About Bible Thianghlim | ©

BibleThianghlim – LAIRELTU

Old Testament

Genesis Exodus Leviticus Numbers Deuteronomy Joshua Judges Ruth 1 Samuel 2 Samuel 1 Kings 2 Kings 1 Chronicles 2 Chronicles Ezra Nehemiah Esther Job Psalm Proverbs Ecclesiastes Song of Solomon Isaiah Jeremiah Lamentations Ezekiel Daniel Hosea Joel Amos Obadiah Jonah Micah Nahum Habakkuk Zephaniah Haggai Zechariah Malachi

New Testament

Matthew Mark Luke John Acts Romans 1 Corinthians 2 Corinthians Galatians Ephesians Philippians Colossians 1 Thessalonians 2 Thessalonians 1 Timothy 2 Timothy Titus Philemon Hebrews James 1 Peter 2 Peter 1 John 2 John 3 John Jude Revelation

LAIRELTU

12345678910
11121314151617181920
21

• A ngantu: Theih a si lo
• A huap sung cān: B.C. 1360-1085 hrawng
• Ngan kum: B.C. 1000 hrawng

Hi cabu hin Joshua le siangpahrangpawl karlak (B.C. 1360-1050 hrawng) tikcucān sung a huap. Hih cān sungih Israel hotupawl cu «Laireltupawl» tiih kawh an si. Ziangruangahtile annihpawl hi siangpahrangpawl um hlanih Israel hotu dingih Pathian ih a dĭnsuah mi an si. Annihpawl hi lairelnak hna lawng ṭuan an si lo ih, ralkappawl hotu khal an si. Annihpawl cu Israel ramhnen pakhat khat in Israel an nehsawh tikah runsuaktu dingih Pathian ruat mi an si. Siangpahrangpawl vekin a sangsángten Israel pumpi ah lai an rel ve lo. Israel ram ah ṭum khat ah hmun dangdangah laireltu dangdang an um cān khal a um. An ramhnen miphun dangpawl in Israel an palbĕt leuhleuh ṭheu, cucu Pathian in Israel nunsimnak ih a rak hman mi a si.

Israel-mipawl in Pathian an phatsan leuhleuh ih, Pathian dangpawl an rak thlun ruangah Pathian in nun a rak sim ṭheu hai. Hi cabu hin Israel-mipawl in Kanaan-mipawl an băng deuhdeuh nak ruangih an tluksiat sinsinnak thu a rel. Bung 1-nak ah, Israel hnámpawl in an ram ihsin Kanaan-mipawl an dawisuak thei lo thu kan hmu. Bung 2:1-10 sungah Israel-mipawlih thulunlonak le căwkpawlh nun ruangih Pathian a lungawi lo thu kan hmu. Hi cabu tluansuak ah Israel-mipawlih nundān cu hibang tukin a si: (1) Pathian mithmuhih thil ṭhalo tuahnak (3:7), (2) Pathian hremnak (3:8), (3) Pathian an kawhnak (3:9a), (4) Pathian runsuahnak (3:9b) le (5) Ram daihnak (3:11). Hi thupawl hi 2:11-17 sung khalah tawi famkim zetin a lang ih, hi cabu sungah kan hmusal leuhleuh. Bung 3:7-16:31 sungah laireltupawlih thuhla kan hmu.

Laireltupawl san sungih thil cang mi tampi lak ihsin thuanthu pawimawh zet pahnih cu hi cabu netnakah ngan an si (bung 17-18 le 19-21). Pathian an ngaihthah ih, «Mi kip in anmai mit ih dik an ti mi vekin an tuah,» (17:6; 21:25) ruangah, Kanaan-mipawl vekin Israel-mipawl cu ziangtluk rangin an hlothlau ti cu hi thuanthu pahnih hin in sim. Thuṭhentu tamsawn cu mipi hnakin an ṭha cecuang lo. Hi cabu-ih thupi cu minungpawl an rinum lo lai khalih Pathian rinumnak a si.

1

Israel-mipawl in Kanaan-mipawl an Do

1 Cun Joshua a thih hnuah hitin a si, Israel tefapawl in, «Kanaan-mipawl do dingah zo so kan hrangah a so hmaisabik ding?» tiin Jehovah an sut.

2 Cule Jehovah in, «Judah a feh pei. Ngai hnik uh, a kut ah ram ka pe zo a si,» tiah a ti.

3 Cun Judah in a unaupa Simeon hnenah, «Kanaan-mipawl kan donak dingah ka covo ram ah ka zawngah hung so ve aw. Cule kei khal na covo ram ah na zawngah ka feh ve ding,» tiah a ti. Cule Simeon cu amai zawngah a feh. 4 Cule Judah cu a hung so ih, Jehovah in Kanaan-mipawl le Periz-mipawl cu an kut ah a pe, cule Bezek ah pacang 10000 an that. 5 Bezek ah Adoni-Bezek an hmu ih, amah cu an do, cule annih in Kanaan-mipawl le Periz-mipawl an neh. 6 Asinan Adoni-Bezek cu a tlân ih, amah cu an dawi, cule an kai. Cule a kut zungpipawl le a ke zungpipawl an tansak. 7 Adoni-Bezek cun, «Kut zungpipawl le ke zungpipawl tansak mi siangpahrang 70 in ka cabuai hnuaiih rawl ṭil an sar ṭheu, keimai rak tuah mi vekin Pathian in i lehrūl a si hi,» tiah a ti. Cun anih cu Jerusalem ah an hruai ih cu tawkah a thi.

8 Cun Judah tefapawl in Jerusalem an do ih an la, ralnâm hriam in Jerusalem cu an do ih khawpi cu mei in an ur. 9 Cule cuṭhehin Judah tefapawl cu tlang ram, Negev le phairawn ih a cêng mi Kanaan-mipawl do dingah an suk. 10 Cun Judah cu Hebron ih a cêng mi Kanaan-mipawl do dingah a feh. Hebron hmin cu a hlanah cun Kirjath Arba ti a si. Cule Sheshai, Ahiman le Talmai tla an that.

11 Cutawk ihsin Debir khua luahtupawl doin an feh. A hlanah cun Debir khaw hmin cu Kirjath Sefer ti a si.

12 Cun Kaleb in, «Kirjath Sefer do ih a latu zokhal cu a nupi dingah ka fanu Akhsah ka pe ding,» tiah a ti. 13 Cule Kaleb-ih nau Kenaz-ih fapa Othniel in cuih khua cu a la, cule a nupi ah a fanu Akhsah cu Othniel a pek. 14 Cun hitin a si, a hnenih cu nu a thlen tikah, cu nu in lóram pakhat a pa dil dingin Othniel a năwr. Cu nu cu a lāk par ihsin a ṭum ih, Kaleb in a hnenah cun, «Ziang so na duh?» tiah a sut.

15 Cule anih in a hnenah, «Thlawsuah i pe aw, Negev ih hmun i pek ta cengceng cu cirhti khal i pe lawlaw aw,» tiah a ti. Cule Kaleb in anih cu cirhti tlunta le cirhti hnuaita a pe.

16 Mosi-ih pu Keni tefapawl cu Arad kiang Negev ih Judah Ramṭhing ah, Judah tefapawl thawn Ṭhulhfau Khawpi ihsin an hung so. Cule an feh ih mipipawl lakah an cêng. 17 Cule Judah cu a unaupa Simeon zawngah a feh ih, Zefthah khua ih cêng mi Kanaan-mipawl an do, cule cuih khua cu an ṭhiatbăl thluh. Curuangah cuih khaw hmin cu Hormah tiah kawh a si. 18 Judah khal in Gaza khua le a ramri tiang, Ashkelon khua le a ramri tiang, cule Ekron khua le a ramri tiang a la. 19 Cutin Jehovah cu Judah hnenah a um. Cule tlangparmipawl an dawisuak. Asinan thir ránglêngpawl an neih ruangah, phaikuam ih cêngpawl cu an dawisuak thei lo. 20 Cun Mosi in a rak sim vekin, Hebron cu Kaleb an pe. Cule Anak-ih fapa pathum pawl cu cutawk ihsin Kaleb cun a hnawhsuak hai. 21 Asinan Benjamin tefapawl cun Jerusalem ih a cêng mi Jebus-mipawl an dawisuak lo. Cutin Jebus-mipawl cu tuihni tiangin Benjamin tefapawl zawngah Jerusalem ah an cêng.

22 Cule Joseph-ih sungza khal Bethel doin an so ih, an hnenah Jehovah a um. 23 Cun Joseph sungza cun Bethel thlingthla dingah mipapawl an thlah. A hlanah cun cuih khawpi hmin cu Luz a si. 24 Cule thlingthlatupawl in mipa pakhat khawpi ihsi ra suak an hmu, a hnenah, «Zangfahten khawpi luhnak in hmuh aw, cule zahngainak na parah kan langter ve ding,» tiah an ti. 25 Cutin anih cun khawpi luhnak a hmuh hai ih, khawpi cu ralnâm hriam in an do. Asinan cu pa le a sungkua hmuahhmuah cu an thlahsuak. 26 Cule cu pa cu Heth-mipawlih ram ah a feh, khawpi a dĭn ih, a hmin ah Luz a sak, cucu tuihni tiangih a hmin a si.

Kanaan-mipawlih Ngunkhuai Peknak

27 Cule Manasseh cun Beth Shean khua luahtupawl le a khawṭekpawl siseh, Taanak khua le a khawṭekpawl siseh, Dor khaw luahtupawl le a khawṭekpawl siseh, Ibleam khaw luahtupawl le a khawṭekpawl siseh, Megiddo khaw luahtupawl le a khawṭekpawl siseh a dawisuak hai lo, ziangahtile Kanaan-mipawl cun cuih ram suahsan an tum hrimhrim lo. 28 Cule hitin a si, Israel a cak tikah, Kanaan-mipawl cu ngunkhuai pekter an si, asinan anmah cu an dawisuak thluh lo.

29 Efraim khal in Gezer khua ih a cêngtu Kanaan-mipawl a dawisuak lo. Cutin Kanaan-mipawl cu Gezer khua ah anmah lakah an cêng.

30 Zebulun khal in Kitron khua ih um mipawl le Nahalol khua ih um mipawl a dawisuak lo. Cutin Kanaan-mipawl cu anmah lakah an cêng ih, ngunkhuai pekter an si.

31 Asher khal in Akkho khaw luahtupawl siseh, Sidon khaw luahtupawl siseh, Ahlab khaw luahtupawl siseh, Akzib khaw luahtupawl siseh, Helbah khaw luahtupawl siseh, Afik khaw luahtupawl siseh, Rehob khaw luahtupawl siseh a dawisuak lo. 32 Cule Asher-mipawl cu ram luahtu Kanaan-mipawl lakah an cêng. Ziangahtile annihpawl cu an dawisuak lo a si.

33 Naftali khal in Beth Shemesh khaw luahtupawl le Beth Anath khaw luahtupawl a dawisuak lo, ram luahtu, Kanaan-mipawl lakah an cêng sawn. Asinan Beth Shemesh khaw luahtupawl le Beth Anath khaw luahtupawl cu anmah hnenih ngunkhuai pekter an si.

34 Cule Dân tefapawl cu Amor-mipawl in tlang ram ah hranhramin an umter, ziangahtile annihpawl cu phaikuam ih sukthlak an siang lo. 35 Cule Amor-mipawl cu Heres Tlang, Aijalon ah le Shaalbim ihsi suah an tum hrimhrim lo. Sikhalsehla Joseph sungza-ih cahnak a ṭhan vivo tikah, annih cu ngunkhuai pekter an si.

36 Cun Amor-mipawlih ramri cu Akrabbim khaw sohnak ihsin le Sela khua ihsin a so vivo.

2

Israel-ih Thulunlonak

1 Cun Jehovah-ih vancungmi cu Gilgal khua ihsin Bokhim khua ah a hung so ih, «Izip ram ihsin nan pupápawl hnenih sia ka rak săm mi ram ah ka lo hruai. Cule kei in, ‹Nangmah thawi ka thukham ka siatbăl dah hrimhrim lo ding. 2 Cun hi ram luahtupawl thawn thukham nan tuah lo pei, an biakṭhengpawl nan siatbăl pei,› ka rak lo ti. Asinan ka aw nan ngaithla lo. Ziangahso hivekih nan rak tuah? 3 Curuangah keimah thotho in, ‹Anmah cu nan hmai ihsin ka dawisuak lo ding, asinan annih cu nan hnak hrangah hling an si ding ih, an pathianpawl cu nan hrangah tháng an si ding,› tiah ka lo ti,» tiah a ti. 4 Cun hitin a si, Jehovah-ih vancungmi in Israel tefapawl hmuahhmuah hnenih hih thupawl a sim tikah, mipi cu an aw an suah ih, an ṭap. 5 Cun cutawk hmun cu a hmin ah ^aBokim tiah an sak, cule cu tawkah Jehovah hnenah rai an thawi.

2:5^a Bokim: A sullam cu ṭap tinak a si.

Joshua Thihnak

6 Cule Joshua in mipi a fehter hnuah, Israel tefapawl cu ram va la dingah ro ih an co mi cio ah an feh. 7 Cutin Joshua damsung hmuahhmuah le Israel hrangih Jehovah in a rak tuah mi hna ropi hmuahhmuah a hmutu Joshua hnuih a nung mi upapawl damsung cu mipi in Jehovah an rian. 8 Cun Nun-ih fapa Joshua, Jehovah siahhlawh cu kum 110 a ti ah a thi. 9 Cule amah cu Gaash Tlang sak lam, Efraim tlang ram ih ro ih a co mi ramri sung Timnath Heres khua ah an phum. 10 Cule cuih san minung hmuahhmuah khal an pupápawl hnenah fĭnkhawm an si, cule anmai hnuah Jehovah thei lo tu le Israel hrangih a rak tuah mi thei lo tu san dang minung an ra suak.

Israel Rinumlonak

11 Cun Israel tefapawl cun Jehovah mithmuhah thil ṭhalo an tuah ih, Baalpawl an rian. 12 Cule Izip ram ihsin a rak hruaisuaktu an pupápawlih Pathian Jehovah an tlansan ih, an kiangkap mipawlih pathianpawl lakih pathianpawl cu an thlun. Cule cupawl hmaiah an băwkkhup ih, Jehovah thinhengnak an căwktho. 13 Jehovah an tlansan ih, Baal le Ashtoreth-pawl an rian. 14 Cule Jehovah thinhengnak cu Israel parah a so. Cutin anih in anmah rămtupawlih kut ah annihpawl cu a pek, cule an kiangkapih an ralpawl kut ah annih cu a zuar, cutin annih in an ralpawl cu an celh lo. 15 Jehovah in a rak sim zo le Jehovah in an hnenih sia a rak săm zo vekin, an fehnak kip ah Jehovah kut cun an parah vanduainak a thlĕn. Cule annih cu nasazetin an van a sâng.

16 Sikhalsehla, anmah rămtupawlih kut ihsin runsuak dingah Jehovah in laireltupawl a dĭnsuak. 17 Cuticingkhalin an laireltupawl an ngaithla cuang lo, pathian dangpawl hnenah hlawhhlannak an tuah ih an hmaiah an băwkkhup sawn riangri. An pupápawl in Jehovah thupekpawl thlunih an rak fehnak lamzin ihsin rang zetin an pial, an pupápawl vekin an tuah ve lo. 18 Cule Jehovah in an hrangih laireltupawl a dĭnsuah tikah, Jehovah cu laireltu hnenah a um ih, laireltu damsung hmuahhmuah cu an ralpawlih kut sung ihsin anmah a runsuak. Ziangahtile anmah palbĕttu le vansanglamtertupawl ruangih an aihramnak cun Jehovah cu anmah zangfah ding ko a tuah. 19 Cule hitin a si, laireltu a thih tikah, an dungtawlh ih, pathian dangpawl rian dingin le an hmaiih băwkkhup dingin, pathian dangpawl an thlun ih, an pupápawl hnakih bawrhhlawh sawnin an nung. An thil ti mipawl le an luhlulnak lamzin khal an cawlhsan cuang lo.

20 Cun Israel parah Jehovah thinhengnak cu a so, cule anih in, «Hi miphun in an pupápawl thu ka rak pek mi ka thukham an pahbăl ih, ka aw an ngaithla lo, 21 curuangah kei khal in, Joshua in a thih tikih a tān ta mi miphunpawl lakih mi pakhat hman an hmai ihsin ka dawisuak ve nawn lo ding, 22 an pupápawl ih an rak zawh bangin, Jehovah lamzinpawl an zawh maw zawh lo ti Israel hniksaknak dingah anmah ka hmang ding,» tiah a ti. 23 Curuangah Jehovah in cuih miphunpawl cu dawisuak lohli loin, a umter hai ih, Joshua kut khalah a rak ap hai lo.

3

Ram ah Miphunpawl an Tâng

1 Cun Kanaan ram ih ral doawknak pakhat hman thei lo Israel hmuahhmuah cu miphun dangpawl hmangin a hniksak theinak dingih Jehovah in a tanter mi miphun dangpawl cu hipawl hi an si. 2 Israel tefapawlih tesinfanaupawl, tuihlanih ral doawknak zianghman rak thei lo pawl kha ral dodān zirh an sinak ding liolio ih tanter mi an si. 3 Cupawl cu Filisṭia-mipawlih lal panga, Kanaan-mi hmuahhmuah, Sidon-mipawl le Baal Hermon Tlang ihsin Hamath khawluhnak tiang, Lebanon Tlang ih cêng Hiv-mipawl an si. 4 Cule annih cu Jehovah in Mosi kut in an pupápawl hnenih thu a rak pek zo mi thupekpawl tla an thlun maw thlun lo ti theihnak dingah Israel hniksaknak ih a tān mi an si.

5 Cutin Israel tefapawl cu Kanaan-mipawl, Heth-mipawl, Amor-mipawl, Periz-mipawl, Hiv-mipawl le Jebus-mipawl lakah an cêng. 6 Cule an fanupawl cu an nupi dingah an lâk ih, an fanupawl cu an fapapawl an pe. Cule annih cun an pathianpawl an rian.

