sunglawi cu kumkhuain thangṭhat si seh!
Cule leitlun pumpi cu a ropitnak in khat seh.
Amen, Amen.
20 Jesse fapa David-ih thlacamnakpawl a ne.

72:8^a Tiva: Zufriṭis tiva a si.

Bu 3-nak

73

Palbehnak ihsi Runsuak dingih Ngĕnnak

Asaf-ih Sam.

1 Thungaiten Pathian cu Israel hnenah a ṭha,
Thinlung thiang a nei mipawl hnenah.
2 Asinan kei ka hrangah cun, ka ke an bah zikte;
Ka kepawl an nâl zikte a si.
3 Ziangahtile mitluangkhâwngpawl ka iksik,
Misualrálpawlih hmuingilnak ka hmuh tikah.
4 Ziangahtile an thihnak ah harsatnak an tuar lo,
An thazang a hnget sawn riangri.
5 Mi dangpawl vekin buainak ah an um lo ih,
Mi dangpawl vekih hrem khal an si lo.
6 Curuangah hngalnak kha an ṭhi a si;
Nunrawnnak sinfen in an khuhaw.
7 An neih tam tuk ruangah an mit a pâwng thluh;
Thinlung ih duhthusamnak ah thilsual an tuah.
8 Mi an hnihsan ih, palbĕtnak thu ah sualrál zetin an ṭawng;
Hngal zetin an ṭawng.
9 An kâ cu vanpawl dokalhin an ret ih,
An lei cun leitlun a fángsuak.
10 Curuangah a mipawl cu hitawk hmun ah an ra kirsal ih,
Tidai tampi an in.
11 Cule annih in, «Pathian in ziangtin a thei?
Cungnung Bik hnenah theihnak a um maw?» tiah an ti.
12 Ngai hnik, hipawl hi Pathian ngaihsak lo tu an si,
Ngaihngam huahhiin an um men;
Lennak ah an ṭhangso deuhdeuh.
13 Thungaiten, ka thinlung hi ka rak thianter lak men ih,
Mawh nei loin ka kut ka khawlh lak men.
14 Ziangahtile sunnihlawhih sawisak ka si ih,
Zing tinten nunsim ka si.
15 Kei in, «Hivekin ka sim ding,» rak tita hnik ningla cu,
Ngai hnik, na falepawlih san ah midik lo ka rak si ding.
16 Himi theithiam dingih ka ruah tikah,
Ka hrangah a na tuk,
17 Pathian hmun thianghlim sungih ka luh tiangin;
Cun an cemnetnak ka theithiam.
18 Thungaiten, anmah cu a nâl mi hmunpawl ah na ret hai a si;
Anmah cu siatralnak ah na hlăwn.
19 Aw, ziangtin so annih cu hmakhatteih kawlawngnak ih hruai an si!
Annih cu ṭihphannak in nasazetin a hlorálter hai.
20 Mi pakhat a ṭhangharh tikih a mang vek a si,
Bawipa, na ṭhangharh tikah,
An thlahlim na hmuhsuam ding.
21 Ka thin a nat ih,
Ka lungthin a vansan tikah,
22 Kei cu mi-â tuk le theihnak nei lo ka rak si;
Na hmaiah cun ramsa vek ka rak si.
23 Sikhalsehla, kei cu tlaitluanin na hnenah ka um;
Nang in ka vawrh lam kut in i kai.
24 Na thurawnpeknak thawn lam i hmuh ding ih,
Cuihhnu ah sunlawinak ah i hruai ding.
25 Nangmah siarlo van ah khin zo so ka neih?
Leilung tlun khalah nangmah hleiih ka duh mi zohman an um lo.
26 Ka titsa le ka thinlung an derthawm men thei;
Asinan Pathian cu ka thinlungih lungpi le kumkhuaih ka covo a si.
27 Ziangahtile, ngai hnik, na hnen ihsi hla zetih umtupawl cu an hlorál ding;
Rinumlonak ruangih nangmah a lo tlansantupawl hmuahhmuah cu na siatsuah hai zo.
28 Asinan ka hrangah cun Pathian naih hi a ṭha;
Na thil tipawl hmuahhmuah ka thăn theinak dingah Bawipa Jehovah ka rinsan.

74

Harsat Cān ih Băwmnak hrang Thlacam

Asaf-ih Maskil.

1 Maw Pathian, ziangahso kumkhuaih in hnawn?
Ziangahso na thinhengnak khu cu na ran tlannak hmun ih tuupawl parih a khût?
2 Na mipi-umkhawm, hlanlaipi ih na rak lei mipawl,
Ro ih na co mi hnám, na rak tlen zo mipawl,
Na rak cēnnak hi Zion Tlang cu máng ringring aw.
3 Kumkhuaih a siat mipawl lamah hin na ke kar aw.
Ral in hmun thianghlim sungih thilri hmuahhmuah a rak siatsuah ṭheh.
4 Na ralpawl cu nan tawnkhawmawknak hmun ah an aukio;
An thantarpawl kha hminsinnak hrangah an tar.
5 Amah cu thingrûl lakih
Hreitlung hawiih um mipa a bang.
6 Cule a ker mi thil hmuahhmuah kha vei khat ah annih in an khuai ṭheh,
Hreitlungpawl le sobulpawl in.
7 Na hmun thianghlim kha mei in an ur;
Na hmin cēnnak hmun kha lei ah an bawrhbangter.
8 An thinlung in,
«An zaten that thluh lawlaw uhsi,» tiah an ti.
Ram sungih Pathian-ih tawnkhawmawknak hmunpawl hmuahhmuah an rak urkāng ṭheh.
9 Kan hminsinnakpawl kan hmu lo;
Profet pakhat hman an um nawn lo ih,
Ziangtluk a rei ding ti theitu khal kan lakah an um nawn lo.
10 Maw Pathian, ralpawlih in hmuhsuamnak hi ziangtluk a rei lai ding?
Ralpawl in na hmin hi kumkhua an thangsiat ding maw?
11 Ziangahso na kut, na vawrh lam kut rori na sûp?
Cumi cu na ṭāng ihsin lasuak awla, anmah cu siatsuah aw.
12 Ziangahtile Pathian cu hlanlai ihsin ka siangpahrang a si,
Leilung tlunih runsuahnak tuahtu a si.
13 Na cahnak in tifinriat na rak ṭhen;
Tipi sungih um tifinriat sahring tumpipawlih lu na rak khuai.
14 Leviathan lupawl na khuaidip ṭheh ih,
Ramṭhing luahtu minungpawl hnenah rawl ah anih cu na pe hai.
15 Nang in tihnapawl le lihăwng na pûtsuakter;
Kāng dah lo tivapawl na kāngter.
16 Sun hi na ta a si, zan khal na ta a si;
Nang in tleu le ni na rak timtuah.
17 Leilung ramri hmuahhmuah na rak dĭn;
Ṭhâl le thlatáng na tuah.
18 Maw Jehovah, ral ih in rak hmuhsuam le,
Mi-âpawl ih na hmin an rak thangsiat hi cîng aw.
19 Aw, na thuro nunnak hi sahrang hnenah pe hlah aw!
Na mifarahih nunnak hi kumkhuain hngilh hlah aw.
20 Thukham kha upat aw;
Ziangahtile leilung hmun thimnakpawl cu nunrawnnak in a khat.
21 Aw, palbĕt mipawl kha ningzakin kirtersal hlah aw!
Mifarah le mitlasam pawl in na hmin thangṭhat hai seh.
22 Maw Pathian, tho aw, na ṭannak hum aw;
Ziangvekin mi-âpa in ni tin a lo hmuhsuam ti kha cîng ringring aw.
23 Na ralpawlih aw kha hngilh hlah,
A karh vivo mi nangmah dokalhih thotupawlih thawmvâng khal.

75

A Mangbangza Tuah Mi Ruangih Pathian Thangṭhatnak

Hla Hruaitu Hrang. Al-tashheth Hla Thlûk In. Asaf-ih Sam. Hla.

1 Na hnenah lungawi thu kan lo sim, Maw Pathian, lungawi thu kan lo sim!
Ziangahtile na hmin a nai;
Mi in na mangbangza thil tipawl an thăn.
2 Tikcu remcâng ka hril tikah,
Dĭng zetin thu ka ṭhen ding.
3 Leilung le amah luahtu hmuahhmuah cu an ziamrál ṭheh;
Kei in a ṭhuampawl cu hnget zetin ka phun. Selah
4 «Kei in mitluangkhâwngpawl hnenah,
‹Tluangkhâwng hlah uh,›
Cule misualrálpawl hnenah, ‹Nan ^aki sângter hlah uh.
5 Nan ki sâng ah tisâng hlah uh;
Lungruhnak thawn ṭawng hlah uh,› » tiah ka ti.
6 Ziangahtile cawisannak cu nisuahnak lamin maw,
Nitlaknak lamin maw, thlang lamin simaw a ra mi a si lo.
7 Pathian cu thuṭhentu a si:
Mi pakhat a namthlak ih,
A dang kha a cawisâng.
8 Ziangahtile Jehovah kut ah no pakhat a um,
Cule sabitzu cu a hung phûl;
Cumi cu kimteih cawhrawi mi a si ih, anih in a thletsuak;
Thungaiten leitlun misualrálpawl hmuahhmuah in
A siabik a tawne tiang rori in an in thluh ding.
9 Kei lawngte cun cumi cu a kumkhuain ka thăn ding,
Jakob-ih Pathian hnenah hla ka sak ding.
10 Misualrálpawlih kipawl hmuahhmuah ka sattán ding,
Asinan midingfelpawlih kipawl hmuahhmuah cu santer an si ding.

75:4^a ki: Hi tawkah «ki» hin câwki in a cahnak a hmuhsak vekin thazangcahnak a hmuhsak.

76

Leitlun Pumpuluk Thuṭhentu Pathian

Hla Hruaitu Hrang. Neginoth thawi Sak Ding. David-ih Sam. Hla.

1 Judah ram ah Pathian cu theih a si;
Israel ram ah a hmin a ropi.
2 A puanthlam khal Salem ah a um ih,
A cēnnak hmun cu Zion ah a si.
3 Cu tawkah cun meialh thálfungpawl a khiak,
Raldonak ralphaw le ralnâm khal. Selah
4 Nang cu deh ding mi ramsa umnak tlangpawl hnakih
Ropi le ṭha hleice sawn na si.
5 Lungruhpawl cu lâksak an si;
Thithlĕpin an itthat;
Cule micakpawl pakhat hman in an kut an hmang thei nawn lo.
6 Maw Jakob Pathian, na kawknak ruangin,
Ránglêng parih totupawl le rángpawl cu mithi ihthatin an itthat.
7 Nangmah rori hi ṭihzah ding mi cu na si;
Cule na thin a heng ceng asile,
Zo so na hmaika-ah a ding thei ding?
8 Na thuṭhennak cu van ihsin hna ih theih dingin na tuah;
Leilung in a ṭih ih daiten a um,
9 Leilung parih palbĕt mipawl hmuahhmuah runsuak ding le thuṭhen dingih Pathian a thawh tikah. Selah
10 Minung thinlingnak cun nangmah a lo thangṭhat tengteng ding;
A tāngsŭn thinlingnak thawn na hrengaw ding.
11 Jehovah na Pathian hnenah thutiampawl tuah awla, hlĕnsuak aw;
Nannih a kiangkapih um mipawl nan zaten, ṭihzahtlak a si mi amah hnenah laksawngpawl pe uh.
12 Anih in uktupawlih thinlung a sattán ding;
Amah cu leitlun siangpahrangpawl in an ṭih.

77

Pathian Thil Ti Makpawl Ruahsalnak

Hla Hruaitu Hrang. ^aJeduthun Hrang. Asaf-ih Sam.

^a Jeduthun: Jeduthun hi Temple ih hla hruaitupawl lakih pakhat David in khawm hruaitu dingih a hril mi a si (1San 16:41-42 zoh aw).

1 Ka aw thawn Pathian hnenah ka au.
Ka aw thawn Pathian hnenah;
Cule anih in a hna i tŭn.
2 Ka harsat nikhua ah Bawipa ka hawl;
Zan ah ka kut khâm loin ka phar;
Ka nun in hnĕm ding a êl.
3 Pathian ka mángsuak ih, ka buai;
Ka phunzai ih, ka thinlung a cau. Selah
4 Ka mittlângpawl na kaimeng ringring;
Ka thinbuai tuk ruangah ka ṭawng thei lo.
5 Khuahlan nipawl ka vun ruat,
Hlanlai kumpawl khal.
6 Zan ah hla ka mángsuak;
Ka thinlung ah ngunngaih zetin ka ngaihtuah,
Cule ka thinlung in taima zetin a hliakhlai.
7 Bawipa in in hnáwng kumkhua ding maw?
Duhsaknak a nei nawn lo ding maw?
8 A lainatduhdawtnak teh a cem lan ta maw si?
A thutiamkam teh a pelh lan ta maw si?
9 Pathian in zangfahnak neih ding a hngilh zo maw si?
A thinheng in a zahngaihnak duhnungza a kharpit ṭheh zo maw si? Selah
10 Cule kei in, «Himi hi ka ānhainak a si,
Cungnung Bik-ih vawrh lam kut a thlengawknak hi,» tiah ka ti.
11 Jehovah thil tipawl kha ka cîng ringring ding;
Thungaiten khuahlan ih mangbangza na tuah mipawl ka cîng ringring ding.
12 Na thil tipawl hmuahhmuah par khalah ngunngaih zetin ka ngaihtuah ding,
Cule na tuah mipawl ka ngaihtuah ding.
13 Maw Pathian, na lamzin cu hmun thianghlim ah a si;
Kan Pathian vek Pathian nasa cu zo so a si?
14 Nangmah cu mangbangzapawl tuahtu Pathian na si;
Miphunpawl lakah na cahnak na rak thăn.
15 Na bân thawn na mipawl na tlen zo,
Jakob le Joseph fapapawl. Selah
16 Maw Pathian, tidaipawl in an lo hmu;
Tipi in an lo hmu, an thla a phâng; Tipithuanthum thûkpawl khal an khūr.
17 Khawdurpawl in ti an tawih;
Vanpawl in thawngvâng an thlahsuak;
Na thálfungpawl khal an tle zukzo.
18 Na khawri aw cu phusîng ah a um;
Nimthlakaupawl in leilung an tlet;
Leilung a khūr ih a hnîn.
19 Na lamzin cu tifinriat ah a si,
Na zin cu tipi kaupi ah a si,
Cule na kenehpawl cu theih an si lo.
20 Na mipawl cu
Mosi le Aaron ih kut hmangin rante rual vekin na hruai.

78

Pathian Ṭhatnak le Israel Lungawihna Thiamlonak

Asaf-ih Maskil.

1 Ka dān lamah nan hna tháwng uh, Maw ka mipawl tla;
Ka kamsuakthupawl lamah nan hna tŭn uh.
2 Tahṭhimnak hmangin ka kâ ka âng ding;
Khuahlan laiih thupawlhpawl ka relsuak ding,
3 Kan pupápawl ih in rak sim cia mi le,
Kan hna ih a theih zo mi le kan thinlung khalih a theih zo mipawl an si.
4 Cuih thupawl cu an fātepawl hnen ihsin kan thup lo ding,
Jehovah thangṭhatnakpawl, a cahnak le mangbangza hnaṭuan a tuah mipawl cu,
A ra lai ding mi san mipawl hnenah kan sim ding.
5 Ziangahtile Jakob hnenah thutheihpinak a rak dĭnhnget ih,
Israel hnenah dān a ruat,
Annih in cumi cu an falepawl hnenih an theihter theinak dingah,
Kan pupápawl hnenah thu a rak pe,
6 Cutin a ra lai ding mi san mipawl in an thei thei ding,
A suak lai ding mi nauhakpawl in,
Cule annih cu an tho ding ih, an falepawl hnenah cumi cu an sim ding,
7 Cutin annih in Pathian ah ruahsannak an nei thei ding ih,
Pathian thil tipawl hngilh loin,
A thupekpawl an thlun ding;
8 Lungruh le helhmang san,
Thinlung dikteih ret duh lo san le,
An thinlung khal Pathian hnenih rinum lo,
An pupápawl bangtuk an si lo ding.
9 Efraim tefapawl, ralthuam thuamaw le thálpawl kengtu cu,
Ral do ni ngaingai ah dungah an kirsal.
10 Annih in Pathian thukham an rak thlun lo;
Amai dān ih feh ding an rak êl.
11 Cule a thil tipawl an rak hngilh ih,
An hnenih a hmuh zo mi a mangbangzapawl khal.
12 Izip ram sung, Zoan ram ah,
Pathian in nan pupápawl mithmuhah mangbangza thilpawl a rak tuah.
13 Tifinriat a ṭhen ih, a fehtlăngter hai;
Cule tipi kha penkhawm mi vekin a dinter.
14 Sun cān khalah khawdur in a hruai hai ih,
Zanvar meitleu in.
15 Ramṭhing ah lungpipawl a phelter ih,
An in ding tidai kha ti thûkpi vekin a tawrih tawrin a pek hai.
16 Lungpi sung ihsin tivatepawl khal a suakter ih,
Tipi cu tivapi vekin a luanter.
17 Asinan amah dokalhin thilsual an rak tuah sinsin,
Ramṭhing ah Cungnung Bik dokalhin an hél.
18 Cule an thinlung in Pathian an rak hniksak,
An hiar mi rawl dilnak in.
19 A si, Pathian dokalhin an ṭawng:
Annih in, «Ramṭhing ah hin Pathian in cabuai a timlam thei ding maw?
20 Ngai hnik, anih in lungpi a vuak,
Cutin tidai a khâwtsuak,
Cule tivatepawl ah an luangliam.
Sang teh a pe thei ngai pei maw?
A mipawl hrangah sa teh a pe thei hai pei maw?» tiah an ti.
21 Curuangah Jehovah in himi cu hna in a thei ih, a thin a so;
Cule Jakob parah mei a alhter ih,
Israel parah a thinhengnak khal a thleng.
22 Ziangruangahtile annih in Pathian an rak zum lo ih,
A runsuahnak an rinsan lo.
23 Cuticingcun, tlunvan khawdurpawl thu a pek ih,
Van sângkapawl a áwng,
24 An ei dingah an parah manna a surter ih,
Van sang a pek hai.
25 Minungpawl in vancungmipawlih rawl an ei;
Anih in an ei khawp tiang rawl a pe hai.
26 Vanpawl ah nisuahnak lam thli a hrānter;
Cule a huham thawn thlang lam thli a hruai.
27 An parah sa kha leivut vekin a run surter,
Tifinriat vunnel vekin thla nei vâte rori khal.
28 Cule cupawl cu an ṭanhmun khuarnak ah a tlakter hai,
An cēnnak kiangkap hmuahhmuah ah.
29 Cun an ei ih an khawp zet,
Anmai hiar mi a pe.
30 An câkhiarnak di a riamngah hlan,
An kâ ih an rawl a um lai rori hmanah,
31 Pathian thinlingnak an tlunah a rak thleng ih,
Anmah lakih misekbikpawl a that hai ih,
Israel pacangṭha hrilpawl a duaiter hai.
32 Cuticingkhalin an sual lai hrih thotho,
Cule a mangbangza thil tipawl an zum lo.
33 Curuangah anih in an damsung nipawl cu zianghmanlo ah a canter ih,
An damsung kumpawl cu ṭihphannak ah.
34 Anmah a thah hai tikah, amah an rak hawl;
Cule an kirsal ih thungaithlakin Pathian an hawl.
35 Cun Pathian kha an lungpi a si ti le,
Cungnung Bik Pathian kha anmah tlentu a si ti an mángsal.
36 Sikhalsehla amah cu an kâ in an fakder ih,
An lei in a hnenah thuphan an sim.
37 Ziangahtile amah parah an thinlung a hnget lo ih,
A thukham ah an rinum fawn lo.
38 Asinan anih cu lainatnak thawi khat a si vekin, an mawhsualnak a rak ngaidam ih,
Annih cu a siatsuah hai lo.
A si, vei tampi a thinhengnak a sūp ih,
A thinlingnak a thoter ṭheh lo.
39 Ziangahtile anih in annihpawl cu titsa men an si,
A hlorál mi thaw, a kirsal nawn lo mi men an si ti a cîng ringring.
40 Ramṭhing ah amah cu vei ziang zat meng an căwktho ih,
Nelrawn ah vei ziang zat meng a thin an natter!
41 A si, Pathian an hniksak leuhleuh ih,
Israel-ih Mi Thianghlim a riah an siatter.
42 A huham an cîng nawn lo:
Ral kut ihsin anmah a tlen ni,
43 Izip ram ih a rak tuah mi a hminsinnakpawl le,
Zoan ram ih a mangbangza tuah mipawl khal.
44 An tivapipawl le,
Tivatepawl thisen ah a canter ih, an rak in thei lo.
45 An lakah fikte burpipawl a thlah, cupawl in anmah a keu,
Anmah siatsuahtu butlakpawl tla.
46 An thlairawlkungpawl kharbawk a pe ih,
An ṭuanbăngnak rah cu khaukhuap a pe.
47 An sabit hripawl rial in a siatsuah ih,
An sikamor kungpawl vur in.
48 An ṭilvapawl rial hnenah a pe ih,
An rante rualpawl ṭihnungza nimthlakau hnenah.
49 A thinhengnak nasazet,
A thinlingnak, a aithawknak le buainak pawl cu an parah a tlakter,
Mi siatsuahtu vancungmipawl an hnenih thlahnak in.
50 A thinhengnak hrangah zin a tuah;
An nunnak kha thihnak ihsin a zuah hai lo,
An nunnak kha hremnak ah a pek hai sawn.
51 Cule Izip ram ah fatir hmuahhmuah a that ṭheh,
Ham-ih puanthlampawl sungih an cahnak rah hmaisabikpawl cu.
52 Asinan amai minungpawl cu tuu rual vekin a fehsuakter ih,
Ramṭhing ah rante rual vekin a hruai hai.
53 Cule anih in annihpawl cu himdamten a hruai hai, cule an ning a ṭih lo;
Asinan an ralpawl sawn cu tifinriat in a cîmpil ṭheh.
54 Cule a ramri thianghlim tiangin anmah a hruai hai,
A vawrh lam kut thawn a neh cia mi himi tlang tiangin.
55 A hmaiah miphunpawl a dawisuak hai,
Ro ih an co ding rampawl cu tahin a zem hai,
Cule Israel hnámpawl kha anmai puanthlampawl sungah a cêngter.
56 Cuticingcun Cungnung Bik Pathian cu an hniksak ih an hél,
Cule thutheihtermipawl an thlun lo.
57 Dung lamah an kirsal ih an pupápawl vekin rinum loin an nung;
Annih cu mibumhmang thál vekin an fehpêng.
58 Ziangahtile an hmun sângpawl hmangin thinheng dingin amah an rak cawktho,
Cule an milem khercawppawl ruangah a thîksiatnak an thoter.
59 Pathian in himi a theih tikah, a thin a so ih,
Israel cu a fih tuk lawmmam.
60 Curuangah Shiloh Biakbûk cu a tansan,
Minung lakih a ret mi puanthlam,
61 Cule a cahnak kha ralkaih ah a pek ih,
A ropitnak kha ral kut ah.
62 A mipawl khal ralnâm ah a pek,
Cule ro ih a co mi parah a thin a so.
63 An minopawl meisa in a kangrál ih,
An falapawl in ṭhitawknak hla an nei lo.
64 An puithiampawl ralnâm in an thi ih,
An nuhmeipawl in an ṭah lo.
65 Cun Bawipa cu ihthahnak ihsi ṭhang mi vekin a tho,
Sabitzu ruangih ausuaktu micakpa vekin.
66 Cule anih in a ralpawl a nehkirsal;
Kumkhaw hmuhsuamnak ah a ret hai.
67 Cuihtlunah Joseph-ih puanthlam a hnáwng ih,
Efriam hnám khal a hril lo.
68 Judah hnám,
A duhdawt mi Zion Tlang a hril sawn.
69 Cule a hmun thianghlim cu hmun sângpawl vekin a sak,
Kumkhaw hrangih a dĭn mi leilung vekin.
70 A siahhlawh David khal a hril ih,
Tuu hruang sung ihsin amah cu a lasuak;
71 Tuu notepawl a kilkhawinak ihsin a hruaisuak,
A mi Jakob le,
A ro Israel khāl dingah.
72 Cuticun anmah cu felfainak thinlung zulhin a khāl hai,
Cule anmah cu a kut in thiam zetin a hruai hai.

79

Jerusalem hrangih Thlacamnak

Asaf-ih Sam.

