About Bible Thianghlim | ©

BibleThianghlim – MALAKI

Old Testament

Genesis Exodus Leviticus Numbers Deuteronomy Joshua Judges Ruth 1 Samuel 2 Samuel 1 Kings 2 Kings 1 Chronicles 2 Chronicles Ezra Nehemiah Esther Job Psalm Proverbs Ecclesiastes Song of Solomon Isaiah Jeremiah Lamentations Ezekiel Daniel Hosea Joel Amos Obadiah Jonah Micah Nahum Habakkuk Zephaniah Haggai Zechariah Malachi

New Testament

Matthew Mark Luke John Acts Romans 1 Corinthians 2 Corinthians Galatians Ephesians Philippians Colossians 1 Thessalonians 2 Thessalonians 1 Timothy 2 Timothy Titus Philemon Hebrews James 1 Peter 2 Peter 1 John 2 John 3 John Jude Revelation

MALAKI

1234

• A ngantu: Malaki
• A siartu: Persia-mipawlih an uk laiih Jew-pawl
• A huap sung cān: B.C. 420-395

Malaki in a cabu cu «Jehovah thuphuan kamsuakthu» ti ṭawngkam in a thăwk. Malaki hlan kum 100 hrawngah, temple sak an ngaihsak lo ruangah mipi kawk dingin Jehovah in Haggai le Zekariah a rak thlah. Malaki rawng a bawl hlan kum 25 hrawngah, Persia siangpahrang in Jerusalem kulh dĭntharsal dingin mipi hruaitu dingah Nehemiah thu a rak pe. Jehovah in anmah cu nasazetin thlawsuah a pe hai, asinan annih in temple siseh, temple rawngbawlhna siseh, temple sungih biak mi Jehovah siseh an bawrhbangter. Mipi in Malaki ih phuan mi thucah cu Pathian hnen ihsin a si tiah an rak cohlang lo. Mi tamsawn cu an lung a ruh ih, Pathian kamsuakthu dokalhin an hél sawn riangri.

Nehemiah cu Judah uktu a si lai khalah mipi cu thlarau lamah ṭumsuk an thăwk. Judah ram ih kum hleihnih uktu a si hnuah (Neh 5:14), Nehemiah cu Persia siangpahrang inn ah a kirsal (B.C. 433 hrawngah). Tawkfang a rei hnuah, siangpahrang hnen ihsin Jerusalem ih kirsal siannak a ngah. Cuih cān ah mipi cu thlarau lamah nasazetin an ṭumsuk zo, Pathian kamsuakthu lamih mipi tundinsal an ṭulzia Nehemiah in a hmu. Malaki in thuphuan a thăwk tikah, puithiampawl le mipi thlarau nun cu Nehemiah uktu a si lai hnakin a sia sinsin. Curuangah Malaki cu Nehemiah uktu a si hnu kum ziangmawzat hnuah rawng a bawl a si men thei; a rawngbawl cān cu B.C. 420 le 395 karlak a si a zumum.

Mipi in Jehovah kamsuakthu an el natsatzia Malaki cabu ah kan hmu. Mipi in ningzakza thusuhnak in Pathian an êl. Ṭhimnakah, Jehovah in a duhdawt hai ti a sim tikah, «Ziangti zawngin in duhdawt?» tiah an sawn (1:2). Pathian duhzawng si lo thawinakpawl in Jehovah an upat lo ruangah Malaki in puithiampawl a kawk hai tikah, «Ziangti zawngin na hmin kan nautat?» (1:6) ih, «Ziangti zawngin kan lo bawrhhlawhter?» tiah an sawn (1:7). Cutivekih elnak cu hi cabu pumpi ah a khat. Pathian ih sualpuhnak hmuahhmuah cu thusuhnak butut in an sâng (ṭhimnakah 2:14, 17; 3:7, 8, 13). Sikhalsehla mi hrekkhat in profet kamsuakthu cu an rak cohlang. Cupawl hnenah Jehovah in a thutiamkam khawruahharza thukham cu a ap hai (3:16-18; 4:2-6).