Othniel

7 Cutin Israel tefapawl cun Jehovah mithmuhah thil ṭhalo an tuah. Jehovah an Pathian an hngilh ih, Baalpawl le Asherah-pawl an rian. 8 Curuangah Jehovah thinhengnak cu Israel parah a so ih, Mesopotamia siangpahrang Kushan-Rishathaim kut ah annihpawl cu a pek. Cule Israel tefapawl in Kushan-Rishathaimmipawl cu kum riat sung an rian. 9 Israel tefapawl cu Jehovah hnenih an ṭah tikah Jehovah in Israel tefapawl hrangah, anmah rak runsuaktu Kenaz-ih fapa Othniel, Kaleb naupa cu runsuaktu ah a ruat. 10 A parah Jehovah Thlarau a thleng ih, Israel tlunah lai a rel. Anih cu raldonak ah a feh ih Jehovah in a kut ah Mesopotamia siangpahrang Kushan-Rishathaim cu a pek. Cule a kut in Kushan-Rishathaim cu a neh. 11 Cutin ram cu kum 40 sung a dai. Cun Kenaz-ih fapa Othniel cu a thi.

Ehud

12 Cule Israel tefapawl cu Jehovah mithmuhah thil ṭhalo an tuahsal. Cun Jehovah mithmuhih thil ṭhalo an tuah ruangah, Jehovah in Israel dokalhin Moab siangpahrang Eglon a cakter. 13 Cun Eglon cun Ammon tefapawl le Amalek tefapawl a hnenah a khawm, an feh ih Israel an neh. Cule Ṭhulhfau Khawpi-ih neih thil a lâk. 14 Cutin Israel tefapawl in kum hleiriat sung Moab siangpahrang Eglon an rian.

15 Asinan Jehovah hnenih Israel tefapawl an ṭah tikah, Jehovah in an hrangah Benjamin-mi Gera-ih fapa Ehud, kehtlakpa cu runsuaktu ah a ruat. Amai hnenin Israel tefapawl in Moab siangpahrang Eglon hnenah laksawng an kuat. 16 Cun Ehud in a hrangah dawng khat sau, kap hnih hriam nâm a tuah ih cumi cu a vawrh lam tâi parih a hnipuan hnuaiah a ṭawn. 17 Cutin Moab siangpahrang Eglon hnenah laksawng a keng. Eglon cu pa thau zet a si. 18 Cule laksawng pek a ṭheh tikah, laksawng phurtu milaipawl cu a suakter hai. 19 Asinan amah tu cu Gilgal ih lungto milimpawl sernak hmun ihsin a kirsal ih, «Maw siangpahrang, na hrangah thuthup thucah ka nei,» tiah a ti.

Siangpahrang in, «Daiten um!» tiah a ti. Cule amah kiltupawl cu a hnen ihsin an fehsuak.

20 Cule anih cu inn tlunta a bulpak pindan dai ih a to laiah Ehud cu a hnenah a ra. Cun Ehud in, «Na hrangah Pathian hnen ihsin thucah pakhat ka nei,» tiah a sim. Cun siangpahrang cu a tonak ihsin a tho. 21 Cun Ehud cu a keh lam kut a suah ih a vawrh lam tâi ihta nâm a la, cule a nâm cun siangpahrang pum ah a sun. 22 A hlăwk tiangin a fáng thawn a lut ih a thau in a fáng a khuh. Ziangahtile nâm cu a pum ihsin a lasuak thei lo, cule a sungrilpawl an pawt. 23 Cun Ehud cu hulhliap lamah a suak ih, a dungih inn tlun sângkapawl cu a khar ih, a kalh hai.

24 A fehsuak tikah, Eglon-ih siahhlawhpawl cu an ra, cule ngai hnik, inn tlun sângkapawl cu kalhawin a um ti an hmu. Cutikah annih in «Anih hi pindan dai ah a daileng lai a si men ding,» tiah an ti. 25 Cutin an beidăwng tiangin an hngak, zoh hnik, anih cun inn tlun pindan sângkapawl ăwn ti a nei lo. Curuangah tawhfung an la ih an áwng. Cule cu tawkah an pu cu zial ah tlu ih thiin a rak um.

26 Asinan an khawtlai sungah Ehud cu a rak tlânsuak ih lungto milim sernak a lan ih, Seirah ah a tlân. 27 Cule hitin a si, a thlen tikah Efraim tlang ram ah tuupa ki a phaw ih, Israel tefapawl cu tlang ihsin amah thawn an suk, cule anih in annihpawl cu a hruai. 28 Cun an hnenah, «I thlun uh, ziangahtile Jehovah in nan ral a si mi Moab rammipawl cu nan kut ah a lo pe zo,» tiah a ti. Cutin a dung thlunin an suk, Moab fehnak Jordan kāipawl cu an kulh ih zohman fehtlăng an siang lo. 29 Cule cumi laiah Moab mi, micak le miralṭha hlir pacang 10000 hrawng an that, mi pakhat hman an tlânsuak lo. 30 Cutin cuih ni ah Moab cu Israel kut hnuaiah a duai. Cule ram cu kum 80 sung a dai.

Shamgar

31 Ehud hnuah Anath-ih fapa Shamgar a lang, anih cun câwcang khalhnak fung in Filisṭia pacang 600 a that, cule anih khal in Israel a runsuak ve.

4

Deborah le Barak

1 Ehud a thih tikah, Israel tefapawl cun Jehovah mithmuhah thil ṭhalo an tuah lala. 2 Cule anmah cu, Hazor khua ih lal, Kanaan siangpahrang Jabin kut ah Jehovah in a zuar hai. Jabin-ih ralkappawl hotu lubik cu Harosheth Hagoyim khua ih cêng Sisera a si. 3 Cule Jabin cun thir ránglêng 900 a nei ih, kum 20 sung Israel tefapawl râwng zetin a palbĕt hai ruangah, Israel tefapawl cu Jehovah hnenah an ṭap.

4 Cun nunau profet Deborah, Lapidoth-ih nupi cu cumi laiah Israel tlunah lai a rel. 5 Cule anih cu Efraim tlang ram ih a um mi Ramah le Bethel karlakih Deborah-ih ṭhulhfau kung hnuaiah a to. Cule Israel tefapawl cu a hnenah an thu lairelsak dingin an so. 6 Cun Deborah in Naftali ram Kedesh ihsin mi a thlah ih Abinoam-ih fapa Barak cu a ko, cule a hnenah, «Israel-ih Pathian Jehovah in, ‹Feh awla, Tabor Tlang lam va naih aw, Naftali fapapawl le Zebulun fapapawl lak ihsin mipa 10000 na zawngah hruai aw. 7 Cule nangmah dokalhin Sisera, Jabin-ih ralkappawl hotu lubik cu a ránglêngpawl le a mi burpi thawn Kishon Tiva ah na hnen lam ka naihter ding. Cule amah cu na kut ah ka lo pe ding,› tiin thu a lo pe a si lo maw?» tiah a ti.

8 Cule Barak cun a hnenah, «Ka hnenih na feh ding a si ahcun, ka feh ding, asinan ka hnenih na feh lo ding asile, ka feh lo ding!» tiah a ti.

9 Cule anih in, «Na hnenah ka feh tengteng ding. Sikhalsehla na fehnak lam tluanah na hrangah sunlawinak a um lo ding, ziangahtile Jehovah in nunau pakhat kut ah Sisera a zuar ding,» tiah a ti. Cun Deborah cu a tho ih Kedesh khaw lamah Barak zawngah a feh. 10 Cule Barak in Kedesh khua ah Zebulun le Naftali cu a ko hai. Anih cu a thu hnuaiih um mipa 10000 thawn a so ih, a zawngah Deborah a feh.

11 Cun Mosi-ih pu Hobab-ih tefapawl lakih Keni-mi Heber cu Ken-mipawl lak ihsin a thiarfihlimaw ih, Kedesh khaw kiangih a um mi Zaanaim ram ih elon thingkung kiangah a puanthlam a zar.

12 Cule Abinoam-ih fapa Barak cu Tabor Tlang ah a so zo ti Sisera an sim. 13 Cule Sisera cun a ránglêngpawl hmuahhmuah, thir ránglêng 900 le a zawngih um mipi hmuahhmuah cu Harosheth Hagoyim khua ihsin Kishon Tiva tiang a fĭnkhawm.

14 Cun Deborah in Barak hnenah, «Tho aw! Ziangahtile tuihni hi Jehovah in na kut sungih Sisera a lo pek ni a si. Jehovah cu na hmaiah a feh a si lo maw?» tiah a ti. Cutin Barak cu amah thluntu mipa 10000 thawn Tabor Tlang ihsin a suk. 15 Cule Jehovah in Sisera le a ránglêngpawl hmuahhmuah le a ralkappawl hmuahhmuah cu ralnâm hriam in Barak hmaiah a vaivuanter hai, cule Sisera cu a ránglêng ihsin a ṭum ih ke in a tlân. 16 Asinan Barak cun ránglêngpawl le ralkappawl cu Harosheth Hagoyim khua tiangin a dawi, cule Sisera-ih ralkappawl hmuahhmuah cu ralnâm hriam hmangin an tlu, mi pakhat hman an tâng lo.

Jael in Sisera a That

17 Sikhalsehla Sisera cu Ken-mi Heber-ih nupi, Jael-ih puanthlam lamah ke in a tlânsia. Ziangahtile Hazor siangpahrang Jabin le Keni-mi Heber-ih sungkua karlakah daihnak a um. 18 Cule Jael cu Sisera táwng dingah a fehsuak ih a hnenah, «Ra pial aw, ka bawipa, ka hnenah ra pial aw, ṭih hlah,» tiah a ti. Cule a puanthlam sungih a pialluh hnuah amah cu puan a khuh.

19 Cule anih in a hnenah, «Ka ti a hāl ruangah zangfahten in ding tidai málten i pe aw,» tiah a ti. Cutikah Jael in hnawi bawm a áwng ih in ding a pe, cule amah cu a khuh. 20 Cule Sisera in a hnenah, «Puanthlam sângka ah ding awla, zo simaw ra in, ‹Hi tawkah mi pakhat tal an um maw?› tiin an lo suh asile, ‹Um lo,› rak ti aw,» tiah a ti. 21 Cun Heber-ih nupi Jael cu a kut in puanthlam khenkilhnak le sobul a la ih, Sisera hnenah dimten a feh, cule khenkilhnak cu a depdep ah a khen. Cumi cu leilung ah a tlăng, ziangahtile Sisera cu a cau ih thithlĕpin a itthat. Cutin anih cu a thi. 22 Cule zoh hnik, Barak cun Sisera a dawi. Jael cu Barak hmuak dingin a va suak ih a hnenah, «Ra aw, na hawl mi pa ka lo hmuh ding,» tiah a ti. Cule a puanthlam sungih a luh tikah, zoh hnik, Sisera cu a depdep ah puanthlam khenkilhnak thawn tlu ih thiin a um.

23 Cutin cuih ni ah Pathian in Kanaan siangpahrang Jabin cu Israel tefapawl hmaika-ah a duaiter. 24 Cule Israel tefapawlih kut cu Kanaan siangpahrang Jabin dokalhin, Kanaan siangpahrang Jabin an nuairal tiangin a cak sin vivo.

5

Deborah Hla

1 Cun Deborah le Barak, Abinoam-ih fapa cun cuih ni ah,

2 «Israel ram ah hotupawl in an hruai tikah,
Mai lungpuakih mipi an hlănawk tikah,
Jehovah cu thangṭhat uh!
3 Maw siangpahrangpawl, ngai uh!
Maw mizahumpawl nan hna tŭn uh!
Kei, keimah rori hman Jehovah hnenah hla ka sak ding,
Israel-ih Pathian Jehovah hnenah thangṭhat hla ka sak ding.
4 Jehovah, Seir ihsin na fehsuak tikah,
Edom ramlak ihsin na karsuah tikah,
Leilung cu a khūr ih vanpawl in an burh,
Khawdurpawl khal in tidai an burh,
5 Tlangpawl an hnîn Jehovah hmaiah,
Himi Sinai khal, Israel-ih Pathian Jehovah hmaiah.
6 Anath-ih fapa Shamgar san laiah,
Jael san laiah,
Zinpipawl tla an ṭhing,
Cule khualtlawngpawl in zinte an zawh.
7 Israel ram ah khawtepawl an ṭhing,
Kei, Deborah, Israel ram ih nu pakhat ka thawh hlanlo an ṭhing.
8 Annih in pathian tharpawl an hril,
Cun kăwtkapawl ah ral doawknak a um,
Israel ram ah mi 40000 lakah ralphaw le fei hmuh ding a um lo.
9 Ka thinlung cu mipi zawngih mai lungsuakih hlanaw mi,
Israel uktupawl hnenah a um.
Jehovah cu thangṭhat uh!
10 Nannih lāk varpawl parih topawl,
Nannih puan sah zet parih topawl le,
Nannih lamzin tluanih a fehtupawl, phuang uh.
11 Thálsaithiampawl thawmvâng ihsi hlatnak, tidai khainak hmunpawl lakah,
Cu tawkah Jehovah căngvaihnak dingfelpawl an siarsal ding,
Israel ram ah a khawmipawl hrangih a dingfel mi căngvaihnakpawl cu,
Jehovah-ih minungpawl cu kăwtkapawl ah an ṭum ding.
12 Ṭhang law, ṭhang law, Deborah!
Ṭhang law, ṭhang law, hla sak law!
Tho law, Barak, cule na ralkaihpawl hruaihlo aw,
Maw, Abinoam-ih fapa!
13 Cun a nungdampawl an ra suk, minungpawl in mipawimawhpawl an dokalh,
Jehovah cu ka hrangah micak dokalhin a ra ṭum.
14 Amalek-mipawlih hrihrampawl cu Efraim ihsin an si.
Nangmah hnuah, Benjamin, na mipawl thawn,
Makir ihsin uktupawl an ra suk ih,
Zebulun ihsin cangantupawlih fungfek kengtu.
15 Cule Issakar-ih ralbawipawl cu Deborah zawngah,
Issakar vekin, Barak khal phaikuam ah a thupek hnuaiah thlah a si,
Reuben bur ṭhenpawl lakah,
Nasa zetih tumruhnak thinlung a um.
16 Ziangahso rante hruangkulhpawl lakah,
Rante rual be ngai dingih nan to?
Reuben burṭhenpawl in nasazetih thinlung cekawknak an nei.
17 Gilead cu Jordan ralah a tâp ta,
Cule ziangahso Dân cu lăwngpawl parah a tān ta?
Asher cu tipi kapah a um ringring ih,
A litengsâwl ah a tâp.
18 Zebulun cu an nunnak thihnak tiangih ui lo minung an si,
Naftali khal, doawknak hmun sângpawl ah cuvek thotho a si.
19 Siangpahrangpawl an ra ih, an do,
Cun Kanaan siangpahrangpawl in an do,
Taanak khua ah, Megiddo tipi kiangah cun;
Ralthillawn ngun zianghman an la lo.
20 Annih in vanpawl ihsin an do,
Arsipawl in an zin ihsin Sisera an do.
21 Kishon tilian in anmah a fĕnhlo,
Cuih khuahlan tilian, Kishon tilian cun.
Maw, ka nunnak, cahnak thawn hmai năwr aw!
22 Cun rángpawl an tlân cak tuk ruangah an ketinpawl lei ah an khâwng tluttlo,
A rángtlancakpawl a sawtin an sawt.
23 ‹Meroz cu camsiat uh,
A sungih umpawl cu nasazetin camsiat uh,
Ziangahtile annih cu Jehovah băwmnak ah an ra lo,
Micak donak ih Jehovah băwmnak ah cun,› tiah Jehovah-ih vancungmi in a ti.
24 Nunaupawl lakih mithlawsuakbik cu Jael a si,
Ken-mi Heber-ih nupi;
Puanthlampawl sungih nunaupawl lakah anih cu mithlawsuak a si.
25 Sisera in tidai a dil, Jael in hnawi a pe,
Jael in khēng mawi zetin hnawikhăl a kengsuak.
26 Jael kut cu puanthlam khenkilhnak lamah a suah,
A vawrh lam kut cu hnaṭuantupawlih sobul lamah;
Sisera a khêng, a lu a sŭn,
Jael cun a khēng ih, a depdep ah tlăng ko a khêng.
27 Jael ke hramah Sisera cu a sâwn, a tlu, a tlulan ta,
Jael ke hramah anih cu a sâwn, a tlu,
A sâwnnak hmun ah, a tluthat.
28 Sisera-ih nu in tukvirh ihsin a cuan,
Cule tukvirh kalhpaṭheng ihsin,
‹Ziangah so a ránglêng a va thleng har ve?
Ziangahso a ránglêng awn a khawtlai?› tiin a ausuak.
29 Jael-ih nunau fimbikpawl in amah Jael cu an sâng,
A si, amah le amah a sângaw,
30 ‹Ralthillawn an hmu ih an ṭhenaw rero lo maw si?
Mipa kip in nunau pakhat asilole pahnih;
Sisera hrangah, buh mi ralthillawn sinfenpawl,
Ṭelh mi le buh mi ralthillawn sinfenpawl,
Rallakthil hngawng ih bah ding mi khat lam le khat lam buh le ṭelh mi,› tiin.
31 Cutivekcun na ralpawl hmuahhmuah hlorál hai seh, Maw, Jehovah!
Asinan amah duhdawtu cu thacak zetih suak ni vek si hai seh,»

tiin hla an sak.

Cule ram cu kum 40 sung ralmuangin a um.

6

Midia-mipawl in Israel an Palbĕt

1 Cun Israel tefapawl cun Jehovah mithmuhah thil ṭhalo an tuah. Cule Jehovah in anmah cu kum sarih sung Midian kut ah a pek hai, 2 cun Midian kut cun Israel a neh. Israel tefapawl in Midian-mipawl ruangah tlang ah anmai hrangah khurpawl, pûkpawl le ralhruangkulhpawl an tuah. 3 Cule hitin a si, Israel in thlaici a tuh tinten, Midian-mipawl an ra so, Amalek-mipawl le nisuahnak lam mipawl khal Israel dokalhin an ra so. 4 Cun Israel dokalhin ṭanhmun an khuar ih, Gaza tiangin leilung rahsuak an siatsuah, cule tuu siseh, câwcang siseh, lāk siseh, Israel hrangah ei ding zianghman an hlah lo. 5 Ziangahtile annih cu an sumhnámpawl le an puanthlampawl thawn kharbawkpawl vekih tam in an hung so, anmah le an kalaukpawl cu siar cawk lo an si. Cule ram siatsuah dingin ram sungah an lut. 6 Cun Israel cu Midian-mipawl ruangah nasazetih farahterin a um, cule Israel tefapawl cu Jehovah hnenah an ausuak.

