About Bible Thianghlim | ©

BibleThianghlim – NAHUM

Old Testament

Genesis Exodus Leviticus Numbers Deuteronomy Joshua Judges Ruth 1 Samuel 2 Samuel 1 Kings 2 Kings 1 Chronicles 2 Chronicles Ezra Nehemiah Esther Job Psalm Proverbs Ecclesiastes Song of Solomon Isaiah Jeremiah Lamentations Ezekiel Daniel Hosea Joel Amos Obadiah Jonah Micah Nahum Habakkuk Zephaniah Haggai Zechariah Malachi

New Testament

Matthew Mark Luke John Acts Romans 1 Corinthians 2 Corinthians Galatians Ephesians Philippians Colossians 1 Thessalonians 2 Thessalonians 1 Timothy 2 Timothy Titus Philemon Hebrews James 1 Peter 2 Peter 1 John 2 John 3 John Jude Revelation

NAHUM

123

• A ngantu: Nahum
• A huap sung cān: B.C 663 le 612 karlak
• A siartu: Judah (Pathian minungpawl) le Assiria

Nahum in Assiria lalrampi a siat ding tiah a simsung. A cabu hin Assiria khawpi Nineveh thuhla a rel. Hi cabu sungih a dang khawpi pawimawh cu No-Amon a si. Assiria in hi khawpi pawimawh Izip cu B.C. 663 ah an tisiat (3:8-10). Nahum in himi thil cang hnu, asinan Nineveh siat hlan B.C. 612 ah hi cabu hi a ngan (2:1-3:7, 11-19).

Assiria in Zufariṭis Tivapi ihsin Kanaan ram ih sak lam kha B.C. 850-612 tiang a uk. Khuahlan leilungpi hin Assiria lalram hi an ṭih ngaingai, ziangruangahtile miphun dangpawl an siatsuah ih, an mipi an ṭekdarhter (2Sp 17:1-6). Assiria cun thiltitheinak, neihnunnak le hminthannak a hawl. Sikhalsehla hi lalrampi cu a tlu ding, ziangruangahtile cuih lalrampi cu Pathian in a do ding ih, dān a tat ding (2:13; 3:5).

Nahum in a simsungnak hi Pathian thangṭhatnak hla in a thăwk (1:2-8). Pathian cu ral dotu a si. Anih cu thiltitheinak ah a nasa ih, dingfelnak a ngaina. A ralpawl dān a tat.

Amah cu ṭhat khal a ṭha, a thin a fual ih a mipawl parah lainatnak a nei. Bung 1-nak ah Pathian thangṭhatnak hla hnuah runsuahnak le dāntatnak a peh. Dāntatnak cu Jehovah dokalhih thil ṭhalo tuah tumtupawl hrangah a si (1:9, 11, 14), asinan runsuahnak cu Pathian minungpawl hnenah a thleng ding (1:12-13, 15).

Hi cabu ih bung le câng pawimawhpawl cu 2:1-3:7, 11-19 hi an si. Hi tawkah Nahum in Nineveh siatnak a tarlang. Cumi cu a thleng hrih lo nân, Nahum in thil thleng zo mi vekin a sim. Cumi cu Pathian dāntatnak a thlen rori ding ruangah a si. Nineveh cu neh thei lo ding vek a bang, Izip khawpi No-Amon khal neh thei lo ding vek a bang. Khawruahharzain Pathian in Assiria kha No-Amon khawpi kawlawngtertu dingah a rak hmang (3:8-10). Cutivekin Nineveh khal a tisiat ding.

Ziangahso No-Amon siatnak cu Pathian mipawl hrangah thathawhnak thuthang a si? Pathian cu thil cang mi hmuahhmuah tlunih thuneitu a si ih, miphun hmuahhmuah uktu Lal a si. Miphun hmuahhmuah thilsual an tuah tikah Pathian in tawk a ti cin a um. Pathian thuṭhennak a um. Milai sualralnak cu Pathian in siang hmansehla, an sualralnak săn cu amai hnenah an sim leh ding. Leilung tlunih uktu cakbik in a dingfel mi Pathian thuṭhennak hmaiah a ding thei lo. Dāntatnak ni cu a ra lai rero a si. Pathian cu ral dotu a si. Anih cun thil ṭhalo dān a tat, asinan amai mipawl hrang khalah ral a do ih, thlawsuah a pe hai. Curuangah a camsiatnak si loin, a malsawm dawng dingah Pathian thawi pehzawmawknak dik neih hi a thupi tuk.

