BibleThianghlim – 2 SAMUEL

Old Testament

Genesis Exodus Leviticus Numbers Deuteronomy Joshua Judges Ruth 1 Samuel 2 Samuel 1 Kings 2 Kings 1 Chronicles 2 Chronicles Ezra Nehemiah Esther Job Psalm Proverbs Ecclesiastes Song of Solomon Isaiah Jeremiah Lamentations Ezekiel Daniel Hosea Joel Amos Obadiah Jonah Micah Nahum Habakkuk Zephaniah Haggai Zechariah Malachi

New Testament

Matthew Mark Luke John Acts Romans 1 Corinthians 2 Corinthians Galatians Ephesians Philippians Colossians 1 Thessalonians 2 Thessalonians 1 Timothy 2 Timothy Titus Philemon Hebrews James 1 Peter 2 Peter 1 John 2 John 3 John Jude Revelation

2 SAMUEL

1 2 3 4 5 6 7 8 9 10
11 12 13 14 15 16 17 18 19 20
21 22 23 24

A ngantu: Theih a si lo
Thil cang kum: B.C. 1011-971
Ngan kum: B.C. 900 hnu hrawng

Samuel bu khatnak le bu hnihnak hi a thăwk ah cun cazual pakhat ih kăwm a si.

Theih lo mi ngantu (ngantupawl) hin Solomon thih hnu le Israel lalram pahnih ih a ṭhenawk hnu (1Sam 27:6, «Judah siangpahrangpawl») kum tampi hnaṭuan thu a ngan. Hi cabu ngantu (ngantupawl) in kum reipi hnuah a ngan ko nân, hlanlai thu le hla pawl cu a ṭhumawknak ah a hmang. Siangpahrang Saul-ih uknak cemnak le David-ih uk thăwknak cu Samuel bu hnihnak a thăwknak ah kan hmu (B.C. 1011). David-ih uknak hmuahhmuah cu hi cabu sungah kan hmu ih, a ni netabikpawl cu Siangpahrang bu khatnak bung 1 le 2 ah a lang (B.C. 971).

Hi cabu in bung khatnak ah (1:14, 16) «Bawipaih Hriak thih mi» thuhla a rel. Cumi cu Samuel bu khatnak in a theihter zo mi thupi a si ti casiartu in a theih a ṭul (1Sa 2:10). Samuel bu hnihnak hin «hrik hnih» ti ṭawngkam hi Thukham Hlun bu dang hnakin a hmang tam (vei 30 hnak tam a hmang). A tamsawn cu Samuel bu khatnak ah a si ih, Saul cu Pathian ruat mi a si ti David in a theihthiam thu a langter. David in ni khat khat ah siangpahrang a si ding ti a thei, asinan cucu Pathian in a sian tiktikah a si ding ti khal a thei, cule David in Pathian thu a lung. Cuih cān cu Samuel bu hnihnak ah a thleng. Israel-mipawl in siangpahrang an ngĕnnak cu an tlunih Pathian uknak an hnáwng tinak a si (1Sa 8:7). Asinan Bawipa in an tlunah a uk thotho, ziangahtile anih cun an siangpahrangpawl kha a hril ih, hriak a thih hai.

Cuih thutak cu Siangpahrang bu khatnak le bu hnihnak ah a nawlh leuhleuh. Milai hmuhnak cun, thuanthu cu David thuhla a si. A kau zawngih thlir cun, thuanthu cu Pathian thuhla le a mipawl hnenih a rinumzia, a tumtahpawl le a thutiamkampawl thuhla a si. Hi cabu sungah thil thupi tampi a cangsuak: David in Jerusalem a neh ih, cucu Pathian biaknak hmun ah a tuah (bung 5-6); Pathian in David le a tesinfapawl thawn kumkhaw thukham a tuah (bung 7); David in Bathsheba hnenah thilsual a tuah, Pathian in a kawk ih, David a siraw (bung 11-12); David in sungkua buainak a nei, a hleicein a fapa Absalom thawn (bung 13-19); David in a ralkappawl mipum a siar ih, Pathian in amah cu dān a tat, asinan cuih dāntatnak cu Pathian in temple hmun hrilnak hrangah a hmang (bung 24).

David thawi Pathian thukham cu David le Pathian Fapa Jesu hrangih lamzin sialnak hrangih a ruahmannakpawl lakih pakhat te lawng a si (Luk 1:31-33). Hruaitu dingih Pathian ih a hril mi cu ziangtin Pathian in a kilhim ih a timlam ti Samuel bu khatnak in a langter. Pathian hril mi hruaitu si cingin famkim lo zetih Pathian ṭihzahnak thawi uktu cu ziangtin Pathian in a kilhim ih a kilkhawi ti Samuel bu hnihnak in a langter (23:1-3).

Thuhlawm Ṭhen

I. Judah tlunah siangpahrang dinhmun in David a lal (bung 1-4)
II. Israel hmuahhmuah tlunah siangpahrang dinhmun in David a lal (bung 5-24)

Saul Thih Thu Simthannak

1 Saul a thih hnuah hitin a si, David cu Amalek-mipawl a thahnak ihsin a ra tlunkir hnuah, Ziklak ah David cu ni hnih a cam ta, 2 a ni thumnak ah, ngai hnik, hitin a si, Saul-ih ṭanhmun khuarnak ihsin mi pakhat a hnipuan thlekin le a lu ih leivut thawn a ra. Cun hitin a si, cu pa cu David hnen a thlen tikah lei ah a hlăwnaw ih a băwkkhup.

3 Cule David in a hnenah, «Khuitawk ihsin na ra?» tiah a ti.

Cule anih in David hnenah, «Israel ṭanhmun khuarnak ihsin ka tlânsuak a si,» tiah a ti.

4 Cun David in a hnenah, «Thil umtudān ziangtin a si? Zangfahten i sim aw,» tiah a ti.

Cule anih in, «Raldoawknak ihsin mipi an tlansia, mipi tampi an rīl ih an thi, cule Saul le a fapa Jonathan khal an thi ve,» tiah a ti.

5 Cutikah David in amah thusimtu tlangvalpa hnenah, «Saul le a fapa Jonathan an thi ti cu ziangtin na thei?» tiah a ti.

6 Cun amah thusimtu tlangvalpa cun, «Rinlopiah Gilboa Tlang ah ka va suak, Saul cu a feipi parah a rak tlu; cule ngai hnik, ránglêngpawl le rángtothiampawl in a dung ihsin man ziktein an dawi. 7 A dung lam a hei zoh tikah, i hmu ih i ko. Cule kei in, ‹Hinah ka um,› tiah ka sawn. 8 Cule anih in ka hnenah, ‹Zo na si?› tiah i ti. Cutikah kei in, ‹Keimah cu Amalek-mi ka si,› tiah amah cu ka sâng. 9 Anih in ka hnenah, ‹Zangfahten ka kiangah ding awla i that aw, ziangahtile mangbanganhainak ka parah a thleng zo, asinan ka nunnak keimah ah a tāng lai a si,› tiah i tibêt. 10 Cun kei cu a kiangah ka ding ih a tlûk hnu cun a nung thei lo ding ti ka theih ruangah amah cu ka that. Cule a lu parih lallukhum le a bān ih kutkhih cu ka lâk ih, cupawl cu hitawk ka bawi hnenah ka rak keng,» tiah a ti.

11 Cule David cun a hnipuanpawl cu a phăwih ih a thlek, cule a zawngih um mipa hmuahhmuah khal in cuvekin an tuah ve. 12 Cule ralnâm in an thih ruangah, Saul hrangah le a fapa Jonathan hrangah, Jehovah-ih mipawl hrangah le Israel sungkuapawl hrangah nitlak tiang an sûn, an ṭap ih rawl an ul.

13 Cun David in thu ra simtu tlangval hnenah, «Khui tawkin na ra?» tiah a ti.

Cule anih in, «Keimah cu khawtluang mi-ih fapa, Amalek-mi ka si,» tiah a ti.

14 Cutikah David in a hnenah, «Ziangtin Jehovah-ih hriak thih mi that dingin ṭih riai loin na kut na suah ngam?» tiah a ti. 15 Cun David in a zawngih um tlangvalpawl lakih pakhat a ko ih, «Va naih awla amah cu that aw,» tiah a ti. Cule Amalekpa cu a vuak ih, anih cu a thi. 16 Cule David in mithipa hnenah cun, «^aNa thisen cu nangmai lu parah a um a si, ziangahtile nangmai kâ rori in nangmah dokalhin, ‹Jehovah-ih hriak thih mi ka that tiah,› a theihter zo,» tiah a ti.

1:16^a Na thisen cu nangmai lu parah: Thukham Hlun san laiah mithattu in thisen suah man mawhphurh a nei. Dāntatnak a co ding.

David in Saul le Jonathan a Ṭah

17 Cun David in Saul le a fapa Jonathan cu himi ṭahhla in a ṭah hai ih, 18 Thál Hla cu Judah tefapawl zirh dingin a sim hai; ngai hnik, cumi cu Jasher-ih Cazual sungah ngan a si.

19 «Israel-ih mawinak cu na hmun sângpawl ah thah a si!
Ziangtin so micak an tluk!
20 Cumi cu Gath khua sim hlah uh,
Cumi cu Ashkelon kăwtthler ah thăn hlah uh,
Culole Filisṭia-mipawlih falapawl lungawiaipuangin an um pang ding,
Culole serh zim tan lo pawlih fanupawl in an neh pang ding.
21 «Maw Gilboa tlangpawl,
Nan parah daifim siseh, ruah siseh um hlah sehla,
^aLópawlih thilhlănpawl khal um hlah seh.
Ziangahtile cu tawkah micak ralphaw cu na zetih hlăwn a si!
Saul-ih ralphaw, hriak culh a si lo.
22 Thah mi thisen ihsin,
Micak thau ihsin,
Jonathan-ih thál a kirsal lo ih,
Saul-ih ralnâm kawlawngin a kirsal lo.
23 «Saul le Jonathan cu an nun laiah
Duhdawt mi le miduhum an si,
Cule an thihnak ah an ṭhenaw lo;
Annih cu muvanlaipawl hnakin an rangsawn,
Kiosapawl hnakin an caksawn.
24 «Maw Israel fanupawl,
Năwmcennak thawi puan senlar ih a lo thuamtu,
Nan hnipuan parih ceiawknak sui thawi a lo ceitu,
Saul cu ṭah rero uh.
25 «Raldoawk laiah ziangtin micak an rīl!
Nan hmun sângpawl ah Jonathan cu thah a si.
26 «Ka unaupa Jonathan, nangmah ruangah ka van a sâng a si;
Ka hrangah duhnungza zet na si;
Ka parih na duhdawtnak hi khawruahharza a si,
Nunaupawlih duhdawtnak a hleih.
27 «Ziangtin micak an rīl men ih,
Raldonak hriamhreipawl cu ṭhiahbăl an si!»

1:21^a Lópawlih thilhlănpawl: Lóram ihsi suak mi thilhlănpawl tinak a si.

David Hriak Thih a Si

1 Cuihhnu ah hitin a si, David in, «Judah khawpipawl lakih pakhat khat ah ka so pei maw?» tiin Jehovah a ráwn.

Cule Jehovah in a hnenah, «So aw,» tiah a ti.

David in, «Khuitawk ah ka so ding?» tiah a ti.

Cule anih in, «Hebron ah,» tiah a ti.

2 Cule David cu cuih hmun ah a so, a nupi pahnih, Jezreel-mi Ahinoam le Karmel-mi Nabal-ih nupi Abigail te khal. 3 Cule David in mi kip anmai sungkua cio thawn a hnenih um mipapawl cu a hruai hai. Cutin annihpawl cu Hebron khawpipawl ah an cêng.

4 Cun Judah mipapawl an ra ih, cu tawkah David cu Judah sungza tlunah siangpahrang ah hriak an thih. Cule annih in David hnenah, «Jabesh Gilead mipapawl cu Saul phumtu an si,» tiah an sim. 5 Cutikah David in Jabesh Gilead mipapawl hnenah palaipawl a thlah ih, an hnenah, «Nan bawi, Saul parah himi ngilneihnak nan rak langter ih, amah nan rak phum ruangah, nannih cu Jehovah-ih thlawsuah mi nan si. 6 Cule atu ah Jehovah in ngilneihnak le thutak cu nan hnenah langter hram seh. Hi thil nan rak tuah ruangah kei khal in hi ṭhatnak hi nan parah ka tuah ve ding. 7 Curuangah atu ah, nan kutpawl cak sehla, ralṭha uh, ziangahtile nan pu Saul cu a thi ih, Judah sungza in keimah cu an parih siangpahrang ah hriak in rak thih a si,» tiah a ti.

Israel Siangpahrang ah Ishbosheth

8 Asinan Saul-ih ralkap burpi hotu Ner-ih fapa Abner in Saul-ih fapa Ishbosheth cu a hruai ih Mahanaim ah a thlenpi. 9 Cule amah cu Gilead-mipawl tlun, Ashur-mipawl tlun, Jezreel-mipawl tlun, Efraim-mipawl tlun, Benjamin-mipawl tlun le Israel-mi zate tlunah siangpahrang ah a tuah. 10 Saul fapa Ishbosheth cu Israel tlunih siangpahrang ṭuan a thăwk tikah kum 40 mi a si, cule kum hnih sung a lal. David cu Judah sungza lawngin an rak thlun. 11 Cule Hebron ah Judah sungza tlunih David siangpahrang a ṭuan tikcucān cu kum sarih le thla ruk sung a si.

Israel le Juda Doawknak

12 Ner fapa Abner le Saul fapa Ishbosheth-ih siahhlawhpawl cu Mahanaim ihsin Gibeon ah an feh. 13 Cule Zeruiah-ih fapa Joab le David-ih siahhlawhpawl cu an păwksuak ih annihpawl cu Gibeon tidāwl kiangah an va táwng. Annihpawl cu tili khat lam kapah bur khat, tili khat lam kapah bur khat tiin an to. 14 Cun Abner in Joab hnenah, «Atu ah tlangvalpawl kha suak hai sehla, kan hmaiah zuamaw hai seh,» tiah a ti.

Cule Joab in, «Suak hai seh,» tiah a ti.

15 Cutin annih cu an tho ih, ziang zat ti siarawin, Benjamin hnám, Saul-ih fapa Ishbosheth thluntupawl ihsin mi hleihnih, cule David-ih siahhlawhpawl ihsin mi hleihnih pawl cu an fehsuak. 16 Cule pakhat cio in mai tum cio an lu in an kai ih, mai ralnâm in mai tum cio hnak ah an sun; cule hmunkhatah an rīlkhawm. Curuangah cuih hmun cu ^aHelkath Hazzurim tiih kawh a si, cumi cu Gibeon ah a um. 17 Cutin cuih ni ah a nasazet mi doawknak a um ih, Abner le Israel mipapawl cu David-ih siahhlawhpawl in an neh.

2:16^a Helkath Hazzurim: A sullam cu ralnâm Hriampawlih lóram tinak a si.

Asahel in Abner a Dawi

18 Zeruiah fapa pathum: Joab le Abishai le Asahel pawl cu cu tawkah an um. Cule Asahel cu hramlak sakhi pinu ke tlukin a zuan a zâng. 19 Cule Asahel in Abner a dawi ih, Abner a dawi laiah keh lamah siseh, vawrh lamah siseh a pial lo. 20 Cun Abner cun a dung lam a hawi ih, «Asahel na si maw?» tiah a ti.

Anih in, «Ka si,» tiah a sawn.

21 Cule Abner in a hnenah, «Na vawrh lamah asilole na keh lamah pial awla, tlangvalpawl lakih pakhat khat kha kai aw, cule nangmai hrangah an ralthuam la aw,» tiah a ti. Asinan Asahel cun a dawinak ihsin a pial cuang lo. 22 Cun Abner in Asahel hnenah, «I dawinak ihsin i pialsan aw. Ziangahso lei ah ka lo sahthluk ding? Ziangtin na unaupa Joab hmel ka hmuh ngam ding?» tiah a tisal. 23 Sikhalsehla, anih cun sirih pial cu a êl. Curuangah Abner in a pum ah feipi bīl lamin a sawh, cutin a feipi cu a phurhsam ah a tlang; cule cu tawkah cun a rīl ih a thi cih. Cun hitin a si, Asahel rilhnak le thihnak hmun ih ratu pauhpauh cu an ding cuahco.

24 Joab le Abishai khal in Abner cu an dawi ve. Cule Gibeon Ramṭhing lamzin kiang Giah hmaiih um Ammah tlang an thlen tikah ni a tla. 25 Benjamin tefapawl cu Abner-ih dungah hmunkhatah an fĭnaw ih, bur khat ah an cang, cule tlang zimah ṭanhmun an la. 26 Cun Abner in Joab a ko ih, «Ralnâm in a dawlh kumkhua ding maw? A netnak lamah cun a khâ deuhdeuh ding ti na thei lo maw? Anmai unau dawi rero tu minungpawl tlungkir dingin ziang tik tiang so sim loih na um ding?» tiah a ti.

27 Cule Joab in, «Pathian a nun rori bangin, cutiin rak ṭawng lo awla cu, mi hmuahhmuah anmai unau dawinak ihsin zing lam lawngah an cawl ding,» tiah a ti. 28 Cun Joab in tuupa ki a phaw, cule mi hmuahhmuah an ding ih, Israel cu an dawi nawn lo, a do khal an do nawn lo. 29 Cun Abner le a mipapawl cu cuih zan ah zanvar Arabah hrawhsuakin an feh, Jordan tiva an tán ih, Bithron hmuahhmuah an lansuak, cule Mahanaim an thleng.

30 Joab cu Abner a dawinak ihsin a tlungkir. Cule mi hmuahhmuah hmunkhatih a fĭnkhawm thluh hai tikah, David-ih siahhlawh mipa hleikua le Asahel an kim lo. 31 Asinan David-ih siahhlawhpawl in Benjamin-mi mi tampi le Abner-ih mipapawl cu an that ih, mi 360 an thi. 32 Cun Asahel cu an thiar ih, Bethlehem ih a paih thlān ah an phum. Cule Joab le a mipapawl cu zanvar an feh ih, zing lam khawvan zawngah Hebron an thleng.

David Fapapawl

1 Cun Saul sungza le David sungza karlakah rei zet doawknak a um. Asinan David cu a cak deuhdeuh ih, Saul sungza cu an cak lo deuhdeuh. 2 Hebron ah David in fapapawl tla a nei: a fapa upabik cu Jezreel-mi Ahinoam ih hrinsak mi Amnon a si; 3 a pahnihnak cu, Karmel-mi Nabal-ih nuhmei Abigail ih hrin mi Kileab a si; a pathumnak cu, Geshur siangpahrang Talmai fanu Maakah ih hrin mi Absalom a si; 4 a palitnak cu, Haggith-ih fapa Adonijah a si; a pangatnak cu Abital-ih fapa Shefatiah a si; 5 cule a paruknak cu, David nupi Eglah hrin mi Ithream a si. Hipawl cu David in Hebron ih a neih mi fapapawl an si.

Abner in David a Kăwp

6 Cun hitin a si, Saul sungza le David sungza karlakih ral doawknak a um laiah, Abner cun Saul sungza ah a dinhmun a cakter vivo. 7 Cule Saul in nusûn a nei, a hmin cu Rizpah a si, Aiah-ih fanu a si. Cule Ishbosheth in Abner hnenah, «Ziangah ka paih nusûn hnenih na rak luh?» tiah a ti.

8 Cutikah Ishbosheth-ih ṭawngkampawl parah Abner a thin a heng zet ih, «Keimah cu Judah-ih uico lu maw ka si? Tuihsun ah na pa Saul-ih sungza hnenah, a unaupawl hnenah le a rualpipawl hnenah ngilneihnak ka langter ih, David kut ah ka lo pe lo; cule tuihsun ah nang in hi nunau thawn pehparawin mawh neiah i puh? 9–10 Saul sungza ihsin lalram cu la tahratin Israel tlunah le Judah tlunah, Dân ihsin ^aBeersheba tiang David laltokham dĭn dingih Jehovah in David hnenih sia a rak săm vekih ka tuah lo asile, Abner parah Pathian in a titi in ti seh, cuhnakih nasa khalin,» tiah a ti. 11 Cule amah a ṭih ruangah ṭawngkam dangin Abner cu a sawn lo.

3:9-10^a Beersheba: «Thukam tikhur» asilole «pasarih tikhur» tinak a si.

12 Cun Abner in amai aiah David hnenah palaipawl a thlah ih, «Leiram cu zo-ih ta a si?» tiin le, «Keimah thawn na thukham tuah aw, ngai hnik, na hnenih Israel hmuahhmuah thlenpi dingin ka kut cu na hnenah a um ding,» tiin a simbêt.

13 Cule David in, «A ṭha, nangmah thawn thukham ka tuah ding. Asinan na hnenah thil pakhat ka lo dil a si. Ka hmel hmu dingih na rat tikah Saul-ih fanu Mikal na rak hruai lo asile, ka hmel na hmu lo ding,» tiah a ti. 14 Cule David in Saul fapa Ishbosheth hnenah, «Filisṭia-mipawlih vun zim 100 ih ka rak ham mi ka nupi Mikal i rak pe aw,» tiin palaipawl a thlah. 15 Cule Ishbosheth in mi a thlah ih, Mikal cu a pasal Laish fapa Paltiel hnen ihsin a lâk. 16 Cun a pasal cun ṭap phahin a dung ihsin Bahurim tiang a thlun. Cutikah Abner in a hnenah, «Feh aw, tlungkir aw!» tiah a ti. Cule anih cu a tlungkir.

