About Bible Thianghlim | ©

BibleThianghlim – JOB

Old Testament

Genesis Exodus Leviticus Numbers Deuteronomy Joshua Judges Ruth 1 Samuel 2 Samuel 1 Kings 2 Kings 1 Chronicles 2 Chronicles Ezra Nehemiah Esther Job Psalm Proverbs Ecclesiastes Song of Solomon Isaiah Jeremiah Lamentations Ezekiel Daniel Hosea Joel Amos Obadiah Jonah Micah Nahum Habakkuk Zephaniah Haggai Zechariah Malachi

New Testament

Matthew Mark Luke John Acts Romans 1 Corinthians 2 Corinthians Galatians Ephesians Philippians Colossians 1 Thessalonians 2 Thessalonians 1 Timothy 2 Timothy Titus Philemon Hebrews James 1 Peter 2 Peter 1 John 2 John 3 John Jude Revelation

JOB

12345678910
11121314151617181920
21222324252627282930
31323334353637383940
4142

• A ngantu: Theih a si lo
• A huap sung cān: Abraham San (B.C. 2000 hrawng)
• Ngan kum: Solomon San (B.C. 950 hrawng) a si men thei

Job cabu hi zo in a ngan ti theih a si lo. A thuanthu hrimhrim hi tuan le mang thu a si, Abraham san ihsin simaw, a hlan ihsin simaw a si men thei. Abraham san vekin, Job cu kum tampi a nung (42:16), leiletpa a si ih, Mosi Dān hlanah diktakin Pathian a bia. Job hi Arabia ram sung sak lamih um a si men thei (1:3).

Hi cabu hi sual nei lo pawlih tuarnak simfiang lo mi a bang. Asinan hi cabu-ih thuken cu cuhnakin a thuk, ziangruangahtile harsat tuarnak in Pathian thuhla ah thusuhnak a suah.

Job cabu sungih thuêltupawl kha ṭhateih na ngai hai asile, harsat tuarnak thu hnakin Pathian thuhla an ṭawng tamsawn ti na hmu ding. Job cabu-ih thuken cu Pathian le milai pehtlaihawknak thu a si.

A hleicein harsatnak kan tawn cān ah Pathian thuhla ah ziang lungput kan nei ding ih a hnenah ziang kan sim ding? Harsatnak kan tuar tikah amah in ziangtin in ruat ih, harsatnak kan tuar tikah amah lamih lungput dik kan neih lo asile ziangtin in ti pei? A maksak zet mi tuarnak le zăwnzaihnak Job ih a tuar mi hin thusannak thupi zetzet a pe, ziangruangahtile kan khawruahnak le Pathian kan zumnak hi harsat tuarnak in a hniksak (Jam 1:2-3).

Hi cabu-ih thucah cu Pathian cu ziangkim tlunih Lal a si ih (2:3), a thil tidanpawl hi thuthup a si cān a um (Rom 11:33). Asinan Pathian cu ziang tik lai khalah a dingfel, a fim, lainatnak a nei ih, a tuah mi hmuahhmuah le kan parih thlen a sian mi hmuahhmuah ah amah cu a ṭha (Jam 5:10). Ziangruangah harsatnak kan tuar ti kan theih lo tik khalah amah cu a dik a si. Curuangah ziang dang hmuahhmuah hnak khalih a ropit ruangah, neihnunnak le harhdamnak thawi in thlawsuah lo hmanah Jehovah cu upat zetih kan biak ding hi a phu a si. Anih cun ziang vek a si ti in sim ruangah, a cangvaihdān hmuahhmuah in simfiang thluh lo hmansehla, amah kan rinsan ding a phu. Cule anih cu ziangkim tlunih Lal le miṭha a si ruangah, kan tuarnak hi theithiam lo hman nungna a hnenih kan tlukluh ding cu a phu a si. Job in cucu a thei (1:21; 2:10), asinan harsat tuarnak ih nĕnbehnak hnuaiah le a rualpi pathum pawl ih diklo zetih sualpuhnak ruangah, Pathian cu a ṭha ih ziangkim tlunih Lal a si ti a hngilh ih, a zirsal (42:1-6).

Hi cabu ah thuhmaihruai (Job 1-2), a ruangpi (Job 3-41) le thukharnak a um (42).

1

Job le a Insungsang Uz Ah

1 Uz ram ah mi pakhat, a hmin Job an ti mi a rak um, cu pa cu sawihnăwm kâi lo le midĭng, Pathian ṭihzah ih thil ṭhalo hrialtu a si. 2 Cule anih cun fapa pasarih le fanu pathum a nei. 3 Cuihtlunah a thil neih mipawl cu, tuu 7000, kalauk 3000, câwcang hâl 500, lāknu 500 le siahhlawh tampi an si, cutin anih cu nisuahnak lam minung hmuahhmuah lakah a nasabik mi a si.

4 Cule a fapapawl in a haha ten khiah mi ni ah an innpawl ah puai an tuah ṭheu ih, an farnule pathum khal an zawngih ei le in dingin mi an thlah ih an sawm ṭheu. 5 Hitin a si, an puai nipawl a cem tikah, Job cun mi a thlah ih anmah cu a tithianghlim hai, cule anih cu zingpit ten a tho ih, an zate mipum zulhin Meiur Thilhlănpawl a hlan. Ziangahtile Job in, «Ka fapalepawl in sual tuahin, an thinlung in Pathian an camsiat pangah,» tiah a ti a si. Cutivekcun Job in a tuah ringring ṭheu.

Setan in Job-ih Ziaza a Do

6 Pathian fapapawl Jehovah hmaiah anmah le anmah an langawkter ni a rak um, cule Setan khal an lakah a ra ve. 7 Cule Jehovah in Setan hnenah, «Khui lam ihsin na ra?» tiah a ti.

Cun Setan in Jehovah cu a sâng ih, «Leilung tlun khat lam le khat lam ka hlehkatnak ihsin le suk le so ka vahnak ihsin ka ra,» tiah a ti.

8 Cun Jehovah in Setan hnenah, «Amah vekih sawihnăwm kâi lo le midĭng, Pathian ṭihzah ih thil ṭhalo hrialtu leilung tlunih zohman um lo, ka siahhlawh Job hi na ruat dah maw?» tiah a ti.

9 Cule Setan in Jehovah hnenah, «Săn um lo menin Job cun Pathian a ṭih maw si? 10 Nangmah in a kimvelin, a sungkua kimvelin le a neih mi hmuahhmuah kil kip in hruang na tuahsak a si lo maw? A kut hnaṭuan thlawsuah na pek ih ram sungah a neih mi an karh sinsin a si. 11 Asinan atu ah, na kut suahin a neih mi hmuahhmuah parah na kutthlak hnik, na hmaika rori ah a lo camsiat tengteng ding!» tiah a ti.

12 Cule Jehovah in Setan hnenah, «Ngai hnik, a neih mi hmuahhmuah cu na thiltitheinak sungah a um. Amah par lawngte ah kutthlak hlah,» tiah a ti.

Cutin Setan cu Jehovah hmai ihsin a fehsuak.

Job in a Neih Mi Thil le a Falepawl a Hloh

13 Job-ih fapapawl le fanupawl an upabikpaih inn ih rawl ei le sabitzu in ih an um ni a rak um; 14 cule zualko pakhat Job hnenah a ra ih, «Câwcangpawl lei an let rero ih, an kiangih lākpawl hrampi an piat rero laiah, 15 Sabia-mipawl in an run nám ih an hruai ṭheh a si, siahhlawhpawl cu an ralnâm hriampawl in an that ṭheh, keimah lawng hi nangmah lo sim dingah ka tlânsuak a si!» tiah a ti.

16 Cu pa a ṭawng rero laiah, a dang mi pakhat khal a ra thleng ih, «Van ihsin Pathian meisa a rung tla ih, tuupawl le siahhlawhpawl a kāng hai ih, a kangrál ṭheh; keimah lawng hi nangmah lo sim dingah ka tlânsuak a si!» tiah a ti.

17 Cu pa a ṭawng rero laiah, a dang mi pakhat a ra thleng lala ih, «Kaldia-mipawl kha bu thum ah an ṭhenaw, cule kalaukpawl an nám ih an hruai ṭheh, siahhlawhpawl cu an ralnâm hriam in an that; keimah lawng hi nangmah lo sim dingah ka tlânsuak a si!» tiah a ti.

18 Cu pa a ṭawng rero hrih laiah, a dang mi pakhat a ra thleng lala ih, «Na fapapawl le na fanupawl an upabikpaih inn ah rawl ei le sabitzu in in an um, 19 cule ngai hnik, ramṭhing ihsin thlipi a ra hrang ih an inn kil li ah a run nuai, cule minopawl parah a tlu ih, an thi ṭheh; keimah lawng hi nangmah lo sim dingah ka tlânsuak a si!» tiah a ti.

20 Cun Job cu a tho, a kâwrfual a thlek ih, a lu a metkawlh, cule lei parah a tlu ih Pathian a bia. 21 Cule Job in,

«Ka nuih sūl sung ihsin taklawngin ka suak ih,
Taklawng in ka kirsal ding.
Jehovah in i pe ih,
Jehovah in a laksal;
Jehovah hmin cu thangṭhatin um seh,»

tiah a ti.

22 Himi hmuahhmuah ah Job in sual a tuah lo ih, Pathian khal atthlak zetin a mawhthluk fawn lo.

2

Setan in Job-ih Harhdamnak a Do

1 Pathian fapalepawl Jehovah hmaiah an lăngawkter ni a um lala, cule Setan khal an lakah Jehovah hmaiih langawter dingah a ra ve. 2 Cule Jehovah in Setan hnenah, «Khui lam ihsin na ra?» tiah a ti.

Setan in Jehovah hnenah a sâng ih, «Leilung tlun khat lam le khat lam ka hlehkâtnak ihsin le suk le so ka vahnak ihsin ka ra,» tiah a ti.

3 Cun Jehovah in Setan hnenah, «Amah vekih sawihnăwm kâi lo le midĭng, Pathian ṭihzah ih thil ṭhalo hrialtu leilung tlunih zohman um lo, ka siahhlawh Job hi na ruat dah maw? Cule a săn um loih amah siatsuah dingah nang in i ti nân, a felfainak kha a kaihnget thotho,» tiah a ti.

4 Cule Setan in Jehovah hnenah, «Vun aiah vun! A si, milai in a nunnak hrangah a neih mi hmuahhmuah a pe ding. 5 Asinan atu ah na kut suah awla, a ruh le a taksa parah na kutthlak hnik aw, cule na hmaika rori ah a lo camsiat tengteng ding!» tiah a ti.

6 Cule Jehovah in Setan hnenah, «Ngai hnik, amah cu na kut ah a um, a nunnak lawngte cu zuah aw,» tiah a ti.

7 Cule Setan cu Jehovah hmai ihsin a fehsuak ih, Job kha a ke zaphak ihsin a luthlung tiang a na zet mi hmasia thawn a hrem. 8 Cule a hmasia a kheuhawknak dingah hlamphei a lâk ih vutcâm lakah a to.

9 Cun a nupi in a hnenah, «Na felfainak kha na kaihnget lai thotho ding maw? Pathian camsiat awla, thi aw!» tiah a ti.

10 Asinan Job in a hnenah, «Nang cu nunau â pakhat ih ṭawng mi vekin na ṭawng. Pathian hnen ihsin thil ṭha kan dawn vekin thil ṭhalo khal kan dawng ding a si lo maw?» tiah a ti. Himi hmuahhmuah ah Job in a hmurkâ in thilsual a tuah lo.

Job-ih Rualpi Pathum

11 Job-ih rualpi pathum, Teman khawmi Elifaz, Shuh-mi Bildad le Naamath khawmi Zofar in a parih himi thil ṭhalo a thleng mi hmuahhmuah an theih tikah, mi kip an umnak hmun cio ihsin an ra. Ziangahtile Job riahsiatpi ding le hnem dingih ratlang dingah simawknak an nei cia. 12 Cule a hlatnak ihsin an hei zoh tikah, amah a si ti an theithiam lo, an aw suahin an ṭap; cule an kâwrfual an thlek cio ih an lu tlun van lamah leivut an theh. 13 Cule annih cu amai hnenah lei ah ni sarih le zan sarih an to, cule zohman in anih cu kam khat hman an be lo, ziangahtile a thinnatdān a nasatuk ti an hmu.

3

Job in a Suah Ni a Camsiat

1 Himi hnuah Job cu a kâ a âng ih a suah ni a camsia. 2 Cule Job cu a hung ṭawng ih:

3 «Ka suah ni hlorál sehla,
‹Fapa a vun,› an rak ti zan thawn.
4 Cuih ni cu thim ah cang seh;
Cung Pathian in ngaihsak hlah sehla,
Tleu khal a parah êng hlah seh.
5 Cuih ni cu thim le khawthim sahpi in tuamhlo seh;
A tlunah mero zing seh;
Sun thimnak in thlaphângter seh.
6 Cuih zan cu thim in kaibĕt seh;
Cuih kum nipawl lakah lungawiaipuangin um hlah seh,
Thla siarnak khalah tel ve hlah seh.
7 Cuih zan cu ṭhing sehla maw!
Aipuan authâwm zianghman um hlah seh!
8 Ni camsiatthiampawl in camse hai seh,
Leviathan tho ko tuah dingih tiartupawl in.
9 Cuih zing ih arsipawl cu thim hai seh;
Tleunak hawl seh, asinan hmu hlah seh,
Cule zing khawfingcah hmu hlah seh;
10 Ziangruangahtile ka nuih sūlkâ a khar lo ih,
Ka mithmuhnak ihsin riahsiatnak a phen lo.
11 «Ziangah so suahthlak laiih ka rak thih lo?
Ziangahso sūl ihsi ka suah laiah ka rak hlohral lo?
12 Ziangahso khukpawl ih in dawn?
Ziangahso maw ka fawh ding hnawipawl an um?
13 Cuti si lo sehla cu cāng lo le daiten ka it zo ding ih,
Ka rak itthat zo ding,
Cule ka rak cawlhahdam zo ding,
14 Anmai hrangih khaw răm a dĭnsaltu,
Leitlun siangpahrangpawl le thurawnpetupawl zawngah;
15 Asilole an innpawl ngun ih khattertu,
Sui neitu mipawimawh zawngah;
16 Asilole ziangruangah so tleu hmu dah lo nausentepawl bangin,
A thi cia ih suak mi nausente vekih thuhhloh ka rak si lo?
17 Cuih hmun ah cun misualrálpawl in buainak tuah an bansan ih,
Caupawl an cawlhahdam.
18 Cuih hmun ah cun thawngtlapawl an cawlhahdamtlang;
Mikhâwngtuih aw an thei lo.
19 Cuih hmun ah cun mitenaupawl le miropipawl an um ih,
Siahhlawh cu a pu hnen ihsin a zalen.
20 «Ziangah so maw vansangmangbang a tuartu hnenah tleu le,
Thinnatnak a tuartu hnenah nunnak,
21 Thih duh naih táwng lo,
Cumi cu thuh mi hlawnthilpawl hnakih hawl sawntu,
22 Nasa zetih lungawiaipuangih,
Thlān an hmuh thei tikih lungawitupawl hnenih pek a si?
23 Ziangahso a lamzin thuhsak a si mi le,
Pathian in a kulhbĕt mi hnenih tleu pek a si?
24 Ziangahtile rawl ka ei hlanah thinpihnak a thleng ih,
Ka aihramnak cu tidai bangih thlet a si.
25 Ziangahtile ka ṭih tuk mi thil ka parah a thleng ih,
Ka phan tuk mi ka hnenah a ra thleng.
26 Ka thaw a veng lo ih, daiten ka um thei lo;
Cawlhhahdam ti ka nei lo, ziangahtile buainak a thleng,»

tiah a ti.

4

Elifaz: Job in Thilsual a Tuah

1 Cun Teman khawmi, Elifaz in a sâng ih:

2 «Mi in nangmah lo biak tum hnik sehla, na thin a na pei maw?
Asinan zo so ṭawng loih sūpaw thei ding?
3 Ngai hnik, nang in mi tampi na rak zirh ih,
Bân thacak lo pawl na cakter.
4 Na ṭawngkampawl in mirilbahpawl a tungding ih,
Khuk derthawmpawl na cakter.
5 Asinan cumi cu na parah a thleng ih, nang cu na cau;
Cumi in a lo thâm ih, na buai.
6 Na Pathian ngaihsaknak cu na rinsanawknak a si lo maw?
Cule na nun felfainak hi na beiseinak a si lo maw?
7 «Atu ah mángsal hnik, zo so mawh nei lo hlorál dah um?
Asilole khuiah so midĭng sahtăn an si dah?
8 Ka rak hmuh zo mi vekah cun,
Mawhsualnak tuh dingih lei lettupawl le,
Buainak tuhtupawl cun cumi thotho an khawm.
9 Pathian ih sēmnak in annih cu an hlorál ih,
A thinhengnak thaw in annih cu a khangrăl hai.
10 Kiosa hûk,
Kiosa hrang aw le,
Kiosa vanglai hápawl an kiak.
11 Kiosa cu deh mi sa neih lo ruangah a thi,
Cule kiosapinuih fanopawl an ṭekdarh.
12 «Ka hnenah athupten thu a thleng ih,
Ka hna in cuih thu sim thektho mi a dawngsáwng.
13 Mi ihhmu thaw zetih an ihthah lai,
Zan larawknakpawl ka ruah laiah,
14 Ṭihnak ka parah a thleng ih ka khūr,
Cumi cun ka ruhpawl hmuahhmuah a khūrter.
15 Cun thlarau pakhat ka hmaika in a fehtlăng;
Ka taksa hmulthi an ding.
16 Cuih thlarau cu ka hmaiah a ding ringring,
Asinan a hmelhmang ka hliah thei lo.
A pianhmang cu ka mithmuhah a um;
A reh ṭhepṭhep;
Cun aw ka thei ih:
17 ‹Milai hi Pathian hnakin a dingfel sawn thei pei maw?
Minung hi amah tuahtu hnakin a thiangsawn thei pei maw?
18 Zoh hnik, anih in a siahhlawhpawl a rinsan hai lo,
A vancungmipawl tisual a puh hai,
19 Tlak innpawl sungih a cêng mipawl,
An ṭohram cu leivut ah a si,
Pangāng vekih a siatrál mipawl parah cun Ziang tlukin so a puh hai sinsin ding?
20 Annih cu zing lam ihsin zan lam tiang an kekkuai nêknêk ṭheh;
Zohman ih ngaihsak loin, annih cu kumkhuain an hlorál.
21 Anmai cungcuannak cu a hlo ṭheh a si lo maw?
Fimnak nei lo vekin an thi.›