1

1 Nineveh thuhla ih thuphuan. Elkosh khawmi Nahum-ih larnak cazual.

A Doralpawl hnenih Pathian Thinlingnak

2 Pathian cu thîkthusia a si ih, Jehovah cu phuba lakhmang a si.
Jehovah in phuba a la ih, a thin a so.
Jehovah in amah dokalhtupawl hnenah phuba a la ding ih,
A doralpawl hrangah thinlingnak a khêk.
3 Jehovah cu thinfûal le huham nasazet nei a si ih,
Misualpawl cu hrem loin a zuah men hrimhrim lo ding.
Jehovah-ih zin cu phusîng le thlipi cak lakah a si ih,
Khawdurpawl cu a ke ih leivut an si.
4 Tifinriat a kawk ih a carter,
Cule tivapawl hmuahhmuah a kāngter ṭheh.
Bashan le Karmel an cuai ih,
Lebanon parpawl khal a vuai.
5 A hmaika-ah tlangpawl an hnîn ih,
Tlangmualpawl an zuprál,
Cule leilung cu a hmaika-ah a tho,
A si, leilung le a sungih cêng mi hmuahhmuah tla.
6 A aithawknak hmaika-ah zo so ding thei ding?
A thinhengnak nasazet cu zo so tuar thei ding?
A thinsosatnak cu meisa bangin thletbŭng a si ih,
Lungpipawl tla amah in a khuai.
7 Jehovah cu a ṭha,
Harsat cān ih hauhruang a si;
Cule amah rinsantupawl a ngaihsak hai.
8 Asinan tilian nasazetin,
^aCuih hmun cu a netter lellel ding ih,
Khawthim lakah doralpawl cu a dawi hai ding.
9 Jehovah dokalhin ziang khua na khâng?
Cumi cu amah in a netter lellel ding.
Zăwnzaihnak vei hnih a ra lo ding.
10 Ziangahtile annih cu hling awkkalhaw le
Ri ko ih zu in mipawl bangin,
Annih cu cangpâwl ro reprep bangin an ziamrál ding.
11 Na hnen ihsin Jehovah dokalhih thil ṭhalo khawkhângtu,
Sualralnak thurawnpetu a suak zo.

1:8^a Cuih hmun: Câng 1-nak ih Nineveh kha a si.

12 Jehovah in hitin a sim:

«Annih cu cakin tam zet khal hai sehla,
Annih cu thah an si ding ih,
An hlorál ding.
Rak lo zawnzaiter zo khal ningla,
Ka lo zawnzaiter nawn lo ding.
13 Atu ah na parih hngawngkol ka khiak ding ih,
An lo hrennakpawl ka catter ding,» tiin.
14 Na thuhla ah Jehovah in thu a pe:
«Na hmin a um ringring nawn lo ding.
Na pathianpawlih inn sung ihsin kher mi milim le salh mi milim cu ka ṭhiatbăl ding.
Na thlān ka tuah ding,
Ziangahtile nang cu santlaihnak nei lo na si,» tiin.
15 Zoh hnik, tlang parih thuthangṭha kengtu,
Remnak thuphuangtuih ke khi!
Maw Judah, na puaipawl cu tuah ko,
Na thutiampawl hlĕnsuak aw.
Ziangahtile misualrálpa nan lakah a ra nawn lo ding,
Anih cu thahhlo vuarvi a si.

2

Nineveh Siatnak

1 Nangmah dokalhin mi ṭekdarhtertu a thleng zo.
Ralhruang kil aw!
Lamzin kilveng aw!
Na zāngtha suah aw!
Nasazetin na cahnak suah aw.
2 Ziangahtile Jehovah in Jakob-ih ropitnak cu Israel ropitnak vekin a dĭnsal ding,
Ziangahtile mikawlawngtertupawl cun an kawlawngter hai zo ih,
An sabit hngepawl khal an siatsuah.
3 A miralṭhapawlih ralphawpawl tla an senter,
Micakpawl cu senlar in an thuamaw.
A timlamawk ni ah
Ránglêngpawl tla meialh thawn an ra,
Feipipawl an tle zukzo.
4 Ránglêngpawl cu kăwtthler ah nasazetin an mâwng,
Lamzin kaupawl ah pakhat le pakhat an nēk aw;
Meisa hliau vek an si ih,
Nimthlakau bangin suk le so ah an tlân.
5 Anih cun a miupapawl a máng ringring;
An feh laiah an bah;
Khawkulh panin an tlân,
Khamawknak phaw an timlam.
6 Tivapi kăwtkapawl an áwngaw ih,
Siangpahrang inn a riarál.
7 Hitin nĕmhngeh a si:
Anih cu ralkaih ih hruaihlo a si ding,
Anih cu an fehpi ding;
Cule a siahhlawh nunaupawl in thuro aw vekin an ṭah ding ih,
An ṭâng an cūm ding.
8 Nineveh cu amai san ah tili vek si khal sehla,
«Ding uh! Ding uh!» tiin an tlânhlo,
Asinan zohman dunglet hawi an um lo.
9 Ngun kha răm uh! Sui kha răm uh!
Hlawnthil a cem thei lo,
Duhthusam neihnunnak tinkim a um.
10 Anih cu a lawnglak, a ṭhing reprep ih, a kawlh!
Thinlung a zŭp ih, khukpawl an ṭhia rero;
Natnak cu taksa hmun i kip ah a um ih,
An hmel zaten a râm thluh.
11 Kiosapawlih pûk cu khuiah a um ih,
Kiosa pa le kiosa pinu le kiosa fano an lenvahnak hmun,
Zohman in thinphâng ko an tuahlonak
Kiosa vanglaipawl cawmnak hmun teh khuiah a um?
12 Kiosa in a fanopawl hrangah a duhtawkin sa a thlek,
A kiosa pinupawl hrangah sa a that,
A pûkpawl cu a deh mi sa in a khatter ih,
A umnak hmunpawl cu sa hlir in a khat.
13 Ngai hnik, ka lo do a si,
Ralkap rualpawlih Jehovah in a ti,
Ránglêngpawl meikhu cang ko ka urkāng ding ih,
Na kiosa nopawl cu ralnâm in a that ṭheh ding;
Leilung ihsin na deh ding mi sa thaihloh ṭheh a si ding ih,
Na thuphurtupawlih aw cu theih a si nawn lo ding.