1 Maw Pathian, miphunpawl in ro ih na co mipawl an ra sîm;
Na temple thianghlim an bawrhbangter;
Jerusalem khal hnawmpen ah an tuah.
2 Na siahhlawhpawlih ruangpawl kha
Vanpawlih vâtepawl rawl ah an pek,
Na mithiangpawlih sa cu lei ramsapawl an pek.
3 Jerusalem kimvel hmuahhmuah ah tidai vekin an thisen an thlebung ih,
Anmah phumtu ding zohman an um lo.
4 Kannih cu kan ramhnenpawl hnenah hmuhsuam mi ah kan cang,
Kan kiangkapih in kulhtupawl hnenah nautat le hnihsan kan si.
5 Ziang tik tiang so, Maw Jehovah?
Kan tlunah na thinheng kumkhua ding maw?
Na thîksiatnak meisa vekin a kāng ding maw?
6 Nangmah a lo thei lo tu miphunpawl parah le,
Na hmin ko lo tu lalrampawl parah na thinlingnak thlebung aw.
7 Ziangahtile Jakob an ei ṭheh ih,
A cēnnak hmun khal răm ko an tuah.
8 Aw, pupápawlih mawhsualnakpawl kan parah cîng ringring nawn hlah aw!
Na zahngainak dungnungza kha kanmah táwng dingah zamrangten ra seh,
Ziangahtile kannih cu niam zetih dirhthlak kan si.
9 In bawm aw, Maw kan runsuahnak Pathian,
Na hmin sunlawinak dingah;
In runsuak aw, na hmin zarah kan sualpawl in ngaidam aw!
10 Ziangahso miphunpawl in,
«Khuiah so an Pathian cu?» tiah an ti ding.
Na siahhlawhpawlih thisen an suah zo mi hrangih thisen phuba lâknak cu,
Kan mithmuhah miphunpawl lakah theihter si seh.
11 Thawngtla aihramnak cu na hmaiah thleng seh;
Na ^ahuham a nasatdān zulhin,
Thi dingih relcat cia zo mipawl humhim aw.
12 Cule nangmah nautat ih an lo hmuhsuamnak kha,
Kan ramhnenpawl parah an ṭāng sungah alet sarih in kirtersal aw, Maw Bawipa.
13 Cule kannih na mipawl le na ran tlannak hmun ih tuupawl in,
Kumkhuain lungawi thu kan lo sim ding;
San hmuahhmuah hnenah nangmah thangṭhatnak kan langter ding.

79:11^a huham: A ṭawng hrampi ah, «bân» ti a si.

80

Israel Tundinsalnak hrang Thlacamnak

Hla Hruaitu Hrang. ^aEl-Shoshannim Eduth Hla Thlûk In. Asaf-ih Sam.

^a El-Shoshannim Eduth: «Thutheihternak Lily Parpawl» tinak a si.

1 Na hna tŭn aw, Maw Israel tuukhāltu,
Nang rante rual vekih Joseph hruaitu;
Nang cherub-pawl tlunih um, êngsuak aw!
2 Efraim, Benjamin le Manasseh pawl hmaiah
Na cahnak thoter aw,
Cule ra awla, i run aw.
3 Kan kêl in sitersal aw, Maw Pathian;
Na mithmai êngter aw,
Cule runsuah kan si ding!
4 Maw ralkap rualpawlih Pathian Jehovah,
Ziang tik tiang so na mipawlih thlacamnak dokalhin na thin a heng ding?
5 Anmah cu mitthli rawl thawn na câwm hai ih,
Mitthli tam ngaingai na inter hai.
6 Nang in kan ramhnenpawl hrangih tawhawknak ah in tuah,
Cule kan ralpawl cu anmai lakah an hni.
7 Kan kêl in sitersal aw, Maw ralkap rualpawlih Pathian;
Na mithmai êngter aw,
Cule runsuah kan si ding.
8 Izip ram ihsin sabit hri na tlŭn;
Miphunpawl na dawisuak ih, sabit hri cu na phun.
9 A hrangah hmun na timlamsak ih,
A hram thûkpi ah na luhter,
Cule anih in ram a khuh ṭheh.
10 Tlangpawl cu a thlahlim in a khuh ih,
A hngeṭêkpawl in sidar thing tumpipawl a khuh.
11 A hngeṭêkpawl tifinriat tiang a thleng ih,
A hngepawl Tivapi tiang an thleng.
12 A kiang zin ih a fehtu hmuahhmuah ih a rah lawh thei dingah,
Ziangahso a kulhnak hruang na băl ṭheh?
13 Thingrûlpi sung ngal in a siatsuah ih,
Ramsapawl in an ei.
14 Kan lo dil a si, ra kirsal aw, Maw ralkap rualpawlih Pathian;
Van ihsin run thlir awla, zoh aw,
Cule himi sabit hri hi kilkhawi aw,
15 Na vawrh lam kut thawi na rak phŭn mi sabit hmuan le,
Nangmah hrangih cak ko na tuah mi a hngeṭêk cu.
16 Cumi cu meisa ih ur a si ih, hauthluk a si;
Cupawl cu na mithmai thawn na kawknak in an hlorál.
17 Na vawrh lam kut a si mi pa parah na kut ret aw,
Nangmah hrangih cak ko na rak tuah mi pa, minung fapa parah cun.
18 Cun na hnen ihsin kan kirsal lo ding;
In ṭhangphawksal aw, cule na hmin kan ko ding.
19 Kan kêl in sitersal aw, Maw ralkap rualpawlih Pathian Jehovah;
Na mithmai êngter aw,
Cule runsuah kan si ding!

81

Israel Lungruhpawl hnenih Pathian Kawhnak

Hla Hruaitu Hrang. Gittith Thawn. Asaf-ih Sam.

1 Kan cahnak Pathian hnenah ringpiin hla sak uh;
Jakob Pathian hnenah aipuangin au uh.
2 Hla thăwk uhla, khuangte tum uh,
Ṭingṭang ngai nuam zet le cawngcing khal.
3 Thla Thar cān ah tuupa ki phaw uh,
Thla thūl cān, kan puai ni ah.
4 Ziangahtile himi hi Israel hrangah sakhaw dān a si,
Jakob Pathian-ih cīn le dān a si.
5 Izip ram sung a hrawhsuak laiah,
Joseph ah himi hi thutheihternak vekin a dĭnhnget,
Ka theihthiam lo mi ṭawng hna in ka thei.
6 «A liang cu phurrit ihsin ka ṭhawn;
A kutpawl khal khopawl ihsin zalenter an si.
7 Buainak cān ah na ko ih, ka lo runsuak;
Khawri-ih hmun thup sung ihsin ka lo sawn;
Meribah tidai ah ka lo hniksak. Selah
8 «Ngai hnik uh, Maw ka mipawl, nun ka lo zirh hai ding!
Maw Israel, i ngaithla ding asile!
9 Nan lakah ram dang pathian a um lo pei;
Ram dang pathian ziangkhal na be fawn lo pei.
10 Kei cu Jehovah na Pathian ka si,
Izip ram ihsin a lo hruaisuaktu;
Na kâ kau pin âng aw, cule ka khatter ding.
11 «Asinan ka mipawl cun ka aw an ngaithla lo,
Cule Israel cu ka hnenah a tlulut lo.
12 Anmai thurawnpeknak ih feh dingin,
Annih cu a ruh mi anmai thinlung ah ka ap hai.
13 «Ka mipawl in keimah in ngaithla in,
Israel in ka lamzinpawl ah feh sehla cu maw!
14 An ralpawl ka duaiter lohli ding ih,
Anmah dotupawl parah ka kut ka thlah ding nân.
15 Jehovah huatupawl cu a hnenih tlulut vekin an umawter,
Asinan an vanduainak cun kumkhua a daih ding.
16 Sangvut ṭhabik thaw khalin a rak câwm hai ding nân;
Cule lungpi ihsi khuaitizu thawn ka lo diriamter zo ding.»

82

Dik zetih Thuṭhen dingih Ngĕnnak

Asaf-ih Sam.

1 Pathian cu mipi-umkhawm tampi lakah a ding;
Amah in pathianpawl lakah thu a ṭhen.
2 Ziang tik tiang so maw diklo zetih thuṭhen in,
Misualrálpawl na duhsak ding? Selah.
3 Mifarahpawl le pa nei lo pawl hum uh;
Mizawnzaipawl le mitlasampawl parah diknak tuah uh.
4 Mifarahpawl le mitlasampawl runsuak uh;
Misualrálpawl kut ihsin luatter uh.
5 Annih cun an thei lo ih, an theithiam fawn lo;
Thim lakah an tawivâk rero men;
Leilung ṭohrampawl hmuahhmuah an hnîn.
6 Kei cun, «Nannih cu pathianpawl nan si ih,
Nan zaten Cungnung Bik-ih falepawl nan si.
7 Asinan minungpawl vekin nan thi ding ih,
Ram uktupawl lakih mi pakhat vekin nan tlu ding,» tiah ka ti.
8 Tho aw, Maw Pathian, leilung hi thuṭhen aw;
Ziangahtile nang in ro ah miphunpawl hmuahhmuah na co ding a si.

83

Israel Doralpawl Thuṭhen dingih Thlacamnak

Hla. Asaf-ih Sam.

1 Daiten um hlah aw, Maw Pathian!
Um menmen hlah awla,
Daiten um hlah, Maw Pathian!
2 Ziangahtile ngai hnik, na ralpawl in hnaihnawhnak an tuah;
A lo huatupawl khal an lu an tung.
3 Na mipawl dokalhin hrăwkhrawl zetin khua an khâng ih,
Na hum mipawl dokalhin thu an ruatkhawm.
4 Annih in, «Israel hmin cīn a si nawn lonak dingah,
Ra uhla, anmah cu an miphun pumpi in cimitter uhsi,» tiah an ti.
5 Ziangahtile lungkhat tein thu an ruatkhawm;
Nangmah dokalhin thukham an tuah.
6 Edom le Ishmael-mipawlih puanthlampawl;
Moab le Hagar-mipawl;
7 Gebal, Ammon le Amalek;
Filisṭia le Ṭaiar ih cêngpawl;
8 Assiria khal in anmah a kăwp;
Lot tefapawl an rak bawm. Selah
9 Anmahpawl parah Midianpawl parih na tuah vek,
Kishon Tivate ih Sisera le
Jabin parih na tuah vekin tuah aw,
10 En Dor ih hlorál,
Leilung êk ih a cangtupawl vekin.
11 An mizahumpawl kha Oreb le Zeep pawl vekin tuah hai aw,
A si, an ram uktupawl hmuahhmuah cu Zebah le Zalmunna vekin,
12 Annih cun, «Pathian-ih ran tlannak hmunpawl hi
Kanmah hrangah la uhsi,» tiah an ti.
13 Maw ka Pathian anmahpawl hi phusîng ih herh mi leivut vek,
Thli ih sĕm mi fānghi vek siter hai aw.
14 Meisa in ramlak a kăng vekin le,
Meialh in tlangpawl a kăng vekin,
15 Anmah cu na thlisia thawn dawi hai awla,
Na thlipi thawn ṭhihṭhaih hai aw.
16 Na hmin an hawl theinak dingah, Maw Jehovah,
An hmaipawl ningzahnak thawn khatter aw.
17 Kumkhuain mangbang le thlaphângin um hai seh.
A si, ningzakin um hai sehla, hlorál cih hai seh,
18 Cutin leitlun hmuahhmuah ah Jehovah hmin pu nangmah lawng hi Cungnung Bik na si ti an thei ding.

84

Temple ih Pathian Biak Aipuannak

Hla Hruaitu Hrang. Gittith Thawn. Korah Fapapawlih Sam.

1 Na biakbûkpawl cu ziangtluk duhnung so a si,
Maw ralkap rualpawlih Jehovah!
2 Ka nunnak in Jehovah sūmtualrawnpawl a ngai,
A si, cauh phah tiangin;
Ka thinlung le ka titsa khal in a nung mi Pathian an ko.
3 Ka Siangpahrang le ka Pathian,
Maw ralkap rualpawlih Jehovah,
Na biakṭhengpawl hmanah sunṭam in inn a hmungah ih,
Peleng in a fano retnak ding hrangah bu a sak.
4 Na inn sungih a um mipawl cu mithlawsuak an si;
Nangmah an lo thangṭhat camcin ding. Selah
5 A cahnak nangmah ih a hmutu,
A thinlung zalampi ngaitu milai cu mithlawsuak a si.
6 ^aBaka Phaikuam an zawh tikah,
Cuih hmun cu cirhtipût ah an tuah.
Ruahti khal in cuih hmun cu tili in a khuh.
7 Cahnak ihsin cahsinnak ah an feh;
Zion ah Pathian hmaiah pakhat cio in an va lang ṭheh.
8 Maw ralkap rualpawlih Pathian Jehovah, ka thlacamnak hi ngai aw;
Maw Jakob Pathian, na hna tŭn aw! Selah
9 Maw Pathian, kan ralphaw hi zoh hnik,
Cule na hriak thih mi paih mithmai hi zoh hnik aw.
10 Na sūmtualrawnpawl ih ni khat sung um hi hmun dangih ni 1000 um hnakin a ṭhasawn.
Ka Pathian inn sângka kiltu ih um hi
Misualrálpawl puanthlam ih cēn hnakin ka duhsawn.
11 Ziangahtile Jehovah Pathian cu ni le ralphaw a si;
Jehovah in zangfahnak le ropitnak a pe;
Dĭng zetih a fehtupawl hnen ihsin
Thil ṭha zianghman a sûp lo ding.
12 Maw ralkap rualpawlih Jehovah,
Nangmah a lo rinsantu milai cu mithlawsuak a si!

84:6^a Baka: Hebru ṭawng ih «ṭap» ti simaw, balsan thingkung simaw a sawhkhih thei.

85

Ṭhangphawknak hrang Thlacamnak

Hla Hruaitu Hrang. Korah Fapapawlih Sam.

1 Maw Jehovah, na ram parah duhsaknak na nei;
Jakob cu vanneihnak a pekirsal.
2 Na mipawlih mawhsualnak na ngaithiam;
An sual hmuahhmuah na khuhsak ṭheh. Selah
3 Na thinlingnak hmuahhmuah na lahlo ṭheh;
Na thinhengnak nasazet ihsin na herkirsal.
4 Maw kan runsuahnak Pathian, kan kêl in sitersal awla,
Kan parih na thinhengnak kha cemter aw.
5 Kumkhuain maw kan parah na thin a heng ding?
Na thinhengnak cu san hmuahhmuah tiang na awhter ding maw?
6 Na mipawl na parih lungawiaipuangih an um theinak dingah,
In ṭhangphawksal lo ding maw?
7 Na lainatduhdawtnak in hmuh aw, Maw Jehovah,
Na runsuahnak in pe aw.
8 Jehovah Pathian in ziang a sim ding ti ka ngai ding,
Ziangahtile a mipawl le a mithiangpawl hnenah
Daihnak thu a sim ding;
Asinan atnak lamah cun kirsal hlah hai seh.
9 Ropitnak kan ram ih a cēn theinak dingah,
Thungaiten a runsuahnak cu amah ṭihtupawl hnenah a nâi a si.
10 Lainatduhdawtnak le thutak hmunkhatah an táwngaw;
Dingfelnak le remdaihnak an hnamaw.
11 Leilung ihsin thutak a pûtsuak ding ih,
Dingfelnak in van ihsin a run zoh ding.
12 A si, Jehovah in thil ṭha a pe ding;
Cule kan ram khal in a rah a suah ding.
13 A hmaiah dingfelnak a feh ding ih,
A kenehpawl kha kan zin ah a tuah ding.

86

Băwm Dilnak

David-ih Thlacam

1 Na hna i run tŭn aw, Maw Jehovah, i ngaithla aw;
Ziangahtile kei cu mifarah le mitlasam ka si.
2 Ka nunnak humhim aw, ziangahtile kei cu ka thianghlim;
Nang cu ka Pathian na si;
Nangmah a lo rinsantu na siahhlawh cu run aw.
3 Ka parah zahngai hram aw, Maw Bawipa,
Ziangahtile sunnihlawh in na hnenah ka au.
4 Na siahhlawh nunnak hi lungawiaipuangin umter aw,
Ziangahtile, Maw Bawipa, ka nunnak ka cawiso a si.
5 Ziangahtile Bawipa, nang cu na ṭha ih ngaithiam dingah na tiar ringring,
Cule nangmah a lo kotupawl hmuahhmuah hnenah lainatduhdawtnak luangliamin na nei.
6 Maw Jehovah, ka thlacamnak lamah na hna tŭn hram awla,
Ka dilnak aw lamah na hna tháwng aw.
7 Ka harsat nikhua ah ka lo ko ding,
Ziangahtile nang cun i sâng ding.
8 Maw Bawipa, pathianpawl lakah nangmah bang an um lo,
Na tuah mipawl bangtuk zianghman an um lo.
9 Maw Bawipa, na semsuah mi miphunpawl hmuahhmuah an ra ding ih,
Na hmaika-ah an lo be ding,
Cule na hmin an cawimawi ding.
10 Ziangahtile nang cu na nasa ih, mangbangza thilpawl na tuah;
Nangmah lawng hi Pathian na si.
11 Na lamzin i zirh aw, Maw Jehovah;
Na thutak ah ka feh ding;
Na hmin ṭihzahnak dingah thinlung phir lo in pe aw.
12 Ka lo thangṭhat ding, ka thinlung hmuahhmuah in, Maw Bawipa ka Pathian,
Cule na hmin cu a kumkhuain ka cawimawi ding.
13 Ziangahtile ka parih na lainatduhdawtnak hi a nasatuk,
Nang cun ka nunnak hi Sheol thûk tak ihsin i runsuak.
14 Maw Pathian, keimah do in mipuarthaupawl an tho ih,
Minunrâwng umkhawm in ka nunnak an hawl,
Nangmah an lo ngaihsak lo.
15 Asinan Maw Bawipa, nang cu lainatnak le zangfahnak thawi khat,
Thinsaunak le lainatduhdawtnak le thutak thawi khatliam Pathian na si.
16 Ka hnenah kirsal in ka parah zahngai hram aw maw!
Na siahhlawh hnenah na cahnak pe awla,
Na siahhlawhnuih fapa hi run aw.
17 Na ṭhatzia hminsinnak i hmuh aw,
Cule i huatupawl in cumi cu an hmu ding ih an ning a zak ding,
Ziangruangahtile, nang, Jehovah in i bawm ih i hnem.

87

Zion ih Cēn Năwmnak

Korah Fapapawlih Sam. Hla.

1 A ṭohram cu tlang thianghlimpawl ah a si.
2 Jakob cēnnakpawl hmuahhmuah hnakin,
Jehovah in Zion kăwtkapawl kha a duhdawt.
3 Maw Pathian khawpi,
Na ropitnak thuhla an rel! Selah
4 «Keimah i theitupawl hnenah ^aRahab le Babilon thuhla ka sim hai ding;
Ngai hnik, Maw Filisṭia le Ṭaiar, Kush thawn:
‹Hi pa hi khi tawkah a suak,› » tiin.
5 Cule Zion thuhla cu,
«Hi pa le khi pa cu amahnuih sung ihsi suak an si;
Cule Cungnung Bik amah rori in cu nu cu a dĭnhnget ding,» tiih sim a si ding.
6 Anih in miphunpawl hmin cazin a tuah tikah,
Jehovah in,
«Hi pa cu khi tawkah a suak,» tiah a khum ding. Selah
7 Hlasaktupawl le awnmawi hmanrua tumtupawl cun,
«Ka tihna hmuahhmuah cu nangmah ah a um,» tiah an ti ding.

87:4^a Rahab: «Tluangkhâwng» tinak a si. Curuangah Bible hla thu ah cun Izip hi Rahab tiih kawh a si.

88

Băwmnak hrang Thlacam

Hla. Korah Fapapawlih Sam. Hla hruaitu hrang. ^aMahalath hla thlûk zulhin. Ezrah-mi Heman-ih Maskil.

^a Mahalath: 53:0 simfiangnak zoh aw.

1 Maw Jehovah, ka runsuahnak Pathian,
Na hmaiah sun le zanin ka au.
2 Ka thlacam hi na hmaiah thleng seh,
Ka aunak lamah na hna tháwng aw.
3 Ziangahtile ka thinlung hi harsatnak in a khat ih,
Ka nun in Sheol lam a naih.
4 Khur lamih a fehthlatupawl zawngih siar cih ka si;
Cahnak nei lo pa vek ka si.
5 Mithipawl lakih tān tâk,
Na cīn hai nawn lo mi,
Na kut ihsin sahtan mi,
Thlān sungih mithipawl vek ka si.
6 Nang in khur tawdĕngbik ah i ret,
Thim lakah, hmun thûk ah.
7 Na thinlingnak in ka parah rit zetin i nĕn,
Cule na tisuarpawl hmuahhmuah in i zawnzaiter.
8 Ka hawipipawl kha ka hnen ihsin hlatpi ah na ret;
An hrangih fihnungza ah i tuah;
Kei cu kharkhumbĕt ka si ih, ka suak thei lo.
9 Zăwnzaihnak ruangah ka mit a rau.
Maw Jehovah, ni tin nangmah ka lo ko;
Na hnenah ka kut ka phar.
10 Mithipawl hrangah mangbangza na tuah ding maw?
Mithipawl thosal in an lo thangṭhat ding maw? Selah
11 Na lainatduhdawtnak cu Sheol ah thăn a si ding maw?
Asilole na rinumnak cu ^aAbaddon ah?
12 Na mangbangzapawl cu thim lakah theihter a si ding maw?
Na dingfelnak cu hngilhnak ram ah?
13 Asinan na hnenah kei cu ka ausuak, Maw Jehovah,
Zing lamah ka thlacam na hnen a thleng.
14 Maw Jehovah, ziangahso ka nunnak na hnawn?
Ziangahso ka hnen ihsin na hmai na thup?
15 Ka no lai ihsin zăwnzaihter ka si ih, thi zikte tein ka um;
Na ṭihnunnakpawl ka tuar;
Vansang ka lam.
16 Na thinling sosa in in khuh ṭheh;
Na ṭihnunnakpawl in ṭawng thei lo ko in tuah.
17 Cupawl cun sunnivu tidai vekin in kulh;
In kulhbĕttlang.
18 In duhdawttu le rualpi cu ka hnen ihsin a hlatnak ah na ret ih,
Ka hawipipawl khal thim sungah.

88:11^a Abaddon: Siatnak tinak a si.

89

David hnenih Pathian Thukham

Ezrah-mi Ethan-ih Maskil.