7 Cule hitin a si, Midian-mipawl ruangah Israel tefapawl cu Jehovah hnenih an ausuah tikah, 8 Jehovah in Israel tefapawl hnenah profet a thlah ih, anih in an hnenah, «Israel-ih Pathian Jehovah in hitin a ti, ‹Izip ihsin ka lo hruaiso ih sáltannak inn ihsin ka lo hruaisuak. 9 Cule Izip-mipawlih kut ihsin le a lo palbĕttu hmuahhmuah kut ihsin ka lo runsuak ih, anmah cu nan hmaiah dawisuakin an ram ka lo pe. 10 Cuithlunah kei in nan hnenah, «Keimah cu Jehovah nan Pathian ka si, nan cēnnak ram, Amor-mipawlih pathianpawl cu ṭih hlah uh,» tiah ka lo ti. Sikhalsehla ka aw nan ngai duh lo,› a ti a si,» tiah a ti.

Gideon

11 Cun Jehovah-ih vancungmi a ra ih, Ofrah khua Abiezer-mi Joash-ih ela thingkung hnuaiah a to, a fapa Gideon cu Midian-mipawl ih hmuh lo dingin sabit sawrnak sungah sangvut a vua. 12 Cule Jehovah-ih vancungmi cu a hnenah a lang ih, a hnenah, «Na hnenah Jehovah a um, nang miralṭhapa!» tiah a ti.

13 Gideon in a hnenah, «Maw, ka bawipa, Jehovah kan hnenih a um a si ahcun, ziangahso hivek thil hmuahhmuah tla hi kan parih a thlen? ‹Jehovah in Izip ihsin in hruaisuak a si lo maw?› tiin kan pupápawl ih in rak sim mi a thilmakpawl teh khuiah so an um? Atu ah Jehovah cun in thlauthla zo ih, Midian-mipawl kut ah in pe zo a si,» tiah a ti.

14 Cun Jehovah cu a lamah a hawi ih, «Himi na cahnak in feh awla, Midian-mipawlih kut ihsin Israel na runsuak ding a si. Ka lo thlah a si lo maw?» tiah a ti.

15 Cule Gideon in a hnenah, «Maw ka Bawipa, ziangtin Israel cu ka run thei ding? Ngai hnik, ka hrin cu Manasseh lakih a caklobik a si, cule kei cu ka paih sungkua ah a tenaubik ka si fawn,» tiah a ti.

16 Cule Jehovah in a hnenah, «Na hnenah ka um rori ding ih, Midian-mipawl cu minung pakhat vekin na neh hai ding a si,» tiah a ti.

17 Cun Gideon in a hnenah, «Na mithmuhih duhsaknak ka co asile, ka hnenih ṭawngtu hi nangmah na si ti hminsinnak i hmuh aw. 18 Na hmaiih ret ding ka thilhlăn ka va lâk ih, na hnen ka thlen lai hlanlo, zangfahten hitawk ihsin tlân hram hlah aw,» tiah a ti.

Cule anih in, «Na ra thlenkirsal tiang ka rak um ding,» tiah a ti.

19 Cule Gideon cu a lut ih, me note le thilnu telh lo sang cu sangvut efa khat a timtuah. A sa cu kho sungah a ret ih, bel sungah a hang cu a ret. Cule cupawl cu ela thingkung hnuaiih Jehovah-ih vancungmi hnenah a keng ih a hlan. 20 Pathian vancungmi in a hnenah, «Sa le thilnu telh lo sang cu la awla, himi lungpi parah ret aw, cule a ti thle aw,» tiah a ti. Cule cuvekin a tuah. 21 Cun Jehovah-ih vancungmi cun a kut sungih kianghrăwl zim cun sa le thilnu telh lo sang cu a tăwk. Cule lungpi ihsin meisa a suak ih, sa le thilnu telh lo sang cu an káng. Cule Jehovah-ih vancungmi cu a mithmuhnak ihsin a hlo.

22 Cun Gideon in amah cu Jehovah-ih vancungmi a si ti a theithiam. Cule Gideon in, «E heu, Maw Bawipa Jehovah! Hmaităwnin Jehovah-ih vancungmi ka hmu maw!» tiah a ti.

23 Cun Jehovah in a hnenah, «Na hnenah daihnak um seh, ṭih hlah, na thi lo ding,» tiah a ti. 24 Cule Gideon in cu tawkah Jehovah hrangah biakṭheng a dâwl ih, cumi cu, ^aJehovah Shalom tiah a ko. Cuih biakṭheng cu tuihni tiangin Abiezer-mipawlih khua Ofrah ah a um lai.

6:24^a Jehovah Shalom: «Jehovah cu Daihnak a si,» tinak a si.

Gideon in Baal Biakṭheng a Ṭhiatbăl

25 Cule hitin a si, cuih zan thotho ah Jehovah in a hnenah, «Na paih câwpa tuai, a pahnihnak câwpa tûai kum sarih upa kha la awla, na paih neih mi Baal biakṭheng kha ṭhiatbăl aw, cule cumi kiangih Asherah khal hauthlu aw. 26 Cule himi lungpi zimah Jehovah na Pathian hnenah rem thlipthlepten biakṭheng dâwl aw. Cule a pahnihnak câwpa tûai la awla, na hauthluk ding mi thing Asherah lim thawn Meiur Thilhlăn hlan aw,» tiah a ti. 27 Cule Gideon cun a siahhlawhpawl lakih mipa pahra a hruai ih, Jehovah in a hnenih a sim vekin a tuah. Cule hitin a si, sun laiih cumi tuah dingah a paih sungkua le khaw sung mipapawl a ṭih tuk lawmmam ruangah, zan ah a tuah.

28 Cule khaw sung mipapawl zingteih an thawh tikah, zoh hnik, ṭhiahbăl mi Baal biakṭheng le a kiangih Asherah cu hauthlukin a rak um, cule a pahnihnak câwpa tûai cu dawl mi biakṭheng parah hlanin a um. 29 Cule pakhat le pakhat, «Zo in hivek thil a tuah,» tiah an tiaw. Cule an sut ih an suhkual tikah, «Joash-ih fapa Gideon in hivek thil a rak tuah,» tiah an ti. 30 Cule khaw sung mipapawl in Joash hnenah, «Thah a si theinak dingah na fapa rak hruai aw, ziangahtile Baal biakṭheng a ṭhiatbăl ih, cumi kiangih Asherah khal a hauthlu a si,» tiah an ti.

31 Asinan Joash cun amah dokalhih a dingtu hmuahhmuah hnenah, «Baal nan ṭan ding maw? Amah cu nan run ding maw? Amah ṭantu cu zing ah thah si seh! Baal cu pathian asile, amah le amah run aw seh, ziangahtile a biakṭheng cu ṭhiahbăl a si zo!» tiah a ti hai. 32 Curuangah cuih ni ah Joash in Gideon cu, «Baal in Gideon dokalh seh, ziangahtile anih in a biakṭheng a ṭhiatbălsak a si,» tinak ah ^aJerubbaal tiah a sak.

6:32^a Jerubbaal: A sullam cu Baal in a do tinak a si.

33 Cun Midian-mi hmuahhmuah, Amalek-mi hmuahhmuah le nisuahnak lam mipawl an fĭnkhawmaw. Cule an hei tánkai ih Jezreel Phaikuam ah ṭanhmun an khuar. 34 Asinan Jehovah Thlarau cu Gideon parah a rung ^athleng, cule anih in tuupa ki a phaw ih a dungah Abiezer-mipawl an pungkhawm. 35 Cule Manasseh ram pumpi hrawhsuakin Gideon in palaipawl a thlah ih, amah thlun dingin annih khal kawhkhawm an si. Asher, Zebulun le Naftali rampawl khalah palaipawl a thlah ih annihpawl cu amah táwng dingin an hung so.

6:34^a thleng: A ṭawng hrampi ah cun, «thuam» ti a si.

Gideon-ih Tuu Hmul

36 Cun Gideon in Pathian hnenah, «Na rak sim zo bangin ka kut hmangin Israel na run ding asile, 37 zoh hnik, hruihhmun ah tuu hmul ṭhuam khat ka ret ding ih sahmul par lawngah dai a um ih, leilung par hmuahhmuah cu a ro asile, na rak sim zo bangin ka kut hmangin Israel na run ding ti ka thei ding,» tiah a ti. 38 Cule cutin a rak si taktak. A thaizing zingpitih a thawh tikah, tuu hmul cu a sawrkhawm ih dai ihsin tidai khengkûm khat a sawrsuak. 39 Cun Gideon in Pathian hnenah, «Ka parah na thinheng hlah aw, vei khat lawngin ka ṭawng hrih ding, zangfahten tuu hmul thawn vei khat lawng hniksak hrih ko ning, atu ah cun tuu hmul lawng ro sehla, leilung hmuahhmuah ah dai um seh,» tiah a ti. 40 Cule Pathian in cumi zan ah cuvekin a tuah. Tuu hmul lawng a ro, asinan leilung par hmuahhmuah ah dai a um.

7

Gideon-ih Miralṭha 300

1 Cun Gideon ti mi Jerubbaal le a zawngih um minungpawl hmuahhmuah cu zingten an tho ih Harod tikhur kiangah ṭanhmun an khuar. Midian-mipawlih ṭanhmun khuarnak cu an sak lam, phaikuam sungih Moreh tlangpâwng ah a si.

2 Cule Jehovah in Gideon hnenah, «Na hnenih um minungpawl hi an kut sungih Midian-mipawl pe dingah ka hrangah an tam tuk, culole, ‹Keimaih kut rori in i run,› tiin, Israel in keimah dokalhin sunlawinak a la pang ding. 3 Curuangah mipi hnatheihah, ‹Zokhal a khūr le a ṭihtu cu kir sehla, Gilead Tlang ihsin tlân lohli seh,› tiin phuang aw,» tiah a ti. Cule mi 22000 cu an kirsal ih, 10000 an tâng.

4 Asinan Jehovah in Gideon hnenah, «Milai an tam tuk lai thotho, tidai ah hruai hai awla, cu tawkah na hrangah anmah cu ka hniksak hai ding. Cun hitin a si ding, ‹Hi pa hi na hnenah a feh ding a si,› tiih na hnenih ka lo ti mi cu na hnenah a feh ding ih, ‹Hi pa cu na hnenah a feh lo ding a si,› tiih na hnenih ka ti mi cu a feh lo ding,» tiah a ti. 5 Cun milaipawl cu tidai ah a hruai hai. Cule Jehovah in Gideon hnenah, «Uico liah vekin an lei ih tidai a liaktu pauhpauh cu na rethran hai pei ih, cuvek thothoin, in dingih kûn tahratin khuk a biltu pauhpauh khal,» tiah a ti. 6 Cule an kâ ah an kut ret ih a liaktu mipum cu mipa 300 an si, asinan mi dang hmuahhmuah cu kûn tahratin khukbilin tidai an in. 7 Cun Jehovah in Gideon hnenah, «A liahih liaktu mipa 300 hmangin ka run ding ih, Midian-mipawl cu nan kut ah ka lo pe ding. Mi dangpawl hmuahhmuah mai hmun cio ah tlung hai seh,» tiah a ti. 8 Cutin mipi cun ei ding le an tuupa kipawl cu an kut in an keng. Cule Gideon in a tāng mi Israel-mipawl cu, mi kip mah le puanthlam cio ah a tlungter hai ih, cuih mipa 300 cu a tanngter. Midian ṭanhmun khuarnak cu an hnuaiih phaikuam ah a si.

9 Cun hitin a si, cuih zan ah Jehovah in Gideon hnenah, «Tho aw, riahhmun lamah suk aw, ziangahtile cumi cu na kut ah ka lo pe zo. 10 Asinan feh ding na ṭih asile, ṭanhmun khuarnak ah cun na siahhlawh Purah sukpi aw. 11 Cule an ṭawng mi na thei ding ih, cuihhnu ah ṭanhmun khuarnak lamih suk dingah na kutpawl cahter an si ding,» tiah a ti. Cun ṭanhmun khuarnak ih ralthuam keng pacangpawl tăwntir ah a siahhlawh Purah thawn a suk. 12 Midian-mipawl le Amalek-mipawl, nisuahnak lam mipawl hmuahhmuah cu kharbawk tlukih tam in phaikuam ah cun an zau. An kalaukpawl khal siar cawk lo, tiva kapih vunnel vekih tam an si.

13 Cule Gideon a thlen tikah, zoh hnik, mi pakhat a hawipi hnenih a mang sim rero lai a rak um. Cu pa cun, «Mang ka rak nei, zoh hnik, barli sangvut sang hlawm khat hi Midian ṭanhmun khuarnak ah a rīl, cuih sang cu thlam ah a rīl ih, thlam cu a sawh, cutin thlam cu a tlu ih a linglet, cule thlam cu a cim,» tiin a sim.

14 Cun a hawipi cun a sawn ih, «Himi cu ziang dang a si lo, Israel-pa pakhat Gideon, Joash-ih fapaih ralnâm a si cu! Pathian in a kut ah Midian le ṭanhmun khuarnak pumpuluk a pe zo a si hi,» tiah a ti.

15 Cule hitin a si, Gideon in an mang simawk mi le a hrilhfiah a theih tikah, Pathian a bia. Gideon cu Israel ṭanhmun khuarnak ah a kirsal ih, «Tho uh, ziangahtile Jehovah in nan kut ah Midian ṭanhmun khuarnak cu a lo pe zo a si,» tiah a ti. 16 Cun mipa 300 pawl cu bur thum ah a ṭhen hai ih, mi pakhat kut ciar ah tuupa ki pakhat, leibel kawlawng le a sungah meiser a um mi leibel a kenter hai. 17 Cule anih in an hnenah, «In zoh uhla, ka tuah vekin nan tuah ve pei, zoh hnik uh, ṭanhmun khuarnak tăwntir ka thlen tikah ka tuah vekin nan tuah ve pei. 18 Tuupa ki ka phawt tikah, keimah le ka zawngih a um mi hmuahhmuah in, ṭanhmun khuarnak pumpuluk kil kip ah tuupa ki phaw in, ‹Jehovah le Gideon-ih ralnâm!› tiah nan ti cio pei,» tiah a ti hai.

19 Cutin Gideon le a hnenih um mipa 100 pawl cu, ^azan ralven laita thăwktir, ralven an rak thlengawk pekah, ṭanhmun khuarnak tăwntir an thleng. Cule tuupa ki an phaw ih an kut ih leibelpawl cu an khuai. 20 Cun mi bur bur thum cun an tuupa ki an phaw ih, an leibelpawl an khuai. Meiserpawl cu an keh lam kut in an keng ih, tuupa kipawl cu an kut vawrh lamah, cule, «Jehovah le Gideon-ih ralnâm!» tiin an au. 21 Cule ṭanhmun khuarnak kulhin mipa pakhat cio anmai hmun ah an ding fingfing ih, ralkap hmuahhmuah cu an tlân, an au ih, an zâm. 22 Mipa 300 pawl in tuupa ki an phawt tikah, Jehovah in mi kip an ralnâm thawn ṭanhmun khuarnak pumpuluk in anmai hawipi a doter. Cule ralkappawl cu Zererah lam, Beth Akasia tiang, Tabbath kiangih Abel Meholah ramri tiangin an tlânsia. 23 Cule Naftali, Asher le Manasseh hmuahhmuah ihsin Israel mipapawl cu an fĭnkhawmaw ih, Midian-mipawl an hei dawi.

7:19^a zan ralven laita: Zanṭim tinak a si.

24 Cun Gideon in Efraim tlang ram hmuahhmuah ah palaipawl a thlah ih, «Midian-mipawl dokalhin rung suk uhla, anmah cu tidai umnak hmunpawl ihsin Beth Barah le Jordan tiangin kulh uh,» tiah a ti. Cun Efraim mipa hmuahhmuah cu an fĭnkhawmaw ih tidai umnak hmunpawl ihsin Beth Barah le Jordan tiangin an kulh. 25 Cule Midian-mipawlih ralbawi pahnih, Oreb le Zeeb tla an kai. Oreb cu Oreb-ih lungpi ah an that ih, Zeeb cu Zeeb-ih sabit sawrnak ah an that. Midian cu an dawi ih Jordan ralkhat lamih Gideon hnenah Oreb le Zeeb-ih lupawl tla an hei keng.

8

Gideon in Midia-mipawl a Duaiter

1 Cun Efraim mipapawl in Gideon hnenah, «Midian-mipawl do dingih na feh laiah khan, in rak sawm lo, ziangah saw cutiih na tuah?» tiah an ti. Cule annih in Gideon cu na zetin an kawk.

2 Cule anih in an hnenah, «Nanmah khaikhinin ziangso ka rak tuah? Abiezer-ih sabit lawh mi hnakin Efraim-ih sabit hlah mi sarkhawm mi hi a nasa lo maw? 3 Pathian in nan kut ah Midian ralbawi Oreb le Zeeb a lo pe zo. Cule nanmah thawn khaikhinin ziangso ka tuah thei mi?» tiah a ti hai. Cun cuih thu a sim tikah a parih an thinhengnak cu a dai.

Zebah le Zalmunna

4 Gideon cu Jordan a thlen tikah amah le a hnenih um mipa 300 pawl cun an tánkai, cau zet cingin an dawi thotho. 5 Cun anih in Sukkoth mipapawl hnenah, «Zangfahten i thluntu minungpawl hnenah sang hlawm pe uh. Ziangahtile annih cu an cau, kei cun Midian lal Zebah le Zalmunna ka dawi hai lai ding,» tiah a ti.

6 Cule Sukkoth hotupawl in, «Kannih in na ralkap hnenah sang pe dingin, Zebah le Zalmunna ih kutpawl tla na kut ah an um maw si?» tiah an ti.

7 Cutikah Gideon in, «Himi thu ah, Jehovah in ka kut sungih Zebah le Zalmunna i pek tikah cun, ramṭhing ih hlingbûr le hrambûar hmangin nan taksa ka thlek ding!» tiah a ti. 8 Cun Gideon cu cutawk ihsin Penuel ah a so ih, an hnenah cuvek thothoin a ṭawng. Penuel ih mipapawl khal in Sukkoth mipapawl ih rak sandān vekin amah an sâng ve. 9 Cule anih khal in Penuel mipapawl hnenah, «Daihnak thawn ka ratsal tikah, hi dawlsâng hi ka ṭhiatbăl ding!» tiah a ti.

10 Cun Zebah le Zalmunna cu Karkor ah an um ih, an ralkappawl khal anmah zawngah an um, 15000 hrawng an si, nisuahnak lam mipawlih ralkap hmuahhmuah lakih a nungdamsŭn zate an si. Ziangahtile ralnâm kengtu mipa tingkhat le thawngkul pawl cu an tlu zo. 11 Cun Gideon cu Nobah le Jogbehah nisuahnak lam thlampawl ih a cêngtupawlih lamzin in a so ih, ṭanhmun khuarnak cu ralmuangih an theihawk laiah a do. 12 Zebah le Zalmunna an tlan tikah, Gideon in a dawi hai ih Midian siangpahrang pahnih, Zebah le Zalmunna cu a kai hai ih, ralkap zaten a buaiter.

