About Bible Thianghlim | ©

BibleThianghlim – ṬAH HLA

Old Testament

Genesis Exodus Leviticus Numbers Deuteronomy Joshua Judges Ruth 1 Samuel 2 Samuel 1 Kings 2 Kings 1 Chronicles 2 Chronicles Ezra Nehemiah Esther Job Psalm Proverbs Ecclesiastes Song of Solomon Isaiah Jeremiah Lamentations Ezekiel Daniel Hosea Joel Amos Obadiah Jonah Micah Nahum Habakkuk Zephaniah Haggai Zechariah Malachi

New Testament

Matthew Mark Luke John Acts Romans 1 Corinthians 2 Corinthians Galatians Ephesians Philippians Colossians 1 Thessalonians 2 Thessalonians 1 Timothy 2 Timothy Titus Philemon Hebrews James 1 Peter 2 Peter 1 John 2 John 3 John Jude Revelation

ṬAH HLA

12345

• A ngantu: Jeremiah
• A huap sung cān: B.C. 586
• Ngan kum: B.C. 586 hrawng

Hi cabu sungah profet Jeremiah cu Jew-pawlih sualnak ruangih Pathian in Judah le a khawpi Jerusalem parih a burh ding mi nunsimnak nasazet ruangah a ṭap. Kanaan ah hruai dingin Izip ram ihsi a hruaisuah hai ihsi khan (Pui 26:27-29; Dnp 28:49-57), kum 800 sung ralring dingin cān a rak pe. Pathian in Judah ralrin peknak ah Jeremiah telin profet tampi a hmang (Jer 19:1-11). Ṭah Hla cabu ah cun Pathian in ralrinnak a rak pek vekin a thleng taktak thlang (Ṭah 2:20-21; 4:10-11). Babilon-mipawl in Judah-mipawl kha sál ah an hruai ih (B.C. 605 le 597), sál ih hruai a netabikah Jerusalem khawpi le a temple cu an ṭhiatbăl ṭheh (B.C. 586). Cuihhnu ah Ṭah Hla in a thu parih Pathian rinumzia a phuanglang. Hih cabu fate ah hin thinnatnak tam zet a um, asinan cuih thinnatnak ah ruahsannak khal a lang (3:22-38).

Ṭah Hla hi thinlung tuarnak nasazet tarlăngnak le thil cang mi fiang zetih ngannak cabu mawi zet a si. Bung 1-4 hi hla hleice pali an si. Bung khatnak ah, Jerusalem rămnak thuhla a rel (1:2, 9, 16, 17, 21). Bung hnihnak ah, Jeremiah in Pathian thinlingnak in Jerusalem răm ko a tuah thu a simfiang. Bung thumnak ah, Jerusalem siatnak lakah Pathian zahngainak hnget kan hmu. Bung litnak ah, a hmaisa Jerusalem ropi le atu ih dinhmun se zet a khaikhin. Bung ngatnak ah, Pathian hnenah Jerusalem runsuak dingin Jeremiah thla a cam.

Ṭah Hla cabu-ih thucah cu Pathian in a mipawl a diknak le a rinumnak in a thunun hai ti mi hi a si. Cutiih a tuahnak săn cu anmah rĕm dingah le tungdingsal dingah a si. Hi cabu sungah zir ding thil pathum kan hmu. A pakhatnak ah nunsimdān le cumiih rahsuah a simfiang. A pahnihnakah, Pathian nunsimnak thlentu sual phun dangdang a tarlang. A pathumnak le a pawimawhbik cu, Pathian in a mipawl nun a sim tikih an umdān ding simfiang hi a si. Riahsiatnak ni ah ruahsannak a um ti hi Jeremiah in mi zangfahthiam Pathian a ruah rero nak ihsin kan hmuh mi a si (3:21-38). Thuṭhimnakah, «Jehovah-ih zahngainak zarah kannih cu kan riaral lo, ziangruangahtile a lainatnak a tlawlh dah lo,» ti thu ropi tla kan hmu (3:22). Curuangah Pathian in a mipawl tungdingsal dingin Jeremiah in thla a cam.

