About Bible Thianghlim | ©

BibleThianghlim – JONAH

Genesis Exodus Leviticus Numbers Deuteronomy Joshua Judges Ruth 1 Samuel 2 Samuel 1 Kings 2 Kings 1 Chronicles 2 Chronicles Ezra Nehemiah Esther Job Psalm Proverbs Ecclesiastes Song of Solomon Isaiah Jeremiah Lamentations Ezekiel Daniel Hosea Joel Amos Obadiah Jonah Micah Nahum Habakkuk Zephaniah Haggai Zechariah Malachi

Matthew Mark Luke John Acts Romans 1 Corinthians 2 Corinthians Galatians Ephesians Philippians Colossians 1 Thessalonians 2 Thessalonians 1 Timothy 2 Timothy Titus Philemon Hebrews James 1 Peter 2 Peter 1 John 2 John 3 John Jude Revelation

JONAH

  • A ngantu: Theih a si lo; Jonah a si men thei
  • A siartu: Israel
  • Thil cang mi ih huap cān: B.C. Kum zabi pariat hrawng

Jonah cabu hi a dang profet cabu tawipawl lakah a danglamhleice. Thucah si loin thuanthu a si.

Hi cabu hi amah Jonah ih ngan a si men thei, ziangruangahtile hi cabu sungih thuhla cipciar tampi hi amah Jonah lawngih theih mi an si zum a um.

Jonah in Jeroboam lalnak hnuaiah sak lam lalram a kauh ding thu a rak phuang (2Sp 14:25). Amai san ah Israel le Judah cu an doralpawl, Assiria telin, an ṭumsuk laiah, an ṭhangso.

Assiria umnak ram sungih khawpipawl lakih pakhat Nineveh khawpi ah dāntatnak thucah va sim dingih thupek a dawnnak in hi cabu hi a thăwk. A ra thleng ding mi dāntatnak hmangih mipi ralrinnak pe dingin Pathian in profet a thlah asile, an hrangah lungthlengnak ding lamzin a ăwnsak ih, dāntatnak hrial ding lamzin a ăwnsak ti Jonah in a thei.

Israel hrangih mirinum Jonah cu a tlânsuak riangri aw. Bung 1-nak in Jonah a tlanhloh thu le lăwng ihsi hlăwnsuah a sinak le ngapi ih a dawlh thu a sim. Bung 2-nak in ngapi sung ihsi Jonah in runsuahnak hrangih thla a cam thu a ngan. Bung 3-nak in Jonah in a thupek dawn mi a tlamtlinterzia le Nineveh khawmipawl an lung an thleng thu a rel. Bung 4-nak in Jonah le Pathian an biakawknak in cabu a khar. Pathian in Nineveh a zuah cu Jonah a thin a heng, cule Pathian in Jonah hnenah a lainatnak a zirh.

Jonah cabu in Pathian cu ziangkim tlun: tipi tlun, leilung tlun, tisuar tlun, nga tlun, thingkung le hrampi tlun, rannung tlunih Lal a sizia a phuanglang. Anih cu Israel tlun lawngah si loin, miphun dangpawl hmuahhmuah tlun khalih Pathian a si. Israel-mipawl parih a tuah zât in Nineveh khawmipawl par khalah thuṭhen theinak le ngaidam theinak a nei. Mi kip uktu le thuṭhentu ziangkimtithei Pathian cun thlaphang ko mi a tuah thei. Asinan Jonah cabu in Pathian cu lainatnak nei a sizia khal a langter. Abraham hnenih thu a tiamkam vekin, miphun dangpawl cu Israel hmangin thlawsuah pek a duh (Sem 12:3).

Pathian cun Jonah le lăwng mâwngtupawl a zuah hai ih, an lung an thleng tikah misualrál Nineveh khawmipawl khal a zuah hai. Anih cun a sersiam mi milai a duhdawt ih, lungthlengnak cān remcâng le hi dāntatnak pumpelhdān ding remcānnak a pe hai.