13 Cun Joash-ih fapa Gideon cu ni a suah hlanah raldonak ihsin a kir. 14 Cule Sukkoth mipapawl lakih tlangval pakhat a kai ih, thu a sut. Cule cuih tlangval in Sukkoth hotupawl le Sukkoth upapawl mi 77 pawlih hmin cu a ngansak. 15 Cun Gideon cu Sukkoth mipapawl hnenah a hung so ih, «Zoh hnik uh, Zebah le Zalmunna hi, anmah hi sokhaw, ‹Zebah le Zalmunna cu na kut ih um zo vekin, cutiih na micaupawl sang kan hun pek mai ding cu?› tiih in hnihsan kha,» tiah a ti. 16 Cule Gideon cun khaw upapawl cu a hruai hai ih, ramṭhing hlingbûr le hrambûar in Sukkoth mipapawl cu a zirh hai. 17 Cun Penuel dawlsâng a ṭhiatbăl ih, khaw sung mipapawl a that.

18 Cule anih in Zebah le Zalmunna hnenah, «Tabor ih nan thah mi kha ziang vek mipa so an si?» tiah a ti hai.

Cun annih in, «Annih khal nangmah vek an si, an zaten siangpahrang fapa an bang cio,» tiah an sâng.

19 Cun anih in, «Annih cu ka unau, ka nuih fapapawl an si. Jehovah a nun rori bangin, an nunnak rak zuah uhla cu ka lo that lo ding nân,» tiah a ti. 20 Cule a fapa upabik Jether hnenah, «Tho aw, anmah cu that aw!» tiah a ti. Asinan suakthuan cun a ralnâm a phawi lo, ziangahtile a ṭih, amah cu a suakthuan lai hrih ruangah a si.

21 Cun Zebah le Zalmunna in, «Nangmah cu mipa na si, mipa tha na nei, nangmah rori tho awla, in that aw,» tiah an ti. Cule Gideon cu a tho ih, Zebah le Zalmunna cu a that hai, an kalaukpawl hngawng parih ceinak kûalpawl cu a la.

Gideon-ih Puithiam Kâwrcung

22 Cun Israel mipapawl in Gideon hnenah, «In uk aw, nangmah le na fapa nan pahnih le na tupa khal, ziangahtile nang in Midian kut ihsin in runsuak a si,» tiah an ti.

23 Asinan Gideon in an hnenah, «Ka lo uk lo ding ih, ka fapa khal in a lo uk lo ding, Jehovah in a lo uk ding a si,» tiah a ti hai. 24 Cun Gideon in an hnenah, «Thil pakhat lo dil ka duh, mi pakhat fingfing in nan rallâksum ihsin hnakhaih in pe cio pei,» tiah a ti. Ziangahtile annih cun sui hnakhaihpawl an nei, ziangruangahtile annih cu Ishmael-mipawl an si.

25 Cun annih in, «Siang zetin kan lo pe ding,» tiah an ti. Cule sinfen an phah ih, mi kip in cumi parah an rallâksum ihsin hnakhaihpawl an theh. 26 A dil mi sui hnakhaihpawlih rih lam cu ceiawknak kûalpawl, ṭhi le Midian siangpahrangpawlih hruk mi kâwrfual senduppawl le an kalaukpawl hngawng ih ṭhipawl siarlo in, sui shekel 1700 a si. 27 Cun cumi cu Gideon in Puithiam Kâwrcung pakhat ah a tuah ih, cumi cu amai khua, Ofrah khua ah a ret. Cule Israel-mi hmuahhmuah in cu tawkah cumi thawn hlawhhlannak an tuah. Cumi cu Gideon le a sungza hrangah tháng ah a cang.

28 Cuticun Midian cu an lu tungsal nawn loin, Israel tefapawl hmaiah an duai. Cule Gideon damsung hmuahhmuah ram cu kum 40 sung ralmuangin a um.

Gideon Thihnak

29 Cun Joash-ih fapa Jerubbaal cu a feh ih, amai inn ah a cêng. 30 Gideon cu nupi tampi a neih ruangah amai sung suak fapa 70 a nei. 31 Shekem khua ih a um mi a nusûn khal in fapa pakhat a hrinsak. A hmin cu ^aAbimelek a si. 32 Cule Joash-ih fapa Gideon cu tarkûnin a thi, cule Abiezer-mipawlih Ofrah khua, a pa Joash-ih thlān ah phum.

8:31^a Abimelek: Ka pa cu siangpahrang a si tinak a si.

33 Cun hitin a si, Gideon a thih veten Israel tefapawl cun Baalpawl thawn hlawhhlannak an tuahsal, cule ^aBaal-Berith cu an pathian ah an tuah. 34 Cutin Israel tefapawl in kil kip ih an ralpawl hmuahhmuah kut ihsin anmah runsuaktu Jehovah an Pathian an máng nawn lo, 35 Gideon tiih kawh mi Jerubbaal sungza par khalah Israel hrangih thil ṭha a rak tuah mi zulhin ṭhatnak an langter lo.

8:33^a Baal-Berith: Shekem pathian a si ih, a hmin sullam cu «thukham Baal» tinak a si.

9

Abimelek

1 Cun Jerubbaal-ih fapa Abimelek cu Shekem khua ih a nuih ṭapalepawl hnenah a feh ih, anmah le a nuih paih sungkaw hrinpawl hmuahhmuah cu a be hai ih, 2 «Zangfahten Shekem mipapawl hmuahhmuah ih hnatheihah, ‹Jerubbaal-ih fapa 70 pawl in nan tlunih an lo uk maw ṭha nan ti sawn, mi pakhat in nan tlunih a lo uk?› tiah ti hnik uh. Cun kei cu nan titsa le ruh ka si ti cîng ringring uh,» tiah a ti.

3 Cule a nuih ṭapalepawl in Shekem mipapawl hmuahhmuah ih hnatheihah amai thuhla himi ṭawngkam hmuahhmuah hi an sim. Cule an thinlung cun Abimelek thlun ding an duh ih, annih in, «Anih cu kan unaupa a si,» tiah an ti. 4 Cun Abimelek cu ^aBaal-Berith temple ihta ngun shekel 70 an pe, cule cumi thawn anih in mihlothlau le pawisak nei lo pacangpawl a hlang, cule annih in amah cu an thlun. 5 Cun anih cu Ofrah khua ih a paih inn ah feh in a unaupapawl, Jerubbaal-ih fapa 70 pawl cu lungto pakhat parah a that hai. Asinan Jerubbaal-ih fapa nautabik Jotham cu a relh ruangah a tâng. 6 Cule Shekem mipa hmuahhmuah le Beth Millo khaw mipa hmuahhmuah cu an fĭnkhawmaw ih, an feh, cule Abimelek cu Shekem khua ih a um mi elon thingkung kiangih ṭhuam ah cun siangpahrang ah an tuah.

9:4^a Baal-Berith: Shekem pathian a si ih, a hmin sullam cu «thukham Baal» tinak a si.

Thingkung Tahṭhimnak

7 Jotham an sim tikah, anih cu a feh ih, Gerazim Tlang zimah dingin a aw suahin a au. Cule anih in an hnenah,

«Pathian ih a lo ngaithlak theinak dingah,
I ngai hnik uh, nannih Shekem mipapawl!

8 «Vei khat cu thingkungpawl hi an siangpahrang ding hriak thih dingin an fehsuak. Cule olif thingkung hnenah, ‹In uk aw!› tiah an ti.

9 «Asinan olif thingkung in an hnenah, ‹Pathian le milai an cawimawinak ka hriak peksuah hi cawlhsanin, thing parah thēnaw rero dingin ka feh ding maw si?› tiah a ti.

10 «Cun thingkungpawl in theipi kung hnenah, ‹Nang ra awla, in uk aw!› tiah an ti.

11 «Asinan theipi kung in an hnenah, ‹Ka thlumnak le ka rah ṭha hi suahsanin, thing parah thēnaw rero dingin ka feh ding maw si?› tiah a ti.

12 «Cun thingkungpawl in sabit hri hnenah, ‹Nang ra aw, cule in uk aw,› tiah an ti.

13 «Asinan sabit hri in an hnenah, ‹Pathian le minungpawl lungawitertu, Ka sabitzu thar cu cawlhsan in, thing tlunah thēnaw rero dingin ka feh ding maw si?› tiah a ti.

14 «Cun thingkungpawl hmuahhhmuah in hling hnenah, ‹Nang ra awla, in uk aw!› tiah an ti.

15 «Cule hling in thingkungpawl hnenah, ‹Nan parih siangpahrang dingih hriak in thih ngaingai asile, ra uhla ka zârhnemah beu uh, asinan cuti asilole hling ihsin meisa suak aw sehla, Lebanon ih sidarpawl kangrál thluh seh!› tiah a ti.

16 «Curuangah Abimelek siangpahrang ih tuahnak ah thungaithlak le diktakin nan rak cāngvai ih, Jerubbaal le a sungza cu ṭhateih nan rak zoh ih, a phu tawkin a hnenah nan rak tuah asile, lungawiaipuangin um uh. 17 Ziangahtile ka pa cun a nun thāpin nan hrangah ral a do ih, Midian kut ihsin a lo runsuak. 18 Asinan tuihsun ah cun ka paih sungza dokalhin nan rak tho ih lungto pakhat parah a fapa 70 nan that, cule a siahhlawhnuih fapa Abimelek cu nan unaupa a si ruangah Shekem mipapawl parih siangpahrang ah nan tuah. 19 Tuihsun ah Jerubbaal le a sungza thawn thungaithlak le diktakin nan rak cāngvai asile, Abimelek ah lungawiaipuangin um uhla, amah khal nanmah ah lungawiaipuangin um seh. 20 Asinan cuti asilole, Abimelek hnen ihsin meisa suakin Shekem le Beth Millo mipapawl kangrál thluh seh, cule Shekem mipapawl hnen ihsin le Beth Millo mipapawl hnen ihsin meisa suak sehla, Abimelek kāngral thluh seh,» tiah a ti. 21 Cule a unaupa Abimelek a ṭih ruangah, Jotham cu a tlânhlo ih a zâm. Cule Beer khua ah a feh ih, cu tawkah a cêng.

Abimelek Tlûknak

22 Abimelek in Israel kum thum a uk hnuah, 23 Pathian in Abimelek le Shekem mipapawl karlakah lungput ṭhalo a thlah. Cule Shekem mipapawl in Abimelek parah hrăwkhrawl zetin an ti. 24 Cumi cu Jerubbaal-ih fapa 70 pawl tlunih râwng zetih an ti ruangih an parih phuba lâknak a rung thlen theinak dingah le anmah thattu an unaupa Abimelek parah le, a unaupawl that dingih a kut caktertu Shekem mipapawl parih an thisen a um theinak dingah a si. 25 Cule Shekem mipapawl cun tlangtluan zimpawl ah amah bawhtu mipapawl an ret ih, cuih lamzin ih a fehtu hmuahhmuah cu an rak suam, cule cuih thu cu Abimelek hnenah sim an si.

26 Cun Ebed-ih fapa Gaal cu a unau mipapawl thawn Shekem khua ah a feh, cule Shekem mipapawl in amah ah rinngamnak an nei. 27 Cule annih cu lópawl ah an fehsuak ih, an sabit hmuanpawl ihta sabit rahpawl an khawm ih an cīl, cule nuam an cēn. Cun an pathian inn sungah an lut ih an ei ih an in, cule Abimelek an camsiat. 28 Cun Ebed fapa Gaal in, «Kannih in amah rian dingah Abimelek cu zo a si ih, Shekem cu zo a si? Amah cu Jerubbaal-ih fapa a si lo maw? Zebul cu a kut tăng bawi a si lo maw? Shekem-ih pa Hamor-mipawl rian sawn uh, ziangah saw amah cu kan rĕn sawn ding? 29 Hi milaipawl hi ka thuneihnak hnuaiih um si hai sehla cu maw! Abimelek cu ka ṭhawnhlo ding nân,» tiah a ti. Curuangah amah in Abimelek hnenah, «Na ralkap karhter awla, ra suak aw!» tiah a ti.

30 Khawpi uktu Zebul in Ebed fapa Gaal-ih ṭawngkampawl a theih tikah, a thinhengnak cu a tho. 31 Cule athupten Abimelek hnenah palaipawl a thlah ih, «Zoh hnik! Ebed fapa Gaal le a unau mipapawl cu Shekem an thleng zo, zoh hnik, nangmah dokalhin khawpi an kulh. 32 Curuangah atu ah, nangmah le na hnenih um milaipawl tla zan ah tho uhla, ramlakin rak bawh uh. 33 Cule hitin a si ding, zing ni a suah veten zingten nan tho ding ih, khua cu va luhhnawh uh. Cule nanmah dokalhin amah le a hnenih um milaipawl an suah tikah, remcānnak nan hmuhdān dān vekin an hnenah tuah uh,» tiah a ti.

34 Cutin Abimelek le amah hnenih um milaipawl hmuahhmuah cu zan ah an tho ih, bur li in Shekem khua cu an bawh. 35 Ebed-ih fapa Gaal cu a fehsuak ih, khawpi luhnak kăwtka ah a ding, Abimelek le a hnenih um milaipawl cu an mibawhnak ihsin an tho. 36 Cule Gaal in mipi a hmuh tikah, Zabul hnenah, «Zoh hnik, mipi tlang zim ihsin an ra ṭum rero khi!» tiah a ti.

Asinan Zebul cun a hnenah, «Tlangpawlih thlahlim cu mipapawl vekin na hmu a si kha,» tiah a ti.

37 Cule Gaal cu a ṭawngsal ih, «Zoh hnik, mipi cu ram laifang ihsin an ra ṭum rero ih, bur khat cu ^aMeonenim elon thingkung ihsin an ra rero,» tiah a ti.

9:37^a Meonenim: Meonenim ti cu kut ṭial zohthiam tinak a si ih, ram hmin a si.

38 Cun Zebul in a hnenah, « ‹Abimelek cu zo a si ih, amah cu kan rĕn ding? Hi mipi hi na hnawn mipawl an si lo maw?› tiih na simnak na kâ cu khuiah so? Na duh ah cun fehsuak awla, atu ah anmah do aw,» tiah a ti.

39 Cule Gaal cu Shekem mipapawl hmaiah a fehsuak ih, Abimelek thawn an doaw. 40 Cun Abimelek in Gaal cu a dawi ih anih cu a hmai ihsin a tlânsia. Cule mi tampi cu khawpi kăwtsuah rori tiang hriamhma thawn an tlu. 41 Cun Abimelek cu Arumah khua ah a cêng ih, Zebul in Gaal le a unau mipapawl cu Shekem ih an cēnlonak dingah a dawisuak.

42 Cule a thaisun ah hitin a si, mipi cu ló ah an fehsuak ih, Abimelek an va sim. 43 Cutikah anih in a mipawl cu bur thum ah a ṭhen hai ih, ramlakin an bawh. Cule a zoh ih, ngai hnik, khaw sung ihsin ra suak rero mipawl an um, cule anmah dokalhin a tho ih anmah a do. 44 Cun Abimelek le a hnenih um mi bur cu hmai an năwr lohli ih, khawpi kăwtsuah ah an ding. Cule mi bur dang pahnih pawl cun ramlak ih um milaipawl cu an va nám ih an that. 45 Cutin Abimelek in cuih ni pum in khawpi cu a do. Khawpi a la ih cumi sungih um milaipawl cu a that. Cule khawpi cu a ṭhiatbăl ih cuih khua ah cite a theh.

46 Shekem dawlsâng ih mipapawl hmuahhmuah in cuih thu an theih tikah, Berith pathian temple hauhruang sungah an lut. 47 Cule Shekem dawlsâng ih mipapawl hmuahhmuah cu an fĭnaw tiin Abimelek an sim. 48 Cun Abimelek cu amah le a hnenih um milai hmuahhmuah thawn, Zalmon Tlang ah a so. Cule Abimelek cun a kut ah hreitlung pakhat a keng ih, thingkungpawl ihta hngeṭêk pakhat a cêkthla ih cumi cu a la, cule a liang in a pu. Cule a hnenih um milaipawl hnenah, «Ka tuah mi nan hmuh zo vekin zamrang uhla, keimah vekin tuah uh,» tiah a ti hai. 49 Cuticun mi pakhat cio in cuvekin anmai thinghnge cekthlain Abimelek an thlun. Shekem dawlsâng ih um milaipawl, mipa le nunau 1000 hrawng, an thih thluhnak dingah hauhruang hngauhsan zawngin cupawl cu an ret ih, an tlun ihsin ralhruang cu mei in an ur.

50 Cun Abimelek cu Thebez khua ah a feh ih, Thebez dokalhin ṭanhmun a khuar ih a la. 51 Asinan khawpi sungah dawlsâng hnget pakhat a rak um ih, cu tawkah mipa le nunau hmuahhmuah, khawpi sungih um milaipawl hmuahhmuah an tlân ih, a sungah an kharkhumaw. Cun anmah cu dawlsâng zimah an kaiso. 52 Cutin Abimelek cu dawlsâng tiang a ra thleng ih, cumi cu a do. Cule cumi cu meisa ih ur dingin dawlsâng sângka kiang a va naih. 53 Asinan nunau pakhat in Abimelek lu parah riallung tlunta a thlak ih, a lu ruh a kûai. 54 Cun Abimelek cun a ralthuam kengtu tlangval pakhat a ko lohli ih a hnenah, «Na ralnâm phawi awla i that aw, culole mi in, ‹Nunau in amah a that,› in ti pang ding,» tiah a ti. Culen a tlangval cun amah cu a dawttlăng ih, a thi. 55 Cun Israel mipapawl in Abimelek a thi zo ti an hmuh tikah, mi kip anmai hmun cio ah an tlung.

56 Cutin Abimelek-ih sualralnak, a unau mipa 70 tla thatin a pa parih a rak tuah mi cu Pathian in a lehrūl. 57 Cule Shekem mipapawlih ṭhatlonak khal Pathian in anmai lu parah a kirter ih, an parah Jerubbaal-ih fapa Jotham-ih camsiatnak a thleng.

10

Tola

1 Abimelek hnuah Dodo-ih fapa, Puah-ih fapa, Tola, Issakar-mi mi pakhat cu Israel run dingah a tho. Cule anih cu Efraim tlang ram Shamir khua ah a cêng. 2 Anih cun kum 23 sung Israel lai a relsak, cule a thi ih Shamir khua ah phum a si.