1

Jerusalem Rămnak

1 Mipi rak khah dahnak khawpi,
Lileng phiarphiten a to!
Miphunpawl lakih rak ropi dah,
Nuhmei vekah a cang ta!
Ramṭhenpawl lakih lalnu cu sál ah a rak cang aw!
2 Zan ah lungkuai zetin a ṭap,
A mitthli a biang ah a luangthla;
Amah duhtupawl hmuahhmuah lakah,
Amah hnemtu zohman an um lo.
A ṭhianrualpawl hmuahhmuah cu a parah an rinum lo;
Anmah cu a ral ah an cang.
3 Judah cu ralkaih ah a feh,
Thinharnak le a har mi sál hnaṭuan ah;
Anih cu miphunpawl lakah a cêng,
Cawlhhahdamnak a hmu lo;
Amah tiduhdahtupawl hmuahhmuah in a vansan laifangah amah cu an man.
4 Khiah cia mi puaipawl ah zohman an rat lo ruangah,
Zion zinpawl an hrûm.
A kulh kăwtkapawl hmuahhmuah cu an ṭhing reprep;
A puithiampawl an ai ruangro,
A fala himpawl zăwnzaihter an si ih,
Anih cu thinnain a um.
5 A dotupawl bawi ah an cang,
A ralpawl an ṭhangso;
Ziangahtile a dānpahbălnakpawl ruangah amah cu Jehovah in a rak zawnzaiter.
A fātepawl cu ral hmaiah ralkaih ah an rak feh.
6 Cule a lianngannak hmuahhmuah cun Zion fanu a tlansan.
A uktupawl cu tlimno hmu lo zuknêng vekah an cang,
Anmah dawitu hmaiah tha nei loin an tlân.
7 A thinhar le a vahvaih nipawl ah,
Jerusalem cun hlanlai ih a rak neih dah mi a thil duhumpawl hmuahhmuah a máng.
A mipawl ral kut sungih an tlûk tikah,
Amah bawmtu zohman an um lo,
A dotupawl cun amah cu an hmu ih,
A siatnak ah an hnihsan.
8 Jerusalem cu nasatukin a rak sual,
Curuangah anih cu a rak bawrhbang tâtâ.
A taklawngnak an hmuh ruangah amah upattupawl hmuahhmuah in an nautat;
A si rori, anih cu a hrûm ih khat lam a hawisan.
9 A thianlonak cu a hni sunghruhpawl ah a um;
Anih cun a cān netnak ding a rak ruat lo;
Curuangah a tluk săwprăwpnak cu khawruahharza a si;
Hnemtu zohman a nei lo.
«Maw Jehovah, ngai hnik, ka thinharzia hi,
Ziangahtile doral cu a khaisângaw.»
10 A thil duhumpawl hmuahhmuah parah a ral cun a kut a rak pharh;
Ziangahtile na mipi pungkhawm lakah lut lo dingih thu na rak pek mi miphunpawl
A hmun thianghlim sungih an luh a rak hmu.
11 A mipi zaten aihramin,
Rawl an hawl,
Nun humhimnak dingah rawl aiah an thil mankhungpawl an rak pe.
«Zoh hnik, Maw Jehovah, ngai hman,
Ziangahtile kei cu hmuhsuam ka si,» a ti.
12 «Nannih lamzin ih fehpawl hmuahhmuah tla, cucu nan hrangah zianghmanlo men a si maw?
Ngai hnik uhla zoh hnik uh,
Jehovah in a thinheng natsat ni ih a thlenter mi,
Ka parih nasazetih a thlenter mi ka riahsiatnak vek riahsiatnak a um maw si?
13 «Tlun lam ihsin ka ruhpawl sungah meisa a thlak ih,
Cucun a neh thluh hai;
Anih cun ka ke hrangah sûr a zar ih,
Dung lamah i kirter;
Ṭhing ko i tuah ih,
Sunnihlawh in ka cau.
14 «Ka dānpahbălnak hngawngkol cu ka hngawng ah bât a si;
A kut in a phiarkhawm ih,
Ka hngawng ah a thlaih.
Anih cun ka thazang a duaiter;
Ka neh thei lo ding mipawlih kut ah Bawipa in i thlĕn.
15 «Kan lakih ka micak hmuahhmuah Bawipa in a ke hnuaiah a pal;
Ka tlangvalpawl duaiter dingah,
Keimah dokalhin mipi a kokhawm;
Judah fanu himte cu,
Sabit sawr mi bangin Bawipa in a pál.
16 «Hi thilpawl ruangah ka ṭap;
Ka mit, ka mit ihsin tidai a luang;
Ziangruangahtile hnemtu, ka nun harhthartertu ding cu
Ka hnen ihsin hlapi ah a um.
Ral in an neh ruangah ka falepawl cu an ṭhing reprep.»
17 Zion cun a kut a san,
Asinan amah cu zohman in an hnem lo;
Jakob thuhla ah a kiangkapih umpawl cu a doral cang dingah Jehovah in thu a rak pe;
An lakah Jerusalem cu thil bawrhbang ah a cang.
18 «Jehovah cu a dingfel a si,
Ziangahtile a thupek mi dokalhin ka rak hél.
Mi hmuahhmuah in atu ah thei hnik uhla, ka riahsiatnak hi ngai hnik uh;
Ka fala himpawl le ka tlangvalpawl cu ralkaih ah an rak feh.
19 «I duhtupawl ka ko,
Asinan annih cun in rak bum;
An nun humhimnak dingih rawl an hawl laiah,
Ka puithiampawl le ka upapawl cu khawpi sungah an hlorál.
20 «Maw Jehovah, ka thinharzia hi zoh hnik;
Ka nunnak a buai;
Ka sungah ka thinlung a linglet,
Ziangahtile mihél nasatak ka rak si.
Inn lengah ralnâm in a that,
Inn sungah thihnak vek a si.
21 «Annih in ka hrūm an thei,
Asinan zohman in in hnem lo.
Ka ralpawl hmuahhmuah in ka harsatnak an rak thei thluh;
Na tuah mi parah an lung a awi.
Keimah vek an can theinak dingah,
Na rak thăn cia mi ni run thlengter aw.
22 «An sualralnak hmuahhmuah na hmaiah thleng sehla,
Ka dānpahbălnak hmuahhmuah ruangah ka parih na tuah bangin,
An parah tuah ve aw;
Ziangahtile ka hrūmnak a tam ih, ka thinlung a cau,» a ti.

