About Bible Thianghlim | ©

BibleThianghlim – NEHEMIAH

Genesis Exodus Leviticus Numbers Deuteronomy Joshua Judges Ruth 1 Samuel 2 Samuel 1 Kings 2 Kings 1 Chronicles 2 Chronicles Ezra Nehemiah Esther Job Psalm Proverbs Ecclesiastes Song of Solomon Isaiah Jeremiah Lamentations Ezekiel Daniel Hosea Joel Amos Obadiah Jonah Micah Nahum Habakkuk Zephaniah Haggai Zechariah Malachi

Matthew Mark Luke John Acts Romans 1 Corinthians 2 Corinthians Galatians Ephesians Philippians Colossians 1 Thessalonians 2 Thessalonians 1 Timothy 2 Timothy Titus Philemon Hebrews James 1 Peter 2 Peter 1 John 2 John 3 John Jude Revelation

NEHEMIAH

  • A ngantu: Ezra
  • A siartu: Sál suah hnuih Israel-mipawl
  • A huap sung cān: B.C. 445-430
  • Ngan kum: B.C. 430 hrawng

Nehemiah ih ngankhum mi ṭansanin Hebru Bible ah Ezra cabu le Nehemiah cabu hi bu khat vekin a lang ih, Ezra ih ngan mi siih zum a si. B.C. 445 kum ah Persia siangpahrang Artazerzes I in Nehemiah cu Judah ram uktu ah a ruat ih, Jerusalem khawpi, a kulh le a kăwtkapawl saksal dingin thuneihnak thawn Nehemiah cu a thlah (Dan 9:25). Nehemiah cu puithiam a si lo ih, profet khal a si lo, Pathian kilvennak hnuaiih a hmun le a cān zulhih milai remruat mi a si sawn.

Ezra cabu ih rak thăwk mi tundinsalnak le saksalnak thuanthu cu Nehemiah cabu in a sunzawm. Pathian temple saksalnak (Ezr 1-6) le Pathian minungpawl tundinsalnak (Ezr 7-10) thu cu Ezra in cipciar zetin a rel. Pathian khawpi rĕmsalnak (Neh 1-7) le Pathian minungpawl nunrĕmsalnak (Neh 8:13) thu cu Nehemiah in cipciar zetin a rel. Nehemiah bung 3 in khawvel hna hman a thianghlim ih Pathian in a hminsin ti a langter. Pathian-ih minungpawl ih an tawn mi dokalhnak cu Nehemiah in a hminsin. An ralpawl in an zăwkzet (2:19), an hmuhsuam (4:1-3), an phiarthup (4:7-23; 6:1-4), an hro (6:5-9), thlingthlatupawl an thlah (6:10-14), asinan cupawl hmuahhmuah cu zianghmanlo an si (6:15-16). Ralpawl in Pathian minungpawl an tibuai thotho (Neh 6:17-19). Pathian minungpawl in Pathian ralpawl an va hawipinak cun thil ṭihnungza a thlĕn, cumi cu Nehemiah in a net tiangin a do (Neh 13).

Nehemiah-ih thubuaipawl le Malaki ih buaipi mi hi an bangaw zet. Anmah hi san khat mi an si. Malaki cu Thukham Hlun simsungnak netnak a si ih, Nehemiah cu Thukham Hlun thuanthu netnak a si.

Hi cabu pahnih hi beidawnumza ih khar veve an si. Thukham Hlun Pathian-ih minungpawlih thuanthu cu a thăwknak vek cekci in a net: runsuah le duhsak mi milaipawl in a thăwk ah dān thukham thlun dingin thu an tiam ih, nasazetih an tluk leuhleuh bangin Thukham Hlun cemnak khalah nasazetin an tlu leuhleuh. Dān cu ziang tlukin ṭha in mawi khal sehla, dān thlunih nun tum cu beidăwnnak le vansanglamnak a si. Misualpawl in dān ṭhabikpawl thlun an tumnak cu an hlawhtling dah lo, ziangahtile dān cu ṭha khal sehla, a thluntupawl cu misual an si. Dān cu thil ṭha tuah dingin sung lamah thiltitheinak mi pe riai si loin, leng lam ihsi thil ṭha tuah dingih mi phûttu a si. Milaipawlih an ṭul mi cu Jeremiah 31:31-34 ih a sim mi thukham thar hi a si. Ziangahtile hlawhsăm tinteih thiamlo mi cohtu dān thlunnak ih Pathian lunghmuiter tumnak cu thuthangṭha a si lo.

Thuhlawm Ṭhen

  • I. Jerusalem kulh rĕmsal dingin Nehemiah in Jew-pawl a hruai hai (bung 1-7)
  • II. Ezra le Nehemiah in thlarau nun lam remṭhasal dingin Jew-pawl an khihhmuh (bung 8-13)

1

A Mipawl hrangah Nehemiah Thla a Cam

1 Hakaliah fapa Nehemiah-ih ṭawngkampawl cu.

Hitin a si, kum 20-nak, Kislev thla ah, Shushan ih kulhhnget sungih ka um laiah, 2 ka unaupawl lakih pakhat Hanani le mi hrekkhat Judah ram ihsin an ra, cule anmah cu ralkaihnak ihsin luat ih nungdam mi Jew-pawl thuhla le Jerusalem thuhla ka rak sut hai. 3 Cule annih in ka hnenah, «Ramṭhen sungih ralkaihnak ihsi nungdamih a tangsŭnpawl cu cu tawkah nasazetih vansang le nautat tuarin an um. Jerusalem kulh khal a cim ih, a kăwtkapawl khal meisa in a kāng,» tiah an ti.

4 Cule hitin a si, cuih ṭawngkampawl ka theih tikah, ka to ih ka ṭap, cule ni tampi ninghangin ka um, van Pathian hmaiah rawlulin thla ka cam.

5 Cule kei in, «Maw Jehovah van Pathian, Pathian ropi le maksak, nangmah a lo duhdawtu le na thupekpawl a thluntu parih thukham le rinumnak kaihngettu, 6 atu ih na hmaiih ka thlacam mi na siahhlawhih thlacamnak thei dingin na hna tŭn awla na mit meng aw. Na siahhlawh Israel tefapawl thuhla ah a sun a zanin thla ka cam ih, na parih Israel tefapawlih an tuah mi sualpawl hrangah sualphuannak ka nei. Kei le ka paih sungza khal in thilsual kan tuah zo. 7 Na parah bawrhhlawh zetin thil kan rak tuah ih, na siahhlawh Mosi hnenih thu na pek mi na thupekpawl siseh, na sakhaw dānpawl siseh, na cīn le dānpawl siseh kan rak thlun lo. 8 Na siahhlawh Mosi thu na pek mi na ṭawngkam, ‹Nan rinum lo asile, miphunpawl lakah ka lo ṭhekdarh ding, 9 asinan ka hnen nan ra kir ih, ka thupekpawl thlunin nan tuahsuak asile, mi hrekkhat cu van dĕng tiang rak dawisuah zo si hman uhla, cutawk ihsin ka lo khawm hai thotho ding ih, ka hmin cēnnak dingih ka hril mi hmun ah ka lo hruai thleng hai ding,› tiih na ti mi cîng hram aw. 10 Anmah cu na siahhlawhpawl, a nasa mi na huham le na kut cak ih na tlen mi an si. 11 Maw Bawipa, zangfahten na siahhlawh ih thlacam le na hmin ṭihzah nuam titu na siahhlawhpawlih thlacam cu na hna tŭn hram aw, cule tuihsun ah na siahlawh hi hmuingil sehla, zangfahten amah cu hi paih mithmuhah zahngainak pe hram aw,» tiah ka ti.

Ziangahtile keimah cu siangpahrang sabitzu suahtu ka si.

2

Nehemiah a Mithmai a Sia

1 Cule hitin a si, Siangpahrang Artazerzis a lal a kum 20-nak, Nisan thla ah, a hmaiih sabitzu hŭnsak a si tikah, cuih sabitzu cu ka lâk ih siangpahrang ka pe. Tuih hlanah a hmaiah ka riah a se dah lo. 2 Curuangah siangpahrang in ka hnenah, «Ziangruangah na mithmai a sia? Na dam lo le a si fawn lo. Himi cu ziang dang si loin na thin a har ruangah a si ko,» tiah i ti.

Cule ka ṭih tuk lawmmam ih, 3 siangpahrang hnenah, «Siangpahrang cu kumkhua nung hram seh! Ziangtin ka pupápawlih thlānpawl umnak khawpi răm riapriin le a kăwtkapawl tla meisa in a kăng laiah, ka mithmai sia lo ih a um ding?» tiah ka ti.

4 Cun siangpahrang in ka hnenah, «Ziang simaw i dil duh?» tiah i ti.

Cule van Pathian hnenah thla ka cam.

Nehemiah-ih Dilnak

5 Cule siangpahrang hnenah, «Siangpahrang lung tăwng ih na siahhlawh in na mithmuhih duhsaknak a co asile, Judah ram ah ka pupápawlih thlānpawl umnak khawpi ah i thlah awla, khawpi cu ka va dĭnsal ding,» tiah ka ti.

6 Cun a kiangah siangpahrang bawinu khal a to ih, siangpahrang cun ka hnenah, «Na khualtlawn ziangtluk a rei pei? Cule ziang tikah na ra kirsal ding?» tiah i ti. Cutin keimah thlah ding cu siangpahrang lunghmui zawng a si, cule kei in amah cu ka kir ding tikcucān ka sim.

7 Cuihtlunah siangpahrang hnenah, «Siangpahrang lunghmui zawng asile, Tiva ral ram ih uktupawl hmuh dingah, Judah ram tiangih ka fehtlăng vivo in sian theinak dingah ca i kĕn aw, 8 cule siangpahrang-ih tupi kiltu Asaf hmuh dingah, temple kiangih kulhhnget kăwtkapawl hrang, khawpikulh hrang le ka luah ding inn hrangih tlângpawl tuahnak dingah thing i pe dingin ca i ken aw,» tiah ka ti. Cule ka parih ka Pathian kut ṭha a um bangtukin siangpahrang cun cupawl cu i pe.

9 Siangpahrang in ralbawipawl le rángtothiampawl tla ka zawngah a kuat. Cun Tiva ralkhat ram uktupawl hnenah ka feh ih, siangpahrangih ca cu ka pe hai.

Nehemiah in Jerusalem Kulh a Thlingthla

10 Horon-mi Sanballat le Ammon-mi siahhlawh Tobiah in cuih thu an theih tikah, Israel tefapawlih hamṭhatnak ding hawlin mi pakhat a ra tiin an thin a heng zet.