5

Elifaz: Pathian in Job Nun a Sim

1 «Atu ah ko hnik aw,
A lo sangtu ding zo tal an um pei maw?
Cule mithianghlimpawl lakih zo bik so na pan ding?
2 Ziangahtile thinlingnak cun mimâwlpa a that ih,
Iksiknak in mifimvarlo a that.
3 Mi-â in hrihram a thlak ka hmu,
Asinan hmakhatteah a cēnnak hmun kha ka camsiatsak.
4 A fapapawl cu himnak ihsin an hla,
Kăwtka ah annih cu hrem an si ih,
Zohman runsuaktu an um lo.
5 A thlairawl khâwm mi cu mirilrawngpawl in an ei ṭheh,
Hling lakih um mi tiangin an la ih,
A neihnunnak cu suamhmang in a thiarhlo ṭheh.
6 Ziangahtile zăwnzaihnak cu leivut ihsin a ra lo ih,
Buainak cu leilung ihsin a pûtsuak fawn lo;
7 Tlun lamih meici an zām vekin,
Minung cu buai dingah a suak a si.
8 «Asinan kei lawngte cun Pathian ka hawl ding ih,
Ka thuhlapawl Pathian hnenah ka thlen ding,
9 Thil ropipawl le hawlsuah theih lo thilpawl,
Siar cawk lo mangbangza thilpawl titu hnenah.
10 Anih in leilung parah ruah a surter ih,
Leirampawl cu tidai a pe.
11 Minautapawl hmun sâng ah a ret ih,
Miriahsiapawl cu himnak ah a khaisâng.
12 Mihrăwkhrawlpawlih khawkhannakpawl a hlawhsamter,
Cutin an kut in an remruahnakpawl an ṭuansuak thei lo.
13 Anih in mifimpawl kha anmai hrăwkhrawlnak in a awk hai ih,
Midepdepawlih thurawnpek cu anmai parah zamrang zetin a tla.
14 Sun cān ah thimnak an táwng ih,
Sun laifangah zan vekin an dap.
15 Asinan anih in mitlasampawl kha an hmurkâ ralnâm ihsin le,
Micak kut ihsin a runsuak hai.
16 Mifarah in ruahsannak a nei ih,
Midik lo in a kâ a cip.
17 «Ngai hnik, Pathian ih nun a rĕm mi cu mithlawsuak a si;
Curuangah Ziangkimtithei ih nunsimnak cu hmuhsuam hlah.
18 Ziangahtile anih in hma a baih, asinan amah in a tuamsak;
Anih in a tuahmawh, asinan amai kut in a damter.
19 Anih in buainak paruk lakah a lo runsuak ding,
A si, pasarih lakah thil ṭhalo zianghman in a lo dai lo ding.
20 Mangṭam a thlen tikah thihnak ihsin le,
Ral lakah ralnâm thiltitheinak ihsin a lo tlen ding.
21 Hmuhsuamnak ṭawngkam lak ihsin thuh na si ding ih,
Siatralnak a thlen tikah na thin a phâng lo ding.
22 Siatralnak le mangṭam pawl kha na hnihsan hai ding ih,
Leitlun sahrangpawl na ṭih hai lo ding.
23 Ziangahtile ló lak lungtopawl thawn thukham na tuah ding ih,
Ramsapawl thawn nan remaw ding.
24 Na puanthlam ah ralmuannak a um ti na thei ding;
Na cēnnak na vehvai ding ih famkimlonak zianghman a um lo ding.
25 Na tesinfapawl cu tampi an si ding ti khal na thei ding ih,
Na cithlahpawl cu leilung hrampi bangtuk an si ding.
26 Amai tikcu teih khawm mi thlairawl kung bangin,
San kimin thlān ah na feh ding.
27 Ngai hnik, himi hi kan hmuhsuak mi a si;
Hihi a si.
Cumi cu ngaithla awla, nangmai hrangah thei aw,»

tiah a ti.

6

Job: Ka Phunzainak Hi a Dik

1 Cun Job in a sâng ih:

2 «Ka thinnatnakpawl hi dikteih cuaithlai siin le,
Ka vanduainakpawl hi khīngkhai si sehla maw!
3 Ziangahtile cumi cu tifinriat vunnel hnakin a ritsawn ding,
Curuangah ka ṭawngkampawl an hrohrannak a si.
4 Ziangahtile Ziangkimtithei-ih thálfungpawl ka sungah an um;
Ka thlarau in an tûr a zûk.
Keimah dokalhin Pathian ṭihnunnakpawl an tlaraw.
5 Hramlak lāk in a hrampi tlunah a ai maw,
Asilole câwcang in a hramno tlunah a paw maw?
6 Thawtnak nei lo kha cite tel loin ei a theih maw?
Asilole ^akhalamut ti ah thâwtnak a um maw?
7 Cupawl dai ding cu ka thinlung in a duh lo;
Ka hrangah luaksuakza rawl vek an si.
8 «Ka ngĕn mi ngah theiin le,
Pathian in ka beisei mi i pe sehla maw!
9 Pathian in keimah i rialdip ding duhin,
A kut phawih in i that sehla!
10 Cun hnangamnak ka nei ṭhiamṭhiam ding;
Ānhainak ah umin, anih in in zuah lo khal sehla, nasazetin ka lung a awi ding,
Ziangahtile Mi Thianghlim kamsuakthupawl ka hnáwng lo.
11 «Ruahsannak nei dingin ziang cahnak so ka neih?
Cule dam rei dingin ka hmai lam cu ziangso a si?
12 Ka thakhăuhnak cu lungto khohnak a si maw?
Asilole ka titsa cu dar a si maw?
13 Ka sungah i bawmtu a um lo maw?
Cule hlawhtlinnak cu ka hnen ihsin dawisuak a si maw?
14 «Zăwnzaihter mi pa hnenah a rualpi in ngilneihnak a hmuh ding,
Ziangkimtithei ṭihzahnak a thlauthlak hmanah.
15 Ka unaupawl in lihăwngva bangin,
A luangrăl mi tivate bangin in bum.
16 Cuih tivatepawl cu tikhălpawl ruangah an dum ṭheh ih,
Cumi sungah vur an zuprál.
17 Cumi a hlum tikah an luangrăl;
A săt tikah an hmun ihsin an kangrál ṭheh.
18 An zawh mi zinpawl a kikâwi,
Khui hmanah feh loin an cem.
19 Tema sumdâwng rual in an hawl,
Shiba khualtlawngpawl in cupawl cu an ruahsan.
20 Cuih ruahsannak ruangah annih cu an tha a nau;
Cuih hmun ah an ra ih an buai.
21 Ziangahtile atu ah nannih cu zianghman nan si lo,
Thil ṭihnung nan hmu ih nan thla a phâng.
22 ‹Ka hnenah rak keng uh,›
Asilole, ‹Nan neihnunnak sungin nawhthuh i pe uh.›
23 Asilole, ‹Ral kut ihsin i runsuak uh,›
Asilole, ‹Palbĕttupawl kut ihsin i tlen uh,› ka lo ti dah maw?
24 «I zirh uh, cule daiten ka um ding;
Khuitawk lai bik ah ka tisual ti i theithiamter uh.
25 A dik mi ṭawngkampawl cu ziang tlukin so hmual an neih!
Asinan nan thuelnak in ziangso a fiangter.
26 Ka ṭawngkampawl le
Thli vek a si mi mimangbang thurel mipawl cu rĕm nan tum maw si?
27 A si, nannih in pa nei lo pawl nan tuahsia ih,
Nan rualpi cu hlawknak hrangah nan hmang.
28 Atu ah keimah i zoh hram uh;
Ziangahtile nan hmaiah thuphan ka per dah fawn lo.
29 Zangfahten kirsal uh, diklo zetih thil ti um hlah seh!
A si, kirsal uh, hi thil ah hin ka dingfelnak a um a si.
30 Ka lei ah diklonak a um maw?
Ka dang in thil ṭhalo a thleidang thei lo maw si?

6:6^a khalamut ti: Kung pakhat a si ih, a ti cu a thaw lo zet.

7

Job: Ka Tuarnak Hin Hnemtu a Nei Lo

1 «Leilung tlunah minung hrangih hnaṭuan khunhar cān a um a si lo maw?
A nipawl khal cu hlawhfa-ih nipawl bangtuk an si lo maw?
2 Siahhlawh in daihnem a ngai tuk vek le,
Hlawhfa in a hlawhman a hngakhlap vekin,
3 Nithlapawl tla man nei loih hmanter ka si ih,
Băngthlakza zanpawl ka hrangah ruat an si.
4 Ka zau tikah, ‹Ziangtik ah so ka thawh ding ih,
Zan a cem ding,› tiah ka ti.
Ziangahtile khawfingcah tiangin khat lam le khat lamah ka let rero.
5 Ka titsa cu tholungpawl le leivut an kăwp,
Ka vun a ro ih a kûai.
6 «Ka damsung cān cu thiamtahtuih thiamfung hnakin a rangsawn ih,
Ruahsannak um loih hmanral an si.
7 Ka nunnak cu thaw men a si ti máng ringring aw maw!
Ka mit in thil ṭha a hmusal nawn lo ding.
8 Keimah i hmutupaih mit in i hmusal nawn lo ding;
Ka parih nan mit a fut laiah, ka rak um nawn lo ding.
9 Mero a kian ih a hlohral vekin,
Sheol ih a fehtu cu a suaksal dah lo.
10 A inn ah a kirsal nawn lo ding ih,
A hmunram in amah a thei nawn lo ding.
11 «Curuangah ka kâ ka sûp lo ding;
Ka thinpitin thu ka rel ding;
Ka nun zinfetnak ah ka phunzai ding.
12 Ka parih kiltu na ret hi,
Keimah cu tifinriat maw ka si, asilole tifinriat sahring tumpi maw ka si?
13 ‹Ka ihkhun in i thlangăm ding ih,
Ka zaunak in ka phunzainak a dêmter ding,› ka ti tikah,
14 Nang in mangpawl in i ṭihter ih,
Larnakpawl in ka thla na phângter,
15 Cutin ka thinlung cun nun hnakin dēkthat le
Thih a hril sawn.
16 Ka nun ka ning,
Ka nung kumkhua lo ding.
In ngaihsak hlah uh,
Ziangahtile ka damsung cān cu thaw men an si.
17 «Minung hi ziangso a si ih, na khaisan,
A parih na thinlung na ret,
18 Zing tinte na vehvai ih,
Ziang tik lai khalih na hniksak?
19 In hawisan dah lo ding maw si?
Ka cil lem sungte tal i ngaihsak loin na um lo ding maw?
20 Thilsual ka rak tuah maw?
Nang minungpawl thlirtu,
Na parah ziangso ka rak tuah?
Keimah cu keimah lala parih phurrit si dingin,
Ziangruangah na hmuibah mi ih i ret?
21 Ziangahso ka dānpahbălnak na ngaithiam lo ih,
Ka mawhsualnak na lakhloh lo?
Ziangahtile kei cu leivut ah ka it thlang ding ih,
Nang in taima zetin in hawl ding,
Asinan ka rak um nawn lo ding,»

tiah a ti.

8

Bildad: Job cu Siraw ding a Si

1 Cun Shuh-mi Bildad in a sâng ih:

2 «Ziangtik tiang so hi thilpawl na sim lai ding ih,
Na kamsuak ṭawngkampawl cu a cak mi thli vek an si ding?
3 Pathian in thuṭhennak a herhkawi dah maw?
Asilole Ziangkimtithei in diknak a merhkâwi dah maw?
4 Na fapapawl in a parih thilsual an tuah asile,
An dānpahbălnak ruangah anih in a hlăwnhlo hai.
5 Pathian kha ṭhahnemngai zetin na hawl ih,
Ziangkimtithei hnenih a lainatnak na dil asile,
6 Nangmah cu na thiang ih na dĭng asile,
Na hrangah a ṭhangharh tengteng ding ih,
Na covo na cēnnak hmun kha a hmuingilter ding.
7 Na thăwknak cu fate hmansehla,
Neta lamih na cemnetnak cu nasazetin a ṭhang ding.
8 «Khuahlan san kha zingzăwi hram awla,
An pupápawl ih hmuhsuah mi thilpawl kha ruat aw;
9 Ziangahtile kannih cu mizansunte ih suak mi kan si ih,
Zianghman kan thei lo,
Ziangruangahtile leilung parih kan damsung cān cu thlahlim men an si.
10 Annih in an lo zirh in an lo sim lo ding maw,
Cun an thinlung sung ihsin ṭawngkampawl an relsuak lo ding maw?
11–12 «Phaipheng cu leihnâwng lo ah a ṭhang thei maw?
A hrin lai le sahtan lo a si laiah,
Tikap hrampi teh tidai loin a ṭhangṭha thei maw?
Cuih kung cu hrampi dang hmuahhmuah hlanah a vuai.
13 Pathian hngilhtupawl hmuahhmuah ih netnak cu cuvek a si;
Cule midepdepawlih ruahsannak cu a hlorál ding,
14 A ralmuannak cu sahcat a si ding ih,
A rinsan mi cu maimăwm inn râng a si ding.
15 Anih in a inn a hngauhsan, asinan cumi cu a dingsuak lo.
Anih in cumi cu fek zetin a kai, asinan cumi cu a hmun lo.
16 Anih cu sun ah hring dupdoin a ṭhang ih,
A hmuan ah a hngepawl an zamkhat.
17 A hrampawl in lung penkhawm a ngerh ih,
Cuih lungpawl lakah inn ding a hawl.
18 Anih cu a hmunram ihsin siatsuah a si ahcun,
‹Ka lo hmu dah lo,› tiin amah cu a hnáwng ding.
19 «Ngai hnik, himi cu amai nundān ih aipuannak a si ih,
Leilung ihta a dangpawl an kho ding.
20 Ngai hnik, Pathian in sawihnăwm kâi lo cu a hlăwn lo ding ih,
Thil ṭhalo tuahtupawl khal a tungding fawn lo ding.
21 Anih in na kâ cu hnihnak in le,
Na hmur cu lungawiaipuannak in a khatter ding.
22 A lo huatupawl cu mualphonak hrukter an si ding ih,
Misualrálpawl cēnnak hmun cu zianghmanlo ah a cang ding,»

tiah a ti.

9

Job: Palai an Um Lo

1 Cun Job in a sâng ih:

2 «Cutin a si ti cu ka thei rori a si,
Asinan ziangtin minung cu Pathian hmaiah a dingfel thei ding?
3 Mi in Pathian thu-el a duh asile,
Vei 1000 ah vei khat hman a sâng thei lo ding.
4 Pathian cu thinlung ah a fim ih,
Thazang ah a cak.
Amai lakih lungruh zo so hmuingil um?
5 Anih in tlangpawl a ṭhawn ih,
Annih in ziang tikah a thinhengnak in anmah a lingletter ti an thei lo;
6 Anih in leilung cu a umnak hmun ihta a hnînter ih,
A ṭhuampawl a hnînter;
7 Anih in ni cu thu a pe ih, ni a suak lo;
Anih in arsipawl khal a hupbĕt.
8 Amah lawngin vanpawl a pharh ih,
Tifinriat tisuar parah a feh;
9 Anih in ^aAyish, Kesil le Kimah le
Thlang lam pindanpawl a tuah;
10 Anih in hmuhsuah băn lo thil ropipawl a tuah,
A si, siar cawk lo mangbangzapawl tla.
11 Zoh hnik, anih cu ka kiangah a feh ih, ka hmu lo;
A feh vivo ih, amah ka theihliah lo.
12 Zoh hnik, anih in a lahlo, zo in so kham thei ding?
Zo in, ‹Ziang so na tuah rero?› ti ngam ding?
13 Pathian in a thinhengnak a hnûkdâwk lo ding,
A hnuaiah ^bRahab bawmtupawl an băwkkhup.
14 «Cuti a si ahcun, ziangtin so amah cu ka sâng thei ding ih,
A hmaiah ka ṭawngkam ka rĕm thei ding?
15 Ziangahtile kei cu midingfel ka si ko nân, anih cu ka sâng thei lo ding;
Ka thuṭhentuih zahngainak ka ngen ding.
16 Ka ko ih anih in in san a si hmanah,
Anih in ka aw a ngaithla ti ka zum cuang lo.
17 Ziangahtile anih in thlisia in i nuai ih,
A săn um loin ka hriamhmapawl a karhter.
18 Anih in ka thaw hīp ding i siang lo ding,
Siatkhâtnak in i khatter sawn.
19 Thazang lam thu ah cun, ngai hnik, anih cu a cak;
Cule diknak thu ah cun, zo in so in ko ding?
20 Keimah cu midingfel si khal ningla, keimai kâ lala in thiam lo in coter ding;
Sawisel ding um lo si khal ningla, cumi cun mikhêrmei ka sizia a fiangter ding.
21 «Keimah cu sawihnăwm kâi lo ka si, cuticingin keimah le keimah ka theiaw lo;
Ka nunnak ziang hmanah ka siar lo.
22 Himi cu thil pakhat a si;
Curuangah kei in, ‹Anih in sawihnăwm kâi lo le misualrál pawl a siatsuah hai,› tiah ka ti.
23 Hremnak in rinlopin mi a thah asile,
Anih cun mawh nei lo vansanglamnak kha a hnihsan men.
24 Leilung cu misualrál kut sungih pek a si.
Anih in a thuṭhentupawlih hmaipawl a hup.
Cumi cu amah a si lo ah teh, zo dang so a si ding?
25 «Ka damsung cān cu zualko tlân hnakin an rangsawn;
An tlânhlo, thil ṭha zianghman an hmu lo.
26 Câlte lăwnglengpawl vekin an liam,
Muvanlai in a sa deh mi a nam lai vekin.
27 ‹Ka phunzainak ka hngilh ding,
Ka riahsiatnak mithmai ka hlít ding ih hnih hmel ka pu ding,› ka ti a si khalle,
28 Ka tuarnakpawl hmuahhmuah ka ṭih;
Nang in mawh nei lo ah in ruat lo ding ti ka thei.
29 Keimah cu thiamlo coter ka si le,
Ziangahso a lak menih ka ṭuanbăng?
30 Keimah le keimah vur tidai thawi ka khawlhawk ih,
Ka kutpawl cingal thawi ka thianfai a si khalle,
31 Nang in khur sungah i hnim thotho ding ih,
Keimai hnipuan rori in in fih ding.
32 «Ziangahtile amah ka san theinak dingah le,
Thuṭhennak hmun ih kan feh veve theinak dingah,
Anih cu keimah vek milai a si lo.
33 Kan karlakih remnak palai,
Kan pahnih parih kut suahtu ding an um fawn lo.
34 Ka hnen ihsin a fungfek la sehla,
A ṭihnunnak thawn i ṭhihṭhaih hlah seh.
35 Cun ka ṭawng ding ih, amah ka ṭih lo ding,
Asinan cuvek le ka si fawn lo.

9:9^a Ayish: Hebru ṭawng a si ih, arsi rual khat hmin a si. Mirang in Great Bear an ti.

9:13^b Rahab: Tipi sungih um samak phun khat relnak a si.