Jair

3 Tola hnuah Gilead-mi, Jair a tho, cule anih in kum 22 sung Israel lai a relsak. 4 Anih in lāk 30 parih to fapa 30 a nei. Annih in Gilead ram ah khaw 30 an nei ih, cupawl cu tuihni tiangin, Havoth Jair tiih kawh an si. 5 Cule Jair cu a thi ih, Kamon khua ah phum a si.

Israel Palbĕtsalnak

6 Cun Israel tefapawl cu Jehovah mithmuhah thil ṭhalo an tuah lala ih, Baalpawl le Ashtoeth-pawl, Siria pathianpawl, Sidon pathianpawl, Moab pathianpawl, Ammon pathianpawl le Filisṭia pathianpawl tla an rian. Cule Jehovah an thlauthla ih amah an rian lo. 7 Cun Israel parah Jehovah thinhengnak cu a so, cule anmah cu Filisṭia-mipawl kut sung le Ammon tefapawl kut ah a zuar hai. 8 Cuih kum ihsin annih in Israel tefapawl cu vansang an lamter ih, an palbĕt, Jordan ral Gilead ram ih Amor-mipawl ram ih Israel tefapawl hmuahhmuah cu kum hleiriat sung an palbĕt. 9 Cuihhleiah Ammon tefapawl cu Judah, Benjamin le Efraim sungza do dingah, Jordan an tánkai, cutin Israel cu nasazetin an van a sâng.

10 Cule Israel tefapawl cu Jehovah hnenah, «Nangmah dokalhin thilsual kan rak tuah a si, ziangruangahtile kan Pathian kan thlauthla ih, Baalpawl kan rian!» tiin an ausuak.

11 Cun Jehovah in Israel tefapawl hnenah, «Izip-mipawl lak ihsin siseh, Amor-mipawl lak ihsin siseh, Ammon tefapawl lak ihsin siseh, Filisṭia-mipawl lak ihsin siseh, ka lo runsuak a si lo maw? 12 Cuihhleiah Sidon-mipawl in siseh, Amalek-mipawl in siseh, Maon-mipawl in siseh, an lo palbĕt ih ka hnenah nan ausuak, cule kei in an kut ihsin ka lo runsuak. 13 Cuticingkhalin in rak thlauthla ih, pathian dangpawl nan rian. Curuangah ka lo runsuak nawn lo ding. 14 Feh uhla nan rak hril mi pathianpawl hnenah au uh, nan vansan cān ah anmah in lo runsuak hai seh,» tiah a ti.

15 Cule Israel tefapawl in Jehovah hnenah, «Thilsual kan rak tuah a si! Ṭha na tidandanin kan parah tuah aw, zangfahten tuihni rori ah in runsuak aw,» tiah an ti. 16 Cule annih in an lakih ram dang pathianpawl cu an hlăwnhlo ih, Jehovah an rian, cule Israel-ih mangbangvansannak ruangah a thin a nâ.

17 Cun Ammon tefapawl cu an fĭnkhawmaw ih, Gilead ram ah ṭanhmun an khuar. Cule Israel tefapawl cu hmunkhatah pungkhawmaw in Mizpah ah ṭanhmun an khuar. 18 Cule mipi le Gilead hotupawl cu pakhat le pakhat, «Ammon tefapawl do thăwktu ding pa cu zo a si? Amah cu Gilead ram luahtu hmuahhmuah tlunih lu a si tengteng ding,» tiah an ti.

11

Jefthah

1 Gilead-mi Jefthah cu miralṭha a si, asinan amah cu hlawhhlâng fapa a si, cule Gilead in Jefthah a hring. 2 Gilead-ih nupi in fapapawl a hring, cule a nupi-ih fapapawl an pitlin tikah Jefthah cu an dawisuak ih a hnenah, «Kan paih inn ah co ding mi ro na nei ve lo, ziangahtile nang cu nunau dangih fapa na si,» tiah an ti. 3 Cun Jefthah cu a unau mipapawl hnen ihsin a tlân ih, Tob ram ah a cêng. Cule mipa hlothlaupawl cu Jefthah thawn an kăwpaw ih, a zawngah an feh.

4 Cule hitin a si, tawkfang reiah, Ammon tefapawl in Israel dokalhin ral doawknak an tuah. 5 Cule hitin a si, Ammon tefapawl in Israel dokalhin ral doawknak an tuah tikah, Gilead khua upapawl cu Tob ram ihsin Jefthah hruai dingin an feh. 6 Cun annih in Jefthah hnenah, «Ammon tefapawl kan do theinak dingah, ra awla, kan ralbawipi si aw,» tiah an ti.

7 Cule Jefthah in Gilead khaw upapawl hnenah, «In hua ih ka paih inn ihsin in dawisuak a si lo maw? Ziangah saw nan vansan leveteih ka hnenih nan rat?» tiah a ti hai.

8 Cule Gilead khaw upapawl in Jefthah hnenah, «Curuangah a si atu ah na lam kan hawikirsal, kan zawngah fehin Ammon tefapawl do dingah le Gilead khaw luahtupawl hmuahhmuah tlunih kan hotu si dingah,» tiah an ti.

9 Cule Jefthah in Gilead khaw upapawl hnenah, «Nannih in Ammon tefapawl do dingah inn ih in hruaikir ih, Jehovah in anmah cu ka hnenih a pek asile, nan hotu ka si ding maw?» tiah a ti.

10 Cun Gilead khaw upapawl in Jefthah hnenah, «Na ṭawngkampawl vekih kan tuah lo asile, kan lakah Jehovah cu thutheihpitu a si ding,» tiah an ti. 11 Cun Jefthah cu Gilead khaw upapawl zawngah a feh ih, amah cu mipi in an tlunih hotu le ralbawipi ah an tuah. Cule Jefthah in a ṭawngkampawl hmuahhmuah cu Mizpah ah Jehovah hmaiah a ṭawngsuak.

12 Cule Jefthah in Ammon tefapawlih siangpahrang hnenah palaipawl a thlah ih, «Ka ram sungah keimah do dingah nan rat hi, nannih le kei hi ziang pehtlaihawknak so kan neih?» tiah a ti hai.

13 Cule Ammon tefapawlih siangpahrang in Jefthah-ih palaipawl cu a sâng hai ih, «Israel in Izip ihsin an fehsuak laiah, ka ram an la, Arnon ihsin Jabbok tiang le Jordan tiangin. Curuangah remawten cuih rampawl cu i pesal aw,» tiah a ti.

14 Cule Jefthah in Ammon tefapawlih siangpahrang hnenah palaipawl a thlahsal, 15 cule a hnenah, «Jefthah in hitin a ti, ‹Israel in Moab ram a la lo ih, Ammon tefapawlih ram khal a la lo, 16 ziangahtile Israel cu Izip ihsin a hung soh laiah, ramṭhing fehtlăngin Tipi Sen lamah a feh ih, Kadesh a thleng. 17 Cun Israel in Edom siangpahrang hnenah palaipawl a thlah ih, «Zangfahten na ram ka paltlăng ding,» tiah a ti. Asinan Edom siangpahrang in a ngaithla lo. Cuvek thothoin Moab siangpahrang hnenah a thlah, asinan a lung a kim lo. Cule Israel cu Kadesh ah a tâng. 18 Cule ramṭhing an paltlăng ih, Edom ram le Moab ram cu an hēl, cule Moab nisuahnak lam ram an thleng ih, Arnon khat lam ralah ṭanhmun an khuar. Asinan Moab ram sungah an lut lo, ziangahtile Arnon cu Moab ramri a si. 19 Cun Israel in Amor-mipawlih siangpahrang Sihon, Heshbon khawpi siangpahrang hnenah palaipawl a thlah ih a hnenah, «Zangfahten na ram paltlăngin kan hmunram panin kan feh ding,» tiah an ti. 20 Asinan Sihon in a ram sung paltlăng dingah Israel a zum lo. Cun Sihon in a milaipawl hmuahhmuah a khawm, Jahaz ah ṭanhmun a khuar ih Israel cu a do. 21 Cule Israel-ih Pathian Jehovah in Sihon le a mipawl hmuahhmuah cu Israel kut ah a pe ih, anmah cu an neh. Cuticun Israel in cutawk ram luahtu Amor-mipawlih neih mi ram hmuahhmuah cu a nei ṭheh. 22 Amor-mipawlih neih mi ramṭhen hmuahhmuah, Arnon ihsin Jabbok tiang le ramṭhing ihsin Jordan tiang an nei.

23 ‹Cule Israel-ih Pathian Jehovah in a mi Israel hmaiah Amor-mipawl cu a hnawhsuak hai, curuangah nannih in ram cu nan nei ding maw? 24 Nan pathian Kemosh in nei dingih a lo pek mi pauhpauh cu nan nei ding a si lo maw? Cutin kan Pathian Jehovah in kan hmaiih a lawn mi pauhpauh kan nei ding a si. 25 Cule nannihpawl hi Zippor-ih fapa Balak, Moab siangpahrang hnakin nan ṭhasawn maw si? Anih cun Israel a to dah maw? Anmah cu a do dah hai maw? 26 Israel cu Heshbon le a khuapawl, Aroer le a khuapawl le Arnon kiang khuapawl hmuahhmuah ih kum 300 sung an cēn laiah khan, ziangahso cupawl cu nan rak lâksal lo? 27 Curuangah nan parah thilsual ka tuah lo, nanmah sawnin keimah in donak in ka parah thil nan tisual a si. Thuṭhentu Jehovah in tuihsun ah Israel tefapawl le Ammon tefapawl karlakah thuṭhen seh,› a ti,» tiin. 28 Sikhalsehla, Ammon tefapawlih siangpahrang in Jefthah ih cah mi ṭawngkampawl cu a rak ngaithla lo.

Jefthah-ih Thutiam

29 Cun Jehovah Thlarau cu Jefthah parah a thleng, cule anih cun Gilead ram le Manasseh ram a paltlăng ih, Gilead ram Mizpah khua a paltlăng. Cule Gilead ram Mizpah khua ihsin Ammon tefapawl a pan. 30 Cule Jefthah in Jehovah hnenah thutiam a tuah ih, «Ka kut ah Ammon tefapawl i pek ngaingai ding asile, 31 hitin a si ding, Ammon tefapawl lak ihsin ralmuangih ka kir tikah, keimah táwng dingah ka inn sângka ihsin a ra suaktu pauhpauh Jehovah ta an si tengteng ding a si. Cule cumi cu Meiur Thilhlăn ah ka hlan ding,» tiah a ti.

32 Cutin Jefthah cu Ammon tefapawl do dingin a tánkai, cule Jehovah in anmah cu a kut ah a pek. 33 Cule Aroer khua ihsin Minith tiang a neh vivo ih, cule Abel Keramim tiang khaw 20 rori nasazetin a that hai. Cutin Ammon-mipawl cu Israel tefapawl hmaiah an duai.

Jefthah Fanu

34 Jefthah cu Mizpah ih a inn a thlen tikah, ngai hnik, a fanu cu khuangte le lam phahin amah hmuak dingin a ra suak. Amah cu a fa neihsŭn a si. Amah siarlo fapa siseh, fanu siseh a nei lo. 35 Cule hitin a si, Jefthah in a fanu a hmuh tikah a hnipuan a thlek ih, «Ai law, ka fanu! Niam tukah i dir maw! Nang hi i tibuaitupawl lakih tel na si! Ziangahtile kei in Jehovah hnenah ka kâ ka âng zo ih, ka lakirsal thei lo,» tiah a ti.

36 Cutikah a fanu cun a hnenah, «Ka pa, Jehovah hnenih na kâ na an zo a si ahcun, na kâ ih suak mi vekin ka parah tuah aw. Ziangruangahtile Jehovah in na ral, Ammon tefapawl phuba a lo laksak zo a si,» tiah a ti. 37 Cun a fanu cun a pa hnenah, «Himi thil hi ka hrangah tuah si seh, thla hnih sung cu keimah te lawng um ning, cutin ka feh ding ih tlangpawl ah ka vakkûal ding, cule fala him ka sinak hi ka ṭah thlohthlo ding, keimah le ka rualpipawl in,» tiah a ti.

38 Cun Jefthah in, «Feh aw,» tiah a ti. Cule a fanu cu thla hnih sung a thlah, a rualpipawl thawn feh in tlang ah fala him a sinak cu a ṭah. 39 Cule thla hnih a kim hnuah hitin a si, a pa hnenah a ra kirsal ih, Jefthah cun a fanu parih thu a rak tiam zo mi a thutiam cu a fanu parah cun a tuahsuak. A fanu in mipa zohman a thei lo. 40 Cule Israel ram ah Israel fanupawl in kum tin Gilead-mi Jefthah fanu ni li sung ṭah cu an nunphung ah a cang.

12

Jefthah le Efraim Buainak

1 Cun Efraim mipapawl cu an fĭnkhawmaw ih, sak lamah an feh, cule Jefthah hnenah, «Ziangruangah Ammon tefapawl do dingah na tánkai ih, na hnenih feh dingih in sawm ve lo? Na inn thawn meisa in kan lo ur cih ding!» tiah an ti.

2 Cule Jefthah in an hnenah, «Ka mipawl le keimah cu Ammon tefapawl thawn nasazetin kan doaw, cule băwmnak ka lo dil hai tikah an kut sung ihsin nannih in in runsuak lo. 3 Nannih in keimah in runsuak lo ti ka hmuh tikah, thih pawisa loin ka ṭang ih, Ammon tefapawl do dingin ka tánkai. Cule Jehovah in anmah cu ka kut ah i pe. Cuticun ziangahso keimah do dingah tuihsun ah ka hnenih nan rat?» tiah a ti.

4 Cun Jefthah in Gilead mipapawl hmuahhmuah cu hmunkhatah a kokhawm hai ih Efraim cu a do. Cule Gilead mipapawl in Efraim cu an neh. Ziangruangahtile annih in, «Nannih Gilead-mipawl cu Efraim-mipawl lak le Manasseh-mipawl lakih Efraim raltlân nan si,» tiah an ti. 5 Gilead-mipawl in Efraim-mipawl thlen hlanah Jordan kāipawl an la. Cule a tlânsuak mi Efraim-mi zokhal in, «Tankai hram ning,» tiah a ti tikah, Gilead mipapawl in a hnenah, «Efraim-mi na si maw?» an ti ih anih in, «Si lo,» a ti asile, 6 a hnenah, «Asile, Shibboleth! ti aw» tiah an ti. Cule anih in, «Sibboleth,» tiah a ti. Ziangahtile cumi cu anih in dikten a sāl thiam lo. Cule amah cu an kai ih Jordan kāipawl ah an that. Cuih cān ah Efraim-mi 42000 an thi.

7 Cule Jefthah in kum ruk sung Israel tlunah lai a rel. Cun Gilead-mi Jefthah cu a thi ih, Gilead ram khawpipawl lakih khaw pakhat ah phum a si.

Ibzan, Elon le Abdon

8 Amai hnuah Bethlehem-ih Ibzan in Israel tlunah lai a rel. 9 Anih in fapa 30 a nei. Cule fanu 30 cu a sungkhat hladeuh hnenah pasal a neihter hai ih, a fapapawl hrangah hmun dang ihsin fanu 30 a hruailut. Kum sarih sung Israel tlunah lai a rel. 10 Cun Ibzan cu a thi ih Bethlehem ah phum a si.

11 Amai hnuah Zebulun-mi Elon in Israel tlunah lai a rel. Kum hra sung Israel tlunah lai a rel. 12 Cule Zebulun-mi Elon cu a thi ih, Zebulun ram Aijalon khua ah phum a si.

13 Amai hnuah Pirathon-mi Hillel fapa Abdon in Israel tlunah lai a rel. 14 Lāk no 70 parih totu fapa 40 le tu 30 a nei. Kum riat sung Israel tlunah lai a rel. 15 Cun Pirathon-mi Hillel fapa Abdon cu a thi ih, Efraim ram, Amalek-mipawlih tlang ram ah Pirathon khua ah phum a si.

13

Samson Hrinnak

1 Israel tefapawl cun Jehovah mithmuhah thil ṭhalo an tuah lala ih, Jehovah in anmah cu kum 40 sung Filisṭia-mipawlih kut ah a pe. 2 Cun Zorah khua ah Dân hrin mi pakhat a rak um. A hmin cu Manoah a si ih a nupi cu a cing ih fāte a nei lo. 3 Cule cuih nunau hnenah Jehovah-ih vancungmi a rung lang ih a hnenah, «Ngai hnik, nang cu na cing ih, fāte na hring lo, sikhalsehla nau na pai ding ih fapa na hring ding. 4 Curuangah sabitzu siseh, zureu siseh in lo dingin le a thianglo mi zianghman ei lo dingin fimkhur aw. 5 Ziangahtile ngai hnik, nau na pai ding ih fapa na hring ding. Cule a lu parah sám ziahnak nâmte a thleng lo pei, ziangahtile nauhak cu sūl sung ihsin Pathian hrangah ^aNazir-mi a si ding ih, amah in Filisṭia-mipawl kut ihsin Israel runsuah a thăwk ding,» tiah a ti.

13:5^a Nazir-mi: Nazir-mi ih thlun ding mi dān cu Mipum siarnak 6:1-21 ah tarlăng a si.

6 Cutin cuih nunau cu a feh ih a pasal a sim, «Pathian mi pakhat ka hnenah a ra ih, a hmel cu Pathian vancungmi hmel vek, ṭihzahum zet a si. Asinan amah cu khuitawk ihsin a si ti ka sut lo, amah khal in a hmin i sim lo. 7 Cule anih in ka hnenah, ‹Ngai hnik, nau na pai ding ih fapa na hring ding. Sabitzu siseh, zureu siseh na in lo pei, a thianglo mi zianghman na ei fawn lo pei, ziangahtile nauhak cu sūl sung ihsin a thih ni tiang Pathian hrangah Nazir-mi a si ding a si,› i ti,» tiah a ti.

8 Cun Manoah cun Jehovah hnenah a dil ih, «Maw ka Bawipa, zangfahten na thlah mi Pathian mi kha kan hnenah rasal sehla, a suak ding mi nauhak hrangah ziang kan tuah ding ti in sim seh,» tiah a ti.

9 Cule Pathian in Manoah-ih aw a ngai ih nunau cu ramlak ih a to laiah a hnenah Pathian vancungmi a rasal. Asinan a pasal Manoah cu a hnenah a rak um lo. 10 Cun nunaunu cu manhlap zetin a tlân ih a pasal a sim, cule a pasal hnenah, «Zoh hnik, ni dangih ka hnenih ra pa kha atu te rori ah ka hnenah a ra lang!» tiah a ti.