11 Cule Jerusalem ka thleng ih cu tawkah ni thum ka um. 12 Cuihhnu ah keimah le ka hnenih um mipa málte thawn zan ah ka tho ih, Jerusalem hrangih ka ti ding ka Pathian in ka thinlung ih a ret mi cu zohman ka sim lo. Ka to mi siarlo ṭilva dang zianghman ka hnenah an um lo. 13 Cule zan ah Kuam Kăwtka zawhin Rulhreng Tihna le Ran Êk Kăwtka ah ka feh ih, a cim zo mi Jerusalem kulh le meisa kāng mi kăwtkapawl cu ka zoh vivo. 14 Cun Tihna Kăwtka le Siangpahrang Tili ah ka feh vivo, asinan ka to mi ṭilva fehnak ding hmun a um lo. 15 Cutin phaikuam hrawhin zan ah ka so vivo ih, kulh ka zoh thluh. Cun dung lamah ka kirsal ih, Kuam Kăwtka ihsin ka lut, cule ka tlungsal. 16 Cule bawipawl in khuiah ka feh ih, ziang ka tuah ti an thei lo. Jew-mipawl siseh, puithiampawl siseh, mizahumpawl siseh, bawipawl siseh, a dang hnaṭuantupawl khal siseh ka sim hrih lo.

17 Cun kei in an hnenah, «Kan van a san zia, Jerusalem a rămzia le a kăwtkapawl meisa ih a kăngzia tla nan hmu. Relsiat kan si nawn lonak dingah, ra uhla Jerusalem kulh hi dĭn uhsi,» tiah ka ti. 18 Cule ka parih ka Pathian kut a ṭhatzia le ka hnenih siangpahrang ih sim mi ṭawngkampawl khal anmah ka sim.

Cule annih in, «Tho uh sila, dĭn uhsi!» tiah an ti. Cun himi hnaṭuan ṭha ṭuan dingin an tiar.

19 Asinan Horon-mi Sanballat, Ammon-mi siahhlawh Tobiah le Arabia mi Geshem in cuih thu an theih tikah in hnihsan ih in hmuhsuam, cule, «Nan tuah mi thil hi ziang a si? Siangpahrang dokalhin nan hél ding maw?» tiah an ti.

20 Cun kei in anmah cu ka sâng hai ih, an hnenah, «Vancung Pathian in in hmuingilter ding, curuangah kannih a siahhlawhpawl hi kan tho ding ih kan dĭn ding, asinan Jerusalem ah nannih cun ro siseh, thuneihnak siseh, ahngilhlonak ding nan nei ve lo,» tiah ka ti.

2:20a hngilhlonak ding: Hi minungpawl in Judah biaknaksakhua ah covo an nei ve lo. Pathian in a cîng ringring hai lo. Suah 30:16 simfiangnak zoh aw.

3

Kulh Dĭnsalnak

1 Cun puithiam lubik Eliashib cu a unau puithiampawl thawn a tho ih Tuu Kăwtka an dâwl, cuih kăwtka cu an serhhran ih, a sângkapawl an bun. Zakhat Dawlsâng tiang an hei dâwl vivo ih, cucu an serhhran, cun Hananel Dawlsâng tiang an dâwl. 2 Eliaship sangtu ah Jeriko mipapawl in an dâwl. Cule cupawl sangtu ah Imri fapa Zakur in a dâwl.

3 Hassenaah fapapawl khal in Nga Kăwtka an dâwl, a tlângpawl an bun, cule a sângkapawl cu a hrennakpawl le a bānnakpawl ah an bun. 4 Cule anmah sangtu ah Hakkoz fapa, Urijah-ih fapa Meremoth in a rĕm. Anmah sangtu ah Meshezabel fapa, Berekiah fapa Meshullam in a rĕm. Anmah sangtu ah Baana fapa Zadok in a rĕm. 5 Anmah sangtu ah Tekoa-mipawl in an rĕm, asinan an mizahumpawl cu an aBawipaih hnaṭuan an bawm ve lo.

3:5a Bawipaih hnaṭuan an bawm ve lo: A ṭawng hrampi Hebru ah cun «Bawipaih hna ah an ring an hrawlh ve lo» ti a si.

6 Cule Paseah fapa Jehoiada le Besodeiah fapa Meshullam in Yeshana Kăwtka an rĕm, a sângkapawl cu a hrennakpawl le a bānnakpawl ah an bun. 7 Cule anmah sangtu ah Mizpah le Gibeon mipapawl Gibeon-mi Melatiah, Meronoth-mi Jadon in Tiva ralkhat rampawl uktu umnak kiang an rĕm. 8 Amah sangtu ah suierthiampawl lakih pakhat, Harhaiah fapa Uzziel in a rĕm. Cule amah sangtu ah zihmui tuahthiampawl lakih pakhat Hananiah in a rĕm, cule Jerusalem cu Kulh Kau tiangin an rĕm. 9 Cule anmah sangtu cu Jerusalem pengpi hrek uktu Refaiah, Hur fapa in a rĕm. 10 Anmah sangtu ah Harumaf fapa Jedaiah in a inn hmai zawn a rĕm. Amah sangtu ah Hashabniah fapa Hattush in a rĕm.

11 Harim fapa Malkijah le Pahath-Moab fapa Hashub in hmun dang le Thŭkpawl Dawlsâng an rĕm. 12 Anmah sangtu ah Jerusalem pengpi hrek uktu Shallum, Hallohesh fapa le a fanupawl in an rĕm.

13 Zanoah luahtupawl le Hanun in Kuam Kăwtka an rĕm. Kuam Kăwtka an tuah, a sângkapawl cu a hrennakpawl le a bānnakpawl thawn an bŭn ih, kulh dawng 1000 sau Êk Kăwtka lam tiang an rĕm.

14 Beth Hakkerem peng hruaitu Malkijah, Rekab fapa in Êk Kăwtka a rĕm. Anih in Êk Kăwtka a tuah ih, a sângkapawl cu a hrennakpawl le a bānnakpawl thawn a bun.

15 Mizpah peng hruaitu Shallun, Kol-Hozeh fapa in Tihna Kăwtka a rĕm. Anih in Tihna Kăwtka a tuah ih a khuh, a sângkapawl cu a hrennakpawl le a bānnakpawl thawn a bun, cule Siangpahrang Hmuan kiang Shelah Tili kulh cu David Khawpi ihsi kailawn suk tiangin a rĕm.

16 Amah sangtu ah Beth Zur peng hrek hruaitu Nehemiah, Azbuk fapa in David thlānmual hmai zawn le milai tuahcawp tili ihsin Micakpawl Inn tiang a rĕm.

17 Amah sangtu ah Bani fapa Rehum in Levi-mipawl thawn a rĕm. Amah sangtu ah Keilah peng hrek hruaitu Hashabiah in a peng aiawhin a rĕm. 18 Amah sangtu ah an unau, Keilah peng hrek hruaitu Bavai, Henadad fapa in a rĕm. 19 Cule amah sangtu ah Mizpah hruaitu Ezer, Jeshua fapa in hmun dang, kulh ṭhuampi ih ralthuam retnak lam sohnak hmai zawn a rĕm. 20 Amah sangtu ah Zabbai fapa Baruk in ṭhahnemngai zetin hmun dang, kulh ṭhuampi ihsin puithiam lubik Eliashib inn sângka tiang a rĕm. 21 Amah sangtu ah Hakkoz fapa, Urijah fapa Meremoth in hmun dang, Eliashib inn sângka ihsin Eliashib inn cem tiang a rĕm.

22 Cule amah sangtu ah cuih hmun kiangkapih minung, puithiampawl in an rĕm. 23 Anmah sangtu ah Benjamin le Hasshub in an inn hmai zawn an rĕm. Anmah sangtu ah Ananiah fapa Maaseiah fapa Azariah in a inn kiang a rĕm. 24 Amah sangtu ah Henadad fapa Binnui in hmun dang, Azariah inn ihsin kulh ṭhuampi tiang, a kil tiangin a rĕm. 25 Uzai fapa Palal in kulh ṭhuampi hmai zawn le ralvenbûk tualrawn kiang, siangpahrang inn tlunta ihsi lăwrsuak dawlsâng a rĕm. Amah sangtu ah Parosh fapa Pedaiah in a rĕm.

26 Cuihtlunah Ofel ih cêng Nethin-mipawl in Tidai Kăwtka hmai nisuahnak lam le a lăwrsuak mi dawlsâng tiang an rĕm. 27 Anmah sangtu ah Teko-mipawl in hmun dang, a lăwrsuak mi dawlsâng tumpi hmai zawn le Ofel kulh zawn tiang an rĕm.

28 Ráng Kăwtka tlun zawn ihsin puithiampawl in maih inn hmai ciar an rĕm. 29 Anmah sangtu ah Immer fapa Zadok in a inn hmai a rĕm. Amah sangtu ah Nisuahnak Kăwtkakiltu Shemaiah, Shekaniah fapa in a rĕm. 30 Amah sangtu ah Shelemiah fapa Hananiah le Zalaf-ih fapa paruknak Hanun in hmun dang an rĕm. Anmah sangtu ah Berekiah fapa Meshullam in a cēnnak hmai a rĕm. 31 Amah sangtu ah suierthiampawl lakih pakhat Malkijah in Zohhliahnak Kăwtka hmai Nethin-mipawlih inn le sumtuahpawlih inn tiang le a kilih inn tlunta pindan tiang a rĕm. 32 Cule a kilih inn tlunta pindan le Tuu Kăwtka karlak cu suierthiampawl le sumtuahpawl in an rĕm.

4

Kulh Thuhla ih Buainak

1 Asinan hitin a si, Sanballat in kulh kan dâwl rero ti a theih tikah, thinso le thinaithawkin a um ih, Jew-mipawl a zawmtai. 2 Cule anih in a unaupawl le Samaria ralkappawl hmaiah a sim ih, «Hi miṭawnṭai Jew-pawl teh ziangso an tuah rero? Anmah le anmah an kulhaw ding maw si? Raithawinakpawl teh an hlan pei maw? Ni khat ah an ṭheh pei maw? Hnawmpen sungih a kāng mi lungtopawl an tuahṭhasal pei maw?» tiah a ti.

3 Cu pa kiangah Ammon-mi Tobiah a um ih, anih in, «An sak mi parah sihál hman kaiso sehla, an lungto kulh cu a cimter ding,» tiah a ti.

4 Maw kan Pathian, in ngai aw, ziangahtile kannih hi hmuhsuam kan si! An mi hmuhsuamnak cu anmai lu tlunah kir sehla, sáltannak ram ah anmah cu rallâksum ah pe hai aw! 5 An mawhsualnak khuh hlah awla, na hmai ihsin an sual thaihloh si hlah seh, ziangahtile kulh dâwltupawl an hmuhsuam.

6 Cule kulh cu kan dâwl ih, a san lam a hrek tiang kulh hmuahhmuah cu an pehaw zo, ziangahtile mipi in hnaṭuan duhnak lungthin an nei.