10

Job: Pathian ka Ngen Ding

1 «Ka nun ka ning thlang;
Ka phunzainak ka relsuak thluh ding,
Ka thinlung siatkhâtnak ka rel ding.
2 Kei in Pathian hnenah, ‹Thiam lo i coter hlah;
Ziangruangah keimah i bei rero ti i sim aw.
3 Nang in na kut hnaṭuan nautat dingah le,
Misualrálpawlih thurawnpek hnihsan dingah,
Na palbĕt ding cu na hrangah thil ṭha a si maw?
4 Titsa mit na nei maw si?
Asilole milai hmuh vekin na hmu maw si?
5–6 Ka mawhsualnak na hawlsuak ih,
Ka sual na zăwihliah hi,
Na nipawl teh a thi thei mi milai nipawl vek maw an si?
Na kumpawl teh miralṭha nipawl vek maw an si?
7 Na theih vekin misualrál ka si lo,
Cuticingin na kut sung ihsin runsuak theitu zohman an um lo.
8 ‹Na kut in i sersiam ih, ṭha zetin i rĕmkhawm;
Cuticingcun nang in i siatbăl.
9 Tlak vekin i tuah ti kha cîng ringring hram aw.
Cule leivut ah i kirtersal ding maw?
10 Hnawiti vekin i thle ih,
Hnawi cawhkhăl vekin i căwk,
11 Vun le titsa thawn i thuam ih,
Ruhpawl le thahripawl thawn in phiarkhawm a si lo maw?
12 Nang in nunnak le duhsaknak i pe ih,
Nangmai kilkhawinak in ka thlarau a kilhim.
13 ‹Cule hi thilpawl hi na thinlung ah na thup;
Himi cu na hnenah a um ti ka thei:
14 Sual ka tuah asile, i hminsin ding ih,
Ka mawhsualnak lak ihsin i thlah lo ding.
15 Misualrál ka si ahcun, ka hmakhua pit seh;
Midingfel ka si ko nân, khua ka tāng ngam lo.
Mualphonak in ka khat;
Ka mangbangvansannak hi zoh aw!
16 Khua ka tăn a si ahcun,
Nang in kiosa vekin in pêl ih,
Ka hnenah maksak zetin na langawter lala.
17 Keimah dokalhin thutheitu tharpawl na umter ih,
Keimah lamah na aithawknak a luar sinsin;
Ka parah thlengawknak le harsatnak an um ringring.
18 ‹Ziangah so nang in ka nuih sūl sung ihsi i laksuah?
Zohman ih hmuh hlanah rak thih sawn men tak ding!
19 Um dah lo vek ka rak si ding.
Sūl sung ihsin thlān ah thiar ka rak si ding nân.
20 Ka nipawl hi an mál tuk lo maw?
Cawl thlang aw!
Hnangamnak málte tal ka neih theinak dingah in tibuai hlah uh.
21 Ka kirsal nawn lonak ding hmun,
Thim le thihnak thlahlim ram ka feh hlanah,
22 Thimnak vekih thim lutuk ram,
Hnăwkbuai le thim mepmep,
Tleu hman thim vek a sinak hmun ah,› tiah ka ti,»

tiah a ti.

11

Zofar in Siraw dingin Job a Ngen

1 Cun Naamath khawmi Zofar in a sâng ih:

2 «Hi zât liangluang ṭawngkampawl hi san loin maw a um ding?
Mikam tampa cu thiam coter a si ding maw?
3 Umze nei lo na ṭawng mipawl in dai ko mi a tuah ding maw?
Mi na hmuhsuam tikah, ningzak ko zohman ih tuah loin na um ding maw?
4 Ziangahtile nang cun,
‹Ka thuzirh cu a fai ih,
Na mithmuhah ka thiang,› tiah na ti.
5 Asinan Pathian cu ṭawngsuakin,
Nangmah dokalhin a hmur kau hnik sehla cu aw;
6 Anih in fimnakih thuthuppawl a lo hmuh ding.
Ziangahtile fimnak in kap hnih a nei.
Curuangah Pathian in na mawhsualnak hnakih mál in na parah a tuah ti thei aw.
7 «Pathian thil thûkpawl na hawlsuak thei ding maw?
Ziangkimtithei-ih kauhzia na hmusuak thei ding maw?
8 Cupawl cu vanpawl hnakin an sâng, nang in ziangso na tuah thei?
Sheol hnakin an thûk sawn, nang in ziangso na theih?
9 An thil tahnak cu leilung hnakin a sausawn ih,
Tifinriat hnakin a kausawn.
10 «Anih cu a lan ih, a kharkhum, cule a fĭnkhawm asile,
Zo in so kham thei ding?
11 Ziangahtile anih cun mi bumhmangpawl a thei;
Sualralnak khal a hmu.
Cumi cu ruat loin a um ding maw?
12 Ziangahtile ramlak lāk cu milai ih a suah tikah,
Mi-â cu a fim ding.
13 «Na thinlung na timlam ih,
A lamah na kut na pharh a si ahcun;
14 Na kut ah mawhsualnak a um ih hlapi ah na hlăwn,
Cule na puanthlampawl sungah sualralnak na cēnter lo a si ahcun;
15 Na hmai kha bāl um lo ten na khaisâng thei tengteng ding;
A si, na dinghnget thei ding ih, na ṭih lo ding;
16 Ziangruangahtile na mangbangvansannak na hngilh ding ih,
Cumi cu tipi luanghlo vekin na ruat ding.
17 Cule na nunnak cu sun laifang hnakin a tlesawn ding.
Rak thim khal awla, zing lam vek na si ding.
18 Cule ralmuangten na um ding, ziangruangahtile ruahsannak a um;
A si, na kiangkapah khur na lai ding ih, himdamten na cawlhahdam ding.
19 Na zau ding ih, zohman in an lo ṭhihṭhaih lo ding;
A si, mi tampi in an lo tlăwn ding.
20 Asinan misualrálpawlih mit cu a râu ding ih,
An tlânsuak thei lo ding,
Cule an ruahsan mi cu an thaw thawt net kha a si,»

tiah a ti.

12

Job in a Sawiseltupawl a Sâng

1 Cun Job in a sâng ih:

2 «Thungaiten nannih cu milai nan si ih,
Fimnak cu nan zawngah a thi ding!
3 Asinan nanmah vekin theihthiamnak ka nei ve;
Nanmah hnakin ka niam ce lo.
A si, hivek thilpawl thei lo zo so um?
4 «Keimah cu a rualpipawl ih hmuhsuam mi,
Pathian a kotu le, Pathian ih a sān mi pa,
Midik le sawihnăwm kâi lo, hnihsan mi ka si.
5 Mingaihngam ih ruahnak ah vanduainak cu nautatin a um;
Cumi cu ke nâlpawl hrangah tiar cia ih ret a si.
6 Suamhmangpawlih puaninnpawl cu an hmuingil ih,
Pathian in amai kut hmangih a cawmdawlnak thilpawl ah
Pathian thinhengtertupawl cu ralmuangten an um.
7 «Asinan ramsapawl sut awla, annih in an lo zirh ding;
Cule tlun zuang vâtepawl khal, cun annih in an lo sim ding;
8 Asilole leilung hnenah ṭawng awla, anih in a lo zirh ding;
Cule tifinriat ngapawl khal in an lo simfiang ding.
9 Cupawl hmuahhmuah lakah
Himi hi Jehovah ih tuahsuak mi a si ti thei lo zo so um?
10 Pathian kut ah thilnung tinkim ih nunnak le
Milai hmuahhmuah ih thaw a um a si.
11 Hna in ṭawngkampawl a hniksak ih,
Ka in a rawl a tep a si lo maw?
12 Putarpawl hnenah fimnak a um ih,
Nikhaw rei ah, theihthiamnak.
13 «A hnenah fimnak le cahnak a um,
Anih in thurawnpek le theihthiamnak a nei.
14 Zoh hnik, anih in thil a siatbăl, cumi cu dĭnsal theih a si lo;
Anih in thawng mi a thla, thlahsal theih a si lo.
15 Zoh hnik, anih in tipi a kaitâng, an kangrál ṭheh;
Anih in a thlahsuak hai, annih in leilung an cîm ṭheh.
16 A hnenah cahnak le fimnak a um.
Bum mi le a bumtu pawl khal amai ta an si.
17 Anih in thurawnpetupawl cu ralkaih ah a hruaihlo hai ih,
Thuṭhentupawl mi-â ah a tuah.
18 Anih in siangpahrangpawlih ṭemṭawnnakpawl a phelh ih,
An tâipawl ah taikhap in a ṭem.
19 Anih in puithiampawl ralkaih ah a hruaihlo hai ih,
Micakpawl a hlăwnthlu.
20 Anih in rinsan mipawlih thusimpawl a merhkâwi ih,
Kum upapawlih thuṭhenfelthiamnak a lahlo.
21 Anih in mipawimawhpawl parah nautatnak a burh ih,
Micakpawlih taikhap a dawrter.
22 Anih in thim sung ihsin thuthuppawl a phuanglang ih,
Thim mepmep kha tleu ah a canter.
23 Anih in miphunpawl a ropiter ih, a siatsuah hai;
Miphunpawl a tumter ih, a kaihruai hai.
24 Anih in leilung mipawlih lubânpawlih theihthiamnak a lâkhlohsak ih,
Zin umlonak ramṭhing ah a vâkvaiter.
25 Annih cu tleu um lo thim lakah thimtham vah in an vâk ih,
Anih in zuripawl vekin a hawrter hai.

13

1 Ngai hnik, himi thil hmuahhmuah hi ka mit in a hmu zo,
Cumi cu ka hna in a thei zo ih a theihthiam zo.
2 Nan theih mi cu kei khal in ka thei ve;
Nang hnakin ka niam ce cuang lo.
3 Asinan Ziangkimtithei hnenah ka ṭawng ding,
Cule Pathian thawi thuelawk ka câk.
4 Asinan nannih thuphan phuahtupawl,
Nannih cu santlailo sibawi nan si.
5 Maw, daiten um men uh,
Cumi cu nan fimnak a si sawn ding.
6 Ka khawruah mipawl hi ngai uhla,
Ka hmur ih elnakpawl kha hna tŭn uh.
7 Pathian hrangah sualrál zetih ṭawng in,
A hrangah hrăwkhrawl zetin thu nan rel ding maw?
8 A hrangah mi thleidannak nan langter ding maw?
Pathian hrangah nan bei ding maw?
9 Anih in a lo hawlsuah tikah thil ṭha a si ding maw?
Asilole mi pakhat in mi dang a bum vekin,
Pathian cu nan bum thei ding maw?
10 A thupteih mi thleidannak nan lăngter asile,
Anih in a lo kawk tengteng ding.
11 A cungnunnak in lo thinphângter in,
A ṭihnunnak na parah a tla lo ding maw?
12 Nan ṭawngfimpawl cu vutcâm thufim an si ih,
Nan humawknakpawl cu leitlăk humawknak an si.
13 «Ka hmaiah daiten um uh, cule thu ka sim ding,
Cun ka parah ziangkhal thleng ko seh!
14 Ziangahso ka titsa cu ka ha in ka keu ding ih,
Ka nunnak cu ka kut ah ka ret ding?
15 Anih in i that khal sehla, amah cu ka rinsan thotho ding.
Cuti a si hmanah, a hmaiah ka thuhlapawl ka hum ding.
16 Anih cu ka runsuahnak a si fawn ding,
Ziangahtile midepde cu a hmaiah an ra thei lo ding.
17 Ka thusim mi hi ṭhaten ngai uhla,
Ka thuthan mi hi nan hna tŭn uh.
18 Zoh hnik, ka thuhla ka timlam zo,
Ka dikzia phuansuah a si ding ti ka thei.
19 Keimah i khīngtu ding cu zo so a si?
Ziangahtile a um a si ahcun, daiten ka um ding ih, ka thi ding.
20 «Thil pahnih lawng ka parah tuah hlah aw,
Cun na hnen ihsin ka thupaw lo ding:
21 Ka hnen ihsin na kut hi a hlatnak ah zûkkir awla,
Na ṭihnunnak in i ṭihter hlah seh.
22 Ko aw, cule ka lo sâng ding;
Asilole thu sim ning, cun nang in i sawn aw.
23 Ka mawhsualnakpawl le sualnakpawl cu ziang tlukin so an tam?
Ka dānpahbălnak le ka sualnak i theihter aw.
24 Ziangah na hmai na thup ih,
Na ral vekih i ruah?
25 Thinghnah khat lam le khat lam ih a zam mi cu na lâuter ding maw?
Cule cangpâwl ro cu na dawi ding maw?
26 Ziangahtile keimah dokalhin thil khâpawl na ngan ih,
Ka no lai mawhsualnakpawl i tuarter.
27 Nang in ka kepawl hreng na sut ih,
Ka zinpawl hmuahhmuah nâi zetin na thlingthla.
Ka ke zaphakpawl hrangah ri na khiah.
28 «Milai cu thil răwp vekin a ziamrál,
Sunhrûl ei mi sinfen vekin.

14

1 «Nunau hrin milai cu
Buainak ih khat ni málte sung hrang lawng a si.
2 Anih cu pangpar vekin a rung um ih a vuaihlo;
Anih cu thlahlim vekin a tlân ih a um pehzăwm lo.
3 Cule cuvek mi parah na mit fu in,
Nangmah rori in thuṭhennak ah na hruai maw?
4 Thil thianglo sung ihsin zo in so thil thiang a lasuak thei ding?
Zohman in!
5 A damsung ni zât cu relcat cia an si,
A thla zât khal na hnenah a um;
A cān bikhiah na ruat cia ih, anih in a lan thei lo.
6 A cawlhhahdam theinak dingah a hnen ihsin hmun dang hawi aw,
Hlawhfa vekih a ni a ṭheh tiangin.
7 «Ziangahtile thingkung hrangah ruahsan ding a um,
Cumi cu hauthluk asile, a cerhsal ding ih,
Cerh a bāng dah lo ding.
8 A hrampawl leilung sungah târ vivo in,
Lei parah a bul thi khal sehla,
9 Tidai rimnam ah a hung mûmsal ding ih,
Thil kung bangin a hnge a suah ding.
10 Asinan milai cu a thi ih a riarál;
A si, anih cu a cemrál ih,
Anih cu khuiah so a um?
11 Tifinriat ihsin tidai a fehhlo vek le,
Tiva a kang ih a car vekin,
12 Milai khal a it ih a thosal lo.
Vanpawl an um nawn lo tiangin,
A ṭhangharh lo ding ih,
A ihthahnak ihsin a tho fawn lo ding.
13 Sheol ah nang in i thupin,
Na thinlingnak a reh hlanlo a thupnak hmun ah i retin,
Ka hrangah tikcu khiah in, i mang cila aw!
14 Milai a thih asile, a nungsal pei maw?
Ka hahdamnak a thlen lai hlanlo,
Ka hnaṭuan khunghar cān sung hmuahhmuah ka hngak ding.
15 In ko ding ih, ka lo sâng ding;
Na kut hnaṭuan kha na hngakhlap ding.
16 Ziangahtile atu ah ka kekarpawl na siar,
Asinan ka sualnak cu na hminsin lo.
17 Ka dānpahbălnak cu dip sungih erhpit a si ih,
Nang in ka mawhsualnak na khuh.
18 «Cule tlang a cim ih a dip ṭheh vekin le,
Lungpi cu a umnak hmun ihsin a ṭhawn vekin;
19 Tidai in lungtopawl a eicem ih,
Lihăwng in leilung ram ṭha a hruthlo vekin;
Milai ruahsannak khal na hlorálter.
20 Amah cu kumkhaw daihin na neh ih,
Anih cu a hlolan ta;
Nang in a hmel na danglamter ih, amah cu na thlahhlo.
21 A fapapawl cu upat an run hlawh ih,
Cumi cu anih in a thei lo;
Annihpawl cu niamter an si ih, anih in cumi cu a thei lo.
22 Asinan a taksa in nâ a tuar ding ih,
A thinlung a aihram ding,»

tiah a ti.

15

Elifaz in Mi-â tiah Job a Puh

1 Cun Teman khawmi Elifaz in a sâng ih:

2 «Mifimpa in thulolak theihnak thawn sâng in,
Nisuahnak lam thli in a pum a puarter ding maw?
3 Ṭhathnemnak nei lo ṭawng hmangin,
Asilole hlawknak um lo thusim mipawl hmangin thu mi a ruah ding maw si?
4 A si, Pathian ngaihsaknak na hlăwnhlo ih,
Pathian hmaiah ngunngaih zetin na ruat lo.
5 Ziangahtile na mawhsualnak in na hmurkâ a zirh ih,
Nang in hrăwkhrawlnak lei na hril.
6 Nangmai kâ rori in thiam lo a lo coh, kei si loin;
A si, nangmai hmur rori in nangmah dokalhin thu a theihter.
7 «Nangmah cu minung suak hmaisabik na si maw?
Asilole tlangpawl hlanah tuah na si maw?
8 Pathian thurawnpek na hna in na thei dah maw?
Fimnak hi nangmai hrang lawngah a si na ti maw si?
9 Kan theih lo mi ziang na thei?
Kan theihthiam lo mi ziangso na theihthiam?
10 Kan lakah ṭuakpar mipawl le kum upapawl an um,
Na pa hnakih upasawn an si.
11 Pathian-ih hnĕmnak le,
Na hnenih nemteih ṭawng mi cu na hrangah a tenau tuk maw?
12–13 Na thinhengnak kha Pathian lamih herter dingin le,
Na kâ ihsin cuvek ṭawngkampawl suakter dingin,
Ziangahso na khawruahnak in a lo hruaihlo ih,
Ziangahso na mit in lungkim lo zetin a zoh?
14 «Thianghlim dingin milai cu ziangso a si?
Cule dingfel dingin nunau hrin mi cu ziangso a si?
15 Zoh hnik, Pathian in a mithianghlimpawl a rinsan hai lo ih,
A mithmuhah vanpawl an thianghlim lo.
16 Cuti asile mawhsualnak tidai bangih intu,
Fihnungza le bawrhhlawh milai cu ziang tlukin so a thianhlim lo sinsin ding!
17–18 Mifimpawl ih an sim mi,
An pupápawl hnen ihsin hlah mi nei loih an dăwn mi pauhpauh,
Ka lo sim ding, i ngai aw,
Ka hmuh zo mi ka thăn ding
19 (An lakih khawtluang mi zohman um lo, anmah hnen lawngih ram pek mi an pupápawl):
20 Misualrálpa cu a damsung hmuahhmuah nâ a tuar ih,
Mirapthlakpa hrangah cun kum málte lawng khiahsak a si.
21 A hna ah ṭihnungza thâwmpawl a um;
Thlangam zetih a um laiah a parah siatsuahtu a thleng.
22 Thim ihsin a kirsal ding ti a zum lo,
Ziangahtile amah cu ralnâm in a hngak ringring.
23 Anih cu rawl hawlin a vâktawi ih,
‹Khui ah so rawl a um?› tiah a ti.
Thimnak ni a nâi ti a thei.
24 Buainak le ānhainak in amah cu a thlaphângter;
Ral do dingih tiar siangpahrang vekin, annih in amah cu an neh.
25 Ziangahtile Pathian dokalhin a bân a suah ih,
Ziangkimtithei dokalhin a cakawter.
26 A khoh zetih a laipâwng mi a ralphaw thawn
Pathian dokalhin lungruh zetin a va tlân.
27 «Amai thaunak in a hmai a tuam ih,
A tâi kha a thau in a ritter ko nain,
28 Amah cu siatrál mai ding khawpi ṭhingpawl ah le,
Zohman ih luah lo mi innpawl ah a cêng.
29 Anih cu a lian lo ding,
A neihnunnak khal in a daih rei lo ding ih,
A neih mipawl khal leitlun ah a karhzai fawn lo ding.
30 Anih cu thim ihsin a fehsuak lo ding;
Amai hngepawl cu meihliau in a roter ding ih,
Anih cu Pathian kâ ih thaw hmangin a fehhlo ding.
31 Amah le amah bumawin a ṭhahnem lo mi thilpawl rinsan hlah seh,
Ziangahtile ṭhathnemlonak kha a lawmman a si ding.
32 Cumi cu amai tikcu a kim hlanah tifel a si ding ih, amai hnge cu a hring lo ding.
33 Anih in sabit hri bangin sabit rah hmin lo mi cu a hnînṭil ding ih,
Olif kung bangin amai par mûm cu a thingthla ding.
34 Ziangahtile midepde pungkhawm cu an kawlawng ding ih,
Nawhthuh eihmang puanthlampawl cu mei in a kangrál ṭheh ding.
35 Annih cun harsatnak an vun ih, buainak an hring;
An sūl in bumnak a timtuah,»

tiah a ti.