1 Jehovah lainatduhdawtnakpawl cu kumkhuain hla in ka sak ding;
Ka kâ in na rinumnak cu san hmuahhmuah hnenah ka theihter ding.
2 Ziangahtile kei in, «Lainatduhdawtnak cu kumkhuain tundīn a si ding,
Na rinumnak cu vanpawl ah na dĭnhnget ding,» tiah ka ti.
3 «Ka hril mi thawn thukham ka tuah,
Ka siahhlawh David hnenah sia ka săm ih,
4 ‹Na cithlah ka dĭnhnget kumkhua ding ih,
Na laltokham khal san hmuahhmuah tiangin ka tungding ding, › » tiah ka ti. Selah
5 Cule vanpawl in na mangbangzapawl an thangṭhat ding, Maw Jehovah;
Na rinumnak khal mithianghlimpawl punkhawmnak ah.
6 Ziangahtile vanpawl ah khin Jehovah thawi khaikhin theih zo so um?
Micakpawlih fapapawl lakah teh Jehovah thawi tahṭhim theih zo so um?
7 Pathian cu mithianghlimpawl punkhawmnak ah nasazetih ṭihzah ding a si,
Cule a kiangkapih um mi hmuahhmuah khalih upat ding a si.
8 Maw ralkap rualpawlih Pathian Jehovah,
Nangmah vekih micak zo so a um, Maw Jehovah?
Na rinumnak khal in nangmah a lo kulh a si.
9 Nang in tifinriat solet na uk;
A tisuarpawl an thawh tikah, dai ko na tuah hai.
10 Thah mi vekin ^aRahab kha na siatter ṭheh;
Na ralpawl kha a cak mi na bān in na ṭhekdarh ṭheh.
11 Vanpawl khi na ta an si, leilung khal hi na ta a si;
Leilung le a sungih um hmuahhmuah, na rak dĭn mipawl.
12 Sak lam le thlang lam, cupawl khal na sersiam mi an si;
Tabor le Hermon khal na hmin ah lungawiaipuangin an um.
13 Nang in a cak mi bân na nei;
Na kut cu a cak ih, na vawrh lam kut cu khaisan a si.
14 Dingfelnak le diknak cu na laltokham ṭohram an si;
Lainatduhdawtnak le thutak cu na hmaiah an feh.
15 Aipuanumza thawmvâng a theitu minungpawl cu mithlawsuak an si!
Annih cu, Maw Jehovah, na mithmai tleu ah an feh.
16 Na hmin ah sunnihlawh lungawiaipuangin an um ih,
Na dingfelnak in khaisan an si.
17 Ziangahtile nang cu an thazang ropitnak na si ih,
Nangmai duhsaknak ah kan ki khaisan a si.
18 Ziangahtile kan ralphaw cu Jehovah ta a si ih,
Kan siangpahrang khal Israel-ih Mi Thianghlim ta a si.
19 Cun na Mi Thianghlim hnenah larawknak in thu na sim ih,
«Micakpa hnenah băwmnak ka pek;
Mipi lak ihsin hril mi pakhat ka khaisâng.
20 Ka siahhlawh David ka hmu zo;
Ka hriak thianghlim thawn amah hriak ka thih.
21 Ka kut in amah a dĭnhnget ding;
Ka bân khal in amah a cakter ding.
22 Ral in amah an bum linglet lo ding ih,
Sualralnak fapa khal in a zawnzaiter lo ding.
23 A hmaiah amah dotupawl ka vawthlu hai ding ih,
Amah huatupawl ka hrem ding.
24 Ka rinumnak le ka lainatduhdawtnak cu a hnenah an um ding,
Cule ka hmin in a ki khaisan a si ding.
25 Cuihtlunah a kut kha tifinriat tlunah ka ret ding ih,
A vawrh lam kut kha tivapipawl tlunah.
26 Ka hnenah, ‹Nang cu ka Pa,
Ka Pathian le ka runsuahnak lungpi na si,› tiah a au ding.
27 Cuihhleiah amah cu ka fatir ah ka tuah ding,
Leilung siangpahrangpawl lakih a sângbik ah ka tuah ding.
28 Ka lainatduhdawtnak kha a hrangah ka ret kumkhua ding ih,
Ka thukham cu a hrangah a hnget ding.
29 A cithlah khal kumkhuain ka hmunter ding ih,
A siangpahrang tokham khal van um sung hmuah in.
30 A fapapawl in ka dān thlauthla in,
Ka cīn le dān ih an feh lo a si ahcun,
31 Ka sakhaw dānpawl pahbăl in,
Ka thupekpawl an thlun lo a si ahcun,
32 An dānpahbălnak kha fung in cawhkuan ka pe ding ih,
An mawhsualnak kha vuaknakpawl in.
33 Sikhalsehla ka lainatduhdawtnak cu a hnen ihsin cem ko ka la lo ding ih,
Ka rinumnak khal ka tlawlhter lo ding.
34 Ka thukham ka pahbăl lo ding ih,
Ka hmur ihsi a suak mi kamsuakthu khal ka tidanglam lo ding.
35 Vei khat ka thianhlimnak sālin sia ka săm;
David hnenah thuphan ka per lo ding.
36 A cithlah ka hmunter kumkhua ding ih,
A laltokham khal ka hmaiih ni vek a si fawn ding.
37 Thlapi bangtukin dĭnhngeh kumkhua a si ding,
Van ih thutheihpitu rinum vekin. Selah
38 Asinan nang in na hlăwn ih na hnáwng,
Na hriak thih mi parah na thin a so.
39 Na siahhlawh thukham na rak hnáwng;
A lallukhum kha lei parih hlăwnnak in na bawrhbangter.
40 A hruangpawl hmuahhmuah na bălsiat ṭheh;
A ralhruangkulhpawl na siat ṭheh.
41 A kiangih fehtupawl hmuahhmuah in amah cu an răm;
Amah cu a innhnenpawl lakah hmuhsuam mi ah a cang.
42 Amah dodaltupawlih vawrh lam kut na khaisâng;
A ralpawl hmuahhmuah aipuangin na tuah.
43 Cuihtlunah dung lamah a ralnâm hriam na kirter ih,
Raldonak ah amah na bawm lo.
44 A ropitnak na cemter ih,
A laltokham kha leilung ah na hlăwn.
45 A no lai cān na tawiter;
Amah cu ningzahnak in na tuam. Selah
46 Ziang tik tiang so, Maw Jehovah?
Kumkhuain na thupaw ringring ding maw?
Na thinlingnak cu meisa vekin a kāng ding maw?
47 Ka nunnak hi ziangtluk tawi a si ti kha cîng ringring aw;
Ziangahtile minung fātepawl hi ziangtluk santlailoin na sersiam?
48 Ziangtin minung cu thihnak hmu loin a nung thei ding?
A nunnak cu Sheol huham ihsin a runsuak thei ding maw? Selah
49 Bawipa, a hlanih na lainatduhdawtnak,
Na thutak ih David hnenih sia na săm kha khuiah so an si?
50 Bawipa, na siahhlawhpawl hmuhsuam an sinak hi cîng ringring aw.
Miphunpawl hmuahhmuah ih hmuhsuamnak cu ka ṭāng sungah ziang tlukin so ka tuar,
51 Cumi thawn na ralpawl in mi an hmuhsuam, Maw Jehovah,
Cumi thawn na hriak thih mi paih keneh an hmuhsuam.
52 Jehovah cu kumkhuain thangṭhat si seh!
Amen, Amen.

89:10^a Rahab: Sam 87:4 simfiangnak zoh aw.

Bu 4-nak

90

Kumkhaw Pathian le Ziamrál mai ding Milai

Pathian Mi, Mosi Thlacam.

1 Bawipa, nang cu san hmuahhmuah ih kan cēnnak na si.
2 Tlangpawl sēm hlan,
Asilole leilung le leitlun na rak tuah hlan ihsin,
Kumkhua ihsin kumkhua tiang, nang cu Pathian na si.
3 Nang in minung hi leivut ah na kirter ih,
«Minungpawlih falepawl tla, kirsal uh,» tiah na ti.
4 Na hmaiah kum 1000 cu
A cemrál mi mizansun vek a si ih,
Zan sentari kil ṭum khat tluk a si.
5 Anmah cu tilian vekin na thiarhlo hai;
An itthat.
Zing lamah cun hrampi kho a hung ṭhang mi vek an si.
6 Cumi cu zing lamah cun a par ih, a ṭhang;
Zan lamah a vuai ih a ziam.
7 Ziangahtile na thinhengnak in in kangrál ih,
Na thinlingnak in kan thla in phângter.
8 Na hmaiah kan mawhsualnak na ret,
Kan thupte sualpawl khal na mithmai tleu ah.
9 Ziangahtile kan damsung ni hmuahhmuah hi na thinlingnak ah an cemrál;
Kan damsung kumpawl khal thawsuah vekin an ziam.
10 Kan dam kumpawl cu kum 70 an si;
Cahnak ruangah kum 80 a si thei,
Sikhalsehla an tluangkhawnnak cu ṭuanbăngnak le riahsiatnak men a si;
Ziangahtile cumi cu a ziamrál lohli ih, kan zamhlo.
11 Zo in so na thinhengnak huham theithiam?
Ziangahtile na thinlingnak ṭih cu, nangmah ṭih tluk a si.
12 Fimnak thinlung kan neih theinak dingah,
Kan damsung nipawl siardān in zirh aw.
13 Ra kirsal aw, Maw Jehovah!
Ziang tik tiang so na rei ding?
Na siahhlawhpawl parah lainatnak nei hram aw.
14 Kan damsung ni hmuahhmuah ah aipuang le lungawiih kan um theinak dingah,
Zingpit teah na lainatduhdawtnak thawn kan di in riamter aw!
15 In zăwnzaihter zonak nipawl zulhin in lungawiter aw,
Thil ṭhalo kan rak hmuh kumpawl thawi milawin.
16 Na siahhlawhpawl hnenah na thil ti lang seh,
Cule na ropitnak khal an falepawl hnenah lang seh.
17 Kan Pathian Jehovah-ih duhsaknak cu kan tlunah um sehla,
Kan kut thil tipawl hi kanmah hrangah dĭnhnget si seh;
A si, kan kut thil tipawl hi kanmah hrangah dĭnhnget si seh.

91

Pathian hnenih Beu cu Himnak

1 Cungnung Bik-ih kilhimnak ih a cêngtu cu,
Ziangkimtithei-ih thlahlim hnuaiah a um ringring ding.
2 Jehovah thuhla ah cun, «Amah cu ka răwlhimnak le ka kulhhnget,
Ka rinsan mi ka Pathian a si,» tiah ka ti ding.
3 Anih cun thangkamtuih tháng lak ihsin le
Thih theinak nathrisiapawl lakin a lo runsuak hrimhrim ding.
4 A thla hmulpawl thawn a lo khuh ding ih,
A thla hnuaiah răwlhimnak na hmu ding;
A thutak cu na ralphaw le na ralphaw pi a si ding.
5 Zan ah ṭihnungza na ṭih lo ding ih,
Sun ih a zam mi thálfungpawl siseh,
6 Thim lakih vâk mi nathrisia siseh,
Sun laiih ṭhing ko mi tuahtu siatralnak siseh na ṭih lo ding.
7 Na kiangah minung 1000 an tlu ding ih,
Na vawrh lamah 10000;
Asinan cuih natsia cun a ra lo naih lo ding.
8 Na mit lawngin na zoh ding ih,
Misualrálpawl thungrulhnak na hmu ding.
9 Ziangruangahtile Jehovah cu na răwlhimnak ah na tuah,
Cungnung Bik rori hman na cēnnak ah.
10 Na parah thil ṭhalo zianghman a thleng lo ding ih,
Ziang vek nathri hman na puanthlam kiangah a ra lo ding.
11 Ziangahtile na lamzinpawl hmuahhmuah ih lo kilveng dingah,
Na cungcangthu ah a vancungmipawl thu a pe ding,
12 An kut in an lo dăwm ding,
Culole na ke in lungto a khawngngah pang ding.
13 Nang in kiosa le cawngawr na pál ding,
Kiosa vanglai le rul cu na ke tăngah na cīl ding.
14 Ziangruangahtile ka parah a duhdawtnak a ret, curuangah amah ka runsuak ding;
Amah cu hmun sâng ah ka ret ding,
Ziangruangahtile anih in ka hmin a thei.
15 Anih in i ko ding ih, kei in ka sawn ding;
Harsatnak ah a hnenah ka um ding;
Amah cu ka runsuak ding ih, ka cawisâng ding.
16 Nun saunak thawn amah cu a di ka riamter ding ih,
Ka runsuahnak ka hmuh ding.

92

Phubalak ruangih Thangṭhatnak

Sam. Sabbath Ni Hrang Hla.

1 Jehovah hnenih lungawi thu sim le,
Hla ih na hmin thangṭhat hi a ṭha, Maw Cungnung Bik;
2 Zing lamih na lainatduhdawtnak thăn le,
Zan tin na rinumnak thăn khal,
3 Hri hra nei cawngcing le,
Ṭingṭang awnmawi thawn na hmin thangṭhat hi.
4 Ziangahtile Jehovah, nang in na thil ti in ka lung i awiter;
Na kut thil tipawl ruangah aipuangin hla ka sak ding.
5 Na thil tipawl hi ziang tlukin so an natsat, Maw Jehovah!
Na ruahnakpawl hi an thûk tuk.
6 Ruahnak nei lo pa cun a thei lo ih,
Mi-â khal in cumi cu a theithiam lo.
7 Misualrálpawl hrampi vekih an ṭhan tikah le,
Mawhsualnak tuahtupawl hmuahhmuah an ṭhanso tikah,
Cumi cu anmahpawl siatsuah an si kumkhua theinak dingah a si.
8 Asinan Jehovah, nang cu cawisanin na um kumkhua.
9 Ziangahtile ngai hnik, na ralpawl hi, Maw Jehovah,
Ziangahtile zoh hnik hman, na ralpawl hi an hlorál ding;
Mawhsualnak tuahtupawl hmuahhmuah an ṭekdarh ṭheh ding.
10 Asinan ka ki cu ramlak câwcang ki bangin na khaisâng;
Kei cu hriak thar thih ka si.
11 Ka mit khal in ka ralpawl parih ka saduhthah a hmu;
Ka hna khal in keimah i dotu,
Misualrálpawl parih ka saduhthah a thei.
12 Midingfel cu ṭhulhfau kung bangin an hring demdem ding,
Lebanon sidar bangin an ṭhang ding.
13 Jehovah inn sungih phŭn mipawl cu
Kan Pathian sūmtualrawnpawl ah an hring demdem ding.
14–15 Jehovah cu midingfel a si ti thăn dingah,
An tar hnu khalah an rah lai thotho ding;
Thlīng pai in an hring demdem ding.
Amah cu ka lungpi a si ih, amah ah dingfellonak zianghman a um lo.

93

Jehovah-ih Kumkhaw Uknak

1 Jehovah in lai a rel, amah cu cungnunnak thawn a thuamaw;
Jehovah cu a thuamaw,
Cahnak thawn a tâi a khăpaw.
Thungaiin leilung cu dĭnhnget a si, curuangah hninter a si lo ding.
2 Na laltokham cu hlanlai ihsi rak dĭnhnget mi a si;
Nang cu kumkhua ihsin na si.
3 Maw Jehovah, tilianpawl an sosâng,
Tilianpawl in an aw an suah;
Tilianpawl in an tisuarpawl an khaisâng.
4 Hmun sâng ih a um mi Jehovah cu
Tidai tampi thâwm hnakin le,
A cak zet mi tifinriat tisuar hnakin a caksawn.
5 Na thutheihtermipawl cu an hnget taktak;
Thianghlimnak le na inn cu an milaw, Maw Jehovah, a kumkhuain.

94

Midingfel Răwlhimnak Pathian

1 Phuba latu Pathian, Maw Jehovah, phuba latu Pathian, êngsuak aw!
2 Maw leilung thuṭhentu, tho aw;
Mipuarthaupawl thungrūl aw.
3 Maw Jehovah, misualrálpawl hin ziang tik tiang,
Misualrálpawl hin ziang tik tiang so tluang an khawn ding?
4 Annih in thu an sim ih, hngal zetin an ṭawng;
Mawhsualnak tuahtupawl hmuahhmuah cu an tluangkhâwng.
5 Na mipawl an khiakdip ṭheh, Maw Jehovah,
Cule na co mi ropawl an zawnzaiter.
6 Nuhmeipawl le mikhualpawl an that ih,
Pa nei lo pawl khal an that.
7 Cucingcun, «Jehovah in a hmu lo,
Jakob Pathian khal in a ngaihsak lo,» tiah an ti lai.
8 Nannih mipi lakih ruahnak nei lo pawl, ngaihsak uh;
Cule nannih mi-âpawl, ziang tikah so nan fim ding?
9 Hná tuahtu cun thei loin a um ding maw?
Mit tuahtu cun hmu loin a um ding maw?
10 Miphunpawl nunsimtu cun nunsim loin a um ding maw,
Milai zirhtu cun theihnak a nei lo ding maw?
11 Jehovah in milai ruahnakpawl a thei,
Zianghmanlo an si ti a thei.
12 Maw Jehovah, nun na zirh ih,
Na dān na zirh mi pa cu mithlawsuak a si,
13 Cutin anih cu misualrálpawl hrangih khur laih a si hlanlo,
Harsatmangbang nikhuapawl ihsin hahdamnak na pek theinak dingah a si.
14 Ziangahtile Jehovah cun a mipawl a hnáwng lo ding ih,
A ro cu a tansan lo ding.
15 Asinan diknak kha dingfelnak lamah a kirsal ding ih,
Thinlung dĭngpawl hmuahhmuah in cumi cu an thlun ding.
16 Zo so ka hrangah thil ṭhalo tuahtupawl dokalh dingih tho ding?
Zo so ka hrangah mawhsualnak tuahtupawl dokalh dingah ding ding?
17 Jehovah hi i bawmtu rak si hlah sehla cu,
Ka nun hi hmunreh ah a rak um zo ding.
18 «Ka ke a nâl,» ka ti asile, Maw Jehovah,
Na lainatduhdawtnak in i dăwmcawisal ding.
19 Dawnharnak tampi ka neih tikah,
Na mihnemnak in ka thin a nuamter.
20 Mipalbĕtnak dān tuahtu, siatralnak laltokham thawn nan ṭangtlang thei ding maw si?
21 Midingfel nunnak do dingah an tawngkhawmaw,
Cule mawh nei lo thisen thiamlo coter dingin.
22 Asinan Jehovah cu ka khawkulh hnget le,
Ka Pathian ka răwlhimnak lungpi a si.
23 An parah anmai mawhsualnak a thlenter ih,
Anmai sualralnak ah a that hai ding;
Jehovah kan Pathian in a that hai ding.

95

Amah Be ding le Thulung dingih Kawhnak

1 Ra uh, Jehovah hnenah hla sak uhsi!
Kan runsuahnak Lungpi hnenah aipuang zetin au uhsi.
2 A hmaiah lungawi thu simnak thawn feh uhsi;
Sam hla thawn a hnenah aipuang zetin au uhsi!
3 Ziangahtile Jehovah cu Pathian ropi a si,
Cule pathianpawl hmuahhmuah tlunah Siangpahrang ropi a si.
4 A kut ah leilung hmun thûkpawl an um;
Tlang zimpawl khal amai ta an si.
5 Tifinriat khal amai ta a si, ziangahtile a tuah mi a si;
Cule a kutpawl in khawmual a sersiam.
6 Aw ra uh, băwkkhupin amah bia uhsi;
In tuahtu Jehovah hmaiah cun kan khukbil uhsi.
7 Ziangahtile amah cu kan Pathian a si,
Cule kanmahpawl cu a ran tlannak hmun ih minungpawl kan si ih,
A kilkhawi mi tuu rual kan si.
Tuihsun ah a aw nan theih asile:
8 Ramṭhing ih hniksak ni ih hel lai vek khan,
Nan thinlung hakter hlah uh.
9 Nan pupápawl in in rak hniksak tikah;
Ka thil ti hmu ko na cingin, in rak hliakhlai a si.
10 Cuih san minungpawl cu kum 40 sung ka fih hai,
Cule kei in, «Annih cu an thinlung ih fehpêng minung an si ih,
Ka duhdān an thei lo,» tiah ka ti.
11 Curuangah ka thinling in,
«Ka cawlhnak ah an lut lo ding,» tiah sia ka săm.

96

Thuṭhennak thawi Ra ding Mi Pathian Thangṭhatnak

1 Jehovah hnenah hla thar sak uh!
Leilung hmuahhmuah tla, Jehovah hnenah hla sak uh.
2 Jehovah hnenah hla sak uhla, a hmin thangṭhat uh;
Ni khat hnu ni khat a runsuahnak thuthangṭha phuang uh.
3 Miphunpawl lakah a ropitnak thăn uh,
Minungpawl hmuahhmuah lakah a mangbangzapawl.
4 Jehovah cu a ropi ih, ropi zetih thangṭhat ding a si;
Amah cu pathianpawl hmuahhmuah hnakih ṭih ding a si.
5 Ziangahtile miphunpawlih pathianpawl hmuahhmuah cu milem an si,
Asinan Jehovah cun vanpawl a tuah.
6 Upatnak le cungnunnak cu a hmaiah an um;
Cahnak le mawinak cu a hmun thianghlim ah an um.
7 Maw miphunpawlih sungkuapawl, Jehovah hnenah pe uh,
Jehovah hnenah sunlawihnak le cahnak pe uh.
8 A hmin ropitnak cu Jehovah hnenah pe uh;
Thilhlăn kengin, a sūmtualrawnpawl ah ra uh.
9 Aw, thianhlimnakih mawinak ah Jehovah cu biak uh!
Leilung hmuahhmuah tla, a hmaika-ah khūr uh.
10 Miphunpawl lakah, «Jehovah in a uk;
Leitlun khal hngetkhoh zetih dĭnsuah a si,
Hninter a si lo ding;
Anih in dingfel zetin minungpawl cu thu a ṭhen ding,» tiah ti uh.
11 Lungawiaipuangin vanpawl um hai sehla, leilung khal lungawi seh;
Tifinriat le a sungih umpawl tla hûk durdo hai seh.
12 Lóram cu aipuang sehla, a sungih um hmuahhmuah khal.
Cun tupi sungih thingkungpawl hmuahhmuah khal Jehovah hmaiah lungawiaipuangin um hai seh.
13 Ziangahtile amah cu a ra ding, ziangahtile amah cu leilung thuṭhen dingah a ra ding.
Dingfelnak thawn leitlun thu a ṭhen ding ih,
Miphunpawl kha thutak thawn.

97

Jehovah Thangṭhatnak Hla

1 Jehovah in a uk;
Leilung cu lungawiaipuangin um seh;
Tikulh tampi cu lungawiin um hai seh!
2 Khawdurpawl le khawthim in amah an kulh;
Dingfelnak le diknak cu a laltokham ṭohram an si.
3 A hmaiah meisa a feh ih,
A kiangkapih um a ralpawl a kangrál hai.
4 A nimthlakaupawl in lei an tlet;
Leilung in a hmu ih a khūr.
5 Tlangpawl cu Jehovah hmaika-ah khuailûl bangin an zŭp,
Leilung pumpiih Jehovah hmaika-ah cun.
6 Vanpawl in a dingfelnak an thăn ih,
Miphunpawl hmuahhmuah in a ropitnak an hmu.
7 Khercawp milimpawl a riantu,
Milempawl tluangkhawnpitupawl hmuahhmuah cu ningzahter si hai seh.
Nannih pathianpawl hmuahhmuah amah cu bia uh!
8 Zion in a thei ih a lung a awi,
Cule na thuṭhennakpawl ruangah
Judah fanupawl lungawiaipuangin an um, Maw Jehovah.
9 Ziangahtile Jehovah, nang cu leilung hmuahhmuah tlunah Cungnung Bik na si;
Nang cu pathianpawl hmuahhmuah tlun sângpi ih khaisan na si.
10 Nannih Jehovah duhdawtupawl, thil ṭhalo hua uh!
Anih cun a mithiangpawlih nunnak a humhim;
Misualrálpawlih kut ihsin a runsuak hai.
11 Tleu cu midingfel hrangih tuh a si ih,
Lungawinak cu thinlung dĭngpawl hrangah.
12 Jehovah ah lungawiaipuangin um uh, nannih midingfelpawl,
Cule a hmin thianghlim cīn ringring nak ah a hnenah lungawi thu sim uh.

98

Leitlun Thuṭhentu Thangṭhatnak

Sam.

1 Aw, Jehovah hnenah hla thar sak uh!
Ziangahtile amah in mangbangza thilpawl a tuah;
A vawrh lam kut le a bân thianghlim in amai hrangah nehnak a co.
2 Jehovah in a runsuahnak a theihter;
Miphunpawl mithmuhah a dingfelnak a phuanglang.
3 Israel sungkuapawl hnenah a lainatduhdawtnak le a rinumnak cu a cîng ringring;
Leilung dĕng tiangih um hmuahhmuah in kan Pathian-ih runsuahnak an hmu.
4 Leilung hmuahhmuah tla, Jehovah hnenah aipuang zetin au uh;
Hla thawn ausuak uh, lungawiaipuangin um uhla, thangṭhatnak hla sak uh.
5 Jehovah hnenah ṭingṭang thawn hla sak uh,
Ṭingṭang le Sam hla awnmawi thawn,
6 Tawtawrawtpawl le tuupa ki phawt awn thawn;
Jehovah, Siangpahrang hmaiah aipuang zetin au uh.
7 Tifinriat le a sungih um hmuahhmuah cu hûk durdo hai seh,
Leitlun le a sungih umpawl khal.
8 Tivapawl in an kut bēng hai sehla;
Tlangpawl khal Jehovah hmaika-ah aipuangin hla saktlang hai seh.
9 Ziangahtile anih cu leilung thuṭhen dingin a ra ding.
Dingfelnak thawn leitlun thu a ṭhen ding,
Cule miphunpawl parah thleidănnak um loin.

99

A Thianhlimnak ruangih Jehovah Thangṭhatnak

1 Jehovah in a uk;
Miphunpawl khūr hai seh!
Anih cu cherub-pawl tlunah a um;
Leilung hnîn seh!
2 Jehovah cu Zion ah a ropi a si,
Cule anih cu miphunpawl hmuahhmuah ih tlunah cawisan a si.
3 Annih in na hmin ropi le maksak cu thangṭhat hai seh.
Anih cu a thianghlim a si.
4 Siangpahrang cahnak khal in diknak a duh;
Nang in thleidăn umlonak na dĭnhnget zo;
Nang in Jakob ah diknak le dingfelnak in thu na ṭhen zo.
5 Jehovah kan Pathian cu cawisâng uhla,
A keretnak ah biak uh.
Anih cu a thianghlim a si.
6 Mosi le Aaron cu a puithiampawl lakih tel an si ih,
Samuel cu amah kotupawl lakih tel a si.
Anmahpawl in Jehovah an ko ih anih in a sawn hai.
7 Annih cu khawdur ṭhuam ihsin a be hai;
An hnenih a pek mi a thutheihtermipawl le a cīn le dān an thlun.
8 Maw Jehovah kan Pathian, anmah cu na run sâng hai a si;
An thil ti mipawl parah phuba na la ko nân,
An hrangah cun ngaithiamtu Pathian na si.
9 Jehovah kan Pathian cu khaisâng uhla,
A tlang thianghlim ah bia uh;
Ziangahtile Jehovah kan Pathian cu a thianghlim a si.

100

Pathian Thangṭhat dingih Ram hmuahhmuah Kawhnak

Lungawi Thu Simnak Sam.

1 Nannih ram hmuahhmuah tla, Jehovah hnenah aipuangin au uh!
2 Lungawi zetin Jehovah rian uh;
Hla sak phahin a hmaika-ah ra uh.
3 Amah Jehovah cu Pathian a si ti thei uh;
Kanmahpawl in tuahtu cu amah hi a si ih, kanmah kan si lo;
Kanmah cu a minung kan si ih, a ran tlannak hmun ih tuu rual kan si.
4 Lungawi thu sim phahin a kăwt sungah lut uhla,
A sūmtualrawnpawl ah thangṭhatnak thawn.
A parah lungawi uhla, a hmin thangṭhat uh.
5 Ziangahtile Jehovah cu a ṭha a si;
A lainatduhdawtnak cu kumkhuain a hmun ih,
A thutak cu san hmuahhmuah a daih.

101

Jehovah hnenah Rinum dingih Thutiamnak

David-ih Sam.

