About Bible Thianghlim | ©

BibleThianghlim – HOSEA

Old Testament

Genesis Exodus Leviticus Numbers Deuteronomy Joshua Judges Ruth 1 Samuel 2 Samuel 1 Kings 2 Kings 1 Chronicles 2 Chronicles Ezra Nehemiah Esther Job Psalm Proverbs Ecclesiastes Song of Solomon Isaiah Jeremiah Lamentations Ezekiel Daniel Hosea Joel Amos Obadiah Jonah Micah Nahum Habakkuk Zephaniah Haggai Zechariah Malachi

New Testament

Matthew Mark Luke John Acts Romans 1 Corinthians 2 Corinthians Galatians Ephesians Philippians Colossians 1 Thessalonians 2 Thessalonians 1 Timothy 2 Timothy Titus Philemon Hebrews James 1 Peter 2 Peter 1 John 2 John 3 John Jude Revelation

HOSEA

12345678910
11121314

• A ngantu: Beeri Fapa Hosea
• A siartu: Sak lam Lalram, Israel
• Ngan kum: B.C. 725 hrawng

Jeroboam II a uknak cem lamah Hosea in thuphuan a thăwk. Assiria in Israel khawpi Samaria a neh hlante tiang Hosea cun rawng a bawl (B.C. 755-725). Cuih cān ah Israel cu a hmuingil ih ralkap cahnak a nei (bung 2, 4-5). Asinan Hosea-ih rawngbawlnak a cem tikah Israel cu ramkhel lamah a hnget nawn lo. Jeroboam II hnuah siangpahrang paruk in an uk. Pali cu thah an si ih, pahnih in kum khat hnak mal an uk. Israel cu a cak zet mi rampawl in sak lam ihsin Assiria in, thlang lam ihsin Izip in an run năwr. Sak lam lalram-mi sinak nei (7:5) le hlawhhlâng nupi ṭhi dingih Pathian in a fial mi thu siarlo, Hosea thuhla theih ding a mal zet. Hlawhhlâng nupi ih ṭhit ding cu ṭuanvo thil maktak a si. Pathian in a mipawl a pehtlaihnak hmuhsaknak dingah a nupi rinum lo parih rinumteih um dingin Pathian in Hosea a fial. Hosea in fāte pathum a nei ih, an hminpawl hmangin Pathian in minungpawl hnenah thucah a sim.

Hih cabu hi ṭhen hnih ah a ṭhenaw (1-3, 4-14). A hmaisa bung thum hin hi cabu hrangah thutlangpi a zăm. Pasal in a nupi uire cing khalih a nupi thawi an tuah mi thukham parih rinum zettu pasal kha Hosea hin a langter. Israel cu Izip ram ihsi runsuah Pathian-ih mihleice an si. Thulungtu hrangah malsawmnak le thulung lo tu hrangah dāntatnak thutiamkam thukham cu ramṭhing ah Pathian in Israel thawn a tuah, asinan Israel in Pathian a dungtun. A hnen ihsi an dăwn mi malsawmpawl cu Pathian hnenin a si ti an pawm lo. Anmah thawi a tuah mi thukham cu an pahbăl ih, pathian dangpawl lamah an pial, cule miphun dangpawl an rinsan. Hosea thuanthu ih a laimu cu Israel cu hlawhhlâng ih cang nupi, pasal dungtun ih mipa dangpawl hnenih feh vek a si thu hi a si.

Hosea cabu a hrek neta (bung 4-14) ah cun, Pathian in Israel cu dāntatnak thawn a hro. Asinan an hrangah a duhdawtnak cu a langter ih, a hnenih kirsal dingin a ngen hai. Hosea cabu ah tundinsalnak le ngaidamnak ruahsannak thu kan hmu. Israel cu rinum lo si khal hai sehla, Pathian cu an parah a rinum thotho.

Hosea cabu in kan pumhlum ih Pathian hnenih peaw dingin in ngen a si. Amah hnenih kan rinum lo tik khalah, Pathian cu a mipawl tungdingsal dingin a rinum ringring.

1

1 Judah siangpahrang Uzziah, Jotham, Ahaz le Hezekiah san le Israel siangpahrang Joash fapa, Jeroboam san ih Beeri fapa Hosea hnenih Jehovah kamsuakthu thleng.

Hosea Sungkua

2 Hosea hmangin Jehovah in thusim a thawh tikah Jehovah in Hosea hnenah:

«Feh aw, nupi ah hlawhhlâng ṭhi awla
Hlawhhlannak faletla nei aw.
Ziangahtile ram cun Jehovah tansanin
Raptlak zetin a hlawhhlâng a si,»

tiah a ti.

3 Cule Hosea cu a va feh ih, Diblaim fanu Gomer a ṭhi, cule anih cun fa a rai ih, fapa a hrinsak. 4 Cun Jehovah in a hnenah:

«Jezreel tiah hmin sak aw,
Ziangahtile a rei hlanah
Jezreel hmun ih thisen an suah man ah Jehu teih sungza dān ka tat ding,
Cule Israel sungza lalram cem ko ka tuah ding.
5 Cuih ni ah cun Israel-ih thál cu Jezreel Phaikuam ah ka khiak ding a si,»

tiah a ti.

6 Cule Gomer in fa a rai lehsal ih fanu a hring. Cun Pathian in a hnenah:

«^aLo-Ruhamah tiah hmin sak aw,
Ziangahtile Israel sungza parah lainatnak ka nei nawn lo ding ih,
Anmah ka ngaidam hrimhrim lo ding.
7 Asinan Judah sungza parah cun lainatnak ka nei ding,
Annih cu thál in siseh, ralnâm in siseh, doawknak in siseh,
Rángpawl in siseh, rángtothiampawl hmang khal in siseh ka rundam hai lo ding ih,
Jehovah an Pathian hmangin ka rundam hai sawn ding,»

1:6^a Lo-Ruhamah: Lainatnak um lo tinak a si.

tiah a ti.