16

Job in Zangfahnak Nei Lo a Rualpipawl a Mawhsiat

1 Cun Job in a sâng ih:

2 «Cuvek thil tampi hna in ka rak thei;
Nan zaten tuar har zet mihnemtu nan si!
3 Umze nei lo ṭawngkampawl in cemnetnak an nei lo ding maw?
Asilole ziang in a lo căwktho ih na sawn?
4 Nan dinhmun hi ka dinhmun rak si ve ta sehla cu,
Kei khal nanmah vekin ka ṭawng thei ve ding.
Nanmah dokalhin ṭawngkampawl ka phuah ding ih,
Ka lu ka lo thinhnawh ding;
5 Asinan ka kâ in ka lo cakter ding ih,
Ka hmur ih hnĕmnak in nan thinnatnak a lo dêmter ding.
6 «Ṭawng hman ningla, ka thinnat a dêm cuang lo;
Cule daiten um hnik ningla teh, ka thaw a veng cuang ding maw?
7 Asinan atu ah Pathian in i cauter tuk zo;
Ka mipi-umkhawm hmuahhmuah na siatsuah ṭheh.
8 Nang in i sawngkâwrter ih,
Cumi cu in theihpitu a si;
Ka ṭawlnak in in rek ih,
Keimah dokalhin thu a theiter.
9 Anih in a thinlingnak in i thlek ih, i hua;
Anih in a hacâng i ṭhialhnawh;
Ka ralpa in mitkem zetin i zoh.
10 Annih cu keimah dokalhin an kâ an âng,
Mualpho zetin ka biang ah in bēng,
Keimah dokalhin an pungkhawm.
11 Pathian in amah ngaihsak lo tupawl kut ah i ap ih,
Misualrálpawl kut ah i thlĕn.
12 Ka thaw a rak veng ṭheu, asinan anih in i phelhdarh ṭheh;
Cuihtlunah anih in ka hngawng in i lâk ih, i săwpdip ṭheh;
A hmuibah mi ah i ret.
13 A thálsaithiampawl in in kulh.
Anih in ka thin ah i saingah ih, i zangfah lo;
Anih in lei ah ka hnit a thlebung.
14 Anih in hriamhma pakhat hnu pakhat i baih;
Ral dotu bangin i zăwnhnawh.
15 «Ka vun tlunah buri-hnipuan ka ṭhit ih,
Leivut ah ka ki ka sawhlut.
16 Ṭahnak ruangah ka hmai a sen ṭheh ih,
Ka mit vun tlunpawl ah thim mepmep a um,
17 Ka kut ah thahrumsuahnak um loin,
Ka thlacamnak cu thiang ko hman seh.
18 «Maw leilung, ka thisen khuh hlah awla,
Ka ṭahnak in cawlhhahdamnak hmun nei hlah seh!
19 Ngai hnik, atu khalah ka thutheihpitu cu van ah a um ih,
Ka thutheihpitu cu hmun sâng ah a um.
20 Ka rualpipawl in in zawmtai,
Ka mit in Pathian hnenah mitthli a thlebung.
21 Minung in a innhnen hrangih a ngensak vekin,
Mi pakhat khat in a dang mi pakhat hrangah Pathian hnenah ngensak sehla cu aw!
22 Ziangahtile kum málte a liam hnuah cun,
Kir nawn lonak lamzin ah ka feh ding.

17

Băwmnak hrangah Job Thla a Cam

1 «Ka thinlung a kekkuai,
Ka damsung cān a cem,
Ka hrangah thlān cu tiar cia-in a um.
2 Thungaiten hmuhsuamtupawl in in kulh.
Mi aithawhnak parah ka mit a fu ringring.
3 «Ka hrangah tiamkămnak tuah aw.
Zo so ka hrangah amkhām si ding?
4 Ziangahtile nang in theihthiamnak lak ihsin an thinlung na thup;
Curuangah anmah cu na khaisâng lo ding.
5 A hlawknak ding hrangih a rualpipawl dokalhih ṭawngtu cu,
A fātepawlih mit a māl ding.
6 «Asinan Pathian in mi ih puahcăwk mi ah i tuah ih,
Hmai cilphui men mi ah ka cang.
7 Riahsiatnak ruangah ka mit a râu ih,
Ka taksapêng hmuahhmuah cu thlahlim vek an si.
8 Himi ah midĭngpawl an khawruah a har ih,
Mawh nei lo cu midepde dokalhin a căwkthoaw.
9 Midingfel in a lamzin a kaihnget ding ih,
Kut thiangfai neitu cu a cak sinsin ding.
10 «Asinan zangfahten, nan zaten ra kirsal uh,
Ziangahtile nan lakah mifim pakhat hman ka hmu lo.
11 Ka damsung cān cu a liam,
Ka tumtah mipawl an siatbăl,
Ka thinlung ruahnakpawl tiangin.
12 Annih in zan kha sun ah an thleng;
Thim hmaika-ah, ‹Tleu a nâi zo,› tiah an ti.
13 Ka inn vekin Sheol ka hngah a si ahcun,
Thim lakah ka ihnak ka tuah a si ahcun,
14 Siatnak hnenih, ‹Nang cu ka pa na si,› tiah ka kawh ih,
Tholung hnenah, ‹Nang cu ka nu le ka farnu na si,› ka ti a si ahcun,
15 Ka ruahsannak teh khuiah so a um?
Ka ruahsannak teh zo in a ngai pawimawh?
16 Annih cu Sheol kăwtkapawl ah an vung feh ding maw?
Leivut ah kan cawlhahdamtlang ding maw?»

tiah a ti.

18

Bildad: Misualrálpawl cu Dāntat an Si

1 Cun Shuh-mi Bildad in a sâng ih:

2 «Ziangtluk tiang so na ṭawngkampawl na peh ding?
Theihthiamnak neih tum awla, cuihhnu ah kannih in kan sim ding.
3 Ziangah kannih cu ramsa vekih siar kan si ih,
Na mithmuhah mi-â ih ruah kan si?
4 Nang thinheng ruangih mah le mah băwtthlekawtu,
Nangmah ruangah leilung hi thlauthlak a si ding maw?
Asilole lungpi cu a umnak hmun ihsin ṭhawn a si ding maw?
5 «A si, misualrálpawlih êng cu a mit ih,
A meisa alh a tle lo.
6 A puanthlam sungah tleu cu a thim ih,
A kiangih um a meito cu mihter a si.
7 Cak zetih a kekarpawl cu tawiter an si ih,
Amai thurawnpek in amah a hlăwnthla.
8 Amai ke rori in sûr sungah hlăwn a si ih,
Thang sungah a vâk.
9 Sûr in a kedil in a awk ih,
Thang in a awkbĕt.
10 Amah awk dingah lei parah palpelh tháng kămthup a si ih,
A lamzin ah lēmsiah tháng an kăm.
11 A kil kip in ṭihnungza in amah a thlaphângter ih,
A ke dung ihsin a dawi vivo.
12 A cahnak a duai ih,
A kiangah siatralnak tiar cia-in a um.
13 A vun cu hmun kip ih eiral a si;
Thihnak fatir in a kutkepawl a eiral ṭheh.
14 Anih cu a beunak puanthlam ihsin hruaihloh a si ih,
Ṭihnungza siangpahrang hmaiah an hruai.
15 Amai mi si lo pawl a puanthlam sungah an um;
A cēnnak hmun parah kât a darh ṭheh.
16 Hnuai lamah a hrampawl an ro ih,
Tlun lamah a hngepawl an vuai.
17 Amah cīn ringring nak cu leilung tlun ihsin a hlo ih,
Mihminthangpawl lakah hmin a nei lo.
18 Anih cu tleu ihsin thim ah dawihlo a si ih,
Leitlun ihsin dawisuak a si.
19 A mipawl lakah fapa asilole tesinfa a nei lo ih,
A cēnnak hmun ih rung tâng khal zohman an um lo.
20 Nitlaknak lamih a um mipawl cu amai harsatnak ni ah an khawruah a har,
Nisuahnak lamih a um mipawl an thin a phan vekin.
21 Thungaiten misualrál cēnnakpawl cu cuvek a si ih,
Himi cu Pathian a thei lo tupaih umnak hmun a si,»

tiah a ti.

19

Job in Amah Tlentu a Rinsan

1 Cun Job in a sâng ih:

2 «Ziangtik tiang so ka nunnak nan sawisat ding ih,
Ṭawngkampawl in in khuaidip ṭheh ding?
3 Nannih in vei hra in hmuhsuam;
Ka parih thil tisual nan ning a zak lo.
4 Cule rak tisual taktak hman ningla,
Ka tisualnak cu keimah thaw lawngin a pehtlaiaw ding.
5 Keimah dokalhin nanmah le nanmah nan khaisângaw taktak ih,
Keimah dokalhin ka ningzahmualphonak ding nan ngĕn a si ahcun,
6 Pathian in i lingletter ti le,
A sur thawn in kulhbĕt ti thei uh.
7 «Palhnak thuhla ih ka ausuah asile, theih ka si lo.
Ring zetih ka au a si khalle, diknak a um cuang lo.
8 Anih in ka lamzin hruang a kulhpit ih, ka pahlan thei lo;
Cule anih in ka zinpawl ah thim a ret.
9 Anih in ka ropitnak i hlihsak ih,
Ka lu ihsin lallukhum i hlihsak.
10 Anih in a kil kip in i khuai ih,
Ka cemrál cih;
Ka ruahsannak cu thingkung bangin a hram in a phawng.
11 Ka parah a thinlingnak a alhter ih,
A ral ah i ruat.
12 A ralkap burpi an rakhawm ih,
Keimah do dingah an lamzin an tuahṭha;
Ka puanthlam kimvelah ṭanhmun an khuar.
13 «Anih in ka unaupawl ka hnen ihsin a hlatnak ah a ṭhawn ih,
Ka theihthiam mipawl ka lakah an mikhual.
14 Ka sungkhatpawl in in ngaihthah ih,
Ka hawipi nâipawl in in hngilh.
15 Ka inn ih cêngpawl le ka siahhlawh nunaupawl in,
Mikhual ah in ret;
An mithmuhah khawtluang mi ka si.
16 Ka siahhlawh ka ko, asinan anih in i sâng lo;
Ka kâ in amah cu zangfah ka dil.
17 Ka thaw hi ka nupi hrangah huatumza a si ih,
Ka nuih sūl ihsi suak mipawl hrang khalah keimah cu fihnungza ka si.
18 Nauhakte tepawl hman in in nautat;
Ka tho ih, keimah dokalhin an ṭawng.
19 Ka hawipi nâipawl hmuahhmuah in in fih ih,
Ka rak duhdawt mipawl khal in in hawisan.
20 Ka vun le ka taksa ka ruh ah an bĕt ih,
Ka hahni thaw lawngin ka tlânsuak.
21 «Maw, nannih ka rualpipawl, in zangfah hram uh, in zangfah hram uh,
Ziangahtile Pathian kut in i vua a si hi!
22 Ziangah Pathian ih tuah vekin nannih in in tiduhdah ih,
Ka titsa ah hin nan di a riam tawk lo?
23 «Ka ṭawngkampawl hi ngan si sehla cu aw!
Cazual sungih, ngankhum si sehla aw!
24 Thir cangannak le sûan thawn kumkhuain,
Lungpi parah kher sehla cu aw!
25 Ziangahtile i tlentu cu a nung ih,
A netnakah leilung parah a ding leh ding ti ka thei;
26 Cule ka vun a siatral hnuah,
Ka titsa in Pathian ka hmu ding ti ka thei,
27 Keimah rori hrangah ka hmuh ding mi amah cu,
Mi dang si lo, keimai mit rori in a zoh ding.
Ka sungah ka thinlung a cau!
28 ‹Amah cu ziangtin kan tiduhdah ding?
Thu búlhrampawl cu amah ah hmuh theih a si si,› nan ti a si ahcun,
29 Nanmah hrangah ralnâm cu ṭih uh;
Ziangahtile thuṭhennak a um ti nan theihnak dingah
Thinlingnak in ralnâm ih dāntatnak a thlĕn,»

tiah a ti.

20

Misualrálpa Thuhla ih Zofar Sermon

1 Cun Naamath khawmi Zofar in a sâng ih:

2 «Ka khawruah buainak le,
Ka dawnhar khawruahnakpawl in in sângletter.
3 Keimah i mawhthluktuih kawhnak hna in ka thei ih,
Ka theihthiamnak thinlung in in sângletter.
4–5 «Misualrálpawlih nehnak cu a tawi ih,
Midepde-ih aipuannak khal hmakhatte a si, ti hi
Khuahlan, leilung parih milai ret a si thăwk ihsin na thei lo maw si?
6 A uanawknak cu vanpawl tiang thleng in,
A lu in khawdur dai hmansehla,
7 Anih cu amai êk vekin a hlorál kumkhua ding;
Amah a hmu dahtupawl in, ‹Amah cu khuiah so a si?› tiah an ti ding.
8 Anih cu mang vekin a zamhlo ding ih, hmuh a si lo ding;
A si, zan ih larawknak vekih dawihlo a si ding.
9 Amah a hmutu mit in a hmu nawn lo ding ih,
A um ṭheu nak hmun khal in a zoh dah nawn lo ding.
10 A falepawl in mifarahpawl ih duhsaknak an hawl ding ih,
A kut in a neihnunnak a pekirsal ding.
11 A ruhpawl cu a no lai cahvahnak in a khat,
Asinan cumi cu amai zawngah leivut ah a tlu ding.
12 «Amai kâ sungah thil ṭhalo cu thlumin,
A lei tăngah thup khal sehla,
13 Anih in cumi cu khêkin le tlansan loin,
A kâ sungah hmawm sawn hmansehla,
14 A pumpi sungih a rawl cu a thûr mi ah a cang;
Cumi cu a sungah cawngawr tûr ah a cang ding.
15 Anih in lennakpawl a dawlh ih,
A luakkirsal;
Pathian in a pum sung ihsin a hlăwnsuak ding.
16 Anih in cawngawr tûr a zûk ding ih,
Rulngân lei in amah a that ding.
17 Anih in tivatepawl,
Khuaitizu le hnawikhăl thawi a luang mi tivapipawl a hmu lo ding.
18 A ṭuansuah mi a pekirsal ding ih,
Cupawl a dawlh lo ding;
Sumtuahnak rahsuah mi ihsin
Nunnawmnak zianghman a ngah lo ding.
19 Ziangahtile mifarahpawl a palbĕt ih a thlauthla,
Amai sak lo mi inn kha thahrumsuah in a láwng.
20 «A thinlung sungah daihnak a um lo ti a theih ruangah,
A duh mi thil zianghman a khawl lo ding.
21 A hrangah ei ding zianghman a um lo;
Curuangah a neihnunnak in rei a daih lo ding.
22 A todelhawknak ah anih cu vansangin a um ding;
Mangbangvansannak a tuartu kip ih kut cu a parah a thleng ding.
23 A pum a puar zik zawngah,
A parah Pathian in a thinling sosa a thlah ding ih,
Cumi cu rawl a ei laifangah, a parah ruah surin a sur ding.
24 Anih cu thir hriamhrei lak ihsin a tlânsuak ding;
Dar thál in amah a saitlăng ding.
25 Cumi cu phawi a si ih, a taksa ihsin a hung suak;
A si, a hnit sung ihsin a zim tle a hung suak.
Ṭihnungzapawl a parah a thleng;
26 Amai hrangah thim sah zet khêk a si.
Zâp lo mi meisa in amah a kangrál ding;
Cumi cun a puanthlam ih a tāng mi pa cu a kāng ding.
27 Vanpawl in a mawhsualnak an phuanglang ding ih,
Leilung in amah a do ding.
28 A inn-ih neihnunnak in a suahsan ding ih,
Pathian thinling ni ah cun an luangrăl ding.
29 Himi hi Pathian hnen ihsin misualrálpaih covo a si,
Pathian in a ro dingih a ruah mi a si,»

tiah a ti.

21

Misualrál Thuhla ih Job Thusim

1 Cun Job in a sâng ih:

2 «Ka thusim mi hi ṭhaten ngai uhla,
Himi hi nan hnĕmawknak si seh.
3 Ka ṭawng theinak dingah in rak zāwi hrih uhla,
Ka ṭawng ṭheh tikah, in hmuhsuam leh uh.
4 «Kei in minung dokalhin ka phunzai maw si?
Cuti asile, ziangahso ka thin a tawi lo ding?
5 I zoh uhla, khawruahharin um uh;
Nan kut in nan kâ hup uh.
6 Ka theihsuahsal tikah ka ṭih ih,
Ka thlaphannak ah ka taksaruangpum a khūr.
7 Misualrálpawl cu ziangahso an nun ih an tar,
Huham nasazet nei ih an can?
8 An tesinfapawl cu anmai zawngah an mithmuhah dĭnhnget an si ih,
An cikuangpawl an mithmuhah.
9 An innpawl cu ṭihphannak lak ihsin an him ih,
Pathian fungfek khal an parah a tla lo.
10 An câwpa in hlawhsam loin ci a thlah;
An câwpi in fasiat lo ten fa a nei.
11 An fanau tetepawl rante rual vekin an thlah men ih,
An fātepawl an lâm.
12 Khuangte le ṭingṭang tumin hla an sak ih,
Phirivau awn ah lungawiaipuangin an um.
13 An damsung cān cu neinung zetin an hmang ih,
Hmakhatteah Sheol ah an feh.
14 Cuticingcun Pathian hnenah, ‹In fehsan aw,
Ziangahtile na lamzinpawl theih kan duh lo.
15 Amah kan rĕn theinak dingah, Ziangkimtithei cu zo so a si?
Cule a hnenih thla kan cam asile ziang hlawknak so kan ngah ding?› tiah an ti.
16 Ngai hnik, an hmuingilnak cu an kut ah a um lo;
Misualrálpawlih thurawnpek cu ka hnen ihsin a hla.
17 «Misualrálpawlih meito cu vei ziang zat so mihter a si?
An siatralnak teh an parah vei ziang zat so a thlen?
A thinhengnak in Pathian in vawi ziang zat so riahsiatnak a zem hai?
18 Annih cu thli hmaiih cangpâwl vek le,
Thlipi ih a hranhloh mi fānghi vek an si.
19 Annih in, ‹Pathian in mi pakhat ih mawhsualnak cu a falepawl hrangah a khawl,› tiah an ti.
Anih in cumi a theih theinak dingah Pathian in cu pa cu lehrūl seh.
20 A siatralnak cu a mit in hmu sehla,
Anih in Ziangkimtithei-ih thinlingnak cu in seh.
21 Ziangahtile a nithla zât a hrekih sahtan a si tikah,
A hnuih a sungkuapawl hrangah ziangso a ruahsak ding?
22 «Anih in a sannak hmun ih um mipawl thu a ṭhen ruangah,
Zo tal in Pathian cu theihnak an zirh thei pei maw?
23 Mi pakhat cu a harhdam zet laiah a thi,
Thawvéng le ralmûang zetih a um laiah.
24 A taksaruangpi cu thau in a khat ih,
A ruhthlikpawl cu an hnâwng.
25 A dang pakhat cu thinna zetin a thi,
Thil ṭha tep dah loin.
26 Annih cu leivut ah bangrepten an it,
Tholungpawl in an bawmkhat.
27 «Zoh hnik, na ruahnakpawl ka thei ih,
I tisiatnak ding khawkhan mipawl thawn.
28 Ziangahtile nannih in, ‹Khuitawkah so mipawimawhpaih inn cu?
Khuitawkah so misualrálpawl cēnnak hmun cu?› tiah nan ti.
29 Lamzin ih khualtlawngpawl nan rak sut a si lo maw?
An hminsinnakpawl nan thei lo maw si?
30 Ziangahtile misualrálpawl cu vanduai ni hrangah khêk an si;
Thinling ni ah anmah cu hruaisuah an si ding.
31 Zo in so a hmaika-ah a lamzin thiamlo coter?
A tuah cia mi hrangah zo in so lehrūl?
32 Cuticingin anih cu thlān ah hruai a si ding ih,
A thlān cu kil a si.
33 Phaikuam leihlâwm cu a hrangah a thlum ding;
Amai hlanih siar cawk lo an rak feh vekin,
Mi kip in amah cu an thlun ding.
34 Nan thulehnakpawl cu diklonak a um ruangah,
Ziangtin saw nannih in thulolak ṭawngkampawl in in hnem thei ding?»

tiah a ti.