2

Pathian-ih Ralrin Peknak a Thleng

1 Bawipa in a thinhengnak khawdur in
Zion fanu a rak khuh hi!
Israel ropitnak cu van ihsin leilung ah a hlăwnthlak ih,
A thinheng ni ah a keretnak a cîng lo.
2 Bawipa in a dawlh thluh ih,
Jakob cēnnak hmunpawl a zangfah lo.
Judah fanuih ralhruangkulhpawl cu a thinling in a hlăwnthla;
Leilung thleng ko a dirthla hai;
Lalram le a uktupawl cu a rak bawrhbangter.
3 Anih in a thinling maksak in Israel ^aki kip in a sattan;
Doral hmai ihsin a vawrh lam kut a lakir.
Kil i kip kāngfaitu meisa hliau bangin,
Anih in Jakob cu a rak ur.
4 Doral bangih dingin a thál a rak nawp;
Doral bangin, a vawrh lam kut in,
A mit ih duh mi hmuahhmuah a that;
Zion fanu deute parah,
A thinso cu meisa bangin a thlebung.
5 Bawipa cu doral bangtukah a cang.
Anih in Israel a dawlh thluh,
A siangpahrang inn zaten a dawlh thluh;
A ralhruangkulhpawl a siatbăl ih,
Judah fanu lakah ninghangriahsia le lungzûrṭahnak a karhter.
6 Hmuan parih a tuah bangtukin,
A biakbûk parah râwng zetin kut a thlak;
A pumkhawmnak hmun a ṭhiatbăl;
Jehovah in Zion ah ni khiah cia mi puaipawl le Sabbath-pawl a hngilhter.
A ling i ling a aithawknak in siangpahrang le puithiam ziangah a siar lo.
7 Bawipa in amai biakṭheng ziangah a siar lo,
A hmun thianghlim a tân ta;
A siangpahrang inn phărpawl khal doral kut ah a pek thluh.
Khiah mi puai ni bangin Jehovah inn ah thawmvâng an rak tuah.
8 Jehovah in Zion fanuih hauhruang ṭhiatbăl a rak tum.
Anih in ri a rîn,
Ṭhiatbălnak ihsin a kut a sūp lo;
Curuangah phentu leipâwng le hauhruang cu ṭap ko a tuah hai;
An riaráltlang.
9 A kulh kăwtkapawl lei sungah an pil;
Anih in a tlângpawl a ṭhiatbăl ih, a khiak hai.
A siangpahrang le a uktupawl cu miphunpawl hnenah an feh;
Dān a um nawn lo ih,
A profetpawl in Jehovah hnen ihsin larnak an hmu lo.
10 Zion fanuih upapawl cu leilung ah an to ih, daiten an um;
An lu parah leivut an phulh ih,
Buri thawn an ngerhaw.
Jerusalem fala himpawl leilung ah an lu an kûn.
11 Mitthli in ka mit a siatter,
Ka thinlung a buai;
Ka mipawlih fanu siathloralnak ruangah le,
Nauhak le nausente khawpi sung kăwtthler ih caupawl ruangah,
Ka hnit leilung ah a bung.
12 An nulepawl hnenah,
«Khui ah thlairawl le sabitzu a um?» tiah an ti.