11 Cule Manoah cu a tho ih a nupi a thlun. Cu pa hnen a thlen tikah a hnenah, «Nangmah hi hi nunaunu hnenih rak ṭawngtupa na si maw?» tiah a ti.

Cule anih in, «Ka si» tiah a ti.

12 Manoah in, «Atu ah na ṭawngkampawl thleng seh! Nauhakpaih nundān ding le a hna cu ziang a si ding?» tiah a ti.

13 Cutikah Jehovah-ih vancungmi cun Manoah hnenah, «Nunau cun a hnenih ka sim mi hmuahhmuah ah fimkhur seh. 14 Sabit hri ihsi a ra mi thil zianghman a in lo pei ih, sabitzu siseh, zureu siseh, zianghman a in lo pei, a thianglo mi thil zianghman a ei lo pei. Amah ka fial mi hmuahhmuah kilhim seh,» tiah a sim.

15 Cun Manoah in Jehovah-ih vancungmi hnenah, «Zangfahten kan lo kai hrih ding ih, na hrangah me no kan timtuah ding,» tiah a ti.

16 Cule Jehovah-ih vancungmi in Manoah hnenah, «Nang in i kai khal awla na rawl ka ei lo ding. Asinan Meiur Thilhlăn na hlăn asile, cumi cu Jehovah hnenah na hlan ding a si,» tiah a ti. Ziangahtile Manoah in amah cu Jehovah-ih vancungmi a si ti a thei lo.

17 Cun Manoah in Jehovah-ih vancungmi hnenah, «Na sim mipawl an thlen tikih, kan lo sunlawihnak dingah na hmin zo a si?» tiah a ti.

18 Cule Jehovah-ih vancungmi in a hnenah, «Ziangruangah ka hmin i sut? Ka hmin cu khawruahharza tuk a si,» tiah a ti.

19 Cun Manoah cun me no cu Thlairawl Thilhlăn thawn a la ih, cumi cu Jehovah hnenah lungpi parah a hlan. Cule Manoah le a nupi in an zoh laiah, vancungmi in khawruahharza zet thil a tuah. 20 Hitin a si, biakṭheng ihsin van lamah meialh a kaiso laiah Jehovah-ih vancungmi cu biakṭheng ih meialh lakin a kaiso! Manoah le a nupi in himi an hmuh tikah leisin bihin an băwkkhup. 21 Manoah le a nupi hnenah Jehovah-ih vancungmi a lăng nawn lo tikah, Manoah in amah cu Jehovah-ih vancungmi a si ti a thei.

22 Cule Manoah in a nupi hnenah, «Kan thi tengteng ding, ziangruangahtile Pathian kan rak hmu aw!» tiah a ti.

23 Asinan a nupi in a hnenah, «Jehovah in thah in duh si sehla, kan kut ihsin Meiur Thilhlăn le Thlairawl Thilhlăn tla a cohlang lo ding, amah in himi thil hmuahhmuah khal in rak hmuter lo ding ih, hitivekin atu ah hivek thilpawl khal in sim fawn lo ding,» tiah a ti.

24 Cutin nunaunu cun fapa a hring ih a hmin ah Samson a sak. Cule nauhak cu a ṭhanglian ih Jehovah in amah cu a thlawsuah. 25 Cule Jehovah Thlarau cu Zorah le Eshtaol karlak Dân ṭanhmun khuarnak ah Samson parah căngvaih a thăwk.

14

Samson

1 Cun Samson cu Timnah khua ah a suk ih, Timnah khua ih Filisṭia-mipawlih fanupawl lakih nunau pakhat a hmu. 2 Cule a hung so ih a nu le a pa hnenah, «Timnah khua ah Filisṭia-mipawlih fanupawl lakih nunau pakhat ka hmu, curuangah atu ah amah cu ka nupi ah in ṭhitsak uh,» tiah a ti.

3 Cun a nu le a pa in a hnenah, «Na unaupawlih fanupawl lakah, asilole kan mipawl hmuahhmuah lakah nunau an um lo maw si, serh zim tan lo mi Filisṭia-mipawl hnen ihsin nupi va ṭhit na tum?» tiah an ti.

Cule Samson in a pa hnenah, «Amah cu in ṭhitsak aw, ziangahtile anih cu ka mithmuhah a dik a si,» tiah a ti. 4 Asinan a nu le a pa in cumi cu Jehovah hnen ihsi suak a si ti an thei lo. Ziangahtile Filisṭia-mipawl dokalhih cāngvai dingah anih in remcānnak a hawl rero a si. Cu laiah cun Filisṭia-mipawl in Israel an uk.

5 Cutin Samson cu a nu le a pa thawn Timnah khua ah an suk ih, Timnah sabit hmuan an thleng. Cule ngai hnik, kiosa vanglai cu amah hrumhnawh phahin a ra. 6 Cule Jehovah Thlarau cu Samson parah cak zetin a thleng ih, a kut ah zianghman a nei lo nân mi pakhat in me note a thlek vekin, kiosa cu a thlek. Asinan ziang a tuah ti a nu khal a pa khal a sim lo.

7 Cun Samson cu a suk ih, nunaunu thawn an beaw, cule cu nu cu Samson mithmuhah a dik. 8 Ni tawkfang hnuah, amah ṭhi dingih a kirsal tikah, kiosa ruak zoh dingin sirah a pial. Cule ngai hnik, kiosa ruak sungah khuai bawm le khuaitizu a rak um. 9 A kut ah cumi ihta ziangmaw zât a la ih, ei phahin a feh vivo. A nu le a pa hnen a thlen tikah, an hnenah ziangmaw zât a pe ih annih khal in an ei. Asinan khuaitizu cu kiosa ruak ihsin a lâk thu anmah a sim lo.

10 Cutin a pa cu nunaunuih hnenah a suk. Cule Samson in cu tawkah puai a tuah, ziangahtile minopawl in cuvekin an tuah ṭheu. 11 Cule hitin a rak cang, Filisṭia-mipawl in amah an hmuh tikah amah thawi um dingah hawipi 30 an rak hruai. 12 Cun Samson in an hnenah, «Thu ka lo pawlh ding. Cumi cu ni sarih puai sungah nan hawlsuah ih ka hnenih in sim thei taktak asile, patzai sinfen 30 le thlengawknak hnipuan zun 30 ka lo pe ding. 13 Asinan cumi cu ka hnenih in sim thei lo asile, nannih in patzai sinfen 30 le thlengawknak hnipuan zun 30 in pe ding,» tiah a ti.

Cule annih in a hnenah, «Kan theih dingah na thupawlh mi cu rel hnik,» tiah an ti.

14 Cuticun anih in an hnenah,

«Eitu sung ihsin ei ding a suak ih,
A cak mi ihsin a thlum mi a suak,»

tiah a ti.

Cule annih in ni thum sung cuih thupawlh an sim thei lo.

15 Asinan hitin a si, a ni litnak ah Samson-ih nupi hnenah, «Kan hnenih a thupawlh sim dingin na pasal lēm aw, culoasile nangmah le na paih inn cu mei in kan lo ur ding. Kan ta a si mi la dingah in rak sawm maw si? Cuti a si lo maw?» tiah an ti. 16 Cun Samson-ih nupi cu a hnenah a ṭap ih, «I hua a si hi! Nang in i duhdawt lo! Ka minungpawlih fapapawl hnenah thu na pawlh, cumi cu i simfiang duh si lo,» tiah a ti.

Cule Samson in a hnenah, «Zoh hnik, cumi cu ka nu le ka pa khal ka sim lo. Curuangah na hnenah cumi cu ka lo sim ding maw?» tiah a ti. 17 Cun anih cu a hnenah an puai sung ni sarih sung a ṭap. Cule hitin a si, a ni sarihnak ah amah cu a simfiang, ziangruangahtile anih in amah cu a năwr tuk. Cun a nupi cun a minungpawlih fapapawl hnenah thupawlh cu a sim. 18 Cutin khawpi mipapawl in a ni sarihnak nitlak hlanah,

«Khuaitizu hnakih thlumsawn cu ziangso?
Cun kiosa hnakih caksawn cu ziangso?»

tiin a hnenah an ti.

Cule anih in an hnenah,
«Ka câwla thawn leilet lo uhla cu,
Ka thupawlh nan thei lo ding!»

tiah a ti hai.

19 Cun Jehovah Thlarau cu Samson parah cak zetin a thleng ih, Ashkelon khua ah a suk, cule an mipa 30 a that, an hnipuan a la ih, a thupawlh rak simtupawl hnenah thlengawknak hnipuan a pek. Cutin a thinheng cu a tho ih a paih inn ah a so. 20 Cule a nupi cu Samson-ih hawipi ṭhabik a rak si mi, a rualpa hnenah an pe.

15

Samson in Phuba a La

1 Tawkfang a rei hnuah, sangvut khawm tikcu ah, Samson cun me note thawn a nupi a veh. Cule anih in, «Ka nupi hnenah, a pindan sungah lut ning,» tiah a ti. Asinan a nupi-ih pa in luh ding a siang lo.

2 A nupi-ih pa in, «Amah na hua taktak ah ka rak ruat a si, curuangah amah cu na rualpa hnenah ka pe. A naunu hi anih hnakin a hmel a ṭhasawn a si lo maw? Zangfahten amah cu a u aiah ṭhi aw,» tiah a ti.

3 Cule Samson in an hnenah, «Tuih ṭum cu Filisṭia-mipawl ka tinat hai a si khalle sawihnăwm kâi lo ka si ding!» tiah a ti. 4 Cun Samson cu a feh ih sihál 300 a kai, cule meiserpawl a la, sihálpawlih mei le mei a merh ih an mei pahnih karlakah meiser a ret. 5 Meiserpawl cu a nawh hai tikah, Filisṭia-mipawlih thlairawl lakah sihálpawl cu a thlah hai. Cule thlairawl pen le thlairawl kung ding laipawl, sabit hmuanpawl le olif hmuanpawl an kāng.

6 Cun Filisṭia-mipawl in, «Hihi zo in a tuah?» tiah an ti.

Cule annih in, «Timnah miih mâkpa Samson a si, ziangruangahtile a pu in a nupi a lâk ih amah cu Samson-ih hawipi hnenah a pe,» tiah an ti. Cule Filisṭia-mipawl cu an so ih meisa in amahnu le a pa cu an ur.

7 Samson in an hnenah, «Hitivekin thil nan ti ruangah nan parah phuba ka lo sám tengteng ding ih, cumi hnuah ka cawl ding,» tiah a ti hai. 8 Cutin anih in nasazetin anmah a vaw hai ih mi tampi a that, cun a suk ih, Etam lung khawkrăwk ah a cêng.

9 Cule Filisṭia-mipawl cu an so ih, Judah ram ah ṭanhmunkhuarin Lehi hmun ah an tlaraw. 10 Cule Judah mipapawl in, «Ziangruangah kanmah do dingih nan hung soh?» tiah an ti.

Cutikah annih in, «Samson ṭawn dingah kan ra so, kan parih a tuah vekin a parih tuah dingah,» tiah an ti.

11 Cule Etam lung khawkrawk ah Judah mipa 3000 an suk ih, Samson hnenah, «Filisṭia-mipawl hi kan parih uktu an si ti na thei lo maw si? Kan parih na thil ti mi hi ziangso a si?» tiah an ti.

Cule anih in an hnenah, «Ka parih an tuah vekin an parah ka tuah a si,» tiah a ti.

12 Asinan annih in a hnenah, «Nangmah lo ṭawn ih Filisṭia-mipawl kut ih lo pe dingah kan ra suk,» tiah an ti.

Cun Samson in an hnenah, «Nannih in in that lo dingin siasăm uh,» tiah a ti.

13 Cule a hnenah, «That lo e, hnget zetin kan lo ṭawn ding ih an kut ah nangmah cu kan lo pe sawn ding, asinan kan lo that hrimhrim lo ding,» tiin an sim. Cule hri thar pahnih thawn amah cu an ṭawn ih lungpi ihsin an hruaiso.

14 Lehi hmun a thlen tikah amah dokalhih au phahin Filisṭia-mipawl an thleng. Cun Jehovah Thlarau cu Samson parah cak zetin a thleng ih, a bân ih hripawl cu meisa in patkung kāng vekah an cang, cule a kutpawl ihsin a ṭawnnakpawl an tla. 15 Lāk khabe ruh thar a hmu, a kut a suah ih cumi cu a lâk. Cule cumi thawn mipa 1000 a that. 16 Cun Samson in,

«Lāk khabe ruh in,
A pen i penkhawm,
Lāk khabe ruh in
Mipa 1000 ka that!»

tiah a ti.

17 Cule hitin a si, a ṭawng a ṭheh tikah a kut ihsin khabe ruh cu a hlăwn ih cutawk hmun cu ^aRamath-Lehi tiah a ko. 18 Cun anih cu a ti a hâl tuk, cule Jehovah hnenah a ausuak ih, «Na siahhlawh kut hmangin himi runsuahnak ropi na pe zo, cule atu ah serh zim tan lo mipawl kut ah tihâlin ka thi ding maw?» tiah a ti. 19 Cule Lehi hmun ih a um mi hmun kuar cu Pathian in a kakter ih tidai a ra suak, cule a in, cun a thinlung a caksal ih, a nung hlunhlo. Curuangah a hmin ah ^bEn-Hakkore tiah a sak, cumi cu tuihni tiangin Lehi hmun ah a um. 20 Cule anih in Filisṭia-mipawlih san laiah kum 20 sung Israel tlunah lai a rel.

15:17^a Ramath-Lehi: Khaberuh hmun sâng tinak a si.

15:19^b En-Hakkore: Hebru ṭawng a si ih, a sullam cu «kotuih cirhti» tinak a si.

16

Samson le Delilah

1 Cule Samson cu Gaza khua ah a feh ih, cu tawkah hlawhhlâng pakhat a hmu ih a hnenah a lut. 2 «Samson hi tawkah a thleng zo,» tiah Gaza khawmipawl sim an si tikah, cuih hmun cu an kulh ih zanvarin khawpi kăwtka in an bawh. Zanvar daiten an um, «Zing lam khua a van tikah, amah kan that ding,» tiah an ti. 3 Cule Samson cu zan laifang tiang a it ih, zanṭim ah a tho, khawpi kăwtka sângkapawl le a ṭhuam pahnih cu a kai ih, a kalhnak thawn a zaten a phawi, a liang parah cupawl cu a ret ih Hebron zawnih tlang zimah a hun pu.

4 Cuihhnu ah hitin a si, Sorek Phaikuam ih nunau pakhat a duh, a hmin cu Delilah a si. 5 Cule Filisṭia-mipawlih bawipawl cu cu nuih hnenah an ra ih a hnenah, «Amah lēm awla, amah zawnzaiter dingin amah kan ṭawn theinak dingah a cahnak maksak khuiah a ṭhumaw ti le amah kan nehdān ding hawlsuak aw. Cule kan zaten ngun 1100 cio kan lo pe ding,» tiah an ti.

6 Cuticun Delilah in Samson hnenah, «Zangfahten na cahnak maksak hi khuiah a um ih, lo zawnzaiter dingah ziang thawn ṭawn theih na si ding ti i sim aw,» tiah a ti.

7 Cule Samson in a hnenah, «A ro hrih lo mi, thálhri thar pasarih in in ṭawn asile, ka cak lo ding ih mipa dang vekah ka cang ding,» tiah a ti.

8 Cutin Filisṭia-mipawlih bawipawl in a hnenah a ro hrih lo mi thálhri thar pasarih an rak keng ih cupawl thawn anih in amah cu a ṭawn. 9 Cu laiah mipapawl cu pindan sungah Delilah hnenah umin an bawh. Cule Delilah in a hnenah, «Samson, Filisṭia-mipawl in an run lo do,» tiah a ti. Asinan thálhripawl cu mei in pathri a kāngcat vekin an cat. Cutin a cahnak thuthup cu theih a si lo.

10 Cun Delilah in Samson hnenah, «Zoh hnik, i rak bum ih thuphan i sim. Atu ah, zangfahten ziang thawn nangmah ṭawn theih na si ding i sim aw,» tiah a ti.

11 Cule Samson cun a hnenah, «Hri thar hman dah lo mi thawn fek zetin in ṭawn asile, ka cak lo ding ih mipa dang vekah ka cang ding,» tiah a ti. 12 Curuangah Delilah cun hri tharpawl a la ih cupawl thawn amah cu a ṭawn ih a hnenah, «Samson, Filisṭia-mipawl in an run lo do,» tiah a ti. Cule mipapawl cu pindan sungah umin an bawh. Asinan a bân ṭawnnakpawl cu pat vekin a catter. 13 Delilah in Samson hnenah, «Tu tik tiang i bum ih thuphan i sim. Ziang thawi ṭawn theih na si ding i sim aw,» tiah a ti.

Cule anih in a hnenah, «Ka lusámphiar pasarih hi puan ah tah cih aw,» tiah a ti. 14 Cuticun cumi cu kilhnak in hnget zetin a tah cih ih a hnenah, «Samson, Filisṭia-mipawl in an run lo do!» tiah a ti. Asinan a ihthahnak ihsin a tho ih a kilhnak cu puanbu thawn a dirsuak.

15 Cun Delilah in a hnenah, «Na thinlung ka hnenah um si loin ziangtin saw, ‹Ka lo duh› na ti thei? Hitin vei thum i bum zo ih, na cahnak maksak khuiah a um ti i sim lo,» tiah a ti. 16 Cule hitin a si, a ṭawngkampawl thawn ni tin a hnaihnăwk ih a năwr tikah, a thinlung cu thih duh tiangin a van a sâng. 17 Cutin anih cun a thinlung zaten a sim ih a hnenah, «Ka lu cu sám ziahnak nâmte in a dai dah lo, ziangahtile keimah cu ka nuih sūl sung ihsin Pathian hrangah Nazir-mi ka si. Ziah ka si le, ka cahnak in i suahsan ding ih ka cak lo ding. Cule mipa dang vek ka si ding,» tiah a ti.

18 Delilah cun a thinlung zaten amah a sim ti a theih tikah, mi a thlah ih Filisṭia-mipawlih bawipawl a ko, cule, «Vei khatten ra hrih uh, ziangahtile a thinlung zaten i sim zo,» tiah a ti. Cuticun Filisṭia-mipawlih bawipawl cu a hnenah an ra ih an kut ah paisa an keng. 19 Cun amah cu nunaunu in a cāwn parih itthat dingah a thlim. Cule mipa pakhat a ko ih a lu ih sámphiar pasarih cu a mehter. Cule Delilah in amah cu sawisak a thăwk ih, a cahnak in amah cu a tlansan. 20 Cule anih in, «Samson, Filisṭia-mipawl in an run lo do!» tiah a ti.