22

Elifaz in Job cu Misualrál tiah a Puh

1 Cun Teman khawmi Elifaz in a sâng ih:

2 «Mifim cu amai hrangah cun a ṭhahnem men ding nân,
Milai hi Pathian hrangah ṭhathnemnak a nei thei pei maw?
3 Midingfel na sinak cu, Ziangkimtithei hrangah lunghmuinak ziang tal a um maw?
Asilole sawihnăwm kâi loih na nundānpawl cun a hrangah hlawknak a pe maw?
4 «Amah na ṭihzahnak ruangah maw nun a lo rĕm ih,
Thuṭhennak ih a lo luhpi?
5 Na sualralnak cu a nasa in,
Na mawhsualnak cu net ti a nei lo a si lo maw?
6 Ziangahtile săn um loin na unaupawl hnen ihsin an thil pawng mi la in,
An hnipuan hlihsakin taklawngin na ret hai.
7 Caupawl hnenah in ding tidai na rak pe lo ih,
Rilrâwngpawl rawl na pe lo.
8 Asinan miralṭhapa in leilung a luah ih,
Cu tawkah upattlak pa a cêng.
9 Nuhmeipawl kut lawngin na tlungter hai ih,
Pa nei lo pawlih bân na khiahsak.
10 Curuangah thangpawl in nangmah an lo kulh,
Rinlopiih thleng ṭihphannak in simaw,
11 Thim in simaw a lo buaiter, cule khua na hmu thei lo ih,
Tidai tampi in a lo khuh.
12 «Pathian cu van a sannak ah a um a si lo maw?
Arsi sangbikpawl khi ziangtluk sâng an si ti zoh hnik aw!
13 Cule nang in, ‹Pathian in ziang a thei?
Thim thûkpi lakah thu a ṭhen thei ding maw?
14 Khawdur sahpipawl in amah an khuh ih, khua a hmu thei lo,
Cule van kûal tlunin a feh,› tiah na ti.
15 Misualrálpawl ih zawh mi,
Lamzin hlun cu na thlun ding maw?
16 An ṭohrampawl tiva in a fĕnhlo ih,
An tikcu kim hlanah hauthluk an si.
17 Annih in Pathian hnenah, ‹In tlansan aw!
Ziangkimtithei in an parah ziangso a tuah thei?› tiah an ti.
18 Cuticingcun Pathian in an innpawl thil ṭha in a khatter;
Asinan misualrálih thurawnpek cu ka hnen ihsin a hla a si.
19 «Midingfelpawl in cumi cu an hmu ih an lung a awi,
Cule mawh nei lo pawl in anmah cu an hnihsan:
20 ‹Thungaiten kan doralpawl cu hauthluk an si ih,
An thil tāngsŭnpawl khal mei in a kangrál ṭheh,› tiin.
21 «Amah thawn va rem aw uhla, remawten um uh,
Cule na hnenah thil ṭha a thleng ding.
22 A kâ ihsin nun zirhnak dawngsáwng hram awla,
A kamsuakthupawl na thinlung ah khawl aw.
23 Ziangkimtithei hnenih na kirsal asile, dĭnhngeh na si ding;
Na puanthlampawl ihsin mawhsualnak hla zetah na hlăwnhlo ding.
24 Cun na sui kha leivut ah na ret ding ih,
Na Ofir sui kha tivatepawlih lungtopawl lakah.
25 A si, Ziangkimtithei kha na sui le,
Na ngun hlú a si ding.
26 Ziangahtile Ziangkimtithei hnenah năwmawknak na nei ding ih,
Pathian hnenah na hmai na khaisâng ding.
27 A hnenah thla na cam ding ih,
Anih in a lo ngaithla ding,
Cule a hnenih na thutiampawl na tuahsuak ding.
28 Thutluknak khal na tuah ding ih,
Cumi cu na hrangah dĭnhngeh a si ding;
Cutin na lamzinpawl ah tleu a êng ding.
29 Annihpawl namthlak an si tikah, nang in, ‹Cawisannak a ra ding!› tiah na ti.
Cun Pathian in mităngdawr a rundam ding.
30 Anih in mawh nei lo a si lo mi hman a runsuak ding;
A si, anih cu nangmai kut thianfainak hmangin runsuah a si ding,»

tiah a ti.

23

Job in Pathian-ih Thuṭhennak Dingfelpawl a Phuang

1 Cun Job in a sâng ih:

2 «Tuihni hmanah ka phunzainak hi a khâ;
Ka aihramnak ruangah ka kut a rit.
3 A tonak hmun ih ka feh theinak dingah,
Khuitawk hmun ah amah ka táwng thei ding ti thei ningla maw!
4 A hmaiah ka thuhla ka thlĕn ding ih,
Ka kâ cu thuelnakpawl ka khatter ding.
5 In sannak ding ṭawngkampawl ka thei ding ih,
Ka hnenih a sim ding mi ka theithiam ding.
6 A huham nasazet thawn keimah i bei pei maw?
Bei hlah e! A hna i tŭn sawn ding.
7 Cu tawkah midĭng in amah thawn thu an ruattlang ding ih,
Thu in ṭhentu hnen ihsin kumkhuain runsuah ka si ding.
8 «Zoh hnik, hmai lamah ka feh, asinan anih cu a um lo,
Cule dung lamah ka kir, asinan amah ka theifiang thei lo.
9 Keh lamih hna a ṭuan tikah, amah cu ka hmufiang thei lo;
Vawrh lamih a her tikah, amah ka hmu thei lo.
10 Asinan anih in ka lamzin zawh mi a thei,
I hniksak tikah, sui vekah ka suak ding.
11 A kekarpawl ka ke in fekten a thlun,
A lamzin ka thlun ih ka pial lo.
12 A hmur ih thupek ka suahsan lo,
Ka ṭul mi rawl hnakin a kamsuakthupawl ka khawlkhawm sawn.
13 «Asinan amah cu mi danglamhleice a si ih, zo in so amah danglamter thei ding?
A thinlung ih duh mi pauhpauh a tuah.
14 Ziangahtile ka hrangih ruat mi a tuahsuak ih,
A hnenah cuvek thil tampi a um.
15 Curuangah a hmaiah ka thla a phâng,
Ka ruah tikah amah ka ṭih.
16 Ziangahtile Pathian in ka thinlung a cauter ih,
Ziangkimtithei in i thlaphângter;
17 Ziangruangahtile keimah cu thim hmaika ihsin danbĕt ka si lo ih,
Anih in ka hmai ihsin thim sahpi a thup lo,»

tiah a ti.

24

Leilung Tlunih Hrohrannak ruangah Job a Phunzai

1 «Ziangkimtithei in thuṭhennak tikcucān a thup fawn lo ih,
Ziangruangah so amah theitupawl in a nipawl an hmuh lo?
2 «Mi hrek in ramripawl an ṭhawn,
Râwng zetin rante rual an kai ih an ei;
3 Pa nei lo pawlih lākpawl an dawihlohsak;
Nuhmei câwcang kha thil pawngnak ah an laksak.
4 Lamzin ihsin mitlasampawl an tûlsuak;
Ram sungih mifarah hmuahhmuah hranhramih relhter an si.
5 Ngai hnik, annih cu nelrawn ih hramlak lākpawl vekin,
Rawl hawlih hnaṭuan dingin an fehsuak.
Ramṭhing in anmah le an fātepawl hrangah rawl a suah.
6 Ló ah ran rawl an khawm ih,
Misualrálpawlih sabit hmuan ah sabit rah hrelh mi an lakhawm.
7 Zan kha hnipuan loin, taklawngin an tuar ih,
Khawdai lakah sĭn ding an nei lo.
8 Annih cu tlang ruah in a cîarter ṭheh ih,
Beunak duh ruangah lungpi an pawm.
9 «Mi hrek in pa nei lo pawl an hnawi fawh lai an lawnsak ih,
Mifarahpawl hnen ihsin thil pawngnak an la.
10 Mifarahpawl hnipuan loin, taklawngin an fehter,
Cule annih in mirilrâwng hnen ihsin fângtelpawl an laksak.
11 An hruang sungah hriak an sawr ih,
Sabit sawrnak an cīlsak, cuticingcun an ti a hâl thotho.
12 Khawpi sungah mithi zikpawl an hrûm ih,
Hriamhma pupawl an ausuak;
Cuticingcun Pathian in annih cu sual a puh hai cuang lo.
13 «Anmah cu tleu dokalhtupawl an si;
Tleu lamzinpawl an thei lo ih,
Tleu zinpawl ah an kăwp fawn lo.
14 Laithattu cu khawfingcah ah a tho ih,
Mifarah le mitlasam a that;
Cule zan ah cun anih cu fifir vek a si.
15 Uire mit in thim hmulhmak a hngak,
‹Zawih mit hman in in hmu lo ding,› tiah a ti;
Cule ^aa hmai a tidanglam.
16 Thim ah innpawl an băuh ih, sun ah an kharkhumaw,
Tleu an thei lo.
17 Ziangahtile zing lam cu an hrangah thim mepmep vek a si;
Annih cun ṭihnungza thim mepmep kha an theifiang tuk.
18 «Annih cu tipi vangdâp parih fenlanter an si ding,
An covo cu leilung parah camsiat an si ding,
Cutin an sabit hmuanpawl lamzin ah zohman an piallut lo ding.
19 Khawkheng le khawsa in vur a tiralter vekin,
Sheol in thilsual tuahtupawl cu a lemrál hai.
20 Sūl in amah cu a hngilh ih,
Tholung in amah cu thaw zetin an ei ding;
Amah cu cīn ringring a si nawn lo ding ih,
Sualralnak cu thingkung vekih tisiat a si ding.
21 Ziangahtile anih in favun lo, micingpawl harsatnak a pe ih,
Nuhmei hrangah thil ṭha a tuah lo.
22 «Asinan Pathian in miralṭha kha a huham in a hnûkhlo;
A hung thosal, asinan zohman in a nung tengteng ding an ti ngam lo.
23 Anih in anmah cu ralmuannak a pe hai ih, cumi cu an rinsan;
Cuticingcun a mit cu an lamzinpawl ah a fu ringring.
24 Annih cu rei lo te sung khaisan an si,
Cule an rál.
Annih cu namthlak an si;
Mi dang vek thothoin lamzin ihsin lakhloh an si;
Fângvuipawl vekin an ro.
25 «Thungaiten, zohman in thuphan pertu ka si ti an langter thei lo ding ih,
Ka thusimpawl man nei lo ah an tuah thei lo ding,»

24:15^a a hmai a tidanglam: A ṭawng hrampi ah cun, «a hmai a khuh,» ti a si.

tiah a ti.

25

Bildad: Ziangtin Milai a Dingfel Thei Ding?

1 Cun Shuh-mi Bildad in a sâng ih:

2 «Uknak le ṭihzahnak cu Pathian ta an si;
Amai hmun sângpawl ah daihnak a tuah.
3 A ralkappawl siar cawk an si maw?
Zo parah so a tleu tlâng loih a um?
4 Ziangtin minung cu Pathian hmaiah a dĭngfel thei ding?
Asilole ziangtin nunau hrin mi cu a thiangfai thei ding?
5 Thlapi hman a êng lo ih,
Arsipawl hman a mit hmuhih an thianfai lo a si ahcun,
6 Tholung a si mi minung le,
Pangāng a si mi milai fapa cu ziang tlukin so a fai lo sinsin ding?»

tiah a ti.

26

Job: Milai Santlaihlonak le Pathian Cungnunnak

1 Asinan Job in a sâng ih:

2 «Huham a nei lo tupa kha ziangvekin so na băwm?
Cahnak a nei lo mi bān kha ziangvekin so na run?
3 Fimnak a nei lo tupa kha ziangvekin so thurawn na pek?
Ziangvekin so mi tampi hnenah a ṭhahnem mi ruahnak na pek?
4 Zo hnenah so ṭawngkampawl na simsuak ih?
Zo-ih thlarau so na hnen ihsi ra suak?
5 «Tipi tăngih a um mipawl le cutawk luahtu,
Mithipawl an khūr.
6 Pathian hmaiah Sheol cu taklawngin a um ih,
^aAbaddon cun khuh a nei lo.
7 Anih in boruak lawng tlunah sak lam a pharh;
Leilung cu zianghmanlo parah a khai.
8 Amai khawdur sahpi sungah tidai a funkhawm ih,
Cumi tăngah khawdurpawl cu an păwp lo.
9 Anih in a laltokham hmai cu a khuh ih,
Cumi tlunah a khawdur a pharh.
10 Tleu le thim ramri ah,
Tipi vangdâp parah kualpûm a rîn.
11 Van ṭhuampawl an khūr ih,
A kawknak ah an khawruah a har.
12 A huham in tifinriat a căwktho ih,
A theihthiamnak in ^bRahab a siatter.
13 A Thlarau in vanpawl a ceimawi,
A kut in rul tlân lai a dawttlăng.
14 Ngai hnik, hipawl cu a thil ti mipawl lakih a zimte men lawng an si ih,
A thuhla kan theih mi hi a va tenau em!
Asinan a huham khawri thâwm cu zo so theithiam thei ding?»

26:6^a Abaddon: Siatralnak tinak a si.

26:12^b Rahab: 9:13 simfiangnak zoh aw.

tiah a ti.

27

Job in a Felfainak a Kaihnget

1 Cuihtlunah Job in a thusim mi a peh ih:

2 «Ka diknak lahlotu Pathian le,
Ka nunnak tuarhartertu Ziangkimtithei, a nun rori vekin,
3 Ka sungih ka thaw a um sung le,
Ka hnar sungih Pathian thaw a um sung cu,
4 Ka hmur in sualralnak a ṭawng lo ding ih,
Ka lei khal in mi bumnak a ṭawngsuak lo ding.
5 Nannih nan dik ka lo ti ding cu ka hnen ihsin hla seh,
Ka thih tiang ka hnen ihsin ka felfainak cu ka thlah lo ding.
6 Ka dingfelnak ka kaihnget ding ih, ka thlah lo ding,
Ka nunsung hmuah in ka thinlung in i mawhthluk lo ding.
7 «Ka ral cu misualrál vek si sehla,
I dotu cu midingfel lo vek si seh.
8 Ziangahtile Pathian in midepdepaih nunnak lâksakin,
A sahtansak a si ahcun,
A hrangah ziang ruahsannak so a um ding?
9 A parih buainak a thlen tikah,
Pathian in a aunak a ngaithla pei maw?
10 Anih cu Ziangkimtithei parah a nuamaw pei maw?
Pathian a ko tlaitluan pei maw?
11 «Pathian kut thuhla ka lo zirh ding,
Ziangkimtithei hnenih um mi cu ka thup lo ding.
12 Thungaiten cumi cu nan zaten nan rak hmu;
Ziangruangah so thulolak menih nan nun?
13 «Himi hi Pathian hnen ihsi misualrálpaih covo a si ih,
Ziangkimtithei hnen ihsi palbĕttupawlih co mi ro cu a si.
14 A fātepawl an karhzai asile, cumi cu ralnâm hrangah a si,
Cule a cikuang cu rawl an khăwpkham lo ding.
15 A mitangsŭnpawl cu an thi ding ih, phum an si ding.
A nuhmeipawl an ṭap lo ding,
16 Anih cun leivut vekin ngun pengkhawm in,
Tlăk vekin hnipuan a thuahthuahin ret hmansehla,
17 Anih in pengkhawm hmansehla, cumi cu midik in a hruk ding,
Cule mawh nei lo pawl in a ngunpawl cu an ṭhenaw ding.
18 Maimăwm bangin a inn a sak,
Ralvengtu ih sak mi deuthlam bangin.
19 Lian zetin a it,
Asinan zianghman a keng lo;
A mit a hun meng ih,
Cucu a um nawn lo.
20 Ṭihnungzapawl in tilian bangin amah cu an cîm,
Thlisia in amah cu zan ah a thiarhlo.
21 Nisuahnak lam thli in amah cu a hrănhlo ih, a hlo,
Cuih thli cun a umnak hmun ihsin a phiathlo.
22 Thli in amah cu a nuai ih a zuah lo,
Anih cu thli thiltitheinak ihsin beidawng zetin a tlân.
23 A za a benghnawh ding ih,
A umnak hmun ihsin a heheu ding.

28

Fimnak Thuhla ih Job Thusim

1 «Thungaiten ngun laihnak khur a um ih,
Sui thianfainak hmun a um.
2 Thir cu leilung ihsi laksuah a si ih,
Dar cu lung ihsin rawhtit a si.
3 Milai in thim a cemter ih,
Lung cu thim le thim mepmep kĕlkawm kip tiangin a hawl.
4 Anih in milai umnak thawi a hlatnak ah lungkhur kua a laipăwp;
Ke ih fehpawl ih an hngilhnak hmun ah, milai umnak hmun ihsi hla zetah thlai in, khat lam le khat lamah an sēp.
5 Leilung bélte cu, amah ihsin rawl a suak,
Asinan a thuai cu meisa ih lehter vekin a letaw rero.
6 A lungtopawl cu safaira lung suahnak hrampi a si ih,
Sui dipnâwi khal an tel.
7 Cuih zin cu vâte in a thei lo ih,
Khauva mit khal in a hmu dah lo.
8 Cumi cu kiosa puarthau in a pál dah lo ih,
Kiosa hrâng khal in a paltlăng dah lo.
9 Anih in a kut cu ṭêklung parah a ret,
Tlangpawl kha an ṭhumawknakpawl ihsin a linglet ṭheh.
10 Lungtopawl lakah tiluannak a tuah ih,
A mit in thil hlú tinkim a hmu.
11 Tihnapawl pût thei lo dingin a phit,
Thuh mi cu tleu ah a suah.
12 «Asinan fimnak cu khuiah so hmuh theih a si ding?
Theihthiamnak umnak hmun cu khuiah so a si?
13 Milai in fimnak hlutzia a thei lo ih,
Cumi cu a nungdam mipawlih ram khalah hmuhsuah a si lo.
14 Ti thûkpi in, ‹Keimah ah a um lo,› tiah a ti;
Tifinriat in, ‹Ka hnenah a um lo,› tiah a ti.
15 Fimnak cu sui ih thleng theih a si lo ih,
A man ah ngun khīngkhai theih a si lo.
16 Cumi cu Ofir sui thaw khalin a man khiah theih a si lo,
Onik lung mankhung asilole safaira lung mankhung thaw khalin a man khiah theih a si lo.
17 Sui asilole krisṭal lung in a tluk thei lo ih,
Sui ṭha ih tuah mi thil thaw khalih thleng theih a si lo.
18 Koral le krisṭal pawl cu reltlak an si lo,
Fimnakih man cu rubi lungpawl hnakin a sângsawn.
19 Kush topaz khal in a tluk thei lo ih,
Sui hlirhlăng man khal in a tluk lo.
20 «Cuti asile fimnak cu khuitawk ihsin a ra?
Theihthiamnak hmun teh khuitawkah a si?
21 Cumi cu a nung mi hmuahhmuah mit ihsin thuh a si ih,
Tlun zuang vâtepawl hnen ihsi khalih khuhhlo a si.
22 ^aAbaddon le Thihnak in,
‹Cuih thu an sim mi cu kan hna in kan thei,› tiah an ti.
23 Pathian in cumiih lamzin a thei ih,
A umnak hmun khal a thei.
24 Ziangahtile Pathian in leilung tawpnak thlengin a zoh ih,
Van rāng tăng hmuahhmuah a hmu ṭheh,
25 Thli hrangah rihnak pe in,
Tipi cu thil tahnak hmangih a ṭhen tikah,
26 Ruah hrangih dān le,
Ṭêk hrangih zin a tuah tikah,
27 Anih in fimnak a rak hmu ih, cumi cu a thăn;
Fimnak kha a timtuah, a si, a hmuhsuak.
28 Cule milai hnenah anih in,
‹Ngai hnik, Bawipa ṭihzah cu fimnak a si ih,
Thil ṭhalo tlansan cu theihthiamnak a si,› a ti,»

28:22^a Abaddon: Siatralnak tinak a si.

tiah a ti.