Hriamhma baih mi bangin
Khawpi kăwtthler ah an cau,
An nunnak cu an nulepawlih ṭāng ah thletbŭng a si.
13 Ziangtin so maw ka lo hnem ding?
Maw Jerusalem fanu,
Ziang thawn so ka lo ṭhim ding?
Maw Zion fanu himte,
Ka lo hnĕmnak dingah ziang thawn ka lo ṭhim ding?
Ziangahtile na siatbălzia cu tifinriat tlukin a kau;
Zo in a lo damter thei ding?
14 Na profetpawl cun thuphan le
Bumawknak larnak na hrangah an hmu;
Na vanneihnak tungdingsal dingah,
Na mawhsualnak an rak phawrhsuak lo,
Asinan simsungnak diklo le
Bumnakpawl na hrangah an rak hmu.
15 Lamzin ih feh hmuahhmuah in an za an lo bĕnghnawh;
Jerusalem fanu heheuin an lu an thinhnawh:
« ‹Mawi famkim,
Leitlun pumpuluk lungawiaipuannak,› tiih kawh mi khawpi a si lo maw?» tiah an ti.
16 Na doral hmuahhmuah in nangmah dokalhin an kâ an âng;
An lo heheu ih, an hacâng an lo rialhnawh.
Annih in, «Amah cu kan dawlh thluh zo!
Thungaiten hihi kan rak hngah mi ni a si;
Cumi cu kan rak táwngngah zo, kan rak hmungah zo!» tiah an ti.
17 Jehovah in a tumtah mi a tuah zo;
Hlanlaipi ih thu a rak pek mi a thu a tlamtlingter zo.
Anih in a hlăwnthla ih a zangfah lo,
Cule ralpawl cu na tlunih lungawiaipuang dingin a tuah;
Na doralpawlih ^bki a rak khaisâng.
18 Bawipa hnenah an thinlung a ausuak,
«Maw Zion fanu hauhruang,
Tiva bangin sun le zan mitthli luangthla seh;
Cawlhahdam hlah aw;
Na mit cawlhahdamter hlah.
19 Tho aw, zan ah ausuak aw,
Zan hngah cān thawh tirah;
Bawipaih hmaiah tidai bangin na thinlung thlebung aw.
Kăwtthler tăwntir kip ih rilrawn ruangih cau,
Na falepawlih nunnak ruangah amai hnen lamah na kut thlir aw.»
20 Zoh hnik, Maw Jehovah, ngai hman!
Zo hnenah so hihi na rak tuah?
An rak hrin mi, duat zetih an kilkhawi mi an fanau tete,
An cithlah cu nunaupawl in an ei ding maw?
Puithiam le profet teh Bawipaih hmun thianghlim ah,
Thah an si ding maw?
21 Kăwtthler leilung parah mino le tar an rīl teptep;
Ka fala himpawl le ka tlangvalpawl ralnâm in an rīl;
Na thinheng ni ah na rak that hai,
Zangfah hai loin, na that hai.
22 Khiah mi puai ni ih mi na sawm bangin
Ka hrangih ṭihnungzapawl cu kil i kip ihsin na sawm.
Jehovah thinheng ni ah cun zohman raltlân le zuah mi an um lo.
Ka hrin mi le ka cawm mipawl cu
Ka ralpawl in an that ṭheh.