8 Gomer in Lo-Ruhamah hnawi a thleingah tikah, fa a rai ih fapa a hring. 9 Cun Pathian in,

«^aLo-Ammi tiah hmin sak aw,
Ziangahtile nannih cu ka mi nan si lo ih,
Kei khal nan Pathian ka si lo,»

1:9^a Lo-Ammi: Ka mi a si lo mipawl tinak a si.

tiah a ti.

Tundinsal ding Tiamkamnak

10 Asinan Israel tefa mipum cu tipi kapih tah cawk lo le siar cawk lo vunnel zât vek an si ding. Cule, «Nannih cu ka minung nan si lo,» a tinak hmun ah, «Nannih cu a nung mi Pathian fapapawl nan si,» tiah an hnenah ti an si ding. 11 Cun Judah tefapawl le Israel tefapawl cu hmunkhatah fĭnkhawm an si ding ih an hrangah hruaitu pakhat ruat a si ding. Cule annihpawl cu cuih ram ihsin an ra suak ding. Ziangahtile Jezreel ni cu a nasazet ding.

2

1 Nan unaupawl hnenah,

‹^aAmmi,› tiin le
Nan farnupawl hnenah, ‹^bRuhamah,› tiah ti uh.

2:1^a Ammi: Ka mipawl tinak a si.

2:1^b Ruhamah: Lainatnak a cohlang tinak a si.

Rinumlo Israel

2 «Nan nu kawk uh, kawk uh;
Ziangahtile anih cu ka nupi a si lo ih,
Kei khal a pasal ka si lo!
A mithmai ihsin a hlawhhlannak hlăwn seh,
Cule a pawhte karlak ihsin a uiretnak hlăwn seh.
3 Culole taklawng ko ka tuah ding ih,
A suah ni bangin ka lawngfangkhehter ding,
Cule anih cu ramṭhing vekin ka tuah ding ih,
Ramcar vekin ka ret ding,
Cule tihâlin ka that ding.
4 A falepawl parah lainatnak ka nei lo ding,
Ziangahtile annih cu hlawhhlannak fāte an si.
5 Ziangahtile an nu cun hlawhhlannak a tuah;
Anmah vuntunu cun ningzakzain a cāngvai.
Ziangahtile anih in, ‹Ka rawl le ka ti,
Ka sahmul le ka patzai,
Ka hriak le ka in ding in petu,
Ka duhdawt mipawlih dung ka thlun ding,› tiah a ti.
6 Curuangah zoh hnik, na zin cu hlingrûl in ka phit ding ih,
Amahnu in a zinpawl a hmuh theilonak dingah hruang ka tung ding.
7 A duhdawt mipawl a dûm ding,
Asinan a man cuang hai lo ding.
A si, a hawl hai ding, asinan a táwng hai lo ding.
Cun anih in, ‹Ka pasal hmaisa hnenah ka kirsal ding,
Ziangahtile kha laiih ka dinhmun kha atu hnakin a ṭhasawn,› tiah a ti ding.
8 Ziangahtile kei in a thlairawl, sabitzu thar le hriak thar ka pe ti le,
Baal hrangih an timtuah mi a sui le a ngun ka pungter ti a thei lo.
9 Curuangah ka thlairawl cu amai cān ah le
Ka sabitzu thar cu a tikcucān ah ka lakirsal ding,
Cule a taklawng khuhnak dingih pek mi
Ka sahmul le ka patzai puan khal ka lakirsal ding.
10 A duhdawt mipawlih mithmuhah fihnungza hursualnak a tuah mi ka langter ding ih,
Zohman in ka kut ihsin anih cu an runsuak lo ding.
11 A hlimnak hmuahhmuah ka cemter ding,
A puai nipawl,
A thla tharpawl,
A Sabbath-pawl le
A khiah cia mi puaipawl hmuahhmuah khal.
12 Cule a sabit hmuan le a theipi kungpawl ka tisiat ding,
Cupawl thuhla ah amahnu cun,
‹Hi bangpawl tla hi ka duhdawt mipawl ih in rak pek mi hlawhman an si,› tiah a ti.
Cule anmah cu thingrûl ah ka tuah hai ding ih,
Ramsapawl in an eirál ding.
13 Baal hnenih rimhmui a ur nipawl ruangah amah cu dān ka tat ding.
Amah cu hnakhaih le ceiawknak thawn a ceiaw ih,
A duhdawt mipawl dung a thlun,
Asinan kei cu i hngilh, Jehovah in a ti.

Pathian in Israel a Tungdingsal

14 «Curuangah ngai hnik, amahnu cu ka thlimthluai ding,
Ramṭhing ah ka hruai ding ih,
Aw ^anemten ka be ding.
15 Cutawk hmun ihsin a sabit hmuanpawl cu amah ka pe ding,
Cule Akor Phaikuam cu ruahsannak sângka ah ka tuah ding.
Anih in cutawk hmun ah
A no lai cān le Izip ram ihsi a ra suah ni bangin,
Hla a sak ding.
16 Jehovah in, «Cuih ni ah cun, ‹Ka pasal,› tiah i ko ding,
‹Ka bawipa,› tiah i ko nawn lo ding,» tiah a ti.
17 Ziangahtile a kâ ihsin Baal pathianpawl hmin ka lahlo ding ih,
Annih cu an hmin sāl a si nawn lo ding.
18 Cuih ni ah an hrangah ramsapawl thawn,
Tlun zuang vâtepawl thawn le
Leilung parih thilnung petzuangpawl thawn thukham ka tuah ding.
Ralmûang zetih zau ko ka tuah hai theinak dingah,
Leilung ihsin thál, raldonak ralnâm ka ṭhiatbăl ding.
19 Ka hrangah kumkhaw hrangah ka lo ham ding.
A si, dingfelnak le diknak le,
Lainatduhdawtnak le lainatnak in ka hrangah ka lo ham ding.
20 Rinumnak in ka hrangah ka lo ham ding,
Cule nang in Jehovah na thei ding.
21 Jehovah in cuih ni ah ka lo sawn ding a ti.
Vanpawl ka sawn ding ih,
Annih in leilung an sawn ding.
22 Leilung in thlairawl thawn,
Sabizu thar le
Hriak thar thawn an sawn ve ding.
Annih in ^bJezreel an sawn ding.
23 Cun anih cu ka hrangah lei ah ka cîng ding,
Cule lainatnak co lo amai parah lainatnak ka nei ding;
Cun ka mi a si lo mipawl hnenah, ‹Nannih cu ka mi nan si!› tiah ka ti hai ding ih,
Annih in, ‹Nang cu kan Pathian na si!› tiah in ti ding,» tiah a ti.