7 Cule hitin a si, Sanballat, Tobiah, Arab-mipawl, Ammon-mipawl le Ashdod-mipawl in Jerusalem kulh rĕmṭhat rero a si ih, a siatnak hmunpawl rĕmṭhat kan thăwk ti an theih tikah, an thin a heng ngaingai. 8 Cule Jerusalem do ding le buainak tuah dingih ra thăwk dingin an zaten an rawnawkhawm. 9 Sikhalsehla kan Pathian hnenah thla kan cām ih, sun le zan anmah ralvengtu kan ret.

10 Cun Judah mipawl in, «Thilphurtupawlih tha a cem zik, cule hnawm le a tam si ih, kulh cu kan dâwl thei lo ding a si hi!» tiah a ti.

11 Cule kan doralpawl in, «An lakah kan feh ih, anmah kan thah hlanlo zianghman an thei lo ding ih, an hmu fawn lo ding, cun kulh dawl hna kan cawlter ding,» tiah an ti.

12 Cule hitin a si, kan ralpawl kiangkapih um Jew-pawl cu kil kip in an ra ih, «Kan hnenah ra kir uh,» tiah vei hra lai in ti.

13 Curuangah kulh dung lam a niamnak hmun, hmuh theinak ah mipapawl ka ret, cule mipi anmai hrin vek cio in, an ralnâmpawl, an feipipawl le an thálpawl thawn ka ret vivo hai. 14 Cule ka zoh, ka ding ih, mizahumpawl hnen, hruaitupawl hnen le mipi dangpawl hnenah, «Anmahpawl hi ṭih hlah uh, a ropi le maksak Bawipa hi cîng ringring uhla, nan unaupawl, nan fapapawl, nan fanupawl, nan nupipawl le nan innpawl hrangah do uh,» tiah ka ti.

15 Cule hitin a si, cumi cu theihter kan si ti le Pathian in an khawkhannak cu zianghmanlo ah a canter ti kan ralpawl in hna in an theih tikah, kan zaten kulh lamah maih hna cio ah kan kir. 16 Cun hitin a si, cuih ni ihsi thăwkin ka siahhlawhpawl lakih a hrek cun hna an ṭuan ih, a dang a hrek pawl cun fei, ralphaw, thál an keng ih ralthuam an hruk, cule hruaitupawl cu Judah sungza hmuahhmuah dungah an um. 17 Kulh dâwl rero tupawl le phur a phurtupawl cun phur phahin kut khat lamin kulh dawl hna an ṭuan ih, khat lam kut in hriamhrei an keng. 18 Kulh dâwltu kip in an ṭuan laiah an khêl ah an ralnâm an thlaih. Cule tuupa ki phawtu cu ka kiangah a um.

19 Cun mizahumpawl, uktupawl le mipi dangpawl hnenah, «Hna hi a ropi ih a kau tuk, cule kulh ah hin pakhat le pakhat kângaw zetzetin kan um. 20 Tuupa ki phawt awn nan theihnak pauhpauh ah, cu tawkah in ra pankhawm uh. Kan Pathian in in dosak ding,» tiah ka ti.

21 Cutin hna cu kan ṭuan ih, mipa a hrek in zing khawvâng ihsin zan lam arsi lăng tiang feipi an hûm ringring. 22 Cuih cān thotho ah kei khal in mipi hnenah, «Zan ah in kiltu siin, sun ah hnaṭuantu an si theinak dingah, mipa kip cu a siahhlawh thawn zan ah Jerusalem ah riak hai seh,» tiah ka ti. 23 Cutin kei siseh, ka unaupawl siseh, ka siahhlawhpawl siseh, i thluntu kiltu pacangpawl siseh, zohman hnipuan kan phawih lo, mi kip tidai umnak ah an hriamhrei an keng cio.

5

Nehemiah in Mifarahpawl a Bawm

1 Cule mipipawl le an nupipawl cu an unau Jew-mipawl dokalhin nasazetin an au. 2 Ziangahtile, «Kanmah, kan fapapawl le kan fanupawl cu kan tam zet, curuangah kan ei ih kan nun theinak dingah thlairawl la uhsi,» tiih titupawl an um.

3 Cun, «Mangṭam ruangih thlairawl kan leinak dingah kan lópawl le sabit hmuanpawl le innpawl kan rak thāp zo,» tiih titu a dang mi hrekkhat khal an um.

4 Cun, «Kan lópawl le sabit hmuanpawl parih siangpahrang siah hrangah paisa kan rak cawi zo. 5 Atu ah kan titsa cu kan unaupawl titsa vek thotho a si, kan fātepawl khal an fātepawl vek an si, asinan ngai hnik, kan fapapawl le kan fanupawl sál si dingah hranhramin kan fial ih kan fanu hrekkhat cu sál ih hruai an rak si zo. Mi dangpawl in kan lópawl le sabit hmuanpawl an neih ruangah cawlhter theinak cahnak kan nei lo,» tiih titu mi hrekkhat khal an um.

6 Cule an aunak le cuih ṭawngkampawl ka theih tikah ka thin a heng zet. 7 Nasa zetih ka ruah ciamciam hnuah, mizahumpawl le uktupawl cu ka kawk hai ih, an hnenah, «Mi kip in nan unau a ṭhangin sum nan cawih,» tiah ka ti hai. Cun anmah dokalhin tawnkhawmawknak pipa ka ko. 8 Cule an hnenah, «Miphunpawl hnenih zuar mi kan unau Jew-pawl cu kan ti theinak zulhin kan tlen hai zo. Atu ah nannih in nan unaupawl tiangin nan zuar ding maw? Cun annih cu kan hnenih zuarsal an si ding maw?» tiah ka ti. Cun annih cu ṭawng ding thei loin daiten an um.

9 Cule kei in, «Nan thil tuah mi hi a ṭha lo. Kan ral a si mi miphunpawl ih in relsiatnak ruangah kan Pathian ṭihzahin nan nung lo ding maw? 10 Keimah, ka unaupawl le ka siahhlawhpawl khal in paisa le thlairawl kan cawih. A ṭhang lâk cawl hram uhsi! 11 Tuihsun rori ah an lópawl, an sabit hmuanpawl, an olif hmuanpawl le an innpawl pekirsal uh. An sumpai le an thlairawl, sabitzu thar le hriak thar ṭhen za ih ṭhen khat a ṭhang nan lâk mipawl khal pekirsal uh,» tiah ka ti.

12 Cule annih in, «Kan pekirsal ding ih, an hnenah zianghman kan dil nawn lo ding, na sim vekin kan tuah ding,» tiah an ti.

Cun puithiampawl ka ko ih, himi thutiamkam bangtukih tuah dingin mizahumpawl le uktupawl cu thukamnak ka later hai. 13 Cun ka sinfen vĕl mi cu ka thing ih, «Himi thutiamkam tuahsuak lo tupa cu amai inn ihsin le a thil neih mipawl ihsin Pathian in thingsuak seh. Anih cu hitivekin thinthlak si sehla, kawlawngin um seh,» tiah ka ti.

Cule mipungkhawm hmuahhmuah in, «Amen!» an ti ih, Jehovah an thangṭhat. Cun mipi in himi thutiamkam vekin an tuah.

14 Cuihtlunah Judah ram ih an uktu dingih ruat ka si thăwk, Siangpahrang Artazerzis a lal a kum 20-nak ihsin kum 32 a kim tiang, kum hleihnih sung cu kei le ka unaupawl in ram uktu ih zem mi rawl kan ei lo. 15 Asinan ka hlanih uktu hmaisapawl in mipi parah phur an suang ih, an hnen ihsin ngun shekel 40 tlunah sang le sabitzu an la. An siahhlawhpawl hman in mipi an uk, asinan kei cu Pathian ka ṭih ruangah cuvekin ka tuah lo. 16 Cuihtlunah kei cu hi kulh dawl hnaṭuan ah pumhlum in ka peaw, ló khal kan lei lo. Ka siahhlawhpawl hmuahhmuah cu cu tawkah hnaṭuanin an umkhawm.

17 Cule kan kiangkapih miphunpawl hnen ihsi a ra mipawl hleiah, ka cabuai ah Jew-pawl le uktu mipa 150 rawl an ei. 18 Ni khat hrangih an timlam mi cu câwcang pakhat le a ṭhabik bik tuu paruk a si. Vâtepawl khal ka hrangah an timlam ih, ni hra dan ah sabitzu phunkim a tawri tawrin an timlam. Cutivekin timlam khal hai sehla, hi mipi parah an sáltannak a rit tuk ruangah, ram uktuih rawl cu ka ngen lo.

19 Maw ka Pathian, hi mipi hrangih ka rak tuah mi hmuahhmuah hi ka ṭhatnak dingah cîng ringring hram aw.

6

Dokalhnak a Tam Sinsin

1 Cun hitin a si, cuih cān ah kăwtkapawl ah sângkapawl ka bŭn hrih lo na cingin Sanballat, Tobiah, Arab-mi Geshem le kan ral dangpawl in khawkulh ka dâwl ṭheh zo ih, a siatnak hmun rĕmṭhat ding a um nawn lo ti an theih tikah, 2 Sanballat le Geshem in ka hnenah, «Ra aw, Ono phairawn ih khuapawl lakih pakhat ah kan táwngaw pei,» tiin mi an thlah. Asinan keimah in tuahmawh ding an rak ruat hi a si.

3 Cule kei in an hnenah, «Hna pawimawh ka ṭuan ih, ka ra suk thei lo ding. Ziangahso hna tansan ih nan hnen ka suk laiah hnaṭuan cu a cawlh ding?» tiin palaipawl ka thlah. 4 Cun hi thucah hi vei li in rak kuat ih, kei in anmah cu ka rak san kêl vekin ka sâng hai.

5 Cun Sanballat in tuihlan vek thothoin a vei nganak ah a siahhlawh kut in erhpit lo cakuat i rak kuat. 6 Cuih ca ah cun: «Nang le Jew-pawl cun hel nan tum, curuangah kulh cu na rĕmsal a si ti thu miphunpawl lakah a thang ih, Geshem khal in a rel. An reldān ah nang hi an siangpahrang na si ding. 7 Cule ‹Judah ram ah siangpahrang a um,› tiin na thuhla Jerusalem ih phuang dingin profetpawl khal na rak ruat. Hih thuhlapawl hi siangpahrang hnenah simthan a si leh ding. Curuangah ra awla, thu ruattlang uhsi,» tiih ngan a si.

8 Cun a hnenah, «Na sim mi vekin zianghman ti a um lo, na thinlung ih na phuahcawp mipawl an si sawn,» tiin mi ka cah.

9 Ziangahtile an zaten, «An kut cu cah loter a si ding ih, an hna cu ṭheh a si lo ding,» tiin in thlaphanter an tum.

Curuangah maw Pathian, atu ah ka kut ticak aw.