1 Lainatduhdawtnak le diknak thu cu hla in ka sak ding;
Maw Jehovah, na hnenah thangṭhatnak hla ka sak ding.
2 Sawisel ding um lo nundān lamah ka thinlung ka pe ding.
Aw, ziang tikah so ka hnenih na rat ding?
Ka inn sungah sawihnăwm kai lo thinlung thawn ka nung ding.
3 Ka mithmuhah thil santlailo ka ret lo ding;
A tlubah mipawlih thil ti ka hua;
Cumi cu ka hnenah a kăwp lo ding.
4 A khermei mi thinlung in i fehsan ding;
Sualralnak ka thei lo ding.
5 A thupteih a innhnen a relsetu pauhpauh cu,
Keimah in ka siatsuah hai ding;
Hngalnak mithmai a neitu le pawrhawknak thinlung a neitu cu,
Keimah in ka zāwi lo ding.
6 Ka hnenih an cēn theinak dingah,
Ram sungih mirinumpawl parah ka mit a fu ding;
Sawisel ding um lo zin ih a fehtu in,
Keimah i rian ding.
7 Bumnak ih thil titu cu ka inn ah a cêng lo ding;
Thuphan pertu cu ka mithmuhah a umhnget thei lo ding.
8 Jehovah khawpi sung ihsin thil ṭhalo tuahtupawl ka sahtan theinak dingah,
Ram sungih misualrálpawl hmuahhmuah cu zing tin ka siatsuah hai ding.

102

Kumkhaw Siangpahrang hnenih Băwmnak hrang Thlacam

A cau ih, Jehovah hmaika-ih phunzainak a thletbŭng laiih zăwnzaihnak tuartuih thlacamnak.

1 Ka thlacamnak ngai aw, Maw Jehovah,
Na hnenah ka aunak thleng seh.
2 Ka harsat ni ah ka hnen ihsin na hmai thup hlah aw;
Ka lamah na hna tháwng aw;
Ka lo kawh nikhua ah, zamrangten i let aw.
3 Ziangahtile ka damsung cān cu meikhu vekin an kangrál ih,
Ka ruhpawl khal thŭk vekin an kāng.
4 Ka thinlung hi hriamnat a si ih hrampi vekin a vuai,
Cutin ka rawl ei ding hman ka hngilh.
5 Ka aihram awnau ruangah
Ka ruhpawl ka vun ah an bĕt.
6 Kei cu ramṭhing ih ^aka-at va vek ka si;
Kei cu nelrawn sumbuh vek ka si.
7 Zau phahin ka meng,
Cule inn luanglu parih sunṭam lileng vek ka si.
8 Ka ralpawl in sunnihlawh in in hmuhsuam,
Hnihsuahsainak ih i hmangtupawl cun ka hmin an camsiat.
9 Ziangahtile rawl vekin vutcâm ka ei ih,
Ka in mi khal mitthli thawn ka rawi,
10 Na aithawknak le na thinlingnak ruangah a si;
Ziangahtile nang in i cawisâng, cule i hlăwnhlo.
11 Ka damsung cān cu thlahlim sauter mi vek a si ih,
Kei cu hrampi vekin ka vuaihlo.
12 Asinan Maw Jehovah, nang cu kumkhuain na hmun ih,
Na cīn ringring nak cu san hmuahhmuah tiangin a si.
13 Na tho ding ih, Zion parah lainatnak na nei ding;
Ziangahtile amah duhsaknak cān a thleng,
A si, cān khiah mi a kim thlang.
14 Ziangahtile na siahhlawhpawl cu a lungtopawl ah an lung a hmui ih,
A leivut hnen khalah duhsaknak an hmuh.
15 Cutin miphunpawl in Jehovah hmin an ṭih ding ih,
Leitlun siangpahrangpawl hmuahhmuah in na ropitnak.
16 Ziangahtile Jehovah in Zion a tungding ding;
A ropitnak thawn a lang ding.
17 Miretheipawlih thlacamnak a ngaihsak ding ih,
An thlacamnak ziang siarloin a um lo ding.
18 Sersiam lai ding mi san minungpawl in Jehovah an thangṭhat theinak dingah,
Himi hi a ra lai ding mi san hrangih ngan a si ding.
19 Ziangahtile anih cun a sang mi a hmun thianghlim ihsin a run zoh;
Jehovah in van ihsin leilung a run thlir.
20 Thawngtlapawl aihram aw thei dingah le,
Thah dingih relcat mipawl luatter dingah,
21 Zion ih Jehovah hmin thăn dingah le,
Jerusalem ih amai thangṭhatnak thăn dingah,
22 Jehovah rian dingih miphunpawl le
Lalrampawl an tawnawkkhawm tikah.
23 Lamlak ah ka tha a ṭumter ih;
Ka damsung cān a tawiter.
24 Kei in, «Maw ka Pathian,
Ka san ṭhat lai cān ah i lahlo hlah aw;
Na kumpawl cu san hmuahhmuah hrawhsuakin a si.
25 Khuahlan laiah leilung ṭohram na rak bŭn ih,
Vanpawl khi nangmai kutsuak an si.
26 Cupawl cu an hlorál leh ding, asinan nang cu na hmun ding;
A si, cupawl hmuahhmuah cu sinfen bangin an hlun thluh leh ding;
Puan bangin cupawl cu na thleng ding,
Cule an hlorál ding.
27 Asinan nang cu nangmah kêl na si,
Cule na kumpawl in cem ti an nei lo ding.
28 Na siahhlawhpawlih fātepawl cu an umpeh vivo ding,
Cule an tesinfapawl khal na hmaika-ah dĭnhnget an si ding,» tiah ka ti.

102:6^a ka-at va: Pui 11:18 simfiangnak zoh aw.

103

Pathian Ṭhatnak ruangih Lungawi Thu Simnak

David-ih Sam.

1 Maw ka nunnak, Jehovah thangṭhat aw;
Ka sungih a um mi hmuahhmuah tla, a hmin thianghlim thangṭhat uh.
2 Jehovah thangṭhat aw, Maw ka nunnak,
A ṭhahnem mi a thil ti mi hmuahhmuah hngilh hlah:
3 Na mawhsualnakpawl hmuahhmuah lo ngaithiamtu,
Na nathripawl hmuahhmuah lo tidamtu,
4 Khur ihsi na nunnak runsuaktu,
Lainatduhdawtnak le lainatnak lo khumtertu,
5 Na nonak muvanlai vekih a tharthawhsal theinak dingih,
Na saduhthah thil ṭhapawl thawi lo diriamtertu a si.
6 Jehovah in palbĕt mipawl hmuahhmuah hrangah dingfelnak le
Diknak in thu a ṭhen.
7 Anih in Mosi hnenah a lamzinpawl a theihter,
Israel tefapawl hnenah a hnaṭuandānpawl.
8 Jehovah cu zahngainak le zangfahnak thawi khat a si,
A thin a fûal ih, lainatduhdawtnak ah a luangliam.
9 Anih cun in buan ringring lo ding ih,
A thinhengnak a khawl kumkhua fawn lo ding.
10 Kan sualnakpawl vekin kan parah a ti lo ih,
Kan mawhsualnakpawl vekin in thungrūl fawn lo.
11 Ziangahtile vanpawl khi leilung hnakih an san zet vekin,
Amah ṭihzahtupawl lamah a lainatduhdawtnak khal a nasa a si.
12 Nisuahnak lam cu nitlaknak lam ihsin a hlat vekin,
Kan dānpahbălnakpawl cu kan hnen ihsin anih in a ṭhawnhlo.
13 Pa in a falepawl a zangfah vekin,
Jehovah in amah ṭihzahtupawl a zangfah a si.
14 Ziangahtile anih in kan taksaruangâm a thei;
Leivut kan si kha a cîng ringring.
15 Minung bélte cu, a damsung cānpawl cu hrampi vek a si;
Ramlak pangpar vekin, anih cu a par.
16 Ziangahtile thli in a hran ih a hlorál,
Cule a umnak hmun in a cîng nawn lo.
17 Asinan Jehovah-ih lainatduhdawtnak cu
Amah ṭihzahtupawl parah kumkhua ihsin kumkhua tiang a um,
Cule a dingfelnak khal an fātepawlih fatepawlsin tiang.
18 A thukham thluntu le,
A thupekpawl tuah dingih cîng ringring tupawl par khalah cuvekin a si thotho.
19 Jehovah in a laltokham van ah a dĭnhnget ih,
A lalram in ziang hmuahhmuah a uk ṭheh.
20 Cahnak ih nasa, a kamsuakthu ngaithla ih, a thu tuahsuaktu,
Nannih vancungmipawl,
Jehovah cu thangṭhat uh.
21 Nannih a ralkap rual hmuahhmuah,
Amai lunghmuizawng tuah ih, amai rawngbawltupawl, Jehovah cu thangṭhat uh.
22 A uknak hmunpawl hmuahhmuah ih,
Amai kutsuakpawl tla, Jehovah cu thangṭhat uh.
Maw ka nunnak, Jehovah cu thangṭhat aw.

104

Sersiamtu Jehovah Thangṭhatnak

1 Maw ka nunnak, Jehovah cu thangṭhat aw.
Maw Jehovah ka Pathian, nang cu na ropi tuk:
Nangmah cu maksaknak le cungnunnak ih thăwm na si,
2 Nangmah ten tleu kha sinfen vekin na hruh,
Vanpawl khi puanzar vekin na pharh.
3 Anih in tidaipawl ah a pindan tluntapawlih tlângkhanpawl ah a ret,
Khawdurpawl kha ránglêng ah a hmang,
Thlipi thlapawl parah a tlanglêng.
4 Thli kha a thuphurtupawl ah a tuah,
Meialh kha a rawngbawltupawl ah.
5 Anih in leilung cu a ṭohrampawl parah a dĭn,
Ziang tik khalah a hnîn dah lo ding.
6 Cumi cu tipi thûk zet thawn sinfen vekin na khuh;
Tipi cu tlangpawl tlunah an ding.
7 Annih cu na kawk tikah an tlân;
Na khawpiri awn ruangah zamrangin an feh.
8 Tlangpawl parah an kaiso;
Phaikuampawl ah an ṭum,
An hrangih na tuah mi hmun ah.
9 An lan theilonak dingah ramri na ret,
Leilung khuh dingin an ra kirsal theilonak dingah a si.
10 Anih in phaikuampawl ah cirhti a luangter,
Tlangpawl karlakah an luang.
11 Cupawl cun ramsa tinkim in ding an pe;
Hramlak lākpawl khal in an tihāl an riamter.
12 Vanpawlih vâtepawl tla an kiangah bu an nei;
Thing hngepawl lakah hla an sak.
13 A pindan tlunta ihsin tlangmualpawl tidai a tawih;
Leilung cu na thil tipawlih rah in a khăwpkham.
14 Anih in leilung ihsin rawl a suahter theinak dingah,
Rannung hrangah hrampi a khoter ih,
Minung in lei a leh theinak dingah thlai kungpawl,
15 Minung thinlung lungawitertu sabitzu,
A mithmai êngtertu hriak le,
Minung thinlung caktertu sangpawl tla.
16 Jehovah thingkungpawl cu khăwpkham zetih ti tawih an si,
A phŭn mi Lebanon ih sidarpawl cu,
17 Cu tawkah vâtepawl in an bupawl an sak;
Ngathûr in far thingpawl ah bu a nei.
18 Tlang sângpawl cu zâtharpawl hrangah an si;
Khāmpawl cu shafanpawlih răwlhimnak an si.
19 Tiklecupawl hrangah thlapi a ruat;
Ni in a tlaknak ding a thei.
20 Nang in thim na tuah ih, cumi cu zan a si,
Cu tawkah tupi sung ramsapawl hmuahhmuah an vâksuak.
21 Kiosa vanglaipawl in an sa deh ding thlunin an hrûm ih,
Pathian hnen ihsin an rawl an hawl.
22 Ni a suah tikah, an tlung ih,
An pûkpawl ah an băwk.
23 Minung cu a hnaṭuannak ah le,
A ṭuanbăngnak ah sîm lam tiang a fehsuak.
24 Maw Jehovah, na thil tipawl hi ziangtluk phun tam so a si!
Cupawl hmuahhmuah cu na fimnak thawi na tuah mi an si.
Leilung cu na sersiam mipawl in a khat.
25 Khi tawkah a tûm le a kau mi tifinriat a um,
A sungah siar cawk lo thilnung tampi an um,
Nunnak nei a te le a tûm pawl thawn.
26 Cu tawkah lăwngpawl an feh;
Cutawk hmun ah lek dingih na tuah mi Leviathan khal a um.
27 A tikcucān teih an rawl na pek theinak dingah,
Cupawl hmuahhmuah cun nangmah an lo hngak.
28 Annih in na pek hai mipawl an khawm;
Na kut na san, annih cu thil ṭha in an khat.
29 Na hmai na thuh tikah, harsatnak an táwng;
An thaw na laksak tikah, an thi ih leivut ah an kir.
30 Na Thlarau na thlah ih, annihpawl cu sersiam an si;
Cule leilung vangdâp na thartersal.
31 Jehovah ropitnak cu hmun kumkhua hram seh;
Jehovah cu a thil ti mipawl ah lungawiaipuangin um seh.
32 Anih in leilung a run zoh ih, leilung a khūr;
Tlangpawl a thâm hai ih, meikhu an suak.
33 Ka nunsung hmuahhmuah Jehovah hnenah hla ka sak ding;
Ka damsung hmuahhmuah ka Pathian hnenah thangṭhatnak hla ka sak ding.
34 Ngunngaih zetih ka ngaihtuahnak hi a hrangah thlum hram seh;
Kei lawngte cu, Jehovah ah ka lung a awi ding.
35 Misualpawl kha leilung par ihsin kangrál ṭheh si hai sehla,
Misualrálpawl um nawn hlah hai seh.
Maw ka nunnak, Jehovah cu thangṭhat aw!
Jehovah thangṭhat aw!

105

Jehovah-ih Kumkhaw Rinumnak

1 Aw, Jehovah hnenah lungawi thu sim uh!
A hmin ko uh;
Miphunpawl lakah a thil ti mipawl theihter uh!
2 A hnenah hla sak uh, a hnenah Sam hla sak uh;
A mangbangza thil ti mi zaten rel uh.
3 A hmin thianghlim tluangkhawnpi uh;
Jehovah hawltupawlih thinlung cu lungawiaipuangin um seh.
4 Jehovah le a cahnak hawl uh;
A mithmai hawl camcin uh!
5 A tuah mi mangbangza a thil ti zo mipawl cîng ringring uh,
A thilmakpawl le a relsuak mi thuṭhennakpawl khal,
6 Maw, a siahhlawh Abraham-ih cithlah,
Nannih Jakob-ih tefapawl, a hril mipawl tla!
7 Amah cu Jehovah kan Pathian a si;
A thuṭhennakpawl cu leilung hmuahhmuah ah a um.
8 A thukham a cîng ringring,
San 1000 hrangih a thupek, a kamsuakthu khal.
9 Abraham thawi a tuah mi thukham le,
Isak hnenih a thukam thawn.
10 Cule cumi cu Jakob hnenah sakhaw dān hrangah a nĕmhnget,
Israel hnenah kumkhaw thukham hrangah,
11 «Ro ih na covo hrangah,
Na hnenah Kanaan ram ka lo pe ding,» tiah a ti.
12 Anmahpawl mipum málte an si lai,
Málte taktak an si ih, cuih ram ih mikhual an si laiah.
13 Anmahpawl cu ram pakhat ihsin a dangah,
Lalram pakhat ihsin a dang mipi hnenih an feh tikah,
14 Zohman anmah va dekcăwk ding a siang lo;
A si, anmah ruangah siangpahrangpawl a kawk.
15 «Ka hriak thih mipawl hi dai hlah uhla,
Ka profetpawl tuahmawh hlah uh,» tiah a ti.
16 Cuihhleiah an ram ah mangṭam a tlunter;
An neih mi thlairawl hmuahhmuah a siatsuah ṭheh.
17 An hmaiah mi pakhat a thlah,
Sál ih an zuar mi Joseph cu.
18 A ke cu thir cikcinpawl in an tuahmawh,
Amah cu thirkual sungah an ret.
19 A sim sung mi thu a thlenkimnak ding tikcu a thlen hlanlo,
Jehovah kamsuakthu in amah a hniksak.
20 Siangpahrang in mi a thlah ih amah cu an suakter,
Miphunpawl uktu in amah a luatter.
21 A sungza hotu ah le,
A neih hmuahhmuah uktu ah a tuah,
22 A bawipawl a duh vekih ṭemṭawn dingah le,
A miupapawl fimnak zirh dingah.
23 Israel khal Izip ah a feh ih,
Jakob cu Ham ram ah a cêng.
24 A mipawl nasazetin a punter ih,
An ralpawl hnakih cakdeuhin a tuah hai.
25 A mipawl hua dingin le
A siahhlawhpawl hrăwkhrawl zetih ti dingin an thinlung a letter.
26 A siahhlawh Mosi le,
A hril mi Aaron a thlah.
27 Annih in a thilmak hminsinnakpawl cu an lakah an tuah ih,
Ham ram ah mangbangzapawl.
28 Thim a thlah ih, thim ko a tuah;
Cule a kamsuakthu an dokalh nawn lo.
29 An tidaipawl thisen ah a canter ih,
An ngapawl a that.
30 An ram cu butlak in a khat,
An siangpahrangpawlih pindan sung tiangin.
31 Thu a pe ih, thothe rual burpi an ra,
Cule an ram sung hmuahhmuah ah fikte an khat ṭheh.
32 Anih in ruah aiah rial a pek hai ih,
An ram ah nimthlakau khal.
33 An sabit hripawl le theipi kungpawl a vawsiat ih,
An ram sungih thingkungpawl thinghniar ah a canter.
34 Thu a pe ih, kharbawkpawl an ra,
Siar cawk lo kharbawk nopawl.
35 Cule an ram ih thlai kung zaten an ei ṭheh,
Cule an leiram rahsuak mipawl an ei ṭheh.
36 An ram ih fatir hmuahhmuah khal a that,
An cahnak rah hmaisabik hmuahhmuah cu.
37 Anmahpawl cu sui le ngun thawn a hruaisuak hai ih,
A hnámpawl lakah micaklo pakhat hman an um lo.
38 Anmahpawl an fehsuah tikah Izip a lung a awi,
Ziangahtile anmah cu an ṭih.
39 Khuhtu dingah khawdur a pharh ih,
Zan ih tleu petu dingah meisa.
40 Mi senpi in an dil ih, vanîm a pek,
Cule annih cu van sang thawn an khăwpkham.
41 Lungpi a áwng ih, tidai a khâwtsuak;
Tiva vekin hmun ropawl ah a luang.
42 Ziangahtile anih in a thutiamkam thianghlim le,
A siahhlawh Abraham a máng ringring.
43 A mipawl kha aipuannak thawn a hruaisuak,
A hril mipawl lungawinak thawn.
44 Miphunpawlih rampawl anmah a pek hai ih,
Minungpawlih ṭuanbăngnak kha ro ah an co,
45 Cutin a sakhaw dānpawl an thlun ih,
A dānpawl an thlun theinak dingah a si.
Jehovah cu thangṭhat uh.

106

Israel Ngaidamnak ih Lungawiaipuannak

1 Jehovah cu thangṭhat uh!
Aw, Jehovah hnenah lungawi thu sim uh!
Ziangahtile anih cu a ṭha!
Ziangahtile a lainatduhdawtnak cu kumkhuain a hmun.
2 Zo in so Jehovah thil ti nasatakpawl cu simsuak thei ding?
A thangṭhatnak hmuahhmuah zo in so thăn cawk ding?
3 Diknak kaihngettu le
Ziang tikcān khalih dingfelnak tuahtu cu mithlawsuak a si.
4 Maw Jehovah, na mipawl hnenih na neih mi duhsaknak thawn i máng ringring aw;
Aw, na runsuahnak thawn i vehvai aw,
5 Cutin na hril mipawlih hmuingilnak ka hmuh theinak dingah le,
Na miphunpawlih lungawinak ih lungawiaipuangih ka um ve theinak dingah le,
Ro ih na co mipawl zawngih ka tluangkhawn ve theinak dingah.
6 Kan pupápawl thawn kan rak sual,
Mawhsualnak kan rak tuah,
Sualrál zetin kan rak tuah.
7 Kan pupápawl in Izip ram ah na mangbangzapawl an rak theithiam lo;
Na zahngainak tampi khal an cîng ringring lo,
Tifinriat kap, Tipi Sen ah an rak hél.
8 Sikhalsehla a huham cahnak a theihter theinak dingah,
Amai hmin ruangah a runsuak hai.
9 Tipi Sen khal a kawk ih, a kâng;
Cule ramṭhing hrawhtlăng vekin,
Ti thûk hrawhtlăngin a hruaisuak hai.
10 Anmah huatupawl kut ihsin a runsuak hai,
Cule ralpawl kut ihsin anmah a tlen.
11 Tipi in an ralpawl a khuh;
An lakah a tāng mi pakhat hman an um lo.
12 Cun annih in a kamsuakthupawl an zum;
A thangṭhatnak hla an sak.
13 A thil tipawl an hngilh lohli;
A thurawnpek an rak hngak lo.
14 Asinan ramṭhing ah câkhiarnak nasazet an nei ih,
Nelrawn ah Pathian an hniksak.
15 Cule an dil mi a pe hai,
Asinan an lakah thacemnat a thlenter.
16 Mosi le Jehovah mithiang Aaron an ṭanhmun khuarnak ih an iksik tikah,
17 Leilung a áwngaw ih Dathan a lem,
Cule Abiram-ih mipi-umkhawm a khuh ṭheh.
18 An mipi-umkhawmnak ah mei a alh;
Meialh in misualrálpawl a kangrál.
19 Annih in Horeb ah câwno pakhat an tuah ih,
Cuih burcawp milim cu an bia.
20 Cutin an ropitnak Pathian cu
Hrampi ei câwcang lim ah an thleng.
21 Izip ram ih thil ropipawl a tuahtu,
Anmah Rundamtu Pathian an hngilh,
22 Ham ram ih mangbangza hnaṭuanpawl le,
Tipi Sen kiangih thil maksakpawl tuahtu kha.
23 Curuangah anmah siatrálter lo dingih a thinlingnak pêngter dingah,
A hril mi Mosi kha Pathian hmaiah rak ding lo sehla cu anmahpawl a siatsuah ding tiah a ti.
24 Cun ram nuam cu an nautat;
A kamsuakthu an zum lo.
25 An puanthlampawl ah an phunzai rero sawn ih,
Jehovah aw an rak ngaithla lo.
26 Curuangah anmahpawl ramṭhing ih hlăwn ṭheh dingin a bân a phar ih
Anmahpawl dokalhin thukamnak a tuah,
27 Miphunpawl lakih an tesinfapawl hlăwn dingin le,
Ram dangdangih ṭekdarhter dingin.
28 Anmah ten Peor tlang ih Baal an kăwp ih,
Mithi hnenih raithawi mipawl an ei.
29 Cutin annih in an thil ti mipawl in a thinheng ko an căwktho ih,
An lakah hremnak a suak.
30 Cun Finehas a ding ih a rak hrawlhaw,
Cule hremnak cu a reh.
31 Cule cumi cu Finehas hrangih dingfelnak ih siarsak a si,
Kumkhuain san hmuahhmuah tiangin.
32 Meribah tidai ah annih in a thin an hengter,
Cule anmahpawl ruangah Mosi parah thil ṭhalo a thleng.
33 A Thlarau dokalhin an hel ruangah,
Mosi in a hmur in manhlap zetin a ṭawngsuak.
34 That dingin an hnenih Jehovah in thu a rak pek vekin,
Annih in miphunpawl cu an rak that lo.
35 Annih cu miphunpawl thawn an rawiaw ih,
An nundān an zir.
36 An milempawl an rian,
Cupawl cu anmah hrangih tháng ah an cang.
37 An fapapawl tiangin rai ah an thawi ih,
An fanupawl khal khawsiapawl hnenah.
38 Cule mawhnak nei lo thisen an suah,
Kanaan milempawl hnenah raithawinak ih an hman mi,
An fapapawl le an fanupawl ih thisen cu;
Cule ram cu thisen in a bāl ṭheh.
39 Cutin annih cu anmai thil tipawl in a bawrhbangter ih,
Anmai thil tipawl hmangin hlawhhlâng an ṭuan.
40 Curuangah Jehovah thinlingnak cu a mipawl parah a alh ih,
Ro ih a co mipawl a fih.
41 Cule anmahpawl kha miphunpawl kut ah a pek ih,
Anmah huatupawl in an uk.
42 An ralpawl khal in anmah cu an palbĕt ih,
An thuneihnak hnuaiah duaiter an si.
43 Vei tam tuk anmah a runsuak;
Asinan an tumtah mi ah an hél ih,
An mawhsualnak ruangah niam sinsin ih ret an si.
44 Cuticing khal cun, anih cun an auaw a theih tikah,
An zăwnzaihnak a theihpi thotho.
45 Cule anmah ruangah anih in a thukham a máng ringring ih,
A lainatduhdawtnak a natsat bangtukin a lamlet.
46 Ralkaih ih hruaihlotu hmuahhmuah in an parih zangfahnak nei ding khalin a tuah.
47 In run aw, Maw Jehovah Pathian,
Cule miphunpawl lak ihsin in hruaikhawm aw,
Na hmin thianghlim hnenih lungawi thu sim dingah le,
Na thangṭhatnak ih neh dingah.
48 Israel-ih Pathian Jehovah cu
Kumkhuain kumkhua tiang thangṭhatin um seh!
Cule minungpawl hmuahhmuah in «Amen» tiah ti hai seh.
Jehovah cu thangṭhat uh!