2:14^a nemten: A ṭawng hrampi ah cun, «thinlung ah» ti a si.

2:22^b Jezreel: Hebru ṭawng ih a sullam cu «Pathian in a tuh» tinak a si.

3

Hosea in Gomer a Tungdingsal

1 Cun Jehovah in ka hnenah, «Va fehsal aw, a dang pathianpawl lamih pial tahratih rairingpawlih sabit rah car duh ko na cingih Israel tefapawlih Jehovah in a duhdawt hai bangin, mi dangih duhdawt mi uire nunau kha va duhdaw aw,» tiah i ti.

2 Cuih nunau cu ngun shekel hleinga le barli sangvut homer khat le a hrek in keimai hrangah ka lei. 3 Cule a hnenah, «Ka hnenah cān reipi na cêng ding, hlawhhlannak na tuah nawn lo ding, mipa dang khal na nei lo ding, kei khal cutivekin na lakah ka um ve ding,» tiah ka ti. 4 Ziangahtile Israel tefapawl cu siangpahrang le bawi nei lo, raithawinak le ṭhuamserh nei lo, Puithiam Kâwrcung le sungkaw milem nei loin cān reipi an um ding. 5 Cumi hnuah Israel tefapawl an kirsal ding ih, Jehovah an Pathian le an siangpahrang David an hawl ding. Ni neta lamah Jehovah le a ṭhatnak an ṭihzah ding.

4

Pathian in Israel Sual a Puh

1 Nannih Israel tefapawl,
Jehovah kamsuakthu hi ngaithla uh,
Ziangahtile Jehovah in ram luahtupawl a khîng a si:
Ram sungah thutak siseh, lainatduhdawtnak siseh,
Pathian theihnak siseh a um lo.
2 Sesămnak, thuphan pernak,
Thahawknak, rûkrûknak le uiretnak a um.
Sūpawknak hmuahhmuah cu an pahbăl,
Thisen suahnak cu thisen suahnak in a thlun.
3 Curuangah ram in a tuar ding ih,
A sungih cêng pauhpauh cu
Ramsapawl le
Tlun zuang vâtepawl thawn an zăwi ding;
Tifinriat nga tiang an hlorál ding.
4 Zohman in khîng hlah sehla, zohman in mi dang kawk hlah seh;
Ziangahtile na mipawl cu puithiam khîngtupawl vek an si.
5 Curuangah sun ah na bah ding;
Profet khal na zawngah zan ah a bah ve ding;
Cule na nu ka hlorálter ding.
6 Ka mipawl cu theihnak tlaksăm ruangah an hlorál.
Theihnak na hnawn ruangah,
Kei khal in ka hrangih puithiam sinak ihsin ka lo hnáwng ve ding;
Na Pathian Dān na rak hngilh ruangah,
Kei khal in na tefapawl ka hngilh ve ding.
7 Puithiam an karh tam pauh le,
Ka parah an sual tam;
An ropitnak cu ningzahnak ah ka thleng ding.
8 Ka mipawlih sual thawinak sa in an câwmaw;
An thinlung cu ka mipawlih mawhsualnak parah an ret.
9 Cule hitin a si ding: Puithiam vekin mipi an si ding.
An nuntudān ruangah dān ka tat hai ding ih,
An thil ti mipawl ka lehrūl hai ding.
10 Ziangahtile an ei ding, asinan an khawp lo ding;
An hlawhhlâng ding, asinan an karhzai cuang lo ding;
Ziangruangahtile Jehovah thulun an cawlhsan.

Milem Biaknak

11 Hlawhhlannak, sabitzu le sabitzu thar in an theihthiamnak a lahlo.
12 Ka mipawl cun an thing milempawl thu an ráwn ih,
An ^akianghrăwl in thu a thăn hai.
Ziangahtile hlawhhlannak thinlung cun a hruaipêng hai ih,
An Pathian dokalhin hlawhhlannak an tuah.
13 An zârhnem a ṭhat ruangah,
Elon thing hnuai, ^blibna thing hnuai le ela thing hnuai pawl,
Tlangzimpawl ah raithawi mipawl an hlan ih,
Tlangmualpawl ah rimhmui an ur.
Curuangah nan fanupawl in hlawhhlannak an tuah ih,
Nan molepawl in uiretnak an tuah.
14 Nan fanupawl in hlawhhlannak an tuah tikah dān ka tat hai lo ding,
Nan molepawl in uiretnak an tuah tik khalah;
Ziangahtile mipapawl anmah rori hlawhhlângpawl thawn an kăwpaw ih,
Sakhaw hlawhhlângpawl thawn raithawi mipawl an hlan.
Curuangah theihthiamnak nei lo minungpawl cu an siatrál ding.
15 Nang, Israel, hlawhhlannak tuah khal awla,
Judah cu mawh co hlah seh.
Gilgal ah so hlah,
Beth Aven khalah so fawn hlah,
«Jehovah a nun rori vekin,» ti khalin siasăm hlah.
16 Ziangahtile Israel cu câwla vekin a lung a ruh;
Ran tlannak hmun kaupi ih tuufa no tlanter mi vekin,
Jehovah in annihpawl cu a tlangter thei hai ding maw si?
17 Efraim cun milempawl a kăwp,
Buaipi hlah uh.
18 An zu in a net tikah,
Cawl loin hlawhhlannak an tuah.
Anmah uktupawl in mualpho an duh tuk lawmmam.
19 Thli in a thla sungah a tuam hai ih,
An raithawi mipawl ruangah mualphoin an um ding.

4:12^a kianghrăwl: Aizohnakih an hman mi a si.