Thuhlawm Ṭhen

  • I. Bawipaih thupek ihsin Jonah a tlân, cule Bawipa in amah dawlhtu dingah ngapi a thlah (bung 1)
  • II. Runsuahnak hrangah Jonah thla a cam, cule Bawipa in ngapi pum sung ihsin a runsuak (bung 2)
  • III. Bawipaih thupek Jonah in a famkimter, cule Nineveh khawmipawl an sual an sir (bung 3)
  • IV. Pathian in Nineveh a zuah ruangah Jonah a riah a sia, cule Pathian in a lainatnak Jonah a zirh (bung 4)

1

Jonah-ih Thulunlonak

1 Amittai fapa Jonah hnenah Jehovah kamsuakthu a thleng ih, 2 «Tho aw, khawpi ropi Nineveh ah feh awla, cuih khawpi dokalhin ausuak aw; ziangahtile an sualralnak cu ka hnen a hung thleng a si,» tiah a ti. 3 Asinan Jonah cu Jehovah hnen ihsin Tarsis lamih tlânhlo dingin a tho. Joppa lamah a suk ih, Tarsis feh ding lăwngpi a hmu; cule to man a pe ih, Jehovah hnen ihsin Tarsis lamah an zawngih feh dingin lăwng sungah a lut.

Tifinriat ih Thlipi

4 Asinan Jehovah in tifinriat parah a nasazet mi thlipi a hrānter ih, tifinriat parah cun thlipi hran a nasatuk, cutin lăwngpi cu a kûai zikte.

5 Cun lăwng hnaṭuantupawl an lung a phâng; cule mi kip anmai pathian cio hnenah an ausuak ih, lăwng zângter dingin tifinriat ah thilri an hlăwn. Asinan Jonah cu lăwng hnuaitabik ah sukin, a rak zau ih, a itthat hluahhlo men.

6 Cule lăwng hotu cu a hnenah a ra ih, «Ziangtin so na ihthah hluahhlo men? Tho awla, na pathian ko aw; kan hlohrallonak dingah na pathian in in ngaihtuahsak tla a si mahna,» tiah a ti.

7 Cule pakhat le pakhat, «Ra uh, zawih ruangah hi harsatnak a cang ti thei dingah camcawhfung zûk uhsi,» tiah an tiaw. Camcawhfung an zûk ih, Jonah parah a tla. 8 Cun annih in a hnenah, «Zangfahten in sim hnik aw! Zo ruangah hi harsatnak kan parih a thlen? Ziang hnaṭuan na si? Khui rammi na si? Ziang miphun na si?» tiah an ti.

9 Cule anih in an hnenah, «Keimah cu Hebru-mi ka si ih, tifinriat le khawmual tuahtu van Pathian, Jehovah ṭihtu ka si,» tiah a ti.

Tifinriat ah Jonah an Hlăwn

10 Cun milaipawl cu an thin a phâng tuk lawmmam ih a hnenah, «Ziangah hihi na rak tuah?» tiah an ti. Ziangahtile milaipawl cun amah ih a rak sim hai ruangah anih cu Jehovah hnen ihsin a tlân a si ti an thei. 11 Cun annih in a hnenah, «Tifinriat a daih theinak dingah na parah ziang kan tuah ding?» tiah an ti. Ziangahtile tifinriat suar a nasa ih, thli hrang le a nasa deuhdeuh.

12 Cule anih in an hnenah, «I cawi uhla, tifinriat ah i hlăwn uh; cun tifinriat cu nan hrangah daiten a um ding. Ziangahtile keimah ruangah nan parah himi thlipi a thleng a si ti ka thei,» tiah a ti hai.