10 Cuihhnu ah kharkhum a si mi Shemaiah, Delaiah fapa, Mehetabel fapa inn ah ka feh, cule anih in, «Temple sung, Pathian inn ah kan táwngaw pei, cule temple sângkapawl kan khar thluh ding, ziangahtile nangmah lo that dingin an ra ding. A si, zan ah nangmah that dingin an ra ding a si,» tiah a ti.

11 Cule kei in, «Kei vek pacang hi ka tlân ding maw si? Kei vek mi hi a nunnak humhim dingin temple sungah a lut ding maw? Ka lut lo ding,» tiah ka ti. 12 Cun anih cu Pathian in a thlah lo lawlaw ti ka theithiam, anih cu Tobiah le Sanballat in an rak hlan ruangah keimah dokalhin himi simsungnak phuang men a rak si sawn. 13 Amah hlan a sinak săn cu ka ṭih ih khativekih tiin sual ka tuahnak dingah le thuthang ṭhalo an tuah ding ih, in relsiatnak dingah a si.

14 Maw ka Pathian, himi an thil ti mipawl zulhin Tobiah le Sanballat le ṭih dingih i tuahtu nunau profet Noadiah le profet dangpawl hi cîng ringring hai aw.

Kulh Ṭhehfel a Si

15 Cutin kulh cu ni 52-nak ah, Elul thla ni 25 ni ah ṭhehfel a si. 16 Cule hitin a si, kan ralpawl hmuahhmuah in cumi cu an hna in an thei ih, kan kiangkap miphunpawl hmuahhmuah in cumi an hmuh tikah tenau zetin an hmu-aw, ziangahtile hi hna hi kan Pathian ih ṭuansuak mi a si ti an theithiam.

17 Cuih cān lai thotho ah Judah mizahumpawl in Tobiah hnenah ca tampi an kuat ih, Tobiah-ih cakuatpawl khal an hnenah a thleng. 18 Anih cu Arah fapa Shekaniah-ih mâkpa a si ruangah le amai fapa Jehohanan in Berekiah-ih fapa Meshullam fanu cu nupi ih a ṭhit ruangah Judah ram ih mi tampi in a hnenah sia an săm. 19 Cuihtlunah ka hmaiah a thil tiṭhatpawl an sim ṭheu ih, ka ṭawngkampawl a hnenah an sim. Tobiah in ka thlaphâng dingin ca in kuat ṭheu.

7

1 Cun hitin a si, kulh dawl ṭheh a si ih, sângkapawl ka bŭn thluh tikah, kăwtkakiltupawl, hla saktupawl le Levi-mipawl ruatfel an si tikah, 2 ka unaupa Hanani le kulhhnget hotu Hananiah cu Jerusalem ṭuanvo ka pe hai, ziangahtile Hananiah cu mirinum a si ih, mi tam zet hnakin Pathian a ṭihzah sawn.

3 Cule kei in an hnenah, «Ni a satngah hlanlo Jerusalem kăwtkapawl ăwn si hlah seh. Kiltupawl an din laiah, an khar pei ih sângkapawl kalh si seh, cule Jerusalem luahtupawl lak ihsin kiltupawl nan ruat pei, mi hrek maih kilnak hmun le mi hrek maih inn hmai zawn cio ah kil hai seh,» tiah ka ti hai.

4 Khawpi cu a tûm ih a kau, asinan cutawk ih umtu mi an mál ih, innpawl tla rĕm an si lo.

Sáltang Kirsalpawl

5 Cun ka Pathian in mizahumpawl, uktupawl le mipi kokhawm thluh ih, an cithlahsâwng cio vekih hmin khum dingin thinlung i neihter. Cule a hmaisabik kirsaltupawlih cithlahsâwng hmin khumnak ka rak hmusuak ih, cu tawkah cun hitivekin ngan mi ka hmu:

6 Hipawl hi Babilon siangpahrang Nebukhadnezzar ih a rak hruaihloh mi, ralkaihnak ihsi tlungkirsal Judah ramṭhen minung an si. Annih cu Jerusalem le Judah ram ih anmaih khua ciar ah an tlungkirsal.

7 Jerubbabel thawi ra tlungtupawl cu Jeshua, Nehemiah, Azariah, Raamiah, Nahamani, Mordekai, Bilshan, Mispereth, Bigvai, Nehum le Baanah tla an si.

Israel mipa mipum zât cu:

8 Parosh tefa 2172,
9 Shefatiah tefa 372,
10 Arah tefa 652,
11 Pahath-Moab tefapawl lakih Jeshua le Joab tefa 2818,
12 Elam tefa 1254,
13 Zattu tefa 845,
14 Zakkai tefa 760,
15 Binnui tefa 648,
16 Bebai tefa 628,
17 Azgad tefa 2322,
18 Adonikam tefa 667,
19 Bigvai tefa 2067,
20 Adin tefa 655,
21 Ater tefapawl lakih Hezekiah tefa 98,
22 Hashum tefa 328,
23 Bezai tefa 324,
24 Harif tefa 112,
25 Gibeon tefa 95,
26 Bethlehem le Netofah khawmi 188,
27 Anathoth khawmi 128,
28 Beth Azmaveth khawmi 42,
29 Kirjath Jearim, Khefirah le Beeroth khawmi 743,
30 Ramah le Geba khawmi 621,
31 Mikmas khawmi 122,
32 Bethel le Ai khawmi 123,
33 A dang Nebo khawmi 52,
34 A dang Elam fapapawl 1254,
35 Harim fapapawl 320,
36 Jeriko fapapawl 345,
37 Lod, Hadid le Ono fapapawl 721,
38 Senaah fapapawl 3930.

39 Puithiampawl:

Jedaiah tesinfapawl lakih Jeshua sungza 973,
40 Immer tefa 1052,
41 Pashhur tefa 1247,
42 Harim tefa 1017.

43 Levi-mipawl:

Jeshua tefapawl lakih Hodevah tefa Kadmiel-ih tefa 74,

44 Hlasaktupawl:

Asaf tefa 148,

45 Kăwtkakiltupawl:

Shallum tefapawl,
Ater tefapawl,
Talmon tefapawl,
Akkub tefapawl,
Hatita tefapawl,
Shobai tefa 138.

46 Nethin-mipawl:

Ziha tefapawl,
Hasufa tefapawl,
Tabbaoth tefapawl,
47 Keros tefapawl,
Sia tefapawl,
Padon tefapawl,
48 Lebana tefapawl,
Hagaba tefapawl,
Salmai tefapawl,
49 Hanan tefapawl,
Giddel tefapawl,
Gahar tefapawl,
50 Reaiah tefapawl,
Rezin tefapawl,
Nekoda tefapawl,
51 Gazzam tefapawl,
Uzza tefapawl,
Paseah tefapawl,
52 Besai tefapawl,
Meunim tefapawl,
Nefishesim tefapawl,
53 Bakbuk tefapawl,
Hakufa tefapawl,
Harhur tefapawl,
54 Bazlith tefapawl,
Mehida tefapawl,
Harsha tefapawl,
55 Barkos tefapawl,
Sisera tefapawl,
Tamah tefapawl,
56 Neziah tefapawl,
Hatifa tesinfa.

57 Solomon siahhlawhpawlih tefapawl:

Sotai tefapawl,
Sofereth tefapawl,
Perida tefapawl,
58 Jaala tefapawl,
Darkon tefapawl,
Giddel tefapawl,
59 Shefatiah tefapawl,
Hattil tefapawl,
Pokhereth-Hazzebaim tefapawl le
Amon tefapawl.

60 Nethin-mi hmuahhmuah le Solomon siahhlawhpawlih tesinfa 392.

61 Cule cupawl cu Tel Melah, Tel Harsha, Kherub, Addon le Immer ih ra an si. Asinan an pupápawlih sungkua siseh, an suahkehnak siseh, Israel-mi an sizia an nĕmhnget thei lo.

62 Delaiah tefapawl,
Tobiah tefapawl,
Nekoda tesinfa 642.

63 Cule puithiampawl lakih mi:

Habaiah tefapawl,
Hakkoz tefapawl,
Barzillai tefapawl, anih cun Gilead-mi Barzillai-ih fanupawl lakih pakhat nupi ah a ṭhi ih, an hmin a pu cih.

64 Cupawl cun an cithlahsâwng vekih hminkhumnak ah an hmin an hawl nan an hmu lo. Curuangah annih cu mibawrhbang vekih siar an si ih, puithiam sinak ah an telh lo. 65 Cule ram uktu in an hnenah Urim le Thummim thurawn theitu puithiam a ra suah hlanlo thil thianghlimbikpawl ei lo dingin a sim hai.

66 Pungkhawm mi mipum zaten 42360 an si. 67 Cuihtlunah an siahhlawh mipapawl le an siahhlawh nunaupawl cu 7337 an si ih, hla saktu mipa le nunau 245 an nei. 68 aAn rángpawl cu 736, an lākrang 245, 69 an kalauk 435 le lāk 6720 an si.

7:68a An rángpawl cu 736, an lākrang 245: Hi Bible câng hi Hebru Bible ah a um lo, asinan Hebru Bible hrekkhat sirte ah le Grik Thukham Hlun (Septuagint) ah a um.

70 Sungza lubân hrekkhat pawl in cuih hna hrangah an pe ve. Tirshatha in thawhhlawm retnak ah sui darakma 1000, cawhtawlh 50 le puithiam sinfen 530 a pe. 71 Sungkaw lubân hrekkhat in hnaṭuannak hrang thawhhlawm retnak ah sui darakma 2000 le ngun amina 2200 an pe. 72 Cule a dang mipi ih an pek mi cu sui darakma 20000, ngun mina 2000 le puithiam sinfen 67 an si.

7:71a mina: Bile ih tahnak phunphun simfiangnak zoh aw.

73 Cule puithiampawl, Levi-mipawl, kăwtkakiltupawl, hla saktupawl, mipi hrekkhat, Nethin-mipawl le Israel-mi zaten anmai khua cio ah an cêng. A thla sarihnak a thlen tikah, Israel tefapawl cu anmai khuapawl ah an um.

8

Dān Bu Siar a Si

1 Cun mi hmuahhmuah cu minung pakhat vekin Tidai Kăwtka hmaiih mual ah an fĭnkhawmaw, cule Dān zirhtu Ezra cu Jehovah in Israel thu a pek mi Mosi Dān Cazual rak keng dingin an sim. 2 Cule thla sarihnak a ni khatnak ah puithiam Ezra in mipungkhawm mipapawl, nunaupawl le ngaithla ih theithiam theitupawl hmuahhmuah hmaiah Dān Cazual cu a rak keng. 3 Cun khawvan ihsin sundir tiang, mipapawl, nunaupawl le a theithiam theitupawl hmai, Tidai Kăwtka hmaiih mual ah Ezra in cuih Dān Cazual cu a siar, cule mi hmuahhmuah in Dān Cazual thu lamah cun an hna an tháwng.