4:13^b libna thing: Ṭhang cak zet thingkung sang tuk lo a si ih, hnah hring le hnah var a nei, thingkung tumpi a si ih, mirang in poplar thingkung râng an ti.

5

Israel le Judah parih Thleng cing ding mi Dāntatnak

1 Maw puithiampawl, hihi ngaithla uh!
Maw Israel sungza, fimkhur uh!
Maw siangpahrang sungza, nan hna tháwng uh!
Ziangahtile dāntatnak cu nan hrangah a si,
Ziangruangahtile nang cu Mizpah ah thangkam mi le Tabor tlang ah sûrpharh mi na rak si.
2 Mihélpawl cu mi thahnak ah an lut thûk zet,
An zaten ka kawk hai ding.
3 Efraim ka thei ih,
Israel cu ka hnen ihsin thuh a si lo;
Ziangahtile atu ah, Maw Efraim, hlawhhlannak na tuah;
Israel cu a bawrhbang a si.
4 Pathian lamih kir dingin an thil ti mipawl in anmahpawl cu a hawiter lo,
Ziangahtile an lakah hlawhhlannak thinlung a um ih,
Jehovah an thei lo.
5 Israel hngalnak cu a mithmai ah a lang;
Curuangah Israel le Efraim cu an mawhsualnak ah an bah;
Judah khal anmah zawngah a bah ve.
6 An rante rual le ranpi rual thawn
Jehovah hawl dingin an feh ding,
Asinan an hmu lo ding;
Anih cu an hnen ihsin a sîp zo.
7 Jehovah hnenah rinum loin an rak um,
Ziangahtile ^akham mi fāte an hring.
Anmah le an leiram cu Thla Thar in a eirál ding.
8 Gibeah ah tuupa ki phaw uh,
Ramah ah tawtawrawt!
Beth Aven ah, na dungah,
Maw Benjamin, tiah ring zetin au uh.
9 Kawk ni ah Efraim ram cu a ṭhing ding;
Israel hnámpawl lakah thufiang ka thăn a si.
10 Judah hotupawl cu ramri lungphun ṭhawntu vek an si;
An parah tidai bangin ka thinlingnak ka burh ding.
11 Efraim cu thuṭhennak ah palbĕtin le tisiatin a um.
Ziangruangahtile anih cun milai nunphung dān cu lungsi zetin a thlun.
12 Curuangah Efraim hrangah sunhrûl vek ka si ding ih,
Judah sungza hrangah ngĕt vek ka si ding.
13 Efraim in a natnak a hmu ih,
Judah in a hriamhma a hmuh tikah,
Efraim cu Assiria ah a feh ih
Siangpahrang Jareb hnenah băwmnak a dil.
Asinan anih cun a lo damter thei lo ih,
Na hriamhma khal a damter thei lo.
14 Ziangahtile Efraim hrangah kiosa vek ka si ding ih,
Judah sungza hrangah kiosa vanglai vek ka si ding.
Kei, keimah rori in ka băwtthlek thluh hai ding ih, ka fehhlo ding.
Ka thiarhlo hai ding ih, zohman in an run lo ding.
15 An mawhsualnak an pawm hlanlo,
Ka umnak hmun ah ka kirsal ding.
Cun ka mithmai an hawl ding;
An vansannak ah nasazetin keimah in hawl ding.

5:7^a kham: Pathian in ṭhit lo dingih a kham mi thawi neih mi fāte tinak a si.

6

Sual Sir dingih Kawhnak

1 Ra uh, Jehovah hnenah kir uhsi;
Ziangahtile anih in in băwtthlek, asinan anih in in tidamsal ding;
Anih in in tuahmawh, asinan anih in in tuamsak ding.
2 Ni hnih hnuah anih in in ṭhangphawksal ding;
A mithmuhih kan nun theinak dingah,
A ni thumnak ah in kaitho ding.
3 Thei uhsi,
Jehovah thei dingin ṭang uhsi.
A fehsuaknak cu khawfingcat a pelh dah lo vekin a si;
Anih cu ruahpi bangin kan hnenah a ra ding,
Lei ih sur ṭhâl tawp ruah bangin.

Suarsir lo Israel le Judah

4 Maw Efraim, na hnenah ziangso ka tuah ding?
Maw Judah, na hnenah ziangso ka tuah ding?
Ziangahtile na lainatduhdawtnak cu zing mero vek le
Zingpit daitla rang zetih zuprál vek a si.
5 Curuangah profet hmangin cip nêknêkin ka tán hai,
Anmah cu ka kâ ih kamsuakthupawl in ka that hai;
Cule nan parih thuṭhennakpawl cu tleu êngsuak vek a si.
6 Ziangahtile thawinak si loin zahngainak,
Cule Meiur Thilhlănpawl hnakin Pathian theihnak ka duh sawn.
7 Asinan ^aAdam khua ah thukham an pahbăl;
Cu tawkah ka parah an rinum lo.
8 Gilead cu thil ṭhalo tuahtupawlih khawpi a si ih,
Thisen in a bawrhbang.
9 Suamhmang rual in mi an bawh bangin,
Puithiam rual cun Shekem zin ah mi an that;
Thungaiten fihnungza hursualnak an tuah a si.
10 Israel sungza ah tuksumza thil ka hmu:
Efraim-ih hlawhhlannak a um;
Israel cu a bawrhbang a si.
11 Cuihtlunah, Maw Judah, ka minungpawlih vanneihnak ka tundinsal tikah,
Na hrangah fâng ah ding ruah cia a si.

6:7^a Adam: Milai hmaisabik Adam kha a si men thei.