1

Pathian ih Duhdawt Mi Israel

1 Malaki hmangih Israel hnenih Jehovah thuphuan kamsuakthu.

2 Jehovah in, «Ka lo duhdawt a si,» tiah a ti.

Asinan nannih in, «Ziangti zawngin so in duhdawt?» tiah nan ti.

«Esau cu Jakob-ih u a si lo maw?» tiah Jehovah in a thăn.
«Jakob cu ka duhdawt;
3 Asinan Esau cu ka hua,
Cule a tlangpawl ka rămter ih,
A ro cu ramṭhing cinghniapawl hrangah ka canter,»

tiin.

4 Edom in, «Kannih cu vuakthluk kan si, asinan kan kirsal leh ding ih, a ṭhing mi hmunpawl kan dĭn leh ding,» tiin a ti hmanah, ralkap rualpawlih Jehovah in,

«An dĭn ngaingai tla a si men ding, asinan ka ṭhiatbăl thotho ding;
Annih cu ‹Sualralnak Ram,› tiin le,
‹Jehovah aithawhnak co kumkhuatu mipi,› tiah an ti ding,» tiah a ti.
5 Nan mit in nan hmu ding ih,
«Jehovah cu Israel ramri lan tiang a cungnung a si,» tiah nan ti ding.

Thilhlăn Bawrhhlawh

6 «Fapa in a pa a upat ih,
Siahhlawh in a pu a upat.
Cule keimah cu Pa ka si le cu,
In upatnak teh khuiah so?
Kei cu Bawi ka si le,
In ṭihzahnak teh khuiah so?

Ralkap rualpawlih Jehovah in ka hmin nautattu nannih puithiampawl hnenah a lo ti.

«Asinan nannih in, ‹Ziangti zawngin na hmin kan nautat?› tiah nan ti.

7 «Ka biakṭheng parah sang bawrhhlawh nan hlan, asinan nannih in, ‹Ziangti zawngin so kan lo bawrhhlawhter?› tiah nan ti. ‹Jehovah cabuai cu hmuhsuamumza a si,› nan tinak hin a si.

8 «Cule raithawinak hrangah rannung mitcaw nan hlăn tikah,
Cumi cu a ṭha lo a si lo maw?
Cule rannung kebái le rannung cawrna nan hlăn tikah,
Cumi cu a ṭha lo a si lo maw?
Cuvek pakhat khat kha nan uktu hnenah pe hnik uh!
Nan parah a lung a hmui pei maw?
Duhsaknak a lo pe pei maw? Ralkap rualpawlih Jehovah in a ti.

9 «Asinan atu ah kan parih zangfahnak a neih theinak dingah tiin, pathian duhsaknak dil uh. Nan kut in kha ti vek raithawinak nan pek laiah, duhsaknak thawn a lo cohlang ding maw? Ralkap rualpawlih Jehovah in a ti. 10 Ka biakṭheng parih ṭhathnemnak nei loin mei nan muahlonak dingah, nanmah lakah sângka khar thei pakhat tal um uh ci la maw! Nan parah lunghmuinak ka nei lo ih, nan kut ihsin thilhlăn ka cohlang lo ding, ralkap rualpawlih Jehovah in a ti.

11 «Ziangahtile ni a suah ihsin ni a tlak tiang miphunpawl lakah ka hmin a ropi ding.
Ka hmin in rimhmui le a thiang mi thilhlăn hmun kip ah an pe ding.
Ziangahtile ka hmin cu miphunpawl lakah a ropi ding, ralkap rualpawlih Jehovah in a ti.

12 «Asinan nannih puithiampawl in, ‹Jehovah cabuai cu a bawrhbang a si, a theirah le a rawl khal nautatumza a si,› tiin nan ti vivo tikah, ka hmin cu zianghmanlo ah nan cangter a si. 13 Nannih puithiampawl in, ‹Aw, a va bangthlak ve!› tiin nan hnar nan phîtphît, ralkap rualpawlih Jehovah in a ti.