4 Cumi hrangih tuah mi thing dawnsâng parah Dān zirhtu Ezra cu a ding, cule a kiang, a vawrh lamah Mattithiah, Shema, Anaiah, Urijah, Hilkiah le Maaseiah, cule a keh lamah Pedaiah, Mishael, Malkijah, Hashum, Hashbadana, Zekariah le Meshullam pawl tla an ding. 5 Cule Ezra in mi hmuahhmuah hmuh ah cazual a kau, ziangahtile amah cu mi hmuahhmuah tlunah a ding, cule cazual a kau tikah, mi zaten an ding. 6 Cule Ezra in Pathian ropi, Jehovah cu a thangṭhat.

Cule mipi zaten, «Amen, Amen!» tiin an kut thlirin an sâng. Cule an hmai leilung hawiin an kûn ih Jehovah an bia.

7 Cun Jeshua, Bani, Sherebiah, Jamin, Akkub, Shabbethai, Hodijah, Maaseiah, Kelita, Azariah, Jozabad, Hanan, Pelaiah le Levi-mipawl in Dān theithiam dingin mipi an bawm, cule mipi cu an umnak hmun ah an ding. 8 Annih in cazual ihta Pathian Dān cu an siar ih an simfiang, cule a sullam an sim, an siar mi theithiam dingin an bawm.

9 Cule ram uktu Nehemiah, puithiam le Dān zirhtu Ezra le mipi simfiangtu Levi-mipawl in mipi zate hnenah, «Tuihni hi Jehovah, nan Pathian hrangih ni thianghlim a si, ninghang hlah uhla, ṭap fawn hlah uh,» tiah an ti. Ziangahtile Dān ṭawngkampawl an theih tikah, mipi zaten an ṭap.

10 Cun Ezra in an hnenah, «Va feh uhla, a thauthau ei uh, a thlumthlum in uh, cule zianghman timlam lo pawl hnenah vo kuat uh, ziangahtile tuihni hi kan Bawipa hrangih ni thianghlim a si. Thinnain um hlah uh, ziangahtile Jehovah parih lungawinak cu nan cahnak a si,» tiah a ti.

11 Cun Levi-mipawl in mipi zaten an daiter thluh ih, «Daiten um uh, ziangahtile tuihni cu ni thianghlim a si, thinnain um hlah uh,» tiah an ti. 12 Cule mipi zaten ei ding, in ding le vo kuat ding le nasazetih lungawiaipuangih um dingin an feh, ziangruangahtile annih in an hnenih phuan mi ṭawngkampawl cu an theithiam.

Bûktepawl Puai

13 Cule a ni hnihnak ah mipi hmuahhmuah lakih sungza lubânpawl cu puithiampawl le Levi-mipawl thawn Dān zirhtu Ezra hnenah Dān ṭawngkampawl theithiam sin dingin an fehkhawm. 14 Cule Jehovah in Mosi hmangih thu a pek mi Dān sungah, thla sarihnak puai cān ah Israel tefapawl bûktepawl ih cêng ding an si thu le, 15 «Tlang ah feh uhla, olif hngepawl, hriak thingkung hngepawl, hadas hngepawl, ṭhulhfau hnahpawl le thingbŭk hngepawl cu bûktepawl saknak dingah rak keng uh, tiih ngan a si,» tiin an khuapawl hmuahhmuah ah le Jerusalem ah thăn le phuang ding an si thupawl tla nganawin an hmu.

16 Cun mipi cu an fehsuak ih, cupawl cu an rak keng cio, cule mi kip in anmai inn tlun parah siseh, an tual le Pathian inn tual ah siseh, Tidai Kăwt ih mual ah le Efraim Kăwt ih mual ah siseh, bûktepawl tla an sak. 17 Ralkaihnak ihsi ra kir mi mipungkhawm pumpuluk in bûktepawl an sak ih, cuih bûktepawl hnuaiah cun an cêng. Thungaiten Nun fapa Joshua san ihsin cuih ni tiang Israel tefapawl cun cutivekin an rak ti dah lo. Cule lungawinak nasa ngaingai a um. 18 Cule ni tin a hmaisabik ni ihsin a ni netabik tiang, Pathian Dān Cazual ihsin a siar. Cule ni sarih sung puai an tuah ih, a ni riatnak cu sakhaw dān bangtukin tawnkhawmawknak hleice an nei.

9

Sualphuannak

1 Cule tuih thla ni 24-nak ah Israel tefapawl cu rawlul, buri-hnipuan sĭnin le an lupawl ah leivut phulhawin an pungkhawm. 2 Cun Israel cithlah cu ram dang mipawl hmuahhmuah lak ihsin an thiarfihlimaw, cule an ding ih an sualpawl le an pupápawlih mawhsualnakpawl an phuang. 3 Cule an umnak cio ah an ding ih, cuih ni ṭhen li ṭhen ih ṭhen khat sung cu Jehovah an Pathian Dān Cazual hrekkhat an siar, cule a dang ṭhen li ṭhen khat cu sual phuangin Jehovah an Pathian an bia.

4 Cun Jeshua, Bani, Kadmiel, Shebaniah, Bunni, Sherebiah, Bani le Khenani pawl cu Levi-mipawlih kailawn karbak parah an ding ih, aw ring zetin Jehovah an Pathian hnenah an au. 5 Cule Levi-mipawl, Jeshua, Kadmiel, Bani, Hashabniah, Sherebiah, Hodijah, Shebaniah le Pethahiah pawl in,

«Ding uhla, Jehovah nan Pathian cu
Kumkhuaih kumkhuain thangṭhat uh!
Thlawsuah le thangṭhatnak zate tlunih khaisan mi
Na hmin sunglawi cu thangṭhatin um seh!
6 Nangmah lawng hi Jehovah na si,
Nang in van na tuah,
Vanpawlih van le an ralkap rual hmuahhmuah thawn,
Leilung le a parih um tinkim,
Tifinriatpawl le a sung um zate thawn;
Cupawl cu nang in nunnak na pe thluh hai.
Van ralkap rual in an lo bia.
7 Nangmah cu Jehovah Pathian na si,
Abram hriltu le,
Kaldia-mipawlih Ur ihsin hruaisuaktu le,
A hmin Abraham tiih saktu na si.
8 Na hmaiih a thinlung rinumzia na hmu,
Cule amah thawn thukham na tuah
Kanaan-mipawl, Heth-mipawl,
Amor-mipawl, Periz-mipawl,
Jebus-mipawl le Girgash-mipawlih ram pe dingin,
Cuih ram cu a tesinfapawl pe dingin.
Na kamsuakthupawl na hlĕnsuak zo,
Ziangahtile nang cu midingfel na si.
9 Izip ih kan pupápawl zăwnzaihzia na hmu ih,
Tipi Sen kiangih an au khal na thei.
10 Faro dokalhin,
A siahhlawhpawl hmuahhmuah dokalhin le,
Amai rammipawl hmuahhmuah dokalhin
Nang in hminsinnakpawl le mangbangzapawl na hmuh hai.
Ziangahtile anmah dokalhin puarthau zetin thil an ti ti na thei.
Tuihsun bangin nangmah hrangah hmin na tuah.
11 Cule an hmaiah tipi na ṭhencat,
Cutin tipi laiih leicar ah an fehtlăng,
Cule anmah dûmtupawl cu tipi thûknak ah na hlăwn hai,
Tidai cak zetpawl sungih lungto hlăwn bangin na hlăwn hai.
12 Cuihtlunah sun ah khawdur ṭhuam in na hruai hai ih,
An lamzin tleu dingah
Zan ah meisa ṭhuam in na hruai hai.
13 Sinai Tlang ah na ṭum ih,
Van ihsin an hnenah thu na sim,
Cule anmah cu a dik mi thuṭhennakpawl le rintlak mi dānpawl,
A ṭha mi sakhaw dānpawl le thupekpawl na pe hai.
14 Na Sabbath thianghlim cu anmah na theihter ih,
Thupekpawl, sakhaw dānpawl le dānpawl cu
Na siahhlawh Mosi ih kut in thu na rak pe hai.
15 An rilrawn laiah van ihsin sang na pe hai ih,
An tihāl laiah lungpi sung ihsin tidai na pe hai,
Cule anmah pe dingih asia na săm mi ram cu
Feh ih la dingin na fial hai.
16 Asinan anmah, kan pupápawl cu puarthau zetin an cāngvai,
An ring an khăwngter ih,
Na thupekpawl an ngaithla lo.
17 Annih in thulun ding an êl ih,
An lakih na tuah mi mangbangzapawl an ruat lo.
Asinan an ring an khăwngter ih,
An helnak in an sáltannak ih hruaikirtu ding
Hruaitu an hril.
Asinan nang cu mi ngaithiamtu,
Zangfahnak ih khat le zahngainak ih khat,
Thinfûal, ngilneihnak ih luangliam
Pathian na si ih,
Anmah cu na thlauthla hai lo.
18 Anmah hrangah burcawp câwno lem an tuah ih,
‹Himi hi Izip ihsi a lo hruaisuaktu na Pathian a si,› an ti ih,
Na thinhengnak cawkthawhnak nasazet an tuah tik khalah,
19 Na zahngainak nasazet cun
Ramṭhing ah khan na thlauthla hai cuang lo.
Lamzin ih anmah hruaitu ding khawdur ṭhuam cun
Sun ah a fehsan hai lo ih,
An fehnak ding lamzin tlettu dingah
Zan ah meisa ṭhuam in a fehsan hai fawn lo.
20 Anmah zirh dingin na Thlarau ṭha na pe hai fawn ih,
An kâ ihsin na manna na lahlo lo,
Cule an tihāl laiah tidai na pe hai.
21 Kum 40 sung ramṭhing ah na kilkhawi hai,
Zianghman an tlasam lo,
An hnipuan a hnawh lo ih,
An ke a thling fawn lo.
22 Culawng si loin, lalrampawl le miphunpawl khal anmah na pe ih,
Cuih ram kĕl le kawm tiangin anmah na zem hai.
Sihon ram, Heshbon siangpahrang ram le
Bashan siangpahrang Og ram pawl tla an ta ah an la.
23 An falepawl khal van ih arsipawl vekin na karhter,
Cule va lut le va nei dingih an pupápawl na rak sim hai mi
Ram ah anmah cu na hruai hai.
24 Cutin mipi cu an lut ih
Ram cu an va nei,
Cuih ram luahtu Kanaan-mipawl cu an hmaiah na duaiter hai ih,
An duh duhih ti dingah an siangpahrangpawl le
Cuih rammipawl cu an kut ah na pe.
25 Cule annih in kulh nei khawpipawl le ram ṭha zetzet tla an la ih,
Thil ṭha phunkim ih khat innpawl,
Laih cia tikhurpawl, sabit hmuanpawl, olif hmuanpawl le
Rah nei thingpawl a tawri tawrin an va nei.
Cutin an ei ih an puar, cule an thau,
Na ṭhatnak maksak ah anmah le anmah an nuamaw.
26 Sikhalsehla annih cu thulunglo an si ih,
Na parah an hél,
Na dān cu an dungah an hlăwn ih,
Na hnen kir dingih
Anmah dokalhih theihtertu na profetpawl an that.
Na thinhengnak cawkthawhnak nasazet an tuah.
27 Curuangah anmah cu an ralpawl kut ah na pe hai,
An ralpawl in an palbĕt,
Cule an harsat cān ih an lo auh tikah,
Van ihsin na thei,
Cule na zahngainak a luanliam bangtukin
Anmah runsuaktupawl na pe hai ih
An ralpawl kut ihsin anmah na runsuak.
28 Asinan an ralmuan hnuah,
Na hmaiah thil ṭhalo an tuahsal.
Curuangah anmah cu an ralpawl kut ah na pe hai,
Cutin an ralpawl in an uk,
Cuticingin na hnen an kir ih an au tikah,
Van ihsin na thei,
Cule na zahngainak zulhin vei tampi na runsuak hai.
29 Na dān ih na hruaikirsal hai theinak dingah,
Anmah dokalhin na theihter.
Cucingin puarthau zetin an cāngvai,
Cule na thupekpawl an ngaithla lo,
Na cīn le dānpawl dokalhin thilsual an tuah,
Cumi cu mi in thlun sehla cu, cupawl hmangin a nung ding.
Cule an liang an khohter,
An ring an khăwngter ih,
An ngaithla duh lo.
30 Cuticingin kum tampi anmah na zāwi hai ih,
Na profetpawl hmangin na Thlarau in anmah dokalhin na theihter.
Asinan an ngaithla cuang lo,
Curuangah anmah cu cuih rampawlih miphunpawl kut ah na pe.
31 Sihmansehla na zahngainak maksak ruangah
Anmah cu na hlorálter thluh lo ih,
Na thlautla hai fawn lo,
Ziangahtile nang cu zangfahnak le zahngainak ih khat Pathian na si.
32 Curuangah kan Pathian,
Ropi, cak le maksak Pathian,
Thukham le rinumnak kaihngettu,
Kan par le kan siangpahrangpawl le kan uktupawl,
Kan puithiampawl le kan profetpawl,
Kan pupápawl le na mipipawl zate parah
Assiria siangpahrangpawl san ihsin tuihni tiang kan parih thleng mi
Harsatnak hmuahhmuah hi na hmaiah
Thil tenau menah in hmuhsak hlah.
33 A si, kan parih thil thleng mi hmuahhmuah ah,
Nang cu na dik a si,
Ziangahtile nang cun rinum zetin na tawlrel,
Asinan kannih cun sualrál zetin kan rak tuah.
34 Kan siangpahrangpawl in siseh,
Kan uktupawl in siseh,
Kan puithiampawl in siseh,
Kan pupápawl in siseh,
Na dān an rak thlun lo ih,
Na thupekpawl le na thutheihtermipawl,
Anmah dokalhih na theihternak cu an ngaithla lo.
35 Siangpahrang thawn miphun vekih an um laiah siseh,
Thil ṭha tampi na pek mi an neih laiah siseh,
An hmaiih ram kau le ṭha na pek mi ih an um laiah siseh,
Nangmah an lo rian cuang lo.
An thil ti sualrálpawl khal an bansan lo.
36 Zoh hnik, tuihni ah siahhlawh kan si!
A ram rah le a ram thil ṭha ei dingih,
Kan pupápawl hnenih na pek mi ram ah,
Zoh hnik, siahhlawh kan si!
37 Cule kan sualpawl ruangah
Kan tlunih siangpahrang si dingih na ret mipawl hnenah
Ram cun paṭhatnak tampi a pe,
Annih in an duh duhin
Kan taksa le kan rannung parah thu an nei ih,
Kannih cu nasazetih vansangin kan um.