29

Job-ih Humawknak Netabik

1 Job in a thusim a pehbêt ih:

2 «Maw, a liam cia mi thlapawl ah rak um in,
Pathian in i rak kilven lai nipawl bangkhan;
3 Ka lu parih a meito a en lai le,
A tleu hmangih thim lakih ka feh laiah khan;
4 Ka no lai cān ih ka si vek khan,
Ka puanthlam tlunih Pathian in in duhsak zetih in kăwmnak a um laiah khan;
5 Ziangkimtithei ka hnenah a um ih,
Ka fātepawl ka kimvelih an um laiah khan,
6 Ka kepawl hnawikhăl in a khawlh ih,
Tivapawl vekin lungpi in ka hrangah hriak a thletbŭng laiah khan,
7 «Khawpi ihsin kăwtka ah ka feh ih,
Tokhawmnak mual ih ka to laiah khan,
8 Tlangvalpawl in in hmu ih an relh,
Cule kum upapawl an tho ih an ding;
9 Mipawimawhpawl an ṭawng an cawl ih,
An kut in an kâ an hup;
10 Mizahumpawlih aw a dim ih,
An lei an sangkhâr ah a bĕt.
11 An hna in a theih tikah, annih in thlawsuah in pe,
Cule in hmuh tikah, annih in in fak;
12 Ziangruangahtile băwmnak dil ih a ausuak mi mifarah ka rak runsuak,
Pa nei lo le bawmtu nei lo pawl khal.
13 Mithi zik paih thlawsuahnak ka parah a thleng ih,
Aipuan ruangah nuhmei thinlung hla sak ko ka tuah.
14 Dingfelnak ka hruh ih, cumi in in thuam;
Ka diknak cu kâwrfual le lupâwng vek an si.
15 Mitcaw hrangah mit ka si ih,
Kebái hrangah ke ka si.
16 Mifarah hrangah pa ka si ih,
Ka theih lo mi hrangah thubuai ka hawlsuahsak.
17 Misualrálih hopawl ka khiak ih,
A ha ihsin a sa deh mi ka laksak.
18 «Cun kei in, ‹Ka bu sungah ka thi ding ih,
Ka nipawl vunnel tlukin ka tamter ding.
19 Kan hram cu tipi lam tiangin a zâm,
Cule ka hngeṭêk parah zanvar dai a tla.
20 Ka ropitnak ka sungah a thar ringring ih,
Ka kut ah ka thál cu thartersal a si,› tiah ka ti.
21 «Milaipawl in in ngaithla ih in hngak,
Cule ka thurawnpek lamah daiten an um.
22 Ka ṭawng hnuah cun an ṭawngsal nawn lo ih,
Ka thusim mi cu an parah dai vekin a tla.
23 Annih in ruahti vekin in hngak ih,
Ṭhâl tāwp ruah hngakhlap vekin, an kâ kau pin an âng.
24 An zum lo tikah, ka hnihsan hai,
Annih in ka hmel tleu an hloter lo.
25 An hrangah lamzin ka hril ih, an lubik vekin ka to;
Miaihrampawl hnemtu vekin,
Ralkappawl lakah siangpahrang vekin ka cêng.

30

1 «Asinan keimah hnakih nautapawl in in hmuhsuam.
An palepawl cu ka rante rual kilvengtu uicopawl lak hmanih ka telter duh lo mipawl an si.
2 A si, an kut cahnak cu ka parah ziang a ṭhahnem?
An thazang a cem.
3 Annih cu tlaksăm le rilrawn ruangah an ṭawl ṭheh,
A lawnglak mi le a kawlh mi ramṭhing ah tlaikhawhnupi ah an tlân,
4 Hrambûr lakah hnahnêm an ṭăwt ih,
Rawl ah hmunphiah kung hrampawl an ring.
5 Milai lak ihsin dawisuak an si,
Fifir vekin an auh.
6 Annih cu lungpi kuampawl ah an um,
Lei kua le lung kua pawl ah.
7 Hrambûr lakah an ai,
Hlingpawl tăngah an umkhawm.
8 Annih cu mi-â cithlah an si,
A si, ziang hmanih siar lo cithlah an si;
Annih cu an umnak ram ihsi vuaksuak mi an si.
9 «Cule atu ah kei cu an hnihsan mi ka si,
A si, kei cu an puahcăwk mi ka si.
10 In fih ih, ka hnen ihsi hlatpi ah an um;
Ka hmaiih cilphui an hreh lo.
11 Pathian in a thálhri a thlah ih i nater,
Annih in ka hmaiah an kâkharh an phawih.
12 Ka kut vawrh lamah mino sualrálpawl an tho;
Ka ke an tûlhlo ih,
Anmai siathlohralnak lamzinpawl keimah dokalhin an dĭn.
13 Annih in ka zin an tisiat,
Ka vanduainak an hlawkpi;
Bawmtu zohman an ṭul lo.
14 Băl mi kaw kaupi ih luh vekin an lut;
Siatnak lakah an rung rīl.
15 Ṭihnungzapawl ka parah an ra thleng;
Thli vekin upat ka sinak an dawi ih,
Mero bangin ka hmuingilnak a hlo.
16 «Cule atu ah ka vansanglamnak ruangah ka thinlung cu thletbŭng a si;
Zăwnzaihnak nipawl in in kaibĕt.
17 Ka ruhpawl cu zan ah ka sungah an na tuk ih,
Ka nat ih in ṭamnak hi cawlh ti a um lo.
18 A cak tuk mi huham in ka sinfen a siatter;
Cumi cun ka kâwrcung hngawng vekin i ṭawn.
19 Anih in ciarbêk lakah i hlăwn ih,
Leivut le vutcâm vekah ka cang.
20 «Na hnenah ka ausuak, asinan nang in i sâng lo;
Ka hung ding ih, nang in i ngaihsak lo.
21 Nang cu ka parah na nun a râwng;
Na kut cahnak in in tiduhdah.
22 Nang in thli lakah i cawisâng ih a parah i toter;
Thlipi lakah i riarálter.
23 Ziangahtile nunnak nei hmuahhmuah hrangih ruat cia mi inn ah le,
Thihnak ah in hruai ding ti ka thei.
24 «Pathian in a siatsuah tikih an ausuak asile,
Thilsia penkhawmnak dokalhin a kut a suah hrimhrim lo ding.
25 Buainak a táwngtupa hrangah ka ṭap a si lo maw?
Mifarah hrangah ka thin a na ṭheu a si lo maw?
26 Asinan thil ṭha ka beisei tikah, ka parah thil ṭhalo a thleng;
Cule tleu ka hngak tikah, thim a ra thleng.
27 Ka thin a buai ih a cawlhahdam thei lo;
Zăwnzaihnak nipawl in in pan.
28 Dum tialtialin ka vakkûal, ni sa ruangih dum ka si lo;
Punkhawmnak ah ka ding ih, băwmnak dilin ka ausuak.
29 Kei cu cinghniapawlih unau le,
Kalauk vapawlih hawipi ka si.
30 Ka vun a hung dum ih an hâwk;
Ka ruhpawl cu a săt ruangah an kāng.
31 Ka ṭingṭang cu lusûnṭahnak ah a cang ih,
Ka lemlawi cu a ṭap mipawlih aw ah.

31

1 «Ka mit thawn thukham kan tuah;
Ziangahso fala ka zoh ding?
2 Ziangahtile tlun lam ihsin Pathian lakih covo le,
A sannak hmun ihsin Ziangkimtithei lakih ro cu ziang a si?
3 Misualrál hrangah cun siatralnak siin,
Mawhsualnak a tuahtupawl hrangah cun vansiatnak a si lo maw?
4 Anih in ka lamzinpawl hmu in,
Ka kekar hmuahhmuah a siar ṭheh a si lo maw?
5 «Umze nei loih ka feh asile,
Asilole mi bum dingih ka ke a hmanhmawh asile,
6 Tlaitluannak cuai thawn thlai si nîng,
Cuticun Pathian in ka felfainak a thei ding.
7 Ka kekar cu lamzin ihsin a pial asile,
Asilole ka mit dung thlunih ka thinlung a feh asile,
Asilole ka kut ah thil bāl pakhat khat a kai asile,
8 Kei in tuh ningla, mi dang in ei hai seh;
A si, ka thlai kungpawl phawithat si hai seh.
9 «Ka thinlung in nunau a ît ih,
Ka innhnen sângka in ka bawhthup asile,
10 Ka nupi in mi dang riallung rial sehla,
A parah mi dang băwk hai seh.
11 Ziangahtile cuvek cu sualralnak a si;
A si, cumi cu thuṭhensaktlak mawhsualnak a si.
12 Ziangahtile cumi cu ^aAbaddon tiangih kangráltu meisa a si ih,
Ka thil pungṭhang hmuahhmuah a hram in phawi a si ding.
13 «Ka parih an phunzai tikah,
Ka siahhlawhpa asilole ka siahhlawhnuih thuhla ka ngaihsak lo asile,
14 Pathian a căngvaih tikah ziang ka tuah pei?
Anih in cawhkuan a pek tikah, ziangtin ka sâng ding?
15 Sūl sungih i tuahtu khan anih khal a tuah ve a si lo maw?
Sūl sungih in dĭn veve tu cu amah a si lo maw?
16 «Mifarahpawl ih thil duh mi ka khambĕt asile,
Asilole nuhmei mithmai se dingih ka tuah asile,
17 Asilole pa nei lo pawl in ei ve loin,
Keimah lawngin ka rawl ka ei asile
18 (Asinan ka no lai ihsin pa vekin amah cu ka kilkhawi ih,
Ka nauhak lai ihsin nuhmei cu ka kaihruai);
19 Hnipuan tlaksăm ruangih hlorál pakhat khat,
Asilole tuamawknak nei lo mifarah pakhat khat ka hmuh asile;
20 A thinlung in thlawsuah i pe loin,
Ka tuu hmul thawi a hlum lo asile,
21 Kăwtka ah bawmtu ka nei ti ka hmuh ruangih,
Pa nei lo pawl dokalhin ka kut ka hawi asile,
22 Ka liang ihsin ka bân tla seh,
Ka bān cu ka liangdar ihsin thlawng seh.
23 Ziangahtile Pathian hnenih a ra mi siatralnak cu ka hrangah ṭihnungza a si ih,
Amai ropitnak ruangah ka tuarsuak thei lo.
24 «Sui parih ka rinsanawknak ka ṭhum asile,
Asilole sui ṭha cu ka ṭhumawknak a si ka ti asile;
25 Ka neihnunnak a natsat ruangah le,
Ka kut in lennak tampi a ngah ruangih lungawiaipuangih ka um asile;
26 Ni a tlan lai,
Asilole thlapi vânglai ka zoh asile,
27 Cutin ka thinlung in athupten a ît ih,
Ka kâ in ka kut a hnăm asile;
28 Himi khal hi thuṭhensaktlak mawhsualnak a si,
Ziangahtile cumi cu cung Pathian hnáwng ka si ding.
29 «I huatupaih siatralnak parah lungawiaipuangin ka um maw si?
A parah vansiatnak a tlak tikah aipuangin ka um maw si?
30 A nunnak parih camsiatnak thleng dingih dil dingin,
Ka kâ cu thilsual tuah ding ka siang lo.
31 ‹A rawl khăwpkham dah lo mi pakhat zo in so hmusuak thei ding?› tiah ka puanthlam ih um mipawl in an ti lo maw si?
32 Khualtlawng hrangah ka sângka ka ăwnsak ruangah,
Mikhual zohman lengah an riak lo.
33 Ka mawhsualnak ka ṭāng sungih thuhnak in,
Adam vekin ka dānpahbălnakpawl ka khuhhlo maw si?
34 Mipi tam zet ka ṭih ruangah le,
Sungkuapawl ih nautat ka phan ruangah,
Daiten um in,
Leng ka suak lo.
35 I ngaithlatu ding mi pakhat nei ningla maw!
Hihi ka hminsinnak a si.
Ziangkimtithei in i sâng in,
Ka doral in cazual ngan sehla cu maw!
36 Thungaiten cumi cu ka liang parah ka phur ding ih,
Lallukhum vekin cumi cu ka parah ka ṭem ding.
37 Pathian hnenah ka kekar zât ka thăn ding;
Uktu vekin amah ka pan ding.
38 «Keimah dokalhin ka ram ausuakin,
A lei hrut kuarpawl an ṭaptlang asile;
39 Cumiih ^brah cu paisa loin ka ei,
Asilole a neitupawlih nunnakpawl ka hlohter pang asile,
40 Sangvut aiah hling le,
Barli sangvut aiah hrampi kho seh,»

31:12^a Abaddon: Siatralnak tinak a si.

31:39^b rah: A ṭawng hrampi ah, «cahnak» ti a si.

tiah a ti.

Job-ih ṭawngkampawl a cem.

32

Elihu in Job-ih Rualpipawl a Kalh

1 Cule hi mi pathum pawl cun Job cu an sâng nawn lo, ziangruangahtile anih cu amai mithmuhah midingfel a si. 2 Cun Ram-ih sungkua, Buz-mi Barakhel fapa, Elihu-ih thinlingnak cu Job parah a tho; Pathian hnakin amah le amah thiam a coawter ruangah a thinlingnak a thawhnak a si. 3 A rualpi pathum par khalah a thinlingnak a tho, ziangruangahtile sannak an hmusuak thei lo, cuticingin Job kha thiam lo an coh.

4 Amah hnakin annih cu an upatsawn ruangah, Elihu in Job hnenih a ṭawng ding a hngak. 5 Elihu in hite mi pathum kâ ah sannak a um lo ti a hmuh tikah, a thinlingnak cu a tho.

6 Cule Buz-mi, Barakhel fapa, Elihu in a sâng ih:

«Kei cu kum in ka nauta ih, nannih cu nan upa tuk;
Curuangah ka ṭih ih, ka ruahnak khal ka rel ngam lo.
7 ‹Kum in thurel sehla,
Kum tam in fimnak zirh seh,› tiah ka ti.
8 Asinan minung sungah thlarau a um ih,
Ziangkimtithei-ih thaw in anmah cu theihthiamnak a pe.
9 Kum tam pawl hi an fim cuang lo ih,
Kum upat ruangah diknak an theihthiam cuang lo.
10 «Curuangah kei in, ‹I ngaithla uh,
Kei khal in ka ruahnak ka rel ve ding,› tiah ka ti.
11 Ngai hnik, nan ṭawngkampawl ka hngak,
Nan rel ding mi nan hawl sungah, nan thuruahrel mipawl ka ngaithla.
12 Ṭhaten nan thu ka ngaithla;
Cule ngai hnik uh, zohman in Job nan hmĭn lo,
Nan lakih mi pakhat hman in a ṭawngkampawl nan sâng thei lo;
13 Culole, ‹Fimnak kan hmungah zo,
Anih cu milai in si loin, Pathian in a duaiter ding,› tiah nan ti pang ding.
14 Anih in a ṭawngkampawl in keimah i sawh lo;
Nan ṭawngkampawl hmangin amah cu ka sâng lo ding.
15 «Annih cu an mang a bang ih an sawn nawn lo;
Ṭawng ding an nei nawn lo.
16 Cule an ṭawng lo ruangah, kei in ka hngak,
Ziangruangahtile daiten an ding men ih an sangbêt nawn lo.
17 Kei khal in ka san ding tawk ka sâng ding,
Ka ruahdān ka rel ve ding.
18 Ziangahtile kei cu thurel ding mi in ka khat,
Ka sungih thlarau in in tur.
19 Ngai hnik, ka pum cu suahnak kaw nei lo, sabitzu vek a si;
Sabitzu thâwl thar puakkuai zik vek a si.
20 Ka thawven theinak dingah ka ṭawng ding;
Ka hmur ka kau ding ih, ka sâng ding.
21 Zawih hnen hmanah thleidănnak langter hram hlah ning;
Cun zohman fakder fawn hlah ning.
22 Ziangahtile mifakderdān ka thiam lo,
Culole i tuahtu in i lahlo lohli pang ding.

