About Bible Thianghlim | ©

BibleThianghlim – JUDAS

Old Testament

Genesis Exodus Leviticus Numbers Deuteronomy Joshua Judges Ruth 1 Samuel 2 Samuel 1 Kings 2 Kings 1 Chronicles 2 Chronicles Ezra Nehemiah Esther Job Psalm Proverbs Ecclesiastes Song of Solomon Isaiah Jeremiah Lamentations Ezekiel Daniel Hosea Joel Amos Obadiah Jonah Micah Nahum Habakkuk Zephaniah Haggai Zechariah Malachi

New Testament

Matthew Mark Luke John Acts Romans 1 Corinthians 2 Corinthians Galatians Ephesians Philippians Colossians 1 Thessalonians 2 Thessalonians 1 Timothy 2 Timothy Titus Philemon Hebrews James 1 Peter 2 Peter 1 John 2 John 3 John Jude Revelation

JUDAS

1

• A ngantu: Judas
• A siartu: Zumtupawl
• Ngan kum: A.D. 67-80

Hi cakuatih thuanthu dinhmun hi 2 Peter thawn an bangaw (Peter Cakuat Pahnihnak Thuhmaihruai siar aw). Asinan hi cakuat ah cun, kawhhran ah Pathian ngaihsak lo pawl an rak lut zo (câng 4). Annih cu zumtupawl lakah an um, asinan zumtupawl in cutlukih thil ṭihnung an lakih a um thu khal an rak thei lo. Curuangah Judas in zumtupawl hnenih cakuat lohli an ṭul tuk ti a hmu. «Cotlan mi rundamnak,» thu ngan a tum. Asinan an hrangih ṭulbik mi ngan hmaisa ṭulin a thei (câng 3). Peter cakuat pahnihnak thu a hman tel ruangah a cakuat hi Peter cakuat pahnihnak hnuih ngan mi a si men thei. Hih cakuat hi A.D 67 le 80 karlak hrawngih a ngan mi a si ding. Zumtu an si ti mi siarlo a cakuat dawngtupawl zo an si ti a simfiang lo (câng 1).

Judas hi taksa dān ah Jesu-ih nau a si ko nân, «Jesu Khrih-ih sál» ti lawngin a relaw. A unaupa James khal taksa dān ah Jesu-ih nau a si.

Jesu Khrih-ih naupa a si ko nân, Judas hin amah le amah «Jesu Khrih-ih sál» ti lawngin a relaw. A unaupa James khal hi Jesu-ih naupa a si. Jesu suah hnuah Mary in fāte dangdang Joseph a hrinsak (Mar 6:3). Judas le James hin leilung tlunih a rawngbawl laiah Bawipa hi an rak zum lo (Joh 7:3-8). Neta lamah cun an zum, ziangruangahtile annih khal Pentikos ni ah zumtu dangpawl zawngah an um ve (Apo 1:14). Cuticun Judas cu khualtlawngih thuthangṭha simtu ah a cang (1Ko 9:5).

Hi cakuat ah Judas in zumtupawl kha Jesu in kawhhran hnenih a ap ta mi an zumnak a si mi thutak hmuahhmuah hum dingin thungaithlakin a fawrh. Cibaibûknak a ṭheh hnuah, an lakih um Pathian ngaihsak lo zirhtu diklopawl thuhla ah ralrinnak pein, zumnak hum dingin sawmnak hmanhmawh a tarlang (câng 3-4). Thukham Hlun tahṭhimnak pathum hmangin a thleng taktak ding mi Pathian dāntatnak thu a sim (câng 5-7). Zumnak humnak ding săn a theihtersal. Pathian ngaihsak lo pawlih sualralnak le an tuar ding mi hremnak thupawl tla a sim (câng 8-16). Thlarau lam raldonak ah zumtupawlih mawhphurh khal a sim (câng 17-23). Hi cakuat sungah kăwp thum a si mi ziangmawzat a rel. Cule zumtupawlih mawhphurh a tarlăng mi cu cutivek zawng thothoin a rel. Zumtupawl in apostolpawlih ṭawngkam cîng ringring in, Pathian duhdawtnak ah umhngetin le Pathian ngaisak lo pawl ih buaiter mipawl an runsuak ding a si. Pathian ngaihsak lo pawl lak ihsin humhimtu Pathian thangṭhatnak in Judas in a cakuat a cemter.

Pathian lawng hi Pathian ngaihsak lo pawlih kut ihsin in humhim thei taktaktu a si. Amah lawng in «ropitnak hmaiih aipuannak nasazet thawn» in dingter thei a si (câng 24).

1

Cibaibûknak

1 Jesu Khrih-ih ṭemṭawn sál le James-ih unaupa, Judas in, Pa Pathian ih tithianghlim mi, Jesu Khrih sungih kilhim mi le kawh mipawl hnenah:

2 Zahngainak le hnangamdaihnak le duhdawtnak cu karh sinsin hram seh.

Zirhtu Diklopawl Thuṭhennak

3 Duhdawt mitla, kan cotlang mi rundamnak thu nan hnenih ngan ṭenṭo ka tum tikah, mithiangpawl hnenah Pathian in sankhuk daihih vei khat a rak pek mi zumnak hrangah ṭhahnemngai zetih nan donak dingah tha lo pe dingin nan hnenih ca ka ngan cu a ṭul rori a si.