9:15a sia na săm: A ṭawng hrampi ah cun, «Kut na khai» ti a si.

Thukham Tacik Khĕn a Si

38 «Cule hipawl hmuahhmuah ruangah,
Thukham hnget kan tuah ih, kan ngan,
Kan uktupawl, kan Levi-mipawl le kan puithiampawl in cumi cu tacik an khĕn.»

10

1 Cun ngan mi parih tacik khĕntupawl cu hipawl hi an si:

Hakaliah fapa ram uktu Nehemiah le Zedekiah, 2 Seraiah, Azariah, Jeremiah, 3 Pashhur, Amariah, Malkijah, 4 Hattush, Shebaniah, Malluch, 5 Harim, Meremoth, Obadiah, 6 Daniel, Ginnethon, Barukh, 7 Meshullam, Abijah, Mijamin, 8 Maaziah, Bilgai le Shemaiah. Hipawl hi puithiam an si.

9 Levi-mipawl: Azaniah fapa Jeshua, Henadad fapapawl lakih Binnui le Kadmiel.

10 An unaupawl: Shebaniah, Hodijah, Kelita, Pelaiah, Hanan, 11 Mika, Rehob, Hashabiah, 12 Zakkur, Sherebiah, Shebaniah, 13 Hodijah, Bani le Beninu.

14 Mipi hruaitupawl: Parosh, Pahath-Moab, Elam, Zattu, Bani, 15 Bunni, Azgad, Bebai, 16 Adonijah, Bigvai, Adin, 17 Ater, Hezekiah, Azzur, 18 Hodijah, Hashum, Bezai, 19 Harif, Anathoth, Nebai, 20 Magpiash, Meshullam, Hezir, 21 Meshezabel, Zadok, Jaddua, 22 Pelatiah, Hanan, Anaiah, 23 Hoshea, Hananiah, Hasshub, 24 Hallohesh, Pilha, Shobek, 25 Rehum, Hashabnah, Maaseiah, 26 Ahijah, Hanan, Anan, 27 Malluk, Harim le Baanah tla an si.

Thutiamkampawl

28 Cun Pathian Dān thlun tumih cuih rampawl lak ihsi thiarfihlimawtu hmuahhmuah a tāng lai mipi, puithiampawl, Levi-mipawl, kăwtkakiltupawl, hla saktupawl, Nethin-mipawl cu an nupipawl, an fapapawl, an fanupawl thawn theihnak le theihthiamnak neitu pauhpauh cun, 29 an unaupawl le an mizahumpawl an kăwp ih, Pathian siahhlawh Mosi hmangih Dān a pek mi Pathian Dān thlun dingin, Jehovah kan Bawipaih thupekpawl hmuahhmuah le a cīn le dānpawl le a sakhaw dānpawl kilhim le tuahsuak dingin siatcamnak le thukamnak an tuah. 30 Cuih ram miphunpawl hnenah kan fanupawl nupi dingah kan pe lo ding ih, kan fapapawl hrangah an fanupawl kan la fawn lo ding. 31 Cuih ram miphunpawl in Sabbath ni ah thilri le thlairawl rak kengin an zuar asile, cumi cu an hnen ihsin Sabbath ni le ni thianghlim ah kan lei lo ding, cule kum sarihnak ih kumvawi kan la lo ding ih, leiba zaten kuan kan awlh tâtâ ding.

32 Kan Pathian inn hnaṭuannak hrangah kum tin shekel ṭhen thum ṭhen khat pe dingin kanmah hrangah cīn le dān khal kan tuahaw: 33 Sangserh hrang, hlăn ringring ding mi Thlairawl Thilhlăn hrang, hlăn ringring ding mi Meiur Thilhlăn hrang, Sabbath-pawl hrang, Thla Tharpawl hrang le khiah mi puaipawl hrang, thil thianghlimpawl hrang, Israel hrang sualkhuhthawinak tuah dingih Sual Thilhlănpawl hrang le kan Pathian inn ih hna zate hrangah a si. 34 Kum tin khiah mi tikcucān ah maih pupápawlih sungza cio zulhin, Dān sungih ngan vekin, Jehovah kan Pathian biakṭheng parih ur ding zanthing thilhlăn hrangah kan Pathian inn ih keng dingin, puithiampawl, Levi-mipawl le mipipawl lakah camcawhfung kan zûk.

35 Cule kan leiram rah hmaisabikpawl le thingkung phun zakip rahpawl hmuahhmuah lakih rah hmaisabikpawl kum tin Jehovah inn ih keng dingin si seh; 36 Dān sungih ngan vekin kan fapapawl lak le kan ran rual lakih suak hmaisabik le kan ranpi rual le kan rante rual lakih suak hmaisabik cu kan Pathian inn sungah, kan Pathian inn sungih rawngbawltu puithiampawl hnenih ken ding siseh; 37 kan Pathian inn pindan sungih, puithiampawl hnenih, kan sangphŭt hmaisabikpawl, kan thawhhlawmpawl, thingkung phun zakip rah, sabitzu thar le hriak thar ken ding siseh; cun kan ló ih ṭhen hra ṭhen khat Levi-mipawl hnenih ken ding siseh cīn le dān kan tuahaw. Ziangahtile Levi-mipawl cu ló tuahnak khuapawl ihsi suak ṭhen hra ṭhen khat lakhawm ding an si. 38 Cule Levi-mipawl in ṭhen hra ṭhen khat an lakkhawm tikah, Aaron-ih tesinfa puithiam cu Levi-mipawl hnenah a um ding a si, cule Levi-mipawl in ṭhen hra ṭhen khat sung ihsin ṭhen hra ṭhen khat cu kan Pathian inn sung, thilri retnak inn pindanpawl ah a ret ding a si.

39 Ziangahtile Israel tefapawl le Levi tefapawl in thlairawl thawhhlawm, sabitzu thar thawhhlawm le hriak thar thawhhlawm pawl cu hmun thianghlim bungbel le rawngbawltu puithiampawl, kăwtkakiltupawl le hla saktupawl umnak pindan ah an kenglut ding a si. Cule kannih in kan Pathian inn cu kan thlahthlam lo ding.

11

Jerusalem ih Cêng Mipi

1 Cun mipi hotupawl cu Jerusalem ah an cêng, asinan a dang mipi cun mipum pahra sungah pakhat cu khaw thianghlim Jerusalem ih um dingin camcawhfung an zûk ih, ṭhen hra ṭhen kua cu khaw dangpawl ah an um. 2 Cule Jerusalem ih um dingih palungsuakih pumpeaw mipawl hmuahhmuah cu mipi in thlawsuah an pe.