2:3^a ki: Cahnak hmuhsaknak a si.

2:17^b ki: Câng 3 simfiangnak zoh aw.

3

A Hnget mi Pathian Zahngainak

1 Amai thinlingnak kianghrăwl ih zăwnzaihnak hmutupa cu keimah ka si.
2 Anih cun tleu ah si loin
Thim lakah i hruai ih, i fehter.
3 Thungaiten sunnihlawh in
Atu le atu ka parah a thlak.
4 Amah in ka titsa le ka vun tar ko i tuah ih,
Ka ruhpawl a khiak.
5 Anih in khâtnak le hmakhawpihnak thawn
I kulh ih, i vel.
6 Reipi laiih mithi bangin,
Hmun thimpawl ah i ret.
7 Ka suah theilonak dingin anih cun hruang in i kulh;
Ka cikcin rit zetin a tuah.
8 Ṭapin ka au tik hmanah,
Anih cun ka thlacam i kharsak.
9 Ka lamzinpawl cu lungto in a khambĕt;
Ka zinpawl kĕlkawi ko a tuah.
10 Amah cu mibawhthuptu kiosa le,
Ka hrangih mibawhthuptu saváwm vek a rak si.
11 Anih cun ka lamzinpawl a pêngter ih, cip nêknêkin i băwtthlek;
Anih in ṭhing reprep ko i tuah.
12 A thál a nawp ih,
A thálfung hrangih hmuibah mi ah i ret.
13 A thálfung bawm sungih ^athálfungpawl tla
Ka kailengpawl suntlăng ko a tuah.
14 Ka mipawl hmuahhmuah hnenah hnihsan mi ah ka cang ih,
Sunvu teih nautat ih an hla sakhnawh mi ah ka cang.
15 Anih cun khâtnak thawn i khatter,
Anih cun hnîtkhâ i inter.
16 Anih cun lungtehrâwl in ka ha a khiak fawn ih,
Vutcâm in i khuh.
17 Ka nunnak cu hnangamdaihnak ihsin hlapi ah na ṭhawn;
Lungawinak ka rak hngilh.
18 Cule kei in, «Ka thazang le ka ruahsannak cu
Jehovah hnen ihsin a hlorál zo,» tiah ka ti.
19 Ka zăwnzaihnak le ka vahvaihnak,
Ka hrangih hnîtkhâ le thil khâ cîng hram aw.
20 Ka nunnak cun a cîng lai ih,
Ka sungah a kûn.
21 Himi hi ka vun mángsal,
Curuangah ruahsannak ka nei:
22 Jehovah-ih zahngainak zarah kannih cu kan riarál lo,
Ziangruangahtile a lainatnak a tlawlh dah lo.
23 Cupawl cu zing tin an thar;
Na rinumnak cu a ropi a si.
24 «Jehovah cu ka covo a si,
Curuangah amah cu ka ruahsan a si!» tiah ka nunnak in a ti.
25 Amah hngaktupawl hrangah Jehovah cu a ṭha,
Amah hawltu hrangah.
26 Mi in Jehovah runsuahnak daiteih a hngah cu a ṭha a si.
27 Milai in a no laiih hngawngkol a phurh cu thil ṭha a si.
28 Amah lawngin to sehla, daiten um seh,
Ziangruangahtile cumi cu anih in a parah a ṭhum a si.
29 Leivut ah a kâ ret seh,
Ruahsan ding a um na hman maw!
30 Amah bēngtu hnenah a biang tŭn seh,
Cule nautatnak in khat seh.
31 Ziangahtile Bawipa in a hlăwnhlo kumkhua lo ding.
32 Anih in thinnatnak suakter hman seh,
A zahngainak a tam bangin
Lainatnak a hmuh leh thotho ding.