17 Cun Abner in Israel upapawl cu a bia ih, «A liam cia mi cān ah nan tlunih siangpahrang dingah David nan rak hawl. 18 Atu ah cuticun tuah uh! Ziangahtile David thuhla ah Jehovah in, ‹Ka siahhlawh David kut in Filisṭia-mipawlih kut le an ral hmuahhmuah pawlih kut ihsin ka mi Israel ka run ding,› a ti,» tiah a ti. 19 Cule Abner in Benjamin-mipawl ih hnatheih ah a rel fawn. Cun Abner cu Israel-mipawl le Benjamin sungza pumpuluk ih ṭha an ti mi hmuahhmuah cu Hebron ah David-ih hnatheihih rel dingin a feh fawn. 20 Cuticun Abner cu Hebron ih David hnenah mipa 20 thawn an va feh. Cule David in Abner le a zawngih um mipapawl hrangah puai a tuah. 21 Cun Abner in David hnenah, «Ka tho ding ih ka feh ding, cule nangmah thawi thukham an tuah theinak dingah le na thinlung duhhiarnak hmuahhmuah vekih na uk theinak dingah Israel hmuahhmuah ka bawipa siangpahrang hnenah ka khawm ding,» tiah a ti. David in Abner cu a thlahsuak ih, anih cu hnangamten a feh.

Joab in Abner a That

22 Cule zoh hnik, David-ih siahhlawhpawl le Joab cu ralkap burpi dûmnak ihsin an ra tlung ih, an zawngah ralthillawn tampi an run tlŭn. Asinan Abner cu Hebron ah David hnenah a rak um lo, ziangahtile a rak thlahsuak zo ih, anih cu hnangamten a rak feh a si. 23 Joab le a zawngih um ralkap burpi hmuahhmuah an ra thlen tikah, annih in Joab hnenah, «Ner-ih fapa Abner cu siangpahrang David hnenah a ra, cule David in a rak thlah, cule Abner cu hnangamten a rak feh,» tiin an sim. 24 Cun Joab cu siangpahrang hnenah a feh ih, «Ziang so na rak tuah? Zoh hnik, Abner cu na hnenah a ra. Ziangruangah amah cu na rak fehsuakter ih, a rak fehhloh mai? 25 Ner-ih fapa Abner cu nangmah lo bum dingin, na suah le na luh lo thei dingin le na tuah mi hmuahhmuah thei dingin a ra a si ti na thei,» tiah a sim.

26 Cule David hnen ihsi Joab a suah hnuah, anih in Abner dung ihsin palaipawl a thlah, annih in amah cu Sirah tikhur ihsin an run hruaikir. Asinan cucu David in a rak thei lo. 27 Cule Hebron ih Abner a rak kir tikah, Joab in anih cu a dang deuhah kăwt ah amah te lawngih be dingin a hruai ih, cu tawkah Abner cu a pum ah a sŭn, cutin anih cu a unaupa Asahel thisen ruangah a thi.

28 Lehhnu ah, David in cuih thu a theih tikah, «Ner-ih fapa Abner-ih thisen thu ah Jehovah hmaiah keimah le ka uknak cu mawh nei lo kumkhua kan si. 29 Cumi cu Joab le a paih sungza hmuahhmuah lu parah tla seh, cule Joab sungza ah pakhat hman thisen dăwk siseh, phārnat siseh, kianghrăwl vâwk cawpih um siseh, ralnâm ih thi siseh, rawl tlasam siseh um loin um hlah seh,» tiah a ti. 30 Cuticun Gibeon ih ral doawknak ah Abner in an unaupa Asahel a rak thah ruangah Joab le a unaupa Abishai in Abner cu an that.

David in Abner a Ṭah

31 Cun David in Joab le a zawngih um mi hmuahhmuah hnenah, «Nan hnipuan thlek uh, buri-hnipuan in thuam aw uhla, Abner ṭah uh,» tiah a ti. Cule siangpahrang David in lâng cu a thlun. 32 Cun Hebron ah Abner cu an phum, cule siangpahrang cu a aw a suah ih, Abner thlān ah cun a ṭap, cule mipi zaten an ṭap ṭheh. 33 Cun siangpahrang in Abner ṭahhla a seh ih,

«Abner cu mi-â thih menin maw a thih ding?
34 Na kutpawl tla ṭawn an si lo ih,
Na ke khal thirhri khih an si lo,
Misualrálpawl hmaiih mi a tluk vekih na tluk men,»

tiah a ti.

Cun mipi zaten amah cu an ṭahsal.

35 Cule sun a si hrih laiah mipi hmuahhmuah an ra ih rawl ei dingin David an hnêk, David cun, «Ni a tlak hlanah sang siseh, thil dang siseh, ka tep asile, Pathian in a tuah tuahin i tuah sehla, cuhnakih na deuh khalin,» tiin sia a săm. 36 Mipi zaten cumi cu an hminsin ih, cumi cun mipi lung a hmuiter, ziangahtile siangpahrang ih tuah mi pauhpauh in mi hmuahhmuah lung a hmuiter. 37 Ziangahtile mipi hmuahhmuah le Israel hmuahhmuah in cuih ni ah Ner fapa Abner thah cu siangpahrang ih thil tum a rak si lo ti an theithiam. 38 Cun siangpahrang cun a siahhlawhpawl hnenah, «Tuihni ah Israel lakah hotu le miropi a thi ti nan thei lo maw? 39 Cule siangpahrang dingih hriak thih mi ka si ko na cingin tuihsun ah hin ka ṭawnṭai a si. Cule hi mipapawl, Zeruiah fapapawl hi ka hrangah an siakhâ tuk. Jehovah in thil ṭhalo a tuahtu cu amai sualralnak zulhin lehrūl ko seh,» tiah a ti.

Ishbosheth Thah a Si

1 Saul-ih fapa in Hebron ah Abner a thi ti a theih tikah a ralṭhatnak a hlo; cule Israel-mi hmuahhmuah an buai. 2 Cun Saul-ih fapa in ralkap burpi hotu mi pahnih a nei. Pakhat hmin cu Baanah a si ih, a dang pakhat hmin cu Rekab a si. Benjamin tefa, Beeroth-mi Rimmon fapapawl an si. Ziangahtile Beeroth cu Benjamin ram ih siartelh khal a si, 3 Beeroth-mipawl cu Gittaim ah an tlân ih, tuihni tiangin cu tawkah mikhual vekih an um ta ruangah a si.

Jonathan Fapa Mefibosheth

4 Saul fapa, Jonathan in fapa kebái a nei. Jezreel ihsin Saul le Jonathan thuhla a thlen tikah anih cu kum nga mi a si, cule amah umtu in a pawm ih a tlanpi. Cule hitin a si, manhlap tukih a tlanpi laiah anih cu a tla ih kebái ah a cang. A hmin cu Mefibosheth a si.

5 Cun Beeroth-mi Rimmon fapapawl, Rekab le Baanah cu an păwk ih, Ishbosheth inn ah cun sun ni sat vanglai ah sun laili ih a ihkhun parih a zau laiah an thleng. 6 Cule sangvut la ding vekin inn sung lamah cun an lut ih, a pum ah an sŭn. Cun Rekab le a unaupa Baanah cu an tlânsuak. 7 Ziangahtile inn sung an luh tikah, anih cu a ihnak pindan a ihkhun parah a rak it. Cun annih in amah cu an sŭn ih, an that, a lu an tán ih a lu cu an la, cule Arabah fehtlăngin zanvar an tlân. 8 Cule annih in Ishbosheth lu cu Hebron ih David hnenah an hei keng ih, siangpahrang David hnenah cun, «Zoh hnik, na nunnak hawltu, na doral Saul-ih fapa Ishbosheth-ih lu hi; Jehovah in ka bawi siangpahrang ih phuba cu tuihsun ah Saul le a cithlah parah a lo samsak a si,» tiah an ti.

9 Cule David in Beeroth-mi Rimmon-ih fapapawl, Rekab le a unaupa Baanah cu a sâng hai ih, «Harsatnak hmuahhmuah ihsi ka nunnak i rak tlentu Jehovah a nun rori vekin, 10 mi pakhat in, thuthangṭha kengah ruatawin, ‹Zoh hnik, Saul a thi a si,› tiin in sim ih, amah cu ka kai ih, Ziklak ah ka that. Cumi cu a thuthang lawmman hrangih ka pek mi a si. 11 Misualrálpawl in amai inn sung ihkhun parih it lai midingfel pakhat an thah tikah cun ziang tlukin a nasa sinsin pei? Curuangah atu ah a thisen man cu nan kut ah lo dil loin le leilung par ihsin lo thaihlo loin ka um ding maw?» tiah a ti. 12 Cun David in tlangvalpawl thu a pe hai ih, cupawl cu an that, an kut le an ke an tán ih, Hebron tili kiangah an thlai. Asinan Ishbosheth-ih lu cu an lâk ih, Hebron ah Abner-ih thlān ah an phum.

David in Israel Zaten a Uk

1 Cun Israel hnám hmuahhmuah cu Hebron ah David hnenah an ra ih, «Ngai hnik, kanmah cu na ruh le na titsa kan si. 2 Hi hlanah, kan tlunih Saul siangpahrang a si laiah, nangmah cu doawknak ih Israel hruaisuaktu le hruailuttu na si. Cule Jehovah in na hnenah, ‹Ka mi Israel na kilkhawi hai pei ih, Israel tlunah uktu na si ding,› a lo ti,» tiah an ti. 3 Cule Israel upapawl hmuahhmuah cu siangpahrang hnenah Hebron ah an ra ih, Siangpahrang David in anmahpawl thawn Hebron ah Jehovah hmaiah thukham a tuah. Cule annih in David cu Israel tlunih siangpahrang ah hriak an thih. 4 David a lal thăwk tikah amah cu kum 30 mi a si ih, kum 40 sung a lal. 5 Hebron ihsin kum sarih le thla ruk sung Judah a uk ih, Jerusalem ihsin Judah le Israel-mi zate tlunah kum 33 sung a lal.

Jerusalem Nehnak

6 Cule siangpahrang le a mipapawl cu cuih ram luahtu Jebus-mipawl do dingin Jerusalem ah an feh, cupawl cun David a lut thei lo ding ti ruatin, David hnenah, «Hi tawkah na lut lo ding, mitcaw le kebái pawl in an lo khir ding,» tiah an ti. 7 Sikhalsehla David in Zion hauhruang cu a la, cumi cu David-ih Khawpi a si.

8 Cule cuih ni ah David in, «Tikawng ihsi kai tahratih Jebus-mipawl le David rori ih huat mi kebáipawl le mitcawpawl a nehtu pauhpauh lubân le hotu ah cang seh,» tiah a ti. Curuangah annih in, «Mitcaw le keibai cu inn sungah an lut lo pei,» tiah an ti.

9 Cun David cu ralhruangkulh sungah a cêng ih, cumi cu David Khawpi tiih kawh a si. Cule David in ralhruangkulh cu Millo ihsin a sung lam a dawl. 10 Cutin David cu a ropi deuhdeuh ih, ralkap rualpawlih Pathian Jehovah cu a hnenah a um.

11 Cun Ṭaiar siangpahrang Hiram in David hnenah palaipawl a thlah ih, sidar thingkungpawl, lettamapawl le lungserthiampawl a kuat. Cule annih in David inn an saksak. 12 Cule David in Israel tlunah siangpahrang dingin amah cu Jehovah in a dĭn zo ih, a mi Israel ruangah a uknak cu a rak khaisâng zo ti a thei.

13 Cule David cun Hebron ihsi a rat hnuah, Jerusalem ihsin nusûn tam sinsin le nupi tam sinsin a nei. Fapa tam sinsin le fanu tam sinsin khal David in a nei. 14 Cun hipawl hi Jerusalem ih a hrin mi hminpawl cu an si: Shammua, Shobab, Nathan, Solomon, 15 Ibhar, Elishua, Nefeg, Jafia, 16 Elishama, Eliada le Elifelet.

Filisṭia-mipawl Duainak

17 Cun Israel siangpahrang ah David cu hriak an thih zo ti Filisṭia-mipawl in an theih tikah, Filisṭia-mipawl zaten David hawl dingin an feh. Cule David in cuih thu cu a thei ih ralhruangkulh ah a suk. 18 Filisṭia-mipawl cu an feh ih, Refaim Phaikuam ah an pharhaw. 19 Cun David in, «Filisṭia-mipawl do dingin ka so pei maw? Annih cu ka kut ah in pe pei maw?» tiin Jehovah a ráwn.

Cule Jehovah in David hnenah, «So aw, ziangahtile na kut ah Filisṭia-mipawl cu ka lo pe tengteng ding a si,» tiah a ti.

20 Cule David cu Baal Perazim ah a feh ih, cu tawkah annih cu David in a neh hai. Cule anih in, «Tilian cak bangin Jehovah in ka doralpawl cu ka hmaiah a ṭekdarhter hai,» tiah a ti. Curuangah cuih hmun cu Baal Perazim tiah hmin a sak. 21 Cule cu tawkah annih in an milimpawl an tân ta ih, David le a milaipawl in cupawl cu an thiar.

22 Cun Filisṭia-mipawl cu an păwksal lala ih, Refaim Phaikuam ah an pharhaw. 23 Curuangah David in Jehovah a ráwn ih, anih in, «Kaiso hlah uh, an dung lam ihsin anmah cu kulh uhla, thingtheihmu kungpawl hmai zawnah ra suak uh. 24 Cule hitin a si ding, thingtheihmu kungpawlih zimah feh ṭhupṭho thâwm nan theih asile zamrang zetin nám lohli uh. Ziangahtile Jehovah cu Filisṭia-mipawlih ralkappawl do dingin nan hmaiah a feh ding a si,» tiah a ti. 25 Cule David in cutivekcun Jehovah ih thu a pek vekin a tuah. Cule Filisṭia-mipawl cu Geba ihsin Gezer tiang a that vivo hai.

Jerusalem ah Kuang Thiar a Si

1 David in Israel mipapawl lak ihsi hril mi hmuahhmuah, mipa 30000 a khawmsal. 2 Cule David cu a tho ih, Judah ram ih Baale khua ihsin cherub-pawl karlakih cêng ralkap rualpawlih Jehovah hmin an putter mi Pathian Kuang cu laso dingin a hnenih mi um mi hmuahhmuah thawn a feh. 3 Cuticun Pathian Kuang cu cawlêng thar parah an ret ih, mual ih um Abinadab inn ihta an lasuak. Cule Abinadab-ih fapa Uzzah le Ahio in cawlêng thar cu an mâwng. 4 Cule mual ih um, Abinadab inn ihta cu Pathian Kuang tel cih in an la ih, Kuang hmaiah cun Ahio a feh. 5 Cun David le Israel sungza hmuahhmuah in Jehovah hmaiah far thing ih tuah mi hmanrua phunphun, ṭingṭangpawl, cawngcing, khuangtepawl, sehserpawl le sumselpawl tla an tum.

6 Cule Nakon-ih hruihhmun an thlen fangah, câwcangpawl an tal hnuaihni ruangah Pathian Kuang lamah Uzzah in a kut a suah ih, Pathian Kuang cu a rak kai. 7 Cun Jehovah thinhengnak cu Uzzah dokalhin a tho ih, amah cu Pathian in a thil tisual mi ruangah cu tawkah cun dān a tat. Cule anih cu Pathian Kuang kiangah a thi. 8 Cule Uzzah dokalhih Jehovah-ih a nasazet mi dāntatnak ruangah David cu a thin a heng, cule tuihsun ni tiangin cuih hmun cu Perez Uzzah tiah hmin a sak.

9 Cuih ni ah cun David in Jehovah cu a ṭih. Cule, «Ziangtin Jehovah-ih Kuang cu ka hnen a ra thleng thei pei?» tiah a ti. 10 David in Jehovah-ih Kuang cu amai hnen David Khawpi ah ṭhawn loin, Gath-mi Obed-Edom inn lamah a thiar sawn. 11 Jehovah Kuang cu Gath-mi Obed-Edom inn ah thla thum sung a um. Cule Jehovah in Obed-Edom le a sungkua hmuahhmuah cu a thlawsuah.

12 Cule Siangpahrang David cu, «Pathian Kuang ruangah Obed-Edom sungkua le a neih mi hmuahhmuah cu Jehovah in mal a rak sawm,» tiin an sim. Cutikah David cu a feh ih, Pathian Kuang cu Obed-Edom inn ihsin David Khawpi ah lungawi zetin a tlunpi. 13 Cule hitin a si, Jehovah Kuang zawntupawl kal ruk an kal tikah, câwcangpawl le cawmthau tuu in rai a thawi. 14 Cun David cu a theihpatawp suahin Jehovah hmaiah a lâm; cule David cu patzai fêmte ih tah mi Puithiam Kâwrcung a hruh. 15 Cun David le Israel sungza hmuahhmuah cu au phah le tuupa ki aw thawn Jehovah Kuang cu an thiar.

16 Cule hitin a si, David Khawpi sungih Jehovah Kuang a thlen laiah Saul-ih fanu Mikal in tukvirh ihsin a rak zoh ih, Siangpahrang David cu Jehovah hmaiah khir le heraw in a hmu. Cule Mikal in a thinlungten David cu a nautat.

17 Jehovah Kuang cu an la ih, David in cumi hrangih a rak phun cia mi, Biakbûk laifangih a retnak ding hmun ah cun an ret. Cun David in Jehovah hmaiah Meiur Thilhlănpawl le Remnak Thilhlănpawl a hlan. 18 Cule David in Meiur Thilhlănpawl le Remnak Thilhlănpawl hlăn a ṭheh tikah, ralkap rualpawlih Jehovah hmin in mipi thlawsuah a pe. 19 Cun amah in mipi zate lakah, Israel mi senpi pumpi lakah, mipapawl le nunaupawl cu sang hlawm khat cio, sa sem khat cio, sabit rah car hlawm khat cio a zem hai. Cule mipi an zaten mai inn cio ah an tin.

20 Cun David cu amai sungkua thlawsuah pe dingin a kir. Cule Saul fanu Mikal cu David hmuak dingin a ra suak ih, «Tuihsun ah Israel siangpahrang cu a va ropi tak em, mimumal lo pawl lakih pakhat ningzah thei loih khuhaw loih a um vekin, tuihsun ah a siahhlawhpawlih siahhlawh nunaupawl mithmuhah ^aa siangpahrang kâwrfual a phawih!» tiah a ti.

6:20^a a siangpahrang kâwrfual a phawih: A siangpahrang kâwr leng lawng a phawih.

21 Cutikah David in Mikal hnenah, «Cumi cu na pa le a sungza hmuahhmuah aiawhin i hril ih, Jehovah-ih mi, Israel tlunih uktu ih i ruattu Jehovah hmaiah a si. Curuangah Jehovah hmaiah ka hlim ding. 22 Cule himi hnakih zahpiumin ka um sinsin ding ih, keimah rori ih mithmuhah tăngdawrten ka um ding. Sikhalsehla na rel mi siahhlawh nunaupawlih upat in ka um ding,» tiah a ti. 23 Curuangah Saul fanu Mikal cu a thih ni tiang fa a nei lo.

David thawi Pathian Thukham

1 Cule hitin a si, siangpahrang cu a inn ah a cêng ih, Jehovah in a kiangkap hmuahhmuah ih a doralpawl hmuahhmuah hnen ihsin cawlhhahdamnak a pek hnuah, 2 profet Nathan hnenah siangpahrang in, «Atu ah zoh hnik, kei cu sidar thing inn sungah ka um, asinan Pathian Kuang cu puanthlam puanzar sungah a um,» tiah a ti.

3 Cun Nathan in siangpahrang hnenah, «Feh awla na thinlung sungih um hmuahhmuah in tuah thluh aw, ziangahtile Jehovah in a lo umpi a si,» tiah a ti.

4 Asinan cuih zan lala ah hitin a si, Jehovah kamsuakthu cu Nathan hnenah, 5 «Feh awla ka siahhlawh David hnenah, ‹Jehovah in hitin a ti, «Ka cēnnak dingah nang in inn i saksak ding maw? 6 Ziangahtile Izip ram ihsin Israel tefapawl ka hruaisuah ni thăwkin tuihni tiang inn ah ka cêng lo, cuhnakin Puanthlam sungah le Biakbûk sungah ka ṭhawn vivo sawn a si. 7 Israel tefapawl hmuahhmuah lakih ka fehnak i kip ah, ka mi Israel kilveng dingih thu ka pek mi, Israel hnám zo hnen talah, ‹Ziangruangah sidar thing in inn i saksak lo?› tiin ka ti dah maw?» tiah sim aw.› 8 Curuangah atu ah, ka siahhlawh David hnenah, ‹Ralkap rualpawlih Jehovah cun hitin a ti, «Tuu tlannak hmun ihta, na tuu khalh laiah, ka mipawl tlun, Israel tlunih uktu dingah ka lo la. 9 Cule na fehnak kip ah ka lo umpi ih, na hmai ihsin na doralpawl hmuahhmuah ka lo sahcatsak thluh, cule leilung parih miropipawlih hmin vekin nangmah cu hmin ropi ah ka lo tuah. 10 Cuihtlunah ka mi Israel hrangah hmun ka ruatsak hai ding ih, anmai bul hmun ah an um ih an ṭhawnawk nawn lonak dingah anmah cu ka phun hai ding. Tuih hlan vekin sualralnak fapapawl in an palbĕt nawn fawn lo ding, 11 ka mi Israel tlunih laireltupawl thu ka pek lai vek kha a si nawn lo ding ih, na doralpawl hmuahhmuah hnen ihsin ka lo cawlhahdamter ding. Jehovah in sungza lo dĭnsak dingin a lo sim fawn.