Cuticun a ihthahnak ihsin a ṭhang ih, «Tuih hlan vekin ka fehsuak ding, cān dangpawl vekin ka tâlsuak leh mai ding!» tiah a ti. Asinan Jehovah in a fehsan ti a thei lo. 21 Cun Filisṭia-mipawl in amah cu an kai ih a mit an phawrh, cule Gaza khua ah an suhpi. Dar cikcin an bunter ih thawnginn sungih riallung rialtu ah a cang. 22 Sikhalsehla a lusám cu meh a si hnuah a ṭhangsal.

Samson Thihnak

23 Cun Filisṭia-mipawlih bawipawl cu an pathian Dagon hnenah thawinak ropi hlan dingah le lungawiaipuangih um dingin an pungkhawm. Cule annih in,

«Kan ral Samson cu kan kut ah
Kan pathian in in pe!»

tiah an ti.

24 Mipi in amah an hmuh tikah, an pathian an thangṭhat, ziangahtile annih in,

«Kan kut ah kan pathian in kan ral in pe,
Kan ram siatsuahtu le,
Kan lakih mi tampi thattu cu,»

tiah an ti.

25 Cun hitin a si, an thinlungpawl tla a năwm tikah, «Samson ko uh, kan hrangah zohnuam tuah seh,» tiah an ti. Cuticun thawnginn ihsin Samson cu an ko ih, an hrangah zohnuam a tuah. Cule amah cu ṭhuampawl karlakah an ret. 26 Cun Samson in a kut kaitu mipa nauhak hnenah, «Ka hngauhsan thei hainak dingah, innpi dotu ṭhuampawl thâm ning,» tiah a ti. 27 Innpi cu mipa le nunau an khat. Filisṭia-mipawlih bawipawl hmuahhmuah cu cu tawkah an um. Samson in zohnuam a tuah laiah inn tlunah a zohtu mipa le nunau 3000 hrawng an si. 28 Cun Samson in Jehovah a ko ih, «Maw Bawipa Jehovah, i máng hram aw! Maw Pathian, ka mit pahnih hrangah Filisṭia-mipawl parah hmakhatteih phuba ka lâk theinak dingah atu ah vei khatten i cakter hram aw!» tiah a ti. 29 Cule Samson cun innpi dotu a laifangih ṭhuam pahnih cu a pāwk ih, pakhat a vawrh lamah le a dang a keh lamah a hngauhsan. 30 Cun Samson in, «Filisṭia-mipawl zawngah thi ko ning!» tiah a ti. Cule a tha zaten a tûl ih innpi cu bawipawl le cumi sungih um mi mipi hmuahhmuah parah a tla. Cutin a thih zawngih a thah mi mithipawl cu a dam laiih a thah mi hnakin an tamsawn.

31 Cule a unaupawl le a paih sungkua hmuahhmuah an ra ih amah cu an la, cule an záwnso ih Zorah le Eshtoal karlakih a pa Manoah-ih thlān ah amah cu an phum. Kum 20 sung Israel tlunah lai a rel.

17

Mikah-ih Milempawl

1 Cun Efraim tlang ram ah pa pakhat a rak um, a hmin cu Mikah a si. 2 Cule anih in a nu hnenah, «Na hnen ihsin lâk a si mi ngun shekel 1100, cumi parih ka hnatheih rori ih na camsiat mi kha, ngai hnik, khaih ngun kha ka hnenah a um, ka lâk sokhaw,» tiah a ti.

Cule a nu in, «Ka fapa cu Jehovah in thlawsuah hram seh,» tiah a ti. 3 Cule ngun shekel 1100 cu a nu hnenah a khirhsal, cule a nu in, «Ngun cu ka kut ihsin khercawp milim le burcawp milim tuah dingah ka fapa hrangah Jehovah hnenah ka serhhran pumhlum zo. Cumi cu na hnenah ka khirhsal ding,» tiah a ti. 4 Cuticun a nu hnenah ngun cu a khirhsal. Cun a nu in ngun shekel 200 a la ih, cupawl cu ngun sertu hnenah a pe, cule anih in cumi cu khercawp milim le burcawp milim ah a tuah, cule cupawl cu Mikah-ih inn ah an um. 5 Cu pa Mikah in ^ainnte a nei ih Puithiam Kâwrcung pakhat le sungkaw milempawl a tuah, cule a fapapawl lakih pakhat, a puithiam si dingin a serhhran. 6 Cu laiah Israel ram ah siangpahrang a um lo, mi kip in anmai mit ih dik an ti mi an tuah.

17:5^a innte: Hihi pathian biaknak innte a si.

7 Cun Judah ram ih Bethlehem khua ah tlangval pakhat, Judah hrin lakih cêng a um. Amah cu Levi-mi a si ih cu tawkah a va tlâwng. 8 Cu pa cu a hmuh mi hmun pakhat khat ih um dingin Judah ram ih Bethlehem khua ihsin a suak. Cun anih cu khual a tlawng ih, Efraim tlang ram ah a feh, cule Mikah inn ah a thleng. 9 Cule Mikah in a hnenah, «Khui tawk ihsin na ra?» tiah a ti.

Cun anih in a hnenah, «Judah ram Bethlehem khua ihsin Levi-mi ka si ih umnak hmun hawlin ka vâk a si,» tiah a ti.

10 Mikah in a hnenah, «Ka hnenah cêng awla, ka hrangah pa le puithiam si aw, cule kum tin ngun shekel hra, thlengawknak hnipuan le na ei ding ka lo pe ding,» tiah a ti. Cutin Levi-mi cu a lut. 11 Cun Levi-mi cu cu pa hnenih cêng dingah a lung a kim, cule tlangvalpa cu a hnenah a fapapawl lakih pakhat vekah a cang. 12 Cutin Mikah cun Levi-mi cu a serhhran ih, tlangvalpa cu a puithiam ah a cang, cule Mikah-ih inn ah a um. 13 Cun Mikah in, «Puithiam ah Levi-mi ka neih ruangah atu ah cun Jehovah cu ka parah a ṭha ding ti ka thei!» tiah a ti.

18

Dân-mipawl Vaihnak

1 Cu laiah Israel ah siangpahrang a um lo. Cule cu laiah Dân hnám cun an hrangah cēnnak ding ro an hawl, ziangahtile cumi ni tiangah Israel hnámpawl lakih an ro cu an hnenah a rak thleng hrih lo. 2 Cuticun Dân tefapawl in an zate lak ihsin an hnám lakih mipa panga, Zorah khua le Eshtaol khua ihsin mipa ral do mipawl cu ram thlingthla le cumi hawl dingah an thlah. An hnenah, «Feh uh, ram va hawl uh,» tiah an ti. Cutin Efraim tlang ram ih Mikah inn ah an feh ih, cu tawkah an riak.

3 Mikah inn ih an um laiah Levi tlangvalpaih awcawi cu an theithiam. Sir an her ih a hnenah, «Hi tawkah zo in a lo hruai? Hi tawkah ziang na tuah? Hi tawkah ziang na nei?» tiah an ti.

4 Anih in an hnenah, «Cutin khatin Mikah in ka hrangah a tuah. Amah in in ruai ih a puithiam ah ka rak cang,» tiah a ti.

5 Cule annih in a hnenah, «Kan fehnak lamzin tluanih kan hmuingil ding le ding lo kan theihnak dingah zangfahten Pathian sut aw,» tiah an ti.

6 Cule puithiam in an hnenah, «Hnangamten feh uh. Nan lamzin tluanah Jehovah umpinak um seh,» tiah a ti.

7 Cutin mipa panga pawl cu an suak ih Laish khua ah an feh, cutawk mipawl cu Sidon-mipawl bangin himten ralmûang zet le hnangam zetih an cēnzia an va hmu. Cuih ram ah ziangti lam khalih anmah ningzahnak thlentu ding palbĕttu an um lo. Sidon-mipawl thawn an hla-aw ih, zo thaw hman in pehtlaihawknak an nei lo. 8 Cun thlingthlatupawl cu Zorah le Eshtaol ih an unaupawl hnenah an thlengkir ih, an unaupawl in an hnenah, «Nan thu thlĕn ding cu ziang a si?» tiah an ti.

9 Cutikah annih in, «Tho uh, anmah va do uhsi. Ziangahtile cuih ram cu kan hmu zo ih, ngai hnik uh, cumi cu a ṭha zet mi a si. Nan cāngvai lo ding maw si? Cuih ram ih va feh ding le va lut dingah le va la dingah muangcâng hlah uh. 10 Nan feh tikah, ralmuangteih um mipi hnenah le ram kaupi ah nan thleng ding. Ziangahtile cumi cu Pathian in nan kut ah a lo pe zo, leilung ih um mi zianghman săm mi umlonak hmun a si,» tiah an ti.

11 Cule Zorah khua le Eshtaol khua ihsin Dân sungzapawl cu doawknak hriamhreipawl thawi a thuamaw mi mipa 600 pawl cu an fehsuak. 12 Cun an so ih Judah ram ih Kirjath Jearim khua ah ṭanhmun an khuar. Curuangah cuih hmun cu tuihni tiangin ^aMahaneh Dân tiah an ko. Ngai hnik cumi cu Kirjath Jearim nitlaknak lamah a um. 13 Cule cutawk ihsin Efraim tlang ram an paltlăng ih Mikah-ih inn an thleng.

18:12^a Mahaneh Dân: Dân hnám ṭanhmun khuarnak tinak a si.

14 Cun Laish ram thlingthla dingih rak fehsuaktu mipa panga pawl in an unaupawl hnenah, «Himi innpawl ah Puithiam Kâwrcung, sungkaw milempawl, khercawp milim le burcawp an um ti nan thei maw? Curuangah atu ah ziang nan tuah ding ti ruat uh,» tiah an ti. 15 Cule cu tawkah cun an pial ih, Mikah-ih inn, Levi tlangvalpaih umnak inn ah an thleng, cule amah cu an cibai. 16 Doawknak hriamhreipawl thawi a thuamaw mi Dân tefa mipa 600 pawl cu kăwtsuah ah an ding. 17 Cun ram thlingthla dingih a fehsuaktu mi panga pawl cu an so. Cu tawkah lutin khercawp milim, Puithiam Kâwrcung, sungkaw milempawl le burcawp milim pawl an la. Puithiam cu kăwtsuah ih doawknak hriamhreipawl thawi a thuamaw mi mipa 600 pawl zawngah a ding. 18 Hi mipapawl cu Mikah-ih inn sungah an lut ih khercawp milim, Puithiam Kâwrcung, sungkaw milempawl le burcawp milim pawl an lâk tikah puithiam in an hnenah, «Ziang nan tuah?» tiah a ti.

19 Cule annih in a hnenah, «Daiten um aw, na kâ kha na kut in hup awla, kanmah hnenah ra aw, kan hnenah pa le puithiam si aw. Mi pakhat sungkua puithiam si maw, Israel sungkua le hnám pakhat ih puithiam si so ṭhasawn?» tiah an ti. 20 Cutin cuih puithiam thinlung cu a lungawi, cule anih in Puithiam Kâwrcung, sungkaw milempawl le khercawp milim a la ih cupawl zawngah a feh.

21 Cun annih cu an heraw ih an păwk, cule an hmaiah an fanau tetepawl, sumhnám le bungruapawl an ret. 22 Mikah inn ihsin tawkfang an feh tikah, Mikah-ih inn kiangih um mipapawl an pungkhawmaw ih, Dân tefapawl cu an va man. 23 Cule Dân tefapawl cu an ko. Cun annih cu an herkûal ih Mikah hnenah, «Mi bur hi zât na khawm hi ziang na duh?» tiah an ti.

24 Cule anih in, «Ka tuah mi ka pathianpawl le ka puithiam tla nan la ih nan rak fehhlo. Atu ah ziang dang si ka neih lai? Ziangtin so ka hnenah, ‹Ziang na duh?› nan ti thei?» tiah a ti.

25 Cule Dân tefapawl in a hnenah, «Kan lakah na aw theih si hlah seh, culoasile na parah mipa ^athinhengpawl in an lo do ding ih, na nunnak le na sungkuapawlih nunnak na hloh pang ding!» tiah an ti. 26 Cun Dân tefapawl cu an suak. Cule anmah cu a hrangah an cak tuk ti Mikah in a hmuh tikah a her ih a inn ah a tlung.

18:25^a thinheng: A ṭawng hrampi ah cun, «thinlung khâtnak» ti a si.

Laish Khua ah Dân-mipawl Umhmun an Khuar

27 Cutin Mikah ih tuah mi thilpawl le a rak neih mi puithiam cu an la ih Laish khua, ralmûang le him ih um mipi hnenah an feh, cule anmah cu ralnâm hriam in an that ih meisa in khawpi cu an ur. 28 Cumi cu Sidon ihsin a hlat ruangah le zo thaw hmanin kungkaihawknak an neih lo ruangah, cu tawkah runsuaktu an um lo. Cumi cu Beth Rehob kiang phaikuam ah a si. Cule khawpi an dĭn ih cu tawkah an cêng. 29 Cule khawpi hmin ah Israel ram ih a suak mi an pa Dân hmin thlunin, Dân tiah an sak. Sikhalsehla a hlanih khawpi hmin cu Laish a si. 30 Cun Dân tefapawl in anmai hrangah khercawp milim an dĭn, cule Manasseh fa Gershom-ih fapa Jonathan le a fapapawl cu ram ihsin mipi hruaihloh an si hlanlo, Dân hnám hrangah puithiam an si. 31 Cutin Mikah in a tuah mi khercawp milim cu Shiloh khua ah Pathian inn a um sung hmuahhmuah cu anmai hrangah an dĭn.

19

Levi-mi le a Nusûn

1 Cule cu laiah hitin a si, Israel ram ih siangpahrang a um lo laiah, Efraim tlang ram dĕng lamih a um mi Levi-mi pakhat a rak um. Amai hrangah Judah ram ih Bethlehem ihta nusûn pakhat a nei. 2 Asinan a nusûn cun a rinum lo san ih a hnen ihsin Judah ram Bethlehem khua ih a paih inn ah a fehsan, cule cu tawkah thla li pumhlum a va um. 3 Cun a pasal cu a tho ih, a hnenah ^anemteih ṭawng dingah le amah hruaikirsal dingah, a zawngah a siahhlawh le a lāk kăwp khat thawn a va feh. Cutin cu nu in amah cu a paih inn sungah a hruai, cule nunaunuih pa in Levi mi a hmuh tikah, amah a tawn cu a lung a awi. 4 Cule a pu, nunaunuih pa in amah cu a kai ih a hnenah ni thum sung a câm. Cutin an ei ih an in, cule cu tawkah an riak.

19:3^a nemteih: A ṭawng hrampi ah cun, «thinlung ah,» ti a si.

5 Cun a ni litnak ah hitin a si, zing lam zingten an thawh tikah Levi mi cu fehsuak dingin a ding, asinan nunaunuih pa in a mâkpa hnenah, «Sang málte thawn na thinlung harhter awla, cuihhnu ah feh aw,» tiah a ti. 6 Cuticun an to ih, an pahnih cun an ei ih an in tlang. Cun nunaunuih pa in mipa hnenah, «Zangfahten tuihzan riak hrih awla, na thinlung tla nuam seh,» tiah a ti. 7 Cule cu pa cu fehsuak dingih a din tikah a pu in amah a ngen, cutin cu tawkah a riak lala. 8 Cun a ni ngatnak ah fehsuak dingin zing lam zingten a tho, asinan nunaunuih pa in, «Zangfahten na thinlung harhter aw,» tiah a ti. Cutin sîm lam tiang an um muangcâng ih, an pahnih in an ei. 9 Cule Levi mi cu amah le a nusûn le a siahhlawh thawn fehsuak dingin a din tikah, a pu, nunaunuih pa in a hnenah, «Zoh hnik, khua a tlai zo, zangfahten tuihzan cu cām hrih aw. Zoh hman, khua a thim zik thlang, na thinlung a năwm theinak dingah hinah riak aw. Inn thleng dingin thaizing ah na khualtlawnnak hrangah zingten tho aw,» tiah a ti.

10 Sikhalsehla cu pa cun cuih zan câm ding cu a duh lo; cutin a tho ih a fehsuak, cule Jerusalem ti mi Jebus raldenah a thleng. A hnenah dăm cia lāk pahnih an um; a nusûn khal a hnenah a um. 11 Annih cu Jebus kiangah an um ih, khua a tlai tuk zo, cule a siahhlawh in a pu hnenah, «Ra aw, zangfahten hi Jebus-mipawlih khawpi ah pial in cuih khua ah riak uhsi,» tiah a ti.

12 Asinan a pu in a hnenah, «Israel tefapawl si lo, ram dang mipawlih khua ah kan pial lo ding, Gibeah khua thleng kan feh vivo ding,» tiah a ti. 13 Cun a siahhlawh hnenah, «Ra aw, hi hmunpawl lakih pakhat kan naih pei ih, Gibeah khua ah asilole Ramah khua ah zan kan riak pei,» tiah a ti. 14 Cule an lan ih, an feh vivo, cule Benjamin ram Gibeah kiang an thlen ah ni a tla. 15 Gibeah khua ih riak dingah feh dingin cu tawkah an pial. Cule anih cu khaw sung a luh tikah khawlak mual ah a to, ziangahtile an inn ih zan cām dingih sawmtu zohman an um lo.

16 Cule ngai hnik, putar pakhat hi sîm lamah ló ih a hnaṭuannak ihsin a ra tlung, anih khal Efraim tlang ram ihsin a si ve, amah cu Benjamin-mipawlih umnak Gibeah khua ah a cêng. 17 Cule khua a tang ih, khawlak mual ih khualtlawngpa a hmu, cule putarpa in, «Khui ah nan feh ding ih, khuitawk ihsi ra nan si?» tiah a ti.

18 Cutikah anih in a hnenah, «Judah ram Bethlehem khua ihsin Efraim tlang ram dĕng lamih feh tum ka si, cutawk ih um ka si. Judah ram Bethlehem khua ah ka va feh ih, atu ah Jehovah inn ih feh ka tum. Asinan zohman an inn ih i hruaitu an um lo. 19 Kan lākpawl hrangah cangpâwl le ṭilva rawl le keimah, na siahhlawh nunau le na siahhlawhpawl hnenih a um mi tlangval hrangah sang le sabitzu khal a um, tlaksăm mi zianghman a um lo,» tiah a ti.

20 Cule putarpa in, «Na hnenah daihnak um seh! Sikhalsehla na ṭul mi hmuahhmuah hi ka mawhphurh si seh, mual ah cun zan riak hram hlah,» tiah a ti. 21 Cutin cu pa in amah cu a inn ah a hruai ih, lākpawl tla rawl a pe. Cule an ke an khawlh ih, an in ih an ei.