3 Hipawl hi Jerusalem ih cêng ramṭhen lubânpawl an si (Asinan Judah khawpipawl ah Israel-mipawl, puithiampawl, Levi-mipawl, Nethin-mipawl le Solomon siahhlawhih tesinfapawl cu anmai khua cio ih an co mi ram ah an cêng. 4 Jerusalem ah Judah tefa hrekkhat le Benjamin tefa an cêng.) Judah tefapawl cu: Perez tefapawl lakih Mahalalel fapa Shefatiah, cumi fapa Amariah, cumi fapa Zekariah, cumi fapa Uzziah, cumi fapa Athaiah; 5 Shilo-mi fapa Zekariah, cumi fapa Joiarib, cumi fapa Adaiah, cumi fapa Hazaiah, cumi fapa Kol-Hozeh, cumi fapa Barukh, cumi fapa Maaseiah. 6 Jerusalem ih cêng Perez fapapawl hmuahhmuah cu miralṭha 468 an si.

7 Hipawl hi Benjamin fapapawl an si: Jeshaiah fapa Ithiel, cumi fapa Maaseiah, cumi fapa Kolaiah, cumi fapa Pedaiah, cumi fapa Joed, cumi fapa Meshullam, cumi fapa Sallu, 8 amah sangtu Gabbai le Sallai, 928 an si. 9 Zikhri fapa Joel cu an hotu a si ih, Hassenuah fapa Judah cu khawpi uktu a pahnihnak a si.

10 Puithiampawl ihsin: Joiarib fapa Jedaiah le Jakin; 11 Ahitub fapa Meraioth, cumi fapa Zadok, cumi fapa Meshullam, cumi fapa Hilkiah, cumi fapa Seraiah cu Pathian inn hotu a si. 12 Pathian inn ih hna a ṭuantu an unaupawl cu 822 an si. Cule Malkijah fapa Pashhur, cumi fapa Zekariah, cumi fapa Amzi, cumi fapa Pelaliah, cumi fapa Jeroham, cumi fapa Adaiah le, 13 a unaupawl, an sungza lubânpawl cu 242 an si; cule Immer fapa Meshillemoth, cumi fapa Azarel, cumi fapa Amashai le, 14 an unaupawl micak ralṭha 128 an si. An hotu cu Haggedolim fapa Zabdiel a si.

15 Levi-mipawl lak ihsin: Bunni fapa Hashabiah, cumi fapa Azrikam, cumi fapa Hasshub, cumi fapa Shemaiah; 16 Levi-mipawlih lubânpawl lakih Shabbethai le Jozabad cu Pathian inn leng lam hna hohatu an si; 17 Asaf fapa Zabdi, cumi fapa Mika, cumi fapa Mattaniah cu thlacamnak thawn lungawi thu sim thăwktu hotu a si; a unaupawl lakih a pahnihnak cu Bakbukiah le, Jeduthun fapa Galal, cumi fapa Shammua, cumi fapa Abda tla an si. 18 Khaw thianghlim ih Levi-mi zaten 284 an si.

19 Cuihtlunah kăwtkakiltu Akkub, Talmon le an unau kăwtkakiltupawl cu 172 an si.

20 Cule a dang Israel-mipawl, puithiampawl le Levi-mipawl cu Judah ram khua hmuahhmuah ah, mi kip maih ro ih co mi cio ah an um. 21 Asinan Nethin-mipawl cu Ofel mual ah an cêng. Cule Ziha le Gishpa cu Nethin-mipawl hohatu an si.

22 Jerusalem ih Levi-mipawl hotu cu Asaf fapapawl Pathian inn rawngbawl ṭuanvo nei hlasatupawl lakih pakhat Mika, cumi fapa Mattaniah, cumi fapa Hashabiah, cumi fapa Bani, cumi fapa Uzzi a si. 23 Ziangahtile hla saktupawl thuhla ah siangpahrang thupek le ni tin an tuah mi thuhla ah cīn le dān a um. 24 Judah fapa Zerah tefapawl lakih Meshezabel fapa Pethahiah cu mipi thuhla ah ziangkim ah siangpahrang aiawhtu a si.

Khaw dangih Cêng Mipi

25 Cule an khua le an lóram thuhla ah, Judah tefapawl lakih mi hrekkhat cu Kirjath Arba le a khawṭêkpawl ah, Dibon le a khawṭêkpawl ah, Jekabzeel le a khawṭêkpawl ah, 26 Jeshua ah, Moladah ah, Beth Pelet ah, 27 Hazar Shual ah, Beersheba le a khawṭêkpawl ah, 28 Ziklag ah, Mekonah le a khawṭêkpawl ah, 29 En Rimmon ah, Zorah ah, Jarmuth ah, 30 Zanoah ah, Adullam le an khawṭêkpawl ah, Lakish le a lórampawl ah, Azekah le a khawṭêkpawl ah riahhmun an khuar. Beersheba ihsin Hinnom Phaikuam tiang riahhmun an khuar.

31 Benjamin tefapawl cu Geba ihsin Mikmash, Aija, Bethel le a khawṭêkpawl ah, 32 Anathoth ah, Nob ah, Ananiah ah, 33 Hazor ah, Ramah ah, Gittaim ah, 34 Hadid ah, Zeboim ah, Neballat ah, 35 Lod ah, Ono ah le Zungthiampawlih Phaikuam ah an cêng. 36 Judah ram ih Levi-mi mi hrekkhat cu Benjamin ram ah an cêng.

12

Puithiampawl le Levi-mipawl ih Hminpawl

1 Hipawl hi Shealtiel fapa Zerubbabel le Jeshua thawi ra tlung puithiampawl le Levi-mipawl an si: Seraiah, Jeremiah, Ezra, 2 Amariah, Malluk, Hattush, 3 Shekaniah, Rehum, Meremoth, 4 Iddo, Ginnethoi, Abijah, 5 Mijamin, Maadiah, Bilgah, 6 Shemaiah, Joiarib, Jedaiah, 7 Sallu, Amok, Hilkiah le Jedaiah tla an si. Hipawl hi Jeshua san laiih puithiampawlih lubânpawl le an unaupawl an si.

8 Cuihtlunah Levi-mipawl cu: Jeshua, Binnui, Kadmiel, Sherebiah, Judah le lungawi thu simnak hla hruaitu Mattaniah le a unaupawl an si. 9 An unau Bakbukiah le Unni cu rawngbawlnak ah an hmai zawnih ding an si. 10 Jeshua in Joiakim a hring, Joiakim in Eliashib a hring, Eliashib in Joiada a hring, 11 Joiada in Jonathan a hring ih Jonathan in Jaddua a hring.

12 Cun hipawl hi Joiakim san laiih puithiampawl lakih an sungkaw lubânpawl an si: Seraiah hrin ah Meraiah, Jeremiah hrin ah Hananiah, 13 Ezra hrin ah Meshullam, Amariah hrin ah Jehohanan; 14 Melikhu hrin ah Jonathan, Shebaniah hrin ah Joseph; 15 Harim hrin ah Adna, Meraioth hrin ah Helkai; 16 Iddo hrin ah Zekariah, Ginnethon hrin ah Meshullam; 17 Abijah hrin ah Zikhri; Minjamin hrin ah, Moadiah hrin ah Piltai; 18 Bilgah hrin ah Shammua; Shemaiah hrin ah Jehonathan; 19 Joiarib hrin ah Mattenai, Jedaiah hrin ah Uzzi; 20 Sallai hrin ah Kallai, Amok hrin ah Eber; 21 Hilkiah hrin ah Hashabiah le Jedaiah hrin ah Nethanel tla an si.

22 Eliashib, Joiada, Johanan le Jaddua pawl san laiih Levi-mipawl le puithiampawlih sungkaw lubânpawl cu Persia-mi Darias ih uk laiah ngankhum an si. 23 Eliashib fapa Johanan san tiangah Levi fapapawl lakih an sungkaw lubânpawl cu thuanthu ngannak cazual sungih ngan a si.

24 Levi-mipawlih lubânpawl cu Hashabiah, Sherebiah le Kadmiel fapa Jeshua le an hmai zawnih an unaupawl an si ih, Pathian mi David ih thupek bangtukih a haha teih áwngawin thangṭhat le lungawi thu sim dingah khat lamah an ding. 25 Mattaniah, Bakbukiah, Obadiah, Talmon le Akkub cu kăwtkakiltu an si ih, kăwtka kiangih thilri retkhawmnak pindanpawl an kil. 26 Cupawl cu Jeshua fapa Jozadak, cumi fapa Joiakim san lai mi le ram uktu Nehemiah le dān zirhtu puithiam Ezra san mi an si.

Kulh Hlănnak

27 Jerusalem kulh apnak ah, darsumselpawl, hri nei tum mipawl le ṭingṭangpawl thawi hlasa le lungawi thu sim ih lungawinak thawn an hlannak ih tel dingin, Jerusalem ih run hruai dingin Levi-mipawl cu an hmunrampawl hmuahhmuah ah an hawl. 28 Cule hla saktupawlih tefapawl cu Jerusalem kiangkap ihsin le Netofat-mipawlih khawtepawl ihsin, 29 Beth-Gilgal, Geba lórampawl le Azmaveth lórampawl ihsin an rakhawm, ziangahtile hla saktupawl in Jerusalem kiangkapah khawṭêkpawl an rak dĭn. 30 Cun puithiampawl le Levi-mipawl cu anmah le anmah an thianfaiaw ih, mipi, kăwtkapawl le kulh an thianfai.

31 Cun Judah hruaitupawl cu kulh parah ka hruai hai ih, feh ṭhupṭho ih lungawi thu sim hlaremtu ding bur tûm zetzet bur hnih ka ruat. Bur khat cu Êk Kăwtka lamah, kulh par vawrh lamah an feh. 32 An dung ihsin Hoshaiah le Judah hruaitu a hrek le, 33 Azariah, Ezra, Meshullam, 34 Judah, Benjamin, Shemaiah, Jeremiah pawl an feh ih, 35 tawtawrawt keng puithiam fapa hrekkhat, Asaf fapa Zakkur, cumi fapa Mikaiah, cumi fapa Mattaniah, cumi fapa Shemaiah, cumi fapa Jonathan, cumi fapa Zekariah le, 36 a unaupawl, Shemaiah, Azarel, Milalai, Gilalai, Maai, Nethanel, Judah, Hanani pawl khal Pathian mi David-ih awnmawi hmanruapawl thawn an feh ve. Dān zirhtu Ezra cu an hmaiah a feh. 37 Tihna Kăwt ihsin David Khawpi kailawn karbak zawhin an kaiso ih, David inn hmuansak ihsin, nisuahnak lamih Tidai Kăwt tiang an feh.