33

Elihu in Job a Kalh

1 «Asinan Job, ka sim mi hi na hna in thei hram awla,
Ka ṭawngkam hmuahhmuah hi ngaithla aw.
2 Atu ah cun ka kâ ka âng;
Ka kâ sungih um ka lei a ṭawng.
3 A dĭng mi ka thinlung ihsin ka ṭawngkampawl an ra suak;
Ka hmur in theihnak dik zetin a ṭawngsuak.
4 Pathian Thlarau in i rak tuah ih,
Ziangkimtithei thaw in nunnak i pe.
5 Na ti thei asile, i sâng aw,
Keimah dokalhin timtuah aw,
Ṭanla aw.
6 Ngai hnik, Pathian hmaiah nang le kei kan dinhmun a bangaw;
Kei khal tlăk thawi tuah mi ka si.
7 Ngai hnik, ka hnen ihsin ziang ṭihnak hmanin a lo thlaphângter lo ding ih,
Na parah ka kut a rit fawn lo ding.
8 Thungaiten ka hnatheihah na ṭawng ih,
Na ṭawngkampawlih thâwm hna in ka thei:
9 ‹Kei ka thiangfai, dānpahbălnak ka nei lo;
Mawh nei lo ka si ih, keimah ah mawhsualnak a um lo.
10 Pathian cun keimah dokalhin cān remcâng a hmu thotho,
A ral vekah i ruat.
11 Ka ke hreng a sŭt,
Ka zinpawl hmuahhmuah a vilveng,› na ti.
12 «Zoh hnik, himi ah cun na dik lo.
Ka lo sâng ding,
Ziangahtile Pathian cu milai hnakin a ropisawn.
13 Ziangruangah so amah dokalhih na phunzai?
Ziangahtile Pathian in a hnaṭuan hmuahhmuah thuhla ah zawih hnen hmanah a săn a rel lo.
14 Ziangahtile Pathian in vei khat, asilole vei hnih a ṭawng,
Cuticingin, cumi cu zohman in an thei lo.
15 Mang ah, zan ih larawknak ah,
Milai parih thithlĕp an ihthah laiah,
An ihkhun parih an ih thluahthlo laiah,
16 Cu laiah milaipawlih hna a ăwnsak hai ih,
An nunsimawknak a kharkhumsak hai.
17 A thil ti mi ihsin milai a kirsalter theinak dingah le,
Milai hnen ihsin a hngalnak a khambĕt theinak dingah,
18 A thlarau cu Khur ihsin le,
A nunnak cu ralnâm hmangih hlohralnak ihsin Pathian in a kilhim.
19 «Milai cu a ihkhun parah natnak in nunsim a si fawn ih,
A ruhpawl ah bâng loin natnak a um.
20 Cutin a nunnak in rawl a fih ih,
A thinlung ih a duh zet mi rawl khal.
21 A titsa cu mithmuhnak ihsin an rálhlo ih,
Hmuh dah lo mi a ruhpawl an lang.
22 A si, a thlarau in Khur a naih deuhdeuh ih,
A nunnak in mi thattupawl.
23 «Milai hnenih a dĭngnak theifiangter dingah,
Thawngkhat lakah pakhat, remnak palai,
A hrangih thuphurtu a um asile,
24 A parah zangfahnak a nei ding ih, a hnenah,
‹Khur sungih liam rero pa kha runsuak uh,
Tlennak man ka hmu zo,› tiah a ti.
25 A titsa cu nauhakteih ta bangin a no ding ih,
A no lai cān ah a kirsal ding.
26 Anih cu Pathian hnenah thla a cam ding ih,
Pathian cu a parah a lung a si ding,
Pathian hmel cu aipuang zetin a hmu ding,
Ziangahtile Pathian in milai hnenah a dingfelnak a pesal.
27 Cun cu pa in minungpawl a zoh hai ih,
‹Thilsual ka rak tuah ih, a dik mi ka rak merhkâwi,
Cule cumi cu ka hrangah a ṭhahnem lo,› tiah a ti.
28 Pathian in a thlarau Khur sungih liam ding cu a tlen ding ih,
A nunnak in tleu a hmu ding.
29 «Ngai hnik, hi thil hmuahhmuah hi Pathian in milai hrangah vei hnih, vei thum a tuah.
30 Khur ihsin a thlarau hruaikirsal dingah,
Nunnak tleu ih a tlet theinak dingah a si.
31 «Job, na hna tháwng aw, i ngaithla hnik aw;
Daiten um aw, cule ka ṭawng ding.
32 Sim ding na neih asile, i sâng aw;
Ṭawng aw, ziangahtile thiamlo coter ka duh.
33 Cuti asilole, i ngaithla aw;
Daiten um aw, cule fimnak ka lo zirh ding,»

tiah a ti.

34

Elihu in Pathian Diknak a Phuang

1 Elihu in a sâng ih:

2 «Nannih mifimpawl, ka ṭawngkampawl hi ngaithla uh;
Nannih theihnak neipawl, keimah lamah hna tŭn uh.
3 Ziangahtile dang in rawl a teh vekin,
Hna in ṭawngkampawl a hniksak.
4 Kanmai hrangah diknak hril uhsi,
Kanmah lakah a ṭha mi ziang a si ti thei uhsi.
5 «Ziangahtile Job in, ‹Keimah cu midingfel ka si,
Asinan Pathian in ka diknak a hlăwn;
6 Ka diknak thuhla ah thuphan ka sim ding maw?
Dānpahbălnak nei lo mi ka si ko nân, ka ^ahriamhma cu tidam theih ci a si lo,› tiah a ti.
7 Job vek milai cu ziangso a si,
Mi hmuhsuamnak cu tidai vekih intu,
8 Mawhsualnak tuahtupawl kăwptu le,
Misualrálpawl thawi fehtlangtu cu?
9 Ziangahtile anih in, ‹Pathian lamih a năwmawknak cu
Milai hrangah zianghman a ṭhahnem lo,› tiah a ti.
10 Curuangah nannih theihthiamnak neitupawl, i ngai hnik uh:
Pathian in sualralnak a tuah ding le,
Ziangkimtithei in mawhsualnak a tuah ding cu a hla tuk a si.
11 Ziangahtile Pathian in milai cu amai hnaṭuan bangtukin a lehrūl ih,
A lamzin zawh mi vekin lawmman hmu dingin milai a tuah.
12 Pathian in ziang tik hmanah sualrál zetin thil a ti dah hrimhrim lo ding ih,
Ziangkimtithei in diknak a merhkâwi dah fawn lo ding.
13 Zo in leilung parih ṭuanvo cu Pathian a pe?
Asilole amah cu zo in leitlun pumpi hrangah mawhphurhnak a pe?
14 Anih in leilung parah a thinlung retin,
Amai Thlarau le a thaw a laksuah a si ahcun,
15 Nunnak nei hmuahhmuah cu hmunkhatah an thi ding ih,
Milai cu leivut ah a kirsal ding.
16 «Theihthiamnak na neih asile, hihi ngaithla aw;
Ka ṭawng thâwmpawl hi ngai aw:
17 Diknak huatu in a uk ding maw?
Midikbik cu thiam lo na coh ding maw?
18 Anih cun siangpahrang hnenah, ‹Nang cu misantlailo na si,› tiin le,
Mizahumpawl hnenah, ‹Nannih cu misualrál nan si,› tiah a ti.
19 Anih cu mipawimawhpawl hnenah thleidăn a nei lo ih,
Mifarahpawl hnakin milianpawl a ngaihsak cuang fawn lo;
Ziangahtile annih cu a kutsuak hlir an si.
20 Annih cu rei lo teah an thi, zan laifangah;
Milaipawl cu khurhter an si ih an hlorál.
Micakpawl cu kut tel loin lâkhloh an si.
21 «Ziangahtile a mit cu milai lamzinpawl ah a fu ih,
A kekar hmuahhmuah a hmu ṭheh.
22 Mawhsualnak tuahtupawl an thuhawk theinak ding hmun,
Thim le thim mepmep a um lo.
23 Ziangahtile thuṭhen dingah Pathian hmaiih feh dingin,
Pathian in milai a ngaihtuahbêt a ṭul lo.
24 Anih in micakpawl cu an thu zingzăwi loin a khuaidip ṭheh ih,
Mi dangpawl kha anmai hmun ah a ret hai.
25 Curuangah anih in an hnaṭuanpawl a thei;
Zan ah anmahpawl cu a hlăwn hai ih,
Annihpawl cu an kûai thluh.
26 Anih in mi dangpawlih mithmuhah annih cu misualrálpawl vekin a vuak hai.
27 Ziangruangahtile a hnen ihsin an kirsal ih,
A lamzinpawl pakhat hman an ngaihtuah lo,
28 Cutiin annih in mifarahpawlih ṭahnak amai hnenah an thlengter;
Ziangahtile anih in mizawnzaipawlih ṭahnak a thei.
29 Anih cu daiteih a um tikah, zo in sual a puh thei ding?
Cule miphun pakhat maw, mi pakhat lawng simaw dokalhin,
A hmel a thuh tikah, zo in so amah cu hmu thei ding?
30 Midepdepa in uk hlah seh,
Mipi hrangah tháng si hlah seh.
31 «Ziangahtile mi pakhat khat in Pathian hnenah,
‹Nunsimnak ka tuar;
Ka sual nawn lo ding;
32 Ka hmuh lo mi i zirh aw;
Mawhsualnak ka rak tuah asile, ka tuah nawn lo ding,› tiah a ti dah maw si?
33 Cumi cu nang in na hnawn ruangah,
Anih in nangmai ruahdān bangtukin a lo lehrūl ding maw si?
Nangmah in na hril tengteng pei, kei si loin;
Curuangah na theih mi rel aw.
34 «Theihthiamnak nei minungpawl in kan hnenah in sim,
Keimah i ngaithlatu mifim in:
35 ‹Job in theihnak nei loin a ṭawng,
A ṭawngkampawl cu fimnak tel lo an si,› tiah ti seh.
36 Job cu a vawrtawp tiangih hniksak si sehla maw!
Ziangruangahtile a thusannakpawl cu misualrálpawl thusannak vek an si.
37 Ziangahtile anih in a sualnak ah helnak a bêt;
Kan lakah a kut a bēng ih,
Pathian dokalhin a ṭawngkam a tam,»

34:6^a hriamhma: A ṭawng hrampi ah, «thálfung» ti a si.

tiah a ti.

35

Elihu in Mai Dingfelnak Thiamlo a Coh

1 Cuihtlunah Elihu in a sâng ih:

2 «Hihi a dik tiah na ruat maw?
‹Pathian hnakin ka dingfelnak hi a nasasawn,› tiah na ti maw?
3 Ziangahtile nang in,
‹Cumi cu na hrangah ziang hlawknak so a si ding?
Thilsual rak tuah lo ta ningla teh, ziang ṭhathnemnak so ka hmuh cuang ding?› tiah na ti.
4 «Nangmah le na zawngih um na hawipipawl
Ka lo sâng ding.
5 Vanpawl zoh awla hmu aw;
Cule khawdurpawl zoh aw,
Cupawl cu nang hnakin an sângsawn.
6 Thilsual na tuah asile, Pathian dokalhin ziangso na hlĕnsuak?
Asilole na dānpahbălnakpawl punter an si ahteh, a parah ziangso na tuah?
7 Na dingfel asile, ziangso amah na pek?
Asilole anih in na kut ihsin ziang ngah mi a nei?
8 Na sualralnak in nangmah vek milai a khawihsia ih,
Na dingfelnak in minung fapa.
9 «Palbĕtnak a tam tuk ruangah annih cu an ausuak:
Micakpaih bān ruangah băwmnak dilin an ausuak.
10 Asinan zohman in,
‹Zan ih hlapawl i petu,
I Sersiamtu Pathian,
11 Leilung ramsapawl hnakih tam fimnak in petu le,
Van vâtepawl hnakih fimsawn ih in tuahtu cu khuiah so?› tiah an ti lo.
12 Cu tawkah miṭha lopawlih hngalnak ruangah an ausuak, asinan anih in a sâng hai lo.
13 Thungaiten Pathian in sullam nei lo thurel a ngaithla lo ding ih,
Ziangkimtithei khal in cumi cu a ngaihsak lo ding.
14 Nang in amah ka hmu lo na ti ko nân,
Diknak cu a hmaiah a um ih, amah na hngak tengteng ding a si.
15 Cule atu ah, a thinhengnak in dān a rak tat lo ih,
A atnak a hminsin lo ruangah,
16 Job cu sullam nei loin a kâ a âng;
Theihnak tel loin ṭawngkampawl a pungter,»

tiah a ti.

36

Elihu in Pathian Ṭhatnak a Phuang

1 Elihu cun a ṭawngpeh hrih ih:

2 «Malten i zāwi hrih awla,
Pathian aiawhih sim ding mi thupawl ka nei hrih ti ka lo hmuh ding.
3 A hlatnak ihsin ka theihnak ka la ding;
I Sersiamtu hnenah dingfelnak ka hlan ding.
4 Ziangahtile thungaiten ka ṭawngkampawl cu diklo an si lo;
Theihnak ih mifamkimpa cu na hnenah a um.
5 «Ngai hnik, Pathian cu micak a si, asinan zohman a nautat dah lo;
Anih cu theihthiamnak ah a nasa a si.
6 Misualrál nunnak a zuah lo,
Asinan palbĕt mi hnenah diknak a pe.
7 Midingpawl hnen ihsin a mit a lasal lo;
Asinan annih cu siangpahrangpawl thawn laltokham parah an totlang,
Ziangahtile Pathian in annih cu kumkhuain a toter hai ih,
Annih cu khaisan an si.
8 Cule annihpawl cu kol bunterin,
Zăwnzaihnak hridaipawl in hren an si le,
9 Anih in an hnaṭuan le an dānpahbălnakpawl a sim hai,
Puarthau zetin thil an rak tidanpawl khal.
10 Anih in nun zirhnak lamah an hna a vângter fawn ih,
Mawhsualnak ihsin hawikir dingin thu a pe.
11 Annih in a thulungin amah an rian asile,
An nipawl cu hmuingil zetin le an kumpawl cu nuam zetin an hmang ding.
12 Asinan a thu an lun lo asile,
Ralnâm in an hlorál ding ih,
Theihnak nei loin an thi ding.
13 «Asinan midepdepawl cun an thinlung ah thinlingnak an khawlkhawm;
Anih in anmah a ṭem hai tikah băwmnak dilin an au lo.
14 An no laiah an thi ih,
Sakhua hlawhhlângpawl lakah an nunnak a cem.
15 Anih in mifarahpawl kha an zăwnzaihnak in a runsuak hai ih,
Palbĕt an sinak in an mit a vângter hai.
16 «Anih cun hmuncêp ihsin, khuahkhirhnak umlonak hmun kaupi ah a lo hruaisuak;
Cule na cabuai parih an lo hŭn mi cu rawl ṭha hlir a si.
17 Asinan nang cu misualrálpawl thuṭhensak an si ding duhnak in na khat;
Thuṭhennak le diknak in a lo kai.
18 Mi va hmuhsuam dingin thinlingnak in a lo lēmngahlonak dingah ralring aw,
Cule nawhthuh tampi in lo pialter hlah seh.
19 Na lennakpawl,
Asilole na cahnak thapawl in,
Vansannak ihsin a lo kilhim thei ding maw?
20 Mi an umnak hmun ihsi sahtan an si tikah,
Zan cu hngakhlap hlah.
21 Fimkhur aw, mawhsualnak ah pial hlah,
Ziangahtile nang cun zăwnzaihnak hnakin himi hi na hril sawn a si.
22 «Ngai hnik, Pathian cu a huham in a khaisâng a si;
Amah vek zirhtu zo so um?
23 Zo in so a lamzin a ruatsak,
Asilole zo in, ‹Na tisual a si,› ti dah?
24 «Mi in hla ih an sak mi a hnaṭuan kha,
Cawisâng ding na si ti máng ringring aw.
25 Mi kip in cumi cu an rak hmu;
Milai in hlapi ihsin a hmu.
26 «Ngai hnik, Pathian cu a ropi ih, amah cu kan thei lo;
A kum zât khal hmuhsuah theih a si lo.
27 Ziangahtile anih in mero ihsin ruah ih a surter mi,
Tidai fawrpawl a hîpso,
28 Cumi cu khawdur in a fawrter ih,
Milai parah tampi in a sur.
29 Khawdurpawl pharhawkdan,
A deuthlam ihsin khawpi rîtdān zo in so theithiam?
30 Zoh hnik, anih in cumi parah a tleu a darhter ih,
Tifinriat thûkpawl a khuh.
31 Ziangahtile hipawl hmangin anih in miphunpawl thu a ṭhen;
Anih in rawl tampi a pe.
32 Anih in nimthlakau thawn a kut a tuam ih,
A hmuitin mi fuhngah dingin thu a pe.
33 Cuih awnthawm cun amai thuhla a rel,
Thlipi rung thleng cu sumhnámpawl khal in an langter.

37

1 «Himi khalah ka thin a khūr ih,
A umnak ihsin a khir.
2 Khawri vek a aw le
A kâ ihsi suak mi thâwm durdo cu ṭhaten ngai uh.
3 Anih in cumi cu van rāng tăng pumpi ah a thlahsuak,
A nimthlakau cu leilung dĕng tiangin.
4 Cuihhnu ah aw pakhat a thangsuak dumdo;
Anih in khawri vekin a aw maksak a suah ih,
A aw an theih tikah cuih nimthlakaupawl cu a sūp cuang lo.
5 Pathian in khawri vekin a aw mak zetin a suah,
Kan theihsuak thei lo mi thil ropipawl a tuah.
6 Ziangahtile anih in vur hnenah,
‹Leilung parah tla aw,› tiah a ti,
Cuvek thothoin ruahhmai le a cahnak ruah hnen khalah.
7 Mi hmuahhmuah in amai hnaṭuan an theihnak dingah,
Anih in mi kip kut cu a cawlter.
8 Ramsapawl kua sungah an lut ih,
An cēnnak hmun ah an tâp ta.
9 Thlang lam ihsin phusîngpi a hung hrang ih,
Sak lam ihsin thlipi dai.
10 Pathian thaw hmangin tikhăl pek a si ih,
Tipi kaupi cu an khál.
11 Cuihtlunah anih in khawdur dum sahpi cu tikhu in a hnâwngter,
A khawdur varpawl a darhter.
12 Cule anmah thu a pek hai mi pauhpauh vekin leilung vangdâp pumpi ih an tuah theinak dingah,
Amai hruainak in an her ih, an let.
13 Anih in nunrĕmnak hrangah maw,
A ram hrangah maw,
A zahngainak hrangah simaw, cumi cu a cangter a si.
14 «Maw Job, hihi ngai aw;
Ding awla, Pathian-ih mangbangza thil tipawl hi ruat hnik.
15 Ziangtin cupawl cu Pathian in thu a pe hai ti le,
A khawdur tleu cu êng dingin a tuah ti na thei maw?
16 Theihnak ih mifamkimpa ih tuah mi mangbangzapawl,
Khawdurpawl hi ziangtin an tâng ti na thei maw?
17 Thlang lam thli in leilung daiten a umter laiih sinfen hlum neipa nang,
18 Bur mi thlalang vekih a khoh mi,
Van cu amah thawn na pharh ve maw?
19 «A hnenah ziang kan sim ding ti in zirh aw,
Ziangahtile thim ruangah zianghman kan timlamaw thei lo.
20 Ka sim duh tiah amah sim a ṭul maw?
Milai in a ṭawng asile, amah cu dawlhhlo a si tengteng ding.
21 Thli a hrang ih a thianter hai tikah cun,
Minung in tleu kha van ih a tlet tikah an zoh ngam lo.
22 Sak lam ihsin sui tlê a ra,
Cungnung maksaknak cu Pathian hnenah a um.
23 Ziangkimtithei lawngte cu, kannih in amah kan hmu thei lo;
Anih cu huham ah khaisan a si ih,
Diknak le a nasazet mi dingfelnak cu a merhkâwi dah lo.
24 Curuangah milaipawl in amah cu an ṭihzah;
Anih in thinlung fimvar mi zawih par hmanah thleidănnak a nei lo,»

tiah a ti.