7

1 Israel tidam ka tum tikah,
Efraim-ih mawhsualnak le
Samaria-ih sualralnak a lang.
Ziangahtile mi bum an hmang;
Fifir a lut;
Suamhmang rual in lengah mi an răm.
2 An sualralnak hmuahhmuah ka cîng ringring ti
An thinlung in an ruat lo;
An thil ti mipawl in anmah a kulh;
Cupawl cu ka hmaika-ah an um.
3 An sualralnak in siangpahrang lungawi ko an tuah ih,
An thuphan pernak in hotupawl khal.
4 An zaten an uire.
Annih cu sang rawhtu in sangphŭt a nāwn thăwk ihsin a puam lai hlanlo, meisa a sēmalh ṭul nawn lo mi thŭksa ringring mi vek an si.
5 Kan siangpahrang-ih ni ah
Hotupawl cu sabitzu ruangah an dam lo;
Anih cun mihmuhsuamtupawl zawngah a kut a suah.
6 Mi an bawh tikah,
An thinlung cu thŭk vekin an timtuah;
An thinhengnak cu zanvar a itthat;
Zing lamah cun meisa alh vekin a hliau.
7 An zaten thŭk bangin an ling ih,
An thuṭhentupawl an eirál;
An siangpahrangpawl hmuahhmuah an tlu.
An lakih pakhat hman in keimah in ko lo.
8 Efraim cu miphunpawl lakah a căwkpawlhawter;
Efraim cu khat lam leh lo mi sangper vek a si.
9 Khawtluang mipawl in a cahnak an eiralsak,
Asinan cucu a thei cuang lo.
A sámṭuak cu a parah a khat,
Asinan cumi cu a thei cuang lo.
10 Cule Israel hngalnak cu a hmel ah a lang,
Asinan Jehovah an Pathian hnenah an kir lo ih,
Hibangpawl hmuahhmuah si cing khalin amah an hawl cuang lo.

Israel le Judah Sual Sirlonak

11 Efraim cu ruahnak nei lo, thuro â vek a si.
Izip hnenah băwmnak an dil ih,
Assiria ram ah an feh.
12 An fehnak kip ah,
An parah ka sûr ka pharh ding;
Anmah cu tlun zuang vâtepawl bangin ka dirthla hai ding;
Mipi-umkhawmnak ih thuphuan mi bangtukin
Anmah cu nun ka sim hai ding.
13 An hmakhua a pit a si, ziangahtile ka hnen ihsin an tlan!
An parah siatnak a um,
Ziangruangahtile keimah dokalhin an hél!
Anmah tlen zo ding ka si ko nain,
Keimah dokalhin thuphan an per thotho.
14 An ihkhun parih an râk rero tikah,
An thinlung thawn ka hnenah an rak ṭap lo.
Thlairawl le sabitzu thar hrangah an tawngkhawmaw ih,
Ka hnen ihsin an tlânhlo;
15 An bânpawl cu ka zirh in ka cakter ko nain,
Keimah dokalhin thil ṭhalo khua an khâng thotho.
16 An kir, Cungnungbik hnenah cun a si lo;
Anmah cu thál rinum lo vek an si.
An lei ih camsiatnakpawl ruangah
An hotupawl cu ralnâm in an tlu ding.
Himi cu Izip ram ah hnihsan an sinak a si ding.

8

Israel Tlûknak

1 Na kâ ah tuupa ki thluah aw!
A doral cu Jehovah inn dokalhin muvanlai bangin a ra ding,
Ziangruangahtile annih in ka thukham an rak pahbăl ih,
Ka dān dokalhin an rak hél.
2 Ka Pathian, kannih Israel in kan lo thei, tiah ka hnenah a au ding.
3 Israel in thil ṭha a rak hnáwng;
Amah cu doral in a dawi ding.
4 Annih in siangpahrangpawl an tungding, asinan keimah in si loin;
Hotupawl tla an ruat, asinan ka theihpi mi an si lo.
Sahcat an sinak dingah
Anmai hrangah an sui le ngun in milempawl tla an tuah.
5 Maw Samaria, na câwpa no cu hnawn a si!
Anmah dokalhin ka thinhengnak a tho.
Ziang căn tiang so thianfaiaw thei loih an um ding?
6 Ziangahtile Israel hnen ihsi cun hitin a si:
Kutthiam neipa in a tuah ih,
Pathian hnen ihsin a si lo.
Asinan cuih Samaria câwno cu khuaidarh a si ding.
7 Annih in thli an tuh ih,
Phusîng an at.
Thlai kung in vui a nei lo;
Cumi cun rawl a suah dah lo ding.
A suah pang a si khalle,
Khawtluang mipawl in an eirál thluh ding.
8 Israel cu dawlh a si;
Atu ah anmah cu zohman ih duh lo mi bungbel bangin
Miphunpawl lakah an um.
9 Ziangahtile hramlak lāk mah lawng vâktawi bangin,
Assiria hnenah an hung so.
Efraim cun duhdawttupawl a hlâng.
10 A si, miphunpawl lakah an hlâng ko nân,
Anmah cu ka fĭnkhawm thluh hai ding;
Cule hotupawlih siangpahrang phurrit ruangah
Riahsiat an thăwk ding.
11 Efraim in sual hrangah biakṭheng tampi a tuah ruangah,
Cuih biakṭhengpawl cu amai hrangah a sual tuahnak hmun ah a cang.
12 Ka dān sungah a hrangah thu thawngza tampi ka rak ngan,
Asinan cupawl cu thil lamdangpi ah an ruat men.
13 Ka hrangih raithawinak thilhlănpawl thuhla ah cun, sa an thawi ih an ei.
Asinan Jehovah in cupawl cu a cohlang lo.
Anih in an mawhsualnak a cîng ding ih, an sualpawl ruangah anmah cu dān a tat ding.
Izip ram ah an kir leh ding.
14 Ziangahtile Israel in amah Sersiamtu a rak hngilh ih,
Siangpahrang innpawl a sak;
Judah khal in kulhhnget nei khawpipawl a karhzaiter;
Asinan a khawpipawl parah meisa ka thlah ding ih,
Meisa cun a siangpahrang innpawl cu a kāng ding.

