About Bible Thianghlim | ©

BibleThianghlim – KOLOSE

Old Testament

Genesis Exodus Leviticus Numbers Deuteronomy Joshua Judges Ruth 1 Samuel 2 Samuel 1 Kings 2 Kings 1 Chronicles 2 Chronicles Ezra Nehemiah Esther Job Psalm Proverbs Ecclesiastes Song of Solomon Isaiah Jeremiah Lamentations Ezekiel Daniel Hosea Joel Amos Obadiah Jonah Micah Nahum Habakkuk Zephaniah Haggai Zechariah Malachi

New Testament

Matthew Mark Luke John Acts Romans 1 Corinthians 2 Corinthians Galatians Ephesians Philippians Colossians 1 Thessalonians 2 Thessalonians 1 Timothy 2 Timothy Titus Philemon Hebrews James 1 Peter 2 Peter 1 John 2 John 3 John Jude Revelation

KOLOSE

1234

• A ngantu: Paul
• A siartu: Kolosa khua ih zumtupawl
• Ngan kum: A.D. 60

Kolose khua hi Asia Minor, Efesa ihsin nisuahnak lam peng 100 hrawng hlatnak ah a um ih, Hierapolis (4:13) le Laodisia (2:1; 4:16) thawi naihaw a si. Kolose khua hi sumdawnnak zinpi kapih um a si bangin leitlun hmun kip ih um mipawl a hip zet.

Kolose le Loadisia khawpipawl ah Paul a thleng dah lo nân, Bawipa in cuih khawpipawl ah kawhhran a rak dĭn (2:1). Kolose-mipawl in sumtuahin Efesa khua an feh tikah, Paul-ih rawngbawlnak ihsin thuthangṭha rak cohlang tahratin (Apo 19:10), an khua ih an kir tikah kawhhran an va dĭn a si men thei. Epafras (1:7-8; 4:12-13), Timothy (1:1) le Arkippas (4:17) pawl in cu tawkah cān dangdangah rawng an rak bawl. Arkippas hi Kolose khua ih Filemon inn ih a khawmaw mi kawhhran pastor si in a lang (Filemon Thuhmaihruai siar aw).

Paul thawng a tlak laiah (4:3, 10, 18) Epafras in Kolose kawhhran thuhla a hnenah a sim (1:8). Zumtupawl cu an ṭhang vivo, asinan zirhnak diklopawl in buainak a rak thlĕn. Cuih zirhnak diklopawl cun biaksakhua dān le dūn (2:16), vancungmipawl biaknak (2:18), thu theihawkternak (2:18-19) le taksa retheihawkter (2:20-23) lam an uar. Khrih hi an nunnak ih a thupibik a sizia theihter dingin A.D. 60 hrawngah an hnenah hi cakuat hi Paul in a rak ngan. Hi cakuat hi Ṭaikikas le Onesimas a hei kenter (4:7-9).

Hih cakuatih nun zirhnak hi Efesa khua ih zumtupawl hnenih cakuat thawn an bangaw zet (A hleicein Kol 3-4). A thu rĕmdān hrimhrim khal an bangaw zet. Hi cabu hmaisa lam a hrek cu thurin lam a si ih, a netasawn cu thurin nunpinak lam thu a si. Kolose bung hmaisa pahnih cun ziang hmuahhmuah tlunah Khrih hi an cawisang. Zumtupawlih ni tin nun ah cumi cun ziangso umzia a neih ti bung neta pahnih ah kan hmu. Kolose cakuat hi Efesa cakuat thawn bangawknak tampi a nei nân, danglamnak khal a nei thotho. Efesa cakuat cun kawhhran hi Khrih-ih taksa a si thu a reluar ih, Kolose cakuat cun Khrih cu kawhhran Lu a si thu a reluar (1:18). Anih cu thihnak ihsin a thosal mi Bawipa a si ruangah amah hi ziangkim tlunih Lu a si taktak (1:18)!

Zumtu hrangah Khrih cu kan «nunnak» a si (3:4). Rundamnak hrangah amah kan cohlan hnuah, zumtu sinak vekin amah ah kan tlanglêng (2:6). A rak tuah mi le a sinak ruangah Khrih in kan nunnak ah hmun pawimawhbik a co a ṭul hrimhrim.

1

Cibaibûknak

1 Pathian duhzawngih Jesu Khrih-ih apostol Paul le kan unaupa Timothy cun,

2 Kolose khua ih um, Khrih ih mithiangpawl le mirinum unaupawl hnenah:

Pathian kan Pa le Bawi Jesu Khrih hnen ihsin zangfahnak le hnangamdaihnak cu nan hnenah um seh.