Bu 5-nak

107

A Runsuahnak Hna Ropi ruangih Jehovah Thangṭhatnak

1 Aw, Jehovah hnenah lungawi thu sim uh, Ziangahtile anih cu a ṭha a si!
Ziangahtile a lainatduhdawtnak in kumkhua a daih.
2 Ral kut sung ihsin a tlen zo mipawl,
Jehovah ih a tlen zo mipawl khal in cutivek thothoin sim hai seh,
3 Cule nisuah, nitlak,
Sak lam le thlang lam rampawl ihsin
A hruaikhawm mipawl khal in.
4 Ramṭhing ah zin răm zawhin an vâkvai;
Cēnnak ding khua an hmu lo.
5 Rilrâwng le tihâlin,
An nunnak khal anmai sungah a cau.
6 Cun an buai tikah Jehovah an ko ih,
Anih in an vansannakpawl ihsin a runsuak hai.
7 An cēnnak ding khua ih an feh theinak dingah,
Anih in anmahpawl cu zin tluang ah a hruai hai.
8 A lainatduhdawtnak ruangah le,
Minung fapapawl parih a mangbangza thil tipawl ruangah Jehovah hnenah lungawi thu sim hai seh!
9 Ziangahtile tihâl mi nunnak kha a di a riamter ih,
A rilrâwng mi nunnak kha ṭhatnak in a khatter.
10 Khawthim sung le thihnak thlahlim tăngih a to mipawl,
Zăwnzaihnak le thir cikcinpawl thawi ṭemṭawn a si mipawl cu.
11 Pathian kamsuakthupawl dokalhih an hel ruangah le,
Cungnung Bik-ih thurawnpek an nautat ruangah a si.
12 Curuangah an thinlung cu ṭuanbăngnak in a tăngdawrter;
An tlu, bawmtu zohman an um lo.
13 Cun an buai tikah Jehovah hnenah an ausuak,
Cule anih in an vansannak ihsin a runsuak hai.
14 Anih in annihpawl cu khawthim le thihnak thlahlim sung ihsin a lasuak hai ih,
An thir cikcinpawl a catter.
15 A lainatduhdawtnak ruangah le,
Minung fapapawl parih a mangbangza thil tipawl ruangah Jehovah hnenah lungawi thu sim hai seh!
16 Ziangahtile anih in dar kăwtkapawl a băl ṭheh ih,
Thir tluanpawl tan hnih ah a tán.
17 An dānpahbălnakpawl ruangah le,
An mawhsualnakpawl ruangah mi-âpawl in zăwnzaihnak an tuar.
18 An nunnak in rawl a si mi pauhpauh an fih ih,
Thihnak kăwtkapawl kiang lam an pan.
19 Cun an buai tikah Jehovah hnenah an ausuak ih,
Anih in an vansannak ihsin a runsuak hai.
20 Anih in a kamsuakthu a thlah ih,
An siatralnakpawl ihsin a runsuak hai.
21 A lainatduhdawtnak ruangah le,
Minung fapapawl parih a mangbangza thil tipawl ruangah Jehovah hnenah lungawi thu sim hai seh!
22 Annih in lungawi thu simnak raithawinak thawi hai sehla,
A thil tipawl kha lungawiaipuang zetin thăn hai seh.
23 Tifinriat ih lăwng thawi a fehtupawl,
Tipi parih sumdâwngpawl in,
24 Jehovah thil tipawl le,
Ti thûkpi ah a mangbangzapawl an hmu.
25 Ziangahtile thu a pe ih thlipi a hrangter,
Cumi cun tifinriat tisuarpawl a thoter.
26 Van lamah an vawrhsoaw,
Ti thûknak sungah an ṭumsal;
Harsatbuainak ruangah sumdâwngpawlih thinlung a tirál.
27 Khat lam le khat lamah an pái ih, zuripa vekin an hawr,
Umngaihnak an thei lo.
28 Cun an buai tikah Jehovah hnenah an ausuak ih,
Anih in an vansannak ihsin a runsuak hai.
29 Anih in thlipi a daiter,
Cutin tisuarpawl cu an reh.
30 Cun an reh ruangah annih cu an lung a awi.
Cule an duhthusam lăwng cawlhnak hmun ah a hruai hai.
31 A lainatduhdawtnak ruangah le,
Minung fapapawl parih a mangbangza thil tipawl ruangah Jehovah hnenah lungawi thu sim hai seh!
32 Annih in mipi punkhawmnak hmun khalah amah kha khaisâng hai sehla,
Upapawl khawmnak ah amah cu thangṭhat hai seh.
33 Anih in tivapawl kha ramṭhing ah a canter ih,
Cirhti suahnakpawl kha leiro ah a canter.
34 A sungih cêngpawlih sualralnak ruangah,
Rah tampi a suah mi ram cu a cíng mi ram ah.
35 Anih in ramṭhing kha tilipawl ah a canter ih,
Ramro kha cirhti suahnak ram ah.
36 An cēnnak ding khua an dinsuah theinak dingah,
Cuih hmun ah mirilrawngpawl a umter.
37 Cule lórampawl ah thlaici an tuh ih sabit hmuan an tuah,
Rah tampi an khawm theinak dingah a si.
38 Anih khal in anmah a thlawsuah hai ih, nasazetin an karh;
Cule an rannungpawl khal a zuzitter lo.
39 Anmahpawl kha palbĕtnak, zăwnzaihnak le riahsiatnak pawl ruangih,
An zuzit vivo le an tlak niam vivo tikah,
40 Mipawimawhpawl parah nautatnak a thlet ih,
Lamzin umlonak ramṭhing ah a vâkvaiter hai.
41 Sikhalsehla mifarahpawl hmun sâng ah a ret, zăwnzaihnak thawi a hlatnak ah,
Cule an sungkuapawl cu rante rual vekin a tuah.
42 Midingfelpawl in cumi cu an hmu ih an ai a puang,
Asinan misualrálpawl hmuahhmuah cun an kâ an hup.
43 Mifim a si mi pauh in hi thilpawl cu an ngaihsak ding,
Cule Jehovah lainatduhdawtnak an ngaihtuah ding.

108

Nehnak ruangih Thangṭhatnak

Hla. David-ih Sam.

1 Maw Pathian, ka thinlung hi a hnget a si;
Hla ka sak ding ih thangṭhatnak ka lo pe ding, ka thinlung hmuahhmuah khalin.
2 Tho thlang uh, cawngcing le ṭingṭang!
Ka ṭhang ding khawfingcat.
3 Maw Jehovah, minungpawl lakah ka lo thangṭhat ding,
Cule miphunpawl lakah nangmah thangṭhatnak hla ka sak ding.
4 Ziangahtile na lainatduhdawtnak cu vanpawl hnakin a sângsawn ih,
Na thutak khal khawdurpawl tiang a thleng.
5 Khaisângaw aw, Maw Pathian, vanpawl tlunah,
Cule na ropitnak kha leilung hmuahhmuah tlunah;
6 Cutin na duhdawt mipawl runsuah an si ding ih,
Na vawrh lam kut in run awla, in ngaithla aw.
7 Pathian in a hmun thianghlim ihsin,
«Lungawiaipuangin ka um ding;
Shekem cu ka ṭhen ding ih,
Sukkoth Phaikuam cu ka tah ding.
8 Gilead cu ka ta a si; Manasseh cu ka ta a si;
Efraim khal ka lu hrangah lukhuh a si;
Judah cu ka siangpahrang kianghrăwl a si.
9 Moab cu ka kut khawlhnak khēng a si;
Edom tlunah ka kedam ka hlăwn ding;
Filisṭia cu nehnak in ka auhhnawh ding,» tiah a ti.
10 Kulhhnget nei khawpi ah zo in so i fehpi ding?
Edom ah zo in so i hruai ding?
11 Maw Pathian, in hnáwngtu cu nangmah na si lo maw?
Cule Maw Pathian, kan ralkappawl zawngih fehsuak lo tu cu nangmah na si lo maw?
12 Harsatbuainak ihsin băwmnak in pe aw,
Ziangahtile milai băwmnak cu zianghman a si lo.
13 Pathian thawngin ralṭha zetin kan tuah ding,
Ziangahtile kan ralpawl páltu ding cu amah a si.

109

Phuba La dingih Thlacamnak

Hla Hruaitu Hrang. David-ih Sam.

1 Daiten um hlah, ka thangṭhat mi Maw Pathian!
2 Ziangahtile misualrálpawlih kâ le mi bumhmangpawlih ka cu
Keimah dokalhin an âng;
Keimah dokalhin thuphan per lei thawn an ṭawng.
3 Cuihhleiah annih in huatnak ṭawngkampawl thawn in kulh ih,
Săn um lopiin in do.
4 Ka duhdawtnak cu annihpawl in sualpuhnak in in thungrūl,
Asinan kei cu thlacam dingin ka peaw.
5 Cutin thil ṭha kha thil ṭhalo in in rūl ih,
Ka duhdawtnak kha huatnak in in rūl.
6 Amah tlunah misualrálpa ret aw,
Cule sualpuhtu kha a vawrh lam kut ah dingter aw.
7 Thuṭhensak a si tikah, mimawh a sizia hmuh si seh,
Cule a thlacamnak kha sual ah cang seh.
8 A san tawi sehla,
A dinhmun cu mi dang in luah seh.
9 A falepawl pa nei loin le,
A nupi kha nuhmei ah cang seh.
10 A falepawl cu vâkvai le rawl dilin um hai seh;
A răm mi an hmunpawl ihsin hlatpi ah rawl hawl hai seh.
11 Thil a cawihtupawl in a neih hmuahhmuah laksak hai sehla,
Mikhualpawl in a ṭuanbăngnak răm hai seh.
12 A parah lainatduhdawtnak nei duhtu um hlah hai sehla,
Pa nei lo a falepawl tlunah duhsaktu zohman um fawn hlah hai seh.
13 A cithlah cimit sehla,
A ra lai ding mi san ah an hmin phiahhlo si seh.
14 An pupápawlih mawhsualnak cu Jehovah hmaiah cīn ringring si sehla,
A nuih sualnak cu phiahhlo si hlah seh.
15 Cupawl cu catbang loin Jehovah hmaiah um hai seh,
Cule anmah cīn ringring nak kha leilung tlun ihsin hlohralter a si ding.
16 Ziangruangahtile anih in lainatduhdawtnak langter ding kha a mang nawn lo,
Thinlung kekkuaipawl tiangih a thah theinak dingah,
Mifarah le mitlasam a tiduhdah riangri sawn.
17 Micamsiat a duh vekin, cumi cu a parah thleng seh;
Anih cu thlawsuahnak ih a năwmawk lo vekin, thlawsuahnak kha a hnen ihsin a hlatnak ah um seh.
18 Camsiatnak kha a sinfen vekih a hruk vekin,
Cuih camsiatnak kha a taksaruangpum sungah tidai vekin a lut ih,
A ruhpawl sungah hriak vekin.
19 A hrangah amah khuhtu sinfen vekah cang sehla,
A khap ringring mi a taikhap ah cang seh.
20 Cumi cu i hēktupawl hnenah Jehovah-ih lawmman a pek mi si-aw sehla,
Keimah dokalhih thil ṭhalo a ṭawngtupawl hnen khalah.
21 Asinan Maw Jehovah Bawipa, nangmah in,
Na hmin ruangah ka parah ṭha zetin in ti aw;
Ziangruangahtile na lainatduhdawtnak cu a ṭha, i runsuak aw.
22 Ziangahtile kei cu mifarah le tlasam ka si ih,
Ka thinlung hi ka sungah hriam a tuar.
23 Thlahlim a rál vivo vekin ka cemrál vivo;
Kharbawk vekih thinthlak ka si.
24 Rawlulhnak ruangah ka khukpawl an ṭhia,
Cule thau tlaksăm ruangah ka titsa a derthawm.
25 Kei khal an hnenah hmuhsuam mi ah ka cang;
Keimah in hmuh tikah, an lu an thing.
26 I bawm hram aw, Maw Jehovah ka Pathian!
Na lainatduhdawtnak zulhin i run hram aw,
27 Cutin himi hi na kut ih tuah mi a si ti an thei ding;
Maw Jehovah, cumi cu nangmah ih tuah mi a si!
28 Annih cun in camsiat ko hai seh, asinan nang cun thlawsuah i pe aw;
Annih in keimah in dokalh tikah, ningzakin um hai seh,
Asinan na siahhlawh cu lungawiaipuangin um seh.
29 I hēktupawl cu ningzahnak thawi thăwm si hai sehla,
Anmai mualphonak thawn anmah le anmah puan vekin khuhaw hai seh.
30 Ka kâ in Jehovah cu nasazetin ka thangṭhat ding;
A si, mi senpi lakah amah cu ka thangṭhat ding.
31 Ziangahtile amah thiamlo cotertupawl hnen ihsin run dingah
Anih cu mifarah kut vawrh lamah a ding.

110

Puithiam-Siangpahrang-ih Nehnak

David-ih Sam.

1 Jehovah in ka Bawipa hnenah,
«Na ralpawl na keretnak ih ka tuah hlanlo,
Ka vawrh lamah to aw,» tiah a ti.
2 Jehovah in Zion ihsin a cak mi Siangpahrang kianghrăwl a fehsuakter ding.
Na ralpawl lakah uk aw!
3 Na thuneihnak ni ah cun,
Na mipawl an pum an peaw ding;
Thianhlimnakih mawinak ah,
Na minopawl cu khawfingcat pum sung ihsi a suak mi daifim vek an si ding.
4 Jehovah in sia a săm ih
A lung a thleng lo ding,
«Nangmah cu Melkizedek-ih sidān vekin
Kumkhuain puithiam na si,» tiah a ti.
5 Bawipa cu na vawrh lam kut ah a um;
Anih in a thinling ni ah cun siangpahrangpawl a vawthlu hai ding.
6 Anih in miphunpawl lakah thu a ṭhen ding,
Mithi ruang in hmun zakip a khatter ding,
Ram tampi lubânpawl a vawthlu hai ding.
7 Lamzin kap tivate ih tidai a in ding;
Curuangah a lu a cawisâng ding.

111

A Thil Ti Ropipawl ruangih Pathian Thangṭhatnak

1 Jehovah cu thangṭhat uh!
Midingpawl punkhawmnak le mipi-umkhawmnak ah
Ka thinlung hmuahhmuah in Jehovah cu ka thangṭhat ding.
2 Jehovah thil tipawl cu a nasa a si,
Cupawl parih lunghmuinak neitu hmuahhmuah in an zir.
3 A thil ti cu upattlak le sunlawihtlak a si ih,
A dingfelnak in kumkhua a daih.
4 A mangbangza thil tipawl cu cīn ringring dingah a tuah;
Jehovah cu zangfahnak nei le lainatnak thawi khat a si.
5 Anih in amah ṭihzahtupawl hnenah rawl a pe;
A thukham kha a cîng kumkhua ding.
6 Miphunpawlih ropawl kha a mipawl hnenih a peknak in,
A thil tipawlih huham kha a mipawl hnenah a thăn.
7 A kut thil tipawl cu an tak ih an dik;
A nunphung dānpawl khal rintlak an si.
8 Cupawl cu kumkhuain kumkhua tiang a dinghngetter,
Cule thutak le dĭngnak thawi tuah mi an si.
9 A mipawl hnenah tlennak a pe;
A thukham khal kumkhaw hrangah thu a pe:
A hmin cu thianghlim le maksak a si.
10 Jehovah ṭihzah cu fimnakih hramthăwknak a si;
A thupekpawl tuahsuaktu hmuahhmuah in theihthiamnak ṭha an nei.
A thangṭhatnak cu kumkhua a hmun.

112

Midingfelih Mithlawsuak Sinak Dinhmun

1 Jehovah cu thangṭhat uh!
Jehovah ṭihzahtupa cu mithlawsuak a si,
A thupekpawl ih nasazetih nuamawtu cu.
2 A tesinfapawl cu leilung tlunah an cak ding,
Midĭngih cithlahsâwngpawl cu thlawsuah an si ding.
3 A inn sungah neihnunnak le lennak a um ding ih,
A dĭngfelnak cu a hmun kumkhua.
4 Midĭng hrangah cun thim lakah tleu a suak;
Anih cu zangfahnak nei, lainatnak neiin a dingfel a si.
5 Miṭhapa in zangfahnak a langter ih a cawih ṭheu;
Amai thuhlapawl cu dik zetin a tawlrel.
6 Anih cu a hnîn dah hrimhrim lo ding;
Midĭngfel cu kumkhuaih cīn ringring a si ding.
7 Anih cun thuthang ṭhalo a ṭih lo ding;
Jehovah rinsanin a thinlung a hnget.
8 A ralpawl parih a saduhthah a hmuh hlanlo,
A thinlung cu dĭnhngeh a si ih, a ṭih lo ding.
9 Anih cun tam zet a zemdarh,
Mifarahpawl hnenah a rak pe;
A dingfelnak cu kumkhuain a hmun;
A ki cu upatnak thawn khaisan a si ding.
10 Misualrál in cumi cu a hmu ding ih a thin a nâ ding;
A ha a rial ding ih, a zuprál ding;
Misualrál saduhthah cu a hlorál ding.

113

Pathian Cungnunnak le Maksaknak

1 Jehovah cu thangṭhat uh!
Thangṭhat uh, Maw Jehovah siahhlawhpawl tla,
Jehovah hmin cu thangṭhat uh.
2 Atu ihsin kumkhua tiang,
Jehovah hmin cu thangṭhatin um seh!
3 Nisuah ihsin nitlak tiangin
Jehovah hmin cu thangṭhatin um seh.
4 Jehovah cu miphunpawl hmuahhmuah tlunah cawisan a si,
A ropitnak khal vanpawl tlunah.
5 Jehovah kan Pathian vekih
Hmun sâng ih um,
6 Lei le vanpawl ih a um mi thilpawl thlir dingin,
Amah le amah phahniamawtu cu zo so a si?
7 Anih in mifarah kha leidip ihsin a thoter ih,
Mitlasam kha vutcâm hlăwnkhawmnak ihsin a khaisuak,
8 Cutin mizahumpawl zawngah a toter,
A mipawlih mizahumpawl zawngah.
9 Anih in nunau cíngpawl inn a pe,
Falepawl thawi aipuang zetih um hringtunu vekin.
Jehovah cu thangṭhat uh!

114

Israel a Runsuahnak ih Pathian Huham

1 Izip ram ihsin Israel a fehsuak tikah,
Jakob sungza cu ṭawng phun dang a ṭawng mipawl hnen ihsin,
2 Judah cu a hmun thianghlim ah a cang ih,
Israel kha a uk mi ah.
3 Tifinriat in a zoh ih a tlânhlo;
Jordan khal a kirsal.
4 Tlangpawl cu tuucangpawl vekin an khir,
Tlang fatepawl khal tuufa notepawl vekin.
5 Ziang in so a lo hnaihnăwk ih, Maw tifinriat, na tlan?
Maw Jordan, na kir?
6 Maw tlangpawl tla, ziangahso tuucangpawl vekih nan khir?
Maw tlang fatepawl, tuu notepawl vekin?
7 Maw leilung,
Bawipa hmaika-ah le Jakob Pathian hmaika-ah khūr aw,
8 Lungpi tili ih cangtertu,
Ṭêklung tihna ih cangtertu cu amah a si.

115

Milem Santlaihlonak le Pathian Rinsantlak a Sinak

1 Kan hnenah si loin, Maw Jehovah, kan hnenah si loin,
Na hmin hnenah ropitnak pe aw,
Na lainatduhdawtnak ruangah,
Na thutak ruangah.
2 Ziangahso miphunpawl in,
«An Pathian cu khuiah so?» tiah an ti ding.
3 Asinan kan Pathian cu vanpawl ah khin a um;
A duh mi pauhpauh a tuah.
4 An milempawl cu sui le ngun an si,
Minungpawl kut ih tuah an si.
5 Kâ an nei nân, an ṭawng thei lo;
Mit an nei nân, an hmu lo.
6 Hna an nei nân, an thei lo;
Hnar an nei nân, rim an thei lo.
7 Kut an nei nân, an thâm thei lo;
Ke an nei nân, an feh thei lo;
An dang ihsi khalin aw an suah thei lo.
8 Anmah tuahtupawl cu anmah vek an si,
Cupawl a rinsantupawl khal.
9 Maw Israel, Jehovah rinsan aw;
Amah cu anmahpawl bawmtu le an ralphaw a si.
10 Maw Aaron teih sungza, Jehovah rinsan uh;
Amah cu anmah bawmtu le an ralphaw a si.
11 Nannih Jehovah ṭihzahtupawl, Jehovah rinsan uh;
Amah cu anmah bawmtu le an ralphaw a si.
12 Jehovah cun kanmah in ngaihsak ringring;
Amah in thlawsuah in pe ding;
Amah in Israel sungza thlawsuah a pe ding;
Amah in Aaron sungza thlawsuah a pe ding.
13 Amah in Jehovah a ṭihzahtupawl,
A tûm a sen in thlawsuah a pe ding.
14 Jehovah in lo pungzaiter sinsin seh,
Nangmah le na falepawl cu.
15 Lei le van a tuahtu,
Jehovah in thlawsuah lo pe hram seh.
16 Van le vanpawl tiangin Jehovah ta a si;
Asinan leilung cu minungpawlih fātepawl hnenah a pek.
17 Mithipawl cun Jehovah an thangṭhat lo ih,
Daiteih umnak hmun ih a fehtupawl khal in.
18 Asinan kannih cun Jehovah kan thangṭhat ding,
Tuih cān ihsi thăwkin le kumkhuain.
Jehovah cu thangṭhat uh!

116

Thihnak ihsi Runsuahnak ruangih Lungawi Thu Simnak

1 Jehovah ka duhdawt, ziangruangahtile anih in
Ka aw le ka dilnak i theihsak.
2 Ka lamih a hna a run thăwn ruangah,
Ka damsung hmuahhmuah amah ka ko ding.
3 Thihnak hripawl in in vel ih,
Sheol natnak in in kaibĕt;
Harsatnak le riahsiatnak ka táwng.
4 Cun Jehovah hmin ka ko:
«Maw Jehovah, ka lo ngen a si, ka nunnak runsuak aw!» tiah ka ti.
5 Jehovah cu zangfahnak nei le midingfel a si;
A si, kan Pathian cu lainatnak thawi khat mi a si.
6 Jehovah in mimâwlpawl a humhim;
Kei cu niamter ka si, cule anih in in run.
7 Maw ka nunnak, na cawlhhahdamnak ah kirsal aw,
Ziangahtile Jehovah in na parah ṭha zetin thil a ti.
8 Ziangahtile thihnak ihsin ka nunnak na runsuak,
Mitthli lak ihsin ka mit,
Tlûknak ihsin ka ke.
9 A nungdam mipawl ih ram ah
Jehovah hmaiah ka feh ding.
10 Ka zum, curuangah ka sim,
«Kei cu nasazetih zăwnzaihter ka si.»
11 Hmanhlap zetin kei in,
«Milai hmuahhmuah hi thuphan per an si,» tiah ka ti.
12 Ka parih a ṭhatnak zozai ruangah
Jehovah hnenah ziangso ka pek ve ding?
13 Runsuahnak no ka dăwm ding ih,
Jehovah hmin ka ko ding.
14 Jehovah hnenih ka thutiam mipawl cu
A mipawl hmuahhmuah hmaiah ka hlĕnsuak ding.
15 A mithiangpawl thihnak cu,
Jehovah mithmuhah hlú tak a si.
16 Maw Jehovah, thungaiten keimah cu na siahhlawh ka si;
Keimah cu na siahhlawh ka si, na siahhlawhnuih fapa;
Nang in in ṭemṭawnnakpawl na phelh ṭheh.
17 Na hnenah lungawi thu simnak raithawinak ka hlan ding ih,
Jehovah hmin ka ko ding.
18 Jehovah hnenih ka thutiampawl cu
A mipawl hmuahhmuah hmaika-ah ka hlĕnsuak ding,
19 Jehovah inn sūmtualrawnpawl ah,
Maw Jerusalem, nangmai laifang khalah.
Jehovah cu thangṭhat aw!

117

Miphun hmuahhmuah in Jehovah Thangṭhat hai Seh

1 Nannih miphunpawl hmuahhmuah, Jehovah thangṭhat uh!
Nannih minungpawl hmuahhmuah, amah cu thangṭhat uh!
2 Ziangahtile a lainatduhdawtnak cu kan hrangah a nasa ih,
Jehovah-ih thutak cu kumkhuain a hmun.
Jehovah cu thangṭhat uh!