Gibeah-mipawlih Sualralnak

22 An năwmawk rero laiah, ngai hnik, khawmi mipa hrekkhat, mihlothlaupawl in inn an kulh ih, sângka an run cum. Inn neitupa cu an bia ih, «Na inn ih a thlengtupa kha kan sualpi dingah rak hruaisuak aw!» tiah an ti.

23 Asinan inn neitupa cu an hnenah a suak ih an hnenah, «Si lo e, ka unaupawl! Zangfah ka lo dil, sualrál tukin cāngvai hlah uh! Hi pa hi ka inn sungih a luh ruangah hivek thilsual tuah hlah uh. 24 Zoh hnik uh, hi tawkah ka fanu fala him le hi paih nusûn an um, atu ah anmah ka rak hruaisuak ding. Duhtawkin sualpi uhla, nan mithmuhih dik nan tidandanin an parah tuah uh, asinan hi pa hnenah cun cuvek thil bawrhhlawh tuah hlah uh!» tiah a ti. 25 Asinan cuih mipapawl in an ngaithla duh lo. Cutin cu pa cun a nusûn cu a kaihrem ih an hnenah a pe. Cule cu nu cu an sualpi ih zanvarin zing lam tiang amah an sawisa. Cule khua a van zawngah cu nu cu an fehter.

26 Cun zing lam a hung si tikah nunaunu cu a feh ih, cu paih inn sângka, a bawipaih umnak hmun ah khawvâng tiangin a tlu. 27 A bawipa cu zing ah a tho ih, inn sângkapawl a áwng, cule feh tumin a va suak, ngai hnik, a nusûn cu inn sângka ah a tlu ih, a kutpawl cu sângka kalkantlâng parah an um. 28 Cule anih in a nusûn hnenah, «Tho awla kan feh pei,» tiah a ti. Asinan sannak a um lo. Cule cu pa in cu nu cu lāk parah a cawiso, cule cu pa cu a tho ih, amai hmun ah a feh. 29 A inn a luh tikah nâmte a la, a nusûn cu a kai ih, ṭhen hleihnih ah a hlawm a hlawmin a ṭhen, cule Israel ramṭhen hmuahhmuah ah a kuat. 30 Cule hitin a si, cumi hmutu hmuahhmuah in, «Israel tefapawl Izip ram ihsin an fehsuak ihsin tuihni tiangah hivek thil hi tuah dah le hmuh dah a rak si lo. Cumi cu ruat uh, răwn aw uhla, ṭawngsuak uh!» tiah an ti.

20

Israel le Benjamin Doawknak

1 Cun Israel tefapawl hmuahhmuah cu Dân khua ihsin Beersheba khua tiang, Gilead rammipawl khal an păwksuak ih, Mizpah khua ah mipi-umkhawm cu Jehovah hmaiah mi pakhat vekin an fĭnkhawmaw. 2 Cule mipi hotu hmuahhmuah, Israel hnám hmuahhmuah, ralnâm keng ke ralkap ting li cu Pathian mipawlih punkhawmnak ah an va ding. 3 (Cule Benjamin tefapawl in Mizpah khua ah Israel tefapawl an so zo ti thawmvâng an thei.)

Cun Israel tefapawl in, «Ziangtin hi sualralnak hi a rak cang, rel uh?» tiah an ti.

4 Cule thah mi nunaunuih pasal Levi-mi in a sâng ih, «Kei le ka nusûn cu Benjamin ram Gibeah khua ah zan riak dingin kan feh. 5 Cule keimah dokalhin Gibeah mipapawl an tho ih, keimah ruangah zan ah inn an kulh ih, thah in tum, cule keimah aiah ka nusûn an sualpi sawn ih, cuticun anih cu a thi a si. 6 Cun ka nusûn cu ka kaihnget ih, a hlawm a hlawmin ka cán, cule Israel-ih roco ramṭhen hmuahhmuah ah amah cu ka kuat ṭheh a si, ziangruangahtile annih cun Israel ram ah fihnungza hursualtuahnak le mualphoza an tuah. 7 Zoh hnik uh! Israel tefapawl hmuahhmuah tla, hi tawkah atu ah nan ruahnak le nan thurawnpek pe hnik uh!» tiah a ti.

8 Cule mipi hmuahhmuah cu mi pakhat vekin an tho ih, «Zohman mai puanthlam ah kan feh lo ding, mai inn khalah kan kirsal lo ding, 9 cuhnakin Gibeah parih kan tuah ding mi cu hihi a si: camcawhfung zûkin cumi do dingin kan so ding. 10 Israel ram ih mualphoza an tuah mi hmuahhmuah ruangih dāntat an si theinak dingih, Gibeah hmun ih Benjamin-mipawl an hung do tikih mipi ei ding petu ding hrangah, Israel hnám hmuahhmuah lak ihsin mipa 100 ah pahra, 1000 lak ihsin 100, cule 10000 lak ihsin 1000 kan rethran ding,» tiah an ti. 11 Cutin Israel mipapawl hmuahhmuah cu mi pakhat vekih pumkhat in cuih khua do dingin an pungkhawm.

12 Cun Israel hnámpawl in Benjamin hnám hmuahhmuah hnenah mipapawl an thlah, «Nan lakih a rak cang mi sualralnak hi ziang a si? 13 Curuangah atu ah, anmah kan thah ih, Israel ihsin sualralnak cu kan thaihloh theinak dingah, Gibeah ih a um mi mihlothlau mipapawl kha in ap uh!» tiah an ti. Asinan Benjamin tefapawl cun an unau, Israel tefapawlih aw an ngai lo. 14 Cuhnakin, Benjamin tefapawl cu Israel tefapawl do dingin an khuapawl ihsin Gibeah khua ah an tawngkhawmaw. 15 Cule cu laiah an khuapawl ihsin Benjamin tefapawl cu, Gibeah ih um hril hleice mi mipa mipum 700 siartel loin, ralnâm keng mi 26000 an si. 16 Hi minungpawl hmuahhmuah lakah kehtlak mipa hril hleice mi, lunghlum herhli ih sai ah sám phang pakhat hman ṭhelh lo mi 700 an um. 17 Cun Benjamin tel loin, ralnâm kengtu Israel mipapawl cu thawng zali an si. Hipawl hmuahhmuah cu ral do thiam an si.

18 Cun Israel tefapawl cu an tho ih Pathian sut dingin Bethel ah an feh. Annih in, «Benjamin tefapawl do dingah kan lakah zo kan feh hmaisabik ding?» tiah an ti.

Jehovah in, «Judah feh hmaisabik seh!» tiah a ti. 19 Cuticun Israel tefapawl cu zing ah an tho ih, Gibeah do dingin ṭanhmun an khuar. 20 Cule Benjamin do dingin Israel mipapawl cu an fehsuak ih, Israel mipapawl cu Gibeah ah anmah va do dingin an tlaraw. 21 Cun Gibeah ihsin Benjamin tefapawl cu an ra suak ih, cuih ni ah Israel mipa 22000 lei ah an satthlu. 22 Cule mipi, Israel mipapawl cu anmah le anmah tha an peaw ih, ni hmaisabikih an rak tlarawknak hmun ah ral do dingin an tlarawsal. 23 Cun Israel tefapawl cu an so ih zan tiangin Jehovah hmaiah an ṭap, «Benjamin, ka unaupaih tefapawl do dingah ka naihsal pei maw?» tiin Jehovah-ih thurawnpek an dil.

Cule Jehovah in, «Amah do dingin feh aw,» tiah a ti.

24 Cule a ni hnihnak ah Israel tefapawl in Benjamin tefapawl cu an va naih. 25 Cule a ni hnihnak ah Benjamin tefapawl cu Gibeah ihsin anmah do dingin an fehsuak ih Israel tefa, ralnâm keng fingfing mipa 18000 cu lei ah an satthlu. 26 Cun Israel tefapawl hmuahhmuah, mipi hmuahhmuah cu an so, cule Pathian inn ah an feh ih, an ṭap. Jehovah hmaiah cu tawkah an to ih, cuih ni cu zan lam tiang rawl an ul. Cule Jehovah hmaiah Meiur Thilhlănpawl le Remnak Thilhlănpawl an hlan, 27 cuih cān laiah cun cu tawkah Pathian Thukham Kuang a um ih, 28 cumi hmaiah Aaron fa Eleazar fapa Finehas cu cuih cān laiah cun rawng a bawl, cun Israel tefapawl in Jehovah thu an rawn, «Benjamin, ka unaupaih tefapawl do dingin ka fehsuaksal hrih ding maw, ka cawl ding so?» tiah an ti.

Cule Jehovah in, «Feh aw, anmah cu thaizing ah na kut ah ka lo pe ding,» tiah a ti.

29 Cun Israel cun Gibeah kimvelah ral bawhtu mipapawl a ret. 30 Cule a ni thumnak ah Israel tefapawl cu Benjamin tefapawl do dingin an so ih cān dangpawl vekin Gibeah do dingin an tlaraw. 31 Cuticun Benjamin tefapawl cu mipi do dingin an fehsuak ih, khua ihsin bumsuah an si. Ni dang vek thothoin mi sahthluk an thăwk ih mi hrekkhat an that, Pathian inn lamih so lamzin pakhat le a dang pakhat Gibeah khaw lamih so zinpipawl ah le ramlak ah Israel mipa 30 hrawng an that. 32 Cule Benjamin tefapawl in, «A hmaisa vekin annih cu kan hmaiah neh an si,» tiah an ti.

Sikhalsehla Israel-mipawl in, «Tlân uhsi la, khua ihsin zinpipawl ah anmah bumsuak uhsi,» tiah an ti. 33 Cuticun Israel mipapawl hmuahhmuah cu an hmun ihsin an tho ih, Baal-Tamar hmun ah an tlaraw. Cun ralbawh ih um mi Israel mipapawl cu Maareh-Geba ah an bawhnak hmun ihsin an pawtsuak. 34 Cule Gibeah do dingin Israel hmuahhmuah lakih hril hleice mipa 10000 an ra ih, doawknak cu a nasazet. Asinan Benjamin-mipawl in an parah siatnak a thleng ding ti an thei lo. 35 Jehovah in Israel hmaiah Benjamin a neh. Cule Israel tefapawl in cuih ni ah Benjamin-mipawl, ralnâm keng hlir mipa 25100 an that.

36 Cule Benjamin tefapawl in neh an si ti an thei. Israel mipapawl in Benjamin-mipawl hnen ihsin dung an sîp, ziangruangahtile Gibeah do dingih an ret mi mipa ral bawhtupawl kha an rinsan. 37 Cule ral bawhtu mipapawl cu Gibeah panin zamrang zetin an tlân, ral bawhtu mipapawl an darhaw ih ralnâm hriam thawn khaw minung hmuahhmuah cu an that. 38 Israel mipapawl le ral bawhtu mipapawl karlakih hminsinnak tuah mi cu khaw sungih meikhu sahpi kaisohter ding hi a si. 39 Israel mipapawl cu raldonak ah dungah an sîp, cule Benjamin in do a rak thăwk ih, Israel mipa 30 hrawng an that. Ziangahtile annih in, «Thungaingaiin annih cu doawknak hmaisa vekin kan hmaiah neh an si,» tiah an ti. 40 Asinan khaw sung ihsin meikhu sahpi kaiso a thăwk tikah, Benjamin-mipawl cun an dung lam an hawi ih, zoh hnik, khaw pumpi cu van lamah meikhu in a kaiso rero. 41 Cule Israel mipapawl an herkirsal tikah, Benjamin mipapawl in an parah siatnak a thleng rero ti an hmuh ruangah an thla a phâng. 42 Curuangah Israel mipapawl dung an tŭn ih ramṭhing lamah an tlân, asinan doawknak in anmah a dawiman ih, zokhal khuapawl ihsi a ra suaktu cu an khaw sungah an rak that. 43 Benjamin-mipawl cu an kulh, an dawi ih nisuahnak lamih Gibeah ralden tiang ăwl zetin anmah cu an dawiman. 44 Cule Benjamin mipa 18000 an tlu. Hipawl hi paralṭha hlir an si. 45 Cun a dangpawl cu an kir ih ramṭhing lamih Rimmon lungpi lamah an tlân. Asinan zinpipawl tluanah mipa 5000 an satthat. Cun annih cu Gidom tiangin cawl loin an dawi ih, mi 2000 an that. 46 Cutin cuih ni ih a tlu mi Benjamin-mi hmuahhmuah cu ralnâm keng mipa 25000 an si. Hipawl hi paralṭha hlir an si.

47 Asinan mipa 600 cu an heraw ih, ramṭhing lamih Rimmon lungpi lamah an tlân, cule Rimmon lungpi ah thla li sung an um. 48 Cule Israel mipapawl cu Benjamin tefapawl do dingin an kirsal ih, annih cun khaw kip ihta, minung le rannung, hmuh mi hmuahhmuah cu ralnâm hriam in an satthlu. An thlennak khua hmuahhmuah khal meisa in an ur.

21

Benjamin-mipawl Nupi Peknak

1 Cun Israel mipapawl in Mizpah khua ah, «Kan lakih zohman in Benjamin hnenah a nupi ah a fanu a pe lo pei,» tiin sesămin thukamnak an tuah. 2 Cun mipi cu Bethel ah an ra ih, cu tawkah zan lam tiangin Pathian hmaiah an um. An aw an suah ih nasazetin an ṭap. 3 Cule, «Maw Israel Pathian Jehovah, ziangahso Israel ram ah hivek a thleng ih, tuihni ah Israel ah hnám pakhat kim loih a um ding?» tiah an ti.

4 Cule hitin a si, a thaizing ah mipi cu zingten an tho ih cu tawkah biakṭheng an dâwl, cule Meiur Thilhlănpawl le Remnak Thilhlănpawl an hlan. 5 Israel tefapawl in, «Israel hnám hmuahhmuah lakah Jehovah hnenih punkhawmnak ih rak tel ve lo tu zo a si?» tiah an ti. Ziangahtile Jehovah hnenih a ra suak lo tu mi kip thuhla ah Mizpah khua ah, «Amah cu thah tengteng a si pei,» tiin thukamnak khoh zet an rak tuah. 6 Cule Israel tefapawl cun an unaupa Benjamin hrangah an thin a na ih, «Tuihsun ah hnám pakhat cu Israel ihsin sahcat a si. 7 A tāng mipawlih nupi hrangah ziang kan tuah ding, kan fanupawl tla nupi dingah kan pe lo ding tiin Jehovah hmin sâlin sia kan săm zo fawn?» tiah an ti.

8 Cule, «Israel hnámpawl lak ihsin Mizpah khua ih Jehovah hnenih a ra suak lo tu cu zo a si?» tiah an ti. Cule ngai hnik, ṭanhmun khuarnak ah Jabesh Gilead ihsin mi pakhat hman an rak suak lo. 9 Ziangahtile mipi an siar tikah, ngai hnik, Jabesh Gilead ih cêngpawl mi pakhat hman an um lo. 10 Cule cu tawkah mipi-umkhawm cun an mipa ralṭha 12000 an thlahsuak ih anmah cu, «Feh uhla, ralnâm hriam thawn Jabesh Gilead ih cêng, nunaupawl le nauhakpawl telin, that uh. 11 Cule hihi nan tuah ding mi a si: mipa kip le mipa ihpi zotu nunau kip cu that thluh uh,» tiah thu an pe. 12 Cun Jabesh Gilead ih cêngpawl lak ihsin mipa a thei hrih lo tu fala him 400 an hmu, cule anmah cu Kanaan ram, Shiloh khua ih ṭanhmun khuarnak ah an hruai.

13 Cun Rimmon lungpi ih a um mi Benjamin tefapawl hnenah mipi-umkhawm hmuahhmuah cun thu an cah ih, an hnenah remdaihnak an phuang. 14 Cun Benjamin cu cuih cān ah a ra kirsal ih, Jabesh Gilead nunaupawl lakih nungih an zuah mi nunaupawl cu anmah an pe. Cuticingkhalin an hrangih daihtawk an hmu lo. 15 Cule Israel hnámpawl sungah Jehovah in himlonak a umter ruangah mipi cu Benjamin hrangah an thin a nâ.

16 Cule mipi-umkhawm upapawl in, «Benjamin nunaupawl cu thah an si zo fawn, a tāng lai mipawlih nupi hrangah ziang kan tuah ding?» tiah an ti. 17 Cule annih in, «Israel ihsin hnám khat cimihter a silonak dingah, Benjamin-mi a nungdam mipawl hrangah ro a um tengteng ding a si. 18 Sikhalsehla kan fanupawl an nupi ah kan pe thei lo, ziangahtile Israel tefapawl in, ‹Benjamin hnenih nupi a petu cu camsiat si seh,› tiin tiamkam in sia an săm zo,» tiah an ti. 19 Cun annih in, «Ngai hnik uh, Bethel sak lam, Bethel ihsin Shekem fehnak zinpi-ih nisuahnak lam, Lebonah khaw thlang lamih um Shiloh khua ah kum tin, Jehovah-ih puai a um,» tiah an ti.

20 Curuangah Benjamin tefapawl cu, «Feh uh, sabit hmuanpawl ah va bawh uh, 21 cule zoh hnik uh, Shiloh fanupawl tla an năwmawknak ah lām dingih an ra suah zawngah sabit hmuanpawl ihsin suak uhla, Shiloh fanupawl lak ihsin nanmai hrangah nupi ding kai cio uh, cun Benjamin ram ah feh uh. 22 Cun hitin a si ding, êl dingin an palepawl maw, an ṭapalepawl simaw kan hnen an rat tikah an hnenah, ‹Kanmai ruangah an parah ṭhatnak suah uh, ziangruangahtile doawk laiah anmai hrangah nupi kan rak pe thluh thei lo. Cule nannih khal in nan fanupawl an hnenah nan rak pe lo, pe uhla cu atu ah mawh nei nan si ding,› tiin kan rak ti ding,» tiah an sim.

23 Cule cuvekin Benjamin tefapawl in an tuah. A lāmtu, an kaih mi ihsin an mipum daihtawkin nupi an la. Cule an feh ih ro ih an co mi ram ah an kirsal. Cule khuatla an dĭn ih, cupawl ah cun an cêng. 24 Cutin Israel tefapawl cu cuih cān ah mi kip anmai hnám le suangkua hnenah cutawk ihsin an păwksuak, mi kip ro ih an co mi cio ah cutawk ihsin an fehsuak. 25 Cu laiah Israel ram ah siangpahrang a um lo, mi kip in anmai mit ih dik an ti mi an tuah cio.