Lungawi Thu Simnak le Thlacamnak

3 Nan hrangah thlacam ringring in, Pathian le kan Bawipa Jesu Khrih-ih Pa hnenah lungawi thu kan sim ṭheu. 4 Khrih Jesu nan zumnak le mithiangpawl hmuahhmuah parih duhdawtnak nan neih mi kan theih ruangah le 5 van ih nan hrangih ret mi ruahsannak ruangah lungawi thu kan sim a si. Cuih ruahsannak cu thuthangṭha thutak kamsuakthu ah khan nan rak thei. 6 Cuih thuthangṭha cu nan rak ngaithlak le a takih Pathian zangfahnak nan rak theih ni thawkin, cuih thuthangṭha cu leitlun pumpi ih a thlen vekin, nan hnen khalah a thleng ve. Cule nanmah ih rah a suah bangtukin leitlun pumpi khalah rah a suah a si. 7 Cucu duhdawt mi kan siahhlawhpi, Epafras hnen khalih nan rak zir vekin, anih cu nan hrangah Khrih rawngbawltu mirinum a si. 8 Anih cu Thlarau hnen ihsin nan ngah mi nan duhdawtnak thu kan hnenih thăntu a si.

Khrih Cungnunnak

9 Himi ruangah nan thuhla kan theih ni thăwkin thlarau lam fimnak hmuahhmuah le thlarau lam theihthiamnak hmuahhmuah thawn a duh zawng theihnak ih nan khah theinak dingah, kannih khal nan hrangih thlacam kan bâng lo. 10 Hnaṭuan ṭha tinkim ah rah nan suah ih, Pathian nan theihnak cu a ṭhan ih ziangkim ah Bawipa lunghmuitlak ih nan feh theinak ding hrangah thla ka cam ṭheu. 11 Ziang vek cān khalih thinsau le ziang vek cān khalih aipuang zetih mi dawrhtheinak nan neih theinak dingah, a huham ropi zulhin thiltitheinak hmuahhmuah thawn a lo cakter a si. 12 Tleu ah mithiangpawl roconak ih ṭawmpi ve tlak ih in tuahtu, Pa hnenah lungawi thu kan sim. 13 Anih cun thim thuneihnak sung ihsin in runsuak ih, a duhdawt mi a Fapaih uknak sungah in ṭhawn zo. 14 Fapa ah cun a thisen zarah sualpawl ngaidamnak, tlennak kan nei.

Khrih Lubik a Sinak

15 Anih cu hmuh thei lo Pathian băngpi, sersiam mi hmuahhmuah lakah fatir a si. 16 Ziangahtile amah in thil ziangkim: van ih a um mipawl, leilung parih a um mipawl, hmuhtheihpawl le hmuhtheihlopawl, laltokhampawl, lalnakpawl, uktupawl le thuneitupawl cu a sersiam. Thil hmuahhmuah hi amai hrangah amah in a sersiam. 17 Cule anih cu thil hmuahhmuah hlanah a um ih, thil hmuahhmuah hi amah in hmunkhatah a kaikhawm thluh. 18 Cun amah cu kawhhran a si mi taksaruangpi-ih lu a si. Thil ziangkim ah cungnungbik a si theinak dingah, anih cu búlhrampi, mithi lak ihsin fatir a si.

19–20 Ziangahtile famkimnak hmuahhmuah amai sungih a cēn ding le a khraws thisen zarah amah hmangih remnak a rak tuahnak in, leitlun ih thilpawl siseh, van ih thilpawl siseh, thil ziangkim amah thawi amah hmangih remawkter hi paih lunghmui zawng a si.

21 Cun nannih cu thil sualrál tuahnak ruangah, Pathian hnen ihsin ṭhen mi le nan lungthin ah a ral nan rak si dah, 22 asinan atu ah cun thianghlim le sawihnăwm kâi lo le a mithmuhah mawhthluk ding um loih lo lăngter dingah thihnak thawngin a taksaruangpum ah amah thawn a lo remawter zo a si. 23 Hram hnget bŭn le fek zetih zumnak ih nan umpeh vivo ih, hna ih nan rak theih mi thuthangṭha ruahsannak ihsin nan ṭhawnhlo lo asile, a mithmuhah a lo langter ding a si. Cumi cu van hnuaiih sersiam tinkim hnenih an phuan mi kha a si ih, kei, Paul hi cuih thuthangṭha rawngbawltu ah ka cang.