118

Nehnak Hla

1 Jehovah hnenah lungawi thu sim uh, ziangahtile amah cu a ṭha!
A lainatduhdawtnak cu kumkhuain a hmun fawn si.
2 Israel in,
«A lainatduhdawtnak cu kumkhuain a hmun,» tiah ti seh.
3 Aaron-ih sungzapawl in,
«A lainatduhdawtnak cu kumkhuain a hmun,» tiah ti hai seh.
4 Jehovah a ṭihzahtupawl in,
«A lainatduhdawtnak cu kumkhuain a hmun,» tiah ti hai seh.
5 Ka vansan tikah Jehovah ka ko;
Jehovah in i sawn ih hmun kaupi ah i ret.
6 Jehovah cu ka lamah a ṭang,
Ka ṭih lo ding.
Minung in ka parah ziangso a tuah thei ding?
7 Jehovah cu keimai hrang, i bawmtupawl lakih mi a si;
Curuangah i huatupawl parah ka saduhthah ka hmu ding.
8 Minung rinsan hnakin,
Jehovah hnenih răwlhimnak lâk a ṭhasawn.
9 Uktupawl rinsan hnakin
Jehovah hnenih răwlhimnak lâk a ṭhasawn.
10 Miphunpawl hmuahhmuah in in kulh,
Asinan Jehovah hmin in anmah cu ka siatsuah hai ding.
11 Annih cun in kulh,
A si, annih cun in kulh;
Asinan Jehovah hmin in anmah cu ka siatsuah hai ding.
12 Annih in khuai vekin in kulh;
Annih cu hlingrûl meikāng vekin cimih an si;
Jehovah hmin in anmah cu ka siatsuah hai ding.
13 Nang cun tlu dingin nasazetin i tûl,
Asinan Jehovah in i bawm.
14 Jehovah cu ka cahnak le ka hla a si ih,
Amah cu ka runsuahnak ah a cang.
15 Midingfelpawlih puanthlam sungah
Lungawiaipuannak aw le runsuahnak aw a um;
Jehovah vawrh lam kut in ralṭha zetin hna a ṭuan.
16 Jehovah vawrh lam kut cu khaisan a si;
Jehovah vawrh lam kut in ralṭha zetin a hna a ṭuan.
17 Ka thi lo ding, ka nung sawn lam ding ih,
Jehovah thil tipawl ka thăn ding.
18 Jehovah in na zetin nun i sim,
Asinan thihnak hnenah cun i pesuak lo.
19 Dingfelnak kăwtkapawl i ăwnsak aw;
Cupawl ihsin ka lut ding ih,
Jehovah ka thangṭhat ding.
20 Himi hi Jehovah kăwtka a si,
Cumi ihsin midingfelpawl an lut ding.
21 Ka lo thangṭhat ding,
Ziangahtile nang in i rak sawn ih,
Ka runsuahnak ah na cang.
22 Inn saktupawl ih an hnawn mi lungto kha
A kilih lungto pawimawhbik ah a cang.
23 Himi hi Jehovah ih tuah mi a si;
Kan mithmuhah mangbangza a si.
24 Himi hi Jehovah ih semsuah mi ni a si;
Cumi ah aipuang le lungawiin kan um ding.
25 Maw Jehovah, thla ka cam a si, i run aw;
Maw Jehovah, thla ka cam a si, hmuingilnak thlah aw.
26 Jehovah hmin ih ra cu mithlawsuak a si!
Jehovah inn ihsin thlawsuah kan lo pe.
27 Jehovah cu Pathian a si ih,
Amah in tleu in pe;
Biakṭheng kipawl ah raithawinak cu hri thawn ṭem uh.
28 Nang cu ka Pathian na si ih, ka lo thangṭhat ding;
Nangmah cu ka Pathian na si, ka lo khaisâng ding.
29 Jehovah hnenah lungawi thu sim uh, ziangahtile amah cu a ṭha!
A lainatduhdawtnak cu kumkhuain a hmun fawn si.

119

Pathian Dān Ropitzia

1 Jehovah Dān ih a fehtu,
An nundān ih bawrhbang lo pawl cu mithlawsuak an si!
2 A thutheihtermipawl a thluntu,
Thinlung zateih amah a hawltupawl cu mithlawsuak an si!
3 Annih cun mawhsualnak an tuah lo;
A lamzinpawl ah an feh.
4 Na nunphung dānpawl ṭhahnemngai zetih thlun dingin
Nang in thu in rak pe.
5 Ka nundānpawl hi na sakhaw dānpawl thlun dingih
Tundīn si sehla cu aw!
6 Cule na thupekpawl hmuahhmuah ka zoh tikah,
Ningzahter ka si lo ding.
7 A dingfel mi na thuṭhennakpawl ka zir tikah,
A dik mi thinlung thawn ka lo thangṭhat ding.
8 Na sakhaw dānpawl ka thlun ding;
I thlauthla verver hlah aw maw!

9 Mino in ziangtin a nun a thiangter thei ding?
Na kamsuakthu bangtukih kilvenawknak in.
10 Ka thinlung zaten ka lo hawl;
Na thupekpawl ihsin i vâkvaiter hlah!
11 Nangmah dokalhih ka suallonak dingah,
Ka thinlung ah na kamsuakthu ka khawlkhawm.
12 Maw Jehovah, nang cu thangṭhattlak na si!
Na sakhaw dānpawl i zirh aw!
13 Na relsuak mi cīn le dānpawl hmuahhmuah kha
Ka hmur in ka thăn.
14 Lennak hmuahhmuah tlukin,
Na thutheihtermipawlih zin ah lungawiaipuannak ka nei.
15 Na nunphung dānpawl cu ngunngaih zetin ka ngaihtuah ding ih,
Na lamzinpawl ṭhaten ka ngaihtuah ding.
16 Na sakhaw dānpawl ah ka nuamaw ding;
Na kamsuakthu ka hngilh lo ding.

17 Ka nundam ih na kamsuakthu ka thlun theinak dingah,
Na siahhlawh parah ṭha zetin thil ti aw.
18 Na dān ihsin mangbangza thilpawl ka hmuh theinak dingah,
Ka mit vângter aw.
19 Kei cu leilung ah mikhual ka si;
Ka hnen ihsin na thupekpawl thup hlah.
20 Ziang tik lai khalah na cīn le dānpawl ngaiin,
Ka thinlung a kûai.
21 Na thupekpawl pialsantu,
Camsiat mi, mipuarthaupawl cu na kawk hai.
22 Ka hnen ihsin hmuhsuamnak le nautatnak kiangter aw,
Ziangahtile kei cun na thutheihtermipawl ka thlun a si.
23 Uktupawl khal an tokhawm ih keimah dokalhin an ṭawng,
Asinan na siahhlawh cun na sakhaw dānpawl ngunngaih zetin a ngaihtuah.
24 Na thutheihtermipawl khal ka năwmawknak le
Thurawn i petu an si.

25 Ka nunnak hi leivut ah a bĕt;
Na kamsuakthu zulhin i ṭhangphawksal aw.
26 Ka nundānpawl ka rak thăn ih, nang in i rak sâng;
Na sakhaw dānpawl i zirh aw.
27 Na nunphung dānpawlih umtuzia theithiam ko i tuah aw;
Cutin na mangbangza thil tipawl ngunngaih zetin ka ngaihtuah ding.
28 Riahsiatnak ruangah ka thinlung a ṭap;
Na kamsuakthu zulhin i cakter aw.
29 Thuphan per nundān kha ka hnen ihsin ṭhawnhlo awla,
A dān cu siang zetin i pe aw.
30 Thutak zin cu ka rak hril;
Na cīn le dānpawl khal ka hmaiah ka ret.
31 Na thutheihtermipawl ah ka bet;
Maw Jehovah, ningzakin i umter hlah!
32 Na thupekpawl zin ah ka tlân ding,
Ziangahtile nang in ka thinlung na varkauter.

33 Maw Jehovah, na sakhaw dānpawl zin i zirh aw,
Cule a net tiang ka thlun ding.
34 Theihthiamnak i pe awla, na dān ka thlun ding;
Thungaingaiin, cumi cu ka thinlung zaten ka thlun ding.
35 Na thupekpawl zin i zawhter aw,
Ziangahtile cumi ah ka nuamaw a si.
36 Mi thildawtnak lamah si loin,
Ka thinlung hi na thutheihtermipawl lamah hawiter aw.
37 Ka mit hi thil santlailopawl zoh rero nak ihsin pialter aw,
Cule na lamzin ah i ṭhangphawksal aw.
38 Nangmah ṭihzahnak suaktertu,
Na kamsuakthu kha na siahhlawh hnenah dĭnhnget aw.
39 Ka ṭih zet mi hmuhsuam ka sinak hi phialhlo aw,
Ziangahtile na cīn le dānpawl cu an ṭha.
40 Ngai hnik, na nunphung dānpawl ka ngai;
Na dingfelnak ah i ṭhangphawksal aw.

41 Na lainatduhdawtnak kha ka hnen khalah thlengter aw, Maw Jehovah,
Na kamsuakthu zulhin na runsuahnak khal.
42 Cutin i hmuhsuamtu lehsalnak ka nei ding,
Ziangahtile na kamsuakthu ka rinsan.
43 Cule thutak kamsuakthu kha ka kâ sung ihsin lahlo thluh hlah,
Ziangahtile na cīn le dānpawl ah ruahsannak ka nei.
44 Cutin na dān cu ka thlun tlaitluan ding,
Kumkhuain kumkhua tiang.
45 Cule zalen zetin ka feh ding,
Ziangahtile na nunphung dānpawl ka hawl a si.
46 Siangpahrangpawl hmai khalah na thutheihtermipawl ka sim ding,
Cule ningzahter ka si lo ding.
47 Cule ka duh mi,
Na thupekpawl ah ka nuamaw ding.
48 Ka kutpawl khal ka duh mi,
Na thupekpawl lamah ka thlir ding,
Cule na sakhaw dānpawl ngunngaih zetin ka ngaihtuah ding.

49 Na siahhlawh hnenih na kamsuakthu,
Cumi parih ruahsannak i neihter mi kha cîng ringring aw.
50 Himi hi zăwnzaih ka tuar tikih ka hnangamnak a si,
Ziangahtile na kamsuakthu in i rak ṭhangphawk.
51 Mipuarthaupawl in nasazetin in hnihsan,
Asinan na dān ihsin ka pial cuang lo.
52 Khuahlan na cīn le dānpawl ka cîng ringring, Maw Jehovah,
Cule keimah le keimah ka hnemaw.
53 Na dān thlauthlatu misualrálpawl ruangah
Aithawknak in in cîmbuai.
54 Ka khualtlawnnak inn ah,
Na sakhaw dānpawl hi ka hla an si.
55 Zan ah na hmin ka cîng ringring, Maw Jehovah,
Na dān ka thlun a si.
56 Himi hi ka ta ah a cang,
Ziangahtile na nunphung dānpawl ka thlun.

57 Nang cu ka covo na si, Maw Jehovah;
Na kamsuakthupawl ka thlun ding tiah ka tiamaw.
58 Na duhsaknak kha ka thinlung hmuahhmuah in ka ngen a si,
Na kamsuakthu zulhin ka parah zahngainak nei hram aw.
59 Ka lamzinpawl ka ruat,
Cule na thutheihtermipawl lamah ka ke ka her.
60 Na thupekpawl thlun dingah,
Ka hmanhmawh zet, ka muangcâng lo.
61 Misualrálpawlih hrihrualpawl in in vêt,
Asinan na dān ka hngilh lo.
62 Na cīn le dān dikpawl ruangah
Zanṭim ah nangmah lo thangṭhat dingin ka tho ding.
63 Keimah cu nangmah a lo ṭihzahtu hmuahhmuah le,
Na nunphung dānpawl a thluntupawlih hawipi ka si.
64 Leilung hi na lainatduhdawtnak in a khat, Maw Jehovah;
Na sakhaw dānpawl i zirh aw.

65 Maw Jehovah, na kamsuakthu bangtukin
Na siahhlawh hi na rak tiṭha.
66 Thuṭhennak ṭha le theihnak i zirh aw,
Ziangahtile na thupekpawl ka zum.
67 Zăwnzaihter ka si hlanah cun ka rak fehpêng,
Asinan atu ah cun na kamsuakthu ka thlun a si.
68 Nang cu miṭha na si ih, thil ṭha na tuah;
Na sakhaw dānpawl i zirh aw.
69 Mipuarthaupawl in keimah dokalhin thuphan an phuah,
Asinan kei cun na nunphung dānpawl ka thinlung zaten ka thlun ding.
70 An thinlung cu a hit bepbep,
Asinan kei cu na dān ah ka nuamaw a si.
71 Na sakhaw dānpawl ka thlun theinak dingah,
Zăwnzaihter ka si hi ka hrangah a ṭha.
72 Na kamsuak dān cu,
Sui le ngun a thawng a thawng hnakin ka hrangah a ṭhasawn a si.

73 Na kut in i tuah ih i sersiam;
Na thupekpawl ka zir theinak dingah, theihthiamnak i pe aw.
74 Nangmah a lo ṭihzahtupawl in keimah in hmuh tikah an lung a awi ding,
Ziangruangahtile na kamsuakthu parah ruahsannak ka nei a si.
75 Maw Jehovah, na thuṭhennakpawl cu a dik ti ka thei,
Cule rinumnak ah nang in i zawnzaiter.
76 Na siahhlawh hnenih na kamsuakthu zulhin,
Na lainatduhdawtnak cu ka hnangamnak si seh.
77 Ka nundam theinak dingah
Ka hnenah na lainatnak thlengter aw;
Ziangahtile na dān cu ka năwmawknak a si.
78 Mipuarthaupawl ningzahter si hai seh,
Ziangahtile thuphanpi in diklo zetin in hringhro rero;
Asinan kei cu na nunphung dānpawl ngunngaih zetin ka ngaihtuah ding.
79 Nangmah a lo ṭihzahtupawl ka lamah hawi hai seh,
Na thutheihtermipawl a theitupawl kha.
80 Ningzahter ka silonak dingah,
Na sakhaw dānpawl thuhla ah ka thinlung hi sawihnăwm kâi lo si seh.

81 Na runsuahnak hmuh duhin ka nunnak a cau,
Asinan na kamsuakthu ah ruahsannak ka nei.
82 Na kamsuakthu ka hawlnak ah ka mit an râu thluh.
«Ziangtik ah so i hnem ding?» tiah ka ti.
83 Ziangahtile kei cu meikhu lakih ret mi sabitzu thâwl vek ka si.
Asinan na sakhaw dānpawl ka hngilh lo.
84 Na siahhlawhih damsung nipawl tla hi ziang zat an si?
Keimah i tiduhdahtupawl parah ziang tikah so thuṭhennak na tuah ding?
85 Mipuarthaupawl in ka hrangah khurpawl an lai,
Cumi cu na dān thawi milaw a si lo.
86 Na thupek hmuahhmuah cu an rinum;
Annih in diklo zetin in tiduhdah;
In bawm aw!
87 Leitlun ah in hlorálter zikte thlang,
Asinan na nunphung dānpawl ka thlauthla cuang lo.
88 Na lainatduhdawtnak zulhin i ṭhangphawksal aw,
Cutin na hmurkâ ih thutheihtermipawl ka thlun thei ding.

89 Maw Jehovah, na kamsuakthu cu,
Van ah kumkhuain dĭnhngeh a rak si.
90 Na rinumnak cu san hmuahhmuah a daih;
Leilung hi na dĭnhnget ih, a um ringring.
91 Na cīn le dān zulhin tuihni tiang an pehzăwm vivo,
Ziangahtile an zaten na siahhlawh an si.
92 Na dān hi ka năwmawknak rak si lo sehla cu,
Ka zăwnzaihnak ah ka hlorál zo ding.
93 Na nunphung dānpawl ka hngilh dah lo ding,
Ziangahtile anmahpawl hmangin nang in in ṭhangphawk.
94 Kei cu nangmai ta ka si, i run aw;
Ziangahtile na nunphung dānpawl ka hawl.
95 Misualrálpawl in keimah siatsuah dingah in bawh,
Asinan kei cun na thutheihtermipawl ka ngaihtuah ding.
96 Famkimnak hmuahhmuah ih netnak ka hmu zo,
Asinan na thupek cun nasatukin a huapkau a si.

97 Na dān ka duhzia cu aw!
Cumi cu sunnihlawh ngunngaih zetih ka ngaihtuah mi a si.
98 Nangmah in, na thupekpawl hmangin, ka ralpawl hnakih fimsawn ah i tuah;
Ziangahtile na thupekpawl cu ka hnenah an um ringring.
99 I zirhtupawl hmuahhmuah hnakin theihthiamnak ka nei tamsawn,
Ziangahtile na thutheihtermipawl cu ngunngaih zetih ka ngaihtuah mi an si.
100 Miupapawl hnakin ka theithiam tamsawn,
Na nunphung dānpawl ka thlun ruangah a si.
101 Lamzin ṭhalo kip ihsin, ka ke ka sūp theinak dingah,
Na kamsuakthu ka thlun.
102 Na cīn le dānpawl ka suahsan lo,
Ziangahtile nangmah rori in i zirh zo.
103 Na kamsuakthupawl cu ziang tlukin so an thlum!
Khuaitizu hnakin ka kâ ah cun an thlumsawn.
104 Na nunphung dānpawl ihsin theihthiamnak ka ngah;
Curuangah lamzin sual pauhpauh ka hua.

105 Na kamsuakthu cu ka ke hrangah meito a si ih,
Ka zin hrangah tleu a si.
106 Na cīn le dān dikpawl ka thlun ding tiah
Sia ka săm ih, ka nĕmhnget.
107 Zăwnzaihnak nasazetin ka tuar;
Maw Jehovah, na kamsuakthu zulhin i ṭhangphawksal aw.
108 Maw Jehovah, ka kâ lungpuak thilhlănpawl hi cohlang awla,
Na cīn le dānpawl in zirh aw.
109 Ka nunnak cu catbang loin thlaphanumza in a um,
Asinan na dān cu ka hngilh dah lo.
110 Misualrálpawl in ka hrangah tháng an kăm,
Asinan na nunphung dānpawl ihsin ka pial lo.
111 Na thutheihtermipawl cu ka kumkhaw ro a si,
Ziangahtile cupawl cu ka thinlung aipuannak an si.
112 Kumkhuain, a net tiang rori in,
Na sakhaw dānpawl tuahsuak dingin ka thinlung in ka tum.

113 Thinlung phir ka hua,
Asinan na dān cu ka duh.
114 Nang cu ka relhnak le ka ralphaw na si;
Na kamsuakthu ah ruahsannak ka nei.
115 Nannih thil ṭhalo a tuahtupawl, ka hnen ihsin tlân uh,
Ziangahtile ka Pathian thupekpawl ka thlun ding!
116 Ka nun theinak dingah, na kamsuakthu zulhin i tungding aw;
Cule ka ruahsan mi parah ningzakin i umter hlah.
117 I kaihnget aw, cule ka him ding,
Cule na sakhaw dānpawl catbang loin ka thlun ding.
118 Na sakhaw dānpawl ihsin a pialtupawl hmuahhmuah cu na rak hnáwng,
Ziangahtile an mi bumnak cu thuphan a si.
119 Leilung misualrálpawl hmuahhmuah cu thir-êk bangin na hlăwnhlo hai;
Curuangah na thutheihtermipawl cu ka duh a si.
120 Nangmah ṭih ruangah ka titsa a khūr ih,
Na thuṭhennakpawl ka ṭih.

121 A dik mi le a dingfel mi ka rak tuah;
I palbĕttupawl hnenah i tân ta hlah aw.
122 Na siahhlawh ṭhatnak dingah âmkhāmtu si aw;
Mipuarthaupawl kha in palbĕtter hlah.
123 A dingfel mi na kamsuakthu le
Na runsuahnak hawl ah ka mit an râu ṭheh.
124 Na lainatduhdawtnak thawn na siahhlawh hi ṭha zetin ti aw,
Cule na sakhaw dānpawl i zirh aw.
125 Kei cu na siahhlawh ka si;
Na thutheihtermipawl ka theih theinak dingah,
Theihthiamnak i pe aw.
126 Atu hi Jehovah căngvaih cān a si,
Ziangahtile annih in na dān an pahbăl.
127 Curuangah na thupekpawl cu sui hnakin ka duh a si,
A si, sui hlirhlăng hnakin.
128 Curuangah thil hmuahhmuah thuhla ah cun,
Na nunphung dānpawl hmuahhmuah hi
A dik tiah ka ruat;
Lamzin sual pauhpauh ka hua.

129 Na thutheihtermipawl cu mangbangza an si;
Curuangah ka nunnak in a thlun hai.
130 Na kamsuakthupawl phuanlăngnak in tleu a pe;
Cumi in mimâwlpawl hnenah theihthiamnak a pe.
131 Ka kâ ka âng ih ka thaw hluthlo,
Ziangahtile na thupekpawl ka ngai.
132 I zoh awla, i zangfah hram aw,
Na hmin duhdawtupawl lamih na tikēl vekin.
133 Ka kekarpawl hi na kamsuakthu in hngetter aw,
Cule mawhsualnak in in uk hlah seh.
134 Na nunphung dānpawl ka thlun theinak dingah,
Minungpawlih palbĕtnak ihsin i tlen aw.
135 Na siahhlawh parah na mithmai êngter awla,
Na sakhaw dānpawl i zirh aw.
136 Ka mit ihsin tiva a luang,
Ziangruangahtile milaipawl in na dān an thlun lo.

137 Maw Jehovah, nang cu midingfel na si,
Na cīn le dānpawl khal an dik.
138 Thu na pek mi na thutheihtermipawl cu,
An dingfel ih an rinum zet.
139 Ka ralpawl in na kamsuakthupawl an hngilh ruangah,
Ka ṭhahnemngainak in i kangrál.
140 Na kamsuakthu cu a fai tuk;
Curuangah na siahhlawh in cumi cu a duh.
141 Kei cu mitenau le hmuhsuam mi ka si,
Cuticingcun na nunphung dānpawl ka hngilh lo.
142 Na dingfelnak cu kumkhaw dingfelnak a si ih,
Na dān cu thutak a si.
143 Buainak le ānhainak in in táwngngah,
Cuticingcun na thupekpawl cu ka năwmawknak an si.
144 Na thutheihtermipawl cu an dingfel kumkhua;
Theihthiamnak i pe aw, cule ka nung ding.

145 Ka thinlung zaten ka ausuak;
Maw Jehovah, i ngai aw!
Na sakhaw dānpawl ka thlun ding.
146 Na hnenah ka ausuak;
I run aw, cule na thutheihtermipawl ka thlun ding.
147 Khawfingcat hlanah ka tho ih,
Băwmnak hrangah ka au;
Na kamsuakthu ah ruahsannak ka nei.
148 Na kamsuakthu ngunngaih zetih ka ngaihtuah theinak dingah,
Zan sentari kil cān tluansuakin ka meng.
149 Na lainatduhdawtnak zulhin ka aw ngai aw;
Maw Jehovah, na diknak zulhin i ṭhangphawksal aw.
150 Sualralnak a thluntupawl in in ra naih vivo;
Annih cu na dān thawn a hlataw mi an si.
151 Maw Jehovah, nang cu na nâi a si,
Cule na thupekpawl hmuahhmuah hi thutak an si.
152 Na thupekpawl cu kumkhua daih dingin na rak dĭn ti na thutheihtermipawl ihsin hlanah ka rak thei.

153 Ka zăwnzaihnak zoh awla i runsuak aw,
Ziangahtile na dān ka hngilh lo.
154 Kan ṭannak hum awla, i tlen aw;
Na kamsuakthu zulhin i ṭhangphawk aw.
155 Runsuahnak cu misualrálpawl hnen ihsin a hla,
Ziangahtile na sakhaw dānpawl an hawl lo.
156 Na lainatnak cu a nasatuk, Maw Jehovah;
Na cīn le dānpawl zulhin i ṭhangphawk aw.
157 Ka ralpawl le i tiduhdahtupawl an tam tuk,
Cucingin na thutheihtermipawl ihsin ka fehpêng lo.
158 Miphatsanhmangpawl ka hmu hai ih, ka mit an kem,
Ziangruangahtile annih in na kamsuakthu an thlun lo.
159 Na nunphung dānpawl ziangtluk ka duh ti ruat hnik;
Maw Jehovah, na lainatduhdawtnak zulhin i ṭhangphawksal aw.
160 Na kamsuakthu pumpi in thutak a si ih,
A dik mi na cīn le dānpawl cu pakhat fingfing in kumkhua an daih.

161 Thu um loin uktupawl in in tiduhdah,
Asinan ka thinlung cu na kamsuakthu ṭihzahupatnak thawn a ding.
162 Hlawnthil tampi sartu vekin,
Na kamsuakthu ah lungawiaipuangin ka um.
163 Thuphan cu ka hua ih ka fih,
Asinan na dān cu ka duh.
164 A dik mi na cīn le dānpawl ruangah,
Ni khat ah vei sarih ka lo thangṭhat.
165 Na dān a duhtupawl cun hnangamdaihnak nasazet an nei ih,
Zianghman in a bahter hai lo.
166 Na runsuahnak ka ruahsan, Maw Jehovah,
Na thupekpawl ka thlun.
167 Ka nunnak in na thutheihtermipawl a thlun ih,
Cupawl cu nasazetin ka duh hai.
168 Na nunphung dānpawl le na thutheihtermipawl ka thlun,
Ziangahtile ka lamzin hmuahhmuah cu na hmaiah an um.

169 Ka aunak na hmaiah thleng seh, Maw Jehovah;
Na kamsuakthu zulhin theihthiamnak i pe aw.
170 Ka dilnak na hmaiah thleng seh;
Na kamsuakthu zulhin i runsuak aw.
171 Ka hmur in thangṭhatnak a simsuak ding,
Ziangahtile nang in na sakhaw dānpawl i zirh.
172 Ka lei in na kamsuakthu a rel ding,
Ziangahtile na thupekpawl hmuahhmuah cu an dingfel a si.
173 Na kut hi keimah bawmtu ah cang seh,
Ziangahtile kei in na nunphung dānpawl ka hril zo.
174 Na runsuahnak ka ngai a si, Maw Jehovah,
Cule na dān cu ka năwmawknak a si.
175 Ka lu nung seh, cule a lo thangṭhat ding;
Cun na cīn le dānpawl in i bawm seh.
176 A hlo mi tuu vekin ka rak pial;
Na siahhlawh hi hawlsuak aw,
Ziangahtile na thupekpawl ka hngilh lo.