David-ih Lalram Dĭnnak

12 «Na tikcu a kim ih na pupápawl hnenih na cawlh tikah, na lehhnu ah na sung ihsi ra suak ding mi na cithlah ka tungding ding ih, a uknak ka hngetter ding. 13 Anih cun ka hmin hrangah inn a sak ding ih, a uknak laltokham cu ka hngetter kumkhua ding. 14 Kei cu a Pa ka si ding ih, amah cu ka fapa a si ding. Mawhsualnak a tuah asile, minungpawlih fungfek le minung fapapawl vuaknak hmangin amah cu nun ka sim ding. 15 Asinan na hmaiih ka ṭhawnhlo mi Saul hnen ihta ka lâk vek khan ka zahngainak in anih cu a suahsan lo ding. 16 Cule na hmaiah na sungza le na uknak cu hngehter kumkhua a si ding. Na laltokham khal hngehter kumkhua a si ding,» tiin na sim pei,› tiah a ti,» tiin Jehovah kamsuakthu a rung thleng. 17 Hih ṭawngkampawl hmuahhmuah bangtukin le hi larawknak hmuahhmuah bangtukin Nathan in David a sim.

David in Pathian a Thangṭhat

18 Cun Siangpahrang David cu a lut ih, Jehovah hmaiah a to. Cule anih in, «Maw Bawipa Jehovah, zo so maw ka si, ka sungza teh ziangso maw an si ih, hi tiangtiang ih i hruai? 19 Maw Bawipa Jehovah, cumi cu na mithmuhah cun thil fate a si. Na siahhlawhih sungkua rung um vivo dān ding thu ah hmai lam hlapi ta hrang tiang khal na rak sim cia. Maw Bawipa Jehovah himi cu milai tidān a si maw? 20 Cun David hin na hnenah ziang a simbêt thei ding? Ziangahtile nang, Bawipa Jehovah, in na siahhlawh cu na thei a si. 21 Na kamsuakthu ruangah le nangmai thinlung zulhin, hi thil ropipawl hmuahhmuah hi na siahhlawh theihter dingah na rak tuah. 22 Curuangah, Maw Bawipa Jehovah, nangmah cu na ropi a si. Ziangahtile kan hna ih kan rak theih mi hmuahhmuah bangtukin nangmah bangtuk an um lo ih, nangmah lo Pathian dang khal an um fawn lo. 23 Izip ram ihsin, miphunpawl lak ihsin le an pathianpawl lak ihsin na hrangih na tlen mi, na mipawl hmaiah nangmai hrangih thil ropi le na ram hrangih thil maksak ti dingin le amai hrangih hmin tuah dingin Pathian in amai mi ding hrangih a tlen mi, na mi Israel bangtuk leilung tlunah miphun zo so um? 24 Ziangahtile kumkhua na mi dingah nangmai hrangah na mi Israel cu na dĭn. Cule Jehovah, nangmah cu an Pathian ah na cang.

25 «Cun atu ah, Maw Jehovah Pathian, na siahhlawh thuhla le a sungza thuhla ih na rak rel mi thu cu kumkhua hngetter awla, na rak sim vekin tuah aw. 26 Cun, ‹Ralkap rualpawlih Jehovah cu Israel tlunih Pathian a si,› tiin na hmin cu kumkhua cawimawiin um seh. Cule na hmaiah na siahhlawh David sungza cu hngehter si hai seh. 27 Ziangahtile, Maw ralkap rualpawlih Jehovah, Israel Pathian, nang in na siahhlawh hnenah, ‹Sungza ka lo dĭnsak ding,› tiin na rak phuanglang zo. Curuangah na siahhlawh in hi thlacamnak hi na hnenih cām dingin a thinlung sungah a rak hmu a si. 28 Cule atu ah, Maw Bawipa Jehovah, nangmah cu Pathian na si ih, na kamsuakthupawl cu an dik, cule hi ṭhatnak hi na siahhlawh hnenah na rak tiamkam zo. 29 Curuangah atu ah, na hmaiah kumkhua umpeh vivo thei dingih na siahhlawhih sungza thlawsuah pek cu na lunghmuizawng si hram seh. Ziangahtile, Maw Jehovah Bawipa, nang in cumi cu na rak ṭawngsuak zo ih, na malsawmnak in na siahhlawhih sungkua cu kumkhuain malsawm si hai seh,» tiah a ti.

David in a Neh Vivo

1 Cumi hnuah cun hitin a si, David in Filisṭia-mipawl a do ih, a duaiter hai. Cule David cun Metheg Ammah khawpi cu Filisṭia-mipawl kut ihsin a lâk. 2 Cun Moab a neh. Lei ah hranhramin a băwkter hai ih, hri in a tah hai. Tlar hnih cu thah dingin a tah hai ih, tlar khat cu a tluanih nungih zuah dingin a tah. Cule Moab rammipawl cu David siahhlawh ah an cang ih, ngunkhuai an pe.

3 David cun Zufraṭis Tiva ah a ramṭhen la lehsal dingin a feh phahah Zobah siangpahrang Rehob fapa, Hadadezer khal a neh. 4 David in cu pa hnenin rángtothiam mipa 1700 le ke ralkap mipa 20000 a laksak. David cun lêngdir ránghmuahhmuah cu an thahri a sahcatsak ih, lêng 100 hrang cu a zuah hai.

5 Zobah siangpahrang Hadadezer bawm dingin Damaskas ih Siria-mipawl an rat tikah, David in Siria mipa 22000 a that. 6 Cun David in Siria ram ih Damaskas ah ṭanhmun kiltu ralkappawl a ret, cule Siria-mipawl cu David-ih siahhlawh ah an cang ih ngunkhuai an pe. Jehovah in David cu a fehnak kip ah a humhim. 7 Cule David in Hadadezer siahhlawhpawlih sui ralphawpawl cu a laksak hai ih, Jerusalem ah a tlŭn. 8 Cuihtlunah Hadadezer-ih khawpi, Betah le Berothai ihsi khalin Siangpahrang David cun dar tam ngaingai a la.

9 Hamath siangpahrang Toi in Hadadezer-ih ralkap zaten David in a neh thluh ti a theih tikah, 10 Toi in a fapa Joram cu Siangpahrang David cibaibûk ding le thlaza camsak dingin a thlah, ziangruangahtile anih in Hadadezer a do ih a neh, ziangahtile Hadadezer cu Toi thawn an rak doaw ṭheu. Cule Joram cun ngun thilpawl, sui thilpawl le dar thilpawl a rak sum. 11 Cupawl cu a neh mi miphunpawl hmuahhmuah hnen ihsi sui le ngun a hlăn mi thawn Siangpahrang David in Jehovah hnenah a hlan. 12 Cucu Siria hnen, Moab hnen, Ammon-mipawl hnen, Filisṭia-mipawl hnen, Amalek hnen le Zobah siangpahrang Rehob fapa Hadadezer hnen ihsi a lawn mi thil an si.

13 Cule David cu Ci Phaikuam ah Siria-mi 18000 a thahnak ihsi a ra tlun tikah amai hrangah hmin a tuah. 14 Edom ah ṭanhmun kiltu ralkappawl a ret. Edom ram pumpi hmun tin ah kiltu ralkappawl a ret ih, Edom-mi hmuahhmuah cu David-ih siahhlawh ah an cang. Cule Jehovah in David cu a fehnak kip ah a kilhim vivo.

David-ih Bawipawl

15 Cuticun David cu Israel-mi zate tlunah a lal. Cule David in a mipi hmuahhmuah hnenah diknak le dingfelnak zetin lai a rel. 16 Zeruiah fapa Joab cu ralkap hotu lubik a si, Ahilud fapa Jehoshafat cu ngankhumtu a si, 17 Ahitub fapa Zadok le Abiathar fapa Ahimelek cu puithiam an si, Seraiah cu cangantu a si, 18 Jehoiada fapa Benaiah cu Kereth-mipawl le Peleth-mipawl hotu a si ih, David fapapawl cu uktu lubik an si.

Mefibosheth parih David Ngilneihnak

1 Cule David in, «Jonathan ruangih ngilneihnak ka lăngter theinak dingah Saul sungkua lak ihsin a tāng mi zo tal an um maw?» tiah a ti.

2 Cule Saul sungkua-ih siahhlawh pakhat a hmin Ziba a um. Amah cu David hnenih an kawh tikah, siangpahrang in a hnenah, «Ziba na si maw?» tiah a ti.

Cule anih in, «Na siahhlawh ka si ko!» tiah a ti.

3 Cun siangpahrang in, «Pathian ngilneihnak a hnenih ka lăngter theinak dingah Saul sungkua zo tal an um lai maw?» tiah a ti.

Cule Ziba in siangpahrang hnenah, «Jonathan fapa kebái pakhat a um lai,» tiah a ti.

4 Cutikah siangpahrang in a hnenah, «Amah cu khuiah a um?» tiah a ti.

Cule Ziba in siangpahrang hnenah, «Ngai hnik, amah cu Lo Debar khua ah, Ammiel-ih fapa Makir-ih inn ah a um,» tiah a ti.

5 Cun Siangpahrang David in mi a thlah ih, cu pa cu Lo Debar khua ih Ammiel fapa Makir-ih inn ihta cu an va hruai. 6 Cule Saul fapa Jonathan-ih fapa Mefibosheth cu David hnenah a ra, a hmaiah a kûn ih a băwkkhup. Cun David in, «Mefibosheth,» tiah a ko.

Cule anih in, «Zoh hnik, na siahhlawh cu,» tiah a sawn.

7 Cule David in a hnenah, «Ṭih hlah, ziangahtile na pa Jonathan ruangah ngilneihnak ka lo hmuh tengteng ding ih, na pu Saul-ih ram pumpi ka lo neitersal ding. Cule ka cabuai ah rawl na ei ringring ding,» tiah a ti.

8 Cun anih cu a băwkkhup ih a hnenah, «Kei uico thi vek men, na siahhlawh hi ziangso maw a si ih na ngaihsak?» tiah a ti.

Ziba cu Mefibosheth Rian ding a Si

9 Cule siangpahrang in Saul-ih siahhlawh Ziba cu a ko ih, a hnenah, «Saul-ih thil hmuahhmuah le a sungkuapawlih thil hmuahhmuah cu na puih fapa ka pe ṭheh a si. 10 Curuangah nangmah le na fapa le na siahhlawhpawl in a hrangah lei nan lehsak pei ih, na puih fapa in ei ding a neih theinak dingah nan ṭuan rah cu nan run keng pei. Asinan na puih fapa Mefibosheth cu ka cabuai ah rawl a ei ringring pei,» tiah a ti. Ziba in fapa hleinga le siahhlawh kul a nei.

11 Cun Ziba in siangpahrang hnenah, «Siangpahrang ka bawi ih a siahhlawh thu a rak pek bangtukin na siahhlawh in a tuah ding,» tiah a ti.

«Mefibosheth bélte cu siangpahrang fapapawl lakih pakhat vekin ka cabuai ah a ei pei,» tiah siangpahrang cun a ti. 12 Mefibosheth in fapa tleirawl a nei ih, a hmin cu Mika a si. Cule Ziba sungza hnenih cêng mi hmuahhmuah cu Mefibosheth-ih siahhlawh an si. 13 Cutin Mefibosheth cu Jerusalem ah a cêng, ziangahtile anih cu siangpahrang cabuai ah a ei ve ringring. Amah cu a ke pahnih in a bái.

David in Hanun hnenah Ngilneihnak a Langter

1 Cumi hnuah hitin a si, Ammon-mipawlih siangpahrang a thi ih, a aiah a fapa Hanun in a uk. 2 Cun David in, «A pa in ka parih ngilneihnak a rak lăngter bangin, Nahash fapa Hanun parah ngilneihnak ka langter ve ding,» tiah a ti. Cun David in a hnenah a paih thuhla ah hnem dingin a siahhlawhpawl a thlah. Cule Ammon-mipawlih ram sungah David-ih siahhlawhpawl cu an va feh. 3 Cule Ammon-mipawlih tlangsuakupapawl in an bawi Hanun hnenah, «Na hnenah mihnemtupawl a rak thlah ruangah David in na pa a upat ngaingai tiah maw na ruah? David in a siahhlawhpawl hi khua zingzăwi dingin, khua thlingthla dingin le khua siatsuah dingin a run thlah hai a si lo maw?» tiah an ti.

Hanun in Thuphurtupawl a Dekcăwk

4 Curuangah Hanun in David siahhlawhpawl cu a kai hai ih, an khabe hmul a hrek faiko a ziahsak, an sinfenpawl tla a laifangin an taw tiang lawng tingin a tansak hai ih, anmah cu a thlahhlo. 5 David an sim tikah, anih in anmah hmuak dingin mi a thlah, ziangahtile a milaipawl an ning a zak tuk. Cule siangpahrang in, «Nan khahmul a sau hlanlo Jeriko ah um hrih uhla, cuihhnu ah tlung leh uh,» tiah a ti.

6 Ammon-mipawl in David-ih ngei mi ah an tuahaw ti an hmuh tikah, Ammon-mipawl cun mi an thlah ih Beth Rehob ih Siria-mipawl le Zobah ih Siria-mipawl, ke ralkap 20000 le Maakah siangpahrang hnen ihsin pacang 1000 le Ish-Tob hnen ihsin pacang 12000 cu manphalhin an kâwlruai.

Ammon-mipawl Neh an Si

7 Cuih thu David in a theih tikah, Joab le a ralkap micak hmuahhmuah cu a thlah. 8 Cun Ammon-mipawl an ra suak ih, kăwtsuah lamah ral do dingin an tlaraw. Cule Zoba le Beth Rehob ih Siria-mipawl le Ish-Tob le Maakah-mipawl cu mah te mah te in ramlak ah an um.

9 Joab in dung lam le hmai lamin an run do ding ti a hmuh tikah, Israel miṭha bikpawl mi hrekkhat a hril hai ih, Siria-mipawl dokalh zawngin a tlarawter hai. 10 Cule Ammon-mipawl do dingin a tlar ih a ret thei hainak dingah, a tāng lai mi mipi hmuahhmuah cu a unaupa Abishai kut ah a ret thluh. 11 Cun anih in, «Siria-mipawl cu ka hrangih an cak tuk asile, in bawm pei, asinan nan hrangah Ammon-mipawl an cak tuk asile, ka ra ding ih ka lo bawm ve hai ding,» tiah a ti. 12 Ralṭha zetin um uhla, kan mipi hrangah le kan Pathian khawpipawl hrangah cak zetin um uhsi. Cule Jehovah in a mithmuhih ṭha a ti mi cu tuah seh,» tiah a ti.

13 Cun Joab le a hnenih um mipi cu Siria-mipawl do dingin an va naih, cule annih cu a hmaiah an tlân. 14 Ammon-mipawl in Siria-mipawl an tlân ti an hmuh tikah, annih khal Abishai hmaiah an tlân ve ih, khaw sungah an lut. Cule Joab cu Ammon-mipawl hnen ihsin a kir ih Jerusalem ah a feh.

Siria-mipawl Neh an Si

15 Siria-mipawl in annih cu Israel in a neh zo ti an hmuh tikah, hmunkhatah an fĭnaw. 16 Cun Hadadezer in mi a thlah ih, Tiva ralkhat ih um Siria-mipawl cu a hruaisuak hai ih, Helam an thleng. Cule Hadadezer-ih ralkappawl hotu Shobak in hmai a hruai hai. 17 Cuih thu cu David an sim tikah, anih in Israel-mi zaten a fĭnkhawm ih, Jordan ralkhat an kai, cule Helam ah an feh. Cule Siria-mipawl cu David dokalhin an tlaraw ih amah cu an do. 18 Cun Siria-mipawl cu Israel hmaiah an tlân, cule David in Siria-mi ránglêng parto mi 700 le rángtothiam mi 40000 a that, an ralkap hotu Shobak khal a vuak ih, cu tawkah a thi. 19 Cule Hadadezer-ih siahhlawh ih um siangpahrangpawl hmuahhmuah in annih cu Israel in a neh zo ti an hmuh tikah, Israel thawn remawknak an tuah ih, anmah an rian. Cule Siria-mipawl in Ammon-mipawl an bawm ngam nawn lo.

Dungah David a Tāng Ta

1 Hitin a si, ^aṭhal a hung si ih, siangpahrangpawl doaw dingih an suah tikcucān ah David in Joab le a siahhlawhpawl cu Israel-mi hmuahhmuah thawn a thlah hai ih, Ammon-mipawl an that ṭheh. Cule Rabbah khua an kulh. Asinan David cu Jerusalem ah a tāng ta.

11:1^a ṭhal: Hih cān hi ló ih thlairawl tampi a um lai cān a si.

David Uiretnak

2 Cun hitin a si, nitlak zawng lamah David cu a ihkhun ihsin a tho ih, siangpahrang ^ainn tlunah a feh. Cule cuih inn tlun ihsin nunau pakhat takkhawlh lai a hmu ih, cuih nunau cu zoh mawi zet a si. 3 David cun mi a thlah ih, cuih nunau thuhla cu a zingzăwi. Cule mi pakhat in, «Hi nunau cu Heth-mi Uriah nupi, Eliam-ih fanu Bathseba a si lo maw?» tiah a ti. 4 Cun David in palaipawl a thlah ih, cu nu cu an hruai. Cule David hnenah a ra ih, David in a ihpi, ziangahtile cu nu cu a thianlonak ihsin a thian lai a si, cule cu nu cu a inn ah a tin. 5 Cule cuih nunau cu nau a pai. Cu nu in mi a thlah ih, David hnenah, «Nau ka pai,» tiah a sim.

11:2^a inn tlunah: Inn tlun hi rāwn in an tuah.

Uriah in David Thu a Lung Lo

6 Cun David in Joab hnenah, «Heth-mi, Uriah kha ka hnenah rak thlah aw tiin,» mi a thlah. Cule Joab in David hnenah Uriah cu a thlah. 7 Uriah a hnen a thlen tikah, David in Joab le mipipawl ziang an bang, ral doawknak ah teh ziang an bang, tiah a sut. 8 Cule David in Uriah hnenah, «Na inn ah tin awla, na ke khawlh aw,» tiah a ti. Cuticun Uriah cu siangpahrang inn ihsin a suak, cule amah cu siangpahrang hnen ihsin ei ding thilpek in a thlun cih. 9 Asinan Uriah cu a bawi-ih siahhlawhpawl hmuahhmuah zawngah siangpahrang inn sângka ah a it ih, a inn lamah a tin lo. 10 Cuih thu cu David hnenah, «Uriah cu a inn ah a tin lo,» tiah an sim. David in Uriah hnenah, «Khualtlawnnak ihsin na ra tlung a si lo maw? Ziangahso na inn ah na tin lo?» tiah a ti.

11 Cutikah Uriah in David hnenah, «Kuang le Israel-mipawl le Judah-mipawl cu puanthlampawl ah an cêng ih, ka bawi Joab le ka bawi-ih siahhlawhpawl cu ramlak ah ral do dingin an riak. Kei cu ka inn ah ei le in dingin le ka nupi hnenih it dingin ka tin ding maw? Na nun vekin le na thlarau a nun vekin hi thil cu ka tuah lo ding,» tiah a ti.

12 Cun David in Uriah hnenah, «Tuihsun khal hi tawkah rak hngak awla, thaisun ah ka lo fehter ding,» tiah a ti. Cutin Uriah cu Jerusalem ah cuih ni le a thaisun cu a um. 13 David in Uriah cu a ko, anih cu David hmaiah a ei ih a in, cule David in ri ko a tuah. Cule tlai ah cun a inn lamah tin loin, a bawipaih siahhlawhpawl hnenah it dingin a feh.

Uriah Thi dingih Thupeknak

14 A thaizing ah, hitin a si, David in Joab hnenah ca a ngan ih, cumi cu Uriah kut in a kuat. 15 Cule ca sungah cun, «Uriah cu vuak a si ih, a thih theinak dingah ral doawknak a luarnakbik hmun ah hmaitawngter uhla, sipsan uh,» tiin a ngan. 16 Cun hitin a si, Joab in khawpi a zohhliah laiah, miralṭha ṭha umnak tiih a theihnak hmun ah Uriah cu a ṭangter. 17 Cun cuih khawmipawl cu an suak ih, Joab cu an do. Cule David-ih siahhlawh mi hrekkhat an thi, cule Heth-mi Uriah khal a thi ve.