Kawhhran hrangih Paul Hnaṭuan

24 Atu ah nan hrangih ka tuarnakpawl ah lungawiaipuangin ka um, cule Khrih-ih zăwnzaihnak ṭulsăm mipawl cu amai taksaruangpum a si mi kawhhran ruangah ka taksa ah ka silhkhat rero lai a si. 25 Pathian kamsuakthu tlamtlingter dingah, Pathian in nan hrangah ṭuanvo ka hnenih i pek bangtukin, kei cu kawhhran rawngbawltu ih tuah ka si. 26 Thuthup, kum tampi le san tampi a rak thupaw mi cu atu ah a mithiangpawl hnenah lăngter a si. 27 Cuih thuthup ropiih lenzia kha Zentelpawl lakah Pathian in mithianghlimpawl hnenah lăngter a duh, cumi cu nan sungih um mi Khrih, ropitnak ih ruahsannak kha a si.

28 Mi kip Khrih Jesu ah famkim zetih kan lăngter theinak dingah, fimnak hmuahhmuah thawn mi kip nunsimin le zirhin amai thu kan phuang. 29 Cumi hrangah nasazetin hna ka ṭuan, Khrih-ih hnaṭuannak ka sungih cak zetih a ṭuandān zulhin nasazetin ka ṭang a si.

2

1 Ziangahtile nanmah le Laodisia khua ih umpawl le taksa ih ka hmel hmu lo tu hmuahhmuah hrangah, ziangtluk maksak doawknak ka táwng ti nan theih ka duh. 2 Cuticun an thinlung cu thazang pek mi siin, duhdawtnak ah pehzăwmawin, cule theihthiamnak hnget famkimih lennak hmuahhmuah an nei ding ih, Pa le Khrih-ih ta a si mi Pathian thuthup an thei famkim ding. 3 Khrih ah fimnak le theihnak hlawnthil hmuahhmuah thuhin a um.

4 Cun zohman in ṭawngkam thiamnak ih an lo bumlonak dingah, hihi ka lo sim a si. 5 Ziangahtile taksa in nan hnenah um lo hman ningla, thlarau in nan hnenah ka um a si, mawitei nan um le Khrih ih nan zumnak a hngehzia ka theih tikah, ka ai a puang zet.

Khrih Nun Ṭawmpinak

6 Curuangah Bawipa Khrih Jesu nan rak cohlan zo bangin, amah ah cun feh uh. 7 Amah ah hram bŭn uhla, sakhnget aw uh, cule zumnak ah dĭnhnget aw uh, an lo zirh zo bangin lungawi thu simnak thawn cumi ah luangliam uh.

8 Ralring uh, culoasile mi in Khrih zirhnak vek si lo, milai fimnak le bumawknak thulolak menmen, minung dān le dūn zulh le leitlun thuhramthawh zirhawknak zulhin, rallâk in an lo la pang ding.

9 Ziangahtile Pathian famkimnak hmuahhmuah cu Khrih ah taksa in a cêng a si. 10 Cun nannih cu amah ah nan famkim, anih cu uktu hmuahhmuah le thuneitu hmuahhmuah ih lu a si. 11 Khrih hmangih serh zim tannak thawngin taksaruangpum ih tisa sualpawl hlihnak in, nannih khal amah ah kut tel loih serh zim tan nan si. 12 Baptisma ah amai zawngah phumih umin, mithi lak ihsin amah kaithotu Pathian-ih hnaṭuan zumnak ruangah amai zawngah kaihthawhin nan um.

13 Cule nan mawhsualnakpawl le taksa ih serh zim tan lo nan sinak ih thi nan rak si laiah khan, Khrih zawngah hmunkhatah a lo nungter ih, nan mawhsualnak hmuahhmuah a lo ngaidam a si. 14 Kanmah dokalhtu le kan ral a si ṭheu mi, kut ih ngan mi thupekpawl cu a phiathlo. Cule cumi cu lain, khraws ah a khengbĕt. 15 Cule uktupawl le thuneitupawl cu dirthlain khraws hmangin cupawl cu a neh ih, langsar zetin a mualphoter hai.

16 Curuangah ei thu ah simaw, in thu ah simaw, ni serh thu ah simaw, thla thar thu ah simaw, sabbath-pawl thu ah simaw zohman in thu lo ṭhen hlah hai seh. 17 Cupawl cu thil ra thleng ding mipawlih thlâm an si, a taktak sawn cu Khrih-ih ta a si. 18 Hnuaidawrawkternak le vancungmi biak duhtu in nan lawmman hloter dingin lo bum hlah seh. Cuvek mi cu a hmuh lo mi thilpawl ah a hrawlhaw ih, a tisa lungthin pu-in zianghmanlo in a duhaw. 19 Cuvek mi cun lu cu a pawkhnget lo, taksaruangpum hmuahhmuah ṭhannak cu Lu ihsin a si. Pathian ih a ṭhanterdān vekin taksa cu a ṭhang. Hlikhlăwkpawl le thahripawl in taksaruangpi an câwmdâwl ih hmunkhatah an kaikhawm.