38

Jehovah in Job hnenah a Ziangkim Ti Theinak a Phuanglang

1 Cun phusîng lak ihsin Jehovah in Job cu a sâng ih:

2 «Theihnak tel lo ṭawngkampawl hmangin,
Thurawnpek thimtertu cu zo a si?
3 Atu ah pacang vekin na tâi khap hnik;
Thu ka lo sut ding ih, nang in i sâng pei.
4 «Leilung lungphum ka phum laiah khuiah so na um?
Theihthiamnak na neih asile i sim aw.
5 A tahnak teh zo in a relcat?
Na thei ngaingai a si hi!
Asilole cumi tlunih rīn teh zo in a rîn?
6–7 A ṭhumawknak teh ziang mi ah a ṭhumaw?
Asilole zing lam arsipawl hla an sakkhawm lai le,
Pathian fapapawl hmuahhmuah aipuangih an au laiah khan a kilih lungto teh zo in a phum?
8 «Asilole tifinriat kha sūl ihsin a suak ih, a pawtsuak laiah,
Zo in so tifinriat cu sângkapawl thawi rak khar?
9 Khawdurpawl kha tifinriat sinfen hrangah ka tuah ih,
A tuamnak puan dingah thim sahpi ka tuah laiah;
10 A hrangih ramri ka khiahsak ih,
Tlângpawl le sângkapawl ka bŭn laiah;
11 ‹Hi tiang lawng na ra ding, na ra bêt thei lo,
Cule hi tawkah a puarthau mi na tisuarpawl tawp tengteng seh!› ka ti laiah.
12–13 «Leilung netnak tiang kaibĕt ih
Cutawk ihta misualrálpawl thingsuak ṭheh dingah,
Na damsung ah zing lam hnenah thu pe in,
Khawfingcat teh a umnak na theihter dah maw?
14 Leilung cu tlak parih tacik khĕn vekin ruangam a langter ih,
Sinfen vekin a dingsuak.
15 Tleu cu misualrálpawl hrangah sian a si lo ih,
A hawi sâng mi bān cu khiah a si.
16 «Tifinriat tihnapawl ah na lut dah maw?
Asilole a thûknak bikpawl ah na veivak dah maw?
17 Thihnak kăwtkapawl teh na hnenah phuanlăng a si dah maw?
Asilole thim mepmep sângkapawl teh na hmu dah maw?
18 Leilung kauhdān teh na thei maw?
Hipawl hmuahhmuah na theih asile rel hnik.
19–20 «A ram sungih na hruai theinak dingah,
A inn fehnak zin na theih theinak dingah,
Tleu cēnnak lam cu khuiah so a si?
Thim umnak hmun cu khuitawkah a si?
21 Na thei pei cu, cu laiih na suah zo si,
Na kum khal a tam tuk zo!
22 «Vur khawlnak ah na lut dah maw,
Asilole rial khawlnak teh na hmu dah maw?
23 Cupawl cu buainak tikcucān hrangih ka khêk mi a si,
Doawknak le ral do nikhua hrangah.
24 Tleu hi ziangtin a kapdarh aw,
Asilole nisuahnak lam thli teh leilung parah ziangtin a darh?
25–27 «Zohman umlonak ram le,
Minung zohman an umlonak ramṭhing ih ruah surter dingah le,
Ram lawnglak tlăiter dingah le,
Hramno khosuakter dingah,
Ti luangliam hrangah tiluannak kâwr le,
Ṭêk hrangih zin zo in so a tuah?
28 Ruah in pá a nei maw?
Asilole daifawr teh zo in a hring?
29 Zo-ih sūl ihsin vur a suak?
Van ih vur teh zo in a hring?
30 Tipi cu lungto vekin a hak ih,
Ti thûk vangdâp cu a khál.
31 «Kimah rual khi hmunkhatah na ṭemkhawm thei ding maw?
Asilole Kesil hri na dawrter thei ding maw?
32 Cule ^aMazzarah-pawl khi anmai tikcucān ah na hruaisuak thei maw?
Asilole ^bAyish cu a falepawl thawn na kaihruai thei maw?
33 Vanpawlih cīn le dān teh na thei maw?
Leilung an uknak na dĭn thei maw?
34 «Tidai tam zetin lo khuh dingin,
Khawdurpawl lamah na aw na suah thei maw?
35 Nimthlakaupawl kha an fehsuak theinak dingah le,
Na hnenah, ‹Hi tawkah kan um!› tiah lo ti dingin na kuatsuak thei maw?
36 Zo in lungthin ah fimnak a rak ret?
Asilole zo in thinlung ah theihthiamnak a rak pe?
37–38 Zo in fimnak hmangin khawdurpawl siar thei ding?
Asilole leivut a hak deuhdeuh ih,
Thil hlawmpawl an kăwpawktlang tikah,
Van tithawlpawl zo in a thlebung thei ding?
39–40 «An pûkpawl ah an băwk ih,
An sa bawhnak hmun ih sa an bawh laiah,
Kiosa hrangah sa pēlsak thei in,
Kiosa vanglaipawlih rilrawnnak na diriamter thei maw?
41 Pathian hnenih a fano tetepawl an au le,
Rawl tlasamih an vahvai tikah,
Zo in tlangâk rawl a pe?

38:32^a Mazzarah: Hebru ṭawng a si ih, arsi rualpawl tinak a si.

38:32^b Ayish: Hebru ṭawng a si ih, arsi rual khat hmin a si. Mirang in Great Bear an ti.

39

1 «Zâtharpawl in ziang tikah fa an hring ti na thei maw?
Asilole zukneng fāte hrin lai na hminsin thei maw?
2 An fāte pai thla zât na thei thei maw?
Asilole an fano ziang tikah an hring ti na thei maw?
3 An băwk,
An fano an hring,
An fahrinnat a tāwp.
4 An fanopawl cu an harhdam zet,
Ramlak ah an ṭhanglian;
An fehsuak ih an nulepawl hnenah an kir nawn lo.
5 «Zo in so hramlak lāk thlahsuak?
Zo in so a hrennak phawihsak?
6 A umnak ding inn ah ramṭhing le,
A cēnnak dingah cite ram ka tuahsak.
7 Anih in khawpi sung thâwm cu a hnihsan,
A khāltuih aunak cu ziang a siar lo.
8 Tlangtluanpawl cu a tlannak an si ih,
Thil hring pauhpauh a hawl.
9 «Ramlak câwcang in a lo rian duh ding maw?
Na ran inn ah a riak duh ding maw?
10 Ramlak câwcang cu leilehnak hmun ah hridai in na ṭem thei ding maw?
Asilole na hrangah phaikuampawl a let ding maw?
11 A thazang a nasat ruangah amah cu na rinsan ding maw?
Asilole na hna cu a hnenah na tân ta ding maw?
12 Na thlairawl inn ih phurthleng dingah le,
Na hruihhmun ih na thlairawl thiar dingah na rinsan ding maw?
13 «Kalauk va in pawrhaw zetin a thla a khâwng,
Asinan a thla le a thla hmul cu ngathûr ta vek an si.
14 Ziangahtile a tipawl kha leilung parah a tân ta ih,
Leivut ah a hlumter;
15 Ke in a palkuai ding ti le,
Ramsapawl in an khuai ding ti kha a hngilh.
16 Mai fa lo bangin, a fanopawl cu râwng zetin a kilkhawi;
A ṭuanbăngnak cu a lak a si khalle, a pawisa lo.
17 Ziangruangahtile Pathian in fimnak a hngilhter ih,
Theihthiamnak a pe lo.
18 A thla a zâp sâng tikah,
Ráng le a totu cu a hnihsan.
19 «Ráng kha cahnak thazang na pe dah maw?
A hngawng cu tuanghmul in na thuam dah maw?
20 Amah cu kharbawk vekin na petter thei maw?
A hnar phit maksak tak cu ṭihnungza a si.
21 Phaikuam ah lei a huat ih, a cahnak ah lungawiaipuangin a um;
Doawknak ralthiam a va pan.
22 Ṭihnak cu a hnihsan ih, a thla a phâng lo;
Ralnâm ihsin a kirsal dah lo.
23 Amah dokalhin thálfung bawm an khâwngawn ih,
A tle zohzo mi fei le feite thawn.
24 Anih in khūr thlohthlo le thinsosain lei ah a tlân,
Tawtawrawt awn ah a ding menmen thei lo.
25 Tuupa ki an phawt tinten, anih cun, ‹Ceiraw!› tiah a ti.
Doawknak cu hlapi ihsin a rim a thei,
Ralbawipawlih thâwm le aunak khal.
26 Na fimnak in sambak zamter in,
Thlang lamah a thla na pharhter maw?
27 Muvanlai cu nangmai thupek in zamso in,
A sannak hmun ah a bu a sâm maw?
28 Anih cu lungpi parah a cêng ih, umhmun a khuar,
Lung khawkrawk par le hmun him ah.
29 Cuih hmun ihsin sa deh ding a thlingthla;
A mit in hlapi ihsin a hmu.
30 An fanopawl in thi an zûk;
Cule saruak umnak ah cuih va cu a um,»

tiah a ti.

40

1 Cuihtlunah Jehovah in Job hnenah:

2 «Sawiseltu in Ziangkimtithei a êl ding maw si?
Pathian kawktu in, cumi cu sâng seh,»

tiah a ti.

Job ih Pathian Sawnnak

3 Cun Job in Jehovah cu a sâng ih:

4 «Ngai hnik, keimah cu zianghmanlo ka si,
Ziang ka lo sâng ding?
Ka kâ ka hup a si.
5 Vei khat ka ṭawng zo, asinan ka sâng nawn lo ding;
A si, vei hnih, asinan ka pehbêt nawn lo ding,»

tiah a ti.

6 Cun Jehovah in Job cu phusîng lakin a sâng ih:

7 «Atu ah pacang vekin na tâi khap hnik;
Thu ka lo sut ding ih, nang in i sâng pei:
8 «Ka thuṭhennak cu na nuaihlo ngaingai ding maw?
Thiam na co theinak dingah, keimah thiam lo i coh ding maw?
9 Pathian bān vek na nei maw?
Asilole amah vekin khawri aw na suah thei maw?
10 Cun maksaknak le cungnunnak thawn thuamaw awla,
Ropitnak le mawinak thawn cei aw hnik.
11 Na thinlingnak sosa cu thlesuak aw;
Mipuarthau pauhpauh kha zoh awla, tiniam ṭheh hnik.
12 Mipuarthau pauhpauh kha zoh awla, hnuaidawrter hai aw;
Misualrálpawl cu an umnak hmun ah palbĕt hnik.
13 Annih cu leivut ah thupkhawm hai aw,
Hmun thup ah an hmai ṭem hnik.
14 Cule na vawrh lam kut in a lo run thei ti na hnenah ka phuang ding.
15 «Atu ah nangmah thawi ka tuah mi ^aBehemoth kha zoh hnik;
Câwcang bangin anih cu hrampi a ei.
16 Zoh hnik, a thazang cu a khelbawr ah a um ih,
A thiltitheinak cu a pumpi thahripawl ah a um.
17 A mei cu sidar thingkung vekin a cāngvai,
A kawng tha cu fek zetin a phiaraw.
18 A ruhpawl cu dar tluanpawl vek an si ih,
A hnakruhpawl cu thir tluanpawl vek an si.
19 Anih cu Pathian lamzinpawl lakih hmaisabik a si;
Amah tuahtu in a ralnâm thawn va naih seh.
20 Thungaiten tlangpawl in a hrangah rawl an pek ih,
Cu tawkah ramsa hmuahhmuah an lek.
21 Anih cu loṭas kung tăngah a băwk,
Câlterûl le dûm khalah.
22 Loṭas kungpawl in amah cu an thlâm in an hliah;
Tiva kap partiam thingpawl in an kulh.
23 Ngai hnik, tiva cu a len khal le,
Anih cu a thla a phâng lo;
A kâ ah Jordan luanglut khal sehla, anih cu a rinsanaw thotho.
24 A kilvenawk laiah,
Sio in a hnar va thul in, zo in so kai thei ding?

40:15^a Behemoth: Hlanlai Samak tumpi a si. Ti sung le tileng khalih um thei a si, a um nawn lo a si men thei.

41

1 «Leviathan kha sio thawn na dirsuak thei pei maw?
Asilole a lei teh hrihrual thawn na awk thei pei maw?
2 A hnar na thul thei pei maw?
Asilole a khabe kha sio in na dawttlăng thei pei maw?
3 Na hnenah ngĕnnak tampi a thlĕn pei maw?
Na hnenah teh nemten a ṭawng pei maw?
4 Nangmah thawn thukham a tuah pei maw?
Amah cu na siahhlawh ah na la kumkhua pei maw?
5 Amah cu vâte vekin na lehpi pei maw?
Asilole na falapawl hrangah amah kha na hreng pei maw?
6 Sumdâwngpawl in amai thuhla ah a man an nepaw pei maw?
Sumdâwngpawl lakah amah cu an zemaw pei maw?
7 A vun cu fei in na dawttlăng thei pei maw?
Asilole a lu kha ngafei in?
8 A parah na kut ret hnik aw;
Nan beihawk kha na cîng ringring ding ih,
Ziang tik hmanah cumi cu na tuah lehsal nawn lo ding!
9 Ngai hnik, milai ruahsannak cu a diklo a si;
Amah hmuh men hmanin mi a beidawngter lo ding maw?
10 Amah căwktho ngam dingin zohman an rorum lo.
Cuti asile zo so keimah dokalhih ding thei?
11 Amah ka rulh theinak dingah, zo in so in rak pe?
Van rāng tăng thil ziangkim cu ka ta a si.
12 «A kutkepawl siseh,
A cak mi a huham siseh, a pumrua mawizia thuhla ah siseh ka ngui men lo ding.
13 Zo in so a sinfen leng lam hlít thei ding?
Kâkharh thuah hnih thawn zo in so amah cu pan thei ding?
14 A mithmai sângkapawl cu zo in so áwng thei ding?
A ha kûal hngiarhngiarpi cu ṭihnungza a si.
15 A phuhlip thliar hngethngetpawl cu a hngalnak a si,
Erhpit mi vekin hnget zetin a kăwpaw.
16 An karlakih thli lut thei lo tiangin,
Pakhat le pakhat an naihaw.
17 Annih cu pakhat le pakhat an pehaw,
An kăwpaw ih, ṭhen theih an si lo.
18 A hahthio tikah tleu a suak ṭheu ih,
A mit cu zing lam mit vek an si.
19 A kâ ihsin meialh tleupawl a suak ih;
Meici a suak.
20 A hnar kuapawl ihsin meikhu a suak,
Tiso bêl le phŭk lakih suak vekin.
21 A thaw in meihol a vâmter ih,
A kâ ihsin meialh a suak.
22 A hngawng ah cahnak a um ih,
A hmaiah riahsiatnak a lâm.
23 A titsa thuahpawl an pehawkhawm;
Cupawl cu a parah an hnget ih, ṭhawn theih an si lo.
24 A thinlung cu lungto vekin a hak,
Riallung tăngtasawn hah tlukin.
25 A thawh tikah, micakpawl an thla a phâng;
Kekkuainak awnpawl ruangah annih cu vansang an lam.
26 Ralnâm in do khal sehla, a neh thei lo;
Fei, feizum tawite le feite khalin.
27 Thir cu cangpâwl vekah a ruat ih,
Dar cu thing răwp vekah.
28 ^aThálfung in amah a tlânseter thei lo;
Herhli lunghlum cu a hrangah fângkung hrambúl vek a si.
29 Fungfekpawl cu a hrangah cangpâwl vekih ruah an si;
Feitepawl khawnawk awn cu a hnihsan men.
30 A taksa tăng lam hlamphei hriam vek a si;
Leibêk lakah leilehnak ha vekin a hrût.
31 Ti thûk cu bêl vekin a soter;
Tifinriat kha hnih mi hriak bel vekah a ruat.
32 A fehnak hnuhma cu a êng hupho;
Ti thûk in sám var a nei tiih ruah a si ding.
33 Ṭihnak nei loih tuah mi amah vek,
Leilung parah zianghman a um lo.
34 Anih in thil sâng kip in a zoh;
Mihngal hmuahhmuah tlunah anih cu siangpahrang a si,»

41:28^a Thálfung: Himi hriamhrei relnak hrangah, Hebrumipawl in «thál fapa» ti le «a thál fapapawl» ti ṭawngkam hi an hmang ṭheu.

tiah a ti.

42

Job-ih Tundinawksalnak

1 Cun Job in Jehovah cu a sâng ih:

2 «Ziangkim na ti thei ih,
Na tumtah mi cu kham theih a si lo ti ka thei.
3 Nang in, ‹Theihnak tel loih, thurawnpek thuptu hi zo a si?› tiah i sut.
Curuangah ka theihthiam lo mi ka rak ṭawngsuak a si,
Ka rak theih lo mi ka hrangih mangbangza lutuk thilpawl cu.
4 Ngaithla hram aw, ṭawng ve hnik ning;
Nang in, ‹Thu ka lo sut ding ih, nang in i sâng ding,› tiah na ti.
5 «Hna ih theihnak cun ka rak lo thei,
Asinan atu ah cun ka mit in ka lo hmu.
6 Curuangah keimah le keimah ka fihaw ih,
Leivut le vutcâm lakah toin ka lung ka thleng a si,»

tiah a ti.

7 Cule hitin a si, Jehovah in Job hnenih himi kamsuakthupawl a sim ṭheh hnuah, Jehovah in Teman khawmi Elifaz hnenah, «Ka thinlingnak cu nangmah le na rualpi pahnih dokalhin a tho, ziangahtile ka siahhlawh Job ih a rak sim vekin, ka thuhla thudik nan rel lo. 8 Curuangah nanmai hrangah câwpa pasarih le tuucang pasarih kengin, ka siahhlawh Job hnenah va feh uh, cule nan hrangah Meiur Thilhlăn va hlan uh. Cule ka siahhlawh Job in nan hrangah thla a lo camsak ding. Ziangahtile amah cu ka ^acohlang ding, culole nan atdān izirin nan parah ka ti ding, ziangruangahtile ka siahhlawh Job ih a sim vekin, ka thuhla thudik nan rel lo.

42:8^a cohlang: A ṭawng hrampi ah, «mi pakhat mithmai khaisan» ti a si.

9 Teman khawmi Elifaz le Shuh-mi Bildad le Naamath khawmi Zofar pawl cu an feh ih, Jehovah in an hnenih a sim hai vekin an tuah, cule Jehovah in Job cu a cohlang. 10 Cule Job in a rualpipawl hrangih thla a cam tikah, Jehovah in Job cu a hloh mipawl a pesal. Cule Jehovah in Job cu a hlanih a neih mi alet in a pe. 11 Cun a unaupawl hmuahhmuah, a farnupawl hmuahhmuah le a hlanih a hmeltheih hmuahhmuah cu a hnenah an ra ih, a inn ah rawl an eikhawm. Cule Jehovah in a tlunih harsatmangbangnak a thlenter mipawl hmuahhmuah thu ah an tuarpi ih an hnem. Ngun tangka le sui zunghruk amah an pe fingfing.

12 Jehovah in Job-ih cān neta cu a thăwknak hnakin thlawsuah a pe, cule tuu 14000, kalauk 6000, câwcang hâl 1000 le lāknu 1000 a nei. 13 Fapa pasarih le fanu pathum a nei fawn. 14 Cule a pakhatnak cu ^aJemimah, pahnihnak cu ^bKeziah, pathumnak cu ^cKeren-Happukh tiah hmin a sak hai. 15 Ram hmuahhmuah ah Job fanupawl vekih nunau hmel ṭha hmuh an si lo. An pa in annihpawl cu an ṭapapawl lakah ro a pe hai.

42:14^a Jemimah: Hebru ṭawng a si ih, a sullam cu «thuro» tinak a si.

42:14^b Keziah: Hebru ṭawng a si ih, a sullam cu «kassia» tinak a si. Kassia cun rimhmui kung sung lam a sawhkhih.

42:14^c Keren-Happukh: Hebru ṭawng a si ih, a sullam cu «mit răwng hnawih ki» tinak a si.

16 Himi hnuah Job cu kum 140 a dam ih, a fapapawl le a tulepawl san litnak tiang a hmu. 17 Cutin Job cu tarkûn le kum kimin a thi.