Doawknak Thu Simthannak

18 Cun Joab cun mi a thlah ih doawknak thuhla hmuahhmuah cu David a sim, 19 cule a palai hnenah cun, «Siangpahrang hnenah doawknak thuhla na sim ṭheh tikah, 20 siangpahrang thinlingnak suak tahratin, nan hnenah, ‹Ziangah so nan do tikah khawpi naih tukah na va pan? Phăr ihsin an lo sai ding ti nan thei lo maw si? 21 Jerubbesheth-ih fapa Abimelek kha zo in a that? Phăr ihsin nunau pakhat in riallung kûaiṭek a parah a thlak ih, Thebez ah a thi a si lo maw? Ziangruangah phăr naih tukih na va feh?› a lo ti asile, ‹Na siahhlawh Heth-mi, Uriah khal a thi ve,› na ti pei,» tiah a cah.

22 Cuticun palai cu a feh ih, a va thleng, cule Joab ih a thlahnak săn hmuahhmuah cu David a sim. 23 Cule a thlah mi palai cun David hnenah, «Mi in in neh ih, kan umnak ramlak ah in ra pan. Cun kannih in annih cu kăwtsuah tiang kan năwrsal ve. 24 Thálsaithiampawl in phăr ihsin na siahhlawhpawl cu an sai, cule siangpahrang siahhlawh hrekkhat an thi ih, na siahhlawh Heth-mi, Uriah khal a thi ve,» tiah a sim.

25 Cule David in palai hnenah cun, «Joab hnenah hitin va sim aw, ‹Hi thil hin na ^athinlung nuam loin lo umter hlah seh, ziangahtile ralnâm cun mi pakhat le a dang khal a that. Nasa sinsinin khawpi cu do uhla, tisiat uh,› tiin amah cu thape uh,» tiah a ti.

11:25^a thinlung nuam lo: A ṭawng hrampi ah, «Mithmuh ah thil ṭhalo a si,» ti a si.

David in Uriah Nupi a Ṭhi

26 Uriah nupi in a pasal Uriah a thi ti a theih tikah, a pasal cu a sûn. 27 Cule a sūnnak a ṭheh tikah, David in mi a thlah ih cu nu cu a inn ah a hruaiter, cule a nupi ah a cang ih fapa a hrinsak. Asinan David ih thil ti mi cun Jehovah lung a hmuiter lo.

Nathan in David Thiamlo a Coh

1 Cun Jehovah in David hnenah Nathan a thlah. Cule Nathan cu a hnenah a feh ih, a hnenah cun, «Khaw pakhat ah mi pahnih an um, pakhat cu milian a si ih, a dang pakhat cu mifarah a si. 2 Milianpa cun rante rual tam zet le ranpi rual tam ngaingai a nei. 3 Asinan mifarahpa cun tuufa no fate a nu pakhat a rak lei ih, a câwm, cumi siarlo zianghman a nei lo. Cule cumi cu a hnenah a falepawl thawi ṭhangliantlang a si. Cuih tuunu cun cu paih rawl a ei, a no ihta a in ih, a ṭāng sungah a zau. Cule cumi cu a hrangah fanu vek a si. 4 Cule milianpa hnenah cun khualtlawngpa pakhat a ra thleng, milianpa cun a hnenih thleng mi mikhualpa hrangih pakhat timtuah dingah amai rante rual lak ihsin le ranpi rual lak ihsin lâk siang loin, cuih mifarahpaih tuufa no a nu cu a lâk ih a hnenih thlengpa hrangah cucu a timtuah,» tiah a ti.

5 Cule David-ih thinhengnak cu nasazetin cu pa dokalhin a tho ih, Nathan hnenah, «Jehovah a nun rori vekin, cutiih rak tuahtupa cu ^aa thi tengteng ding a si! 6 Cule hivek thil a tuah ruangah le zawnruahnak a rak neih lo ruangah a tuufa no nu cu alet li in a rūl ding a si,» tiah a ti.

12:5^a a thi tengteng ding: A ṭawng hrampi ah cun, «thihnak fapa,» ti a si.

Nathan in David a Kawk

7 Cun Nathan in David hnenah, «Cu pa cu nangmah hi na si! Israel-ih Pathian Jehovah in hitin a ti, ‹Israel tlunah siangpahrang ah hriak ka lo thih ih, Saul kut ihsin ka lo runsuak. 8 Na pu-ih inn ka lo pe ih, na pu-ih nupipawl khal na kilkhawi dingah ka lo pe, cule Israel sungkua le Judah sungkua khal ka lo pe. Cule cumi cu a rak mál tuk asile, tam sinsin ka rak lo pe ding a si si! 9 Ziangruangah Jehovah thupek cu zianghman siarloin, a mithmuhah thil ṭhalo na tuah? Ralnâm in Heth-mi Uriah na that. Na nupi dingah a nupi na rak láwng ih, amah cu Ammon-mipawlih ralnâm in na that. 10 Curuangah ralnâm in na sungkua a suahsan dah lo ding, ziangahtile nang cun zianghman i rak siar lo ih, na nupi dingah Heth-mi Uriah-ih nupi na láwng,› tiah a ti. 11 Jehovah in hitin a ti, ‹Ngai hnik, nangmah dokalhin nangmai sungkua ihsin thil ṭhalo ka suakter ding. Cule na mithmuh rori ah na nupipawl ka la ding ih, na innhnen ka pe ding, cule anih in sunvâng ah na nupipawl cu a ihpi ding. 12 Ziangahtile nang in athupten na tuah, asinan kei cun cumi cu Israel-mi hmuahhmuah hmaiah, sunvâng ah ka tuah ding,› a ti,» tiah a ti.

13 Cule David in Nathan hnenah, «Jehovah parah ka rak sual a si,» tiah a ti.

Cule Nathan in David hnenah, «Jehovah in na sual cu a hlăwnhlo zo, na thi lo ding. 14 Sikhalsehla hi thil na tuahnak in Jehovah doralpawl hnenah thangsiat dingah cān remcâng zet na tuahsak ruangah, na neih lai ding mi fapa khal a thi tengteng ding,» tiah a ti. 15 Cun Nathan cu a inn lamah a tin. Cule Uriah nupi in David a hrinsak mi naute cu Jehovah in a vuak ih, naute cu a nâ.

David Fapa Thihnak

16 Curuangah David in naute hrangah Pathian a ngen, cule David cu rawl a ul ih a lut, lei ah zanvar a it. 17 Cule a sungkua ihsin upapawl an suak ih lei ihsin amah kaitho dingin a hnenah an feh. Asinan a tho duh cuang lo, an zawngah rawl khal a ei lo. 18 Cun hitin a si, a ni sarihnak ah naute cu a thi. Cule David-ih siahhlawhpawl in naute a thi tiih sim an ṭih. Ziangahtile, «Ngai hnik, naute a nun laiah a hnenah kan sim ih, kan aw zianghman a ngai lo. Ziangtin naute a thi tiah kan sim thei ding? A tuahmawhaw pang lo ding maw!» tiah an ti.

19 David in a siahhlawhpawl beaw thuktho a hmuh tikah, David in naute a thi zo ti a theithiam. Curuangah David in a siahhlawhpawl hnenah, «Naute a thi maw si?» tiah a ti hai.

Cule annih in, «A thi,» tiah an ti.

20 Cutikah David cu lei ihsin a tho, a khawlhaw ih, hriak a hnihaw, cule a hnipuan a thleng. Cule Jehovah inn sungah a lut ih Pathian a bia. Cun amai inn ah a tin. Cule a dil hai ih, a hmaiah rawl an hŭn, cule a ei. 21 Cun a siahhlawhpawl in a hnenah, «Na thil tidān hi ziangtin a si? Naute a nun laiah hmuah rawl na ul ih, na ṭap, asinan naute a thih tikah na tho ih, rawl na ei riangri,» tiah an ti.

22 Cule anih in, «Naute a nun laiah cun rawl ka ul ih, ka ṭap, ziangahtile ‹Naute a nun theinak dingah Jehovah in i zangfah tla a si thei, zo in a sim thei?› tiah ka ti. 23 Asinan atu ah cun anih cu a thi, ziangahso rawl ka ulh ding? Amah ka hruaikirsal thei ding maw? A hnenah ka feh ding, sihmansehla anih cu ka hnenah a kirsal lo ding,» tiah a ti.

Solomon Hrinnak

24 Cun David in a nupi Bathsheba cu a hnem, a hnenah a lut ih a ihpi. Cule Bathsheba cun fapa a hring ih, David in a hmin ah ^aSolomon a sak. Cule Jehovah in anih cu a duhdawt ih, 25 profet Nathan hmangin thu a cah. Jehovah ruangah David in a hmin ah ^bJedidiah tiah a sak.

12:24^a Solomon: Hebru ṭawngfáng shelomoh ti mi awsuah vek a si ih, Hebru ṭawng «hnangamdaihnak» ihsi ra a si men thei.

12:25^b Jedidiah: Jehovah-ih duh zet mi tinak a si.

Rabbah Lâknak

26 Cun Joab in Ammon-mipawlih khawpi Rabbah cu a do ih, cuih siangpahrang khawpi cu a lâk. 27 Cule Joab in David hnenah palaipawl a thlah ih, «Rabbah ka do ih, khawpi tidai ka lakngah zo. 28 Curuangah atu ah a tāng lai mi mipi cu hmunkhatah khawm uhla, khawpi dokalhin ṭanhmunkhuar uh, cule khawpi cu la uh. Culoasile keimah in khawpi cu ka la ding ih, ka hmin ka puter ding,» tiah a ti. 29 Cun David in mipi hmuahhmuah cu hmunkhatah a fĭnkhawm ih, Rabbah lamah a feh, cule cuih khua cu a do ih, a lâk. 30 Cun David in an siangpahrang lallukhum cu a lu ihsin a lâk. Cumiih rihzia cu sui talent pakhat khīng a si, lung mankhungpawl khal an tel. Cule cumi cu David lu tlunih ret a si. Cuihtlunah khawpi sungah ralthillawn tam ngaingai a lasuak. 31 Cule David in khawpi sungih um mipi cu a suahpi hai ih, thingrawtnak hluahpawl le leilehnak thir zumpawl le thir hreitlungpawl tla in hna ṭuanter dingin a ret hai ih, tlakrawh rawhnak hmun ah a fehter hai. Cuticun Ammon-mipawlih khawpipawl hmuahhmuah cu a tuah thluh. Cun David le a mipi hmuahhmuah cu Jerusalem ah an tlungkir.

Amnon le Tamar

1 Cumi hnuah David fapa Absalom in duhnungza farnu a nei, a hmin cu Tamar a si. Cule cu nu cu David fapa Amnon in a duh. 2 Amnon cu a farnu Tamar ruangah cun nasazetin a van a sâng ih, a nâ, ziangahtile anih cu fala him a rak si. Cule Tamar parih thil ziang simaw tuah cu Amnon hrangah cun ti ci a si lo. 3 Asinan Amnon in rualpi pakhat a nei ih, a hmin cu Jonadab a si, David-ih unaupa Shimeah-ih fapa a si. Jonadab cu mihrăwkhrawl zet a si. 4 Cule Jonadab cun Amnon hnenah, «Nang siangpahrang fapa rori, ziangruangah ni khat hnu ni khat na ṭawl deuhdeuh? I sim lo ding maw?» tiah a ti.

Amnon in a hnenah, «Ka unaupa Absalom farnu Tamar ka duh,» tiah a ti.

5 Cutikah Jonadab in a hnenah, «Na ihkhun ah it awla, mina bangin um awter aw. Cule lo veh dingin na pa a rat tikah a hnenah, ‹Zangfahten ka farnu Tamar ra sehla, rawl i pe seh, cule a timlam mi rawl cu ka hmu ih a kut ihta ka ei theinak dingah, ka mithmuhah rawl i timlamsak seh,› ti aw,» tiah a ti. 6 Cun Amnon cu a it ih a naawter. Cule amah veh dingih siangpahrang a rat tikah Amnon in siangpahrang hnenah, «Zangfahten ka farnu Tamar ra sehla, a kut ihsin ka ei theinak dingah ka mithmuhah sangper pahnih i tuahsak seh,» tiah a ti.

7 Cule David in Tamar-ih inn ah, «Na ṭapa Amnon teih inn ah atu ah va feh awla rawl timtuahsak aw,» tiin thu a cah. 8 Cule Tamar cu a ṭapa Amnon inn ah a feh, Amnon cu a it. Cun Tamar in sangphŭt cu a la ih, a kut in a nâwng, cule a mithmuhah sangperpawl a tuah ih, a káng. 9 Cule Tamar in khēngdau cu a la ih, sangperpawl cu Amnon hmaiah a ret, asinan a ei duh lo. Cun Amnon in, «Mi hmuahhmuah in i suahsan thluh hai seh,» tiah a ti. Cule an zaten a hnen ihsin an suak thluh. 10 Cun Amnon in Tamar hnenah, «Na kut ihta ka ei theinak dingah rawl cu ihnak pindan sungah rak keng aw,» tiah a ti. Cule Tamar in a tuah mi sangperpawl cu a keng ih, a ṭapa Amnon hnenah ihnak pindan sungah cun a kenglut. 11 Tamar in ei dingah Amnon hnenih a hei ken tikah amah cu a rak kai ih, a hnenah, «Ra aw, ka hnenah it aw, ka farnu,» tiah a ti.

12 Cule anih in, «It lo e, ka ṭapa, i hnek hlah aw, ziangahtile Israel lakah hivek hi ti ding a si lo. Hi mualphoza thil cu tuah hlah aw! 13 Cule kei in ka mualphonak cu khuiah ka heih ding? Nang khal Israel mi-âpawl lakih pakhat vek na si ding. Curuangah zangfahten atu ah siangpahrang sim aw, ziangahtile anih in nangmah neih ding i dawn lo ding,» tiah a ti. 14 Sikhalsehla, Amnon cun Tamar-ih ṭawng cu a ngai lo ih, amah hnakih a cahdeuh ruangah Amnon in Tamar cu a nâm ih, a ihpi.

15 Cun Amnon in amah cu nasazetin a hua leh, a huatnak cu a duh laiih a duh dohdoh hnak hmanih nasain a hua. Cule Amnon in a hnenah, «Tho awla, tlânhlo aw,» tiah a ti.

16 Cutikah Tamar in a hnenah, «Si lamlam hlah, hi i dawihlohnak thil ṭhalo hi ka parih na rak tuah zo mi a dang hnakin a ṭha lo sawn a si,» tiah a ti. Asinan anih in Tamar cu a ngaithla lo. 17 Cun amah riantu a siahhlawh cu a ko ih, «Hi nu hi ka hnen ihsin dawisuak awla, a dung ihsin sângka kalh aw,» tiah a ti. 18 Tamar cun kâwrfual răwng phunphun nei a hruh, ziangahtile cuvek hnipuan cu siangpahrang fanu fala himpawl in an hruk ṭheu. Cule a siahhlawh cun Tamar cu lengah a suah ih, a dung ihsin sângka a kalh.

19 Cun Tamar in a lu parah vutcâm a phulh ih, a parih um răwng phunphun nei a kâwrfual cu a thlek, cule a lu parah a kut a suang ih, nasazetih ṭap phahin a fehsuak. 20 Cule a ṭapa Absalom in a hnenah, «Na ṭapa Amnon in a lo ihpi maw si? Asinan daiten um men aw, ka farnu. Anih cu na ṭapa a si, hi thil cu na thinlung ah ret duh hlah,» tiah a ti. Cuticun Tamar cu a ṭapa Absalom inn ah ngui zetin a um ta. 21 Asinan cuih thil hmuahhmuah cu David siangpahrang in a theih tikah a thin a heng tuk. 22 Cule Absalom in a unaupa Amnon hnenah a sia siseh, a ṭha siseh, zianghman a rel lo. Ziangahtile a farnu Tamar a nám ruangah Amnon cu Absalom in a hua.

Absalom in Amnon a That

23 Cule hitin a si, kum hnih pumhlum a liam hnuah, Efraim kiang Baal Hazor ah Absalom in tuu hmul mettupawl a nei. Cule Absalom in siangpahrang fapapawl hmuahhmuah a sawm. 24 Cun Absalom cu siangpahrang hnenah a ra ih, «Zoh hnik, na siahhlawh in tuu hmul mettupawl a nei. Zangfahten siangpahrang le a siahhlawhpawl cu na siahhlawh hnenah feh ve hai seh,» tiah a ti.

25 Asinan siangpahrang in Absalom hnenah, «Si lo e, ka fapa, kan zaten kan feh lo pei, culoasile kannih cu na phurrit ah kan cang pang ding,» tiah a ti. Cun Absalom in siangpahrang cu a ngen nasa nân, siangpahrang cu a feh cuang lo. Cule David in anih cu mal a sawm.

26 Cun Absalom in, «Cuti asilole, ka unaupa Amnon kha kan hnenah feh ve seh,» tiah a ti.

Cule siangpahrang in a hnenah, «Ziangruangah na hnenah a feh ve ding?» tiah a ti. 27 Asinan Absalom in siangpahrang cu a ngen ih, anih in Amnon le siangpahrang fapapawl hmuahhmuah cu a hnenah a fehter thluh.

28 Cule Absalom in a siahhlawhpawl cu, «Atu ah thlingthla hnik uh, Amnon-ih thinlung cu sabitzu thawi a năwmawk tikah, nan hnenah, ‹Amnon vaw uh,› ka ti tikah amah cu that uh. Ṭih hlah uh. Thu ka lo pe a si lo maw? Ralṭha zetin um uhla, ngam uh,» tiah thu a pe hai. 29 Cuticun Absalom ih thu a rak pek hai vekin, Amnon parah Absalom-ih siahhlawhpawl in an tuah. Cun siangpahrang fapapawl zaten an tho ih, anmai lākrang cio parah toin an tlân.

30 Cule hitin a si, lamzin ih an um laiah, cuih thuthang cu David hnenah, «Absalom in siangpahrang fapapawl hmuahhmuah a that ih, pakhat hman an tâng lo,» tiin a thleng. 31 Cutikah siangpahrang cu a tho ih, a sinfen a thlek, lei ah a băwk, cule a siahhlawhpawl hmuahhmuah cu an hnipuan thlekin a kiangah an ding. 32 Cun David-ih unaupa Shimeah fapa Jonadab in a sâng ih, «Ka bawi in siangpahrang fapa tlangval hmuahhmuah cu an that ṭheh a si ti cu zum hlah seh, ziangahtile Amnon lawng a thi a si. Ziangahtile a farnu Tamar a nâm ni thăwkin Absalom in hitiih ti dingin a rak ruat cia zo. 33 Curuangah ka bawi, siangpahrang in siangpahrang fapapawl hmuahhmuah cu an thi ti zumin a thinlung ah hi thil cu ret hlah seh. Ziangahtile Amnon pakhat lawng a thi a si,» tiah a ti.

Geshur ah Absalom a Tlân

34 Cun Absalom cu a tlânhlo. Cule ralvengtu tlangval in khuacuanin a zoh. Cule zoh hnik, a dung lamih tlang sir lamzin ihsin mi tampi an ra luihlo. 35 Cule Jonadab in siangpahrang hnenah, «Zoh hnik, siangpahrang fapapawl cu an ra rero lai, na siahhlawh ih a sim vek khan a si taktak,» tiah a ti. 36 Cun hitin a rak si, a ṭawng a cem leveten, zoh hnik, siangpahrang fapapawl cu an ra thleng, cule an aw an suah ih an ṭap. Siangpahrang le a siahhlawhpawl khal nasazetin an ṭap ve. 37 Asinan Absalom cu Geshur siangpahrang Ammihud-ih fapa Talmai hnenah a tlân. Cule David in a fapa cu ni tin a ṭah. 38 Absalom cu a tlân ih, Geshur ah a feh, cule cu tawkah kum thum a um. 39 Cule Siangpahrang David cun Absalom hnenih feh a duh tuk. Ziangahtile Amnon thuhla ah amah cu hnĕm a rak si zo, ziangruangahtile Amnon cu a thi zo.

Joab-ih Khawkhannak

1 Zeruiah fapa Joab in siangpahrang thinlung in Absalom a ngaituah ti a thei. 2 Cule Joab in Tekoah khawmi a thlah ih, cutawk ih nunau fim pakhat cu a hruaiter, cule a hnenah, «Zangfahten lusûn bangin um awter awla, lusûn hnipuan hruh aw. Hriak thihaw loin, reipi mithi sūn nunau vekin um aw. 3 Cule siangpahrang hnenah feh awla, a hnenah hitin thu na va sim pei,» tiah a ti. Cule Joab in a kâ sungah thu a ret.

4 Cule Tekoah nunaunu in siangpahrang hnenih thu a sim tikah lei lam hawiin a tlu ih a băwkkhup, cule, «Maw siangpahrang, i bawm hram aw,» tiah a ti.

5 Cun siangpahrang in a hnenah, «Na harsatnak ziang a si?» tiah a ti. Cule anih in, «Keimah cu nuhmei taktak ka si, ka pasal cu a thi zo. 6 Atu ah na sálnu hin fapa pahnih a nei, cule an pahnih in ramlak ah pakhat le pakhat an sualaw ih, zohman ṭhentu an um lo ih, pakhat in a dang pakhat cu a vuak ih, a that. 7 Cule zoh hnik, an sungkurûn in na siahhlawhnu dokalhin an rak tho ih, annih in, ‹A unaupa thattu cu a unaupa a thah ruangah kan thah ve theinak dingah suah aw. Cule rosartu ding khal kan hlorálter ding,› tiah an ti. Cuticun a tāng mi ka meiling cu an mitter ding ih, leilung tlunah ka pasal cu hmin nei lo le cithlah tângtu nei loin a um ding,» tiah a ti.