3

Nineveh Hmakhawpihnak

1 Thisen suahhmang khawpi na hmakhua a pit!
Cuih khua cu thuphan le suamawknak in a khat.
A tuartupawl an cem dah lo.
2 Hrihrual vuak awn le
Ránglêng ke rīl awn,
Ráng tlân tlurhtlo,
Ránglêng tlân thlurhthlo!
3 Rángralkappawl in an năwr, ralnâm tle zukzo, feipi tle zerzer,
Thah mi minung tam zet,
Ruang tam zet pengaw reprep,
Miruak siar cawk lo,
Ruakpawl parah an tlu!
4 Ziangruangahtile hlawhhlângpawlih hursualtuahnak in a khat,
Dawithiam hotu nunau cun a bum,
Anih cun miphunpawl cu a hursualtuahnak in a zuar hai ih,
A dawithiamnak in minungpawl cu a zuar hai.
5 Ngai hnik, ka lo do a si, ralkap rualpawlih Jehovah in a ti;
Na hni sunghruhpawl na hmai tlunah ka hlip ding,
Miphunpawl na taklawngnak ka hmuh hai ding ih,
Lalrampawl na ningzahnak.
6 Na parah fihnungza ka hlăwn ding,
Mi-â vekin ka lo ceibawl ding ih,
Zohnuam ah ka lo tuah ding.
7 Hitin a si ding, a lo hmutu hmuahhmuah in an lo tlansan ding ih,
Nineveh cu a siat ṭheh zo!
Zo in a ṭah pei? tiah an ti ding.
Nangmah a lo hnemtupawl khuiah ka hawl ding?
8 Nile Tivapi kiangih um,
Tipi ih kulh,
Tifinriat cu a kulhawknak a si mi,
A phăr cu ti a si mi,
Thebes khawpi hnakin na ṭhasawn maw?
9 Kush le Izip cu leitek um loih a cahnak an si.
Put le Lubim cu a lo bawmtu an si.
10 Cucingin Thebes cu hruaihlo a si thotho,
Ralkaih ah a feh;
Lamzin ṭêk kip ah a falepawl khal hlăwndarh an si;
A mizahumpawl hrangah camcawhfung an zûk ih,
A miropipawl cu cikcin ih ṭawn an si.
11 Nang Nineveh, nang khal na ri ding;
Thuh na si ding;
Nang khal in na ralpawl lakah răwlhimnak na hawl ding.
12 Na hauhruangpawl hmuahhmuah cu a rah hmin mi theipi kung vek an si:
An hnin asile,
A eituih kâ sungah an ṭil.
13 Ngai hnik, nanmah lakih um na ralkappawl cu nunau an si!
Na ram sungih kăwtkapawl cu na ralpawl hrangah kau zetin an áwngaw.
Na kăwtka tlângpawl cu meisa in a kangrál.
14 Kulhkhŭm cān hrangah ti khai aw!
Na ralhruangpawl hngetter aw!
Bellei umnak ah feh awla, tlăk kha pál aw!
Tlakrawh hak tuah aw!
15 Cu tawkah meisa in a lo kangrál ding,
Ralnâm in a lo sattán ding;
Kharbawk vekin ralnâm in a lo ei ding.
Kharbawk bangin karhzaiawter aw!
A bur a bur ih um kharbawkpawl bangin karhzaiawter aw!
16 Van arsipawl hnakin na sumdâwngpawl cu na karhter.
Kharbawkpawl in an ei ih, an zamhlo.
17 Na ralbawipawl cu a bur a bur ih um kharbawk vek an si ih,
Na ralbawipipawl cu khaukhuap tumpi pi vek an si,
Annih cu khawdaih cān ah lungto kulh mi ṭanhmun khuarnak ah an um;
Asinan ni a suah tikah an zamhlo.
Khui hmun ah an um ti theih a si lo.
18 Maw Assiria siangpahrang, na tuukhālpawl an sing cuahco.
Na miupapawl an zau.
Na mipawl cu tlangpawl ah an ṭekdarh ih,
Zohman in an fĭnkhawm lo.
19 Na tuahmawhawknak in damnak a nei lo,
Na hriamhma a bese tuk.
Na thuthang theitu hmuahhmuah in an za an lo bĕnghnawh ding,
Ziangahtile cem ti um lo na sualralnak tuar lo zo so um?