13 Sikhalsehla pacangpawl cun an lăwng cu khawmual lam pan dingin nasaten an hlau rero, asinan an ti thei cuang lo. Ziangahtile tifinriat cu a sawp ih, anmah hawihin thlipi a hrang. 14 Cutikah Jehovah hnenah an ausuak ih, «Maw Jehovah, kan lo ngen a si, hi paih nunnak ruangah in hlorálter hram hlah awla, mawh nei lo thisen mawh kan parah thlengter hram hlah. Ziangahtile, Maw Jehovah nang cun na lunghmui zawng na tuah a si,» tiah an ti. 15 Cule Jonah cu an cawi ih tifinriat ah an hlăwn, cule tifinriat suar sawp luihlo cu a reh depdep. 16 Cun milaipawl cun nasazetin Jehovah an ṭih, Jehovah hnenah thawiawknak an hlan ih, thutiampawl an tuah.

Jonah Thlacamnak le Runsuahnak

17 Cule Jonah dawlhtu dingah Jehovah in nga tumpi a rak timtuah. Cun Jonah cu ngapi pum sungah ni thum le zan thum sung a um.

2

Jonah Thla a Cam

1 Cun ngapi pum sung ihsin Jonah in Jehovah a Pathian hnenah thla a cam. 2 Jonah in,

«Ka zăwnzaihnak ruangah Jehovah hnenah ka au ih,
Anih cun i rak sâng.
Sheol pum sung ihsin ka au ih,
Nang cun ka aw na thei.
3 Ziangahtile nang in tifinriat laifang,
Ti thûk sungah i hlăwn ih,
Tilian cun i kulh;
Na tisuar tumpi pi le na ti hlăwkaw hmuahhmuah cu ka par ihsin an luang.
4 Cun kei in, ‹Na mithmuh ihsin hlăwnhloh ka rak si;
Cuticingkhalin na temple thianghlim lam ka hawisal ding,› tiah ka ti.
5 Thi zik ko tipi in i kulh ih,
Tipi thûk in in tuam a si;
Timân in ka lu in zēl.
6 Tlang hramah ka sukthla;
Leilung le a ṭhuampawl cu ka kimvelah an um kumkhua.
Sikhalsehla, Maw ka Pathian, Jehovah, nang in ka nunnak cu siatnak ihsin na dirsuak zo.
7 Ka thinlung a cauh tikah,
Jehovah ka máng;
Cule ka thlacamnak cu na hnenah,
Na temple thianghlim sung a thleng.
8 Santlailo milempawl ngaihsaktupawl cun
Anmai lainatduhdawtnak an thlauthla.
9 Asinan kei cun lungawi thu sim aw thawn na hnenah rai ka thawi ding;
Thu ka rak tiam mi ka pe ding.
Runsuahnak cu Jehovah ta a si,»

tiah a ti.

10 Cule Jehovah in ngapi thu a pe ih, Jonah cu khawmual ah ngapi cun a luak.

3

Nineveh ah Jonah Thu a Sim

1 Jonah hnenah a vei hnihnak Jehovah kamsuakthu a thleng ih, 2 «Tho awla, khawpi ropi, Nineveh ah feh aw, cule ka lo sim ding mi thucah kha va phuang aw,» tiah a ti.

3 Cule Jehovah kamsuakthu bangtukin Jonah cu a tho ih, Nineveh ah a feh. Nineveh khua cu akhawpi ropi nasazet a si ih, a kauh lam cu ni thum feh a si. 4 Cule a ni khatnak ah Jonah cu khawpi sungah a lut thăwk. Cule a ausuak ih, «Atu ihsin ni 40 sungah Nineveh cu tisiat a si ding!» tiah a ti.

3:3a khawpi ropi nasazet: Hebru ah Pathian khawpi ropi ti a si.