8 Cutikah siangpahrang in nunaunuih hnenah, «Na inn ah tin awla, na thuhla ah thu ka pe ding,» tiah a ti.

9 Cule Tekoah nunaunu in siangpahrang hnenah, «Ka bawi, Maw siangpahrang, mawhsualnak cu ka par le ka paih sungkua parah tla ko sehla, siangpahrang le a laltokham cu mawh nei loin um seh,» tiah a ti.

10 Cule siangpahrang in, «Zokhal na hnenih ziang simaw a ṭawngtu cu ka hnenah rak hruai hai awla, a lo dai nawn lo ding,» tiah a ti.

11 Cun nunaunu in, «Thisen suahtupawl parah phuba latupawl in tihlorál nawn lo dingin, zangfahten siangpahrang in Jehovah na Pathian cîng ringring seh, culoasile ka fapa hi an hlorálter pang ding,» tiah a ti.

Cule anih in, «Jehovah a nun rori vekin, na fapaih sám phang khat hman lei ah a tla lo ding,» tiah a ti.

12 Curuangah nunaunu in, «Zangfahten, na siahhlawhnu hin ka bawi siangpahrang hnenah a dang ṭawngkam hun ṭawng hrih seh,» tiah a ti.

Cule anih in, «Ṭawng ko aw,» tiah a ti.

13 Cule nunaunu in, «Cuti asile ziangruangah Pathian mipawl dokalhin hitivekih ti na tum? Siangpahrang in a mi dawi mi a tlunkirtersal lo ruangah siangpahrang cu mawhnak nei mi vekin hi thil hi a ṭawng a si. 14 Ziangahtile kan thi tengteng ding ih, lei parih tidai bung mi ruhkirsal thei lo vek kan si. Pathian in nunnak hi a lahlo a si lo, cuhnakin a dawi mipawl cu a hnen ihsin dawihlo an si lan ta lonak dingah rem a ruat hi a si sawn. 15 Cule atu ah, mipi in ṭih ko in tuah ruangah hi thu lo sim dingin siangpahrang ka bawi hnenah ka ra a si. Cule na siahhlawhnu in, ‹Siangpahrang hnenah ka sim phawt hnik ding, siangpahrang in a siahhlawhnuih dilnak cu a tuahsuak mahna. 16 Ziangahtile siangpahrang in keimah le ka fapa hi hmunkhatih Pathian ro co lo dingih tihlorál tumtu kut ihsin a siahhlawhnu hi a hna in a thei ding ih a runsuak ding,› tiah a ti. 17 Cule na siahhlawhnu in, ‹Ka bawi siangpahrang-ih ṭawngkam cu hnemawknak si hram seh, ziangahtile ka bawi siangpahrang cu a sia le a ṭha thleidănnak ah Pathian vancungmi vek a si. Cule Jehovah na Pathian in lo umpi seh,› a ti,» tiah a ti.

18 Cun siangpahrang in a sawn ih, nunaunuih hnenah, «Zangfahten ka lo suh mi ziangkhal ka hnen ihsin thup hram hlah aw,» tiah a ti.

Cule nunaunu in, «Zangfahten, siangpahrang ka bawi cu ṭawng seh,» tiah a ti.

19 Cutikah siangpahrang in, «Hi thu hmuahhmuah ah hin na hnenah Joab-ih kut a tel maw?» tiah a ti.

Cule nunaunu in a sawn ih, «Ka bawi siangpahrang, na nun bangin, ka bawi siangpahrang ih a rak sim mi ihsin, zohman in keh lamah simaw, vawrh lamah simaw an pialsan thei lo. Ziangahtile na siahhlawh Joab in thu i rak pe ih, hi thu hmuahhmuah hi na siahhlawhnuih kâ ah a ret. 20 Thuhla umtudān dangawter deuh dingin hi thil cu na siahhlawh Joab in a rak tuah a si. Asinan ka bawi cu leilung tlunih thil um mi tinkim thei dingin, Pathian vancungmi-ih fimnak bangtukin a fim a si,» tiah a ti.

21 Cule siangpahrang in Joab hnenah, «Zoh hnik, hi thil hi ka tuah a si. Curuangah feh awla, tlangval Absalom hruaikirsal aw,» tiah a ti.

Absalom Kirsalnak

22 Cun Joab cu lei lam hawiin a tlu ih a băwkkhup, cule siangpahrang hnenah lungawi thu a sim. Cule Joab in, «Maw siangpahrang, ka bawi, siangpahrang in a siahhlawhih dilnak cu a hlawhtlinter ruangah tuihsun ah na siahhlawh hin na mithmuhah duhsaknak ka co ti ka thei,» tiah a ti. 23 Joab cu a tho ih Geshur ah a feh, cule Jerusalem ah Absalom a rak hruai. 24 Cule siangpahrang in, «Anih cu amai inn ah kir sehla, ka hmel i hmu hlah seh,» tiah a ti. Cutin Absalom cu amai inn ah a tin ih, siangpahrang hmel a hmu lo.

David in Absalom a Ngaidam

25 Cun Israel hmuahhmuah lakah Absalom tlukih a mawi ruangih simfak mi zohman an um lo. A ke zaphak ihsin a lu ih lallukhum tiang amah ah sawisel ding a um lo. 26 Cule a lu ih sám a meh tikah, kum cem zawngah a met ṭheu, ziangruangahtile a parah a sám cu a rit tuk, a meh tikah, a lu ih sám cu siangpahrang ^akhīngkhainak ih a thlai tikah shekel 200 a rit. 27 Cun Absalom in fapa pathum le fanu pakhat a nei ih, a fanu hmin cu Tamar a si. Amah cu nunau pian mawi zet a si.

14:26^a khīngkhainak: A ṭawng hrampi ah, «lung» ti a si.

28 Cule Absalom cu Jerusalem ah kum hnih sung a cêng nân, siangpahrang hmel a hmu lo. 29 Curuangah Absalom in siangpahrang hnenih amah thlah dingin Joab a cah, asinan anih cu a hnenah a ra lo. Cule a vei hnihnak a cah leh ih, a ra cuang lo. 30 Cutikah a siahhlawhpawl hnenah, «Zoh hnik uh, ka kiangah Joab-ih ló a um ih, cu tawkah barli sangvut a nei, feh uhla cuih ló cu meisa in duah uh,» tiah a ti hai. Cule Absalom-ih siahhlawhpawl in cuih ló cu meisa an duah.

31 Cun Joab cu a tho ih, Absalom inn ah a feh, cule a hnenah, «Ziangruangah na siahhlawhpawl in meisa in ka ló an duah?» tiah a ti.

32 Cule Absalom in Joab cu, «Zoh hnik, ‹Siangpahrang hnenah ka lo thlah theinak dingah hi tawkah ra aw, «Ziangruangah so Geshur ihsin ka ra tlun? Cu tawkah rak um hrih men ningla ka hrangah a ṭhasawn ding nân,»tiih va sim dingah,› tiin na hnenah mi ka rak thlah kha. Curuangah atu ah, siangpahrang hmel cu hmu ko ning, asinan keimah ah mawhsualnak a um asile, anih in i that ko seh,» tiin a sâng.

33 Cule Joab cu siangpahrang hnenah a feh ih a sim. Cun siangpahrang in Absalom cu a ko ih, a hnenah a ra, cule siangpahrang hmaiah leisin bihin a băwkkhup. Cule siangpahrang in Absalom cu a hnam.

Absalom Helnak

1 Cuihhnu ah hitin a si, Absalom in ránglêngpawl, rángpawl le a hmaiih tlântu ding mipa 50 a timtuah. 2 Cun Absalom cu zing zetin a tho ih, kăwt luhnak zin kiangah a ding, cule hitin a si, thuṭhennak tuahsak dingin siangpahrang hnenih thubuai run thlentu pauhpauh cu Absalom in a hnenah a rak ko hai ih, «Khui khawmi na si?» tiah a ti. Cule anih in, «Na siahhlawh cu Israel hnámpawl lakih hnám pakhat a si,» tiah a ti. 3 Cun Absalom in a hnenah, «Zoh hnik, na thuhla cu a ṭha ih a dik, asinan siangpahrang lam ihsin lo ngaithlatu ding an um lo,» tiah a ti. 4 Cuihtlunah Absalom in, «Kei hi hi ram ah laireltu ih tuah si ta hnik ningla maw, lungkimlonak nei le thubuai nei pauhpauh cu ka hnenah an ra ding, cun kei in an hnenah diknak ka pe hai ding,» tiah a ti. 5 Cule hitin a si, zokhal a hnenih kûn dingih an ra naih tiktikah a kut a suah ih, a kai ih, a hnam. 6 Cutivekcun Absalom in siangpahrang hnenih lairelsak dingih ra Israel-mi hmuahhmuah parah a rak tuah. Cutin Absalom in Israel mipapawlih thinlung cu a fir.

7 Cule hitin a si, ^akum 4 hnuah Absalom in siangpahrang hnenah, «Zangfahten Hebron ih Jehovah hnenih ka tuah mi thutiam hlĕnsuak dingah i fehter aw. 8 Ziangahtile na siahhlawh hin Siria ram Geshur ih ka um laiah, ‹Jehovah in Jerusalem ih i hruaisal taktak asile, Jehovah ka rian ding,› tiin thutiam a tuah a si,» tiah a ti.

15:7^a kum 4 hnuah: Masoretic text ah cun kum 40 ti a si.

9 Cule siangpahrang in a hnenah, «Hnangamten feh aw,» tiah a ti. Cuticun anih cu a tho ih, Hebron ah a feh.

10 Cun Absalom in, «Tuupa ki tawtawrawt awn nan theih leveten, ‹Absalom cu Hebron ah siangpahrang a si,› nan ti pei,» tiin Israel hnám hmuahhmuah hnenah thlingthlatupawl a rak thlah. 11 Cule Absalom hnenah a mi sawm mi, mipa 200 Jerusalem ihsin an ra ve ih, lung thiangten an feh ih, zianghman an rak thei lo. 12 Cun Absalom in raithawinakpawl a hlăn laiah, Gilon-mi Ahithofel, David-ih thurawnpetu cu, a khua Giloh ihta a cah. Cule phiarawknak cu a nasa deuhdeuh, ziangahtile Absalom hnenih mipi cu mipum an pung vivo.

Jerusalem ihsin David a Tlânsuak

13 Cule, «Israel mipapawlih thinlung cu Absalom lamah a um,» ti simin David hnenah palai pakhat a ra thleng.

14 Cule David in Jerusalem ih a hnenih um a siahhlawhpawl hmuahhmuah hnenah, «Tho uhla, tlân uhsi, culole Absalom hnenin kan luat lo ding. Păwksuak dingin hmanhmawh uh, culoasile hmakhatteah in man ding ih, kan parah siatnak a thlengter ding, cule ralnâm hriam in khua hi a run do pang ding,» tiah a ti.

15 Cule siangpahrang siahhlawhpawl in siangpahrang hnenah, «Zoh hnik, kannih cu na siahhlawh kan si, ka bawi siangpahrang in a hril mi ziangkhal tuahsuak dingin kan tiar a si,» tiah an ti. 16 Cun siangpahrang cu a suak ih a sungkuapawl hmuahhmuah in a dung ihsin an thlun. Asinan siangpahrang in inn hngaktu dingah nunau pahra, nusûnpawl cu a tān ta. 17 Cule siangpahrang cu a suak ih mi hmuahhmuah in a dung ihsin an thlun, cule inn pawnta bik ah an cawl. 18 Cun a siahhlawhpawl hmuahhmuah cu a hmaiah an lan, cule Kereth-mi hmuahhmuah, Peleth-mi hmuahhmuah le Gath-mi hmuahhmuah, mipa 600 Gath khua ihsin amah thluntupawl cu siangpahrang hmaiah an lan.

19 Cun siangpahrang in Gath-mi Ittai hnenah, «Ziangah so kan hnenih na feh ve? Kir awla siangpahrang hnenah um aw. Ziangahtile nang cu ram dang mi na si ih, nangmai hmunram ihsi dawi mi na si fawn. 20 Mizan lawngih ra na si ih, tuihsun ah kan zawngah a suk le a so ah ka lo vâkter ding maw? Ziangahtile khuiah ka feh ding ti ka thei lo, kir awla, na unaupawl hi hruaikir aw. Ngilneihnak le thutak in lo umpi seh,» tiah a ti.

21 Cule Ittai in siangpahrang hnenah a sawn ih, «Jehovah a nun rori bangin le ka bawi siangpahrang a nun bangin, thungaiten ka bawi siangpahrang umnak kip ah thih le thih a si ding ih, nun le nun a si ding, cutawk khalah na siahhlawh hi a um ve ding,» tiah a ti.

22 Cutikah David in Ittai hnenah, «Feh awla, tánkai aw,» tiah a ti. Cun Gath-mi Ittai cu a mipapawl hmuahhmuah le a hnenih um nauhakpawl hmuahhmuah thawn an tánkai. 23 Cule ram pumpi in aw ring zetin an ṭap ih, mipi zaten an tánkai. Siangpahrang amah rori khal ramṭhing lamzin lam panin Kidron Tivate cu a tán, cule mipi hmuahhmuah khal in an tánkai ve.

Zadok Kirsalnak

24 Cule zoh hnik, Zadok khal, a hnenih Levi-mi hmuahhhmuah thawn, Pathian Thukham Kuang zawnin a ra ve. Cule Pathian Kuang cu an ṭhum ih, mipi hmuahhmuah in khua an suahsan kim thluh tiangin, Abiathar cu a so. 25 Cun siangpahrang in Zadok hnenah, «Pathian Kuang cu khaw sungah zawnkir uh. Jehovah mithmuhah duhsaknak ka hmuh asile, anih in i hruaikir leh ding ih, cuih Kuang le amai cēnnak hmun i hmuh leh ding. 26 Asinan anih in, ‹Nangmah ah lungsinak ka nei lo,› tiih a ti asile, zoh hnik, hi tawkah hin ka um ko, ṭha a ti vek cio in ka parah tuah ko seh,» tiah a ti. 27 Siangpahrang in puithiam Zadok hnen khalah, «Nangmah cu ^ahmutu na si lo maw? Na fapa pahnih, na fapa Ahimaaz le Abiathar fapa Jonathan thawn khawpi sungah hnangamten kir uh. 28 Zoh hnik, kei cu na hnen ihsin thuhla in run theihter hlanlo ramṭhing phaikuam in ka rak lo hngak ringring ding,» tiah a ti. 29 Curuangah Zadok le Abiathar in Jerusalem ah Pathian Kuang cu an zawnkir. Cule annih cu cu tawkah an um ta.

15:27^a hmutu: Profet kawhnak hmin dang a si.

Ahithofel cu Miphiarsawmtu a Si

30 Cun David cu Olif Tlang kainak ah a so vivo ih, a soh phahin a ṭap, cule a lu a khuh ih a ke lawngin a feh. Cule a hnenih um mipi hmuahhmuah khal an lu an khuh ih, ṭap phahin an feh vivo. 31 Cun mi pakhat in David cu, «Ahithofel cu Absalom lamah ṭangin miphiartupawl lakah a tel ve,» tiin a sim. Cule David in, «Maw Jehovah, Ahithofel-ih thurawnpek cu atnak ah cangter dingin ka lo ngen a si,» tiah a ti.

32 Cun hitin a rak cang, David cu tlang zim a hung thlen tikah Pathian a bia. Cule zoh hnik, Arki-mi Hushai in a kâwrfual thlekin le a lu ah leivut phulhin David hmuak dingin a ra. 33 David in a hnenah, «Ka hnenih na feh vivo asile, ka hrangah phurrit na si ding. 34 Hmansehla khaw sungah kir tahratin Absalom hnenah, ‹Maw siangpahrang, na siahlawh ka si ding, hi hlanih na paih siahhlawh ka rak si vekin, atu khalah nangmai siahhlawh ka si ding,› tiih na ti asile, ka hrangah Ahithofel-ih thurawnpek cu na neh khal a si thei. 35 Cule cu tawkah na hnenah puithiam Abiathar le Zadok khal an um a si lo maw? Curuangah hitin a si ding, siangpahrang inn ihsi na theih mi ziangkhal puithiam Zadok le Abiathar na sim ṭheu hai pei. 36 Ngai hnik, an fapa pahnih Zadok-ih fapa Ahimaaz le Abiathar-ih fapa Jonathan khal an hnenih an um ve kha, na theih mi tinkim cu anmah hmangin i rak kuat pei,» tiah a ti. 37 Cuticun David-ih rualpi Hushai cu khawpi sungah a lut. Cule Absalom cu Jerusalem ah a lut.

Mefibosheth-ih Siahhlawh

1 Cun David cu tlang zim málte a lan tikah, ngai hnik, dăm mi lāk pahnih thawn, an parah sangper 200, sabit rah car bawr 100, ṭhâl thing rah pum 100 le sabitzu thâwl khat phurterin Mefibosheth-ih siahhlawh Ziba cun David cu a rak hmuak. 2 Cule siangpahrang in Ziba hnenah, «Hipawl hi ziang na ti duhnak an si?» tiah a ti.

Cutikah Ziba in, «Lākpawl cu siangpahrang sungkua to dingah, sang le ṭhâl thing rah cu tlangvalpawl ei dingah, cule sabitzu cu ramṭhing ih thacempawl ih in dingah a si,» tiah a ti.

3 Cun siangpahrang in, «Na pu Saul-ih fapa cu khuiah a um?» tiah a ti.

Cule Ziba in siangpahrang hnenah, «Ngai hnik, Mefibosheth cu Jerusalem ah a um, ziangahtile anih cun, ‹Tuihsun ah Israel sungkuapawl in ka paih uknak ka hnenah in pe lehsal ding,› a ti,» tiah a ti.

4 Cule siangpahrang in Ziba hnenah, «Ngai hnik, Mefibosheth-ih ta hmuahhmuah cu na ta an si,» tiah a ti.

Cule Ziba in, «Na mithmuhih duhsaknak ka co theinak dingah tăngdawrten na hmaiah ka kûn a si, ka bawi, Maw siangpahrang!» tiah a ti.

Shimei in David a Camsiat

5 Cun Bahurim khua ih Siangpahrang David a thlen tikah, ngai hnik, Saul sungkua ih innsungsang ihsin mi pakhat, Gera fapa a hmin Shimei cu cutawk ihsin a ra suak. Anih cun feh phahin a camsiat vivo. 6 Cule anih in David le Siangpahrang David-ih siahhlawhpawl hmuahhmuah cu lungto in a deng hai. Cule mipi hmuahhmuah le micakpawl hmuahhmuah cu David-ih vawrh lamah le a keh lamah an um. 7 Cun Shimei in a camsiat tikah hitin a ti fawn, «Tlânsuak aw! Tlânsuak aw! Nang thisensuahhmangpa le nang misantlailopa! 8 A uk aiih na rak uknakpa Saul sungkua thisen hmuahhmuah cu na parah Jehovah in a run thlenter ih, Jehovah in na fapa Absalom hnenah uknak a pe zo. Cule zoh hnik, nangmah cu thisensuahhmangpa na si ruangah nangmai thil ṭhalo ah nangmah cu kaihtān na si,» tiah a ti.

David in Abishai a Êl

9 Cun Zeruiah fapa Abishai in siangpahrang hnenah, «Ziangruangah himi uico thi hin ka bawi siangpahrang cu a camsiat? Zangfahten va feh in, a lu va la ning,» tiah a ti.

10 Asinan siangpahrang in, «Nannih Zeruiah fapapawl, nannih le kei hi ziang pehtlaihawknak so kan neih? Jehovah in a hnenah, ‹David camsiat aw,› a ti ruangih camsia a si ahcun, ‹Ziangruangah cuvekih na tuah?› tiah zo in a ti thei ding?» tiah a ti.

11 Cule David in Abishai le a siahhlawhpawl hmuahhmuah hnenah, «Zoh hnik uh, ka fapa, ka taksa rori ihsi suak cun ka nunnak a hawl. Ziang tlukin hi Benjamin-mi cun a hawl sinsin pei? Zianghman ti hlah uh, camse ko seh, ziangahtile Jehovah in a rak fial a si. 12 Jehovah in ka harsatnak hi a run zoh ding ih, Jehovah in tuihsun ih a camsiatnak hi ṭhatnak thawn in rak rūl leh tla a si thei,» tiah a ti. 13 Cule David le a mipawl cu lamzin ah an feh vivo ih, Shimei cu David-ih ralden tlang sirin a feh vivo, a feh phahin a camse rero, lungto in David a deng thūl ih, leivut tla a sit. 14 Cun siangpahrang le a zawngih um mipi hmuahhmuah cu an cau. Cule cu tawkah anmah le anmah an tha an tharawter.

Ahithofel-ih Thurawnpeknak

15 Cu laifangah Absalom le mipi zate, Israel mipapawl cu Jerusalem an thleng, Ahithofel cu an zawngah a tel ve. 16 Cule hitin a si, David-ih rualpi Arki-mi Hushai cu Absalom hnenih a feh tikah, Hushai in Absalom hnenah, «Siangpahrang a nunkhua sau hram seh! Siangpahrang a nunkhua sau hram seh!» tiah a ti.

17 Cutikah Absalom in Hushai hnenah, «Himi hi na rualpa parih na rinumnak cu a si maw? Ziangah na rualpa zawngih na rak feh lo?» tiah a ti.