«Rûkcawp siseh, kebái rannung siseh, rannung cawrna siseh nan rak keng; cutivekin thilhlăn nan rak keng! Nan kut ihsin ka lo cohlang ding maw?» Jehovah in a ti. 14 «A rante rual lakah a pa nei na cingih, thutiam khal tuah ko naih, sawisel ding um rannung Bawipa hnenih raithawinakih petu mibumtu cu camsiatin um seh. Ziangahitle keimah cu Siangpahrang ropi ka si,» ralkap rualpawlih Jehovah in a ti. Ka hmin cu miphunpawl lakah ṭihzah ding a si.

2

Puithiam Bawrhhlawh

1 «Cule atu ah, Maw puithiampawl, hi thupek hi nan hrangah a si.
2 Ka hmin sunlawihnak pe dingin,
Nan ngaithla lo ih,
Nan thinlung ih nan lâkluh lo asile,
Nan parah camsiatnak ka thlah ding ih,
Nan malsawm dăwn mipawl ka camsiat ding, ralkap rualpawlih Jehovah in a ti.
A si, nan thinlung ih nan lâkluh lo ruangah ka rak camsiat hai zo a si.
3 Ngai hnik uh, nan tesinfapawl ka kawk ding ih,
Nan hmaiah êk ka lo măn ding,
Nan raithawinak puaipawl ih ran êk rori cu;
Cule cuih êk thawn lakhlo nan si ding.
4 Cun Levi thawi ka thukham a peh vivo theinak dingah,
Hi thupek hi nan hnenah ka lo kuat ti nan thei ding, ralkap rualpawlih Jehovah in a ti.
5 Amah thawi ka thukham cu nunnak hrang le hnangamdaihnak a si.
I ṭihzah theinak dingah cucu a hnenah ka pe,
Levi cun i ṭihzah ih, ka hmin upat in a ding a si.
6 A kâ ah dān diktak a um ih,
A hmur ah diklonak hmuh a si lo.
Ka zawngah hnangamten le dingfelten a feh ih,
Mi tampi mawhsualnak ihsin a kirter.
7 Ziangahtile puithiam hmur in theihnak a kilṭha ding ih,
A kâ ihsin mi in dān an hawl ding a si,
Ziangahtile amah cu ralkap rualpawlih Jehovah thuphurtu a si.
8 Asinan nang cu zin na pial zo;
Na zirhnak in mi tampi na tlubahter.
Levi thukham na bawrhhlawhter, ralkap rualpawlih Jehovah in a ti.
9 Curuangah kei khal in mi hmuahhmuah hmaiah hmuhsuam dingin le tiniam dingin ka lo tuah.
Ziangruangahtile nang in ka zinpawl na zawh lo ih,
Na dān ah mi thleidăn na nei,» tiin.