9

Israel-ih Sual Dāntatnak

1 Maw Israel, miphunpawl aipuan bangin lungawiaipuangin um hlah,
Ziangahtile na Pathian dokalhin na hlawhhlâng a si.
Hruihhmun kip ah na hlawhhlannak man ngah na duh.
2 Hruihhmun le sabit sawrnak khur cun
Anmah a câwm lo ding ih,
Sabitzu thar in a beidawngter ding.
3 Jehovah ram ah an cêng lo ding,
Asinan Efraim cu Izip ram ah a kirsal ding,
Cule Assiria ram ah rawl thianglo a ei ding.
4 Jehovah hnenah sabitzu thilhlănpawl an hlan lo ding ih,
An raithawinakpawl in amah a lunghmuiter lo ding.
An rawl cu lusûn rawl vek a si ding ih,
A eitu hmuahhmuah an bawrhbang ṭheh ding.
Ziangahtile an rawl cu anmai nunnak hrang lawngah a si ding,
An rawl cu Jehovah inn ah a lut lo ding.
5 Khiah cia mi ni ah le
Jehovah-ih puai ni ah ziang nan tuah ding?
6 Ziangahtile zoh hnik, siatnak ruangah annih cu an feh ding.
Asinan Izip ram in a fĭnkhawm hai ding ih,
Memfis khua in a phum hai ding.
An hlawnthil ngunpawl cu hrampi in a khuh ding;
An puanthlampawl ah hling an ṭo ding.
7 Dāntat ni a thleng zo;
Phuba lâk ni a thleng zo.
Israel in cucu a thei!
Profet cu mi-â a si,
Thlarau mi khal a mawlh,
Ziangruangahtile na mawhsualnak a nasatuk ih, na mi remlonak a nasatuk.
8 Profet cu ka Pathian aiih Efraim ralvengtu a si;
Asinan a zinpawl hmuahhmuah ah vâte tháng hlir a khat ih,
A Pathian inn ah remawklonak a um.
9 Gibeah san lai bangin
Hlohlaknak ah thûk zet an pil.
Anih in an mawhsualnak cu a cîng ringring ding;
An sualpawl ruangah anmah dān a tat ding.
10 Israel cu ramṭhing ih sabit rah vekin ka hmu;
Nan pupápawl cu theipi kung rah ṭum hmaisabik ih rah hmaisabik bangin ka hmu hai.
Asinan Baal Peor an thleng ih, ningzakza ah an peaw;
An duhdawt mi vekin fihnungza-ah an cang.
11 Efraim-ih ropitnak cu vâte bangin a zamhlo ding.
Fahrin, farai, faraitir ti a um nawn lo ding!
12 An fāte an kilkhawi ṭhanglian ko nain,
Pakhat hman um lo ko lusûnin ka tuah hai ding.
A si, anmah ka tlansan hai tikah hmakhawpihnak cu an parah a um ding!
13 Efraim cu hmun nuam ah phunaw in, Ṭaiar bangin ka hmu,
Asinan Efraim cun a fātepawl cu laithattu hnenah a hruai ding.
14 Maw Jehovah, anmah cu ziang simaw pe hai aw.
Ziang na pe ding?
Fasiatnak sūl le
Hnawi car pe hai aw!
15 An sualralnak hmuahhmuah cu Gilgal ah a si,
Ziangahtile cuih hmun ah anmah cu ka rak hua hai.
An thil ti mi a ṭhat lo ruangah
Anmah cu ka inn ihsin ka dawisuak hai ding;
Ka duhdawt hai nawn lo ding.
An hotupawl hmuahhmuah tla mihél an si.
16 Efraim cu vuakin a um,
An hram a ro;
Rah an rah lo ding.
A si, fa an hrin a si khalle an sūl faduatpawl cu ka that ding.
17 A thu an lun lo ruangah,
Ka Pathian in annih cu a hlăwnhlo hai ding.
Cule annih cu miphunpawl lakah an vâkvai ding.

10

Israel-ih Sualnak le Sáltannak

1 Israel cu sabit hri nîm ciaiciai a si.
Amai hrangah rah a suah.
A rah a tamdān izirin,
Biakṭhengpawl tla a karhter.
A leiram a ṭhatdān izirin, a ṭhuamserhpawl tla a ceimawi.
2 An thinlung a phir;
Anmai mawh an phur ding.
Anih in an biakṭhengpawl a ṭhiatbăl ding;
An ṭhuamserhpawl a tisiat ding.
3 Annih in, «Siangpahrang kan nei lo,
Ziangahtile Jehovah kan ṭihzah lo.
Siangpahrang lawngte cu, anih in teh ziang in tuahsak ding?» tiah an ti ding.
4 Thu an rel menmen,
Sesămawknak santlailo in remawknak an tuah.
Asinan tazacuaiawknak cu lóbua lakih tûr nei hrampi bangin a kho.
5 Beth Aven ih câwno ruangah
Samaria luahtupawl cun an ṭih ding.
Câwno le a ropitnak tlunih aipuang ṭheu milaipawl in cuih câwno cu an ṭah ding,
Ziangruangahtile ropitnak in cuih câwno cu a tlansan.
6 Siangpahrang Jareb ngunkhuai hrangih pek dingah
Câwpa no cu Assiria ram ih thiar a si ding.
Efraim cu ningzahnak in a kaibĕt ding ih,
Israel in amai thurawnpeknak a zahpi ding.
7 Samaria cu a siangpahrang thawn tisiat a si ding,
Tidai parih funghreu vekin.
8 Cuihtlunah Aven hmun sângpawl, Israel sual tuahnak hmun cu,
Tisiat an si ding.
An biakṭhengpawl parah hling le hram an ṭo ding.
Tlangpawl hnenah, «In khuh uh,» tiin le
Tlangmualpawl hnenah, «In nĕn uh,» tiah an ti ding.
9 Maw Israel, Gibeah san lai ihsin na rak sual zo;
Cu tawkah annih cun an peh vivo.
Midik lo pawl dokalhih ral doawknak in anmah cu Gibeah ah a man hai lo ding maw?
10 Ka duh tikah nun ka sim hai ding.
Mawhsualnak thuahaw ruangih anmah ka ṭawn hai tikah
Miphunpawl cu fĭnkhawm an si ding.
11 Efraim cu fâng cīl duh săwizăwi cia câwla vek a si.
Asinan a hngawng mawi parah kăwl ka bŭn ding.
Efraim cu leilehnak ka dirter ding,
Judah in hâl a sun ding;
Jakob in lei a let ding.
12 Nanmai hrangah dingfelnak tuh uh.
Lainatduhdawtnak at uh;
Lei nan lehlonak leilung kha let uh,
Ziangahtile atu hi Jehovah hawl cān a si,
A rat hlan le nan parih dingfelnak ruah a surter hlanah.
13 Sualralnak lei nan let;
Mawhsualnak nan at.
Thuphan pernak rah nan rak ei,
Ziangruangahtile nangmai khawkhannak le na ral do thiam mi tampi na rak rinsan.
14 Curuangah na mipi lakah authâwm a um ding ih,
Na kulhhnget hmuahhmuah cu
Ral do ni ih Shalman in Beth Arbel a băl vek le
Nupinupawl le an fātepawl parh ṭheh ko a tuah vekin băl a si ding.
15 Na sualralnak a natsattuk ruangah,
Maw Bethel, cuvekin na parah tuah a si ding.
Khawfingcah zawngah Israel siangpahrang cu thah a si ding.