18 Cule Hushai in Absalom hnenah, «Si lo e, Jehovah le hi mipipawl le Israel mipapawl hmuahhmuah ih an hril mi thuthu in ka um sawn ding ih, a hnenah ka kăwp ding. 19 Cuihleiah, zo ka rian cuang ding? A fapa hmaiah rawng ka bawl lo ding maw? Na pa hmaiih rawng ka bawl vekin, na hmaiah ka bawl ding a si,» tiah a ti.

20 Cun Absalom in Ahithofel hnenah «Ziang kan tuah ding ti thurawn in pe aw,» tiah a ti.

21 Cule Ahithofel in Absalom hnenah, «Inn hngaktu dingih a rak tān ta mi na paih nusûnpawl hnenah va ^alut aw. Cule Israel hmuahhmuah in nangmah cu na pa in a lo fih ti an hna in an thei ding. Cun na hnenih ṭang hmuahhmuah pawlih kut cu a cak ding,» tiah a ti. 22 Cuticun Absalom hrangah ^binn tlunah puaninn an zarsak ih, Absalom cu Israel hmuahhmuah ih mithmuhah a paih nusûnpawl hnenah a ^clut. 23 Cule cu lai cān ih a rak pek mi, Ahithofel-ih thurawnpek cu Pathian ṭawngkam thurawnpek mi vek a si, cutivekcun Ahithofel-ih thurawnpek mi hmuahhmuah cu David le Absalom in an ruat a si.

16:21^a lut: Ihpi tinak a si.

16:22^b inn tlunah: 11: 2 simfiangnak zoh aw.

16:22^c lut: Câng 11 simfiangnak zoh aw.

1 Cuihtlunah Ahithofel in Absalom hnenah, «Mipa 12000 ka hril ding, cule tuihzan ah ka tho ding ih, David ka dawi ding. 2 A cauh lai le a cah lo laiah ka va man ding ih, ṭih ko ka tuah ding. Cun a hnenih um mi hmuahhmuah an tlân ding, cule siangpahrang lawng ka that ding. 3 Cun mi hmuahhmuah cu na hnenah ka run hruaikir thluh ding. Na hawl mipa siarlo, an zaten an ra tlun tikah, mi hmuahhmuah cu hnangamten an um ding,» tiah a ti. 4 Cule cuih thu cun Absalom le Israel upa zate a lunghmuiter.

Hushai-ih Thurawnpek

5 Cun Absalom in, «Atu ah Arki-mi Hushai khal ko uhla, ziang a sim ve ti thei hnik uhsi,» tiah a ti. 6 Cule Absalom hnenih Hushai a rat tikah, Absalom in a hnenah, «Ahithofel in hitin a ti ih, a ti vekin kan tuah pei maw? Kan tuah lo ding asile hun ṭawng hnik aw,» tiah a ti.

7 Cutikah Hushai in Absalom hnenah, «Ahithofel-ih thurawnpek mi cu tuih cān ah cun a ṭha lo a si,» tiah a ti. 8 Hushai in a ṭawng a peh ih, «Ziangahtile na pa le a mipapawl cu na thei, annih cu micak, lungthin sungih thinsosa, ramlak saváwm fano lawn mi vek an si. Cule na pa cu ralthiam a si ih, mipi lakah a riak lo ding. 9 Ngai hnik, atu hmanah anih cu khuitawk khur ah simaw, khui hmun ah simaw a relh ding. Cule hitin a si ding, a tirih mi hrekkhat an tlûk tikah a theitu pauhpauh in, ‹Absalom thluntu lakah thahawknak a um,› tiah an ti ding. 10 Cule kiosa vek thinlung nei, miralṭha hman a zuprál thluh ding. Ziangahtile Israel hmuahhmuah in na pa cu micak a si ti le a hnenih um mipawl khal miralṭha an si ti an thei. 11 Curuangah Israel hmuahhmuah cu Dân ihsin Beersheba tiang, tifinriat vunnel zat ih tam in na hnenah khawmaw thluh hai sehla, doawknak ah nangmah rori feh aw tiah thurawn ka lo pe a si. 12 Cutin amah hmuh a sinak hmun hmun ah kan pan ding ih, lei parih daifim tlâ vekin a parah kan tlakhnawh ding. Cule amah le a hnenih um mi zaten pakhat hman kan zuah lo ding. 13 Cuihtlunah khaw sungih a sīp asile, Israel mi zaten hridai kengin khaw sungah kan va luhhnawh ding ih, cu tawkah lungte pakhat hman hmuh ding um loin tiva sungah kan dirthla thluh ding,» tiah a ti.

14 Cun Absalom le Israel mipa hmuahhmuah in, «Arki-mi Hushai-ih thurawnpek cu Ahithofel-ih thurawnpek mi hnakin a ṭhasawn,» tiah an ti. Ziangahtile Jehovah in Absalom parih siatnak a thlenter theinak dingah, Jehovah in Ahithofel-ih thurawnpek ṭha a pek mi cu neh dingin a rak tumtah cia.

Hushai-ih Ralrin Peknak

15 Cun Hushai in puithiam Zadok le Abiathar hnenah, «Ahithofel in Absalom le Israel upapawl cutin khatin tiin thurawn a pe hai ih, kei in cutin khatin tiin thurawn ka pe hai. 16 Curuangah atu ah, zamrang zetin David hnenah mi thlah uhla, ‹Tuihzan cu ramṭhing phaikuampawl ah riak loin, a rang theibik in tánkai sawn aw, culoasile siangpahrang le a hnenih um mi hmuahhmuah cu dawlh thluh an si pang ding,› tiin sim uh,» tiah a ti. 17 Jonathan le Ahimaaz cu En Rogel hmun ah an um, ziangahtile khaw sungih an luh lai an hmuh ding an ngam lo. Cun annih cu siahhlawh nunau pakhat a va feh ih, a sim hai ṭheu, cule annih cu an feh ih, Siangpahrang David an simsin ṭheu. 18 Sikhalsehla annih cu nauhak pakhat in a rak hmu hai ih, Absalom a sim. Asinan an pahnih in zamrang zetin an tlânsuak ih, Bahurim khua ah mi pakhat a tual ih tikhur nei inn ah an va thleng, cule cuih tikhur ah cun an lut.

19 Cun nunaunu in a sīn cu a la ih, tikhur kâ ah a pharh, cule a tlunah thlairawl a pho, a thil ti mi cu theih a si lo. 20 Cule Absalom-ih siahhlawhpawl cu nunaunuih hnenah inn ah an va thleng ih, «Ahimaaz le Jonathan khuiah an um?» tiah an ti.

Cutikah nunaunu cun an hnenah, «Tivate an tánkai zo,» tiah a ti hai.

Cule an hawl ih an hmuh lo tikah Jerusalem ah an tlungkir. 21 Cun hitin a rak si, an fehsuah hnuah tikhur sung ihsin annih cu an hung suak, an feh ih Siangpahrang David an sim, cule David hnenah, «Tho awla, tidai cu tánkai zâng aw. Ziangahtile hitin Ahithofel in nangmah dokalhin thurawn a rak pe,» tiah an ti. 22 Cule David le a hnenih um mi hmuahhmuah cu an tho ih, Jordan ralah an kai. Zing khua a hung van tikah mi pakhat hman Jordan tánkai man lo an um lo.

23 Cun Ahithofel in a thurawnpek mi cu thlun a si lo ti a hmuh tikah a lāk a dăm ih, a păwk, cule amai khua, a inn ah a tlung. Cun a sungkuapawl nuntukhawsakdān ding felfaiteih a tawlrel hnuah, amah le amah a khaiaw ih a thi, cule anih cu a paih thlān ah an phum.

Amasa cu Ralkap Hotu ah

24 Cun David cu Mahanaim ah a feh. Cule Absalom cu a hnenih um mi Israel mipapawl hmuahhmuah thawn Jordan an tán. 25 Cule Absalom in Joab aiawhah Amasa cu ralkappawl hotu ah a tuah. Hih Amasa hi mi pakhat a hmin Ithra, Israel-mi Joab-ih nu, Zeruiah-ih naunu, Nahash-ih fanu Abigail hnenih ^aluttu a si. 26 Cun Israel le Absalom cu Gilead ram ah ṭanhmun an khuar.

17:25^a luttu: Ihpitu tinak a si.

27 Cule hitin a rak cang, Mahanaim khua ih David a thlen tikah, Rabbah ihsin Amnon tefapawl, Nahash fapa Shobi, Lo Debar ihsin Ammiel fapa Makir le Rogelim ihsin Gilead-mi Barzillai tepawl an hnenah an ra. 28 Annih in ihkhunpawl, cawhtawlhpawl, leibelpawl le sangvut, barli sangvut le sangphŭt, vainim kăn le bete, pe le bete kăn an rak keng. 29 Cuihtlunah khuaitizu le thawphāt, tuu le ranpi hnawihlap pawl cu David le a zawngih um, milaipawl ih ei dingah an rak keng. Ziangahtile annih in, «Mipi cu ramṭhing ah rilrâwng le cau le tihâlin an um,» tiah an ti.

Absalom Duainak le Thihnak

1 Cule David in a hnenih um minungpawl a siar ih, 1000 tlunih hotupawl, 100 tlunih hotupawl tiin a ret. 2 Cun David in mipi ṭhen thum ṭhen khat cu Joab kut hnuaiah, ṭhen thum ṭhen khat cu Joab-ih unaupa Zeruiah fapa Abishai kut hnuaiah, ṭhen thum ṭhen khat cu Gath-mi Ittai kut hnuaiah tiin a thlahsuak hai. Cule siangpahrang in mipi hnenah, «Keimah rori nan zawngah ka feh ve tengteng ding,» tiah a ti.

3 Asinan mipi in, «Na feh lo ding! Ziangahtile kannihpawl hi tlânhlo hman nungla pawi an ti lo ding, a hrek hman thi nungla pawi an ti cuang lo ding. Asinan nang cu kanmahpawl 10000 tluk na si. Curuangah nang cu khaw sung ihsin in bawm dingin tiar cia ih na um cu a ṭhasawn a si,» tiah an sâng.

4 Cun siangpahrang in an hnenah, «Ṭha nan tidandanin ka tuah ding,» tiah a ti. Cule siangpahrang cu kăwtka kiangah a rak ding ih, mipi hmuahhmuah cu a za a za le a thawng a thawngin an fehsuak. 5 Cun siangpahrang in, Joab, Abishai le Ittai tla, «Keimah ruangah tlangval Absalom cu dimdawih zetin ti uh,» tiin thu a rak pe hai. Cule siangpahrang in Absalom thuhla ah ralkap hotu hmuahhmuah thupek a rak pek tikah mipi zaten an rak thei.

6 Cun mipi cu Israel donak hmun lamah an feh. Cule doawknak cu Efraim thingrûl lakah a si. 7 Cu tawkah Israel-mipawl cu David-ih siahhlawhpawl hmaiah nehin an um ih, cuih ni ah cutawk hmun ah nasazetih mi 20000 thahnak a thleng. 8 Ziangahtile cutawk ih doawknak cu ram pumpi ah a darh. Cule cuih ni ah ralnâm ih mi a ^adawlh mi hnakin thingrûl ih a dawlh mi an tamsawn. 9 Cun Absalom in David-ih siahhlawhpawl a rak táwng. Absalom cu lākrang parah a to. Lākrang cu ela thingkung ṭêk rûlbŭk zet hnuaiah a lut ih, Absalom-ih lu cu ela thingkung in a awk, cutin anih cu van le lei karlakah thlaiawin a tâng. Cule a hnuaiih lākrang cu a tlânlan vivo. 10 Cule mi pakhat in cumi cu a hmu ih Joab a sim, «Zoh hnik, ela thingkung ah Absalom thlaiawin ka hmu,» tiah a ti.

18:8^a dawlh: That tinak a si.

11 Cutikah Joab in amah ra simtupa hnenah, «Zoh hnik, na hmu zo ih, ziangahso amah cu lei ah na vuakthlak lo? Ngun shekel pahra le taikhap pakhat ka lo pe ding nân,» tiah a ti.

12 Asinan cu pa in Joab hnenah, «Shekel ngun 1000 hman ka kut in dawng ding si hman ningla, siangpahang fapa dokalhin ka kut ka suah lo ding. Ziangahtile ka hnatheihah siangpahrang in, nangmah le Abishai le Ittai hnenah, ‹Ralring uh, tlangval Absalom cu zohman in dai hlah hai seh,› tiin thu a rak lo pek kha. 13 Culoasile ka nunnak dokalh zawngin diklo zetin thil ka rak ti ding a si si. Ziangahtile siangpahrang hnen ihsin zianghman thuh theih a um lo ih, nangmah rori cu keimah dokalhin na tuahaw ding,» tiah a ti.

14 Cutikah Joab in, «Na hnenah rei um man hlah ing e,» tiah a ti. Cule a kut in fungfek zum pathum a keng ih, ela thingkung lakih nung lai Absalom-ih thinhna ah a sun. 15 Cule Joab-ih ralthuam kensaktu tlangval pahra pawl in Absalom cu an ra kulh ih, an vuak ih an that. 16 Cule Joab in tuupa ki a phaw ih, mipi cu Israel dawinak ihsin an kir. Ziangahtile Joab in mipi a rak dāwn. 17 Cule Absalom cu an zâwn ih, thingrûl lakih khur kaupi sungah an thlak, cule a parah lung sang zetin an peng. Cun Israel hmuahhmuah cu anmai puanthlam cio ah an tlân.

Absalom Hngilhlonak

18 Absalom in a nun laiah Siangpahrang Phaikuam sungah amai hrangah lungphun a rak phun. Ziangahtile anih in, «Ka hmin hlo lo dingin fapa ka nei fawn si lo ih,» tiah a ti. Cuih lungphun hmin ah amai hmin a rak sak. Cule tuihni tiang cumi cu Absalom Hngilhlonak ti a si.

Kush-mi le Ahimmaz an Tlân

19 Cun Zadok fapa Ahimaaz in, «Atu ah ka va tlân pei ih, Jehovah in a doralpawl phuba a laksakdān thuthang hi siangpahrang cu ka va sim pei,» tiah a ti.

20 Cule Joab in a hnenah, «Tuihsun ah hi thuthang cu na va sim lo pei, ziangahtile ni dangah hi thuthang cu na va sim leh pei. Siangpahrang fapa a thih ruangah tuihni ah cun ziang thuthang hman na phur ding a si lo,» tiah a ti. 21 Cun Joab in Kush-mi hnenah, «Va feh awla na thil hmuh mi siangpahrang va sim aw,» tiah a ti. Cuticun Kush-mi cu Joab hmaiah a kûn ih a tlân.

22 Cule Zadok fapa Ahimaaz in Joab hnenah, «Ziang a va si khalle, zangfahten kei khal Kush-mi pa dung ihsin tlân ve ko ning,» tiah a tisal.

Cutikah Joab in, «Ka fapa, thuthang sim ding na nei si loih, ziangahso na tlan ding?» tiah a ti.

23 Asinan ziang a can a si khalle, «Ka tlân ko ding,» tiah a ti.

Cutikah anih in, «Tlân aw,» tiah a ti. Cun Ahimaaz cu phaikuam lamin a tlân ih, Kush-mi cu a khelh.

24 David cu kăwt pahnih lakah a to. Cule ralvengtu cu kăwtka pawnta deuh tlunah a kaiso ih khuacuanin a zoh. Cule ngai hnik, mi pakhat amah te lawng a ra tlân rero. 25 Cun ralvengtu cu a au ih, siangpahrang a sim. Cule siangpahrang in, «Amah te lawng asile, a kâ ah thuthang a phur ko ding,» tiah a ti. Cule cu pa cu rang zetin a ra ih, a nai deuhdeuh.

26 Cun ralvengtu in mipa dang pakhat ra tlan lai a hmu ih, ralvengtu in kăwtkakiltu a ko ih, «Ngai hnik, a dang mipa pakhat amah te lawng ra tlân rero khi,» tiah a ti.

Cule siangpahrang in, «Anih khal thuthang a phur ko ding,» tiah a ti.

27 Cun ralvengtu in, «A hmaisadeuh ra tlântupaih tlāndān cu Zadok fapa Ahimaaz a bang,» tiah a ti.

Cule siangpahrang in, «Anih cu miṭha a si ih, thuthang ṭha thawn a ra ko ding,» tiah a ti.

28 Cule Ahimaaz cu a au ih siangpahrang hnenah, «Ziangkim a ṭha,» tiah a ti. Cun siangpahrang hmaiah a hmai leisin bihin a kûn ih, «Ka bawi dokalhih an kut suahtupawl nehtu, Jehovah na Pathian cu thangṭhatin um ko seh,» tiah a ti.

29 Siangpahrang in, «Tlangval Absalom a himdam maw?» tiah a sut.

Ahimaaz in, «Joab in siangpahrang siahhlawh le kei na siahhlawh in thlah laiah an buai luihlo lai ka hmu, hmansehla ziang a si ti ka thei lo,» tiah a ti.

30 Cule siangpahrang in, «Sirah her awla hi tawkah ding aw,» tiah a ti. Cun anih cu sirah a her ih, a ding cuahco.

31 Cule zoh hnik, Kush-mi a ra thleng ih, Kush-mi cun, «Ka bawi siangpahrang, thuthang ṭha a um a si! Ziangahtile nangmah dokalhih thotupawl hmuahhmuah phuba cu tuihsun ah Jehovah in a lo laksak zo a si,» tiah a ti.

32 Cule siangpahrang in Kush-mi hnenah, «Tlangval Absalom a himdam maw?» tiah a ti.

Cutikah Kush-mi cun, «Ka bawi siangpahrang-ih doralpawl le nangmah tuahmawh dingih a lo dotu hmuahhmuah cu cuih tlangval bangin si hai seh,» tiah a ti.

David in Absalom a Ṭah

33 Cun siangpahrang cu a khūr ih, kulh kăwtka a tlunih pindan ah a lut ih a ṭap. Cule a feh phahin, «Maw ka fapa Absalom, ka fapa, ka fapa Absalom, na aiah keimah thih sawn tak ding! Maw Absalom ka fapa, ka fapa!» tiah a ti.

Joab in David a Kawk

1 Cule Joab hnenah, «Ngai hnik, siangpahrang cu Absalom a ṭah ih a sûn,» tiah an sim. 2 Cun cuih ni ih nehnak cu mi hmuahhmuah hrangah lusûnṭahnak ah a cang. Ziangahtile, «Siangpahrang cu a fapa ruangah a thin a nâ,» an ti mi cu mipi in cuih ni ah an rak thei. 3 Cule mipi cu ral doawknak ih an tlanhloh tikih an mualpho ruangih an thuhawk bangin cuih ni ah khaw sungah an thupaw. 4 Asinan siangpahrang cu a hmai a hup ih, «Maw ka fapa Absalom! Maw Absalom, ka fapa, ka fapa!» tiin aw ring zetin a au.

5 Cun Joab cu inn sungah siangpahrang hnenah a lut ih, «Na nunnak siseh, na fapapawl le na fanupawl ih nunnak siseh, na nupipawl le na nusūnpawl ih nunnak siseh, na nunnak runtu na siahhlawhpawl hmuahhmuah cu tuihsun ah an ningzak ko na tuah, 6 a lo huatupawl na duhdawt ih a lo duhdawtupawl na huatnak ah hin. Ziangahtile tuihni ah mizahumpawl le siahhlawhpawl cu ziang hmanih rel lo vekin na langter, ziangahtile tuihni ah Absalom nungin kannih hmuahhmuah hi thi thluh nungla, cumi cun na lung a lo hmuiter ding ti ka thei. 7 Curuangah atu ah, tho awla suak aw, cule na siahhlawhpawl hnĕmnak thu sim aw. Ziangahtile na suah lo asile, Jehovah sālin sia ka săm a si, tuihzan ah mi pakhat hman na hnenih riak an um lo ding. Cule cucu na hrangah na no lai ihsin tuihni tiang na parih thil ṭhalo thleng mi hmuahhmuah hnakin a se deuh ding,» tiah a ti.

8 Cun siangpahrang cu a tho ih kăwt ah a to. Cule annih in mipi hmuahhmuah hnenah, «Zoh hnik uh, kăwt ah siangpahrang a to,» tiin an sim. Cun mipi hmuahhmuah cu siangpahrang hmaiah an ra.

Ziangahtile Israel-mi mi kip cu mai puanthlam cio ah an rak tlântlung zo a si.

Jerusalem ah David a Kir

9 «Siangpahrang in kan ralpawl kut ihsin in run ih, Filisṭia-mipawl kut ihsin in runsuak, cule atu ah amah cu hih ram ihsin Absalom ruangah anih cu a tlânsuak. 10 Cule kan tlunih um dingih hriak kan thih mi Absalom cu doawknak ah a thi. Cun atu ah, ziangah saw siangpahrang hruaikir ding zianghman rel loih nan um men?» tiin Israel hnám hmuahhmuah lakah mi zaten an êlaw.