Judah in Thukham a Bawrhbangter

10 Kan zaten Pa pakhat kan nei lo maw si?
Pathian pakhat ih sersiam kan si lo maw si?
Ziangruangah kan pupápawlih thukham cu thulolak menah cangter dingin unau pakhat le pakhat parah rinum loih kan um?
11 Judah cun rinum loin a nung ih,
Israel ram ah le Jerusalem ah thil fihnungza tuah a si,
Ziangahtile Jehovah in a duhdawt mi a hmun thianghlim cu Judah in a bawrhbangter;
Ram dang pathian fanu a ṭhit.
12 Himi tuahtupa cu zo vek a si khalle,
Ralkap rualpawlih Jehovah hnenih thilhlăn a ken a si khalle
Jehovah in Jakob-ih puanthlampawl ihsin sâtcat seh.
13 Cule hihi a pahnihnak thil na tuah mi a si:
Jehovah biakṭheng cu mitthli, ṭahnak le aukionak thawn na khuh ṭheh;
Ziangahtile anih in na thilhlănpawl cu ziang hmanah a siar nawn lo ih,
Na thilhlănpawl tla na kut ihsin lungsi zetin a cohlang nawn lo.
14 Cuticingin nang cun, «Ziangruangah maw?» tiah na ti.
A săn cu, Jehovah cu nangmah le na no laiih na nupi karlakih theihpitu a si,
Na nupi cu na kăwppi le thukham hmangih na ṭhit mi a si ko nân,
A lakah rinum loin na nung.
15 Asinan Jehovah in annih cu Thlarau neitu, pumkhat ah a rak tuah hai a si lo maw?
Cule ziangruangah annih cu pumkhat ah a rak tuah hai?
Jehovah cun Pathian mi cithlah a hawl a si.
Curuangah na thinlung ah fimkhur awla,
Zohman a no laiih a nupi lakah rinum loin nung hlah seh.
16 Ziangahtile ^amâkawk ka hua, Israel-ih Pathian Jehovah in a ti,
Cule a sinfen ih nunrawnnak khuhtu ka hua, ralkap rualpawlih Jehovah in a ti.
Curuangah na nupi lakih rinum loih na umlonak dingah,
Na thinlung ah fimkhur aw.
17 Na ṭawngkampawl in Jehovah ning ko na tuah;
Cucingin, «Ziangtin maw amah cu ning ko kan tuah?» na ti lai hrih.
«Thil ṭhalo a tuahtu pauhpauh Jehovah mithmuhah an ṭha ih, an parah a lung a hmui,»
Asilole «Diknak Pathian cu khuiah so a um?» tiah nan ti mi hin amah ning ko nan rak tuah a si.

2:16^a mâkawk: A ṭawng hrampi ah dawihlo ti a si.

3

A Ra lai ding Mi Thuphurtu

1 «Zoh hnik, ka palai ka thlah ding ih,
Anih in ka hmaiah lamzin a timtuah ding.
Cule na hawl rero mi Bawipa cu a temple ah a ra lohli ding,
A parih na lunghmui mi, thukham phurtu cu.
Zoh hnik, anih cu a ra a si, ralkap rualpawlih Jehovah in a ti.
2 Zo in so a rat ni cu tuar thei ding?
A ra lăng tikah zo so a ding thei ding?
Ziangahtile anih cu erfainak meisa vek a si ih,
Puan sawptuih sahbawn vek a si.
3 Anih cu ngun erfaitu le thianfaitu bangin a to ding;
Jehovah hnenah dingfelnak ih thilhlăn an pek theinak dingah,
Levi fapapawl a thianfai ding,
Sui le ngun bangin annih cu a thianfai hai ding.
4 Cun Judah le Jerusalem ih thilhlăn cu hlanlai le kum liam cia bangin,
Jehovah lungawi zawng a si ding.
5 Cule thuṭhen dingin na kiangah ka ra ding;
Keimah cu dawithiampawl dokalhin,
Uirepawl dokalhin,
Diklo zetih sesămhmangpawl dokalhin,
Hlawhfapawlih hlawhman hlēpsakhmangpawl le
Nuhmeipawl le nupa nei lo pawl dekcăwkhmangpawl dokalhin le
Khawtluang mipawl dawihlohmangpawl le
Keimah i ṭih lo tupawl dokalhin an parah theihpitu rang zet ka si ding, ralkap rualpawlih Jehovah in a ti.
6 Ziangahtile kei cu Jehovah ka si, ka thlengaw dah lo;
Curuangah a si, nannih Jakob fapapawl nan hlohral lo.
7 Nan pupápawl san lai ihsin ka sakhaw dānpawl nan pialsan ih,
Nan rak thlun lo.
Ka hnenah ra kir uh, cule nan hnenah ka ra kir ve ding, ralkap rualpawlih Jehovah in a ti.
Asinan nannih in,
‹Ziangti zawngin so kan ra kir ding?› tiah nan ti.