Ralrin Peknak

20 Curuangah hi leitlun thuhramthawh zirhawknakpawl cu, Khrih zawngah nan thihsăn zo. Cuvek mi si na cingin, ziangahso leitlun mipawl vek menih leitlun thupekpawl hnuaiih nan tlukluh? 21 «Tham hlah,» «Tep hlah,» «Kai hlah,» tipawl hi! 22 Cupawl hmuahhmuah cu hman phahih cemrál men ding thil an si, ziangahtile cupawl cu minung thupekpawl le zirhnakpawl parih ṭhumaw mi an si. 23 Hih thilpawl cu fim hmel pu vekin an lang taktak ih, cumi ah phuahcawp biaknaksakhua, hnuaidawrawkternak le mai taksaruangpum hremawknak pawl an tel, asinan tisa câkhiarnak neh dingin huham an nei lo.

3

Nundān Thianghlim

1 Curuangah Khrih thawi kaihthawh ih nan um zo a si ahcun, Pathian vawrh lam Khrih tonak ih um, tlun lam thilpawl kha hawl uh. 2 Leitlun thilpawl parah si loin, tlun lam thilpawl parah nan lungthin ret uh. 3 Ziangahtile nannih cu nan thi zo ih, nan nunnak cu Khrih hnenah Pathian ah thuhin a um. 4 Kan nunnak a si mi, Khrih a rung lăng tikah nannih khal amai hnenah ropi in nan lang ding.

5 Curuangah nan taksa ih leitlun thil nunau-mipa sualnak, bawrhhlawhnak, sūp theih lo câkhiarnak, câkhiarnak ṭha lo, milem biak a si mi duhhamnakpawl cu that uh. 6 Cuih thilpawl ruangah Pathian thinlingnak cu thulunglo fātepawl parah a thleng a si. 7 Cuih thilpawl ih nan um laiah cun, nannih khal cuih thilpawl ah nan rak nung dah.

8 Asinan atu ah cun hi thil hmuahhmuah: thinhengnak, thinlingnak, lungput siava, mi thangsiatnak, ṭawng bawrhhlawh nan kâ ihsi suak mipawl cu hlîtthla uh. 9 Minung hlun cu a thil tipawl thawn nan hlihthlak zo ruangah, pakhat le pakhat bum aw nawn hlah uh. 10 Cule minung thar nan hruh zo, cuih minung thar cu amah sersiamtu băngnak kengin, theihnak lamah tuah tharin a um. 11 Cumi ah cun Grikmi siseh, Jew-mi siseh, serh zim tan mi siseh, serh zim tan lo mi siseh, barbaros-mi siseh, Sikithiami siseh, sál siseh, miluat ti siseh a um lo. Cuhnakin Khrih cu ziangkim si sawnin ziangkim ah a um a si.

12 Curuangah nannih cu Pathian hril mi, thianghlim le duhdawt mi vekin, lainatnak nasatak, ngilneihnak, hnuaidawrnak, nunnemnak, mi dawrhtheinak pawl tla hruh uh. 13 Pakhat le pakhat zāwi awtăwn uhla, pakhat le pakhat ngaithiam awtăwn uh. Mi pakhat khat in mi dang hnenah pawntam ding a neih a si khalle, Khrih ih a lo ngaidam bangin ngaidam aw ve uh. 14 Cule hi thil hmuahhmuah tlunah duhdawtnak hruk uh, cucu famkim zetih a lo ṭawntu a si.

15 Cun Pathian hnangamdaihnak in nan thinlung lo uk seh, cumi hrangah taksaruangpum pakhat ih kawh nan si; cule lungawihna khal thiam uh. 16 Khrih kamsuakthu cu fimnak hmuahhmuah thawn nanmah ah khatliamin um seh, pakhat le pakhat Sam hlapawl, thangṭhatnak hlapawl, thlarau lam hlapawl in zirh aw uhla, nun khihhmuh aw uh. Bawipa hnenah nan thinlung sungin zangfahnak thawn hla sak uh. 17 Cule nan tuah mi pauhpauh cu ṭawngkam in simaw, tuahnak in simaw, Bawi Jesu hmin in tuah uhla, Pathian le Pa hnenah amai zarah lungawi thu sim uh.