11 Cule Siangpahrang David in puithiam Zadok le Abiathar hnenah, «Judah upapawl hnenah, ‹Ziangruangah siangpahrang amai inn ih hruaikir netabiktu ih nan can? Israel hmuahhmuah ih ṭawngkampawl cu siangpahrang hnenah, amai inn rori ah a rak thleng zo. 12 Nannih cu ka unau nan si, nannih cu ka ruh le ka titsa nan si. Ziangruangah siangpahrang hruaikir dingah a netabikih nan ṭăn riangri?› tiin sim uh. 13 Cule Amasa hnenah, ‹Nangmah cu ka ruh le ka titsa na si lo maw si? Nangmah cu Joab aiah ka ralbawi ih ka lo tuah ringring lo asile, Pathian in ka parah a duh duhin tuah sehla, cuhnakih tamsin khalin tuah seh,› a ti, va ti uh,» tiin mi a thlah. 14 Cule Judah mipapawl hmuahhmuah ih thinlung cu mi pakhat thinlung vekin a hmin ih, cutin siangpahrang hnenah, «Na siahhlawhpawl hmuahhmuah thawn ra kir uh,» ti dingin mi an thlah.

Shimei in David a Ngen

15 Cun siangpahrang cu a ra kir ih, Jordan a thleng. Cule Judah cu siangpahrang hmuak ih, siangpahrang cu Jordan ralih hruai dingin Gilgal khua ah an feh. 16 Cule Bahurim khawmi Benjamin-mi Gera fapa Shimei cu zamrang zetin Siangpahrang David hmuak dingin Judah mipapawl zawngah a feh. 17 A hnenah Benjamin mipa 1000 le Saul sungkuapawlih siahhlawh Ziba, a fapa hleinga le a siahhlawh kul cu a hnenah an rak um. Cule annihpawl cu siangpahrang hmaiah Jordan ralkhat lamah an feh. 18 Cun siangpahrang-ih sungkuapawl hruai dingin le ṭha a tidandanih a tuah dingah lăwng a tankaipi. Cule Jordan a tăn hnuah Gera fapa Shimei cu siangpahrang hmaiah a băwkkhup.

Shimei Tlunih David Zahngainak

19 Cun anih in siangpahrang hnenah, «Ka bawi in mawhsualnak neiah i puh hram hlah sehla, ka bawi siangpahrang in Jerusalem a suahsan ni ih na siahhlawh in diklo zetih a rak lo ti mi cu cîng ringring hlah seh, siangpahrang in a thinlung ah ret hlah seh. 20 Ziangahtile kei, na siahhlawh in thilsual ka rak ti a si ti ka thei. Curuangah zoh hnik, Joseph sungkuapawl hmuahhmuah lakah ka bawi siangpahrang hmuak dingah tuihsun ah a ra suak hmaisabik ka si,» tiah a ti.

21 Asinan Zeruiah fapa Abishai in a sawn ih, «Jehovah hriak thih mi a camsiat ruangah Shimei cu thah a si lo ding maw?» tiah a ti.

22 Cule David in, «Nannih Zeruiah fapapawl, in dotu ah tuihsun ih nan ṭan hi, nannih le kei hi ziang pehtlaihawknak so kan neih? Tuihsun ah Israel ram ah mi pakhat khat thah ding a si maw? Tuihsun ah Israel parih siangpahrang ka si hi thei lo maw ka si?» tiah a ti. 23 Cun siangpahrang in Shimei hnenah, «Na thi lo ding,» tiah a ti. Cule siangpahrang in a hnenah that lo dingin sia a săm.

Mefibosheth in Ziba a Mawhthluk

24 Cun Saul fapa Mefibosheth cu siangpahrang hmuak dingin a rung suk. Cule siangpahrang a pawh ni ihsin hnangamteih inn ih a ra kir ni tiangin a kepawl cu a kilkhawi lo, a khahmul a met lo ih, a hnipuan khal a sawp lo. 25 Cule hitin a rak si, siangpahrang hmuak dingih Jerusalem ih a feh cu siangpahrang in a hnenah, «Mefibosheth, ziangruangah ka zawngih na feh ve lo?» tiah a ti.

26 Cutikah anih in, «Maw siangpahrang, ka bawi, ka siahhlawh in i rak bum a si. Ziangahtile na siahhlawh in, ‹A parah ka to ih siangpahrang hnenih ka feh theinak dingah keimah hrangah lāk ka dăm ding,› tiah ka ti, ziangruangahtile na siahhlawh cu kebái a si si. 27 Cule anih in ka bawi siangpahrang hnenah na siahhlawh hi a rak zuarthlai, asinan ka bawi siangpahrang cu Pathian vancungmi vek a si. Curuangah na mithmuhih ṭha na tidandanin tuah ko aw. 28 Ziangahtile ka paih sungkuapawl hmuahhmuah cu siangpahrang ka bawi hmaiah cun mithi vek an si. Cuticingin na siahhlawh hi na cabuai ih rawl eitupawl lakah na ret. Curuangah siangpahrang hnenah ziang ti theinak so ka lo dil nawn ding?» tiin a sâng.

29 Cun siangpahrang in a hnenah, «Ziangah so nangmai thuhla hi na rel ṭheu? ‹Nang le Ziba cun ram hi ṭhen aw uh,› ka lo ti kha,» tiah a ti.

30 Cutikah Mefibosheth in siangpahrang hnenah, «Ka bawi siangpahrang cu a inn ah hnangamten a rak kir zo ruangah, amah in la thluh seh,» tiah a ti.

Barzillai parih David Ngilneihnak

31 Cule Gilead-mi Barzillai cu Rogelim hmun ihsin a ra ih, siangpahrang cu Jordan ralih fehpi dingin a zawngah Jordan a tánkai ve. 32 Barzillai cu kum upa zet a si, kum 80 mi a si. Cule Mahanaim khua ih siangpahrang a um sung hmuahhmuah ei ding rawl a rak tum thluh, ziangahtile anih cu milian zet a si. 33 Cule siangpahrang in Barzillai hnenah, «Ka hnenah tánkai ve awla, Jerusalem ah ka hnenih na um sung hmuahhmuah ka lo câwm ding,» tiah a ti.

34 Asinan Barzillai in siangpahrang hnenah, «Siangpahrang hnen Jerusalem ih so dingin, kum ziat so ka nun cuang ding? 35 Tuihsun ah keimah cu kum 80 ka si. Asia le a ṭha thleidang thei teh ka si maw si? Na siahhlawh hin ka ei le ka in mi a thawtzia teh ka thei thei nawn maw si? Nunaupawl le mipapawl hla sak aw teh ka thei thei nawn maw si? Ziangahso na siahhlawh hi ka bawi siangpahrang hrangih phurrit ka si bêt ding? 36 Na siahhlawh cu siangpahrang zawngah Jordan lan fangfang lawng a feh ding. Ziangah cuvek lawmman thawn siangpahrang in i rulh kherkher ding? 37 Ka nu le ka paih thlān kiang, ka khua ih ka thih theinak dingah na siahhlawh cu zangfahten tlungter aw. Asinan zoh hnik, na siahhlawh Khimham hi, anih hi ka bawi siangpahrang hnenah tánkai ve sehla, a hrangah ṭha na tidandanin tuah aw,» tiah a ti.

38 Cule siangpahrang in, «Khimham cu ka zawngah a tánkai ding ih, ṭha na tidandanin a hrangah ka tuahsak ding. I dil mi ziangkhal ka lo tuahsak ding,» tiah a sâng. 39 Cun mipi hmuahhmuah cu Jordan ralkhat ah an feh. Cule siangpahrang khal a tankaisuah tikah, siangpahrang in Barzillai cu a hnam ih, mal a sawm, cule amai inn ah a tlung.

Judah Parih Phunzainak

40 Cule siangpahrang cu Gilgal khua ah a feh vivo ih, Khimham in a thlun. Cule Judah-mi hmuahhmuah in siangpahrang cu an hruai ih, Israel mipi a hrek khal an tel ve. 41 Cule zoh hnik, Israel mipa hmuahhmuah cu siangpahrang hnenah an ra ih, siangpahrang hnenah, «Ziangruangah kan unau Judah mipapawl in an lo ru ih, siangpahrang le a sungkuapawl le David-ih mipapawl hmuahhmuah cu Jordan tiva ralah an hruai?» tiah an ti.

42 Cutikah Judah mipapawl hmuahhmuah in Israel mipapawl hnenah, «Siangpahrang cu kan sungkhat nâi a si ruangah a si. Ziangahso hih thu ah nan thin a heng? Siangpahrang kan eisak mi a um maw si? Asilole anih in thilpek ziang tal in rak pe maw?» tiah an sawn.

43 Cule Israel mipapawl in Judah mipapawl cu an sâng ih, «Siangpahrang parah covo pahra kan nei, curuangah kannih in nannih hnakin David thawn kan pehparaw sawn a si. Ziangahso in hmuhsuam men, kannihpawl hi siangpahrang hruaikir dingih ruahnak pe hmaisatu kan si lo maw?» tiah an ti. Cucingin Judah mipapawlih ṭawngkampawl cu Israel mipapawlih ṭawngkampawl hnakin a hrothak deuh thotho.

Sheba Helnak

1 Cule cu tawkah Benjamin-mi Bikhri fapa a hmin Sheba, misantlailopa a rak um. Cule anih cun tuupa ki a phaw ih,

«David ah covo kan nei lo,
Jessi fapa khalah ro kan nei lo,
Maw Israel, mai puanthlam cio ah tin uh,»

tiah a ti.

2 Cun Israel-mi mi kip in David cu an tân ih, Bikhri fapa Sheba an thlun. Asinan Judah mipapawl lawngte cun Jordan ihsin Jerusalem tiang an siangpahrang hnenah rinumten an kăwp. 3 Cun David cu Jerusalem ih a inn ah a thleng. Cule siangpahrang in nunau pahra, a inn kiltu dingih a tān ta mi a nusûnpawl cu a hruai ih, a khum hai, cule a câwm hai, asinan an hnenah a ^alut lo. Cutin an thih ni tiangin annih cu kharkhumin an um ih, nuhmei dinhmun in an nung.

20:3^a lut lo: Ihpi lo tinak a si.

Joab in Amasa a That

4 Cule siangpahrang in Amasa hnenah, «Ni thum sungah Judah mipapawl ka hnenah i rak hruaikhawmsak awla, nangmah khal hi tawkah na rak um ve pei,» tiah a ti. 5 Cuticun Amasa cu Judah mipapawl hruaikhawm dingin a feh. Asinan David in a hrangih cān a khiahsak mi hnakin a va rei deuh. 6 Cule David in Abishai hnenah, «Atu ah Bikhri fapa Sheba in Absalom hnakin in tuahmawh nasadeuh ding. Na bawipaih siahhlawhpawl hruai awla amah cu dawi aw, culoasile amai hrangah kulh nei khuapawl a hmusuak ding ih, kan hnen ihsin a tlânsuak pang ding,» tiah a ti. 7 Cun Joab-ih mipapawl cun Kereth-mipawl, Peleth-mipawl le micakpawl hmuahhmuah thawn amah cu an dawi. Cule Jerusalem ihsin Bikhri fapa Sheba dawi dingin an fehsuak. 8 Gibeon khua ih lungpi tûm zet umnak an va thlen tikah, Amasa cu an hmaiah a feh. Cule Joab cu ral doawknak ralthuam a hruh, cumi parah cun ralnâm a kawm thawn taikhap ah a tâi ah a thlaih. Cule hmai lamih a feh tikah, cumi cu a tla. 9 Cun Joab in Amasa hnenah, «Na dam maw, ka unaupa?» tiah a ti. Cule Joab in Amasa hnam dingin a khahmul cu a vawrh lam kut in a kaihsak. 10 Asinan Amasa in Joab kut ih ralnâm um cu a rak zohhliah lo. Cule Joab in cumi thawn Amasa-ih pum ah a sŭn ih, a rilpawl cu lei ah an tla, cule a sunbêt nawn lo. Cutin anih cu a thi. Cun Joab le a unaupa Abishai in Bikhri fapa Sheba cu an dawi vivo. 11 Cu laiah Joab-ih tlangvalpawl lakih pakhat cu Amasa kiangah a ding ih, «Joab duhsaktu pauhpauh le David lamṭang pauhpauh cun Joab thlun uh,» tiah a ti. 12 Asinan Amasa cu zinpi laifangah amai thisen ah a ciahaw. Cule cu pa in mipi zate ding cuahco ih a hmuh hai tikah, Amasa-ih ruang cu zinpi ihsin ramlak ah a ṭhawn ih, a kiangih fehtu pauhpauh ding vivo ih a hmuh hai tikah, a parah sinfen a hlăwn. 13 Zinpi ihsin Amasa ṭhawn a si hnuah, Bikhri fapa Sheba dawi dingin mipa hmuahhmuah in Joab cu an thlun vivo.

Abel ah Sheba Kulh a Si

14 Cule Sheba in Abel khua le Beth Maakah khua tiang Israel hnám hmuahhmuah le Beri-mi hmuahhmuah cu a hrawhsuak thluh. Beri-mipawl cu hmunkhatah an pungkhawm ih Sheba dung khal an thlun. 15 Cun Joab-ih milaipawl cu Abel khua le Beth Maakah khua ah an ra ih, amah cu an kulhkhŭm, cule khawpi kap tluanah lei an sûngpâwng ih, cumi cu kulh hrulah a um. Cule Joab hnenih a um mi milai hmuahhmuah in cimter dingin kulh cu an su ciamco.

Sheba Thihnak

16 Cun nupinu fim pakhat cu khawpi sung ihsin, «Ngai u law, ngai u law! Zangfahten Joab hnenah, ‹Thu ka lo sim theinak dingah ra nâi aw,› a ti, tiah sim uh,» tiah a au. 17 Cu nuih hnenih a va naih tikah nunaunu in, «Joab na si maw?» tiah a ti.

Anih in, «Ka si ko,» tiah a sâng.

Cun nupinu in a hnenah, «Na siahhlawhnuih ṭawngkampawl hi ngai aw,» tiah a ti.

Cule anih in, «Ka ngai a si,» tiah a sâng.

18 Cutikah cu nu cun, «Hlanlai ah, ‹Abel khua ah kaihhruainak an hawl tengteng ding,› an ti ṭheu ih, cutin elawknak an cemter ṭheu. 19 Kei hi Israel lakih remawk duh le mirinum lakih mi ka si. Nang cun Israel ram ih khua pakhat le nu pakhat tisiat dingin na hawl rero. Ziangahso Jehovah-ih ro cu na dawlh ding?» tiah a ti.

20 Cule Joab in a sâng ih, a hnenah, «Ka dawlh ding le ka tisiat ding cu ka hnen ihsin hla seh, hla seh! 21 Cutivek lam a si lo. Cuhnakin Efraim tlang ram ihsin mi pakhat Bikhri fapa, a hmin Sheba in siangpahrang dokalhin, David dokalhin a kut a rak hawi sawn a si. Cu pa cu pesuak uhla, hi khua hi ka suahsan ding,» tiah a ti.

Cutikah nunaunu in Joab hnenah, «Zoh hnik hman, phăr tlun ihsin na hnenah a lu cu hlăwnthlak a si ding,» tiah a ti. 22 Cun nunaunu cu a fimnak hmangin mi hmuahhmuah hnenah a feh. Cule Bikhri fapa Sheba lu cu an tán ih, Joab hnenah an hlăwn. Cun Joab cun tuupa ki a phaw ih, khawpi ihsin mi kip mai puanthlam cio ah an sipkir. Cule Joab cu siangpahrang hnen, Jerusalem ah a tlungkir.

David-ih Bawipawl

23 Cule Joab cu Israel ralkappawl hmuahhmuah tlunah hotu a si. Jehoiada fapa Benaiah cu Kereth-mipawl le Peleth-mipawl hotu a si. 24 Adoram cu hranhramih ṭuanter mipawl hotu a si. Ahilud fapa Jehoshafat cu ngankhumtu a si. 25 Sheva cu cangantu a si, Zadok le Abiathar cu puithiam an si. 26 Cule Jair-mi Ira cu David-ih puithiam a si.

David in Gibeon-mipawl Phuba a La

1 Cun David dam laiah a pehpehin kum thum sung mangṭam a thleng. Cule David in Jehovah thu a ráwn. Jehovah in, «Himi cu Saul le thisensuahhmang a sungkuapawl ruangah a si, ziangruangahtile anih in Gibeon-mipawl a that,» tiah a sâng.

2 Cutikah siangpahrang in Gibeon-mipawl cu a ko hai ih, a be hai. Gibeon-mipawl cu Israel tefapawl an si lo ih, Amor-mipawl tāngsŭn an si sawn. Israel tefapawl in anmah kilhim dingin sia an rak săm, asinan Saul in Israel tefapawl le Judah tefapawl hrangih ṭhahnem a ngainak ruangah anmah that dingin a hawl.

3 Curuangah David in Gibeon-mipawl hnenah, «Nan hrangah ziang ka lo tuahsak ding? Cule Jehovah-ih ro mal nan sawm theinak dingah ziang thawn sualkhuhthawinak ka tuah pei?» tiah a ti.

4 Cule Gibeon-mipawl in a hnenah, «Saul le a sungkuapawl hnen ihsin sui siseh, ngun siseh kan nei lo ding ih, kan hrangah mi zokhal Israel ram ah kanmah ruangah na that lo pei,» tiah an ti.

Cutikah David in, «Nan ti mi pauhpauh, nan hrangah ka tuah ding,» tiah a ti.

5 Cun annih in siangpahrang hnenah, «Israel ramṭhen khuitawk hmun khalih tâng loih tihloral kan si theinak dingih in cimittertupa le kanmah in bawhthuptu cu, 6 a tesinfa mi pasarih cu kan hnenih pek si sehla, Jehovah ih hril mi Saul-ih umnak Gibeah khua ah Jehovah hmaiah anmah cu kan thlai ding,» tiah an ti.

Cule siangpahrang in, «Ka lo pe ding,» tiah a ti.

7 Asinan siangpahrang cun an karlak, David le Saul fapa Jonathan karlakih Jehovah-ih thukamnak ruangah Saul-ih fapa Jonathan-ih fapa Mefibosheth cu a zuah.

8 Cun siangpahrang in Aiah-ih fanu Rizpah in Saul fapa pahnih a hrinsak mi Armoni le Mefibosheth cu a hruai hai. Cule Meholath-mi Barzillai-ih fapa Adriel hrangih, Saul fanu Mikal in fapa panga a cawmsak mipawl thawn, 9 cupawl cu Gibeon-mipawlih kut ah a pek ih, annih in Jehovah hmaiah tlang parah an thlai. Cun an pasarih ten hmunkhatah an tla ih, fâng ah cān, ni khatnak, barli sangvut lâk thăwktir ah an that a si.

Rizpah in Mithi Ruang a Kil

10 Cun Aiah-ih fanu Rizpah in buri dip a lâk ih, cumi cu amai hrangah fâng ah tir ihsin vanruah in an parih a surh hai hlanlo um dingin lungpi parah a pharh. Cule an parih sun ih tlun zuang vâtepawl fut le zan ih ramsapawl um khal a siang lo. 11 Cule Aiah-ih fanu Saul-ih nusūn ih thil tuah mi cu David an sim.

Saul le Jonathan-ih Ruh

12 Cun David cu a feh ih Saul-ih ruhpawl le a fapa Jonathan-ih ruhpawl cu Filisṭia-mipawl in Gilboa ih Saul an thah ni ah, Filisṭia-mipawl in Beth Shan zin ih an thlai mi firtu, Jabesh Gilead pacangpawl hnen ihsin a la. 13 Cule cutawk ihsin Saul-ih ruhpawl le a fapa Jonathan-ih ruhpawl cu a run keng, cule an thlai mipawlih ruhpawl cu an fĭnkhawm. 14 Saul-ih ruhpawl le a fapa Jonathan-ih ruhpawl cu Benjamin ram Zelah khua ih a pa Kish thlān ah an phum. Cun siangpahrang thupek bangin an tuah thluh. Cule cuihhnu ah ram hrangih dil mi cu Pathian in a thei.

Filisṭia Mimangkawngpawl Thahnak

15 Filisṭia-mipawl in Israel cu an dosal lala. Cule David le a siahhlawhpawl cu an suk ih, Filisṭia-mipawl cu an do, cule David cu a tha a cem deuhdeuh. 16 Cun Ishbi-Benob, mimangkawng tesinfapawl lakih pakhat, a dar fei shekel 300 rit, ralnâm thar keng cun David thah a tum. 17 Asinan Zeruiah fapa Abishai in a bawm ih, Filisṭia-pa cu a vuak ih, a that. Cun David-ih milaipawl in, «Doawknak ah kan hnenah na feh nawn lo ding, culoasile Israel meito na mitter pang ding,» tiin a hnenah sia an săm.

18 Cule hitin a rak cang, cuihhnu ah Filisṭia-mipawl thawn Gob ah doawknak a um lehsal. Cun Hushath-mi Sibbekhai in mimangkawng tesinfapawl lakih pakhat Saf cu a that. 19 Gob ah Filisṭia-mipawl thawn an doaw lehsal lala ih, Bethlehem khawmi Jaare-Oregim fapa Elhanan in Gath-mi Goliath-ih unaupa a that, a feipi ngul cu thiam tlâng vek a si.