38 Lungawi thu sim hlasatu bur dangpawl cu a linglet zawngin an feh, cule kei in an dung ihsin mipi hrek thawn Thŭkpawl Dawlsâng lanin, kulh parah Kulh Kau tiangin kan thlun, 39 cule Efraim Kăwtka tlun, Yeshana Kăwtka tlun, Nga Kăwtka tlun, Hananel Dawlsâng le Zakhat Dawlsâng lanin Tuu Kăwtka tiang, cule Ralvenbûk Kăwtka ah an cawl.

40 Cun lungawi thu sim hla saktu bur hnih cu Pathian inn ah an ding, cuvek thothoin keimah le ka zawngih um uktu a hrek khal; 41 cule puithiampawl: Eliakim, Maaseiah, Minjamin, Mikaiah, Elioenai, Zekariah le Hananiah pawl cu tawtawrawt thawn, 42 cuihhleiah Maaseiah, Shemaiah, Eleazar, Uzzi, Jehohanan, Malkijah, Elam le Ezer pawl khal an ding. Hlasaktupawl cun an hotu Jezrahiah thawn ring zetin an sak.

43 Cuih ni ah a nasazet mi raithawinakpawl an hlan ih, lungawiaipuang zetin an um, ziangahtile annih cu Pathian in aipuannak nasazet thawn lungawiaipuangih um dingin a tuah hai, nunaupawl le nauhakpawl khal lungawiaipuangin an um, cutin Jerusalem-ih aipuannak cu lam hlapi ihsin theih băn a si.

Levi-mipawl Zohkhennak

44 Judah cu rawngbawltu puithiampawl le Levi-mipawl tlunih lungawiaipuangih a um ruangah, cuih ni ah thawhhlawmpawl, thlaitharpawl, ṭhen hra ṭhen khat pawl retnak inn pindanpawl hotu dingah mi hrekhat an ruat. An mawhphurh cu khawpipawl kiangkapih lópawl ihsin Dān thupek bangtukin puithiampawl le Levi-mipawl covopawl cu retnak inn pindanpawl ih retkhawm ding a si.

45 David le a fapa Solomon-ih thupek bangtukin, hla saktupawl le kăwtkakiltupawl khal in an Pathian rawngbawlhna le thianfaiawk rawngbawlhna cu an tuah. 46 Ziangahtile hlan lai, David le Asaf san ah hla saktupawl hotupawl an um ih, Pathian hnenah thangṭhatnak hlapawl le lungawi thu simnak hlapawl an sak ṭheu. 47 Zerubbabel le Nehemiah san ah cun Israel-mi hmuahhmuah in hla saktupawl le kăwtkakiltupawl hrangah ni tin ih an co ding mi vo an pe ṭheu. Annih in Levi-mipawl hrang khalah thil thianghlimpawl an rethran ih, Levi-mipawl in Aaron tefapawl hrangah cupawl cu an rethran ve.

13

Thiarfihlimawk Ngĕn a Si

1 Cuih ni ah mipi hnatheihah Mosi Dān Cazual hrekkhat an siar ih, Ammon-mipawl le Moab rammipawl cu Pathian mipawl punkhawmnak ah ziang tik khalah tel lo ding an si ti thu ngan mi an hmu. 2 Ziangruangahtile annih in Israel tefapawl kha sang le tidai thawn rak hmuak loin, anmah dokalhin anmah camsiattu dingah Balaam an hlâng riangri. Sikhalsehla kan Pathian in camsiatnak cu thlawsuah ah a canter. 3 Cun hitin a si, annih in Dān thu an hna ih an theih tikah, Israel lak ihsin mipi căwkpawlh cu an thliarhrang.

Nehemiah ih Rĕmṭhatnak Netabik

4 Cun cuih hlanah, kan Pathian inn ih thilri retkhawmnak pindanpawl tlunih thuneitu puithiam Eliashib cu Tobiah thawn an pehtlaiaw. 5 Cule hi hlanih Levi-mipawl, hla saktupawl le kăwtkakiltupawl hnenih pe dingih thupek mi, thlairawl thawhhlawmpawl, frankinsense, bungbelpawl, thlairawl, sabitzu thar le hriak thar ṭhen hra ṭhen khat pawl, puithiampawl hrangih thawhhlawmpawl an ret ṭheu nak pindan kaupi cu Tobiah hrangah a rak timlam. 6 Asinan cuih sung hmuahhmuah cu Jerusalem ah ka um lo, ziangahtile Babilon Siangpahrang Artazerzis a lal a kum 32-nak ah siangpahrang hnenah ka kir. Cun ni tawkfang a rei hnuah siangpahrang hnen ihsin siannak ka ngah. 7 Cule Jerusalem ah ka feh ih, Pathian inn tualrawn kulh sungah Tobiah hrang pindan pakhat tawlrelsak in Eliashib ih Tobiah hrangih thil ṭhalo a tuah mi ka hmusuak. 8 Cule cumi cun nasazetin ka thin a hengter. Curuangah Tobiah-ih inn sung thilripawl hmuahhmuah cu pindan ihsin ka hlăwnsuak ṭheh. 9 Cun anmah cu thilri retnak pindanpawl thianfai dingin thu ka pe hai, cule Pathian inn ih bungruapawl cu thlairawl thilhlănpawl le frankinsense thawn pindanpawl sungah ka retsal.

10 Levi-mipawl hrangih an covopawl pek an si lo ruangah hnaṭuantu Levi-mipawl le hla saktupawl cu anmai ló cio ah an rak kir zo ti ka theisuak. 11 Cule uktupawl ka kawk hai ih, «Ziangruangah Pathian inn cu thlauthlak a si?» tiah ka ti. Cule ka kokhawm hai ih anmai hmun cio ah ka ret hai. 12 Cun Judah-mi hmuahhmuah in thlairawl, sabitzu thar le hriak thar ṭhen hra ṭhen khat pawl cu thilri retnak ah an run keng. 13 Cule thilri retnak inn hotu dingah puithiam Shelemiah, Dān zirhtu Zadok le Levi-mi ihsin Pedaiah ka ret, cule anmah sangtu ah Mattaniah fapa Zakkhur-ih fapa Hanan ka ret, ziangahtile anmah cu mirinum ih ruah mi an si ih, ṭuanvo cu an unaupawl thil zem ding a si. 14 Maw ka Pathian, himi thuhla ah i máng ringring awla, ka Pathian inn hrang le cumi rawngbawlhna hrang ka ṭuan zo mi ka thil ṭha tuah mipawl cu phiathlo hlah aw.

15 Cuih san laiah Judah ram ah mi hrekkhat in Sabbath ni ih sabit sawrnak khur ih palsawr le fângtel phurin le lākpawl parih fângtel, sabitzu, sabit rah, theipi rah le phurrit tinkim thawn Sabbath ni ah Jerusalem ih an run phurh ka hmu. Cule tirawl an zuar ni thuhla ah ralrinnak ka pe hai. 16 Cutawk ih cêng Ṭaiar-mipapawl khal in nga le thil phunphun an rak keng ih, Sabbath ni ah Judah tefapawl hnen le Jerusalem ah an rak zuar.

17 Cun Judah mizahumpawl cu ka kawk hai ih an hnenah, «Himi thil ṭhalo nan tuah hi ziang a si? Sabbath ni nan bawrhbangter a si! 18 Nan pupápawl khal khan hivek thotho hi an tuah a si lo maw, cule kan Pathian in hi vansiatnak hmuahhmuah hi kan parah le hi khua parah a run thlen tho a si lo maw? Sabbath ni bawrhbanternak in Israel parah thinhengnak nan bêt a si,» tiah ka ti.

19 Cun hitin a si, Jerusalem kăwtkapawl ni a hliap tikah, Sabbath ni a thlen hlanah kăwtkapawl khar dingin thu ka pe. Cule Sabbath ni a liam hlanlo kăwtkapawl áwng lo dingin thu ka pe. Cun phur zianghman Sabbath ni ih phurlut lo dingin, ka siahhlawh hrekkhat kăwtkapawl ka kilter. 20 Cule sumtuahpawl le thil phun zakip zuartupawl cu Jerusalem lengah vei hnih vei khat an riak.

21 Cun annih cu ralrinnak ka pe hai ih, an hnenah, «Ziangah so kulh kiangih nan riah? Hitivekin nan um leh asile, nan parah kut ka thlâk ding!» tiah ka ti. Cuih ni thăwk ihsin Sabbath ni ah an ra nawn lo. 22 Cule Sabbath ni thianghlimter dingah Levi-mipawl cu thianfaiaw ding le va feh ih kăwtkapawl kil dingin thu ka pe hai. Hih thuhla khalah Maw ka Pathian i máng ringring awla, na zahngainak nasatnak zulhin ka parah lainatnak nei aw!

23 Cuih san laiah Ashdod, Ammon le Moab nunaupawl ṭhitu Jew-pawl khal ka hmu. 24 Cule an fātepawl lakih a hrek cun Ashdod ṭawng an hmang ih, Judah ṭawng an thiam lo, miphun dang ṭawng an hmang.

25 Cun anmah cu ka kawk hai ih ka camsiat hai, mi hrekkhat cu ka vuak ih an sám in ka hnûk, cule Pathian hmin in sia ka sămter hai, «Nan fanupawl cu an fapapawl nupi dingah nan pe lo pei, cule an fanupawl cu nan fapapawl hrangah siseh, nanmah hrangah siseh nan la fawn lo pei. 26 Israel siangpahrang Solomon kha hi thilpawl hmangin sual a rak tuah a si lo maw? Cucingin miphun tampi lakah amah vek siangpahrang an um lo, amah cu a Pathian in a duhdawt ih, Israel-mi hmuahhmuah tlunah siangpahrang ah a tuah. Sikhalsehla miphun dang nunaupawl in amah hman cu sual an tuahter. 27 Miphun dang nunaupawl ṭhi in kan Pathian parih thil ṭhalo zet tiin le kan Pathian parih rinum lo cingin nan thuhla kan ngaithla ding maw?» tiah ka ti.

28 Cule puithiam lubik Eliashib fapa, Joiada fapa pakhat cu Horon-mi Sanballat-ih mâkpa a si, curuangah amah cu ka hnen ihsin ka dawisuak.

29 Maw ka Pathian, puithiam sinak le Levi-mipawl thukham le puithiam sinak thukham an bawrhbanter ruangah anmah cu máng ringring aw.

30 Cutivekin anmah cu miphun dangpawlih thil tinkim lakah ka tifai hai. Puithiampawl le Levi-mipawl cu anmai hnaṭuannak cio ah ṭuanvo ka thiah hai. 31 Cule khiah mi cān ih zanthing thilhlăn rak keng dingin siseh, rah hmaisabik keng ding khalin siseh ṭuanvo ka thiah hai.

Maw ka Pathian, ṭhatnak dingah i máng ringring aw!