Khristian Innsang

18 Nupipawl, Bawipa ah thil āwm a si vekin, nanmai pasal hnenah tlulut uh.

19 Pasalpawl, nan nupi duhdaw uhla, an parah siakhâ hlah uh.

20 Falepawl, Bawipaih lunghmui zawng a si ruangah, ziangkim ah nan nu le nan paih thulung uh.

21 Palepawl, nan fātepawl thinhengter hlah uh, culole an bei a dawng pang ding.

22 Sálpawl, thil ziangkim ah taksa lamih nan bawipawlih thulung uh, an lo zoh lai lawngah an lunghmuiter tum loin, thinlung takin le Pathian ṭih sawnin an thu lung uh. 23 Cule nan tuah mi pauhpauh, milai hnenih tuah vekin si loin, Bawipa hnenih tuah vekin, nan thinlung zaten tuah uh. 24 Bawipa hnen ihta ro cu lawmman ah nan co ding ti nan theih ruangah, cuvekin tuah uh; ziangahtile Bawi Khrih nan rian a si. 25 Asinan thil a tuahsualtu cun cuih a thil tuahsual mi man a ngah ding, thleidănawknak a um lo.

4

1 Bawiletla, nannih khal in van ah Bawi nan nei ve ti theiin, nan sálpawl hnenah a dik mi le a bangrān mi pe uh.

Thapeknak

2 Catbang loin nasazetin thlacam uhla, lungawi thu sim phahin ngaihven uh. 3 Khrih thuthup sim dingin Pathian in kamsuakthu hrangih sângka in ăwnsaknak dingah, kan hrang khalah thla in camsak uh, cuih thuthup ruangah cikcin ih ṭawn ka si. 4 Cuih thuthup cu ka sim ding vekih ka simsuak theinak dingah, thlacam uh. 5 Leng lam mipawl hnenah fim zetin um uhla, a ṭha thei bikin nan cān hmang uh. 6 Mi tin hnenah ziangtiih săwn ding a si ti nan theih theinak dingah, ci thawn thawterin nan ṭawngkam cu zangfahnak tel mi si ringring seh.

Cibaibûknak Netabik

7 Ka thuhla hmuahhmuah cu Ṭaikikas in a lo sim ding, amah cu Bawipa ah duhdawt mi unaupa, rawngbawltu rinum le siahhlawhpi a si. 8 Himi tumtahnak rori hrangah nan hnenah amah cu ka rak thlah a si, cutin nan thuhla a thei thei ding ih, nan thinlung a lo thlangăm thei ding. 9 Nan lakih mi pakhat, mirinum le duhdawt mi unaupa Onesimas thawn ka rak thlah a si. Annih in hitawk ih thil cang mi hmuahhmuah an lo sim ding.

10 Ka thawngtlakpi Aristarkas khal in cibai a lo bûk, cun Barnabas-ih ^aunaupa Mark khal in cibai a lo bûk. Amai thuhla ah thupekpawl nan rak dăwn zo kha! Nan hnenih a rat asile, rak cohlang uh. 11 Cule Jasṭas an ti mi Jesu khal in cibai a lo bûk. Annihpawl hi serh zim tan mi an si. Annihpawl lawng hi Jew-mi Pathian uknak hrangih ka hnaṭuanpi umsŭn le ka hna in ngamtertu an si.

4:10^a unaupa: A pa asilole a nuih unau fapa.

12 Epafras, nan lakih mi, Khrih-ih ṭemṭawn sál hin cibai a lo bûk, Pathian duh zawng tinkim ih nan khah theinak dingah le famkimih nan din theinak dingah, nan hrangah ṭhahnemngai zetin thlacamnak thawn nasazetin ṭan a la. 13 Ziangahtile anih cu nanmai hrangah le Laodisia khua ih umpawl le Hierapolis khua ih umpawl hrangah a tha a tho zet ti theihpitu ka si. 14 Duhdawt mi sibawi Luke le Demas in cibai an lo bûk. 15 Laodisia khua ih unaupawl, Nimfas le cu paih inn ih kawhhran kha cibai in bûksak uh.

16 Cun hih cakuat hi nan lakih siar a si hnuah, Laodisia kawhhran khalah siarter ve uh. Cuvek thothoin nannih khal in Laodisia khua ih ka cakuat mi kha rak siar ve uh.

17 Cule Arkippas hnenah, «Bawipa ah na cohlan mi rawngbawlnak hlĕnsuak dingin fimkhur aw,» tiah sim uh.

18 Hi cibaibûknak hi keimah Paul in ka kut rori ih ka ngan mi a si. Cikcin ih ṭawn ka si hi máng ringring uh. Zangfahnak nan hnenah um seh. Amen.