33 Ziangahtile anih cun ^ba duh hrimhrim ruangih zawnzaiter le,
Minung falepawl thinnater a si fawn lo.
34 Lei thawngtla hmuahhmuah
A ke hnuaiih palbĕt,
35 Cungnung Bik hmaiah mi pakhat diklo ih thuṭhensak le,
36 Mi pakhat a thuhla herhkawisak cu Bawipa in a pawm lo.
37 Bawipa in thu a pek lo tikah,
Thusim ih, cumi cangsuaktertu cu zo a si?
38 Hmakhawpihnak le ṭhatnak cu
Cungnung Bik kâ ihsin a si lo maw?
39 Minung pakhat a sualpawl ruangih cawhkuan pek a si tikah,
Ziangruangah anih cu a phunzai ding?
40 Kan lamzinpawl zawtsuak uh sila, cekfel uhsi,
Cule Jehovah hnenah kirsal uhsi.
41 Van Pathian hnenah
Kan thinlung le kan kut thlir uhsi.
42 Dān kan rak pahbăl ih, kan rak hél;
Nang cun in rak ngaithiam lo.
43 Nang cu thinhengnak thawn na khuhaw ih,
In rak dawi;
Zangfah loin na rak that.
44 Thlacamnak fehtlăng thei lo dingin,
Khawdur in na khuhaw.
45 Nang cun miphunpawl lakih hnawm le bāl ah in rak tuah.
46 Kan doralpawl hmuahhmuah in
Kanmah dokalhin an kâ an rak âng.
47 Ṭihnak le tháng kan parah a thleng,
Ṭhin reprepnak le siatbălnak.
48 Ka mipawlih fanu siatnak ruangah
Ka mitthli tiva bangin a luang.
49 Ka mitthli a luang ih, a reh lo,
Dawnkhamtu um loin,
50 Jehovah in van ihsin a run zoh ih,
A hmuh tiangin.
51 Ka khawpi fanupawl hmuahhmuah ruangah
Ka mit in ka thinlung a nater.
52 Vâte pêl bangin săn um loin,
Ka ralpawl in in pêl.
53 Khur sungah ṭawng loin ^ckeimah cu in ret ih,
Ka parah lungto in thlak.
54 Ka lu tlunah tidai a luang;
Kei in, «Kei cu sahtan ka si,» tiah ka ti.
55 Maw Jehovah, khur thûkbik sung ihsin
Na hmin ka ko.
56 «Ka thawpi suah mi ihsin le băwmnak dil ih ka aunak ihsin
Na hna thup hram hlah,» ka ti mi aw na rak thei.
57 Ka lo kawh ni ah nang in i rak naih ih,
«Ṭih hlah,» tiah i ti.
58 Maw Bawipa, ka nunnak ih thubuai i relsak;
Ka nunnak na rak tlen.
59 Maw Jehovah, palbĕt ka sizia na hmu;
Ka thuhla ṭhen aw.
60 An phulei samnak hmuahhmuah na hmu zo,
Keimah dokalhih an thil tum mi hmuahhmuah khal.
61 An mi hmuhsuamnak hmuahhmuah na rak thei,
Maw Jehovah, keimah dokalhih an thil tum mi hmuahhmuah khal.
62 Ka doralpawlih hmur le
An ṭawng thektho cun sunnihlawh in keimah in dokalh.
63 An to le an din lai zoh hnik aw,
Keimah cu an setet mi hla ka si.
64 Lehrūl hai aw, Maw Jehovah,
An kut hnaṭuan bangtukin.
65 Thinlung khoh pe hai aw,
An parah na camsiatnak um seh!
66 Jehovah-ih vanpawl hnuai ihsin
Na thinhengnak in
Dawi hai awla, hlorálter hai aw.