120

Runsuahnak hrang Thlacam

Sokai Hla.

1 Ka vansannak ah Jehovah hnenah ka au,
Cule anih in i rak ngai.
2 Maw Jehovah, thuphan perhmang hmur ihsin le
Mibumhmang lei lak ihsin i runsuak aw.
3 Maw nang a diklo mi lei,
Na parah ziang tuah a si ding?
Asilole na hnenah ziang pek a si ding?
4 Ral dotuih thálfung hriampawl le,
Hmunphiah kung meilingpawl!
5 Meshek ih ka cēn le,
Kedar puanthlampawl lakih ka cēn hi cu,
Ka hrangah hmakhawpihnak a si.
6 Ka nunnak hi remdaihnak a huatupawl hnenah
Rei tuk a rak cêng.
7 Kei cun remdaihnak ka duh;
Asinan ka ṭawng tikah, annih cun ral do an duh.

121

Rinsantlak Pathian Băwmnak

Sokai Hla.

1 Tlangpawl lam khi ka mit in ka hei thlir ding,
Khui lamin so keimah băwmnak a rat ding?
2 Keimah băwmnak cu lei le van tuahtu,
Jehovah hnen ihsin a ra.
3 Anih cun na ke tawlhter a siang lo ding;
Nangmah kilvengtu cu a sing dah lo ding.
4 Ngai hnik, Israel kilvengtu cu a sing lo ding ih,
A itthat lo ding.
5 Jehovah cu a lo kilvengtu a si;
Jehovah cu na vawrh lam kut ih a lo hliaptu a si.
6 Sun ah ni in siseh,
Zan ah thlapi in siseh harnak an lo pe lo ding.
7 Jehovah in thil ṭhalo hmuahhmuah lak ihsin a lo kilhim ding;
Anih in na nunnak a kilhim ding.
8 Jehovah in na suah na luhin a lo kilhim ding,
Tuih cān ihsin, kumkhuain kumkhua tiang.

122

Jerusalem ruangih Thangṭhatnak

Sokai Hla. David-ih Thangṭhatnak Hla.

1 «Jehovah inn ah feh uhsi,» tiin
Ka hnenih an ti tikah ka lung a awi.
2 Ka ke cu na kăwtkapawl sungah an ding, Maw Jerusalem.
3 Jerusalem cu,
Hngetkhoh zetih dĭn mi khawpi vekih sak mi a si.
4 Cuih hmun lamah hnámpawl,
Jehovah hnámpawl cu,
Israel-mipawlih ti ṭheu vekin,
Jehovah hmin hnenah lungawi thu sim dingin an so ṭheu.
5 Ziangahtile cu tawkah thuṭhennak hrangah laltokhampawl dĭn a si,
David sungza laltokham cu.
6 Jerusalem daihnak hrangah thlacam uh:
«Nangmah duhdawtupawl cu hmuingil hai seh.
7 Na hruangkulhpawl sungah daihnak um seh,
Na siangpahrang innpawl sungah hmuingilnak,» tiin.
8 Ka unaupawl le ka hawipipawl ruangah,
Atu ah, «Na hnenah hnangamdaihnak um seh,» tiah ka ti ding.
9 Jehovah kan Pathian inn ruangah
Na ṭhatnak ka hawl ding.

123

Zahngainak Dilnak

Sokai Hla.

1 Na hnen lam ka hun thlir,
Maw, nang vanpawl ih cêng.
2 Ngai hnik, siahhlawhpawlih mit in an pulepawlih kut an zoh vek le,
Siahhlawh nunaupawlih mit in an pilepawlih kut an zoh vekin,
In zangfah hlanlo,
Kan mit in kan Pathian Jehovah a zoh.
3 In zangfah hram aw, Maw Jehovah, in zangfah hram aw!
Ziangahtile mi ih hmuhsuamnak thawn kan khat nasatuk.
4 Kan nunnak cu ngaihngam huahhi ih a nung mipawlih nautatnak le
Mipuarthaupawlih hmuhsuamnak in,
Nasazetin a khatliam.

124

Runsuahnak ruangih Lungawi Thu Simnak

Sokai Hla. David-ih Thangṭhatnak Hla.

1 Atu ah cun Israel-mipawl in,
Kan lamah Jehovah ṭang lo sehla cu,
2 Minungpawl kanmah dokalhih an thawh tikah,
«Kan lamah Jehovah ṭang lo sehla cu,
3 Kan parih an thinlingnak a alh tikah khan,
Nung cingin in dawlh thluh zo ding.
4 Cun tipi in in cîmpil ding ih,
Tivatepawl in kan nunnak an fĕnhlo zo ding;
5 Cule tiluang khoh in
Kan nunnak a cimpîl zo ding,» tiah ti hai seh.
6 Ramsa ih bawhthlek dingih in siang lo tu
Jehovah cu thangṭhatin um seh.
7 Kan nunnak cu thangkamtuih tháng sung ihsin a tlânsuak mi vâte vekin a tlânsuak;
Thang cu ṭhiahbăl a si ih, kan tlansuak.
8 Kan hrangih băwmnak cu
Lei le van tuahtu Jehovah hmin ah a si.

125

Pathian Mipawl Himnak

Sokai Hla.

1 Jehovah a rinsantupawl cu,
Zion Tlang,
Hnin theih lo mi, kumkhuaih a umhnget mi vek an si.
2 Jerusalem kha tlangpawl in a kulh vekin,
Jehovah in a mipawl cu tuihni ihsin
Kumkhua tiang a kulhbet.
3 Midingfelpawl hnenih zĕm mi ram ah cun
Sualralnak kianghrăwl a cawl lo ding,
Culole midingfelpawl in mawhsualnak tuah dingin an kut an suah pang ding.
4 Maw Jehovah, miṭhapawl hnenah thil ṭha tuah aw,
Cule thinlung dĭngpawl hnen khalah.
5 A kawi mi an lamzinpawl lamih pialtupawl lawngte cu,
Jehovah in mawhsualnak tuahtupawl thawn a hruaihlo hai ding.
Israel parah hngangamdaihnak um seh.

126

Aipuang zetih Thlairawl Khawm

Sokai Hla.

1 Jehovah in Zion cu vanneihnak a pekkirsal laiah khan,
Kannih cu mang mantu vek kan si.
2 Kan kâ cu hnihnak in a khat ih,
Kan lei khal hla saknak in a khat.
Cun miphunpawl lakah,
«Jehovah in an hrangah thil ropipawl a tuah zo,» tiah an ti.
3 Jehovah in kan hrangah thil ropipawl a rak tuah ih,
Kan lung a awi.
4 Maw Jehovah kan vanneihnak in pekirsal aw,
Negev tivatepawl vekin.
5 Mitthli thawn thlaici a tuhtu cun,
Aipuangin a at ding.
6 Vawrh dingah thlaici kengih,
Ṭap cingin cawl loih a fehtu cu,
A fângtelpawl phurin,
Aipuang zetin a kirsal leh tengteng ding.

127

Innsungsang ih Pathian Thlawsuah

Sokai Hla. Solomon-ih Thangṭhatnak Hla.

1 Jehovah in inn a sak lo ah cun,
Cuih inn saktupawl cu an ṭuanbāng lak men;
Jehovah in khawpi a kil lo ah cun,
A kiltupa cu a meng lak men.
2 Ṭuanbăngnak rawl ei dingah,
Zingpit teih thawh,
Tlaipi ih cawlh khal hi na hrangah a lak men a si;
Ziangahtile anih in a duhdawt mi cu ihthahnak a pe.
3 Ngai hnik, fātepawl hi Jehovah hnen ihsin kan co mi ro an si,
Rilih rah hi lawmman a si.
4 Mi pakhat ih a no lai fātepawl cu,
Ralkap kut ih um thálfungpawl vek an si.
5 Thálfung bawm a khat ih neitupa cu mithlawsuak a si;
Kăwtka ih an ralpawl an biak tikah an ning a zak lo ding.

128

Innsungsang Nuam

Sokai Hla.

1 A lamzinpawl ih a fehtu,
Jehovah a ṭihzahtu hmuahhmuah cu mithlawsuak an si.
2 Na kut ṭuanbăngnak rah na ei tikah,
Na lung a awi ding ih, cumi cu na hrangah a ṭha ding.
3 Na nupi cu na inn sungril thûkbik ah,
A rah zet mi sabit hri vek a si ding,
Na fātepawl cu na cabuai kimvel hmuahhmuah ah,
Olif kung vek an si ding.
4 Ngai hnik, Jehovah a ṭihzahtupa cu
Cuvekih thlawsuah a si ding.
5 Jehovah in Zion ihsin thlawsuah lo pe sehla,
Na damsung hmuahhmuah
Jerusalem hnianghnarnak hmu law.
6 A si, na fātepawlih fātesinpawl hmu law.
Israel parah hnangamdaihnak um seh!

129

Israel Doralpawl Duainak hrang Thlacamnak

Sokai Hla.

1 Atu ah Israel in,
«Annih in ka no lai ihsin vei tampi in zawnzaiter,
2 Annih in ka no lai ihsin vei tampi in zawnzaiter;
Asinan in neh dah lo.
3 Lei lettupawl in ka zāng ah lei an let;
An leileh khuarpawl saupin an tuah,» tiah ti seh.
4 Jehovah cu a dingfel;
Misualrálpawlih hrihrualpawl a tán ṭheh.
5 Zion a huatupawl hmuahhmuah cu
Ningzakin kirsal hai seh.
6 Anmah cu a ṭhansan hlanih a vuai mi,
Inn tlunih hrampi vek si hai seh.
7 Cuih hrampi cu a attuih kut khat ding hman a um lo ih,
A bân thawi a tēl ding khal a um lo.
8 A kiangkapih fehtupawl zohman in,
«Jehovah thlawsuah cu na parah um hram seh,
Jehovah hmin in thlawsuah kan lo pe,» tiah ti hlah hai seh.

130

Pathian Tlennak Hngah

Sokai Hla.

1 Ti thûkpi sung ihsin na hnenah ka au, Maw Jehovah;
2 Bawipa, ka aw ngai aw!
Ka dilnak aw lamah
Na hna rak tháwng aw.
3 Maw Jehovah, nang in mawhsualnakpawl hminsin hnik ta la cu,
Maw Bawipa, zo so a ding thei ding?
4 Asinan ṭihzah na si theinak dingah,
Na hnenah ngaidamnak a um.
5 Jehovah ka hngak, ka nunnak in a hngak,
Cule amai kamsuakthu ah ruahsannak ka nei.
6 Kiltu in zing a hngahhlap hnakih nasain,
Ka nunnak in Bawipa a hngak,
A si, kiltu in zing a hngahhlap hnakih nasain.
7 Maw Israel, Jehovah ah ruahsannak nei aw;
Ziangahtile Jehovah hnenah lainatduhdawtnak a um ih,
A hnenah tlennak luangliam a um.
8 Cule anih in Israel kha
A mawhsualnakpawl hmuahhmuah ihsin a tlen ding.

131

Daiteih Pathian Hngahnak Hla

Sokai Hla. David-ih Thangṭhatnak Hla.

1 Maw Jehovah, ka thinlung a hngal lo,
Ka mit khal a sâng lo.
Thuhla pipapawl khalah ka tel lo ih,
Ka hrangih thil harsa tukpawl khalah.
2 Thungaiten ka nunnak cu daiten ka umter ih, hnangamten ka umter zo,
Naute hnawi thlei mi a nu thawi umtlang vekin;
Naute hnawi thlei mi vekin ka nunnak cu ka sungah a um a si.
3 Maw Israel, tuih cān ihsin kumkhua tiangin
Jehovah ah ruahsannak nei aw.

132

Zion ih Pathian Cēnnak

Sokai Hla.

1 Maw Jehovah, David le a zăwnzaih tuarnak hmuahhmuah kha cîng ringring aw;
2 Anih in Jehovah hnenah sia a săm ih,
Jakob-ih Micak Pa hnenah thu a kam:
3 «Ka inn pindan sungah ka lut hrimhrim lo ding,
Asilole ka ihkhun khalah ka kai lo ding;
4 Ka mit ka itthatter lo ding,
Asilole ka mit vunpawl ka singter lo ding,
5 Jehovah hrangah hmun ka hmuh hlanlo,
Jakob-ih Micak Pa hrangah cēnnak hmun ka hmuh hlanlo,» tiah a ti.
6 Ngai hnik, cumi cu Efratha ah hna in kan thei;
Cumi cu Jaar ram ah kan hmu.
7 A biakbûk sungah feh uhsi;
A keretnak ah bia uhsi.
8 Maw Jehovah, tho aw, na cawlhhahdamnak hmun ah feh aw,
Nangmah le na cahnak thukham kuang thawn.
9 Na puithiampawl cu dingfelnak thawn thuam aw hai sehla,
Na mithiangpawl aipuangin au hai seh.
10 Na siahhlawh David ruangah,
Na hriak thih mi paih hmai cu herkirter hlah aw.
11 Jehovah in David hnenah thungaingaiin sia a rak săm;
Cumi ihsin a kirsal lo ding:
«Na laltokham parah na rilrah ka toter ding.
12 Na fapapawl in ka thukham le
Anmah ka zirh ding mi ka thutheihternak an thlun a si ahcun,
An fapapawl khal na laltokham ah kumkhuain an to ve ding.»
13 Ziangahtile Jehovah in Zion a hril zo;
A cēnnak dingah a saduhthah mi hmun a si:
14 «Hih hmun cu ka kumkhaw cawlhnak hmun a si,
Hih hmun ah ka cêng ding, ziangahtile ka saduhthah hmun a si.
15 Amah cu luangliamin ka thlawsuah ding;
A mifarahpawl rawl in ka tlăiter hai ding.
16 Cuihtlunah a puithiampawl runsuahnak thawn ka thuam ding,
Cule a mithiangpawl aipuangin an au ding.
17 Cu tawkah David-ih ki ka ṭoter ding;
Ka hriak thih mi pa hrangah meito ka timlam ding.
18 A ralpawl ningzahnak thawn ka thuam ding,
Asinan amai parah cun a lallukhum a tle ding.

133

Lungrualnak Sunlawizia

Sokai Hla. David-ih Thangṭhatnak Hla.

1 Ngai hnik, unau rual hrangah lungrualteih hmunkhatih cēntlang hi
Ziang tlukin a ṭha ih, ziang tlukin a nuam!
2 Cumi cu lu parih hriak mankhung,
Khabe hmul parih luangthla,
Aaron-ih khabe hmul,
A sinfen zim tiangih luangthla vek a si.
3 Cumi cu Hermon daifim,
Zion tlangpawl parih tlathla vek a si;
Ziangahtile cu tawkah Jehovah in thlawsuahnak thu a pe,
Kumkhaw nunnak cu.

134

Zan ih Pathian Thangṭhat

Sokai Hla.

1 Ngai hnik, Jehovah thangṭhat uh,
Nannih Jehovah siahhlawhpawl hmuahhmuah,
Zan ih Jehovah inn sungih rawngbawltupawl tla!
2 Hmun thianghlim sungah nan kut thlir uhla,
Jehovah thangṭhat uh.
3 Lei le van a tuahtu Jehovah in,
Zion ihsin thlawsuah lo pe seh!

135

Sersiamnak le Tlennak ruangih Pathian Thangṭhatnak

1 Jehovah thangṭhat uh!
Jehovah-ih hmin cu thangṭhat uh;
Maw nannih Jehovah siahhlawhpawl, amah cu thangṭhat uh.
2 Nannih, Jehovah inn le,
Kan Pathian inn sūmtualrawnpawlih rawngbawltupawl,
3 Jehovah thangṭhat uh, ziangahtile Jehovah cu a ṭha;
A hmin thangṭhatnak hla sak uh, ziangahtile cumi cu a nuam a si.
4 Ziangahtile Jehovah in Jakob kha amai hrangah a hril zo,
Israel kha a hlawnthil hleice ah.
5 Ziangahtile Jehovah cu a nasa ti le,
Kan Bawipa cu pathianpawl hmuahhmuah tlunah a um ti ka thei.
6 Van ah le lei ah,
Tifinriatpawl ah le ti thûk hmunpawl hmuahhmuah ah,
Jehovah in a lunghmui zawng pauhpauh a tuah.
7 Anih in tikhu kha leilung dĕngpawl ihsin a kaisoter;
Ruahpi hrangah nimthlakau a tuah;
A hlawnthilpawl lak ihsin thli a thlahsuak.
8 Anih in Izip fatir a that,
Minung fatir le rannung fatir tla.
9 Anih in nan lakah hminsinnakpawl le mangbangzapawl a thlah, Maw Izip,
Faro le a siahhlawhpawl hmuahhmuah parah.
10 Miphun tampi a neh ih,
A cak zet mi siangpahrangpawl a that,
11 Amor-mipawlih siangpahrang Sihon,
Bashan siangpahrang Og le,
Kanaan lalrampawl hmuahhmuah tla.
12 Cule an ram kha ro ah a pek,
A mi Israel hnenah ro ah.
13 Maw Jehovah, na hmin cu kumkhua a hmun,
Maw Jehovah, nangmah cīn ringring nak cu san hmuahhmuah hrawhsuakin a si.
14 Ziangahtile Jehovah in a mipawl thu a ṭhen ding,
Cule a siahhlawhpawl parah lainatnak a nei ding.
15 Miphunpawlih milempawl cu sui le ngun an si,
Minung kutpawl thawi tuah mi an si.
16 Cupawl cun kâ an nei, asinan an ṭawng thei lo;
Mit an nei, asinan an hmu thei lo;
17 Hna an nei, asinan an thei thei lo;
An kâ sung khalah ziang thaw hman a um lo.
18 Cupawl a tuahtupawl khal anmah vek an si;
Cupawl a rinsantupawl khal.
19 Maw Israel sungza! Jehovah thangṭhat uh!
Maw Aaron sungza, Jehovah thangṭhat uh.
20 Maw Levi sungza, Jehovah thangṭhat uh!
Nannih Jehovah a ṭihzahtupawl, Jehovah thangṭhat uh.
21 Jerusalem ih cêng Jehovah cu Zion ah thangṭhat uh!
Jehovah thangṭhat uh.

136

A Lainatduhdawtnak ruangih Pathian Thangṭhatnak

1 Maw, Jehovah hnenah lungawi thu sim uh, ziangahtile anih cu a ṭha!
Ziangahtile a lainatduhdawtnak cu kumkhuain a hmun.
2 Maw, pathianpawlih Pathian hnenah lungawi thu sim uh!
Ziangahtile a lainatduhdawtnak cu kumkhuain a hmun.
3 Maw, bawipawlih Bawi hnenah lungawi thu sim uh!
Ziangahtile a lainatduhdawtnak cu kumkhuain a hmun:
4 Amah lawngih a nasa mi mangbangzapawl tuahtu hnenah,
Ziangahtile a lainatduhdawtnak cu kumkhuain a hmun;
5 Fimnak ih vanpawl a tuahtu hnenah,
Ziangahtile a lainatduhdawtnak cu kumkhuain a hmun;
6 Tipi tlunih leilung a pharhtu hnenah,
Ziangahtile a lainatduhdawtnak cu kumkhuain a hmun;
7 A nasazet mi tleu petupawl a tuahtu hnenah,
Ziangahtile a lainatduhdawtnak cu kumkhuain a hmun,
8 Sun uktu dingah ni,
Ziangahtile a lainatduhdawtnak cu kumkhuain a hmun;
9 Zan uktu dingah thlapi le arsipawl,
Ziangahtile a lainatduhdawtnak cu kumkhuain a hmun.
10 Izip fatir thattu hnenah,
Ziangahtile a lainatduhdawtnak cu kumkhuain a hmun;
11 Cule an lak ihsin Israel hruaisuaktu hnenah,
Ziangahtile a lainatduhdawtnak cu kumkhuain a hmun;
12 A cak mi kut in le bān suahin,
Ziangahtile a lainatduhdawtnak cu kumkhuain a hmun;
13 Tipi Sen hmun hnih ih ṭhentu hnenah,
Ziangahtile a lainatduhdawtnak cu kumkhuain a hmun;
14 Cule cumi laifang ihsin Israel a fehtlăngtertu hnenah,
Ziangahtile a lainatduhdawtnak cu kumkhuain a hmun;
15 Asinan Faro le a ralkappawl lawngte cu Tipi Sen ah a ^apilter hai,
Ziangahtile a lainatduhdawtnak cu kumkhuain a hmun;
16 A mipawl ramṭhing ih hruaitu hnenah,
Ziangahtile a lainatduhdawtnak cu kumkhuain a hmun;
17 Siangpahrang nasazetzet thattu hnenah,
Ziangahtile a lainatduhdawtnak cu kumkhuain a hmun;
18 Cule siangpahrang cak zetzet thattu hnenah,
Ziangahtile a lainatduhdawtnak cu kumkhuain a hmun.
19 Amor-mipawlih siangpahrang Sihon thattu,
Ziangahtile a lainatduhdawtnak cu kumkhuain a hmun;
20 Bashan siangpahrang Og thattu,
Ziangahtile a lainatduhdawtnak cu kumkhuain a hmun.
21 Cule an ram cu a mipawl ro ah a pe,
Ziangahtile a lainatduhdawtnak cu kumkhuain a hmun;
22 A siahhlawh Israel hnenah ro,
Ziangahtile a lainatduhdawtnak cu kumkhuain a hmun.
23 Kan dinhmun niamnak in rak cîng ringring tu cu,
Ziangahtile a lainatduhdawtnak cu kumkhuain a hmun;
24 Kan ralpawl lak ihsin in runsuaktu cu,
Ziangahtile a lainatduhdawtnak cu kumkhuain a hmun;
25 Milai hmuahhmuah hnenih rawl petu cu,
Ziangahtile a lainatduhdawtnak cu kumkhuain a hmun.
26 Van Pathian hnenah lungawi thu sim uh!
Ziangahtile a lainatduhdawtnak cu kumkhuain a hmun.

136:15^a pilter: A ṭawng hrampi ah cun, «thingthla» ti a si.

137

Zion Ngainak Hla

1 Babilon tivapawl kapah,
Cu tawkah kan to, a si,
Zion kan ruah tikah kan ṭap.
2 Kan ṭingṭangpawl,
Partiam thingpawl parah kan thlai.
3 Ziangahtile cuih hmun ah ralkaih ih in hruaihlotupawl in hla sak in fial,
Cule in sawisatupawl in hlim dingin in fial,
«Zion hlapawl lakih pakhat tal in saksak uh,» an ti.
4 Jehovah hla cu mi ram ah cun
Ziangtin saw kan sak thei ding?
5 Maw Jerusalem, ka lo hngilh asile,
Ka vawrh lam kut in a thilthiam hngilh seh.
6 Ka lo cīn ringring lo asile,
Ka sangkhâr ah ka lei bet seh,
Ka aipuannak sângbik tlunih
Jerusalem ka ret lo ah cun.
7 Maw Jehovah, Jerusalem băl ni ih Edom fapapawl ih an rel mi kha cîng ringring aw:
«A ṭohram rori tiangin,
Siatbăl ṭheh uh, siatbăl ṭheh uh,» titupawl kha!
8 Maw, Babilon fanu, tisiat ding mi nu,
Kan parih na tuah vekih a lo rūlsaltu cu mithlawsuak a si!
9 Na fahniangpawl kaibĕt ih,
Lungpi sansiah ih vawtu cu ziangtluk mithlawsuak so a si!

138

Lungawi Thu Simnak le Thangṭhatnak

David-ih Sam.

1 Ka thinlung hmuahhmuah in ka lo thangṭhat ding,
Na hnenah pathianpawl hmaiah thangṭhatnak hla ka sak ding.
2 Na temple thianghlim lam hawihin ka băwkkhup ding ih,
Na lainatduhdawtnak le na thutak ruangah,
Na hmin ka thangṭhat ding;
Ziangahtile thil hmuahhmuah tlunah na hmin le na kamsuakthu cu na rak cawisâng.
3 Ka ausuah ni ah, nang in i sawn,
Cule ka nunnak na cakter ih ralṭha ko in tuah.
4 Na kamsuak ṭawngkampawl an theih tikah,
Maw Jehovah, leilung siangpahrangpawl hmuahhmuah in an lo thangṭhat ding.
5 A si, Jehovah ih thil tidanpawl cu hla in an sak ding,
Ziangahtile Jehovah-ih ropitnak cu a nasatuk.
6 Jehovah cu cawisan a si ko nân,
Dinhmun niampawl a ngaihsak thotho;
Asinan mipuarthaupawl cu a hlatnak ihsin a thei hai.
7 Harsatbuainak lakah feh khal ningla,
Nang in i ṭhangphawksal ding;
Ka ralpawlih thinlingnak dokalhin na bân na pharh ding ih,
Na vawrh lam kut in i run ding.
8 Jehovah in keimah thawi pehparaw mi thupawl a famkimter ding,
Na lainatduhdawtnak cu, Maw Jehovah kumkhuain a hmun;
Na kut thil tipawl thlauthla hlah aw.

139

Ziangkim Thei le Hmun kip ih Um Pathian

Hla Hruaitu Hrang. David-ih Sam.