Pathian Suam Hlah

8 «Minung in Pathian a suam ding maw?
Nannih cun kei in suam a si!
Asinan nannih in, ‹Ziangti zawngin so kan lo suam?› tiah nan ti.
Ṭhen hra ṭhen khat pawl le thawhhlawmpawl ah in suam a si.
9 Keimah in suam ruangah nannih cu camsiatnak hmangih camsiat nan si,
Ziangahtile nannih in keimah in suam,
Hi miphun pumpuluk hin.
10 Ka inn ih rawl a um theinak dingah,
Ṭhen hra ṭhen khat zaten ka thawhhlawm inn ah rak keng uh,
Cule van tukvirhpawl lo ăwnsakin
Thlawsuah dăwn cawk lo ka lo burh le burh lo in hniksak hnik uh, ralkap rualpawlih Jehovah in a ti.
11 Cule eiráltu ka lo kawksak ding,
Cule anih in nan lei rah a siatsuah lo ding ih,
Nan ló ih sabit khal nan hrangah rah loin a um lo ding, ralkap rualpawlih Jehovah in a ti.
12 Cule miphunpawl hmuahhmuah in mithlawsuak tiah an lo ti ding,
Ziangahtile duhnungza leiram nan nei ding, ralkap rualpawlih Jehovah in a ti.

Mipi Phunzainak

13 «Ka parih nan ṭawngkampawl hi an na a si, Jehovah in a ti.
Asinan nannih cun, ‹Nangmah dokalhin ziangso kan ṭawng,› tiah nan ti.
14 Nannih in,
‹Pathian rĕn hi zianghman ṭhathnemnak a um lo;
A thucah kan rak thlun le
Ralkap rualpawlih Jehovah hmaiih mininghangpawl bangih kan nun rero teh hi ziang hlawknak a um?
15 Cule mipuarthaupawl kha mithlawsuakpawl tiah kan ti,
Ziangahtile sualralnak a tuahtupawl an ṭhangso lawng si loin,
Pathian an hniksak ih an luat sapbai,› nan ti,» tiin.

Hngilhlonak Cazual

16 Cun Jehovah a ṭihzahtupawl cu pakhat le pakhat an beaw ih,
Jehovah in a ngaithla hai ih, a hna in a thei hai.
Jehovah ṭihzahtupawl le
A hmin ngaisangtupawl hrangah
A hmaiah hngilhlonak cazual cu ngan a si.
17 «Ka hlawnthil hleice ka tuah ni ah an zaten ka ta an si ding, ralkap rualpawlih Jehovah in a ti.
Cule mi in amah riantu a fapa a zuah bangin,
Anmah cu ka zuah hai ding.
18 Cun midingfel le misualrál karlak le
Pathian riantu le rian lo tu karlak na thliardang ding.

4

Pathian Ni Rapthlak

1 «Ziangahtile ngai hnik,
Rawhtitnak meipi vekih kāngin, ni cu a ra thleng a si.
Mipuarthau hmuahhmuah, a si, thilsual tuahtu hmuahhmuah cu cangpâwl vek an si ding.
Cule annih cu a ra thleng mi ni in a kangrál hai ding ih,
A hram siseh, a ṭêk siseh an hnenah tān ta a si lo ding, ralkap rualpawlih Jehovah in a ti.
2 Asinan nannih ka hmin ṭihzahtu hrangah
Dingfelnak Ni a suak ding ih,
A thlapawl ah damnak a um ding;
Cule nan fehsuak ding ih,
Câwinn ih câwpa nopawl vekin nan khir ding.
3 Misualrálpawl nan cīl ding,
Ziangahtile annih cu hi thil ka tuah ni ah
Nan kephah hnuaiih vutcâm ah an cang ding,
Ralkap rualpawlih Jehovah in a ti.
4 Ka siahhlawh Mosi Dān,
Israel hmuahhmuah hrangah Horeb ih a hnenih thu ka rak pek mi,
Ka sakhaw dānpawl le ka cīn le dānpawl kha máng ringring uh.
5 Ngai hnik, Jehovah ni rapthlak le tuksumza a ra thlen hlanah,
Nan hnenah profet Elijah ka thlah ding.
6 Cule anih in pupápawlih thinlung cu falepawl lamah a hawikirter ding ih,
Falepawlih thinlung cu pupápawl lamah a hawikirter ding.
Culole ka ra ding ih, leilung cu camsiatnak thawn ka vaw pang ding,» tiin.