3:13^a thálfungpawl: Hi hriamhrei relnak hrangah, Hebrumipawl in «thál fapa» ti le «a thál fapapawl» ti ṭawngkam hi an hmang ṭheu.

3:33^b a duh hrimhrim: A ṭawng hrampi ah cun, «a thinlung ihsin» ti a si.

3:53:^c keimah: A ṭawng hrampi ah cun nunnak ti a si.

4

Zion Hremnak

1 Ziangtin so sui cu a rak dál!
Ziangtin so sui hlirhlăng cu a thlengawk!
Hmun thianghlim lungpawl cu
Kăwtthler kip tăwntir ah an darhsarh thluh.
2 A sunglawi mi Zion Fapapawl,
Sui hlirhlăng vekih mankhung,
Ziangtin so beltuahtuih kutsuak,
Leitlak bel vek menih ruah an si!
3 Ram uipawl hman in
An fano cawmnak ah an hnawi an fawh;
Asinan ka mipawlih fanu cu a nun a râwng,
Thlaler ih kalauk va bangin.
4 Tihāl ruangah nausente lei cu a sangkhâr ah a bĕt;
Nauhakpawl in ei ding an dil,
Asinan zohman in an pe lo.
5 Rawl thaw ei ṭheu tupawl,
Kăwtthler ah kut lawngin an um;
Hnipuan senlar thawi ṭhanglianpawl vutcâm pâwng an bawh.
6 Ka mipawlih fanu mawhsualnak cu
Sodom mawhsualnak hnakin a nasasawn,
Cumi cu mit ṭhep karah hlăwn a si ih,
Amah cu zawih kut hman in an bawm lo!
7 A Nazir-mipawl cu vur hnakin an tlesawn ih,
Hnawi hnakin an varsawn;
An taksa cu keplung hnakin an sensawn,
An hmel cu safaira bangtukin.
8 An hmel cu rapṭing hnakin an dumsawn,
Theihthiam theih loin kăwtthler ah an feh.
An vun cu an ruhpawl ah a bĕt,
Cumi cu zanthing vekih ro ah a cang.
9 Ralnâm ih thah mipawl cu
Rilrâwngih thipawl hnakin an van a ṭhasawn;
Ziangahtile annih cu lóram rahsuah tlaksăm ruangah hliam tuarin an riarál.
10 Mi lainat nei nunaupawl kut in
Anmai faletla an sûang;
Annih cu an rawl ah an cang,
Ka mipawlih fanu siatralnak ah cun.
11 Jehovah in a thinsonak a phawrhsuak ṭheh,
A thinheng alh cu a thlebung.
Zion ah meisa a muah ih,
Cumi cun a hramṭohnakpawl a kāng ṭheh.
12 Jerusalem kulh kăwtkapawl sungah doralpawl le ralpawl
An lut thei ti leitlun siangpahrangpawl le,
Leilung luahtupawl hmuahhmuah in an rak zum lo.
13 A sungih midik thisensuahtu,
A profetpawlih sualpawl ruangah le
A puithiampawlih mawhsualnakpawl ruangah a tuar a si.
14 Annih cu kăwtthler ah mitcaw in an vâkvai.
Thisen thawn an bawrhbangawter,
Cutin zohman in an sinfen an thâm thei lo.
15 Annih in an hnenah,
«Tlânhlo uh, mithiang lopawl!
Tlânhlo uh, tlânhlo uh,
In thâm hlah uh!» tiin an au.
An tlân ih an vahvaih tikah,
Miphunpawl lakih mipawl in,
«Hi tawkah an cêng nawn lo ding,» tiah an ti.
16 Jehovah thinheng mithmai in anmah cu a ṭhekdarh,
Anih in a ngaihsak hai nawn lo.
Annih in puithiampawl an upat lo ih,
Upapawl hnenah duhsaknak an langter fawn lo.
17 In bawmtu ding thlir lak mennak ah kan mit a khám;
Kan thlir tikah in runsuak thei lo ding mi miphun kan thlir.
18 Kan kăwtthler ih kan fehlonak dingah
Annih in kan kenehpawl an zâwt.
Kan cemnetnak cu a nâi;
Kan cān a cem,
Ziangahtile kan cemnetnak a thleng zo.
19 In dawitupawl cu vanpawlih muvanlaipawl hnakin an rangsawn.
Annih cun tlangpawl ah in dûm ih,
Thlaler ah in bawhthup.
20 «A thlahlim hnuaiah miphunpawl lakah kan damsuak ding,» tiih kan ruah mi,
Kan nunnak thaw, Jehovah hriak thih mi cu an tháng ah awh a si.
21 Maw Edom fanu, Uz ram ih cêng, aipuang awla lungawi aw!
Sihmansehla, cuih no cu na par khalah a thleng ding,
Na ri ding ih, lawngfangkheh ah na tuahaw ding.
22 Maw Zion fanu,
Na mawhsualnak cawhkuan cu ṭheh a si thlang,
Anih in sáltannak ah a lo kuat nawn lo ding.
Maw Edom fanu,
Anih cun na mawhsualnak cawhkuan a pe ding;
Na sualpawl a khuh lo ding!