1 Maw Jehovah, nang in in hliakhlai ih in thei.
2 Nang in ka to le ka thawh na thei;
A hlatnak ihsin ka ruahnak khal na thei.
3 Ka lenvah le ka zau khal na theifel ih,
Ka umdān hmuahhmuah khal na thei thluh.
4 Ka lei ih ṭawngkam a um hlanin,
Ngai hnik, Maw Jehovah, nang in cumi cu na thei ṭheh.
5 Nang in ka dung lam le ka hmai lam i kulh ṭheh,
Cule ka parah na kut na ret.
6 Cuvek theihnak cu ka hrangah mangbangza nasatuk a si;
Cumi cu a sâng ih, ka ngahsuak thei lo.
7 Na Thlarau hnen ihsin khuitawkah ka feh thei ding?
Asilole na hmaika ihsin khuiah so ka tlan ding?
8 Van ah ka kai a si khalle, cu tawkah nang na um;
Sheol ah ihnak ka tuah khal asile, ngai hnik, cu tawkah nang na um.
9 Khawfingcat thlapawl lain,
Tifinriat dĕngah cêng khal ningla,
10 Cutawk hmun khalah na kut in i hruai ding ih,
Na vawrh lam kut in i kaihnget ding.
11 «Thim in i tuam tengteng ding,» ti khal ningla,
Zan hman kha ka kiangkapah tleu ah a cang ding.
12 A si, thim hman na hrangah cun a thim lo,
Zan hi sun vekin a vâng sawn;
Na hnenah cun khawthim le tleu hi an bangrep.
13 Ziangahtile nang in ka sungrilpawl na sersiam;
Ka nuih sūl sungah i phiar.
14 Ka lo thangṭhat ding, ziangahtile maksak le khawruahharza zetih tuah ka si;
Na thil tipawl hi mangbangza an si,
Cule cumi cu ka nunnak in a theifiang.
15 A thupnak ih tuah ka si lai,
Leilung thûknakbik hmunpawl ah thiam zetih phiar ka si laiah,
Ka ^ataksaruangâm hi na hnen ihsin thuh a rak si lo.
16 Na mit in pianhmang dĭnsuah hrih lo cinung ka si lai khal in rak hmu.
Cule ka hrangih ruah cia mi nipawl,
Pakhat hman an rak um hlanin,
Na cazual ah ngan ṭheh an si.
17 Ka hrangih na ruahnakpawl hi ziangtluk hlú so an si, Maw Pathian!
A kăwmkhawm cu ziang tlukin so a tam!
18 Cupawl cu siar ningla, vunnel hnakin an tamsawn ding;
Ka hung ṭhang tikah, kei cu na hnenah ka um lai thotho.
19 Maw Pathian, misualrálpawl hi that ṭheh la cu aw!
Curuangah nannih thisensuahhmangpawl ka hnen ihsin tlânsuak uh.
20 Ziangahtile nangmah dokalhin sualrál zetin an ṭawng;
Na ralpawl in na hmin zianghmanlo menin an rel.
21 Maw Jehovah, nangmah a lo huatupawl kha ka hua ve hai a si lo maw?
Cule nangmah dokalhih a thotupawl ka mitkem ve a si lo maw?
22 Anmah cu huat taktakin ka hua hai;
Ka ral ah ka ruat hai.
23 Maw Pathian i hliakhlai awla, ka thinlung thei aw;
I hniksak awla, ka dawnharnakpawl hi thei aw.
24 Cule keimah ah sualralnak a um maw ti zoh aw,
Cule kumkhaw lamzin ah i hruai aw.

139:15^a taksaruangâm: A ṭawng hrampi ah «ruhpawl» ti a si.

140

Runsuahnak hrang Thlacam

Hla Hruaitu Hrang. David-ih Sam.

1 Miṭha lo pawl hnen ihsin i runsuak aw, Maw Jehovah;
Mihrohrangpawl hnen ihsin i humhim aw,
2 An thinlung sungih thil ṭhalo ruahmannak neipawl hnen ihsin.
Annih cu ralthoter dingin catbang loin an táwngawkhawm.
3 An lei cu rul vekin an hriamter;
An hmur hnuaiah rulngân tûr a um. Selah
4 Misualrálpawl kut ihsin i kilhim aw, Maw Jehovah;
Ka kekarpawl bahter tumtu,
Mihrohrangpawl hnen ihsin i humhim aw.
5 Mipuarthaupawl cun ka hrangah tháng le hrihrual pawl an thup;
Lamzin kiangah sûr an pharh;
Ka hrangah tháng an kăm. Selah
6 Kei in Jehovah hnenah, «Nang cu ka Pathian na si;
Ka dilnak aw lamah na hna tŭn aw, Maw Jehovah.
7 Ka runsuahnak cahnak, Maw Jehovah Bawipa,
Ral do ni ah ka lu na hup.
8 Maw Jehovah, misualrálih saduhthah cu pek hlah aw;
A khawkhannak sualrál khal kauter hlah,
Culole khaisan an si pang ding. Selah
9 Keimah i kulhtupawlih lu parah cun,
An hmur ṭhatlonak in anmah khuh seh.
10 An parah meiling tla seh;
Meisa sungih hlăwn si hai seh,
An thawhsal nawn lonak dingah, khur thûk zet sungah.
11 Mi thangsiattupa cu leilung parah dĭnhnget si hlah seh;
Amah neh dingah mihrohrangpa cu thil ṭhalo in pêl seh,» tiah ka ti.
12 Jehovah in mizawnzaipawl cu an thuhla ah le,
Mifarahpawl hrangah diknak a ṭăn ding ti ka thei.
13 Midingfelpawl cun na hmin ah lungawi thu an sim tengteng ding;
Midĭngpawl cu na hmaika-ah an cêng ding.

141

Sual lak ihsin Kilveng dingih Thlacamnak

David-ih Sam.

1 Maw Jehovah, na hnenah ka ausuak;
Ka hnenah hmanhmawh zetin ra aw!
Na hnenih ka au tikah, ka aw lamah na hna tŭn aw.
2 Ka thlacamnak cu na hmaiah rimhmui vekih ret si seh,
Ka thlir mi ka kutpawl cu, zan lam raithawinak vek si seh.
3 Maw Jehovah, ka kâ ah kiltu ret aw;
Ka hmur sângka ah kiltu ret aw.
4 Ka thinlung hi ziang thil ṭhalo lam khalah hawiter hlah aw,
Mawhsualnak a tuahtupawl thawi
Thil sualrál tuah dingah, ṭan duhnak neiter hlah aw;
Cule an rawl thawpawl khal i eiter hlah aw.
5 Midingfel cun i thawi seh;
Cumi cu ngilneihnak a si ding.
Cule anih cun i kawk seh;
Cumi cu lu parih hriak vek a si ding;
Cumi cu ka lu in êl hlah seh;
Ziangahtile ka thlacamnak cun misualrálpawlih thil tipawl a dokalh ringring lai.
6 An thuṭhentupawl cu khām ih hlăwnthlak an si,
Cule annih in ka ṭawngkampawl an thei, ziangahtile ka ṭawngkampawl cu an thlum a si.
7 Mi pakhat in lei a leh tikih leilung a kuaiter vekin,
Kan ruhpawl cu Sheol sângka ah thehdarh an si.
8 Asinan Jehovah Bawipa, ka mit in nangmah lam a thlir;
Nangmah ah ka beu a si;
Ka nunnak hi kiltu um loin tân hlah aw.
9 Keimah awknak dingih an kăm mi tháng ihsin le,
Mawhsualnak tuahtupawlih thangkam mipawl ihsin i kilhim aw.
10 Himdamteih ka tlansuah laiah,
Misualrálpawl cu anmai sûrpawl sungah tla hai seh.

142

Runsuahnak hrang Thlacam

David Maskil. Pûk sung a um laiih a Thlacam.

1 Ka aw thawn Jehovah hnenah ka ausuak;
Ka aw thawn Jehovah hnenah dilnak ka tuah.
2 Ka phunzainak a hmaiah ka thlebung;
Ka harsatbuainak a hmaiah ka thăn.
3 Ka thlarau thinharmangbangin ka sungih a um tikah,
Nang cun ka zin na thei.
Ka fehnak lamzin ah
Annih in athupten tháng in kam.
4 Vawrh lam zoh awla, hmu aw.
Ziangahtile keimah i ngaihsaktu zohman an um lo;
Răwlhimnak ka nei lo;
Zohman in ka nunnak an kilkhawi lo.
5 Maw Jehovah, na hnenah ka ausuak a si:
«Nang cu ka răwlhimnak,
A nungdam mipawl ram ah ka covo na si,» tiah ka ti.
6 Ka aunak lamah na hna tháwng aw,
Ziangahtile dinhmun niam tukih dirhthlak ka si;
I tiduhdahtupawl hnen ihsin i runsuak aw,
Ziangahtile annih cu ka hrangah an cak tuk.
7 Na hmin ka thangṭhat theinak dingah,
Thawnginn ihsin ka nunnak suah aw;
Midingfelpawl in in kulh ding,
Ziangahtile nang cun ka parah ṭha zetin thil na ti ding.

143

Runsuahnak hrang Thlacam

David-ih Sam.

1 Ka thlacamnak ngai aw, Maw Jehovah,
Ka dilnak lamah na hna tŭn aw!
Na rinumnak le
Na dingfelnak in i sâng aw.
2 Na siahhlawh hi thuṭhennak ah hruai hlah aw,
Ziangahtile na mithmuhah a nung mi zohman midingfel an um lo.
3 Ziangahtile ral in ka nunnak an tiduhdah;
Anih in ka nunnak kha lei ah a palsiat;
Khuahlan laiih a rak thi zo mipawl vekin,
Hmun thim ah i cêngter.
4 Curuangah ka sungah ka thlarau cu thinharmangbangin a um;
Ka thinlung khal ka sungah vansangin a um.
5 Tuihlan nipawl ka máng;
Na thil tipawl hmuahhmuah kha ngunngaih zetin ka ngaihtuah;
Na kut thil ti ka ruat.
6 Na hnenah ka kutpawl ka pharh;
Leicar in tidai a hāl bangin, ka nunnak in nangmah a lo hâl. Selah
7 Zamrangten i sawn aw, Maw Jehovah;
Ka thlarau a cau a si!
Ka hnen ihsin na hmai thup hlah,
Culole khur sungih a suk mipawl vek ka si pang ding.
8 Zing lamah na lainatduhdawtnak thu hna in thei ning,
Ziangahtile nangmah ka lo rinsan;
Ka fehnak ding lamzin i theihter aw,
Ziangahtile ka nunnak na hnen lamah ka dăwmcawi a si.
9 Ka ralpawl hnen ihsin i runsuak aw, Maw Jehovah;
Nangmah ah ka béu a si.
10 Na duh zawng tuah dingin i zirh aw,
Ziangahtile nang cu ka Pathian na si;
A ṭha mi na Thlarau cun dĭngnak ram ah i hruai seh.
11 Na hmin ruangah i ṭhangphawksal aw, Maw Jehovah!
Ziangahtile na dingfelnak ruangah ka nunnak kha harsatbuainak sung ihsin hruaisuak aw.
12 Na lainatduhdawtnak in ka ralpawl sattán hai aw,
Cule ka nunnak zawnzaitertupawl hmuahhmuah siatsuah ṭheh aw;
Ziangahtile kei cu na siahhlawh ka si.

144

Runsuahnak hrang Thlacam

David-ih (Sam).

1 Ka kutpawl ral dodān zirh ih,
Ka kutzungpawl doawkdān zirhtu,
Jehovah ka lungpi cu thangṭhatin um seh.
2 Anih cu ka lainatduhdawtnak le ka kulhhnget,
Ka dawlsâng le i runsuaktu,
Ka ralphaw le ka beunak,
Minungpawl ka tăngih duaitertu a si.
3 Maw Jehovah, minung hi ziangso maw a si ih, na ngaihsak ringring?
Asilole minung fapa teh ziangso a si ih, a zawn na ruah ṭheu?
4 Minung cu thaw vek a si;
A damsung cān cu a liam rero mi thlahlim vek a si.
5 Maw Jehovah, na vanpawl kûnter awla rung ṭum aw;
Tlangpawl thâm awla, meikhu an suak ding.
6 Nimthla kauter awla annihpawl ṭhekdarh hai aw;
Na thálfungpawl thlahsuak awla siatsuah hai aw.
7 Tlun lam ihsin na kut run pharh aw;
Tipi nasazet lak ihsin,
Ram dang mipawl kut ihsin,
I runsuakin i dirsuak aw,
8 An kâ in bumnak ṭawngkampawl a ṭawngtupawl le,
An vawrh lam kut khal thuphan vawrh lam kut a si mipawl kut sung ihsin.
9 Maw Pathian, na hnenah hla thar ka sak ding;
Hri hra nei cawngcing thawn na hnenah thangṭhatnak hla ka sak ding.
10 Siangpahrangpawl hnenih runsuahnak petu,
A siahhlawh David kha
Thihnak ralnâm lak ihsi runsuaktu na si.
11 Ram dang mipawl kut ihsin i lasuak awla i runsuak aw,
An kâ ihsi thuphan ṭawngkampawl a ṭawngtupawl le,
An vawrh lam kut khal thuphan vawrh lam kut a si mipawl hnen ihsin.
12 Kan fapapawl khal an vāng laiah thlai kung pitling vek si hai seh;
Kan fanulepawl cu
Siangpahrang inn hrangih ceimawi mi a kilih ṭhuampawl vek si hai seh;
13 Ló rawlsuak mi a phunphunin
Kan cuampawl khat hai seh,
Kan lórampawl ah kan tuupawl khal in fano thawng tampi, thawngza tampi in hring hai seh;
14 An câwcangpawl an thau,
Hāwi siatsuah ih rung lut an um lo ih,
A suak khal an um lo,
Kăwtthler ah authâwm a um lo.
15 Cuvek dinhmun ih a um mipawl cu mithlawsuak an si;
An Pathian ih Jehovah a neitu miphun cu mithlawsuak an si!

145

Pathian Maksaknak le Ṭhatnak

David-ih Thangṭhatnak Hla.

1 Maw Siangpahrang, ka Pathian, ka lo cawisâng ding;
Cule kumkhuain kumkhua tiang na hmin ka thangṭhat ding.
2 Ni tinte ka lo thangṭhat ding ih,
Kumkhuain kumkhua tiang na hmin ka thangṭhat ding.
3 Jehovah cu a nasa ih, nasazetih thangṭhat ding a si;
Cule a nasatnak hi hawlsuah theih a si lo.
4 Na thil tipawl cu san khat in san khat hnenah an thangṭhatsâwng vivo ding,
Cule na thil ti nasatakpawl an thăn ding.
5 Na cungnunnak maksak ropi le
Na mangbangza tuah mipawl cu ngunngaih zetin ka ngaihtuah ding.
6 Minungpawl in na thil ti maksakpawlih cahzia an sim ding ih,
Kei in na nasatnak ka thăn ding.
7 Annih in na ṭhatnak nasatak cīn ringring nak khal an relsuak ding,
Cule na dingfelnak cu hla in an sak ding.
8 Jehovah cu zangfahnak le lainatnak thawi khat a si,
A thin a fûal ih a lainatduhdawtnak a nasa.
9 Jehovah cu mi hmuahhmuah parah a ṭha,
Cule a lainatnak khal a thil ti hmuahhmuah tlunah a um.
10 Maw Jehovah, na thil ti hmuahhmuah in an lo thangṭhat ding ih,
Na mithiangpawl in an lo thangṭhat ding.
11 Na lalram ropitzia an rel ding ih,
Na cahnak an sim ding,
12 Minung fapapawl hnenah a thil ti nasatakpawl le,
A lalram mawinak ropitzia theihter dingah.
13 Na lalram cu kumkhaw lalram a si ih,
Na thuneihnak cu san hmuahhmuah hrawhsuakin a si.
14 Jehovah in a tlupawl hmuahhmuah a tungding,
Cule a băwkkhup mipawl hmuahhmuah a kaitho.
15 Mit hmuahhmuah in nangmah an lo zoh ih,
Nang in a tikcucān teah an rawl na pe.
16 Na kut na pharh ih,
Nunnak nei mi hmuahhmuah ih hiar mi di na riamter.
17 Jehovah cu a lamzin hmuahhmuah ah a dingfel,
A thil ti hmuahhmuah ah ngil a nei.
18 Jehovah cu amah kotu hmuahhmuah kiangah a um,
Thutak ih amah kotu hmuahhmuah hnenah.
19 Amah ṭihzahtupawlih saduhthah a tlamtlingter ding;
Cuihtlunah an auaw a thei ding ih a run hai ding.
20 Jehovah in amah a duhdawtupawl hmuahhmuah a humhim ding,
Asinan misualrálpawl hmuahhmuah a siatsuah ṭheh ding.
21 Ka kâ in Jehovah thangṭhatnak thu a sim ding ih,
Milai hmuahhmuah in a hmin thianghlim cu
Kumkhuain kumkhua tiang an thangṭhat ding.

146

Bawmtu Jehovah Thangṭhatnak

1 Jehovah cu thangṭhat uh!
Maw ka nunnak, Jehovah cu thangṭhat aw!
2 Ka nun laiah Jehovah ka thangṭhat ding;
Nungdamih ka um laiah ka Pathian thangṭhatnak hla ka sak ding.
3 Uktupawl parah nan rinsannak ret hlah uhla,
Băwm theinak nei lo, minung fapa par khalah.
4 A thlarau in a fehsan ih, amah cu lei ah a kirsal;
Cumi ni rori ah a khawkhannakpawl an hlorál.
5 Amah bawmtu dingih Jakob Pathian a neitu cu mithlawsuak a si,
A ruahsannak cu a Pathian Jehovah ah a si,
6 Lei le van, tifinriat le
A sungih thil um hmuahhmuah tuahtu;
Thutak kumkhuaih a kilkhawitu,
7 Palbĕt mipawl hrangah diknak tuahtu,
Rilrâwngpawl hnenih rawl petu cu.
Jehovah in thawngtlapawl a suah hai.
8 Jehovah in mitcawpawl mit a vângter;
Jehovah in a băwkkhup mipawl a kaitho;
Jehovah in dingfelnak a duh.
9 Jehovah in mikhualpawl a kilveng;
Pa nei lo pawl le nuhmeipawl a bawm;
Asinan misualrálpawlih lamzin cu a lingletter.
10 Jehovah in kumkhuain a uk ding.
Maw Zion, na Pathian cun san hmuahhmuah a uk ding.
Jehovah cu thangṭhat uh!

147

Jerusalem Kilkhawinak ruangih Pathian Thangṭhatnak

1 Jehovah cu thangṭhat uh!
Ziangahtile kan Pathian hnenih thangṭhatnak hla sak hi a ṭha;
Ziangahtile cumi cu a nuam ih, thangṭhatnak cu a mawi.
2 Jehovah in Jerusalem a tungding;
Israel-mipawl lakih dawisuah mipawl a khawm.
3 Anih in thinlung kûaipawl a damter ih,
An hmapawl a tuamsak.
4 Arsi um zât a siar;
An zaten an hmin ciar in a ko hai.
5 Kan Bawipa cu a nasa ih, a cahnak cu a nasa;
A theihthiamnak in cem ni a nei lo.
6 Jehovah in mităngdawrpawl a dăwmcawi;
Misualrálpawl leilung ah a hlăwn.
7 Jehovah hnenah lungawi thu simnak thawn hla sak uh;
Kan Pathian hnenah ṭingṭang thawn thangṭhatnak hla sak uh,
8 Vanpawl khawdur thawi a khuhtu,
Leilung hrangih ruah petu,
Tlangpawl parih hrampi kho dingih tuahtu cu.
9 Amah in ramsapawl rawl a pe ih,
Tlangâk notepawl khal an ai tikah rawl a pe.
10 Ráng cahnak ah a nuamaw lo;
Minung kepawl khalah lunghmuinak a nei lo.
11 Jehovah cu amah ṭihzahtu le
A lainatduhdawtnak ih ruahsannak neitupawl parah a lung a hmui.
12 Maw Jerusalem, Jehovah thangṭhat aw!
Maw Zion, na Pathian thangṭhat aw.
13 Ziangahtile amah in na kăwtka tlângpawl a hngetkhohter;
Na sungih um na fātepawl thlawsuah a pe.
14 Na ramri sungah remdaihnak a tuah ih,
Sangvut ṭhabik in a lo tláiter.
15 Leilung ah a thupek a thlah;
A kamsuakthu cu zamrang zetin a tlân.
16 Sahmul bangin vur a pek;
Vutcâm bangin vur a thehdarh.
17 A vur kha lungtenawi vekin a hlăwndarh;
Amai khawdai hmaiah zo so ding thei ding?
18 A kamsuakthu a thlahsuak ih, cupawl cu an zŭp ṭheh;
A thli a hrānter ih, tipi a luang.
19 Jakob hnenah a kamsuakthu a thăn,
Israel hnenah a sakhaw dānpawl le a cīn le dānpawl khal.
20 Cuvekin ziang miphun par hmanah a ti dah lo;
Cule a cīn le dānpawl khal annih cun an thei lo.
Jehovah cu thangṭhat uh!

148

Sersiam Mipawlih Jehovah Thangṭhatnak

1 Jehovah thangṭhat uh!
Vanpawl ihsin Jehovah thangṭhat uh;
Hmun sângpawl ah thangṭhat uh.
2 A vancungmipawl hmuahhmuah tla, amah thangṭhat uh;
A ralkap rual hmuahhmuah tla, amah thangṭhat uh.
3 Ni le thlapi tla, amah thangṭhat uh;
Nannih a tleu mi arsipawl hmuahhmuah tla, amah thangṭhat uh.
4 Nannih a sângbik mi vanpawl,
Nannih vanpawl tlunih tipi, amah thangṭhat uh.
5 Annih in Jehovah hmin thangṭhat hai seh,
Ziangahtile anih in thu a pek ih anmahpawl cu sersiam an si.
6 Anih in cupawl cu kumkhuain kumkhua tiang a dĭnhnget hai;
Anih in a hlorál lo ding mi thupek a suah.
7 Nannih tifinriat sahring tumpipawl le ti thûk hmuahhmuah pawl,
Leilung ihsin Jehovah thangṭhat uh.
8 Meisa le rial, vur le khawdurpawl,
A kamsuakthu tlamtlingtertu thlipi;
9 Tlangpawl le mualpawl hmuahhmuah;
Rah thei mi thingkungpawl le sidarpawl hmuahhmuah;
10 Ramsapawl le rannungpawl hmuahhmuah;
Băwkvâkpawl le a zam mi vâtepawl;
11 Lei siangpahrangpawl le miphunpawl hmuahhmuah;
Uktupawl le leilung thuṭhentupawl hmuahhmuah;
12 Falapawl le tlangvalpawl;
Tarpawl le nauhakpawl.
13 Annih in Jehovah hmin thangṭhat hai seh,
Ziangahtile amai hmin lawng hi khaisan a si;
A ropitnak cu lei le van tlunah a si.
14 Cule a mipawlih ki a khaisâng zo,
A mithiangpawl,
A kiangnaiih um Israel tefapawl hmuahhmuah ih thangṭhatnak cu.
Jehovah thangṭhat uh.

149

A Ṭhatnak ruangih Jehovah Thangṭhatnak

1 Jehovah thangṭhat uh!
Jehovah hnenah hla thar sak uhla,
A mithiangpawl punkhawmnak ah amah thangṭhatnak.
2 Israel cu anmah Sersiamtu parah lungawiaipuangin um seh;
An Siangpahrang parah Zion fātepawl aipuang hai seh.
3 Lam phahin a hmin thangṭhat hai seh;
Khuangte le ṭingṭang thawn a hnenah thangṭhatnak hla sak hai seh.
4 Ziangahtile Jehovah cu a mipawl parah a lung a hmui a si;
Anih in mităngdawrpawl kha rundamnak thawn a ceimawi ding.
5 Mithiangpawl cu ropitnak ah aipuang zetin um hai seh;
An ihkhun parah ringpin hla sak hai seh.
6 Sang zetih Pathian thangṭhatnak cu an kâ ah um sehla,
An kut ah kap hnih hriam ralnâm,
7 Miphunpawl parah phulei sam dingah le,
Minungpawl parih cawhkuan pe dingah;
8 An siangpahrangpawl kha thir cikcin ih ṭem dingah le,
An upapawl thir hreng sŭt dingah;
9 An parah thuṭhennak ngan cia tuahsuak dingah a si.
Himi hi a mithiangpawl hmuahhmuah cawimawinak a si.
Jehovah thangṭhat uh.

150

A Natsat Hleicenak ruangih Jehovah Thangṭhatnak

1 Jehovah thangṭhat uh!
A hmun thianghlim ah Pathian thangṭhat uh;
A tlolak nasatak ah amah thangṭhat uh.
2 A thil ti nasatakpawl ruangah amah thangṭhat uh;
A nasat hleicenak zulhin amah thangṭhat uh.
3 Tuupa ki phawt awn thawn amah thangṭhat uh;
Cawngcing le ṭingṭang thawn amah thangṭhat uh.
4 Khuangte le lāmin amah thangṭhat uh;
Hri nei tum mipawl le phirivau thawn amah thangṭhat uh!
5 Darsumsel awn thawn amah thangṭhat uh;
Darsumsel khāwng phahin amah thangṭhat uh!
6 Thaw nei hmuahhmuah in Jehovah thangṭhat hai seh.
Jehovah thangṭhat uh!