Nineveh Mipi in an Zum

5 Cule Nineveh mipi in Pathian an zum, rawlulh an phuang ih, a fatebik in a tumbik tiang buri an sĭn. 6 Cun Nineveh siangpahrang hnenah cuih thuthang a thlen tikah, a siangpahrang tokham ihsin a tho ih a siangpahrang hnipuan a hlît, cule buri a sĭn ve ih, vutcâm lakah a to. 7 Cule siangpahrang le a mipawimawhpawlih thusuah vekin, Nineveh khawpi sungah tlang a auter ih, thu a phuang. Cuih thuthan mi cu hitin a si: minung in siseh, rannung in siseh, ranpi rual in siseh, rante rual in siseh zianghman tep hlah hai seh; zianghman eiter hlah uhla, ti khal inter hlah uh. 8 Cuhnakin minung le rannung pawl cun buri khuhaw sawn cio hai sehla, nasazetin Pathian ko hai seh. A si, mi kip in an nundān ṭhalo le an kut ih um nunrawnnak cu bansan hai seh. 9 Kan hlohrallonak dingah Pathian cun hawikirin le lamlêtsalin a nasazet mi a thinhengnak cu a lahlo mahna.

10 Cun Pathian in an ṭhatlonak lamzin ihsin an hawikir ti an thil ti mipawl a hmuh tikah, an parih thlengter dingih a phuan mi siatnak thuhla ah Pathian a lamlêtsal, cule cumi cu a thlengtersal lo.

4

Jonah Thinhengnak le Pathian Ngilneihnak

1 Asinan cumi cun Jonah a lunghmuiter lo tuk lawmmam ih, a thin a heng. 2 Cule Jehovah hnenah thla a cam ih, «Maw Jehovah, ka ram ih ka um laiih ka rak lo sim vek kha hihi a si lo maw? Curuangah hi hlanah Tarsis ah ka rak tlân a si; ziangahtile nang cu zangfahnak nei, zahngainak nei Pathian, thinfûal, lainatduhdawtnak i khat, siatnak tuah ding ihsi lamlêthmang na si ti ka rak lo thei. 3 Curuangah atu ah, Maw Jehovah, ka hnen ihsin ka nunnak la hram aw, ziangahtile ka hrangah nun hnakin thih a ṭhasawn,» tiah a ti.

4 Cun Jehovah in, «Na thinheng hi a dik maw si?» tiah a ti.

5 Cule Jonah cu khaw lengah a feh ih, khawpi nisuahnak lamah a to. Cu tawkah amai hrangah thlamte a tuah ih, khawpi sungah ziang a cang ti hmu dingin, a hnuai zârhnemah a to. 6 Cule Jehovah Pathian in kung pakhat a timtuah ih, Jonah cu zârhnem in a harsatnak dêmter dingah a kiangah a ṭoter. Cule cuih kung ruangah Jonah cu a lung a awi zet.

7 Asinan a thaizing khawvan zawngah, Pathian in pangāng a timtuah ih, cuih pangāng cun cuih kung cu a ei ih a vuai. 8 Cun hitin a si, ni a suah tikah, Pathian in a cak zet mi nisuahnak lam thli a timtuah. Cule ni in Jonah-ih lu a sat, cutin Jonah cu a cau zet. Jonah in thih a duh ruangah, «Ka hrangah nun hnakin thih a ṭhasawn,» tiah a ti.

9 Cun Pathian in Jonah hnenah, «Cuih kung pakhat thuhla ih na thinheng hi a dik maw si?» tiah a ti.

Cule anih in, «Thil dik a si ko, thihnaktlak khawpin ka thin a heng,» tiah a ti.

10 Asinan Jehovah in, «Hi kung, a hrangih zianghman na ṭuan lo, nangmai ṭoter khal si lo, zan khat thilthu ah amah ten a kho ih, zan khat ah amah teih a thi mi cuih kung parah lainatnak na nei. 11 Mai vawrh lam kut le keh lam hman ṭhenfel thei lo, mi ting khat le thawngkul hnak tam minung umnak le rannung rual tampi umnak khawpi ropi Nineveh cu lainat loin ka um ding maw?» tiah a ti.