11

Pathian in Israel a Duhdawt Vivo

1 Nauhak a si laiah, Israel cu ka rak duhdawt,
Cule Izip ihsin ka fapa ka kosuak.
2 Anmah ^aan kawh tam pauh le,
An hnen ihsin an fehhla deuhdeuh;
Baal-pawl hnenah rai an thawi ih,
Milimpawl hnenah rimhmui an ur.
3 Efraim cu a bân ih kaiin fehdān ka zirh;
Asinan anmah ka tidam ti an rak thei lo.
4 Hri nemten ka dir hai,
Duhdawtnak hri in,
Cule keimah cu an hngawng ihta hngawngkol lakthlaksaktu vekah ka cang.
Ka kûn ih anmah ka câwm hai.
5 Anih cu Izip ram ah a kirsal lo ding;
Asinan sual sir an duh lo ruangah,
Assiria-mi cu an siangpahrang a si ding.
6 Cule ralnâm cun a khawpipawl a hrut ding,
An kăwt tlângpawl a sattán ding ih,
A eirál hai ding,
Anmai thurawnpeknakpawl ruangah.
7 Ka mipawl cu ka hnen ihsin tlanhlo an tum ṭelhṭelh.
Cungnungbik an ko nain,
Zohman in amah cu an khaisâng cuang lo.
8 Efraim, ziangtin ka lo dungtun thei ding?
Ziangtin ka lo pesuak thei ding, Israel?
Admah khua bangin ziangtin ka lo tuah thei ding?
Zeboiim khua bangin ziangtin ka lo tuah thei ding?
Ka sungah ka thinlung lingletin a um;
Ka zawnruahnak cu cawkphur a si.
9 Ka thinhengnak nasazet cu ka ṭuansuak lo ding;
Efraim ka tisiatsal lo ding.
Ziangahtile kei cu minung ka si lo ih, Pathian ka si,
Nan lakih Mi Thianghlim ka si;
Cule thinlingnak thawn ka ra lo ding.
10 Annih cun Jehovah dung an thlun ding.
Anih cu kiosa bangin a hûk ding.
A hûk tikah a fātepawl cu nitlaknak ihsin khūr phah rero in an ra ding;
11 Vâte bangin Izip ihsin khūr phah rero in an ra ding,
Thuro bangin Assiria ram ihsin.
Cule anmai inn cio ah ka cêngter hai ding, Jehovah in a ti.

11:2^a an: Profetpawl an si men thei.

Efraim Dokalhih Pathian Ngen Mi

12 Efraim cun thuphan in i kulh ih,
Israel sungza cun bumnak in;
Asinan Judah cu Pathian thawn an fehtlang thotho,
Mirinum Mi Thianghlim thawn.

12

1 Efraim cu thli in a câwmaw ih,
Nisuahnak thli a dawi;
Ni tin thuphan le nunrawnnak a karhter.
Cuihtlunah Assiria-mipawl thawn thukham khal an tuah ih,
Hriak cu Izip ah laksawng hrangah phurh a si.
2 Judah dokalhin Jehovah in mawhthluknak a keng ih,
A zawh mi zin zulhin Jakob dān a tat ding;
A thil ti mipawl zulhin a lehrūl ding.
3 Sūl sungah a unaupaih kedil a kai ih,
A pitlin tikah Pathian thawn an buanaw.
4 A si, vancungmi thawn an buanaw ih a neh;
A ṭap ih, a hnen ihsin duhsaknak a hawl.
Amah cu Bethel ah a táwngngah ih,
Cu tawkah Pathian cun kan hnenah thu a sim,
5 Ralkap rualpawlih Pathian Jehovah rori in.
Jehovah ti cu amah cīn ringring nak hmin a si.
6 «Curuangah nang cu, na Pathian băwmnak thawngin ra kirsal aw;
Lainatduhdawtnak le diknak nunpi awla,
Na Pathian hngak ringring aw.»
7 A kut ih bumnak cuaithlainak kengtu ^aKanaan-mi palbĕt cu amai duh zawng a si.
8 Cule Efraim in, «Thungaiten milian ah ka cangngah riai,
Keimah hrangah neihnunnak ka hmungah zo;
Ka ṭuanbăngnak hmuahhmuah ah
Sual a si mi mawhsualnak zianghman an hmu lo ding,» tiah a ti.
9 Asinan Izip ram ihsi thăwkin
Keimah cu Jehovah na Pathian ka rak si;
Na tuah ṭheu mi puai nipawl bangin,
Puanthlam sungah ka lo cêngter leh ding.
10 Profetpawl hmangin thu ka sim ih,
Larnakpawl ka pungter;
Profetpawl hmangin tahṭhimnak thupawl tla ka rak pe.
11 Gilead ah mawhsualnak a um asile, cupawl cu zianghmanlo ah an cang tengteng ding.
Gilgal ah câwpapawl in rai an thawi,
A si, an biakṭhengpawl cu ló sungih leileh khuar kapih lungpen vek an si.
12 Jakob cu Siria ram ah a tlân;
Israel cun a nupi hrangah a ṭuan ih,
Nupi hrangah tuu a khāl.
13 Profet hmangin Jehovah in Israel cu Izip ihsin a hruaisuak ih,
Profet hmangin anih cu kilhim a si.
14 Efraim in nasazetih thinheng ko amah cu a tuah;
Curuangah a Bawipa in a thisen suah mawh a parah a tân ding,
Cule a hminsiatnak cu a Bawipa in a parah a thŭngrūlsal ding.