4 Ziangah cutin ka ti tile a thupteih luttu mi hrekkhat in Pathian zangfahnak cu fihnungza hursualtuahnak ah an cangter ih, Bawipa Pathian umsŭn le kan Bawipa Jesu Khrih cu an hnáwng fawn. Cupawl cu Pathian ngaihsak lo le hlanlaipi ihsin hivek thuṭhennak co dingih hminsin cia mi an si.

5 Curuangah Bawipa in Izip ram ihsin ziangtin Israel-mipawl a runsuak ih, cumi hnuih a zum lo tupawl a siatsuah thupawl hi, nan theih zo mi si khal sehla lo theihthartersal ka duh. 6 Cule vancungmi, an sinak hmaisa rak kai ringring loih, anmai umnak hmun tlansantupawl cu thuṭhennak ni rapthlak zet hrangah thim hnuaiah kumkhaw cikcin ih ṭawnin a ret hai a si. 7 Cutivek thothoin Sodom khawpi le Gomorrah khawpi le anmah vekih a nung ve mi an kiangkap khawpipawl cu, nunau-mipa sualnak ah an peaw ih, tidān lo vekin an pawlaw. Cupawl cu sankhuk meipi thawi hrem ding mipawlih zohṭhim dingah tarlăng an si.

8 Cuvek thothoin hi suangtuahtupawl hin an taksaruangpum an bawrhbangter, thuneitupawl an nautat ih, huham ropi neipawl an relsia. 9 Cuti a si nân, vancungmi cungnungbik Maikal cun Mosi-ih ruang thu ah Diabol thawn thu an elawk laiah khan, Diabol cu a thangsiat zawngin sual a puh ngam lo ih, «Bawipa in lo kawk seh!» tiah a ti. 10 Asinan cuih minungpawl cun an theih lo mi pauhpauh cu an relsia. Cule ramsa â in thil a theih vekin pianphung sinak ih an theih mi thilpawl ah anmah le anmah an bawrhhlawhawter.

11 An hmakhua a pit a si! Ziangahtile Kain lamzin an zawh ih, hlawknak hmu dingih Balaam a fehsualnak ah khan duhham zetin an tlân ih, Korah-ih helnak sual ah an hlorál.

12 Cuih minungpawl cu nanmai duhdawtnak puai ih hnawmbāl an si. Nan hnenih rawl an ei tikah ṭihnak um riai loin anmah te an ei ding mi lain an ei mai. Annih cu thli in a suk le a so ih a hrăn mi ruahti pai lo khawdur vek, favāng cān ih thingkung rah nei lo vek, vei hnih thi zo, a hram ihsin phawisuah mi vek an si. 13 Cupawl cu tifinriat tisuar cak zet vek an si, an ningzahnak cu ti parih tiphûl vekin a suak; arsi zuang vek an si, thim sah mepmep cu an hrangah retsak kumkhua a si.

14 Cun Adam ihsin a pasarihnak Enok khal in hipawlih thuhla cu profet thuphuan in thu a rak phuang, «Ngai hnik, Bawipa cu thawngza tampi a mithiangpawl thawn a ra ding. 15 Mi hmuahhmuah parih thuṭhennak thlengter dingah le Pathian ngaihsak lo pawl hmuahhmuah in Pathian ngaihsaklonak hna, Pathian ngaihsak lo cingih an ṭuan mi hmuahhmuah thu ah le cuvek misualpawl in amah dokalhin ṭawng hrohrang an ṭawng mi hmuahhmuah an tisualzia theihter dingah a ra ding,» tiah a ti. 16 Cupawl cu phunciarhmang, mi sawiselhmang, anmai câkhiarnak thluntupawl an si. Cule an kâ in pawrhawknak ṭawngkam nasazetzet an ṭawng ih, mai hlawknak duh ruangah mi va fakawter an si.

Tuarfai dingih Kawhnak

17 Sikhalsehla duhdawt mitla, nannih cun kan Bawipa Jesu Khrih-ih apostolpawl in hi hlanih an rak sim mi kamsuakthupawl kha cîng ringring uh. 18 Cān neta ah cun mi hmuhsuamhmangpawl le anmai Pathian ngaihsaklonak câkhiarnak vekih nungtu an um ding tiah an lo sim kha. 19 Cupawl cu khawvel mi, ṭhenawknak tuahtu, Thlarau nei lo pawl an si.

20 Asinan duhdawt mitla, nannih cu nan zumnak thianghlimbik parah nanmah ten sakṭha aw vivo uh, cule Thlarau Thianghlim ah thlacam uh. 21 Sankhuk nunnak ih mi hruaitu kan Bawipa Jesu Khrih-ih zahngainak nan hngah laiah Pathian duhdawtnak ah nanmah le nanmah kilhim aw uh.

22 Cule mi hrekkhat parah lainatnak nei uhla, fimkhur zetin thuṭhenfelthiamnak hmang uh. 23 Cun mi dangpawl cu meisa sung ihsin dirsuak uhla, ṭih cingin runsuak uh, tisa ih fate zet a bawrhbanter mi nan sinfen hman hua uh.

24 Cule tlûknak ihsin a lo kilhim theitu le

Mawh nei loin a ropitnak hmaiih
Aipuannak nasazet thawi lo dingter theitu,
25 In Rundamtu Pathian fim umsŭn hnenah
Thangṭhatnak le cungnunnak, huham le thuneihnak cu
Atu le kumkhua tiang um seh. Amen.