5

Tundinsalnak hrang Thlacam

1 Maw Jehovah, kan parih thil thleng mi hi cîng ringring aw;
Zoh hnik, hmuhsuam kan sinak hi hmu hnik aw!
2 Kan ro cu mikhualpawl hnenih pek an si ih,
Kan innpawl cu khawtluang mipawl hnenah.
3 Kannih cu pa nei lo le hngakṭah ah kan cang,
Kan nulepawl cu nuhmei vek an si.
4 Kan in mi tidai man kan pe ih,
Kanmai tihthing ding kan lei.
5 Kan hngawng cu tiduhdahnak tăngah a um;
Bāng zetin kan ṭuan ih, cawlh ti kan nei lo.
6 Rawl khawp ngah dingah, Izip le
Assiria-mipawl hnenah kan kut kan rak san.
7 Kan pupápawl an rak sual ih, an um nawn lo,
Asinan kannih in an mawhsualnakpawl kan phur.
8 Siahhlawhpawl in in uk;
An kut ihsi in runsuaktu ding zohman an um lo.
9 Thlaler ih ralnâm ruangah,
Kan nun tiang pe ngam in kan rawl kan ngah.
10 Pām natsattuk ruangah,
Kan vun cu thŭk vekin a sa.
11 Annih in Zion ah nunaupawl an kaihrem,
Falapawl cu Judah khawpipawl ah.
12 An kut in tlangsuakupapawl an thlai ih,
Upapawl cu zahpah an si lo.
13 Tlangvalpawl in riallung an rial;
Mipa nauhakpawl thingtum rit hnuaiah an tlu zăwk rero.
14 Kulh kăwtka ah upapawl an um nawn lo ih,
Tlangvalpawl in an awnmawi an tum nawn lo.
15 Kan thinlung aipuannak a reh;
Kan lāmnak cu lusūnnak ah a cang.
16 Kan lu ihsin lallukhum a tla.
Kan rak sual ruangah kan hmakhua a pit.
17 Himi ruangah kan thinlung a cau,
Himi thilpawl ruangah kan mit a râu.
18 A ṭhing reprep mi Zion Tlang ruangah,
Tlang parah sihál rual an tawivâk rero.
19 Maw Jehovah, nang cun kumkhuain na uk,
Na laltokham cu san khat hnu san khat a hmun.
20 Ziangahso in hngilh kumkhua ih,
Rei tuk in thlauthlak?
21 Maw Jehovah na hnen lam in hawitersal awla, tuahṭhatsal kan si ding;
Hlanlai vek khan kan nun titharsal aw,
22 In hnáwng lan ta lawlaw lo ih,
Kan parih na thin a heng tuk lawmmam lo ah cun!