12:7^a Kanaan-mi: Kanaan-mi hi sumdâwng hnám an si ruangah mi hrekkhat in sumdâwng mi tiin an let.

13

Israel parih Dāntatnak Maksak

1 Efraim a ṭawng tikah khŭrhnak a um,
Israel ram ah a khaisângaw;
Asinan Baal ruangih mawhsualnak a neih tikah, anih cu a thi.
2 Annih cu an sual deuhdeuh ih,
Anmai hrangah burcawp milimpawl tla an tuah,
Thiam zetin ngun in milempawl an tuah.
Cupawl hmuahhmuah cu zungthiampawlih kutsuak an si.
«Raithawitupawl in câwpa nopawl hnam hai seh,» tiin, hipawl thuhla ah an ti ṭheu.
3 Curuangah annih cu zingpit sumzing le
Zing daifimtla zuprál men vek,
Hruihhmun ih fānghi pet vek le
Meikhu suahnak ihsi meikhu vek an si ding.
4 Keimah cu Izip ram ihsi thăwkin Jehovah na Pathian ka si ih,
Keimah siarlo Pathian dang na thei ding a si lo;
Ziangahtile keimah siarlo Rundamtu an um lo.
5 Leicâr maksak, ramṭhing ah ka rak lo kilkhawi.
6 Tlimno an neih tikah an tlái;
An tlái ih, an thinlung a hngal;
Curuangah kei in rak hngilh.
7 Cun keimah cu an parah kiosa vek ka si ding;
Tlavâng bangin zin kapin anmah ka bawhthup ding;
8 A fano laksak mi savâwm bangin, anmah ka bei hai ding;
An ṭâng ka băwtthlek ding,
Cule cu tawkah kiosa pinu bangin ka eirál hai ding.
Ramlak sahrangpawl in anmah cu an băwtthlek ding.
9 Maw Israel, nangmah bawmtu in do hi na siatnak a si.
10 Na khawpipawl hmuahhmuah ih lo runtu ding na siangpahrang cu khuiah so?
«Siangpahrang le uktupawl in pe aw,» tiih an thu na rel mi thuṭhentupawl teh khuiah so?
11 Ka thinhengin siangpahrang ka rak lo pe ih,
Ka thinlingin ka lo laksaksal.
12 Efraim-ih mawhsualnak cu ṭāwnkhâwm a si;
A sual cu a pengaw.
13 Nunau fahrinnat a parah a thleng ding.
Anih cu fapa fim lo a si,
Nausuah cān ah anih cu muangcâng ding a si si lo.
14 Sheol thiltitheinak ihta annih cu ka tlen hai ding.
Thihnak ihsin ka tlen hai ding.
Maw Thihnak, na nathrisia cu khuiah so!
Maw Sheol, na mi hĕnnak cu khuiah so!
Zangfahnak cu ka mithmuhnak ihsin thuh a si ding.
15 Anih cu a unaupawl lakah ṭhangso hmansehla,
Nisuahnak lam thlipi a ra ding ih,
Ramṭhing ihsin Jehovah-ih thlipi a ra ding,
Cule a tihna a kâng ding ih,
A cirhti a car ding.
Anih in hlawnthil khawlnak ihsin thil mankhung hmuahhmuah a răm ding.
16 Samaria cu mawh neihter a si ding,
Ziangahtile a Pathian dokalhin a hél a si.
Ralnâm in an tlu ding,
An fahniangpawl cu leilung ah parh thluh ko hlăwn an si ding ih,
An nunau faraipawl cu raipăwp an si ding.

14

Netabikah Israel Tundinsal a Si

1 Maw Israel, Jehovah na Pathian hnenah kir aw,
Ziangahtile na mawhsualnak ruangah na rak bah;
2 Thurel ding mi timlam awla,
Jehovah hnenah kir aw.
A hnenah, «Kan hmur ^araithawinak kan lo hlăn theinak dingah,
Mawhsualnak hmuahhmuah lahlo awla,
Ngilnei zetin in cohlang aw.
3 Assiria cun in runsuak lo ding,
Rángpawl parah kan to lo ding,
Kan kutsuak hnen khalah, ‹Kan pathian,› tiah kan ti nawn lo ding.
Ziangahtile pa nei lo pawl in na hnenah zahngainak an hmu,» tiah ti uh.
4 An dungtawlhnak ka tidam ding,
A lakin ka duhdawt hai ding,
Ziangahtile ka thinhengnak cu an hnen ihsin a pialhlo zo.
5 Israel hnenah daifim vek ka si ding;
Anih cu lily par bangin a mûm ding ih,
Lebanon thingkung bangin a hram a thla ding.
6 A hngepawl an ṭhang ding;
A mawinak cu olif thingkung vek a si ding,
Cule a rim hmuizia cu Lebanon thingkung vek a si ding.
7 An kirsal ding ih, amai thlahlim ah an cêng ding;
Thlai bangin an ṭhang ding ih,
Sabit hri bangin an nîm ciaiciai ding.
An hminthannak cu Lebanon sabitzu vek a si ding.
8 Maw Efraim, milempawl thawn ziang pehtlaihawknak ka neih nawn ding?
Keimah cu amah sânglettu le kilhimtu ka si.
Keimah cu a nîm ciaiciai mi mirang far thing vek ka si;
Na rah cu keimah ah hmuh a si, tiin ti aw.
9 Zo so mifim?
Anih cun hi thilpawl hi theithiam seh.
Zo so khawruatthiam?
Anih cun hi thilpawl hi thei seh.
Ziangahtile Jehovah lamzinpawl cu an dik;
Midingfelpawl in cuih zinpawl cu an zawh,
Asinan mihélpawl cu cuih zinpawl ah an bah.

14:2^a raithawinak: A ṭawng hrampi ah, «câwpa tûaipawl» tinak a si.