20 Gath ah doawknak a um lehsal lala ih, cu tawkah misâng zet, a kut khat lam le khat lam ih zung paruk veve nei, a ke khat lam le khat lam ih kezung paruk veve nei, a zaten zung 24 neipa a um, cule anih khal mimangkawng tesinfapawl lakih pakhat a si ve. 21 Cu pa in Israel cu a camsiat, cule David-ih unaupa Shimei-ih fapa Jonathan in cu pa cu a that. 22 Hi mi pali pawl hi Gath khua ih mimangkawng lakih suak an si ih, annih cu David-ih kut le a siahhlawhpawlih kut in an tlu.

Pathian Runsuahnak

1 Cun David in a ralpawl hmuahhmuah kut ihsin le Saul kut ihsin Jehovah ih a runsuah ni ah hi hla-ih hla thupawl hi Jehovah hnenah a seh. 2 Cule anih in,

«Jehovah cu ka lungpi le ka kulhhnget le i runsuaktu a si.
3 Ka lungpi Pathian, amah cu ka rinsan ding,
Ka ralphaw le ka runsuahnak ki,
Ka hauhruang le ka răwlhimnak,
I rundamtu, nang in thahrumsuahnak lak ihsin i run.
4 Thangṭhattlak Jehovah cu ka ko ding,
Cule ka ralpawl lak ihsin run ka si ding.
5 Thihnak tisuarpawl in i kulh tikah,
Misantlailopaih tilian in ka thla i phângter.
6 Sheol riahsiatnakpawl in in kulh,
Thihnak thangpawl in keimah dokalhin in hmuak.
7 Ka vansan tikah Jehovah ka ko ih,
Ka Pathian hnenah ka ausuak,
Anih cun a temple ihsin ka aw a rak thei,
Cule ka auaw cu a hna sungah a lut.
8 Cun leilung cu a hnîn ih a khūr,
A thin a heng ruangah
Van lungphumpawl an hnîn ih an khūr.
9 A hnar kuapawl ihsin meikhu a suak ih,
A kâ ihsin mikāngraltu meisa,
Cumi in meihol a alhter.
10 Anih in vanpawl khal a kûnter hai ih,
A ke hnuaiah thim thawn a rung suk.
11 Anih cu cherub parah a to ih, a zám,
Cule anih cu thlipi thlapawl parah hmuh a si.
12 Thim cu amah kimvelah bûk ah a tuah,
Tipi dum khemkhem le vanpawlih khawdur sahpawl cu.
13 A hmaiih tletnak ihsin
Meilingpawl an alh.
14 Jehovah cu van ihsin khawri vekin a ri ih,
Cungnung Bik cun a aw a suah.
15 Thálfungpawl a sai ih, anmah cu a ṭekdarhter,
Nimthla a kauter ih, anmah cu a vaivuanter hai.
16 Cun Jehovah kawknak le a hnar ih thaw in a sĕm ruangah,
Tifinriat luannakpawl an lang,
Leilung lungphumpawl cu hmuh an si.
17 Anih in tlun lam ihsin a run dawh ih i la,
Tidai nasazet sung ihsin i dirsuak.
18 A cak mi ka ral lak ihsin i runsuak,
I huatupawl hnen ihsi khalin,
Ziangahtile annihpawl cu ka hrangah an cak tuk.
19 Annih cun ka vanduai ni ah keimah dokalhin in hmuak,
Asinan Jehovah cu ka ṭhumawknak a si.
20 Cuihhleiah anih cun hmun kaupi ah i hruaisuak,
Ka parih a lungsi ruangah i runsuak.
21 Jehovah in ka dingfelnak zulhin lawmman i rak pe,
Ka kut thianfainak zulhin i rak rūl.
22 Ziangahtile Jehovah lamzinpawl cu ka thlun ih,
Ka Pathian cu sualrál zetin ka rak suahsan dah lo.
23 Ziangahtile a cīn le dānpawl hmuahhmuah cu ka hmaiah a um,
Cule a sakhaw dānpawl cu ka suahsan dah lo.
24 A hmaiah sawihnăwm kâi lo khal ka si ih,
Ka mawhsualnak lakah ka kilvengaw.
25 Curuangah Jehovah in ka dingfelnak zulhin,
A mithmuhih ka thiannak zulhin i rak rūl.
26 Zahngainak nei mi parah zahngainak nei zetin na langawter ding,
Sawihnăwm kâi lo mipawl hnenah sawihnăwm kâi loin na langawter ding,
27 Mithiang hnenah thiangin na langawter ding ih,
Miherhkawi hnenah herhkawiin na langawter ding.
28 Mităngdawrpawl na run ding,
Asinan mipuar na dirhthlak theinak dingah an parah na mit a fu.
29 Ziangahtile, Maw Jehovah, nangmah cu ka meito na si,
Jehovah in ka thimnak cu a tleuter ding.
30 Ziangahtile nangmah ruangah ralkap burpi ka năwr thei,
Ka Pathian ruangah hruang tlunah ka khir thei.
31 Pathian hrang lawngte ah cun, a lamzin cu a famkim,
Jehovah kamsuakthu cu hniksak zo mi a si,
Anih cu amah rinsantupawl hmuahhmuah hrangah ralphaw a si.
32 Ziangahtile Jehovah siarlo zo so Pathian?
Cule kan Pathian siarlo teh zo so lungpi?
33 Pathian cu ka cahnak le huham a si ih,
Anih in ka lamzin a famkimter.
34 Anih in zuknêng ke vekin ka ke a tuah ih,
Ka hmun sângpawl ah i ret.
35 Ka banpawl in dar thál kūlter thei dingin,
Amah in ka kutpawl tla ral do dingin a zirh.
36 Nang in na runsuahnak ralphaw khal i rak pe,
Na zaidamnak in miropi ah i tuah.
37 Ka hnuaiah ka zin na kauter,
Cule ka ke a nâl lo.
38 Ka doralpawl ka dawi ih ka hlorálter hai,
An cemral hlanlo dungah ka kirsal lo.
39 Cule annih cu ka hlorálter hai ih, ka tuahmawh hai,
Cutin annih cu an tho thei lo,
Annih cu ka ke hnuaiah an rīl.
40 Ziangahtile nang in raldonak hrangah cahnak thawn i rak thuam,
Keimah dokalhih thotupawl kha ka ke hnuaiah na duaiter hai.
41 I rak huatupawl ka hlohralter theinak dingah,
Ka ralpawlih ^ahngawngpawl tla i rak pe.
42 Annih cun khua an zoh, hmanseh runtu ding zohman an um lo,
Jehovah rori khal cu an zoh nan a rak sawn hai lo.
43 Cun anmah cu leilung leivut bangin ka vawdip thluh hai ih,
Kăwtthler ih leibêk bangin ka cīl hai,
Cule ka thehdarh hai.
44 Nang in ka mipawl an sualawknak ihsi khalin i runsuak,
Miphunpawlih lubân vekin i rak kilhim.
Ka rak theih dah lo mi minungpawl in in rian ding.
45 Ram dang mipawl ka hnenah an pe aw,
An hna ih an theih leveten ka thu an lung.
46 Ram dang mipawl an ziam ih,
An ṭankhuarnak ihsin khūr phahin an ra.
47 Jehovah cu a nung a si!
Ka lungpi cu thangṭhatin um seh!
Pathian cu khaisanin um seh,
Ka runsuahnak lungpi cu.
48 Phuba i laksaktu le
Ka hnuaiih miphunpawl duaitertu cu Pathian a si.
49 Amah in ka ralpawl lak ihsin i runsuak.
Nang khal in keimah dokalhih thotupawl tlunah i khaisâng,
Thahrumsuahpa lak ihsin i runsuak.
50 Curuangah Maw Jehovah, miphunpawl lakah na hnenah lungawi thu ka lo sim ding,
Cule na hmin thangṭhatnak hla ka sak ding.
51 Anih cu a siangpahrang hnenah runsuahnak dawlsâng a si ih,
A hriak thih mi parah,
David le a cithlahpawl parah kumkhuain a zahngainak a langter a si,»

22:41^a hngawngpawl: Siangpahrang in a neh mi siangpahrang cu a băwkter ding ih a hngawng a pál.

tiah a ti.

David-ih Netabik Ṭawngkampawl

1 Hipawl hi David-ih ṭawngkam netabik an si.

Jessi fapa David,
Sang zetih khaisan milai, Jakob Pathian ih hriak thih,
Israel-ih hla mawi phuahtu cun hitin a sim,
2 «Jehovah Thlarau cu keimah hmangin a ṭawng ih,
A kamsuakthu cu ka lei ah a um.
3 Israel Pathian cun a sim,
Israel-ih lungpi cun ka hnenah,
‹Milai uktu cu dik tengteng seh,
Pathian ṭihzahnakih uktu cu.
4 Cule anih cu ni a suah tikih khawdur um lo, zing khawvâng vek a si ding,
Ruah sur hnuih nikhaw thiang ih leilung ih hrampi no cerh vek a si ding,› tiah a ti.
5 «Ka sungkua cu Pathian zawngah um lo khal hai sehla,
Amah in kumkhaw thukham cu ka hnenah a tuah thotho,
Ziangkim rem thlipthlep le hngetkhoh zetin.
Ziangahtile himi hi ka runsuahnak zate le ka duhhiar mi zate a si,
Anih in cumi cu a karhter lo ding maw?
6 Asinan mihlothlaupawl cu an zaten hlăwnhloh mi hling vek an si ding,
Ziangruangahtile annih cu kut ih lâk theih an si lo.
7 Asinan anmah daitupa cun
Thir le fei ngul in a thuam aw tengteng ding,
Cule annih cu anmai hmun ah meisa ih urkăng thluh an si ding,» tiah a ti.

David-ih Micakpawl

8 Hipawl hi David-ih neih mi micakpawlih hminpawl cu an si: Takhmon-mi Josheb-Basshebeth cu ralkap hotupawl lakih hotu lubik a si. Amah cu ṭum khat ah mi 800 a thah ruangah Ezni-mi Adino tiah an ko. 9 Cule amah sangtu cu Ahoh-mi Dodo fapa Eleazar a si. Cu pa cu ral do dingih cutawk ih tawngkhawmaw Filisṭia-mipawl zuamtaitu, Israel mipapawl an tlanhloh thluh laiih David hnenih ralkap miralṭha pathum lakih pakhat kha a si. 10 Anih cun tho tahratin a kut a kham hlanlo, a kut ralnâm parih erhaw tiangin Filisṭia-mipawl cu a sat hai. Cuih ni ah Jehovah in nehnak maksak a thlengter, cule mipi cu a dungah rallakthil la dingin an kirsal. 11 Cule cumi sangtu cu Harar-mi Agee fapa Shammah a si. Bete cinnak hmun ah Filisṭia-mipawl cu ralkap burpi pakhat ah an fĭnkhawmaw. Cule mipi cun Filisṭia-mipawl an tlansiatsan. 12 Asinan anih cu ló laifangah a um, ṭan a la ih, Filisṭia-mipawl cu a that hai. Cule Jehovah in nehnak maksak a pe.

Bethlehem Tidai Ngainak

13 Cun ralbawibikbik 30 lakih pathum cu fâng ah cān ah an suk ih, David hnenah Adullam pûk ah an feh. Cule Filisṭia-mipawlih ralkap burpi cu Refaim Phaikuam ah ṭanhmun an khuar. 14 David cu ralhruangkulh sungah a um ih, Filisṭia ṭanhmun kiltu ralkappawl cu Bethlehem ah an um. 15 Cule David cun ngai kuahko zetin, «Bethlehem kăwtka kiangih tikhur sung ihta tidai in ding zo tal in simaw i pe sehla maw!» tiah a ti. 16 Cule micak pathum pawl cun Filisṭia-mipawlih ṭanhmun khuarnak an pahtlăng ih, kăwtka kiangih Bethlehem tikhur ihta tidai cu an va khai, David hnenah an keng ih an pe. Sikhalsehla anih cun a in duh loih, Jehovah hrangah a thlebung ṭheh sawn. 17 Cule anih in, «Maw Jehovah, himi tuah ding cu ka hnen ihsin hla seh! Himi cu an nunnak ui lo ih fehsuaktupawlih thisen a si lo maw?» tiah a ti. Curuangah a in duh lo. Hi thilpawl cu micak pathum pawl ih tuah mi a si.

18 Zeruiah fapa Joab-ih unaupa Abishai cu a dang pathum pawl lakah lubik a si. Anih in mi 300 pawl dokalhin a fei a hawi ih, a that hai, cule an pathum lakah a hmin a thang bik. 19 Amah cu mi pathum pawl lakah cawimawibik mi a si lo maw? Curuangah amah cu an hotu ah a cang. Asinan a hmaisabik mi pathum a tluk hrih lo.

20 Cule Kabzeel ihsi micak fapa Jehoiada fapa Benaiah in thil tampi a rak tuah. Cu pa cun kiosa bang Moab miralṭha pahnih a that. A rung suk ih, vur tlak ni ah khur sungah kiosa a that fawn. 21 Cule Izip-mi, mituak zet pakhat khal Benaiah cun a that. Cuih Izippa cun a kut ah feipi a keng, asinan Benaiah in cu pa cu fungfek thawn a run pan ih, Izip paih kut ihta feipi cu a lawn, cule a feipi cun a that. 22 Hi thilpawl cu Jehoiada fapa Benaiah in a tuah ih, micak pathum pawl lakah a hmin a thang bik. 23 Amah cu khaih mi 30 pawl hnakih upat mi a si, asinan a hmaisabik mi pathum pawl a tluk cuang lo. Cule David in cu pa cu amah kiltu dingah a ret.

24 Joab-ih unaupa Asahel cu khaih mi 30 pawl lakih pakhat a si ve, Bethlehem khawmi Dodo fapa Elhanan, 25 Harod-mi Shammah le Harod-mi Elika, 26 Palti-mi Helez, Tekoa-mi Ikkesh-ih fapa Ira, 27 Anathoth-mi Abiezer, Hushath-mi Mebunnai, 28 Ahoh-mi Zalmon, Netofath-mi Maharai, 29 Netofath-mi Baanah-ih fapa Heleb, Benjamin tefa Gibeah khawmi Ribai-ih fapa Ittai, 30 Pirathon-mi Benaiah, Gaash tivate ih um Hiddai, 31 Arbath-mi Abi-Albon, Barhum-mi Azmaveth, 32 Shaalbon-mi Jashen fapapawl lakih Eliahba, Jonathan, 33 Harar-mi Shammah, Harar-mi Sharar-ih fapa Ahiam, 34 Maakath-mi Ahasbai-ih fapa Elifelet, Gilon-mi Ahithofel-ih fapa Eliam, 35 Karmel-mi Hezrai, Arbi-mi Paarai, 36 Zobah khawmi Nathan fapa Igal, Gad-mi Bani, 37 Ammon-mi Zelek, Beeroth-mi Naharai, anih cu Zeruiah fapa Joab-ih ralthuam kengtu a si, 38 Ithri-mi Ira, Ithri-mi Gareb le, 39 Heth-mi Uriah pawl tla an si, an zaten 37 an si.

David-ih Mipum Siarnak

1 Jehovah thinhengnak cu Israel parah a thosal, cule anmah dokalhin, «Feh uhla, Israel le Judah mipum siar uh,» titer dingin anih in David a căwktho.

2 Cun siangpahrang in a hnenih um ralkappawl hotu lubik Joab hnenah, «Israel hnám hmuahhmuah lakah Dân ihsin Beersheba tiang hrawhsuak awla, mipum ziang zat an si ti ka theih theinak dingah mipum siar thluh aw,» tiah a ti.

3 Cule Joab in siangpahrang hnenah, «Atu ah Jehovah na Pathian in mipi cu cutawk ih um mi hnakih alet 100 in bêt sehla, ka bawi siangpahrang mit in hmu seh. Asinan ka bawi siangpahrang in ziangruangah hi thil hi a duh?» tiah a ti. 4 Sihmansehla siangpahrang thu cun Joab le ralkap hotupawl cu a neh. Curuangah Joab le ralkap hotupawl cu Israel-mipawl siar dingin siangpahrang hnen ihsin an fehsuak.

5 Cule Jordan ral an kai ih, Gad kuam laifang vawrh lamih khaw um Aroer ah Jazer tiangin ṭanhmun an khuar. 6 Cun Gilead ram le Tahtim Hodshi ram an thleng. Dân Jaan an thleng ih, Sidon lamah an feh. 7 Cule Ṭaiar khua hauhruang an thleng ih, Hiv-mipawl le Kanaan-mipawlih khua zaten an pál thluh. Cun Judah ram Negev lamah Beersheba tiang an feh. 8 Cuticun ram pumpi an fansuah thluh hnu, thla kua le ni kul cemnakah Jerusalem an thleng. 9 Cun Joab in siangpahrang hnenah mipi mipum zât cu a pe. Cule Israel ram ah miralṭha, ralnâm kai thei hlirah mipa ting riat an um ih, Judah mipa ting nga an um.

David Sualphuannak

10 Cule mipi a siar hnuah David cu a thin a nuam lo. Cun David in Jehovah hnenah, «Ka thil ti mi ah nasazetin ka rak sual a si, sikhalsehla atu ah Maw Jehovah, na siahhlawhih mawhsualnak hi hlăwnhlo dingin ka lo dil, ziangahtile atthlak zetin thil ka rak tuah a si,» tiah a ti.

11 Cun zingpitih David a thawh tikah, Jehovah kamsuakthu cu profet Gad, David-ih ^ahmutu hnenah, 12 «Feh awla David hnenah, ‹Jehovah in hitin a ti, «Thil pathum ka lo pe, na parih ka tuah dingah cu mipawl lakah nangmai hrangah pakhat hril aw,» a ti,› tiin,» a thleng. 13 Cule Gad cu David hnenah a feh ih, a sim, cule Gad in a hnenah, «Na ram sungah kum sarih sung mangṭam na parih thlen maw, na ralpawl hmaiih an lo dawi rero cingih thla thum sung tlan maw, na ram sungih ni thum sung nathrisia thlen na duh? I thlahtu hnenah ziang sannak so ka simkirsal ding, atu ah ruat awla i sim aw,» tiah a ti.

24:11^a hmutu: Profet tinak a si.

14 Cule David in Gad hnenah, «Ka vansannak hi a nasatuk. Jehovah kut ah kan tlu mai pei, ziangahtile a zahngainak cu a nasa a si, asinan minung kut ah cun i tluter hram hlah aw,» tiah a ti.

Israel hnenih Nathrisia Thlahnak

15 Cun Jehovah in Israel parah zing ihsin khiah mi cān tiang nathrisia a thlah. Dân ihsin Beersheba tiang mipa 70000 an thi.

16 Cule vancungmi in tisiat dingin Jerusalem tlunih a kut a hawi tikah, Jehovah in thil ṭhalo tuah a tum mi cu a lamlet ih, mi tisiattu vancungmi hnenah cun, «A tawk zo, na kut sūp aw,» tiah a ti. Cule Jehovah-ih vancungmi cu Jebus-mi, Araunah-ih hruihhmun kiangah a um.

17 Cun David in minungpawl thattu vancungmi a hmuh tikah Jehovah hnenah a ṭawng ih, «Ngai hnik, ka rak sual a si, sualrál zetin thil ka tuah a si, asinan hi tuupawl hin ziang an tuah? Ka lo dil a si, na kut cun keimah i dokalh seh, ka paih sungkua dokalh seh,» tiah a ti.

David in Biakṭheng a Dâwl

18 Cule cuih ni ah David hnenah Gad a ra ih, a hnenah, «Hung so awla, Jebus-mi Araunah-ih hruihhmun ah Jehovah hrangah biakṭheng dâwl aw,» tiah a ti. 19 Cun David cu Jehovah in thu a pek bangtukin, Gad-ih ṭawngkam vekin a hung so. 20 Cun Araunah cu khua a tang ih, siangpahrang le a siahhlawhpawl a hnen lamih ra cu a hmu. Cutikah Araunah cu a fehsuak ih siangpahrang hmaiah leisin bihin a kûn.

21 Cun Araunah in, «Ziangruangah ka bawi siangpahrang cu a siahhlawh hnenih a rat?» tiah a ti.

Cule David in, «Mipi lak ihsin pulhnat lakkirsal a si theinak dingah Jehovah hrangih biakṭheng dawlnak dingah na hruihhmun lei dingin ka ra,» tiah a ti.

22 Cule Araunah in David hnenah, «Ka bawi siangpahrang in ṭha a ti mi cu la sehla hlan seh. Zoh hnik, hi tawkah Meiur Thilhlăn hrangah câwcangpawl tla an um, cule tihthing dingah hruih hmanruapawl le câwcangpawlih hngawngkolpawl tla an um cia. 23 Maw siangpahrang, hi thil hmuahhmuah hi Araunah in siangpahrang a pe thluh a si,» tiah a ti. Cule Araunah in siangpahrang hnenah, «Na Pathian Jehovah in lo cohlang hram seh,» tiah a ti.

24 Cutikah siangpahrang in Araunah hnenah, «Si lo e, man neiin ka lo lei hrimhrim ding, man nei lo mi thil in Jehovah ka Pathian hnenah Meiur Thilhlănpawl ka hlan lo ding,» tiah a ti. Cule David in hruihhmun le câwcangpawl cu ngun tangka shekel 50 in a lei. 25 Cule cu tawkah David in Jehovah hrangah biakṭheng a dâwl ih, Meiur Thilhlănpawl le Remnak Thilhlănpawl a hlan. Cule Jehovah in an ram hrangih dilnakpawl cu a ngai ih, pulhnat cu Israel lak ihsin a lakirsal.